4. ஸபதா³னசாரிகங்க³கதா²வண்ணனா

27. இமினாதி ஸபதா³னசாரிகேன. காலதரந்தி காலஸ்ஸேவ. அபா²ஸுகட்டா²னந்தி ஸபரிஸ்ஸயாதி³வஸேன து³ப்பவேஸனட்டா²னம். புரதோதி வீதி²யம் க³ச்ச²ந்தஸ்ஸ புரதோ க⁴ரம் அபவிட்ட²ஸ்ஸேவ. பத்தவிஸ்ஸட்ட²ட்டா²னந்தி பேஸகாரவீதி²யம் பேஸகாரபா⁴வம் நிம்மினித்வா டி²தஸ்ஸ ஸக்கஸ்ஸ க⁴ரத்³வாரே பத்தவிஸ்ஸட்ட²ட்டா²னம். உக்கட்ட²பிண்ட³பாதிகோ தம் தி³வஸம் ந பி⁴க்க²ம் ஆக³மயமானோ நிஸீத³தி, தஸ்மா தம் அனுலோமேதி. கத்த²சிபி குலே நிப³த்³த⁴ம் உபஸங்கமனாபா⁴வதோ பரிசயாபா⁴வேன குலேஸு நிச்சனவகதா. ஸப்³ப³த்த² அலக்³க³மானஸதாய ச ஸோம்மபா⁴வேன ச சந்தூ³பமதா. குலேஸு பரிக்³க³ஹசித்தாபா⁴வேன தத்த² மச்சே²ரப்பஹானம். ஹிதேஸிதாய விபா⁴கா³பா⁴வதோ ஸமானுகம்பிதா. குலானம் ஸங்க³ண்ஹனஸம்ஸட்ட²தாத³யோ குலூபகாதீ³னவா. அவ்ஹானானபி⁴னந்த³னாதி நிமந்தனவஸேன அவ்ஹானஸ்ஸ அஸம்படிச்ச²னா. அபி⁴ஹாரேனாதி பி⁴க்கா²பி⁴ஹாரேன. ஸேரிசாரந்தி யதா²ருசி விசரணம்.

இதி ஸபதா³னசாரிகங்க³கதா²வண்ணனா.