2. தேசீவரிகங்க³கதா²வண்ணனா

25. சதுத்த²கசீவரந்தி நிவாஸனபாருபனயோக்³யம் சதுத்த²கசீவரந்தி அதி⁴ப்பாயோ, அம்ஸகாஸாவஸ்ஸ அப்படிக்கி²பிதப்³ப³தோ. அஞ்ஞதரவசனேனாதி ஏத்த² யம் வத்தப்³ப³ம், தம் ஹேட்டா² வுத்தனயமேவ. யாவ ந ஸக்கோதி, யாவ ந லப⁴தி, யாவ ந ஸம்பஜ்ஜதீதி பச்சேகம் யாவ-ஸத்³தோ³ ஸம்ப³ந்தி⁴தப்³போ³. ந ஸம்பஜ்ஜதீதி ந ஸிஜ்ஜ²தி. நிக்கி²த்தபச்சயா தோ³ஸோ நத்தீ²தி நிசயஸன்னிதி⁴து⁴தங்க³ஸம்கிலேஸதோ³ஸோ நத்தி². ஆஸன்னேதி சீவரஸ்ஸ ஆஸன்னே டா²னே. ரஜனக்க²ணே பரிபு⁴ஞ்ஜனகாஸாவம் ரஜனகாஸாவம். தத்ரட்ட²கபச்சத்த²ரணம் நாம அத்தனோ, பரஸ்ஸ வா ஸந்தகம் ஸேனாஸனே பச்சத்த²ரணவஸேன அதி⁴ட்டி²தம். ‘‘அம்ஸகாஸாவம் பரிக்கா²ரசோளம் ஹோதி, இதி பச்சத்த²ரணம், அம்ஸகாஸாவந்தி இமானி த்³வேபி அதிரேகசீவரட்டா²னே டி²தானிபி து⁴தங்க³பே⁴த³ம் ந கரோந்தீ’’தி அட்ட²கதா²யம் வுத்தந்தி வத³ந்தி. பரிஹரிதும் பன ந வட்டதீதி ரஜனகாலே ஏவ அனுஞ்ஞாதத்தா நிச்சபரிபோ⁴க³வஸேன ந வட்டதி தேசீவரிகஸ்ஸ. அம்ஸகாஸாவந்தி க²ந்தே⁴ ட²பேதப்³ப³காஸாவம். காயபரிஹாரிகேனாதி வாதாதபாதி³பரிஸ்ஸயதோ காயஸ்ஸ பரிஹரணமத்தேன. ஸமாதா³யேவாதி க³ஹேத்வா ஏவ. அப்பஸமாரம்ப⁴தாதி அப்பகிச்சதா. கப்பியே மத்தகாரிதாயாதி நிஸீத³னாதி³வஸேன, பரிக்கா²ரசோளவஸேன ச ப³ஹூஸு சீவரேஸு அனுஞ்ஞாதேஸுபி திசீவரமத்தே டி²தத்தா. ஸஹ பத்தசரணாயாதி ஸபத்தசரணோ. பக்கீ² ஸபக்க²கோ.

இதி தேசீவரிகங்க³கதா²வண்ணனா.