1. பம்ஸுகூலிகங்க³கதா²வண்ணனா

24. க³ஹபதிதா³னசீவரந்தி ஏத்த² தா³யகபா⁴வேன ஸமணாபி உக்கட்ட²ஸ்ஸ க³ஹபதிபக்க²ம்யேவ பவிட்டா²தி த³ட்ட²ப்³ப³ம். ‘‘பப்³ப³ஜிதோ க³ண்ஹிஸ்ஸதீ’’தி ட²பிதகம் ஸியா க³ஹபதிசீவரம், ந பன க³ஹபதிதா³னசீவரந்தி தாதி³ஸம் நிவத்தேதும் தா³னக்³க³ஹணம். அஞ்ஞதரேனாதி ஏத்த² ஸமாதா³னவசனேன தாவ ஸமாதி³ன்னம் ஹோது, படிக்கே²பவசனேன பன கத²ந்தி? அத்த²தோ ஆபன்னத்தா. யதா² ‘‘தே³வத³த்தோ தி³வா ந பு⁴ஞ்ஜதீ’’தி வுத்தே ‘‘ரத்தியம் பு⁴ஞ்ஜதீ’’தி அத்த²தோ ஆபன்னமேவ ஹோதி, தஸ்ஸ ஆஹாரேன வினா ஸரீரட்டி²தி நத்தீ²தி, ஏவமிதா⁴பி பி⁴க்கு²னோ க³ஹபதிதா³னசீவரே படிக்கி²த்தே தத³ஞ்ஞசீவரப்படிக்³க³ஹோ அத்த²தோ ஆபன்னோ ஏவ ஹோதி, சீவரேன வினா ஸாஸனே டி²தி நத்தீ²தி.

ஏவம் ஸமாதி³ன்னது⁴தங்கே³னாதிஆதி³விதா⁴னம் பம்ஸுகூலிகங்கே³ படிபஜ்ஜனவிதி⁴. ஸுஸானே லத்³த⁴ம் ஸோஸானிகம். தம் பன யஸ்மா தத்த² கேனசி ச²ட்³டி³தத்தா பதிதம் ஹோதி, தஸ்மா வுத்தம் ‘‘ஸுஸானே பதிதக’’ந்தி. ஏவம் பாபணிகம்பி த³ட்ட²ப்³ப³ம். தாலவேளிமக்³கோ³ நாம மஹாகா³மே ஏகா வீதி². அனுராத⁴புரேதி ச வத³ந்தி. ட³ட்³டோ⁴ பதே³ஸோ ஏதஸ்ஸாதி ட³ட்³ட⁴ப்பதே³ஸம், வத்த²ம். மக்³கே³ பதிதகம் ப³ஹுதி³வஸாதிக்கந்தம் க³ஹேதப்³ப³ந்தி வத³ந்தி. ‘‘த்³வத்திதி³வஸாதிக்கந்த’’ந்தி அபரே. தோ²கம் ரக்கி²த்வாதி கதிபயம் காலம் ஆக³மேத்வா. வாதாஹதம்பி ஸாமிகானம் ஸதிஸம்மோஸேன பதிதஸதி³ஸந்தி ‘‘ஸாமிகே அபஸ்ஸந்தேன க³ஹேதும் வட்டதீ’’தி வுத்தம். தஸ்மா தோ²கம் ஆக³மேத்வா க³ஹேதப்³ப³ம்.

‘‘ஸங்க⁴ஸ்ஸ தே³மா’’தி தி³ன்னம், சோளகபி⁴க்கா²வஸேன லத்³த⁴ஞ்ச லத்³த⁴காலதோ பட்டா²ய ‘‘ஸமணசீவரம் ஸியா நு கோ², நோ’’தி ஆஸங்கம் நிவத்தேதும் ‘‘ந தம் பம்ஸுகூல’’ந்தி வுத்தம். ந ஹி தம் தேவீஸதியா உப்பத்திட்டா²னேஸு கத்த²சி பரியாபன்னம். இதா³னி இமினாவ பஸங்கே³ன யம் பி⁴க்கு²த³த்தியே லக்க²ணபத்தம் பம்ஸுகூலம், தஸ்ஸ ச உக்கட்டா²னுக்கட்ட²விபா⁴க³ம் த³ஸ்ஸேதும் ‘‘பி⁴க்கு²த³த்தியேபீ’’திஆதி³ வுத்தம். தத்த² கா³ஹேத்வா வா தீ³யதீதி ஸங்க⁴ஸ்ஸ வா க³ணஸ்ஸ வா தே³ந்தேஹி யம் சீவரம் வஸ்ஸக்³கே³ன பாபேத்வா பி⁴க்கூ²னம் தீ³யதி. ஸேனாஸனசீவரந்தி ஸேனாஸனம் காரேத்வா ‘‘ஏதஸ்மிம் ஸேனாஸனே வஸந்தா பரிபு⁴ஞ்ஜந்தூ’’தி தி³ன்னசீவரம். ந தம் பம்ஸுகூலந்தி அபம்ஸுகூலபா⁴வோ புப்³பே³ வுத்தகாரணதோ, கா³ஹேத்வா தி³ன்னத்தா ச. தேனாஹ ‘‘நோ கா³ஹாபேத்வா தி³ன்னமேவ பம்ஸுகூல’’ந்தி. தத்ரபீதி யம் கா³ஹேத்வா ந தி³ன்னம் பி⁴க்கு²த³த்தியம், தத்ரபி யேன பி⁴க்கு²னா சீவரம் தீ³யதி, தஸ்ஸ லாபே⁴, தா³னே ச விஸும் விஸும் உப⁴யத்த² ஆத³ரகா³ரவானம் ஸப்³பா⁴வதோ, தத³பா⁴வதோ ச பி⁴க்கு²த³த்தியஸ்ஸ ஏகதோஸுத்³தி⁴ உப⁴தோஸுத்³தி⁴ அனுக்கட்ட²தா ஹோந்தீதி இமமத்த²ம் த³ஸ்ஸேதும் ‘‘யம் தா³யகேஹீ’’திஆதி³ வுத்தம், பாத³மூலே ட²பேத்வா தி³ன்னகம் ஸமணேனாதி அதி⁴ப்பாயோ. யஸ்ஸ கஸ்ஸசீதி உக்கட்டா²தீ³ஸு யஸ்ஸ கஸ்ஸசி. ருசியாதி ச²ந்தே³ன. க²ந்தியாதி நிஜ்ஜா²னக்க²ந்தியா.

நிஸ்ஸயானுரூபபடிபத்திஸப்³பா⁴வோதி உபஸம்பன்னஸமனந்தரம் ஆசரியேன வுத்தேஸு சதூஸு நிஸ்ஸயேஸு அத்தனா யதா²படிஞ்ஞாதது³தியனிஸ்ஸயானுரூபாய படிபத்தியா விஜ்ஜமானதா. ஆரக்க²து³க்கா²பா⁴வோதி சீவராரக்க²னது³க்க²ஸ்ஸ அபா⁴வோ பம்ஸுகூலசீவரஸ்ஸ அலோப⁴னீயத்தா. பரிபோ⁴க³தண்ஹாய அபா⁴வோ ஸவிஸேஸலூக²ஸபா⁴வத்தா. பாஸாதி³கதாதி பரேஸம் பஸாதா³வஹதா. அப்பிச்ச²தாதீ³னம் ப²லனிப்ப²த்தி து⁴தங்க³பரிஹரணஸ்ஸ அப்பிச்ச²தாதீ³ஹியேவ நிப்பா²தே³தப்³ப³தோ. து⁴தத⁴ம்மே ஸமாதா³ய வத்தனம் யாவதே³வ உபரி ஸம்மாபடிபத்திஸம்பாத³னாயாதி வுத்தம் ‘‘ஸம்மாபடிபத்தியா அனுப்³ரூஹன’’ந்தி. மாரஸேனவிகா⁴தாயாதி மாரஸ்ஸ, மாரஸேனாய ச விஹனனாய வித்³த⁴ம்ஸனாய. காயவாசாசித்தேஹி யதோ ஸம்யதோதி யதி, பி⁴க்கு². தா⁴ரிதம் யம் லோகக³ருனா பம்ஸுகூலம், தம் கோ ந தா⁴ரயே, யஸ்மா வா லோகக³ருனா பம்ஸுகூலம் தா⁴ரிதம், தஸ்மா கோ தம் ந தா⁴ரயேதி யோஜனா யம்தம்ஸத்³தா³னம் ஏகந்தஸம்ப³ந்தி⁴பா⁴வதோ. படிஞ்ஞம் ஸமனுஸ்ஸரந்தி உபஸம்பத³மாளே ‘‘ஆம ப⁴ந்தே’’தி ஆசரியபமுக²ஸ்ஸ ஸங்க⁴ஸ்ஸ ஸம்முகா² தி³ன்னம் படிஞ்ஞம் ஸமனுஸ்ஸரந்தோ.

இதி பம்ஸுகூலிகங்க³கதா²வண்ணனா.