3. ஸங்கா⁴னுஸ்ஸதிகதா²

154. ஸங்கா⁴னுஸ்ஸதிம் பா⁴வேதுகாமேனாபி ரஹோக³தேன படிஸல்லீனேன ‘‘ஸுப்படிபன்னோ ப⁴க³வதோ ஸாவகஸங்கோ⁴, உஜுப்படிபன்னோ ப⁴க³வதோ ஸாவகஸங்கோ⁴, ஞாயப்படிபன்னோ ப⁴க³வதோ ஸாவகஸங்கோ⁴, ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ம் சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴ ஆஹுனேய்யோ, பாஹுனேய்யோ, த³க்கி²ணேய்யோ, அஞ்ஜலிகரணீயோ, அனுத்தரம் புஞ்ஞக்கே²த்தம் லோகஸ்ஸா’’தி (அ. நி. 6.10) ஏவம் அரியஸங்க⁴கு³ணா அனுஸ்ஸரிதப்³பா³.

155. தத்த² ஸுப்படிபன்னோதி ஸுட்டு² படிபன்னோ, ஸம்மாபடிபத³ம் அனிவத்திபடிபத³ம் அனுலோமபடிபத³ம் அபச்சனீகபடிபத³ம் த⁴ம்மானுத⁴ம்மபடிபத³ம் படிபன்னோதி வுத்தம் ஹோதி. ப⁴க³வதோ ஓவாதா³னுஸாஸனிம் ஸக்கச்சம் ஸுணந்தீதி ஸாவகா. ஸாவகானம் ஸங்கோ⁴ ஸாவகஸங்கோ⁴, ஸீலதி³ட்டி²ஸாமஞ்ஞதாய ஸங்கா⁴தபா⁴வமாபன்னோ ஸாவகஸமூஹோதி அத்தோ². யஸ்மா பன ஸா ஸம்மாபடிபதா³ உஜு அவங்கா அகுடிலா அஜிம்ஹா, அரியோ ச ஞாயோதிபி வுச்சதி, அனுச்ச²விகத்தா ச ஸாமீசீதிபி ஸங்க²ம் க³தா. தஸ்மா தம்படிபன்னோ அரியஸங்கோ⁴ உஜுப்படிபன்னோ ஞாயப்படிபன்னோ ஸாமீசிப்படிபன்னோதிபி வுத்தோ.

ஏத்த² ச யே மக்³க³ட்டா², தே ஸம்மாபடிபத்திஸமங்கி³தாய ஸுப்படிபன்னா. யே ப²லட்டா², தே ஸம்மாபடிபதா³ய அதி⁴க³ந்தப்³ப³ஸ்ஸ அதி⁴க³தத்தா அதீதம் படிபத³ம் ஸந்தா⁴ய ஸுப்படிபன்னாதி வேதி³தப்³பா³.

அபிச ஸ்வாக்கா²தே த⁴ம்மவினயே யதா²னுஸிட்ட²ம் படிபன்னத்தாபி அபண்ணகபடிபத³ம் படிபன்னத்தாபி ஸுப்படிபன்னோ.

மஜ்ஜி²மாய படிபதா³ய அந்தத்³வயமனுபக³ம்ம படிபன்னத்தா காயவசீமனோவங்ககுடிலஜிம்ஹதோ³ஸப்பஹானாய படிபன்னத்தா ச உஜுப்படிபன்னத்தா ச உஜுப்படிபன்னோ.

ஞாயோ வுச்சதி நிப்³பா³னம். தத³த்தா²ய படிபன்னத்தா ஞாயப்படிபன்னோ.

யதா² படிபன்னா ஸாமீசிப்படிபன்னாரஹா ஹோந்தி, ததா² படிபன்னத்தா ஸாமீசிப்படிபன்னோ.

156. யதி³த³ந்தி யானி இமானி. சத்தாரி புரிஸயுகா³னீதி யுக³ளவஸேன பட²மமக்³க³ட்டோ² ப²லட்டோ²தி இத³மேகம் யுக³ளந்தி ஏவம் சத்தாரி புரிஸயுக³ளானி ஹோந்தி. அட்ட² புரிஸபுக்³க³லாதி புரிஸபுக்³க³லவஸேன ஏகோ பட²மமக்³க³ட்டோ² ஏகோ ப²லட்டோ²தி இமினா நயேன அட்டே²வ புரிஸபுக்³க³லா ஹோந்தி. ஏத்த² ச புரிஸோதி வா புக்³க³லோதி வா ஏகத்தா²னி ஏதானி பதா³னி. வேனேய்யவஸேன பனேதம் வுத்தம். ஏஸ ப⁴க³வதோ ஸாவகஸங்கோ⁴தி யானிமானி யுக³வஸேன சத்தாரி புரிஸயுகா³னி, பாடிஏக்கதோ அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴, ஆஹுனேய்யோதிஆதீ³ஸு ஆனேத்வா ஹுனிதப்³ப³ந்தி ஆஹுனம், தூ³ரதோபி ஆனேத்வா ஸீலவந்தேஸு தா³தப்³ப³ந்தி அத்தோ². சதுன்னம் பச்சயானமேதமதி⁴வசனம். தம் ஆஹுனம் படிக்³க³ஹேதும் யுத்தோ தஸ்ஸ மஹப்ப²லகரணதோதி ஆஹுனேய்யோ. அத² வா தூ³ரதோபி ஆக³ந்த்வா ஸப்³ப³ஸாபதேய்யம்பி ஏத்த² ஹுனிதப்³ப³ந்தி ஆஹவனீயோ. ஸக்காதீ³னம்பி வா ஆஹவனம் அரஹதீதி ஆஹவனீயோ. யோ சாயம் ப்³ராஹ்மணானம் ஆஹவனீயோ நாம அக்³கி³, யத்த² ஹுதம் மஹப்ப²லந்தி தேஸம் லத்³தி⁴. ஸசே ஹுதஸ்ஸ மஹப்ப²லதாய ஆஹவனீயோ, ஸங்கோ⁴வ ஆஹவனீயோ. ஸங்கே⁴ ஹுதஞ்ஹி மஹப்ப²லம் ஹோதி. யதா²ஹ –

‘‘யோ ச வஸ்ஸஸதம் ஜந்து, அக்³கி³ம் பரிசரே வனே;

ஏகஞ்ச பா⁴விதத்தானம், முஹுத்தமபி பூஜயே;

ஸாயேவ பூஜனா ஸேய்யோ, யஞ்சே வஸ்ஸஸதம் ஹுத’’ந்தி. (த⁴. ப. 107);

ததே³தம் நிகாயந்தரே ஆஹவனீயோதி பத³ம் இத⁴ ஆஹுனேய்யோதி இமினா பதே³ன அத்த²தோ ஏகம். ப்³யஞ்ஜனதோ பனேத்த² கிஞ்சிமத்தமேவ நானம். இதி ஆஹுனேய்யோ.

பாஹுனேய்யோதி ஏத்த² பன பாஹுனம் வுச்சதி தி³ஸாவிதி³ஸதோ ஆக³தானம் பியமனாபானம் ஞாதிமித்தானமத்தா²ய ஸக்காரேன படியத்தம் ஆக³ந்துகதா³னம். தம்பி ட²பேத்வா தே ததா²ரூபே பாஹுனகே ஸங்க⁴ஸ்ஸேவ தா³தும் யுத்தம், ஸங்கோ⁴வ தம் படிக்³க³ஹேதும் யுத்தோ. ஸங்க⁴ஸதி³ஸோ ஹி பாஹுனகோ நத்தி². ததா² ஹேஸ ஏகபு³த்³த⁴ந்தரே ச தி³ஸ்ஸதி, அப்³போ³கிண்ணஞ்ச பியமனாபத்தகரேஹி த⁴ம்மேஹி ஸமன்னாக³தோதி. ஏவம் பாஹுனமஸ்ஸ தா³தும் யுத்தம் பாஹுனஞ்ச படிக்³க³ஹேதும் யுத்தோதி பாஹுனேய்யோ. யேஸம் பன பாஹவனீயோதி பாளி, தேஸம் யஸ்மா ஸங்கோ⁴ புப்³ப³காரமரஹதி, தஸ்மா ஸப்³ப³பட²மம் ஆனேத்வா ஏத்த² ஹுனிதப்³ப³ந்தி பாஹவனீயோ. ஸப்³ப³ப்பகாரேன வா ஆஹவனமரஹதீதி பாஹவனீயோ. ஸ்வாயமித⁴ தேனேவ அத்தே²ன பாஹுனேய்யோதி வுச்சதி.

த³க்கி²ணாதி பன பரலோகம் ஸத்³த³ஹித்வா தா³தப்³ப³தா³னம் வுச்சதி. தம் த³க்கி²ணம் அரஹதி, த³க்கி²ணாய வா ஹிதோ யஸ்மா நம் மஹப்ப²லகரணதாய விஸோதே⁴தீதி த³க்கி²ணேய்யோ.

உபோ⁴ ஹத்தே² ஸிரஸ்மிம் பதிட்ட²பேத்வா ஸப்³ப³லோகேன கயிரமானம் அஞ்ஜலிகம்மம் அரஹதீதி அஞ்ஜலிகரணீயோ.

அனுத்தரம் புஞ்ஞக்கே²த்தம் லோகஸ்ஸாதி ஸப்³ப³லோகஸ்ஸ அஸதி³ஸம் புஞ்ஞவிரூஹனட்டா²னம். யதா² ஹி ரஞ்ஞோ வா அமச்சஸ்ஸ வா ஸாலீனம் வா யவானம் வா விரூஹனட்டா²னம் ரஞ்ஞோ ஸாலிக்கே²த்தம் ரஞ்ஞோ யவக்கே²த்தந்தி வுச்சதி, ஏவம் ஸங்கோ⁴ ஸப்³ப³லோகஸ்ஸ புஞ்ஞானம் விரூஹனட்டா²னம். ஸங்க⁴ம் நிஸ்ஸாய ஹி லோகஸ்ஸ நானப்பகாரஹிதஸுக²ஸம்வத்தனிகானி புஞ்ஞானி விரூஹந்தி. தஸ்மா ஸங்கோ⁴ அனுத்தரம் புஞ்ஞக்கே²த்தம் லோகஸ்ஸாதி.

157. ஏவம் ஸுப்படிபன்னதாதி³பே⁴தே³ ஸங்க⁴கு³ணே அனுஸ்ஸரதோ நேவ தஸ்மிம் ஸமயே ராக³பரியுட்டி²தம் சித்தம் ஹோதி. ந தோ³ஸ…பே… ந மோஹபரியுட்டி²தம் சித்தம் ஹோதி. உஜுக³தமேவஸ்ஸ தஸ்மிம் ஸமயே சித்தம் ஹோதி ஸங்க⁴ம் ஆரப்³பா⁴தி (அ. நி. 6.10) புரிமனயேனேவ விக்க²ம்பி⁴தனீவரணஸ்ஸ ஏகக்க²ணே ஜா²னங்கா³னி உப்பஜ்ஜந்தி. ஸங்க⁴கு³ணானம் பன க³ம்பீ⁴ரதாய நானப்பகாரகு³ணானுஸ்ஸரணாதி⁴முத்ததாய வா அப்பனம் அப்பத்வா உபசாரப்பத்தமேவ ஜா²னம் ஹோதி. ததே³தம் ஸங்க⁴கு³ணானுஸ்ஸரணவஸேன உப்பன்னத்தா ஸங்கா⁴னுஸ்ஸதிச்சேவ ஸங்க²ம் க³ச்ச²தி.

இமஞ்ச பன ஸங்கா⁴னுஸ்ஸதிம் அனுயுத்தோ பி⁴க்கு² ஸங்கே⁴ ஸகா³ரவோ ஹோதி ஸப்பதிஸ்ஸோ. ஸத்³தா⁴தி³வேபுல்லம் அதி⁴க³ச்ச²தி, பீதிபாமோஜ்ஜப³ஹுலோ ஹோதி, ப⁴யபே⁴ரவஸஹோ, து³க்கா²தி⁴வாஸனஸமத்தோ², ஸங்கே⁴ன ஸம்வாஸஸஞ்ஞம் படிலப⁴தி. ஸங்க⁴கு³ணானுஸ்ஸதியா அஜ்ஜா²வுத்த²ஞ்சஸ்ஸ ஸரீரம் ஸன்னிபதிதஸங்க⁴மிவ உபோஸதா²கா³ரம் பூஜாரஹம் ஹோதி, ஸங்க⁴கு³ணாதி⁴க³மாய சித்தம் நமதி, வீதிக்கமிதப்³ப³வத்து²ஸமாயோகே³ சஸ்ஸ ஸம்முகா² ஸங்க⁴ம் பஸ்ஸதோ விய ஹிரோத்தப்பம் பச்சுபட்டா²தி, உத்தரி அப்படிவிஜ்ஜ²ந்தோ பன ஸுக³திபராயனோ ஹோதி.

தஸ்மா ஹவே அப்பமாத³ம், கயிராத² ஸுமேத⁴ஸோ;

ஏவம் மஹானுபா⁴வாய, ஸங்கா⁴னுஸ்ஸதியா ஸதா³தி.

இத³ம் ஸங்கா⁴னுஸ்ஸதியம் வித்தா²ரகதா²முக²ம்.