4. ஸீலானுஸ்ஸதிகதா²

158. ஸீலானுஸ்ஸதிம் பா⁴வேதுகாமேன பன ரஹோக³தேன படிஸல்லீனேன ‘‘அஹோ வத மே ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸம்வத்தனிகானீ’’தி (அ. நி. 6.10) ஏவம் அக²ண்ட³தாதி³கு³ணவஸேன அத்தனோ ஸீலானி அனுஸ்ஸரிதப்³பா³னி. தானி ச க³ஹட்டே²ன க³ஹட்ட²ஸீலானி, பப்³ப³ஜிதேன பப்³ப³ஜிதஸீலானி.

க³ஹட்ட²ஸீலானி வா ஹோந்து பப்³ப³ஜிதஸீலானி வா, யேஸம் ஆதி³ம்ஹி வா அந்தே வா ஏகம்பி ந பி⁴ன்னம், தானி பரியந்தே சி²ன்னஸாடகோ விய ந க²ண்டா³னீதி அக²ண்டா³னி. யேஸம் வேமஜ்ஜே² ஏகம்பி ந பி⁴ன்னம், தானி மஜ்ஜே² வினிவித்³த⁴ஸாடகோ விய ந சி²த்³தா³னீதி அச்சி²த்³தா³னி. யேஸம் படிபாடியா த்³வே வா தீணி வா ந பி⁴ன்னானி, தானி பிட்டி²யா வா குச்சி²யா வா உட்டி²தேன தீ³க⁴வட்டாதி³ஸண்டா²னேன விஸபா⁴க³வண்ணேன காளரத்தாதீ³னம் அஞ்ஞதரஸரீரவண்ணா கா³வீ விய ந ஸப³லானீதி அஸப³லானி. யானி அந்தரந்தரா ந பி⁴ன்னானி, தானி விஸபா⁴க³பி³ந்து³விசித்ரா கா³வீ விய ந கம்மாஸானீதி அகம்மாஸானி. அவிஸேஸேன வா ஸப்³பா³னிபி ஸத்தவிதே⁴ன மேது²னஸம்யோகே³ன கோது⁴பனாஹாதீ³ஹி ச பாபத⁴ம்மேஹி அனுபஹதத்தா அக²ண்டா³னி அச்சி²த்³தா³னி அஸப³லானி அகம்மாஸானி. தானியேவ தண்ஹாதா³ஸப்³யதோ மோசேத்வா பு⁴ஜிஸ்ஸபா⁴வகரணேன பு⁴ஜிஸ்ஸானி. பு³த்³தா⁴தீ³ஹி விஞ்ஞூஹி பஸத்த²த்தா விஞ்ஞுப்பஸத்தா²னி. தண்ஹாதி³ட்டீ²ஹி அபராமட்ட²தாய கேனசி வா அயம் தே ஸீலேஸு தோ³ஸோதி ஏவம் பராமட்டு²ம் அஸக்குணேய்யதாய அபராமட்டா²னி. உபசாரஸமாதி⁴ம் அப்பனாஸமாதி⁴ம் வா, அத² வா பன மக்³க³ஸமாதி⁴ம் ப²லஸமாதி⁴ஞ்சாபி ஸம்வத்தேந்தீதி ஸமாதி⁴ஸம்வத்தனிகானி.

159. ஏவம் அக²ண்ட³தாதி³கு³ணவஸேன அத்தனோ ஸீலானி அனுஸ்ஸரதோ நேவஸ்ஸ தஸ்மிம் ஸமயே ராக³பரியுட்டி²தம் சித்தம் ஹோதி. ந தோ³ஸ…பே… ந மோஹபரியுட்டி²தம் சித்தம் ஹோதி. உஜுக³தமேவஸ்ஸ தஸ்மிம் ஸமயே சித்தம் ஹோதி, ஸீலம் ஆரப்³பா⁴தி புரிமனயேனேவ விக்க²ம்பி⁴தனீவரணஸ்ஸ ஏகக்க²ணே ஜா²னங்கா³னி உப்பஜ்ஜந்தி. ஸீலகு³ணானம் பன க³ம்பீ⁴ரதாய நானப்பகாரகு³ணானுஸ்ஸரணாதி⁴முத்ததாய வா அப்பனம் அப்பத்வா உபசாரப்பத்தமேவ ஜா²னம் ஹோதி. ததே³தம் ஸீலகு³ணானுஸ்ஸரணவஸேன உப்பன்னத்தா ஸீலானுஸ்ஸதிச்சேவ ஸங்க²ம் க³ச்ச²தி.

இமஞ்ச பன ஸீலானுஸ்ஸதிம் அனுயுத்தோ பி⁴க்கு² ஸிக்கா²ய ஸகா³ரவோ ஹோதி ஸபா⁴க³வுத்தி, படிஸந்தா²ரே அப்பமத்தோ, அத்தானுவாதா³தி³ப⁴யவிரஹிதோ, அணுமத்தேஸு வஜ்ஜேஸு ப⁴யத³ஸ்ஸாவீ, ஸத்³தா⁴தி³வேபுல்லம் அதி⁴க³ச்ச²தி, பீதிபாமோஜ்ஜப³ஹுலோ ஹோதி. உத்தரி அப்படிவிஜ்ஜ²ந்தோ பன ஸுக³திபராயனோ ஹோதி.

தஸ்மா ஹவே அப்பமாத³ம், கயிராத² ஸுமேத⁴ஸோ;

ஏவம் மஹானுபா⁴வாய, ஸீலானுஸ்ஸதியா ஸதா³தி.

இத³ம் ஸீலானுஸ்ஸதியம் வித்தா²ரகதா²முக²ம்.