6. பத்தபிண்டி³கங்க³கதா²

29. பத்தபிண்டி³கங்க³ம்பி ‘‘து³தியகபா⁴ஜனம் படிக்கி²பாமி, பத்தபிண்டி³கங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன பத்தபிண்டி³கேன யாகு³பானகாலே பா⁴ஜனே ட²பேத்வா ப்³யஞ்ஜனே லத்³தே⁴ ப்³யஞ்ஜனம் வா பட²மம் கா²தி³தப்³ப³ம், யாகு³ வா பாதப்³பா³. ஸசே பன யாகு³யம் பக்கி²பதி, பூதிமச்ச²காதி³ம்ஹி ப்³யஞ்ஜனே பக்கி²த்தே யாகு³ படிகூலா ஹோதி, அப்படிகூலமேவ ச கத்வா பு⁴ஞ்ஜிதும் வட்டதி. தஸ்மா ததா²ரூபம் ப்³யஞ்ஜனம் ஸந்தா⁴ய இத³ம் வுத்தம். யம் பன மது⁴ஸக்கராதி³கம் அப்படிகூலம் ஹோதி, தம் பக்கி²பிதப்³ப³ம். க³ண்ஹந்தேன ச பமாணயுத்தமேவ க³ண்ஹிதப்³ப³ம். ஆமகஸாகம் ஹத்தே²ன க³ஹேத்வா கா²தி³தும் வட்டதி. ததா² பன அகத்வா பத்தேயேவ பக்கி²பிதப்³ப³ம். து³தியகபா⁴ஜனஸ்ஸ பன படிக்கி²த்தத்தா அஞ்ஞம் ருக்க²பண்ணம்பி ந வட்டதீதி இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்ட²ஸ்ஸ அஞ்ஞத்ர உச்சு²கா²த³னகாலா கசவரம்பி ச²ட்³டே³தும் ந வட்டதி. ஓத³னபிண்ட³மச்ச²மம்ஸபூவேபி பி⁴ந்தி³த்வா கா²தி³தும் ந வட்டதி. மஜ்ஜி²மஸ்ஸ ஏகேன ஹத்தே²ன பி⁴ந்தி³த்வா கா²தி³தும் வட்டதி, ஹத்த²யோகீ³ நாமேஸ. முது³கோ பன பத்தயோகீ³ நாம ஹோதி, தஸ்ஸ யம் ஸக்கா ஹோதி பத்தே பக்கி²பிதும், தம் ஸப்³ப³ம் ஹத்தே²ன வா த³ந்தேஹி வா பி⁴ந்தி³த்வா கா²தி³தும் வட்டதி.

இமேஸம் பன திண்ணம்பி து³தியகபா⁴ஜனம் ஸாதி³தக்க²ணே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, நானாரஸதண்ஹாவினோத³னம். அத்ரிச்ச²தாய பஹானம், ஆஹாரே பயோஜனமத்தத³ஸ்ஸிதா, தா²லகாதி³பரிஹரணகே²தா³பா⁴வோ, அவிக்கி²த்தபோ⁴ஜிதா, அப்பிச்ச²தாதீ³னம் அனுலோமவுத்திதாதி.

நானாபா⁴ஜனவிக்கே²பம், ஹித்வா ஓக்கி²த்தலோசனோ;

க²ணந்தோ விய மூலானி, ரஸதண்ஹாய ஸுப்³ப³தோ.

ஸரூபம் விய ஸந்துட்டி²ம், தா⁴ரயந்தோ ஸுமானஸோ;

பரிபு⁴ஞ்ஜேய்ய ஆஹாரம், கோ அஞ்ஞோ பத்தபிண்டி³கோதி.

அயம் பத்தபிண்டி³கங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.