7. க²லுபச்சா²ப⁴த்திகங்க³கதா²

30. க²லுபச்சா²ப⁴த்திகங்க³ம்பி ‘‘அதிரித்தபோ⁴ஜனம் படிக்கி²பாமி, க²லுபச்சா²ப⁴த்திகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன க²லுபச்சா²ப⁴த்திகேன பவாரேத்வா புன போ⁴ஜனம் கப்பியம் காரேத்வா ந பு⁴ஞ்ஜிதப்³ப³ம். இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்டோ² யஸ்மா பட²மபிண்டே³ பவாரணா நாம நத்தி², தஸ்மிம் பன அஜ்ஜோ²ஹரியமானே அஞ்ஞம் படிக்கி²பதோ ஹோதி, தஸ்மா ஏவம் பவாரிதோ பட²மபிண்ட³ம் அஜ்ஜோ²ஹரித்வா து³தியபிண்ட³ம் ந பு⁴ஞ்ஜதி. மஜ்ஜி²மோ யஸ்மிம் போ⁴ஜனே பவாரிதோ, ததே³வ பு⁴ஞ்ஜதி. முது³கோ பன யாவ ஆஸனா ந வுட்டா²தி தாவ பு⁴ஞ்ஜதி.

இமேஸம் பன திண்ணம்பி பவாரிதானம் கப்பியம் காராபேத்வா பு⁴த்தக்க²ணே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, அனதிரித்தபோ⁴ஜனாபத்தியா தூ³ரபா⁴வோ, ஓத³ரிகத்தாபா⁴வோ, நிராமிஸஸன்னிதி⁴தா, புன பரியேஸனாய அபா⁴வோ, அப்பிச்ச²தாதீ³னம் அனுலோமவுத்திதாதி.

பரியேஸனாய கே²த³ம், ந யாதி ந கரோதி ஸன்னிதி⁴ம் தீ⁴ரோ;

ஓத³ரிகத்தம் பஜஹதி, க²லுபச்சா²ப⁴த்திகோ யோகீ³.

தஸ்மா ஸுக³தபஸத்த²ம், ஸந்தோஸகு³ணாதி³வுட்³டி⁴ஸஞ்ஜனனம்;

தோ³ஸே விது⁴னிதுகாமோ, ப⁴ஜேய்ய யோகீ³ து⁴தங்க³மித³ந்தி.

அயம் க²லுபச்சா²ப⁴த்திகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.