5. ஏகாஸனிகங்க³கதா²

28. ஏகாஸனிகங்க³ம்பி ‘‘நானாஸனபோ⁴ஜனம் படிக்கி²பாமி, ஏகாஸனிகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன ஏகாஸனிகேன ஆஸனஸாலாயம் நிஸீத³ந்தேன தே²ராஸனே அனிஸீதி³த்வா ‘‘இத³ம் மய்ஹம் பாபுணிஸ்ஸதீ’’தி பதிரூபம் ஆஸனம் ஸல்லக்கே²த்வா நிஸீதி³தப்³ப³ம். ஸசஸ்ஸ விப்பகதே போ⁴ஜனே ஆசரியோ வா உபஜ்ஜா²யோ வா ஆக³ச்ச²தி, உட்டா²ய வத்தம் காதும் வட்டதி. திபிடகசூளாப⁴யத்தே²ரோ பனாஹ ‘‘ஆஸனம் வா ரக்கே²ய்ய போ⁴ஜனம் வா, அயஞ்ச விப்பகதபோ⁴ஜனோ, தஸ்மா வத்தம் கரோது, போ⁴ஜனம் பன மா பு⁴ஞ்ஜதூ’’தி. இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்டோ² அப்பம் வா ஹோது ப³ஹு வா, யம்ஹி போ⁴ஜனே ஹத்த²ம் ஓதாரேதி, ததோ அஞ்ஞம் க³ண்ஹிதும் ந லப⁴தி. ஸசேபி மனுஸ்ஸா ‘‘தே²ரேன ந கிஞ்சி பு⁴த்த’’ந்தி ஸப்பிஆதீ³னி ஆஹரந்தி, பே⁴ஸஜ்ஜத்த²மேவ வட்டந்தி, ந ஆஹாரத்த²ம். மஜ்ஜி²மோ யாவ பத்தே ப⁴த்தம் ந கீ²யதி, தாவ அஞ்ஞம் க³ண்ஹிதும் லப⁴தி. அயஞ்ஹி போ⁴ஜனபரியந்திகோ நாம ஹோதி. முது³கோ யாவ ஆஸனா ந வுட்டா²தி தாவ பு⁴ஞ்ஜிதும் லப⁴தி. ஸோ ஹி உத³கபரியந்திகோ வா ஹோதி யாவ பத்ததோ⁴வனம் ந க³ண்ஹாதி தாவ பு⁴ஞ்ஜனதோ, ஆஸனபரியந்திகோ வா யாவ ந வுட்டா²தி தாவ பு⁴ஞ்ஜனதோ.

இமேஸம் பன திண்ணம்பி நானாஸனபோ⁴ஜனம் பு⁴த்தக்க²ணே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, அப்பாபா³த⁴தா, அப்பாதங்கதா, லஹுட்டா²னம், ப³லம், பா²ஸுவிஹாரோ, அனதிரித்தபச்சயா அனாபத்தி, ரஸதண்ஹாவினோத³னம் அப்பிச்ச²தாதீ³னம் அனுலோமவுத்திதாதி.

ஏகாஸனபோ⁴ஜனே ரதம்,

ந யதிம் போ⁴ஜனபச்சயா ருஜா;

விஸஹந்தி ரஸே அலோலுபோ,

பரிஹாபேதி ந கம்மமத்தனோ.

இதி பா²ஸுவிஹாரகாரணே,

ஸுசிஸல்லேக²ரதூபஸேவிதே;

ஜனயேத² விஸுத்³த⁴மானஸோ,

ரதிமேகாஸனபோ⁴ஜனே யதீதி.

அயம் ஏகாஸனிகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.