4. ஸபதா³னசாரிகங்க³கதா²

27. ஸபதா³னசாரிகங்க³ம்பி ‘‘லோலுப்பசாரம் படிக்கி²பாமி, ஸபதா³னசாரிகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன ஸபதா³னசாரிகேன கா³மத்³வாரே ட²த்வா பரிஸ்ஸயாபா⁴வோ ஸல்லக்கே²தப்³போ³. யஸ்ஸா ரச்சா²ய வா கா³மே வா பரிஸ்ஸயோ ஹோதி, தம் பஹாய அஞ்ஞத்த² சரிதும் வட்டதி. யஸ்மிம் க⁴ரத்³வாரே வா ரச்சா²ய வா கா³மே வா கிஞ்சி ந லப⁴தி, அகா³மஸஞ்ஞம் கத்வா க³ந்தப்³ப³ம். யத்த² கிஞ்சி லப⁴தி, தம் பஹாய க³ந்தும் ந வட்டதி. இமினா ச பி⁴க்கு²னா காலதரம் பவிஸிதப்³ப³ம், ஏவஞ்ஹி அபா²ஸுகட்டா²னம் பஹாய அஞ்ஞத்த² க³ந்தும் ஸக்கி²ஸ்ஸதி. ஸசே பனஸ்ஸ விஹாரே தா³னம் தே³ந்தா அந்தராமக்³கே³ வா ஆக³ச்ச²ந்தா மனுஸ்ஸா பத்தம் க³ஹேத்வா பிண்ட³பாதம் தே³ந்தி வட்டதி. இமினா ச மக்³க³ம் க³ச்ச²ந்தேனாபி பி⁴க்கா²சாரவேலாயம் ஸம்பத்தகா³மம் அனதிக்கமித்வா சரிதப்³ப³மேவ. தத்த² அலபி⁴த்வா வா தோ²கம் லபி⁴த்வா வா கா³மபடிபாடியா சரிதப்³ப³ந்தி இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்டோ² புரதோ ஆஹடபி⁴க்க²ம்பி பச்ச²தோ ஆஹடபி⁴க்க²ம்பி படிக்கமனம் ஆஹரித்வா தி³ய்யமானம்பி ந க³ண்ஹதி, பத்தத்³வாரே பன பத்தம் விஸ்ஸஜ்ஜேதி. இமஸ்மிஞ்ஹி து⁴தங்கே³ மஹாகஸ்ஸபத்தே²ரேன ஸதி³ஸோ நாம நத்தி². தஸ்ஸபி பத்தவிஸ்ஸட்ட²ட்டா²னமேவ பஞ்ஞாயதி. மஜ்ஜி²மோ புரதோ வா பச்ச²தோ வா ஆஹடம்பி படிக்கமனம் ஆஹடம்பி க³ண்ஹதி, பத்தத்³வாரேபி பத்தம் விஸ்ஸஜ்ஜேதி, ந பன பி⁴க்க²ம் ஆக³மயமானோ நிஸீத³தி. ஏவம் ஸோ உக்கட்ட²பிண்ட³பாதிகஸ்ஸ அனுலோமேதி. முது³கோ தம் தி³வஸம் நிஸீதி³த்வா ஆக³மேதி.

இமேஸம் பன திண்ணம்பி லோலுப்பசாரே உப்பன்னமத்தே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, குலேஸு நிச்சனவகதா, சந்தூ³பமதா, குலமச்சே²ரப்பஹானம், ஸமானுகம்பிதா, குலூபகாதீ³னவாபா⁴வோ, அவ்ஹானானபி⁴னந்த³னா, அபி⁴ஹாரேன அனத்தி²கதா, அப்பிச்ச²தாதீ³னம் அனுலோமவுத்திதாதி.

சந்தூ³பமோ நிச்சனவோ குலேஸு,

அமச்ச²ரீ ஸப்³ப³ஸமானுகம்போ;

குலூபகாதீ³னவவிப்பமுத்தோ,

ஹோதீத⁴ பி⁴க்கு² ஸபதா³னசாரீ.

லோலுப்பசாரஞ்ச பஹாய தஸ்மா,

ஓக்கி²த்தசக்கு² யுக³மத்தத³ஸ்ஸீ;

ஆகங்க²மானோ பு⁴வி ஸேரிசாரம்,

சரேய்ய தீ⁴ரோ ஸபதா³னசாரந்தி.

அயம் ஸபதா³னசாரிகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.