3. பிண்ட³பாதிகங்க³கதா²

26. பிண்ட³பாதிகங்க³ம்பி ‘‘அதிரேகலாப⁴ம் படிக்கி²பாமி, பிண்ட³பாதிகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன பிண்ட³பாதிகேன ‘‘ஸங்க⁴ப⁴த்தம், உத்³தே³ஸப⁴த்தம், நிமந்தனப⁴த்தம், ஸலாகப⁴த்தம், பக்கி²கம், உபோஸதி²கம், பாடிபதி³கம், ஆக³ந்துகப⁴த்தம், க³மிகப⁴த்தம், கி³லானப⁴த்தம், கி³லானுபட்டா²கப⁴த்தம், விஹாரப⁴த்தம், து⁴ரப⁴த்தம், வாரகப⁴த்த’’ந்தி ஏதானி சுத்³த³ஸ ப⁴த்தானி ந ஸாதி³தப்³பா³னி. ஸசே பன ‘‘ஸங்க⁴ப⁴த்தம் க³ண்ஹதா²’’திஆதி³னா நயேன அவத்வா ‘‘அம்ஹாகம் கே³ஹே ஸங்கோ⁴ பி⁴க்க²ம் க³ண்ஹாது, தும்ஹேபி பி⁴க்க²ம் க³ண்ஹதா²’’தி வத்வா தி³ன்னானி ஹோந்தி, தானி ஸாதி³தும் வட்டந்தி. ஸங்க⁴தோ நிராமிஸஸலாகாபி விஹாரே பக்கப⁴த்தம்பி வட்டதியேவாதி இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்டோ² புரதோபி பச்ச²தோபி ஆஹடபி⁴க்க²ம் க³ண்ஹதி, பத்தத்³வாரே ட²த்வா பத்தம் க³ண்ஹந்தானம்பி தே³தி, படிக்கமனம் ஆஹரித்வா தி³ன்னபி⁴க்க²ம்பி க³ண்ஹதி, தம் தி³வஸம் பன நிஸீதி³த்வா பி⁴க்க²ம் ந க³ண்ஹதி. மஜ்ஜி²மோ தம் தி³வஸம் நிஸீதி³த்வாபி க³ண்ஹதி, ஸ்வாதனாய பன நாதி⁴வாஸேதி. முது³கோஸ்வாதனாயபி புனதி³வஸாயபி பி⁴க்க²ம் அதி⁴வாஸேதி. தே உபோ⁴பி ஸேரிவிஹாரஸுக²ம் ந லப⁴ந்தி, உக்கட்டோ²வ லப⁴தி. ஏகஸ்மிம் கிர கா³மே அரியவம்ஸோ ஹோதி, உக்கட்டோ² இதரே ஆஹ – ‘‘ஆயாமாவுஸோ, த⁴ம்மஸவனாயா’’தி. தேஸு ஏகோ ஏகேனம்ஹி, ப⁴ந்தே, மனுஸ்ஸேன நிஸீதா³பிதோதி ஆஹ. அபரோ மயா, ப⁴ந்தே, ஸ்வாதனாய ஏகஸ்ஸ பி⁴க்கா² அதி⁴வாஸிதாதி. ஏவம் தே உபோ⁴ பரிஹீனா. இதரோ பாதோவ பிண்டா³ய சரித்வா க³ந்த்வா த⁴ம்மரஸம் படிஸம்வேதே³ஸி.

இமேஸம் பன திண்ணம்பி ஸங்க⁴ப⁴த்தாதி³அதிரேகலாப⁴ம் ஸாதி³தக்க²ணேவ து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, ‘‘பிண்டி³யாலோபபோ⁴ஜனம் நிஸ்ஸாய பப்³ப³ஜ்ஜா’’தி (அ. நி. 4.27; இதிவு. 101) வசனதோ நிஸ்ஸயானுரூபபடிபத்திஸப்³பா⁴வோ, து³தியே அரியவம்ஸே பதிட்டா²னம், அபராயத்தவுத்திதா, ‘‘அப்பானி சேவ ஸுலபா⁴னி ச தானி ச அனவஜ்ஜானீ’’தி ப⁴க³வதா ஸம்வண்ணிதபச்சயதா, கோஸஜ்ஜனிம்மத்³த³னதா, பரிஸுத்³தா⁴ஜீவதா, ஸேகி²யபடிபத்திபூரணம், அபரபோஸிதா, பரானுக்³க³ஹகிரியா, மானப்பஹானம், ரஸதண்ஹானிவாரணம், க³ணபோ⁴ஜனபரம்பரபோ⁴ஜனசாரித்தஸிக்கா²பதே³ஹி அனாபத்திதா, அப்பிச்ச²தாதீ³னம் அனுலோமவுத்திதா, ஸம்மாபடிபத்திப்³ரூஹனம், பச்சி²மஜனதானுகம்பனந்தி.

பிண்டி³யாலோபஸந்துட்டோ², அபராயத்தஜீவிகோ;

பஹீனாஹாரலோலுப்போ, ஹோதி சாதுத்³தி³ஸோ யதி.

வினோத³யதி கோஸஜ்ஜம், ஆஜீவஸ்ஸ விஸுஜ்ஜ²தி;

தஸ்மா ஹி நாதிமஞ்ஞேய்ய, பி⁴க்கா²சரியாய ஸுமேத⁴ஸோ.

ஏவரூபஸ்ஸ ஹி –

‘‘பிண்ட³பாதிகஸ்ஸ பி⁴க்கு²னோ,

அத்தப⁴ரஸ்ஸ அனஞ்ஞபோஸினோ;

தே³வாபி பிஹயந்தி தாதி³னோ,

நோ சே லாப⁴ஸிலோகனிஸ்ஸிதோ’’தி.

அயம் பிண்ட³பாதிகங்கே³ ஸமாதா³னவிதா⁴னப்பபே⁴த³பே⁴தா³னிஸம்ஸவண்ணனா.