13. நேஸஜ்ஜிகங்க³கதா²

36. நேஸஜ்ஜிகங்க³ம்பி ‘‘ஸேய்யம் படிக்கி²பாமி, நேஸஜ்ஜிகங்க³ம் ஸமாதி³யாமீ’’தி இமேஸம் அஞ்ஞதரவசனேன ஸமாதி³ன்னம் ஹோதி.

தேன பன நேஸஜ்ஜிகேன ரத்தியா தீஸு யாமேஸு ஏகம் யாமம் உட்டா²ய சங்கமிதப்³ப³ம். இரியாபதே²ஸு ஹி நிபஜ்ஜிதுமேவ ந வட்டதி. இத³மஸ்ஸ விதா⁴னம்.

பபே⁴த³தோ பன அயம்பி திவிதோ⁴ ஹோதி. தத்த² உக்கட்ட²ஸ்ஸ நேவ அபஸ்ஸேனம், ந து³ஸ்ஸபல்லத்தி²கா, ந ஆயோக³பட்டோ வட்டதி. மஜ்ஜி²மஸ்ஸ இமேஸு தீஸு யம்கிஞ்சி வட்டதி. முது³கஸ்ஸ அபஸ்ஸேனம்பி து³ஸ்ஸபல்லத்தி²காபி ஆயோக³பட்டோபி பி³ப்³போ³ஹனம்பி பஞ்சங்கோ³பி ஸத்தங்கோ³பி வட்டதி. பஞ்சங்கோ³ பன பிட்டி²அபஸ்ஸயேன ஸத்³தி⁴ம் கதோ. ஸத்தங்கோ³ நாம பிட்டி²அபஸ்ஸயேன ச உப⁴தோபஸ்ஸேஸு அபஸ்ஸயேஹி ச ஸத்³தி⁴ம் கதோ. தம் கிர மிளாப⁴யத்தே²ரஸ்ஸ அகம்ஸு. தே²ரோ அனாகா³மீ ஹுத்வா பரினிப்³பா³யி.

இமேஸம் பன திண்ணம்பி ஸேய்யம் கப்பிதமத்தே து⁴தங்க³ம் பி⁴ஜ்ஜதி. அயமேத்த² பே⁴தோ³.

அயம் பனானிஸம்ஸோ, ‘‘ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதீ’’தி (தீ³. நி. 3.320; ம. நி. 1.186) வுத்தஸ்ஸ சேதஸோ வினிப³ந்த⁴ஸ்ஸ உபச்சே²த³னம், ஸப்³ப³கம்மட்டா²னானுயோக³ஸப்பாயதா, பாஸாதி³கஇரியாபத²தா, வீரியாரம்பா⁴னுகூலதா, ஸம்மாபடிபத்தியா அனுப்³ரூஹனந்தி.

ஆபு⁴ஜித்வான பல்லங்கம், பணிதா⁴ய உஜும் தனும்;

நிஸீத³ந்தோ விகம்பேதி, மாரஸ்ஸ ஹத³யம் யதி.

ஸேய்யஸுக²ம் மித்³த⁴ஸுக²ம், ஹித்வா ஆரத்³த⁴வீரியோ;

நிஸஜ்ஜாபி⁴ரதோ பி⁴க்கு², ஸோப⁴யந்தோ தபோவனம்.

நிராமிஸம் பீதிஸுக²ம், யஸ்மா ஸமதி⁴க³ச்ச²தி;

தஸ்மா ஸமனுயுஞ்ஜேய்ய, தீ⁴ரோ நேஸஜ்ஜிகம் வதந்தி.

அயம் நேஸஜ்ஜிகங்கே³ ஸமாதா³ன விதா⁴னப்பபே⁴த³ பே⁴தா³னிஸம்ஸவண்ணனா.

து⁴தங்க³பகிண்ணககதா²

37. இதா³னி –

குஸலத்திகதோ சேவ, து⁴தாதீ³னம் விபா⁴க³தோ;

ஸமாஸப்³யாஸதோ சாபி, விஞ்ஞாதப்³போ³ வினிச்ச²யோதி. –

இமிஸ்ஸா கா³தா²ய வஸேன வண்ணனா ஹோதி.

தத்த² குஸலத்திகதோதி ஸப்³பா³னேவ ஹி து⁴தங்கா³னி ஸேக்க²புது²ஜ்ஜனகீ²ணாஸவானம் வஸேன ஸியா குஸலானி, ஸியா அப்³யாகதானி, நத்தி² து⁴தங்க³ம் அகுஸலந்தி.

யோ பன வதே³ய்ய ‘‘பாபிச்சோ² இச்சா²பகதோ ஆரஞ்ஞிகோ ஹோதீதி ஆதி³வசனதோ (அ. நி. 5.181; பரி. 325) அகுஸலம்பி து⁴தங்க³’’ந்தி. ஸோ வத்தப்³போ³ – ந மயம் ‘‘அகுஸலசித்தேன அரஞ்ஞே ந வஸதீ’’தி வதா³ம. யஸ்ஸ ஹி அரஞ்ஞே நிவாஸோ, ஸோ ஆரஞ்ஞிகோ. ஸோ ச பாபிச்சோ² வா ப⁴வேய்ய அப்பிச்சோ² வா. இமானி பன தேன தேன ஸமாதா³னேன து⁴தகிலேஸத்தா து⁴தஸ்ஸ பி⁴க்கு²னோ அங்கா³னி, கிலேஸது⁴னனதோ வா து⁴தந்தி லத்³த⁴வோஹாரம் ஞாணம் அங்க³மேதேஸந்தி து⁴தங்கா³னி. அத² வா து⁴தானி ச தானி படிபக்க²னித்³து⁴னனதோ அங்கா³னி ச படிபத்தியாதிபி து⁴தங்கா³னீதி வுத்தம். ந ச அகுஸலேன கோசி து⁴தோ நாம ஹோதி, யஸ்ஸேதானி அங்கா³னி ப⁴வேய்யும், ந ச அகுஸலம் கிஞ்சி து⁴னாதி, யேஸம் தம் அங்க³ந்திகத்வா து⁴தங்கா³னீதி வுச்சேய்யும். நாபி அகுஸலம் சீவரலோலுப்பாதீ³னி சேவ நித்³து⁴னாதி படிபத்தியா ச அங்க³ம் ஹோதி. தஸ்மா ஸுவுத்தமித³ம் ‘‘நத்தி² அகுஸலம் து⁴தங்க³’’ந்தி.

‘‘யேஸம்பி குஸலத்திகவினிமுத்தம் து⁴தங்க³ம், தேஸம் அத்த²தோ து⁴தங்க³மேவ நத்தி². அஸந்தம் கஸ்ஸ து⁴னனதோ து⁴தங்க³ம் நாம ப⁴விஸ்ஸதி. து⁴தகு³ணே ஸமாதா³ய வத்ததீதி வசனவிரோதோ⁴பி ச நேஸம் ஆபஜ்ஜதி, தஸ்மா தம் ந க³ஹேதப்³ப³’’ந்தி அயம் தாவ குஸலத்திகதோ வண்ணனா.

து⁴தாதீ³னம் விபா⁴க³தோதி து⁴தோ வேதி³தப்³போ³. து⁴தவாதோ³ வேதி³தப்³போ³. து⁴தத⁴ம்மா வேதி³தப்³பா³. து⁴தங்கா³னி வேதி³தப்³பா³னி. கஸ்ஸ து⁴தங்க³ஸேவனா ஸப்பாயாதி வேதி³தப்³ப³ம்.

தத்த² து⁴தோதி து⁴தகிலேஸோ வா புக்³க³லோ கிலேஸது⁴னனோ வா த⁴ம்மோ.

து⁴தவாதோ³தி ஏத்த² பன அத்தி² து⁴தோ ந து⁴தவாதோ³, அத்தி² ந து⁴தோ து⁴தவாதோ³, அத்தி² நேவ து⁴தோ ந து⁴தவாதோ³, அத்தி² து⁴தோ சேவ து⁴தவாதோ³ ச.

தத்த² யோ து⁴தங்கே³ன அத்தனோ கிலேஸே து⁴னி, பரம் பன து⁴தங்கே³ன ந ஓவத³தி, நானுஸாஸதி பா³குலத்தே²ரோ விய, அயம் து⁴தோ ந து⁴தவாதோ³. யதா²ஹ, ‘‘தயித³ம் ஆயஸ்மா பா³குலோ து⁴தோ ந து⁴தவாதோ³’’தி. யோ பன ந து⁴தங்கே³ன அத்தனோ கிலேஸே து⁴னி, கேவலம் அஞ்ஞே து⁴தங்கே³ன ஓவத³தி அனுஸாஸதி உபனந்த³த்தே²ரோ விய, அயம் ந து⁴தோ து⁴தவாதோ³. யதா²ஹ, ‘‘தயித³ம் ஆயஸ்மா உபனந்தோ³ ஸக்யபுத்தோ ந து⁴தோ து⁴தவாதோ³’’தி. யோ உப⁴யவிபன்னோ லாளுதா³யீ விய, அயம் நேவ து⁴தோ ந து⁴தவாதோ³. யதா²ஹ, ‘‘தயித³ம் ஆயஸ்மா லாளுதா³யீ நேவ து⁴தோ ந து⁴தவாதோ³’’தி. யோ பன உப⁴யஸம்பன்னோ த⁴ம்மஸேனாபதி விய, அயம் து⁴தோ சேவ து⁴தவாதோ³ ச. யதா²ஹ, ‘‘தயித³ம் ஆயஸ்மா ஸாரிபுத்தோ து⁴தோ சேவ து⁴தவாதோ³ சாதி.

து⁴தத⁴ம்மா வேதி³தப்³பா³தி அப்பிச்ச²தா, ஸந்துட்டி²தா, ஸல்லேக²தா, பவிவேகதா, இத³மத்தி²தாதி இமே து⁴தங்க³சேதனாய பரிவாரகா பஞ்ச த⁴ம்மா ‘‘அப்பிச்ச²தம்யேவ நிஸ்ஸாயா’’திஆதி³வசனதோ (அ. நி. 5.181; பரி. 325) து⁴தத⁴ம்மா நாம, தத்த² அப்பிச்ச²தா ச ஸந்துட்டி²தா ச அலோபோ⁴. ஸல்லேக²தா ச பவிவேகதா ச த்³வீஸு த⁴ம்மேஸு அனுபதந்தி அலோபே⁴ ச அமோஹே ச. இத³மத்தி²தா ஞாணமேவ. தத்த² ச அலோபே⁴ன படிக்கே²பவத்தூ²ஸு லோப⁴ம், அமோஹேன தேஸ்வேவ ஆதீ³னவபடிச்சா²த³கம் மோஹம் து⁴னாதி. அலோபே⁴ன ச அனுஞ்ஞாதானம் படிஸேவனமுகே²ன பவத்தம் காமஸுகா²னுயோக³ம், அமோஹேன து⁴தங்கே³ஸு அதிஸல்லேக²முகே²ன பவத்தம் அத்தகிலமதா²னுயோக³ம் து⁴னாதி. தஸ்மா இமே த⁴ம்மா து⁴தத⁴ம்மாதி வேதி³தப்³பா³.

து⁴தங்கா³னி வேதி³தப்³பா³னீதி தேரஸ து⁴தங்கா³னி வேதி³தப்³பா³னி பம்ஸுகூலிகங்க³ம்…பே… நேஸஜ்ஜிகங்க³ந்தி. தானி அத்த²தோ லக்க²ணாதீ³ஹி ச வுத்தானேவ.

கஸ்ஸ து⁴தங்க³ஸேவனா ஸப்பாயாதி ராக³சரிதஸ்ஸ சேவ மோஹசரிதஸ்ஸ ச. கஸ்மா? து⁴தங்க³ஸேவனா ஹி து³க்கா²படிபதா³ சேவ ஸல்லேக²விஹாரோ ச. து³க்கா²படிபத³ஞ்ச நிஸ்ஸாய ராகோ³ வூபஸம்மதி. ஸல்லேக²ம் நிஸ்ஸாய அப்பமத்தஸ்ஸ மோஹோ பஹீயதி. ஆரஞ்ஞிகங்க³ருக்க²மூலிகங்க³படிஸேவனா வா ஏத்த² தோ³ஸசரிதஸ்ஸாபி ஸப்பாயா. தத்த² ஹிஸ்ஸ அஸங்க⁴ட்டியமானஸ்ஸ விஹரதோ தோ³ஸோபி வூபஸம்மதீதி அயம் து⁴தாதீ³னம் விபா⁴க³தோ வண்ணனா.

ஸமாஸப்³யாஸதோதி இமானி பன து⁴தங்கா³னி ஸமாஸதோ தீணி ஸீஸங்கா³னி, பஞ்ச அஸம்பி⁴ன்னங்கா³னீதி அட்டே²வ ஹோந்தி. தத்த² ஸபதா³னசாரிகங்க³ம், ஏகாஸனிகங்க³ம், அப்³போ⁴காஸிகங்க³ந்தி இமானி தீணி ஸீஸங்கா³னி. ஸபதா³னசாரிகங்க³ஞ்ஹி ரக்க²ந்தோ பிண்ட³பாதிகங்க³ம்பி ரக்கி²ஸ்ஸதி. ஏகாஸனிகங்க³ஞ்ச ரக்க²தோ பத்தபிண்டி³கங்க³க²லுபச்சா²ப⁴த்திகங்கா³னிபி ஸுரக்க²னீயானி ப⁴விஸ்ஸந்தி. அப்³போ⁴காஸிகங்க³ம் ரக்க²ந்தஸ்ஸ கிம் அத்தி² ருக்க²மூலிகங்க³யதா²ஸந்த²திகங்கே³ஸு ரக்கி²தப்³ப³ம் நாம. இதி இமானி தீணி ஸீஸங்கா³னி, ஆரஞ்ஞிகங்க³ம், பம்ஸுகூலிகங்க³ம், தேசீவரிகங்க³ம், நேஸஜ்ஜிகங்க³ம், ஸோஸானிகங்க³ந்தி இமானி பஞ்ச அஸம்பி⁴ன்னங்கா³னி சாதி அட்டே²வ ஹோந்தி.

புன த்³வே சீவரபடிஸம்யுத்தானி, பஞ்ச பிண்ட³பாதபடிஸம்யுத்தானி, பஞ்ச ஸேனாஸனபடிஸம்யுத்தானி, ஏகம் வீரியபடிஸம்யுத்தந்தி ஏவம் சத்தாரோவ ஹோந்தி. தத்த² நேஸஜ்ஜிகங்க³ம் வீரியபடிஸம்யுத்தம். இதரானி பாகடானேவ.

புன ஸப்³பா³னேவ நிஸ்ஸயவஸேன த்³வே ஹோந்தி பச்சயனிஸ்ஸிதானி த்³வாத³ஸ, வீரியனிஸ்ஸிதம் ஏகந்தி. ஸேவிதப்³பா³ஸேவிதப்³ப³வஸேனபி த்³வேயேவ ஹோந்தி. யஸ்ஸ ஹி து⁴தங்க³ம் ஸேவந்தஸ்ஸ கம்மட்டா²னம் வட்³ட⁴தி, தேன ஸேவிதப்³பா³னி. யஸ்ஸ ஸேவதோ ஹாயதி, தேன ந ஸேவிதப்³பா³னி. யஸ்ஸ பன ஸேவதோபி அஸேவதோபி வட்³ட⁴தேவ, ந ஹாயதி, தேனாபி பச்சி²மம் ஜனதம் அனுகம்பந்தேன ஸேவிதப்³பா³னி. யஸ்ஸாபி ஸேவதோபி அஸேவதோபி ந வட்³ட⁴தி, தேனாபி ஸேவிதப்³பா³னியேவ ஆயதிம் வாஸனத்தா²யாதி.

ஏவம் ஸேவிதப்³பா³ஸேவிதப்³ப³வஸேன து³விதா⁴னிபி ஸப்³பா³னேவ சேதனாவஸேன ஏகவிதா⁴னி ஹோந்தி. ஏகமேவ ஹி து⁴தங்க³ம் ஸமாதா³னசேதனாதி. அட்ட²கதா²யம்பி வுத்தம் ‘‘யா சேதனா, தம் து⁴தங்க³ந்தி வத³ந்தீ’’தி.

ப்³யாஸதோ பன பி⁴க்கூ²னம் தேரஸ, பி⁴க்கு²னீனம் அட்ட², ஸாமணேரானம் த்³வாத³ஸ, ஸிக்க²மானஸாமணேரீனம் ஸத்த, உபாஸகஉபாஸிகானம் த்³வேதி த்³வாசத்தாலீஸ ஹோந்தி. ஸசே பன அப்³போ⁴காஸே ஆரஞ்ஞிகங்க³ஸம்பன்னம் ஸுஸானம் ஹோதி, ஏகோபி பி⁴க்கு² ஏகப்பஹாரேன ஸப்³ப³து⁴தங்கா³னி பரிபு⁴ஞ்ஜிதும் ஸக்கோதி. பி⁴க்கு²னீனம் பன ஆரஞ்ஞிகங்க³ம் க²லுபச்சா²ப⁴த்திகங்க³ஞ்ச த்³வேபி ஸிக்கா²பதே³னேவ படிக்கி²த்தானி, அப்³போ⁴காஸிகங்க³ம், ருக்க²மூலிகங்க³ம், ஸோஸானிகங்க³ந்தி இமானி தீணி து³ப்பரிஹாரானி. பி⁴க்கு²னியா ஹி து³தியிகம் வினா வஸிதும் ந வட்டதி. ஏவரூபே ச டா²னே ஸமானச்ச²ந்தா³ து³தியிகா து³ல்லபா⁴. ஸசேபி லபே⁴ய்ய ஸம்ஸட்ட²விஹாரதோ ந முச்சேய்ய. ஏவம் ஸதி யஸ்ஸத்தா²ய து⁴தங்க³ம் ஸேவேய்ய, ஸ்வேவஸ்ஸா அத்தோ² ந ஸம்பஜ்ஜேய்ய. ஏவம் பரிபு⁴ஞ்ஜிதும் அஸக்குணேய்யதாய பஞ்ச ஹாபேத்வா பி⁴க்கு²னீனம் அட்டே²வ ஹோந்தீதி வேதி³தப்³பா³னி. யதா²வுத்தேஸு பன ட²பேத்வா தேசீவரிகங்க³ம் ஸேஸானி த்³வாத³ஸ ஸாமணேரானம், ஸத்த ஸிக்க²மானஸாமணேரீனம் வேதி³தப்³பா³னி. உபாஸகஉபாஸிகானம் பன ஏகாஸனிகங்க³ம், பத்தபிண்டி³கங்க³ந்தி இமானி த்³வே பதிரூபானி சேவ ஸக்கா ச பரிபு⁴ஞ்ஜிதுந்தி த்³வே து⁴தங்கா³னீதி ஏவம் ப்³யாஸதோ த்³வேசத்தாலீஸ ஹோந்தீதி அயம் ஸமாஸப்³யாஸதோ வண்ணனா.

ஏத்தாவதா ச ‘‘ஸீலே பதிட்டா²ய நரோ ஸபஞ்ஞோ’’தி இமிஸ்ஸா கா³தா²ய ஸீலஸமாதி⁴பஞ்ஞாமுகே²ன தே³ஸிதே விஸுத்³தி⁴மக்³கே³ யேஹி அப்பிச்ச²தாஸந்துட்டி²தாதீ³ஹி கு³ணேஹி வுத்தப்பகாரஸ்ஸ ஸீலஸ்ஸ வோதா³னம் ஹோதி, தேஸம் ஸம்பாத³னத்த²ம் ஸமாதா³தப்³ப³து⁴தங்க³கதா² பா⁴ஸிதா ஹோதி.

இதி ஸாது⁴ஜனபாமோஜ்ஜத்தா²ய கதே விஸுத்³தி⁴மக்³கே³

து⁴தங்க³னித்³தே³ஸோ நாம து³தியோ பரிச்சே²தோ³.