23. ஸ்யாதீ³ஸு ரஸ்ஸோதி

நபும்ஸகே வத்தமானஸ்ஸ ஸ்யாதீ³ஸு ரஸ்ஸோ. போ⁴ ச²த்துபாஹன, ச²த்துபாஹனம், ச²த்துபாஹனேன இச்சாதி³.

தே ச ஸமாஹாரிதரீதரயோகா³ ப³ஹுலம்விதா⁴னா நியதவிஸயாயேவ ஹோந்தி, தத்ரா+யம் விஸயவிபா⁴கோ³-நிருத்திபிடகாக³தோ-பாணி+தூரிய+யோக்³க³+ஸேனங்கா³னம், நிச்சவேரீனம், ஸங்க்²யாபரிமாணஸஞ்ஞானம், கு²த்³த³ஜந்துகானம், பசனசண்டா³லானம், சரணஸாதா⁴ரணானம், ஏகஜ்ஜா²யனபாவசனானம், லிங்க³விஸேஸானம், விவித⁴விருத்³தா⁴னம், தி³ஸானம், நதீ³னஞ்ச நிச்சஸமாஹாரேகத்த²ம் ப⁴வதி.

பாணங்கா³னம்-சக்கு² ச ஸோதஞ்ச சக்கு²ஸோதம், முக²ஞ்ச நாஸிகா ச முக²னாஸிகம், ‘‘ஸ்யாதீ³ஸு ரஸ்ஸோ’’தி நபும்ஸகே வத்தமானஸ்ஸ ரஸ்ஸோ. ஹனு ச கீ³வா ச ஹனுகீ³வம், கண்ணா ச நாஸா ச கண்ணனாஸம், பாணி ச பாதோ³ ச பாணிபாத³ம், ச²வி ச மம்ஸஞ்ச லோஹிதஞ்ச ச²விமம்ஸலோஹிதம், நாமஞ்ச ரூபஞ்ச நாமரூபம், ஜரா ச மரணஞ்ச ஜராமரணம்.

தூரியங்கா³னம்-அலஸோ ச தாலம்ப³ரோ ச அலஸதாலம்ப³ரம், முரஜோ ச கோ³முகோ² ச முரஜகோ³முக²ம், ஸம்கோ² ச பணவோ ச தே³ண்டி³மோ ச, ஸம்கா² ச பணவா ச தே³ண்டி³மா சாதி வா ஸம்க²பணவதே³ண்டி³மம், பணவாத³யோ த்³வேபி பே⁴ரிவிஸேஸா, மத்³த³விகோ ச பாணவிகோ ச மத்³த³விகபாணவிகம், கீ³தஞ்ச வாதி³தஞ்ச கீ³தவாதி³தம், ஸம்மஞ்ச தாளஞ்ச ஸம்மதாளம், ஸம்மம்தி கம்ஸதாலம், தாளம்தி ஹத்த²தாளம்.

யோக்³க³ங்கா³னம்-பா²லோ ச பாசனஞ்ச பா²லபாசனம், யுக³ஞ்ச நங்க³லஞ்ச யுக³னங்க³லம்.

ஸேனங்கா³னம்-ஹத்தி²னோ ச அஸ்ஸா ச ஹத்தி²அஸ்ஸம், ரதா² ச பத்திகா ச ரத²பத்திகம், அஸி ச ஸத்தி ச தோமரஞ்ச பிண்ட³ஞ்ச அஸிஸத்திதோமரபிண்ட³ம், அஸி ச சம்மஞ்ச அஸிசம்மம், சம்மந்தி ஸரவாரண-ப²லகம். த⁴னு ச கலாபோ ச த⁴னுகலாபம், கலாபோ=துணீரம். பஹரணஞ்ச ஆவரணஞ்ச பஹரணாவரணம்.

நிச்சவேரீனம்-அஹி ச நகுலோ ச, அஹீ ச நகுலா சாதி வா அஹினகுலம். ஏவம் பி³ளாரமூஸிகம், அந்தஸ்ஸ ரஸ்ஸத்தம். காகோலுகம், ஸப்பமண்டூ³கம், க³ருளஸப்பம், நாக³ஸுபண்ணம்.

ஸங்க்²யாபரிமாணஸஞ்ஞானம்-ஏககஞ்ச து³கஞ்ச ஏககது³கம். ஏவம், து³கதிகம், திகசதுக்கம், சதுக்கபஞ்சகம். த³ஸகஞ்ச ஏகாத³ஸகஞ்ச த³ஸேகாத³ஸகம், ‘‘திதாலீஸ’’ இதி சக-பா⁴க³லோபனித்³தே³ஸேன ககாரஸ்ஸ லோபோ.

கு²த்³த³ஜந்துகானம்-கீடா ச படங்கா³ ச கீடபடங்க³ம், கீடா=கபாலபிட்டி²கபாணா. ஏவம் குந்த²கிபில்லிகம், ட³ம்ஸா ச மகஸா ச ட³ம்ஸமகஸம், மக்கி²கா ச கிபில்லிகா ச மக்கி²ககிபில்லிகம், கீடா ச ஸரிம்ஸபா ச கீடஸரிம்ஸபம். தத்த² குந்தா²=ஸுகு²மகிபில்லிகா.

கு²த்³த³ஜந்து அனட்டீ² வா, அத² கோ² கு²த்³த³கோபி வா;

ஸதம் வா பஸதோ யேஸம், கேசி ஆனதுலா இதி.

பசனசண்டா³லானம்-ஓரப்³பி⁴கா ச ஸூகரிகா ச ஓரப்³பி⁴கஸூகரிகம், ஏவம் ஸாகுந்திகமாக³விகம். ஸபாகோ ச சண்டா³லோ ச ஸபாகசண்டா³லம், புக்குஸச²வடா³ஹகம், வேனரத²காரம், தத்த² வேனா=தச்ச²கா, ரத²காரா=சம்மகாரா.

சரணஸாதா⁴ரணானம்-அதிஸோ ச பா⁴ரத்³வாஜோ ச அதிஸபா⁴ரத்³வாஜம், கட்டோ² ச கபாலோ ச கட்ட²கபாலம், ஸீலஞ்ச பஞ்ஞாணஞ்ச ஸீலபஞ்ஞாணம், ஸமதோ² ச விபஸ்ஸனா ச ஸமத²விபஸ்ஸனம், விஜ்ஜா ச சரணஞ்ச விஜ்ஜாசரணம், ஏவம் நாமரூபம், ஹிரோத்தப்பம், ஸதிஸம்ப-ஜஞ்ஞம், லோப⁴மோஹம், தோ³ஸமோஹம், அஹிரிகானோத்தப்பம், தி²னமித்³த⁴ம், உத்³த⁴ச்சகுக்குச்ச+மிச்சாதி³.

ஏகஜ்ஜா²யனபாவசனானம்-தீ³கோ⁴ ச மஜ்ஜி²மோ ச தீ³க⁴மஜ்ஜி²மம், ஏவம் ஏகுத்தர ஸம்யுத்தகம், க²ந்த⁴கவிப⁴ங்க³ம்.

லிங்க³விஸேஸானம்-இத்தீ² ச புமா ச இத்தி²புமம், தா³ஸீ ச தா³ஸோ ச தா³ஸிதா³ஸம், சீவரஞ்ச பிண்ட³பாதோ ச ஸேனாஸனஞ்ச கி³லானபச்சயபே⁴ஸஜ்ஜபரிக்கா²ரோ ச சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், திணஞ்ச கட்டோ² ச ஸாகா² ச பலாஸஞ்ச திணகட்ட²ஸாகா²பலாஸம். ‘‘லாபீ⁴ ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம்’’திபி தி³ஸ்ஸதி.

விவித⁴விருத்³தா⁴னம்-குஸலஞ்ச அகுஸலஞ்ச குஸலாகுஸலம், ஏவம் ஸாவஜ்ஜானவஜ்ஜம், ஹீனபணீதம், கண்ஹஸுக்கம், சே²கபாபகம், ஸுக²து³க்க²ம், அத⁴முத்தமம், படிகா⁴னுனயம், சா²யாதபம், ஆலோகந்த⁴காரம். ரத்திஞ்ச தி³வா ச ரத்திந்தி³வம், ‘‘ரத்திந்தி³வதா³ரக³வசதுரஸ்ஸா’’தி அபச்சயே கதே நுமஆக³மோ. அஹோ ச ரத்தி ச அஹோரத்தம், ‘‘தீ³கா⁴+ஹோவஸ்ஸேகதே³ஸேஹி ச ரத்யா’’தி அபச்சயே கதே ‘‘மனாத்³யாபாதீ³ன+மோ மயே சே’’தி ஓகாரோ.

தி³ஸானம்-புப்³பா³ ச அபரா ச புப்³பா³பரம், ஏவம் புரத்தி²மபச்சி²மம், த³க்கி²ணுத்தரம், புப்³ப³த³க்கி²ணம், புப்³பு³த்தரம், அபரத³க்கி²ணம், அபருத்தரம்.

நதீ³னம்-க³ங்கா³ ச யமுனா ச க³ங்கா³யமுனம், ஏவம் மஹீஸரபூ⁴.

திண+ருக்க²+பஸு+ஸகுண+த⁴ன+க²ஞ்ஞ+ப்³யஞ்ஜன+ஜனபதா³னம் வா. திணவிஸேஸானம்-உஸீரானி ச பீ³ரணானி ச உஸீரபீ³ரணம் உஸீரபீ³ரணானி வா. ஏவம் முஞ்ஜபப்³ப³ஜம் முஞ்ஜபப்³ப³ஜானி வா, காஸகுஸம் காஸகுஸா வா.

ருக்க²விஸேஸானம்-அஸ்ஸத்தா² ச கபிட்டா² ச அஸ்ஸத்த²கபிட்ட²ம் அஸ்ஸத்த²கபிட்டா² வா, ஏவம் அம்ப³பனஸம் அம்ப³பனஸா, க²தி³ரபலாஸம் க²தி³ரபலாஸா, த⁴வாஸ்ஸகண்ணம் த⁴வாஸ்ஸகண்ணா, பிலக்க²னிக்³ரோத⁴ம் பிலக்க²னிக்³ரோதா⁴, ஸாகஸாலம் ஸாகஸாலா.

பஸுவிஸேஸானம்-க³ஜா ச க³வஜா ச க³ஜக³வஜம் க³ஜக³வஜா வா, அஜா ச ஏளகா ச அஜேளகம் அஜேளகா, ஹத்தீ² ச கா³வோ ச அஸ்ஸா ச வளவா ச ஹத்தீ²க³வஸ்ஸவளவம் ஹத்தீ²க³வஸ்ஸவளவா, ரஸ்ஸத்தம். ஏவம் கோ³மஹிஸம் கோ³மஹிஸா, ஏணேய்யவராஹம் ஏணேய்யவராஹா, ஸீஹப்³யக்³க⁴தரச்ச²ம் ஸீஹப்³யக்³க⁴தரச்சா², குக்குடஸூகரம் குக்குடஸூகரா, ஏணேய்யகோ³மஹிஸம் ஏணேய்யகோ³மஹிஸா.

ஸகுணவிஸேஸானம்-ஹம்ஸா ச ப³கா ச ஹம்ஸப³கம் ஹம்ஸப³கா. ஏவம் காரண்ட³வசக்கவாகம் காரண்ட³வசக்கவாகா, மயூரகோஞ்சம் மயூரகோஞ்சா, ஸுகஸாலிகம் ஸுகஸாலிகா, ப³கப³லாகம் ப³கப³லாகா.

த⁴னானம்-ஹிரஞ்ஞஞ்ச ஸுவண்ணஞ்ச ஹிரஞ்ஞஸுவண்ணம் ஹிரஞ்ஞஸுவண்ணானி. ஏவம் ஜாதரூபரஜதம் ஜாதரூபரஜதானி, மணிஸங்க²முத்தவேளுரியம் மணிஸங்க²முத்தவேளுரியா.

த⁴ஞ்ஞானம்-ஸாலீ ச யவா ச ஸாலியவம் ஸாலியவா வா. ஏவம் திலமுக்³க³மாஸம் திலமுக்³க³மாஸானி, நிப்பாவகுலத்த²ம் நிப்பாவகுலத்தா².

ப்³யஞ்ஜனானம்-ஸாகோ ச ஸுவா ச ஸாகஸுவம் ஸாகஸுவா. ஏவம் க³ப்³யமாஹிஸம் க³ப்³யமாஹிஸா, ஏணேய்யவராஹம் ஏணேய, வராஹா. மிக³மயூரம் மிக³மயூரா.

ஜனபதா³னம்-காஸி ச கோஸலா ச காஸிகோஸலம் காஸிகோஸலா, வஜ்ஜீ ச மல்லா ச வஜ்ஜிமல்லம் வஜ்ஜிமல்லா, அங்கா³ ச மக³தா⁴ ச அங்க³மக³த⁴ம் அங்க³மக³தா⁴, ஏவம் சேதிவம்ஸம் சேதிவம்ஸா, மச்ச²ஸூரஸேனம் மச்ச²ஸூரஸேனா, குருபஞ்சாலம் குருபஞ்சாலா. நாமஞ்ச ரூபஞ்ச நாமரூபஞ்ச நாமரூபனாமரூபந்தி சதுரேகபஞ்சவோகாரவஸேன வத்தப்³பே³ ப³ஹுலாதி⁴காரா ஸரூபேகஸேஸம் கத்வா நாமரூபந்தி வுத்தம்.

ஏதஸ்மிம் ஏகத்தீ²பா⁴வகண்டே³ யம் வுத்தம் புப்³ப³ம், ததே³வ புப்³ப³ம் நிபததி, கமாதிக்கமே பயோஜனஸ்ஸா+பா⁴வா. க்வசி விபல்லாஸோபி ஹோதி, ப³ஹுலாதி⁴காரதோ, த³ந்தானம் ராஜா ராஜத³ந்தோ. சத்தே² ஸமாஹாரே ‘‘ஸபா⁴பரிஸாயா’’தி ஞாபகா க்வசி நபும்ஸகலிங்க³ம் ந ப⁴வதி, ஆதி⁴பச்சஞ்ச பரிவாரோ ச ஆதி⁴பச்சபரிவாரோ. ஏவம் ச²ந்த³பாரிஸுத்³தி⁴, படிஸந்தி⁴பவத்தியம்.