19. சத்தே²

அனேகம்ஸ்யாத்³யந்தம் சத்தே² ஏகத்த²ம் வா ஹோதி. ஸமுச்சயோ அன்வாசயோ இதரீதரயோகோ³ ஸமாஹாரோதி சஸத்³த³ஸ்ஸ அத்தோ² சதுப்³பி³தோ⁴.

தத்த² ஸமுச்சயா+ந்வாசயேஸு ஸமாஸோ ந ஹோதி, க்ரியாஸாபேக்க²தாய நாமானம் அஞ்ஞமஞ்ஞம் அயுத்தத்த²த்தா, யதா²-சீவரம் பிண்ட³பாதஞ்ச பச்சயம் ஸயனாஸனம் அதா³ஸி, தா³னஞ்ச தே³ஹி, ஸீலஞ்சரக்கா²ஹி. இதரீதரயோகே³ ஸமாஹாரே ச அஞ்ஞமஞ்ஞாபேக்க²த்தா ஸமாஸோ.

உப⁴யத்த²பதா⁴னே சத்தே² கத²+மேகத்தீ²பா⁴வோ ஸம்ப⁴வே+தி சே, வுத்தஞ்ஹி –

ஸப்பதா⁴னாபி யத்த²+த்தா², மிதோ² ஸாபேக்க²தா இவ;

க்ரியாஸம்ப³ந்த⁴ஸாமஞ்ஞா, சத்தே²+கத்த²ம் த+து³ச்சதேதி.

யஸ்மா ஏகத்தீ²பா⁴வேபி ஸதீயஸதீயத்தே² பதா⁴னம், தஸ்மா இத³ம் வுச்சதே –

ந+ஞ்ஞமஞ்ஞம் விஸேஸேந்தி, சத்தே² அத்தா² பதா³னிவ;

ஸத்த²வுத்யீ அதோ தேஸம், பதா⁴னத்த²ம்+பி⁴யுஜ்ஜதே.

இதரீதரயோகோ³ ச, ஸமாஹாரோத்ய+யம் த்³விதா⁴;

ஸமாஸோ து இமம் அஞ்ஞே, ஜானந்தே த்³வந்த³னாமதோ.

இதரீதரயோக³ஸ்மிம்+வயவத்த²ஸ்ஸ ஸம்ப⁴வோ;

ஸமுதா³யதிரோபா⁴வோ, பரம்வ லிங்க³+மஸ்ஸ ச.

ஸமுதா³யப்³ப⁴வோ யஸ்மிம்+வயவா ச திரோஹிதா;

ஸமாஹாரோத்ய+யம் சத்தோ², ஸோ ச ஹோதி நபும்ஸகே.

இதரீதரயோகோ³ யதா²-ஸாரிபுத்தோ ச மோக்³க³ல்லானோ ச ஸாரிபுத்தமோக்³க³ல்லானா, போ⁴ ஸாரிபுத்தமோக்³க³ல்லானா இச்சாதி³. அவயவபதா⁴னத்தா ப³ஹுவசனமேவ. ஸமணா ச ப்³ராஹ்மணா ச ஸமணப்³ராஹ்மணா, ஏவம் ப்³ராஹ்மணக³ஹபதிகா, க²த்தியப்³ராஹ்மணா, தே³வமனுஸ்ஸா, சந்தி³மஸூரியா.