ரூப ஸங்க³ஹ பரமத்த²தீ³பனீ

156. ஏவம் சித்தசேதஸிகே த்³வீஹி பபே⁴த³ப்பவத்தீஹி த³ஸ்ஸேத்வா இதா³னி யதா²னுப்பத்தம் ரூபம் த³ஸ்ஸேந்தோ ஆதி³கா³த² மாஹ. தத்த² ஏதம் பரிமாணம் அஸ்ஸாதி ஏத்தாவம். தேன ஏத்தவதா. நிபாதபத³ம்வா ஏதம். ஹி ஸத்³தோ³ பத³பூரணே. பபே⁴தோ³ச பவத்திச பபே⁴த³ப்பவத்தியோ. தாஹி ஸஹ யே வத்தந்தி தே ஸப்பபே⁴த³ப்பவத்திகா. ஏத்தாவதா ஸப்பபே⁴த³ப்பவத்திகா சித்தசேதஸிகா த⁴ம்மா மயா விப⁴த்தா. இதா³னி ரூபம் பவுச்சதீதி யோஜனா. ஸங்கே²பதோ உத்³தி³ஸனம் கத²னம் ஸமுத்³தே³ஸோ. ஸமுத்³தி³ட்ட²ஸ்ஸ ரூபஸ்ஸ புன விப⁴ஜனம் விபா⁴கோ³. ஸமுட்டா²தி ரூபம் ஏதேனாதி ஸமுட்டா²னம். கம்மாதி³. கலா வுச்சந்தி அவயவா. தா அப்பேந்தி பவிஸந்தி ஏத்தா²தி கலாபோ. பிண்டீ³தி அத்தோ². பவத்திக்கமதோதி உப்பத்திக்கமதோ. ஸலக்க²ணதோ ஸஸம்பா⁴ரதோச மஹந்தானி ஹுத்வா ப⁴வந்தி பாதுப⁴வந்தீதி மஹாபூ⁴தானி. தானி ஹி அத்தனோ ஸபா⁴வதோபி மஹந்தானிஏவ ஹுத்வா பாதுப⁴வந்தி உபாதா³ரூபானி உபாதா³யாதி.

[175] விபா⁴வனியம் பன மஹாடீகாயஞ்ச

‘‘ஸஸம்பா⁴ரதா⁴துவஸேனாதி’’ வுத்தம். தம் அனுபபன்னம்.

ந ஹி ஸஸம்பா⁴ரவத்து²வஸேனேவ தேஸம் அயம் வோஹாரோ பவத்தோதி ஸக்கா வத்தும். நச ஸலக்க²ணதோ மஹத்தேன வினா தேஸம் ஸஸம்பா⁴ரதோ மஹத்தம்னாம ஸம்ப⁴வதீதி. தஸ்மா யம் தேஸம் இந்த்³ரியானிந்த்³ரியப³த்³த⁴ஸந்தானேஸு பத²விபப்³ப³தாதி³வஸேன ஸமுத்³தே³ மச்ச²கச்ச²பாதி³வஸேன ஸஸம்பா⁴ரதோ மஹத்தம். தம்பி ஸலக்க²ணமஹத்தமூலகமேவாதி த³ட்ட²ப்³ப³ம். மஹாபூ⁴தாதிவா லோகே விஸம்வாத³ கட்டே²ன மாயாகாராவா ஆவிஸனக³ஹணேஸு அசிந்தேய்யட்டா²னட்டே²ன யக்கா²த³யோவா வஞ்சகட்டே²ன யக்கி²னியோவா வுச்சந்தி. தேனேவட்டே²ன தேஹி ஸதி³ஸத்தா இமானிபி மஹாபூ⁴தாவியாதி மஹாபூ⁴தானி. உப⁴யத்த²பிச மஹந்தானி அபூ⁴தானி அப்³பு⁴தானிவா ஏதேஸூதி நிப்³ப³சனம் யுஜ்ஜதியேவ.

[176] விபா⁴வனியம் பன

யக்கி²னிம் விஸும் உபமாமத்தம் கத்வா ‘‘மனாபவண்ணஸண்டா²னா தீ³ஹிவா ஸத்தானம் வஞ்சிகா யக்கி²னீஆத³யோ விய மனாப இத்தி²புரிஸரூபத³ஸ்ஸனாதி³னா ஸத்தானம் வஞ்சகத்தா மஹந்தானி அபூ⁴தானி ஏதேஸூதி மஹாபூ⁴தாதி’’ வுத்தம். தம் அட்ட²கதா² ய ந ஸமேதி.

அட்ட²கதா²யஞ்ஹி மஹாபூ⁴தஸாமஞ்ஞதோதி பத³ஸ்ஸ வித்தா²ரே ஏவ மாயாகாரோ யக்கோ² யக்கி²னீதி தயோ மஹாபூ⁴தா வுத்தாதி. சதுன்னஞ்சமஹாபூ⁴தானந்தி உபயோக³த்தே² ஸாமிவசனம். உபாதா³யாதி த³ள்ஹம் நிஸ்ஸாய. பவத்தந்தி பாட²ஸேஸோ. உபாதா³ய ரூபந்திவா ஸமாஸபத³ம் த³ட்ட²ப்³ப³ம்.

[177] விபா⁴வனியம் பன

‘‘உபாதா³ய பவத்தம் ரூபம் உபாதா³ரூபந்தி’’ வுத்தம். தம் இத⁴ ந யுஜ்ஜதி.

ந ஹி இமஸ்மிம் பாடே² கத்த²சி யகாரவிரஹோ தி³ட்டோ². ததா² ஹி மூலடீகாயம் உபாதா³யதி நிஸ்ஸயதீதி உபாதா³யம். தமேவ ரூபந்திபி வுத்தம். பத²யதீதி பத²வீ. ஸஹஜாதரூபானம் பதிட்டா²ன பா⁴வேன பக்கா²யதி உபட்டா²தீதி அத்தோ². புது² மஹந்தீ ஹுத்வா ஜாயதீதிபி பத²வீ. பகாரேன த²வீயதி ஸப்³பே³ஸம் ரூபஸம்பா⁴ரானம் அதி⁴ட்டா²னத்தா. அயம் தேஸம் அதி⁴ட்டா²னா பதிட்டா²னா வத்து²பூ⁴தா பூ⁴மி பூ⁴தாதிஆதி³னா நானாப்பகாரேன கு³ணபதே³ன அபி⁴த்த²வீயதீதி பத²வீ. ஸாஏவ நிஸத்தனிஜீவட்டே²ன தா⁴தூதி பத²வீதா⁴து. ஆபேதி ஸஹஜாதரூபானி ப்³யாபேத்வா திட்ட²தி, அப்பாயதி வா தானி ஸுட்டு² ப்³ரூஹேதி வட்³டே⁴தீதி ஆபோ. தானிவா அவிப்பகிண்ணானி கத்வா பு⁴ஸோ பாதி ரக்க²தி, பிவதிவா விவந்தோ விய தானி ஸங்க³ண்ஹதி ஸம்பிண்டே³தீதி ஆபோ. ஸோயேவ தா⁴தூதி ஆபோதா⁴து. தே ஜதி திக்க²பா⁴வேன ஸமுஜ்ஜலந்தோ விய ஸஹஜாதத⁴ம்மானம் மஜ்ஜே² பகாஸதி, தேஜேதிவா நிஸேதி ஸஹஜாதத⁴ம்மே திக்க²தா²ம ப³லே கரோதி, பரிபாசேதிவா உஸ்மாபேதீதி தேஜோ, ஸோ ஏவ தா⁴தூதி தேஜோதா⁴து. வாயதி ஸமீரேதி தே³ஸந்தருப்பத்தி ஹேதுபா⁴வேன பூ⁴தஸங்கா⁴டம் தே³ஸந்தரம் க³மேதீதி வாயோ. வாயதி வா ஸஹஜாதத⁴ம்மே அபதமானே கத்வா வஹதீதி வாயோ. ஸோஏவ தா⁴தூதி வாயோதா⁴து. தத்த² கக்க²ளலக்க²ணா பத²வீ. ஆப³ந்த⁴னலக்க²ணோ ஆபோ. உண்ஹத்தலக்க²ணோ தேஜோ. வித்த²ம்ப⁴னலக்க²ணோ வாயோ. ஏத்த² ஸியா, கஸ்மா பத²வீ கக்க²ளலக்க²ணாதி வுத்தா. நனு ஸா முது³பூ⁴தாபி ஹோதீதி. ஸச்சம், முது³பூ⁴தாபி பன ஸா ஸேஸபூ⁴தத்தயம் உபாதா³ய கக்க²ளா த்வேவ ஸங்க்²யம் க³ச்ச²தி. அஞ்ஞமஞ்ஞம் உபாதா³யேவ பன அயம்முது³ அயம் கக்க²ளாதி ப⁴வதி. தேனேவ முது³கக்க²ளானம் தீ³க⁴ரஸ்ஸானம் விய அனவட்டா²னதா ஹோதி. முது³பூ⁴தாபி ஹி ததோ முது³தரம் பத்வா கக்க²ளானாம ஜாதா. கக்க²ளாபி கக்க²ளதரம் பத்வா முது³பூ⁴தானாம ஜாதாதி. ஆப³ந்த⁴னலக்க²ணோ ஆபோதி வுத்தோ. ஸோச பகதிஉத³கே அதி⁴மத்தோதி பகதிஉத³கம் ப³த்³த⁴ம் க⁴னீபூ⁴தமேவ ஸியாதி சே. ந. ஆப³ந்தி⁴தப்³பா³ய பத²வியா தத்த² பரிது³ப்³ப³லத்தாதி, யத்த² பன பத²வீ ப³லவதீ ஹோதி தத்தே²வ ஸோ ப³த்³த⁴தரம் ஆப³ந்த⁴தீதி. உண்ஹத்த லக்க²ணோ தேஜோதி வுத்தோ. ஏவஞ்சஸதி ஸீதபா⁴வோ தேஜோயேவ ந ஸியாதி சே. ந. உஸதி த³ஹதி பரிபாசேதி பரிண தபா⁴வம் க³மேதீதி உண்ஹோனாம. ஸீதபா⁴வோச த³ஹதி பரிபாசேதி தப்³பா⁴வம் க³மேதியேவாதி. வுத்தஞ்ச மூலடீகாயம் தேஜோஏவ ஹி ஸீதம். ஹிமபாதஸமயாதீ³ஸு ஸீதஸ்ஸ பரிபாசகதாத³ஸ்ஸன தோதி. வித்த²ம்ப⁴ன லக்க²ணோ வாயோதி வுத்தோ. ஸோ பன க⁴ன த²த்³தே⁴ஸு ஸிலாத²ம்பா⁴தீ³ஸு நலப்³ப⁴தீதி சே. ந. தத்த² ஹி பத²வீ அத்தனா ஸஹஜாதவாயுவித்த²ம்ப⁴னம் லபி⁴த்வா தா²மப்பத்தா தி²ரதரப்பத்தாச ஹுத்வா வஹதீதி. சக்க²தீதி சக்கு². ஸமவிஸமம் ஆசிக்க²தி ஸமவிஸமஜானனஸ்ஸ தம்மூலகத்தா. ரூபம்வா அஸ்ஸாதே³தி ஆபாதம் ஆக³தாக³தஸ்ஸ ரூபஸ்ஸ அனிராகரணதோ. தம்வா விபா⁴வேதீதி அத்தோ². ஸுணாதீதி ஸோதம். ஸுணந்தி ஸுய்யந்திவா ஏதே நாதி ஸோதம். கா⁴யதீதி கா⁴னம். கா⁴யந்தி கா⁴யியந்திவா ஏதேனாதி கா⁴னம். ஜீவிதனிமித்தம் ரஸோ ஜீவிதந்தி வுச்சதி. தஸ்மிம் நின்னதாய தம் அவ்ஹாயதீதி ஜிவ்ஹா. அத²வா. ஜீவிதம் வஹதி ஏதாயவா தம் வஹந்தி பவத்தேந்தி ஜீவிதவுத்திஸம்பாத³னத்தாதி ஜிவ்ஹா. ஜீதிவா ஜயோ பராஜயோவா வுச்சதி. தது³ப⁴யம் வஹதி வஹந்திவா ஏதாயாதி ஜிவ்ஹா. ஸஸம்பா⁴ரஜிவ்ஹா. யதா²ஹ –

புரிஸஸ்ஸ ஹி ஜாதஸ்ஸ, குதா³ரீ ஜாயதே முகே²;

யாய சி²ந்த³தி அத்தானம், நரோ து³ப்³பா⁴ஸிதம் ப⁴ணந்தி.

இத⁴ பன தம் ஸஹசரிதத்தா ஜிவ்ஹாதி பஸாத³ரூபமோ வுச்சதி. குச்சி²தானம் கேஸாதீ³னம் பாபத⁴ம்மானஞ்ச ஆயோ உப்பத்திட்டா²னந்தி காயோ. ஸஸம்பா⁴ரகாயோ. இத⁴ பன தம் ஸஹசரிதோ பஸாத³ காயோஏவ அதி⁴ப்பேதோ. பஸீத³ந்தீதி பஸாதா³. பஸீத³ந்தி வா ஏத்த² சந்த³மண்ட³லாதீ³னி ஆரம்மணனிமித்தானி தத்த² ஸம்ஸீத³மானானி விய ஸரூபதோ ஸந்தி³ஸ்ஸந்தீதி பஸாதா³, ஸுபரிஸுத்³த⁴ஆதா³ஸமண்ட³ஸதி³ஸா கம்மஜமண்டா³. இமே பன பஞ்ச த³ட்டு²காமதாதி³ நிதா³ன கம்மஸமுட்டா²ன பூ⁴தபஸாத³ லக்க²ணா ரூபாதி³ அபி⁴கா⁴தாரஹ பூ⁴தபஸாத³லக்க²ணா வா சக்கு²பஸாதா³த³யோ த³ட்ட²ப்³பா³. தத்த² சக்கு² தாவ ஸேதமண்ட³ல பரிக்கி²த்தஸ்ஸ கண்ஹமண்ட³லஸ்ஸ மஜ்ஜே² ஊகாஸிரபமாணே அதிமுகே² டி²தானம் ஸரீரஸண்டா²னுப்பத்தி பதே³ஸபூ⁴தே தி³ட்ட²மண்ட³லே தேலமிவ ஸத்தபிசுபடலானி ஸத்தஅக்கி²படலானி ப்³யாபேத்வா திட்ட²தி. ஸோதம் ஸோதபி³லப்³ப⁴ந்தரே அங்கு³லிவேட²னாகாரம் உபசிததனுதம்ப³லோமம் பதே³ஸம் ப்³யாபேத்வா திட்ட²தி. கா⁴னம் நாஸிகப்³ப⁴ந்தரே அஜபத³ஸண்டா²னம் பதே³ஸம் ப்³யாபேத்வா திட்ட²தி. ஜிவ்ஹா ஸஸம்பா⁴ர ஜிவ்ஹாமஜ்ஜே² உப்பல த³லக்³க³ ஸண்டா²னம் பதே³ஸம் ப்³யாபேத்வா திட்ட²தி. காயோ பன மஹந்தி யா கப்பாஸ படலவட்டியம் ஆஸித்ததேலம்விய த²பேத்வா பாசக தேஜஸ்ஸ பதிட்டா²னட்டா²னம் கேஸக்³க³ லோமக்³க³ நக²க்³க³ ஸுக்க²சம்மானிச அவஸேஸம் ஸகலஸரீரம் ப்³யாபேத்வா திட்ட²தீதி. தே பன பஞ்ச யதா²ரஹம் பஞ்சத்³வாரிகசித்தானம் வத்து²த்³வாரபா⁴வம் ஸாதே⁴ந்தி. தேஸுச ஏகேகஸ்ஸ சதஸ்ஸோ சதஸ்ஸோ தா⁴துயோ ஸந்தா⁴ரணஆப³ந்த⁴ன பரிபாசன ஸமுதீ³ரண கிச்சேஹி உபகாரம் கரோந்தி. யதா²க²த்தி யகுமாரஸ்ஸ சதஸ்ஸோ தா⁴தியோ தா⁴ரண நஹாபன மண்ட³ன பீ³ஜன கிச்சேஹீதி. உதுசித்தாஹாராச நம் உபத்த²ம்பே⁴ந்தி. யதா² தம் க²த்தியகுமாரம் பிது ஜேட்ட²பா⁴து ஜேட்ட²ப⁴கி³னியோவிய. ஆயுச நம் ஸுட்டு² அனுபாலேதி. யதா² தம் க²த்தியகுமாரம் தி³ஸாபாமோக்கோ² ராஜஸம்மதோ மஹாபி⁴ஸக்கோவிய. வண்ணாத³யோச நம் பரிவாரேந்தி. யதா² தம் க²த்தியகுமாரம் ஸஹஜாதா அமச்சபுத்தா வியாதி. யஸ்மா பன ஸத்தானம் சித்தம் நாம விசித்தம் ஹோதி. சித்தவிசித்ததாய ஸஞ்ஞாவிசித்தா. ஸஞ்ஞாவிசித்ததாய தண்ஹாவிசித்தா. தண்ஹாவிசித்த தாய கம்மானி விசித்தானி. கம்மவிசித்ததாய கம்மஸமுட்டா²னானி பூ⁴தானி விசித்தானி. பூ⁴தவிசித்ததாய இமே பஸாதா³ விசித்தா. அஞ்ஞமஞ்ஞம் அஸதி³ஸா ஹோந்தி. தேஹி பஸாத³மண்ட³பூ⁴தாபி ஸமானா கேசி ரூபஸ்ஸேவ அபி⁴கா⁴தாரஹா ஹோந்தி, ந ஸத்³தா³தீ³னம். கேசி ஸத்³தா³தீ³னம் ஏவ, ந ரூபஸ்ஸாதி. தஸ்மா தேஸம் அஞ்ஞமஞ்ஞஞ்ச அஞ்ஞரூபேஹிச லக்க²ணதோ அஸம்மிஸ்ஸதா வேதி³தப்³பா³தி.

ரூபயதீதி ரூபம். வண்ணவிஸேஸம் ஆபஜ்ஜித்வா ஹத³யங்க³தபா⁴வம் பகாஸேதி. பகதியாபி வா யம்கிஞ்சித³ப்³ப³ம் ஸமவிஸமம்வா பகாஸே தீதி அத்தோ². ஸப்பதி ஸோதவிஞ்ஞேய்யபா⁴வம் க³ச்ச²தீதி ஸத்³தோ³. ஸத்³த³யதீதி ஸத்³தோ³. தம் தம் அத்த²ம்வா அத்தனோ வத்து²ம்வா ஆசிக்க²தீதி அத்தோ². ஸத³திவா தம் தம் தி³ஸம்வா தே³ஸம்வா க²ணேன விஸ்ஸரதி விப்ப²ரதீதி ஸத்³தோ³. க³ந்த⁴யதீதி க³ந்தோ⁴. அத்தனோ வத்து²ம்ஸூசேதீதி அத்தோ². க³ச்ச²தீதி கோ³. வாதோ. தேன தா⁴ரீயதீதி க³ந்தோ⁴. ரஸீயதி அஸ்ஸாதீ³யதீதி ரஸோ. ரஸந்திவா தம் அஸ்ஸாதே³ந்தீதி ரஸோ. பு²ஸீயதீதி போ²ட்ட²ப்³ப³ம். பு²ஸனஞ்சேத்த² பஸாதே³ன ஸஹ க⁴ட்டனம் கலாபந்தரபூ⁴தேஹி ஸத்³தி⁴ம் படிஹனனஞ்ச வேதி³தப்³ப³ம். தது³ப⁴யம்பி ஆபோ தா⁴துயா நத்தீ²தி வுத்தம் ஆபோதா⁴துவிவஜ்ஜிதந்தி. கஸ்மா பன தம் தஸ்ஸா நத்தி². நனு ஸீததாவா த்³ரவதாவா பு²ஸித்வா க³ய்ஹதீதி. வுச்சதே, ஸீததா ஹி தேஜோயேவ, ந ஆபோ. யதி³ ஹி ஸா ஆபோயேவ ஸியா. பக்குமிதே ஸந்தத்தே லோஹரஸேபிஸ்ஸ ஸீததா லப்³ப⁴மானா ஸியா. ஸோ ஹி ரஸோ ஆபாதி⁴கோ ஹோதீதி. ஏவம் பன நலப்³ப⁴தி. தஸ்மா ஸா தேஜோயேவ, ந ஆபோதி. அபிச, ஸீதுண்ஹானம் ஏகஸ்மிம் கலாபே ஸஹ அப்பவத்தனதோ ஓரபாரானம் விய தேஸம் அனவட்டா²னதோச விஞ்ஞாயதி. ந ஹி ஸீதகலாபே உண்ஹம், உண்ஹகலாபேவா ஸீதம் ஸஹ பவத்ததி. யஸ்மிம்ச வத்து²ம்ஹி புப்³பே³ ஸீதஸஞ்ஞா ஸண்டா²தி. பச்சா² ததோ ஸீததரே ஆக³தே தஸ்மிம்யேவ புன உண்ஹஸஞ்ஞா ஸண்டா²தி. புப்³பே³ உண்ஹஸஞ்ஞாயம்பி ஏஸேவ நயோ. ததா² உண்ஹே மந்தே³ ஸீதஸஞ்ஞா ஸண்டா²தி. ஸீதே மந்தே³ உண்ஹஸஞ்ஞாதி.

அத² பன த்³ரவபா⁴வபூ⁴தோ ஆபோ பு²ஸித்வா க³ய்ஹதி. அயோ பிண்டா³தீ³ஸு ஆப³ந்த⁴னபூ⁴தோபி பு²ஸித்வாவ க³ய்ஹேய்ய. ஏவஞ்ச ஸதி யதா² தேஸு இதரானி தீணி பூ⁴தானி வினா இதரீதரேன விஸும் விஸும் காயிக ஸுக²து³க்கா²னம் ஆரம்மணபூ⁴தானி ஹோந்தி. ததா² ஸோபி வினா இதரேஹி விஸும் காயிகஸுக²து³க்கா²னம் ஆரம்மணபூ⁴தோஏவ ஸியா. ந பன ஹோதி. யஞ்ஹி தானி அயோபிண்டா³தீ³னி பு²ஸந்தானம் காயிகம் ஸுக²ம்வா து³க்க²ம்வா உப்பஜ்ஜதி, தம் ஸண்ஹத²த்³த⁴தா வஸேனவா உப்பஜ்ஜதி. ஸீதுண்ஹதாவஸேனவா அப்³ப⁴ந்தரத²ம்ப⁴னஸ்ஸ மந்த³கா³ள்ஹதாவஸேனவா. நோ அஞ்ஞதா²தி. தஸ்மா புரிமபா⁴கே³ தீணி பூ⁴தானி பு²ஸித்வாவா வண்ணம் தி³ஸ்வாவா பச்சா² பா⁴கே³ ஸுத்³தே⁴ன மனோ விஞ்ஞாணஸந்தானேன தீ³க⁴ரஸ்ஸாதி³ஸண்டா²னம்வா ரத்தியம் அலாதசக்கம் வா தம்தம்சி²த்³த³விவரம்வா ஜானந்தா விய பத²மம் த்³ரவதாஸஹிதானி விலீனானி முதூ³னி தீணி பூ⁴தானி பத²விம் ஏவ வா பு²ஸித்வா பச்சா² ஸுத்³தே⁴ன மனோ விஞ்ஞாணஸந்தானேன விஸும் த்³ரவபா⁴வம் அத்³த³திந்தபா⁴வம் ஜானந்தி. ஏவம் ஸந்தேபி தம் பு²ஸித்வா ஜானந்தா இச்சேவ மஞ்ஞந்தி அவிஸேஸவிது³னோதி. கு³ன்னம் அபி⁴ண்ஹம் சரணட்டா²னம் கோ³சரோ. கோ³சரஸதி³ஸத்தா இத⁴ கோ³சரோ. கோ³திவா இத⁴ சக்கா²தீ³னி இந்த்³ரியானி வுச்சந்தி. தானி விஞ்ஞாணாதி⁴ட்டி²தானி ஹுத்வா ஏதேஸு சரந்தி. ஏதானிவாதேஸு சரந்தி பவத்தந்தி க⁴ட்டேந்தீதி கோ³சரா. தேயேவ இத⁴ ஏகத்தம் உபனேத்வா கோ³சரரூபந்தி வுத்தம். இமானிபன பஞ்ச யதா²க்கமம் சக்கா²தீ³ஸு படிஹனன லக்க²ணானி ரூபாதீ³னீதி வேதி³தப்³பா³னி.

இத்தீ² வுச்சதி அவிஸதா³காரஸண்டி²தம் க²ந்த⁴பஞ்சகம். யஸ்ஸ பன த⁴ம்மஸ்ஸ ஆனுபா⁴வேன தம் ததா² ஸண்டா²தி பவத்ததி. ஸோ இத்தி² யா பா⁴வோதி இத்த²த்தம். புரிஸோ வுச்சதி விஸதா³காரஸண்டி²தம் க²ந்த⁴பஞ்சகம். ஸேஸம் வுத்தனயமேவ. தத்த² இத்தி²லிங்க³ இத்தி²னிமித்த இத்தி² குத்த இத்தா²கப்பானம் ஹேதுபா⁴வ லக்க²ணம் இத்த²த்தம். புரிஸலிங்க³ புரிஸனிமித்த புரிஸகுத்த புரிஸாகப்பானம் ஹேதுபா⁴வ லக்க²ணம் புரிஸத்தம். தத்த² லிங்க³ந்தி பதா⁴னங்க³பூ⁴தம் மஹாஸண்டா²னம். நிமித்தந்தி பச்சங்க³பூ⁴தம் கு²த்³த³கஸண்டா²னம். குத்தந்தி கீளாலிலாதி³ க்ரியாவிஸேஸோ. ஆகப்போதி க³மனாதி³கோ ஆகாரவிகாரோ. ஸப்³பே³பேதே க²ந்த⁴பஞ்சகஸ்ஸ பவத்திவிஸேஸாஏவ. யே ஸத்³த³ஸத்தே²ஸு லிங்க³ந்தி வுச்சந்தி. யேஸஞ்ச வஸேன அயம் இத்தீ²ஏவ, ந புரிஸோ. அயம் புரிஸோஏவ, ந இத்தீ²தி ஸஞ்ஜானந்தி. யஸ்மா பனேத்த² ஸண்டா²னாதீ³னம் அவிஸதா³தி³பா⁴வோஏவ அத்த²தோ இத்தி²புரிஸதா ஹோதி. தது³ப⁴யமுத்தபா⁴வோச நபும்ஸகதா. ஸோச அக்க²ரபத³ ஸங்கா²தேஸு வசனேஸு ச வசனத்தே²ஸுச யதா²ரஹம் ஸந்தி³ஸ்ஸதியேவ. தஸ்மா இந்த்³ரியரஹிதேஸுபி பதே³ஸுச ருக்கா²தீ³ஸு பத³த்தே²ஸுச பரியாயேன இத்தி²புமனபும்ஸகதாஸித்³தி⁴ வேதி³தப்³பா³தி.

[178] யம் பன விபா⁴வனியம்

‘‘இத்தீ²னம் அங்க³ஜாதம் இத்தி²லிங்க³’’ந்தி வுத்தம். தம் ந ஸுந்த³ரம்.

ந ஹி கத்த²சி பாளியம் அட்ட²கதா²ஸுச நிமித்தஸத்³தோ³விய லிங்க³ஸத்³தோ³ அங்க³ஜாதே பாகடோ தி³ட்டோ²தி.

[179] யஞ்ச தத்த²

‘‘இத்தி²ஸண்டா²னம் இத்தா²கப்போ’’தி வுத்தம். தம்பி ந ஸுந்த³ரம்.

ந ஹி லிங்க³ஸத்³தோ³ விய ஆகப்பஸத்³தோ³ ஸண்டா²னே பாகடோ தி³ட்டோ²தி. ஸேஸம்பன தத்த² வுத்தம் யம்கிஞ்சி அட்ட²கதா²ய அஸமேந்தம்பி தேன பரியாயேன யுஜ்ஜதியேவ. ப⁴வந்தி பவத்தந்தி தம்ஸஹிதே க²ந்த⁴ஸந்தானே ஏஸா இத்தீ², ஏஸோ புரிஸோதி ஏவம் பவத்தா ஸத்³த³ பு³த்³தி⁴யோ ஏதேனாதி பா⁴வோ ப⁴வந்திவா பாதுப⁴வந்தி தம்ஸஹிதே க²ந்த⁴ஸந்தானே லிங்கா³தீ³னி ஏதஸ்மிம் ஸதீதி பா⁴வோ. ஸோ ஏவ ரூபந்தி பா⁴வரூபம். ஹத³ந்தி ஸத்தா தம்தம்அத்த²ம்வா அனத்த²ம்வா பூரேந்தி ஏதேனாதி ஹத³யம். ஹத³ந்திவா ஸத்தா இதோ நானாவிகக்கே ஓஸஜந்தி முஞ்சந்தீதி ஹத³யம். ஹரந்திவா பரிஹரந்தி தம் ஸத்தா ஜீவிதம்விய த³யந்தி ரக்க²ந்திசாதி ஹத³யம். வஸந்தி நிவஸந்தி சித்தசேத ஸிகாத⁴ம்மா ஏத்தா²தி வத்து². ஹத³யஞ்ச தம் வத்து²சாதி ஹத³யவத்து². தா⁴துத்³வயனிஸ்ஸயலக்க²ணம் வத்து²ரூபம். தம் பன ஹத³யகோஸப்³ப⁴ந்தரே அட்³ட⁴பஸதமத்தம் லோஹிதம் ப்³யாபேத்வா திட்ட²தீதி வேதி³தப்³ப³ம். த⁴ம்மஸங்க³ணியம் பன தே³ஸனாபே⁴த³ரக்க²னத்த²ம் அவத்வா பட்டா²னேஏவ தம் வுத்தம். யதா²ஹ-வத்து² குஸலானம் க²ந்தா⁴னம் நிஸ்ஸயபச்சயேன பச்சயோ. வத்து² அகுஸலானம் க²ந்தா⁴னம் நிஸ்ஸயபச்சயேன பச்சயோதிஆதி³. ஏத்த²ச ச²ஹி வத்தூ²ஹி அஞ்ஞம் வத்து²னாம நத்தி². தேஸுச புரிமானி பஞ்ச குஸலாதீ³னம் நிஸ்ஸயாஏவ ந ஹோந்தி. தஸ்மா தேஸம் நிஸ்ஸயபா⁴வேன தத்த² வுத்தம் வத்து²னாம விஸும் ஏகம் வத்து²ரூபமேவாதி ஸித்³த⁴ந்தி.

[180] விபா⁴வனியம் பன

யம் ரூபம் நிஸ்ஸாயாதி பாட²ஸ்ஸ உத்³த⁴டத்தா ரூபஸாமஞ்ஞபஸங்கோ³ ஹோதீதி தம் விஸோதே⁴தும் யுத்தினாம வுத்தா. பட்டா²னே பன ப³ஹூஸு அனஞ்ஞஸாதா⁴ரணேஸு டா²னேஸு வத்து²னாமேன விஸேஸேத்வா வுத்தத்தா ஸோபஸங்கோ³ நத்தி²யேவாதி த³ட்ட²ப்³ப³ம்.

ஜீவந்தி ஸஹஜாதத⁴ம்மா யேனாதி ஜீவிதம். தேஸம் ஜீவனே ஆதி⁴பச்சயோகே³ன தேஸு இந்த³ம் இஸ்ஸரம் அத்தானம் கரோதீதி இந்த்³ரியம். ஜீவிதஞ்ச தம் இந்த்³ரியஞ்சாதி ஜீவிதிந்த்³ரியம். ஸஹஜாதா நுபாலன லக்க²ணம் ஜீவிதிந்த்³ரியம். யதா² ஹி பீ³ஜனிப்³ப³த்தானி உப்பலாதீ³னி பீ³ஜேவினட்டே²பி உத³கானுபாலிதானி சிரம்பி காலம் ஜீவந்தி. ஏவமேவம் நிருத்³த⁴ கம்மனிப்³ப³த்தானி கம்மஜரூபானி கம்மே அஸந்தேபி ஜீவிதானுபாலிதானி ஸந்ததிவஸேன வஸ்ஸஸதம்பி வஸ்ஸஸஹஸ்ஸம்பி கப்பம்பி ஸோளஸகப்பஸஹஸ்ஸானிபி ஜீவந்தியேவ, ததா² ஹி ஜீவிதரஹிதானி இதரரூபானி ஜீவந்தானினாம நஹோந்தி. தானி ஹி யேன ஏகேன சித்தேனவா உதுனாவா ஆஹாரேனவா ஜாயந்தி. தஸ்மிம் நிருத்³தே⁴ நிருஜ்ஜ²ந்தி, பரம் முஹுத்தமத்தம்பி ஸந்தானம் க⁴டேதும் நஸக்கோந்தி. தேஸு ஹி சித்தஜரூபானம் ஸந்ததிபச்சுப்பன்னம் ஏகவீதி² ஏகஜவனவார ஏகஸமாபத்திவாரேன பரிச்சி²ன்னம் ஹோதி. உதுஜாஹாரஜானஞ்ச ஸபா⁴கே³க உதுஆஹார வஸேன பரிச்சி²ன்னம் ஹோதி. கம்மஜரூபானம் பன விஸும் ஸந்ததிபச்சுப்பன்னம்னாம நத்தி². தேஸம் ஏகப⁴வபரிச்சி²ன்னம் அத்³தா⁴பச்சுப்பன்னமேவ ஹோதீதி. யதி³ ஏவம் அரூபத⁴ம்மானம் கத²ந்தி. தேஹி ஜீவிதயோகே³ன ஜீவந்தாஏவ ஹோந்தி. ஏவம்ஸந்தேபி தேஸம் ஸந்ததிபச்சுப்பன்னம் தி³ஸ்ஸதீதி. வுச்சதே, அரூபத⁴ம்மேஸு விபாகானி தாவ கம்மஜரூபஸதி³ஸானி. தானிபி ஹி அஸதி வீதி²சித்துப்பாதே³ யாவஜீவம்பி ஏகஸந்ததிவஸேன பவத்திஸ்ஸந்தியேவ. இதரானி பன யஸ்ஸ ஆரம்மணஸ்ஸ ஆபாதாக³தத்தா உப்பஜ்ஜந்தி. தஸ்மிம் நிருத்³தே⁴ தத³பா⁴வேபி ததா³ரம்மணா ப³ஹூ சித்தஸந்ததியோ ஜீவிதஸ்ஸஅத்³தா⁴னப²ரணானுபா⁴வேன பவத்தந்தியேவ. அபிச, யாவக²ந்த⁴பரினிப்³பா³னா அனந்தரபச்சயுபனிப³ந்தே⁴ன அப்³போ³ச்சி²ன்னம் பவத்தமானாய சித்தஸந்ததியாவஸேனபி அயமத்தோ² வத்தப்³போ³. தேனேவ ஹி கிலேஸஸீஸம் அவிஜ்ஜா. பவத்தஸீஸம் ஜீவிதிந்த்³ரியந்தி வுத்தம்.

[181] விபா⁴வனியம் பன

ஆஹாரஜாதீ³னம் ஆஹாராதி³யேவ உப்பத்தியாபி டி²தியாபி காரணம் ஹோதி. கஸ்மா, தங்க²ணே த⁴ரமானத்தா. கம்ம ஜானம் பன கம்மம் உப்பத்தியாஏவ காரணம், ந டி²தியா. கஸ்மா, தங்க²ணாபா⁴வதோ. ஜீவிதேன பன அனுபாலிதத்தா ஏவ தேஸம் க²ணட்டி²தி ஸித்³தா⁴தி இமினா தி⁴ப்பாயேன யம் வுத்தம் ‘‘யதா²ஸகம் க²ணமத்தட்டா²யீனம்பி ஹி ஸஹஜாதானம் பவத்திஹேதுபா⁴வேன அனுபாலகம். ந ஹி தேஸம் கம்மம்யேவ டி²திகாரணம் ஹோதி. ஆஹாரஜாதீ³னம் ஆஹாராதி³ விய கம்மஸ்ஸ தங்க²ணாபா⁴வ தோதி’’. தம் ந யுத்தம்.

த⁴ம்மானஞ்ஹி க²ணட்டி²தினாம ஏககலாபக³தஸஹஜாதபச்சயா யத்தாஏவ ஹோதி. ந நானாகலாபக³தஜனகபச்சயாயத்தா. இதரதா² உப்பாத³க்க²ணே லப்³ப⁴மானானம் உபசயஸந்ததீனம் விய டி²திக்க²ணே லப்³ப⁴மானாய ஜரதாயபி குதோசிஸமுட்டா²னதா பாளியம் வுத்தா ஸியாதி. அபிச, க²ணட்டி²தினாம ஸபா⁴வஸித்³தா⁴ஏவ. ந ஹி உப்பன்னா த⁴ம்மா பச்சயவேகல்லேன அத்தனோ க²ணேஸு பரிபுண்ணம் அட்ட²த்வா அந்தராவ பி⁴ஜ்ஜந்தீதி அத்தி². நச பச்சயாதி⁴மத்தேன அதிரே கதரம் திட்ட²ந்தீதி அத்தி². தஸ்மா க²ணட்டி²தியம் உபத்த²ம்ப⁴யமானாபி ஆஹாராத³யோ அனுபாலயமானஞ்ச ஜீவிதம் பச்சா² ப³லவரூபஸந்ததி பவத்திஅத்தா²யஏவ உபத்த²ம்பே⁴ந்தி பாலேதிச. ந க²ணட்டி²திபவத்தியாதி. ஏத்தாவதா ஸப்³பே³ஸம்பி க²ணட்டி²தினாம த⁴ரமானஜனகாயத்தா வா ஜீவிதாயத்தாவா நஹோதீதி ஸித்³த⁴ம் ஹோதி. யதி³ பன தம் ஸந்ததிபவத்திமேவ ஸந்தா⁴ய வுத்தம் ஸியா, ஏவம்ஸதி யுஜ்ஜேய்யாதி. அட்ட² கதா²யம்பி ஸந்தேபிச அனுபாலன லக்க²ணாதி³ம்ஹி விதா⁴னே அத்தி²க்க²ணேயேவ தம் தேத⁴ம்மே பாலேதீதிஆதி³வசனே யதா²ஸந்ததிட்டி²தி லப்³ப⁴தி. ததா² விசாரேத்வா க³ஹேதப்³பா³தி. இத³ம் பன பாசகக்³கி³னா ஸஹ ஸகலம் உபாதி³ன்னகஸரீரம் ப்³யாபேத்வா திட்ட²தீதி. கப³ளம் கரீயதீதி கப³ளீகாரோ. ஆஹரீயதி அஜ்ஜோ²ஹரீயதீதி ஆஹாரோ. கப³ளீகாரோச ஸோ ஆஹாரோசாதி கப³ளீகாராஹாரோ. கப³ளீகாரோ ஆஹாரோதிபி பாடோ². இத³ஞ்ச ஸவத்து²க வசனம் த³ட்ட²ப்³ப³ம். அத²வா, கப³ளீகாராஹாரப⁴க்கா²னம் ஸத்தானம் அத்தபா⁴வம் பு⁴ஸோ ஹரதி அத்³தா⁴னம் பவத்தேதீதி ஆஹாரோ. க²ஜ்ஜ போ⁴ஜ்ஜாதி³கே கப³ளீகாரே ஆஹாரோ தன்னிஸ்ஸிதத்தா தப்பரியா பன்னத்தாசாதி கப³ளீகாராஹாரோ. இமஸ்மிம்அத்தே² ஸதி நிப்³ப³த்தித ஓஜா ஏவ லப்³ப⁴தி. அத்த²தோ பன அங்க³மங்கா³னுஸாரினோ ரஸஸ்ஸ ஸாரபூ⁴தோ உபத்த²ம்ப⁴ப³லகாரோ பூ⁴தனிஸ்ஸிதோ பரமஸினித்³த⁴ஸி நேஹோ இத⁴ ஆஹாரரூபம்னாம. தத்த² அங்க³மங்கா³னுஸாரினோ ரஸஸ்ஸாதி அஜ்ஜோ²ஹரித்வா ஆமாஸயே பதிட்டி²தானி ஆஹாரவத்தூ²னி பாசகதேஜேன விவேசிதானி ரஸாதி³பா⁴வேன பஞ்சதா⁴ விபா⁴க³ம் க³ச்ச²ந்தி. தத்த² பணீத ஸினித்³த⁴ லஹுக ஸினேஹ கோட்டா²ஸோ ரஸோனாம. யே லோகே ரஸதா⁴தூதி வுச்சதி. ஸோ பாசக தேஜப³லேன ததோ உத்தரித்வா ரஸஹரணித⁴மனிஜாலானுஸாரேன ஹேட்டா²ச உத்³த⁴ஞ்ச ஸகலஸரீரே அங்க³மங்கா³னி அனுஸரந்தோ அனுப²ரந்தோ அங்க³மங்கா³னுஸாரீதி வுச்சதி. தஸ்ஸ ஸாரபூ⁴தோ உபத்த²ம்ப⁴ம் ப³லம் கரோதீதி உபத்த²ம்ப⁴ப³லகாரோ. ஸோ ஹி ஆமாஸயே பதிட்டி²த மத்தோவ ஸகலஸரீரே பூ⁴தேஸு உபத்த²ம்ப⁴கப³லம் ஜனேதீதி.

[182] விபா⁴வனியம் பன

‘‘அங்க³மங்கா³ நஸாரி ரஸஹர ஸங்கா²தாதி’’ பாடோ². ஸோ து³ப்பாடோ².

தம் பன ஸேந்த்³ரியகாயோபத்த²ம்ப⁴னலக்க²ணம் ஆஹாரரூபம். ஓஜாலக்க²ணம் வா. தத்த² உத³யதி பஸவதீதி ஓஜா. அவஸத்³தோ³வா ரக்க²ணே. ரக்க²ணஞ்சேத்த² உபத்த²ம்ப⁴னமேவ. அவதி ஜனேதிசாதி ஓஜா. கிம் அவதி. அத்தனோ நிஸ்ஸயவத்து²ம். கிம்ச ஜனேதி. ஆஹாரஸமுட்டா²னரூபம். உத³யானந்தரம் ரூபம் ஜனேதீதி ஓஜாதிபி வத³ந்தி. அஞ்ஞாபதே³ஸரஹிதேன கக்க²ளத்தாதி³னா அத்தனோ பா⁴வேன ஸித்³த⁴ம் ரூபம் ஸபா⁴வரூபம். உப்பாதா³தி³னா அனிச்சதாதி³னாச ஸங்க²ஹலக்க²ணேன ஸஹிதம் ரூபம் ஸலக்க²ணரூபம். உஜுகதோவ கம்மாதீ³ஹி பச்சயேஹி நிப்பா²தி³தம் ரூபம் நிப்ப²ன்னரூபம். ருப்பனலக்க²ணஸம்பன்னம் நிப்பரியாயரூபம் ரூபரூபம். யதா² து³க்க²து³க்க²ம் அஜ்ஜ²த்தஅஜ்ஜ²த்தந்தி. ஸங்க²தலக்க²ணயுத்த தாய அனிச்சதாதி³கம் லக்க²ணத்தயம் ஆரோபேத்வா ஸம்மஸனாரஹம் ரூபம் ஸம்மஸனரூபம். தே தே த³ப்³ப³ஸம்பா⁴ராவா ரூபகலாபாவா விஸும்விஸும் பு⁴ஸோ காஸந்தி பகாஸந்தி ஏதேனாதி ஆகாஸோ. நிஸத்த நிஜீவட்டே²ன தா⁴து. ஆகாஸஸங்கா²தா தா⁴தூதி ஆகாஸதா⁴து. பரிதோ ஸமந்ததோ சி²ந்த³தி கலாபந்தரபூ⁴தானி கலாபந்தர பூ⁴தேஹி ஸத்³தி⁴ம் அஸம்மிஸ்ஸம் ஏகத்தம் அனுபக³மனம் கரோதீதி பரிச்சே²தோ³. தேஹிவா பரிச்சி²ந்தீ³யதி அத்தனோவா பரேஸம்வா அகத்வாமஜ்ஜே² விஸும் த²பீயதி. தேஸம்வா சி²த்³த³விவரமத்தபூ⁴தோ. ந விஸும் ஏகோ உப்பாத³ஸஹிதோ ஸபா⁴வத⁴ம்மோ. நாபி கஸ்ஸசி ரூபகலாபஸ்ஸ பக்க²பூ⁴தோதி பரிச்சே²தோ³. விகாரலக்க²ணரூபானி ஹி அஸபா⁴வத⁴ம்மபூ⁴தானிபி தம்தம் ரூபகலாபேஸு ஸந்தி³ஸ்ஸமானதா தம்தம்ரூபகலாபபக்கி²கானிஏவ ஹோந்தி. அயம் பன தேஹி ரூப கலாபேஹி ஸப்³ப³ஸோ விமுத்தபா⁴வேன ப³ஹிபூ⁴தத்தா கஸ்ஸசி ரூப கலாபஸ்ஸ பக்க²பூ⁴தோ ந ஹோதீதி. அஸபா⁴வத⁴ம்மத்தாச பன கேனசி ரூபேன பு²ஸன பரியாயோபி தஸ்ஸ ஸப்³ப³ஸோ நத்தீ²தி கத்வா ஸோ அஸம்பு²ட்ட²ம் சதூஹி மஹாபூ⁴தேஹீதி பாளியம் வுத்தோ. அட்ட²கதா²யம் பன க⁴னபிண்ட³வத்தூ²ஸு படிக⁴போ²ட்ட²ப்³ப³ஸபா⁴வானம் நானா கலாபக³தபூ⁴தானம் அஞ்ஞமஞ்ஞஸம்பு²ட்ட²தா அத்தீ²தி கத்வா அஸம்பு²ட்ட²ம் சதூஹி மஹாபூ⁴தேஹீதி ஏதேஹி அஸம்பு²ட்ட²ம் அஜடாகாஸம் கம்தி²தந்தி வுத்தம். டீகாயம் பன அயம் நித்³தே³ஸோ அஜடாகாஸனித்³தே³ஸோ நஹோதி, பரிச்சே²த³ரூபனித்³தே³ஸோயேவ. ஸோச க⁴னபிண்ட³ வத்தூ²ஸுஏவ வேதி³தப்³போ³. தேஸுச பூ⁴தானம் அஸம்பு²ட்ட²தானாம நத்தி². தஸ்மா பூ⁴தானம் அஞ்ஞமஞ்ஞஅப்³யாபிதா ஏகத்தம் அனுபக³ததாஏவ. தத்த² அஸம்பு²ட்ட²தானாம யுத்தா ஸியாதி அதி⁴ப்பாயேன அப்³யாபிகதா ஹி அஸம்பு²ட்ட²தாதி வுத்தம். அத்த²தோ பன நானாகலாபக³தானம் பூ⁴தானம் பரியந்ததா ஸங்கா²தோ அந்தராளத⁴ம்மோ. ரூபபரிச்சே²த³லக்க²ணம் பரிச்சே²த³ரூபம். யா பன சலமானேன காயங்கே³ன அத்தானஞ்ச அத்தஸமங்கி³னோ புக்³க³லஸ்ஸ அதி⁴ப்பாயஞ்ச பச்சக்கே² டி²தே ஜனே விஞ்ஞாபேதி பாகடம் கத்வா த³ஸ்ஸேதி. ஸயஞ்ச தேன காயங்கே³ன தேஹி ஜனேஹி விஞ்ஞாயதி. ஸா காயவிஞ்ஞத்தினாம. யா உச்சாரீயமானேன வாசங்கே³ன ஸத்³தே³ன அத்தானஞ்ச அத்தஸமங்கி³னோ புக்³க³லஸ்ஸ அதி⁴ப்பாயஞ்ச ஸோதபதே² டி²தே ஜனே விஞ்ஞாபேதி. ஸயஞ்ச தேனவாசங்கே³ன தேஹி ஜனேஹி விஞ்ஞாயதி. ஸா வசீவிஞ்ஞத்தினாம. அத²வா, விஞ்ஞாபேந்தி ஜனா விஞ்ஞாயந்திவா ஜனேஹி அஞ்ஞமஞ்ஞஸ்ஸ சித்தானி ஏதாயாதி விஞ்ஞத்தி. ஸஸம்பா⁴ரே அங்க³பச்சங்க³பூ⁴தே காயே பவத்தா விஞ்ஞத்தி காயவிஞ்ஞத்தி. சோபன காயஸங்கா²தோ காயோ ஏவவா விஞ்ஞத்தி காயவிஞ்ஞத்தி. சித்தஜஸத்³த³ஸங்கா²தாய வாசாய பவத்தா விஞ்ஞத்தி வசீவிஞ்ஞத்தி. சோபனவாசா ஸங்கா²தா வாசா ஏவவா விஞ்ஞத்தி வசீவிஞ்ஞத்தி. தத்த² சித்தவஸேன யம்கிஞ்சி காயங்க³விகாரம் கரோந்தஸ்ஸ தம்தம்அங்க³ம் ஸந்தம்ப⁴ந்தா ஸந்தா⁴ரேந்தா சாலேந்தா அங்க³மங்கா³னுஸாரிஸங்கா²தா சித்தஜவாதகலாபா தம்தம்அங்க³ம் பூரேத்வா உப்பஜ்ஜந்தி. உப்பஜ்ஜந்தாச யதா²வா ததா²வா அனுப்பஜ்ஜித்வா யஸ்ஸ தேஹி சித்தஜவாதகலாபேதி ஸஹஜாதஸ்ஸ சோபனகாயஸ்ஸ ஆனுபா⁴வேன ஸப்³பே³ தே கலாபா யதா²தி⁴ப்பேததி³ஸாபி⁴முகா²ஏவ உப்பஜ்ஜந்தி. அயம் சோபனகாயஸங்கா²தோ ஆகாரவிகாரோ காயவிஞ்ஞத்தி நாம. நியாமகஸதி³ஸீ ஹி அயம் காயவிஞ்ஞத்தி. தேச நாவாஸதி³ ஸாதி. யதா² ஹி நியாமகோ நாவாய மூலபா⁴கே³ ட²த்வா ஏகம் மஹாபி²யம் த³ள்ஹம் க³ஹேத்வா நதி³ஸோதே சாரேத்வா ஸகலம் மஹானாவம் இச்சி²ததி³ஸாபி⁴முக²ம் நியோஜேதி. ந யம்வா தம்வா தி³ஸம் க³ந்தும் தே³தி. ஏவம் ஸம்பத³மித³ம் த³ட்ட²ப்³ப³ம். ஏகசித்தக்க²ணிகா ஹி விஞ்ஞத்தி தேஸம் மூலபா⁴கே³ஏவ லப்³ப⁴மானா தே யதா²தி⁴ப்பேததி³ஸாபி⁴முகே² ஏவம் கத்வா நியோஜேதீதி ஸா நியாமகஸதி³ஸீ ஹோதீதி. ஏத்த²ச யதே³தம் அட்ட²கதா²யம். ஏகஜவனவீதி²யம் ஸத்தஸு ஜவனேஸு பத²ம ஜவனஸமுட்டி²தா வாயோதா⁴து அத்தனா ஸஹஜாதரூபகாயம் ஸம்த²ம்பே⁴தும் ஸந்தா⁴ரேதும் ஸக்கோதி. அபராபரம் பன சாலேதும் நஸக்கோதி. து³தீயாதீ³ஸுபி ஏஸேவ நயோ. ஸத்தமசித்தேன பன ஸமுட்டி²தா வாயோதா⁴து ஹேட்டா² ச²ஹிசித்தேஹி ஸமுட்டி²தம் வாயோதா⁴தும் உபத்த²ம்ப⁴னபச்சயம் லபி⁴த்வாஅத்தனாஸஹஜாதம் ரூபகாயம் ஸம்த²ம்பே⁴தும் ஸந்தா⁴ரேதும் சாலேதும் அபி⁴க்கமாபேதும் ஸக்கோதீதி வுத்தம். தம் அபி⁴க்கமாமீதி காயம் பக்³க³ண்ஹந்தானம் அனேகஸஹஸ்ஸேஸு ஜவன வாரேஸு பவத்தமானேஸு யஸ்மிம்வாரே சலனஸங்கா²தம் தே³ஸந்தரபாபனம் ஜாயதி, தம் ஸந்தா⁴ய வுத்தம். ந ஹி கதிபயஜவனவாரேஹி சலனம் ஜாயதி. யதி³ ஜாயேய்ய, இத்³தி⁴மந்தானம் இத்³தி⁴யாக³மனம் விய ஸப்³பே³ஸம்பி ஸீக⁴தரம் க³மனம் பஞ்ஞாயேய்ய. கஸ்மா, ஏகச்ச²ரக்க²ணேபி அனேககோடிஸதஸஹஸ்ஸசிக்கபவத்தியா ஸம்ப⁴வதோ. அயஞ்ச அத்தோ² உபரி அக்க²ருப்பத்திவிசாரணாயம் பாகடோ ப⁴விஸ்ஸதீதி. தஸ்மா ததோ புரிமவாரேஸு ஸம்த²ம்ப⁴னஸந்தா⁴ரணானிஏவ ஸம்பஜ்ஜந்தீதி வேதி³தப்³ப³ம். யா சேத்த² ஸத்தயுக³ஸகடோபமா வுத்தா, ஸாபி நானாஜவனவீதீ²ஸு ஸமுட்டி²தானம் வாயோதா⁴தூனம் அபராபரம் உபத்த²ம்ப⁴னேச யுஜ்ஜதியேவ. ததா² ஹி சலனசித்தஜரூபஸந்ததியம் பவத்தானி உதுஜரூபஸங்கா⁴டானிபி விஞ்ஞத்திஸஹிதானி விய ததா³காரவந்தானி ஸவேகா³னி ஸவிப்பா²ரானிஏவ பவத்தந்தி. தஸ்மா புப்³பா³பரபவத்தானம் நானா ஜவனவீதீ²னம் அந்தரந்தரா ப⁴வங்க³ஸமயேஸுபி அபி⁴க்கமனாதி³கம் சலனம் ஸம்பஜ்ஜதியேவ. ஏகாப³த்³த⁴பவத்தானிச சதுஸமுட்டா²னிகரூபானினாம ஏகஸ்ஸ விஸயே இதரானி ஏகஸமுட்டா²னானி விய ஸப்³ப³ஸோ தத³னு பரிவத்தீனி ஹோந்தீதி சித்தஜே சலந்தே இதரானிபி சலந்தி யேவாதி த³ட்ட²ப்³ப³ம். சலனஞ்சேத்த² பச்சி²மபச்சி²மானம் ரூபகலாபஸங்கா⁴டானம் புரிம புரிமானம் உப்பன்னதே³ஸதோ தே³ஸந்தரே யதா²பவத்தஸன்னிவேஸாகாரேன அபராபரம் உப்பஜ்ஜமானம் வேதி³தப்³ப³ம். ந ஹி ரூபாரூபத⁴ம்மானம் உப்பன்ன தே³ஸே அனிருஜ்ஜி²த்வா கேஸக்³க³மத்தம்பி தே³ஸந்தர ஸங்கமனம்னாம அத்தி². இதரதா² க²ணிகத⁴ம்மதா அப்³யாபாரத⁴ம்மதா அவஸவத்திதாச தேஸம் நஸியாதி. யம்கிஞ்சி வசீபே⁴த³ம் கரோந்தஸ்ஸ கண்ட²ட்டா²னாதி³ க³தஉபாதி³ன்னக பத²வீதா⁴தூஸு சலமானகண்ட²பதே³ஸாதி³க³தசித்தஜ பத²வீதா⁴தூனம் ஸங்க⁴ட்டனஸங்கா²தேன டா²னகரணஸன்னிபாதேன ஸஹேவயோ வசீகோ⁴ஸஸங்கா²தோ சித்தஜஸத்³தோ³ ஜாயதி. ஸோ யேன அத்தனா ஸஹ ஜாதேன ஆகாரவிகாரேன யதா²தி⁴ப்பாயம் தம்தம் வண்ணவிஸேஸத்தம் உபக³ச்ச²தி. யேனச ஸுணந்தானம் தம்தம்அத்த²ஜோதகோ அக்க²ரஸன்னிபாதபூ⁴தோ பத³ப்³யஞ்ஜனவிஸேஸோ உபலப்³ப⁴தி. ஸோ சோபனவாசாஸங்கா²தோ ஆகாரவிகாரோ வசீவிஞ்ஞத்தினாம. அட்ட²கதா²யம் பன தஸ்ஸா பன சித்தஸமுட்டா²னாய பத²வீதா⁴துயா உபாதி³ன்னக⁴ட்டனஸ்ஸ பச்சயபூ⁴தோ ஏகோ ஆகாரவிகாரோ வசீ விஞ்ஞத்தினாமாதி வுத்தம். தத்த² உபாதி³ன்னக⁴ட்டனஸ்ஸ பச்சயபூ⁴தோதி கம்மஜபூ⁴தாய சதுஜபூ⁴தாயஏவவா உபாதி³ன்னபத²வீதா⁴துயா ஸஹக⁴ட்டனம் படிச்ச ஸத்³த³விஸேஸபவத்தியா பச்சயபூ⁴தோதி அத்தோ². க⁴ட்டனஸ்ஸ பச்சயோ பன சலமானகண்ட²பதே³ஸாதி³விகாரபூ⁴தோ காயங்க³விஸேஸோஏவ ஸியா. விகாரத்³வயஞ்ச அஸம்மிஸ்ஸம் கத்வா வேதி³தப்³ப³ந்தி. ஏத்த²ச உபாதி³ன்னகபத²வீஹி ஸஹ க⁴ட்டனம் சித்தஜபத²வீனம் கிச்சம். யம் பன தாஸம் யதா²வா ததா²வா அக⁴ட்டேத்வா யதா² இச்சி²தக்க²ரம் ஸம்பஜ்ஜதி. ததா² க⁴ட்டனபகாரவிதா⁴னம். இத³ம் காயவிஞ்ஞத்தியா கிச்சம். க⁴ட்டனேன ஸஹேவ உப்பன்னஸத்³தா³னம் தம்தம்வண்ணத்த பத்தியா வித³ஹனமேவ வசீவிஞ்ஞத்தியா கிச்சம். கும்ப⁴து²னதலம் வியச உபாதி³ன்னகபத²வீ. பஹரணஹத்தோ² விய சித்தஜபத²வீ. ஹத்த²பரி வத்தன விகாரோ விய காயவிஞ்ஞத்தி. ஸத்³த³விகாரோ விய வசீவிஞ்ஞத்தி. கும்ப⁴து²னஸ்ஸ நானாஸத்³த³பபே⁴தோ³விய நானாவண்ணபே⁴தோ³தி. ஏத்த²ச யதே³தம் அட்ட²கதா²யம் இத³ம் வக்கா²மி ஏதம் வக்கா²மீதி உப்பஜ்ஜமானம் சித்தம் அட்ட²ரூபானி ஸமுட்டா²பேதி. தேஸம் அப்³ப⁴ந்தரே சித்த ஸமுட்டா²னா பத²வீதா⁴து உபாதி³ன்னகம் க⁴ட்டயமானாவ உப்பஜ்ஜதி. தேன தா⁴துக⁴ட்டனேன ஸஹேவ ஸத்³தோ³ உப்பஜ்ஜதீதிச புரிமசித்தஸமுட்டா² நாய உபத்த²ம்ப⁴னகிச்சம்பி நத்தீ²திச வுத்தம். தம்பி அனேகஸதேஸு ஜவனவாரேஸு பவத்தமானேஸு யஸ்மிம்வாரே பரிப்³யத்தம் அக்க²ரம் பவத்ததி, தம் ஸந்தா⁴ய வுத்தந்தி க³ஹேதப்³ப³ம். தேனேவ ஹி மூல டீகாயம் உபத்த²ம்ப⁴னகிச்சம் நத்தி² லத்³தா⁴ஸேவனேன சித்தேனேவ க⁴ட்டனஸ்ஸ ப³லவபா⁴வதோதி வுத்தம். ஏத்த²ச லத்³தா⁴ஸேவனேனாதி ஏதேன புப்³ப³பா⁴கே³ நானாஜவனவீதீ²ஹி லத்³தா⁴ஸேவனபா⁴வம் த³ஸ்ஸேதி. பத²ம ஜவனசித்தஸ்ஸபி லத்³தா⁴ஸேவனதாய அதி⁴ப்பேதத்தா. நச ஏகஜவன வாரமத்தேன பரிப்³யத்தம் ஏகக்க²ரம் ஸம்பஜ்ஜதீதி ஸக்கா விஞ்ஞாதும். கஸ்மா, தஸ்ஸ ஏகத்³விஅச்ச²ரக்க²ணமத்தேன காலேன வத்தப்³ப³த்தா ஏகச்ச²ரக்க²ணேச அனேகஸதஸஹஸ்ஸானம் ஜவனவீதீ²னம் பவத்திஸம்ப⁴வதோ. வுத்தஞ்ச –

ஏகமத்தா தயோ ரஸ்ஸா, த்³விமத்தா தீ³க⁴முச்சரே;

திமத்தோ து கீ³தோ ஞேய்யோ, ப்³யஞ்ஜனா அட்³ட⁴மத்திகாதி.

மிலிந்த³பஞ்ஹேச ஸாதி⁴கே வீஹிவாஹஸதே வீஹிபீ³ஜானி ஏகச்ச²ரக்க²ணே உப்பன்னஸ்ஸ சித்தஸ்ஸ கலம்பி நஉபேந்தி. கலபா⁴க³ம்பி நஉபேந்தீதி தீ³பிதம். ஏகக்க²ரம் உச்சாரேந்தஸ்ஸச தத்தகம்பி காலம் உச்சாரணசித்தப்³யாபாரோ ஸந்தி³ஸ்ஸதியேவ. நச பரமத்த²தோ ஏகமேவ ஸத்³த³ம் உச்சாரேமீதிவா ஸுணோமீதிவா ஸக்கா நியமேத்வா உச்சாரேதும் ஸோதுஞ்ச. ததா² நியமேந்தஸ்ஸபி ஸத்³தா³னம் புப்³பா³பரதோ அனேகஸதஸஹஸ்ஸஸ்ஸேவ உச்சாரண ஸவன ஸம்ப⁴வதோ. ஏகமேவாதி அபி⁴மானோ பன ஸமூஹக⁴ன ஸந்ததிக⁴னேஹி படிச்ச²ன்னத்தாஏவ ஹோதீதி த³ட்ட²ப்³ப³ம். ஸேஸமேத்த² காயவிஞ்ஞத்தியம் வுத்தன யேன யதா²ஸம்ப⁴வம் வேதி³தப்³ப³ந்தி. ஏத்த²ச விஞ்ஞத்திஸத்³தோ³ காயேன விஞ்ஞாபேதி வாசாய விஞ்ஞாபேதீதிஆதி³ஸு போ³த⁴னத்தோ². ஸுதி³ன்ன கண்டே³ திக்க²த்தும் விஞ்ஞாபேதீதிஆதீ³ஸு பவத்தனத்தோ². இத⁴ பன து³விதோ⁴பி யுஜ்ஜதி. ஏவஞ்ஹி ஸதி பரம் போ³தே⁴துகாமதாரஹி தேஸு ஸப்³பே³ஸு காயங்க³வாசங்க³சோபனேஸுபி பவத்தகவிஞ்ஞத்தியா லப்³ப⁴மானதா வேதி³தப்³பா³ ஹோதீதி. மூலடீகாயம் பன பரம் போ³தே⁴துகாமதாய வினாபி அபி⁴க்கமனாதி³பவத்தனேன ஸோ சித்த ஸஹபூ⁴விகாரோ அதி⁴ப்பாயம் விஞ்ஞாபேதி. ஸயஞ்ச விஞ்ஞாயதீதி த்³விதா⁴பி விஞ்ஞத்தியேவாதி வுத்தம், தத்த² த்³வீஸு போ³த⁴னவிஞ்ஞத்தீஸு புரிமா காயவிஞ்ஞத்தி அங்க³பச்சங்க³ஸ்ஸ சலமானவண்ணம் சக்கு²விஞ்ஞாணவீதி²யா சலமானங்க³பச்சங்க³ம் காயவிஞ்ஞாணவீதி²யா க³ஹேத்வா பச்சா² ஸுத்³தே⁴ன மனோத்³வாரிகஜவனேனஏவ விஞ்ஞாயதி பச்சி²மாச வசீவிஞ்ஞத்தி உச்சாரியமானம் ஸத்³த³ம் ஸோதவிஞ்ஞாணவீதி²யா க³ஹேத்வா பச்சா² ஸுத்³தே⁴ன மனோத்³வாரிகஜவனேனஏவ விஞ்ஞாயதி, ந பஞ்சத்³வாரிகஜவனேன. ஸா ஹி அத்தானம் ஜானந்தேஏவ பரஸத்தே அத்தனா ஸமங்கி³னோ புக்³க³லஸ்ஸ சித்தம் விஞ்ஞாபேதி, ந அஜானந்தே. ஞாபக ஹேது ஹி நாம அத்தானம் ஜானந்தேஏவ ஞாபேதப்³ப³ம் ஞாபேதி, நோ அஜானந்தே. ஏவஞ்ச கத்வா காயங்க³ சோபனம் தி³ஸ்வாவா பராமஸித்வாவா ஸத்³த³ம் ஸுத்வாவா பரஸ்ஸ தம்தம்அதி⁴ப்பாயம் ஜானந்தானம் திரச்சா²ன க³தானம்பி பத²த⁴ம் விஞ்ஞத்திஜானனம் ஸித்³த⁴ம் ப⁴வதி. தம்ஜானனேன வினா அதி⁴ப்பாயஜானனஸ்ஸ அஸம்ப⁴வதோ. விஞ்ஞத்திம் ஜானந்தானம்ச புரிமஸித்³த⁴ஸங்கேத ஸம்ப³ந்த⁴ ஜானனேன வினா அதி⁴ப்பாயஜானனம் ந ஸம்ப⁴வதீதி மஜ்ஜே² விஸும் புப்³ப³ஸங்கேத ஸம்ப³ந்த⁴க³ஹனம்பி இச்ச²ந்தி, த்³வீஸு பன பவத்தகவிஞ்ஞத்தீஸு பரம் அபி⁴க்கமந்தம் சக்கு²விஞ்ஞாணவீதி²யா தி³ஸ்வா அபி⁴க்கமனவிஞ்ஞத்திஞ்ச அபி⁴க்கமனசித்தஞ்ச மனோவிஞ்ஞாணவீதி²யா ஜானந்தி. ஏஸனயோ படிக்கமனாதீ³ஸு. ததா² பரஸ்ஸ கத²ம் ஸோதவிஞ்ஞாணவீதி²யா ஸுத்வா கத²னவிஞ்ஞத்திஞ்ச கத²னசித்தஞ்ச மனோவிஞ்ஞாணவீதி²யா ஜானந்தி. பரம் ரத்தசித்தேன காயங்க³ம் சாலேந்தம் தி³ஸ்வா சலனவிஞ்ஞத்திஞ்ச ராக³சித்தஞ்ச ஜானந்தி. ரத்தஸ்ஸ கத²ம் ஸுத்வா கத²ன விஞ்ஞத்திஞ்ச ராக³சித்தஞ்ச ஜானந்தி. ஏஸனயோ ஸப்³பா³ஸு காயிகவாசஸிகக்ரியாஸூதி. லஹுனோ பா⁴வோ லஹுதா. முது³னோ பா⁴வோ முது³தா. கம்மனி ஸாது⁴ கம்மஞ்ஞம். கம்மயோக்³யந்தி அத்தோ². கம்மஞ்ஞஸ்ஸ பா⁴வோ கம்மஞ்ஞதா.

அத³ந்த⁴தாலக்க²ணா ரூபஸ்ஸ லஹுதா. அத²த்³த⁴தா லக்க²ணா ரூபஸ்ஸ முது³தா. ஸரீரக்ரியானுகூலகம்மஞ்ஞபா⁴வலக்க²ணா ரூபஸ்ஸ கம்மஞ்ஞதா. அஞ்ஞமஞ்ஞம் அவிஜஹந்தியோபி ஏதா விருத்³த⁴பச்சயஸப்பாய பச்சயானம் வஸேன அஸம்மிஸ்ஸதோ வேதி³தப்³பா³. ததா² ஹி அத்தனோ காயவிருத்³த⁴ம் உதும்வா ஆஹாரம்வா சித்தக்ரியம்வா ஸேவந்தானம் ஸரீரக³தா தா⁴துயோ கதா³சி ஸகலஸரீரம்வா ஸரீரேகதே³ஸம்வா கோ²பே⁴த்வா விஸேஸதோ பூதிமுக² ஸப்பஸங்கா²தஆபோ பரியுட்டா²னம் கத்வா காயம் அஸய்ஹபா⁴ரம் விய க³ரும் பா⁴ரியம் கரோந்தி. இரியா பத²பரிவத்தனே காயபா⁴ரியனிமித்தம் து³க்க²ம் உப்பாதே³ந்தி. ததா³ரூபஸ்ஸ லஹுதா நபவத்ததி. புன அத்தனோ ஸரீரஸப்பாயம் உதும்வா ஆஹாரம்வா சித்தகிரியம்வா ஸேவந்தானம் ஸோ தா⁴துக்கோ²போ⁴ வூபஸம்மதி. காயோ ஸல்லஹுகோ ஹோதி. இரியாபத²பரிவத்தனே காய பா⁴ரியனிமித்தம் து³க்க²ம்னாம நத்தி². ததா³ ஸா பவத்ததி. ஏஸனயோ ஸேஸாஸுபி. விஸேஸனதோ பனேத்த² முது³பா⁴யம் கட்ட²முக²ஸப்பஸங்கா²த பத²வீபரியுட்டா²னம் கத்வா ஸுக்க²கட்ட²ம்விய காயம் த²த்³த⁴ம் கக்க²ளம்கரோந்தி. இரியாபத²பரிவத்தனே அங்க³மங்கா³னம்சி²ஜ்ஜனபி⁴ஜ்ஜனாகாரபத்தம் த²த்³த⁴ம் கக்க²ளனிமித்தம் து³க்க²ம் உப்பாதே³ந்தீதி வத்தப்³ப³ம். கம்மஞ்ஞதாயம் ஸத்த²முக²ஸப்பஸங்கா²த வாயோ பரியுட்டா²னம் வாயோவிஸமம் கத்வா தா³மரிகசோரபரியுட்டி²தம் பச்சந்தரட்ட²ம் விய காயம் விவட்டமானம் கரோந்தி, ஸப்³ப³இரியாபதே²ஸு ஸுக²ம்னாம நத்தீ²தி வத்தப்³ப³ம். தேஜோதா⁴து பன தாஸம் ஸப்³பா³ஸம்பி மூலபூ⁴தா ஹோதீதி வேதி³தப்³பா³.

இமா பன அரோகி³னோ கல்லபா⁴வோவிய ஸுபரிமத்³தி³தசம்மஸ்ஸ முது³பா⁴வோவிய ஸுத³ந்த⁴ஸுவண்ணஸ்ஸ கம்மக்க²மபா⁴வோவிய ரூபகாயஸ்ஸ இரியாபத²பரிவத்தனே ஸல்லஹுகதாதி³வஸேன ஸந்தி³ஸ்ஸமானா விஸேஸாகாரா ஹோந்தீதி கத்வா விகாரரூபம் நாம. சயனம் சயோ. பிண்ட³வஸேன அபி⁴னிப்³ப³த்தீதி அத்தோ². ஆதி³தோ உபரிதோச சயோ உபசயோ. பத²மாபி⁴னிப்³ப³த்தி உபருபரிவட்³டி⁴சாதி அத்தோ². அயஞ்ஹி உபஸத்³தோ³ உபஞ்ஞத்தந்திஆதீ³ஸு விய பத²மத்தோ² உபஸித்தந்திஆதீ³ஸு வியச உபரி அத்தோ²தி. வுத்தஞ்ச மூலடீகாயம் உபஸத்³தோ³ பத²மத்தோ² உபரிஅத்தோ²ச ஹோதீதி. தேனேவஹி பாளியம் யோ ஆயதனானம் ஆசயோ, ஸோ ரூபஸ்ஸ உபசயோ. யோரூபஸ்ஸ உபசயோ, ஸா ரூபஸ்ஸ ஸந்ததீதி வுத்தம். தனனம் வித்தா²ரணம் ததி. ஸம்ப³ந்தா⁴ ததி புனப்புனம்வா ததி ஸந்ததி. யதா² பவத்தானம் ஆயதனானம் அத்³தா⁴னபூரணவஸேன பவத்தீதி அத்தோ². தத்த² க³ப்³ப⁴ஸேய்யகானம் ஸத்தானம் படிஸந்தி⁴க்க²ணே ரூபானம் உப்பாதோ³ பத²மானிப்³ப³த்திஅத்தே²ன உபசயோனாம. ததோ பரம் யாவ ஸப்³ப³பத²மம் உப்பன்னானம் சக்கு² ஸோத கா⁴னஜிவ்ஹானம் உப்பாதோ³, ஏத்த²ந்தரே ரூபானம் உப்பாதோ³ உபரி வட்³டி⁴அத்தே²ன உபசயோனாம. ததோ பரம் யாவஜீவம் சதுஸந்ததிரூபானம் உப்பாதோ³ ஸந்ததினாம. வுத்தஞ்ஹேதம் அட்ட²கதா²யம் நதீ³தீரே நிகா²தகூபஸ்மிம் உத³குக்³க³மனகாலோவிய ஆசயோ நிப்³ப³த்தி. பரிபுண்ணகாலோவிய உபசயோ வட்³டி⁴. அஜ்ஜோ²த்த²ரித்வா க³மனகாலோ விய ஸந்ததி பவத்தீதி.

விபா⁴வனியம் பன

படிஸந்தி⁴தோ பட்டா²ய யாவசக்கா²தி³ த³ஸகானம் உப்பத்தி. ஏத்த²ந்தரே ரூபுப்பாதோ³ உபசயோனாம. ததோ பரம் ஸந்ததி நாமாதி வுத்தம். தம்பி தேன பரியாயேன யுஜ்ஜதியேவ.

ஸம்ஸேத³ஜோபவாதிகானம் பன படிஸந்தி⁴க்க²ணே ரூபானம் உப்பாதோ³ பத²மா பி⁴னிப்³ப³த்தி அத்தே²ன பரிபுண்ண வட்³டி⁴ அத்தே²னச உபசயோ நாம, ததோ பரம் ரூபானம் உப்பாதோ³ ஸந்ததினாம. அபிச, திஸமுட்டா²னிக ரூபானம்பி விஸும் விஸும் ஸந்ததிபச்சுப்பன்னம்னாம அத்தி². தஸ்ஸச ஏகேகஸ்ஸ நிப்³ப³த்தி வட்³டி⁴ பவத்தி வஸேன திஸ்ஸோ திஸ்ஸோஅவத்தா² ஹோந்தி. தத்த² ஏகேகஸந்ததியம் ஆதி³ம்ஹி ஸந்ததிஸீஸரூபானம் ஸப்³ப³பத²மம் உப்பாதோ³ நிப்³ப³த்தினாம. ததோ வட்³ட⁴னரூபானம் உப்பாதோ³ வட்³டீ⁴னாம. வட்³ட⁴னே ஸமத்தே அவட்³டி⁴த்வா பப³ந்த⁴ட்டி²திவஸேன வத்தனவஸேனஉப்பாதோ³பவத்தினாம. தத்த² ச நிப்³ப³த்திவட்³டி⁴யோ உபசயோனாம. பவத்திஸந்ததி நாம. ஸங்கே²பதோ பன லோகே ஸப்³பா³ஸு இந்த்³ரியானிந்த்³ரியப³த்³த⁴ரூபபவத்தீஸு ஸந்தி³ஸ்ஸமானே ஜாயன வட்³ட⁴ன பவத்தனஸங்கா²தே அவத்தா²பே⁴தே³ தி³ஸ்வா உபசயஸந்த தியோ வேதி³தப்³பா³. தத்ராயம் நயோ-ருக்க²திணாதீ³னிவா ஸாகா² பத்தபுப்ப²ப²லாதீ³னிவா ஆதி³ம்ஹி ஜாயந்தி. ஜாயித்வா வட்³ட⁴ந்தி. வட்³ட⁴னே ஸமத்தே அவட்³டி⁴த்வா பப³ந்த⁴வஸேன பவத்தித்வா பி⁴ஜ்ஜந்தீதி. ஜீரணம் ஜரா, ஜீரந்தி ஜிண்ணபா⁴வம் க³ச்ச²ந்தி ஏதாயாதி ஜரா. ஸாயேவ ஜரதா. உப்பாத³ஜராப⁴ங்கே³ஹி நிச்சலதி நகம்பதீதி நிச்சோ அஸங்க²த த⁴ம்மோ. ந நிச்சோ அனிச்சோ, ஸங்க²தத⁴ம்மோ. அனிச்சஸ்ஸ பா⁴வோ அனிச்சதா, ப⁴ங்கோ³.

[183] விபா⁴வனியம் பன

‘‘நிச்சது⁴வபா⁴வேன ந இச்சம் அனுக³ந்தப்³ப³ந்தி அனிச்ச’’ந்தி வுத்தம். தம் ந ஸுந்த³ரம்.

நிச்சஸத்³தோ³ ஹி ஸாஸனே லோகேச பாகடோ. ஸோ ஏவ இத⁴ நகாரயுத்தோ அனிச்சோதி வுத்தோதி. லக்கீ²யந்தி ஸல்லக்கீ²யந்தி வினிச்சீ²யந்தி த⁴ம்மா இமே ஸங்க²தாதி ஏதேனாதி லக்க²ணம். ஸங்க²த பா⁴வஜானனனிமிதந்தி அத்தோ². யதா²ஹ- அங்கு³த்தரே தீணி மானி பி⁴க்க²வே ஸங்க²தஸ்ஸ ஸங்க²தலக்க²ணானி. கதமானி தீணி, உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதீதி. நனு பாளியம் ஜாதினாம ஆக³தா. தஸ்மா ஸாபி இத⁴ வத்தப்³பா³தி வுத்தம் ஜாதிரூபமேவாதிஆதி³. ஏத்தா²தி ரூபஸமுத்³தே³ஸே. ஜனனம் பாதுப⁴வனம் ஜாதி. ஜாயந்திவா ஏதாயாதி ஜாதி, உபசய ஸந்ததி நாமேனபவுச்சதி தஸ்ஸாஜாதியாததா² அவத்தா²பே⁴த³யோக³தோதி அதி⁴ப்பாயோ. ஸா ஹி ஆதி³தோ படிஸந்தி⁴ரூபானி பாதுப⁴வந்தானி கரோதி. புன அபரிபுண்ணானிச ஆயதனானி பூரேதி. பூரிதானி ச தீ³க⁴ம்பி அத்³தா⁴னம் அப்³போ³ச்சி²ன்னம் கத்வா பவத்தேதி பப³ந்த⁴யதீதி. ஏகா த³ஸவித⁴ம்பீதி மஹாபூ⁴தாதி³பா⁴வேன ஏகத்தம் உபனயனவஸேன ஏகா த³ஸபபே⁴த³ம்பி. கத²ம் ஸரூபவஸேன அட்ட²வீஸதிவித⁴ம் ஹோதீதி புச்சி²த்வா பூ⁴தப்பஸாத³ விஸயாதிஆதி³னா ஏகாத³ஸவித⁴ஸ்ஸேவ ஸரூபதோ த³ஸ்ஸனம் அந்தோக³த⁴பே⁴தா³னம் புப்³பே³ வுத்தபா⁴வேன ஸுபாகடத்தாதி த³ட்ட²ப்³ப³ம். தேனாஹ-அட்டா²ரஸவித⁴ந்தி.

சத்தாரி பூ⁴தானி பஞ்சபஸாதா³ அக³ஹிதக³ஹணேன சத்தாரோ விஸயா கோ³சரா. து³விதோ⁴ பா⁴வோ. ஏகம் ஹத³யம். இதி இத³ம் ஸோளஸவித⁴ம் ரூபம் ஜீவிதாஹாரரூபேஹி ஸஹ அட்டா²ரஸவித⁴ம் ஹோதி ததா² ஏகோ பரிச்சே²தோ³. து³விதா⁴ விஞ்ஞத்தி. அக³ஹிதக³ஹணேன திவிதோ⁴ விகாரோ. சதுப்³பி³த⁴ம் லக்க²ணந்தி த³ஸ அனிப்ப²ன்னாசாதி ரூபம் ஸரூபதோ அட்ட²வீஸதிவித⁴ம் ப⁴வேதி யோஜனா. ஏத்த²ச பச்சி²மானி த³ஸரூபானி ஸபா⁴வதோ அனுபலப்³ப⁴மானத்தா பச்சயேஹி நிப்பா²தி³தானி ரூபானி ந ஹோந்தீதி அனிப்ப²ன்னானி நாம. அபி சேத்த² அபி⁴த⁴ம்மே விஸும் உத்³தி³ட்டா²னி நித்³தி³ட்டா²னிச ஏதானி ஸபா⁴வதோ அனுபலப்³ப⁴மானானீதி வா பரமத்த²தோ அவிஜ்ஜமானானீதிவா நஸக்கா வத்தும். வோஹாரஸித்³த⁴ மத்தபா⁴வம் அதிக்கம்ம தாதி³ஸேன ஸுத்³த⁴த⁴ம்மக³தியா ஸித்³தே⁴ன பரமத்த² லக்க²ணேன உபலத்³த⁴த்தா. இதரதா² நிப்³ப³த்திலக்க²ணரஹிதம் அஸங்க²த நிப்³பா³னம்பி ஸபா⁴வதோ அனுபலப்³ப⁴மானம் பரமத்த²தோ அவிஜ்ஜமானஞ்ச நாம ஸியாதி. தஸ்மா நிப்³ப³த்தி லக்க²ணரஹிதத்தாஏவ ஏதானி அனிப்ப²ன்னானினாம. ந ஸபா⁴வதோ அனுபலப்³ப⁴மானத்தாதி யுத்தம் ஸியாதி. [ரூபஸமுத்³தே³ஸோ]

157. ரூபவிபா⁴கே³ஸப்³ப³ஞ்ச பன ஏதம் யதா²ஸமுத்³தி³ட்ட²ம் அட்ட²வீஸதி வித⁴ம் ரூபம் அஹேதுகட்டே²ன ஏகவித⁴மேவ. ந ஸஹேதுகா ஹேதுக வஸேன து³வித⁴ம். ததா²ஸப்பச்சயட்டே²ன ஏகவித⁴மேவ. ந ஸப்பச்சயாபச்சய வஸேன து³வித⁴ந்தி ஏவம் பவத்தம் ஏகவித⁴னயம் தாவ த³ஸ்ஸேதும் ஸப்³ப³ஞ்சாதிஆதி³மாரத்³த⁴ம்.

[184] விபா⁴வனியம் பன

ஏகவித⁴னயோபி ரூபவிபா⁴கோ³ஏவாதி கத்வா ‘‘யதா² உத்³தி³ட்ட² ரூபானம் ஏகவிதா⁴தி³னயம் த³ஸ்ஸனத்த²ம் ஸப்³ப³ஞ்ச பனேதந்திஆதி³ வுத்த’’ந்தி வுத்தம். தம் ந ஸமேதி.

வக்க²தி ஹி –

அஜ்ஜ²த்திகாதி³பே⁴தே³ன, விப⁴ஜந்தி யதா²ரஹந்தி.

ஏதேன அஜ்ஜ²த்திகாதி³பே⁴தோ³ ஏவ ரூபவிபா⁴கோ³னாமாதி விஞ்ஞாயதி.

தத்த² ஸப்³ப³ம்பி ரூபம் ஹேதுஸம்பயோகா³ பா⁴வதோ அஹேதுக மேவ, ந கிஞ்சி ஸஹேதுகம். கிஞ்சி அஹேதுகந்தி ஏவம் விபா⁴கோ³ அத்தீ²தி அதி⁴ப்பாயோ. ஸப்பச்சயம் ஸாஸவம் ஸங்க²தம் லோகியந்தி பாடோ². ஸப்பச்சயம் ஸங்க²தம் லோகியம் ஸாஸவந்தி பன யுத்தோ. பாளியம்பி ததா² தி³ட்ட²த்தா ஸபா⁴க³யுக³ளஸம்ப⁴வதோசாதி. இதரானி பன பாளிகமேன அஸமேந்தானிபி ஸபா⁴க³ யுக³ளத்தா பா⁴க³தோ யுத்தானிஏவ. தத்த² அத்தனோ ஜனகேன பச்சயேன ஸஹேவ வத்ததீதி ஸபச்சயம். பச்சயேஹி ஸங்க³ம்ம கரீயதீதி ஸங்க²தம். பஞ்சுபாதா³ நக்க²ந்த⁴ஸங்கா²தே லோகேஏவ பரியாபன்னந்தி லோகியம். அத்தானம் ஆரப்³ப⁴ பவத்தேஹி ஆஸவேஹி ஸஹேவ வத்ததீதி ஸாஸவம். அகனிட்ட² ப்³ரஹ்மஸந்தான பூ⁴தம்பி ரூபம் காமதண்ஹா விஸயபா⁴வேன காமேஏவ பரியாபன்னத்தா காமாவசரம். நத்தி² அத்தனா க³ஹிதம் கிஞ்சி ஆரம்மணம்னாம அஸ்ஸாதி அனாரம்மணம். யோ த⁴ம்மோ அஞ்ஞேன பயோகே³ன பஹீனோபி ஸமுத³யபஹானே அஸதி அபஹீனோவ ஹோதி. புன அவஸ்ஸம் உப்பஜ்ஜமானத்தா. அப்பஹீனோபி தஸ்மிம் ஸதி பஹீனோவ ஹோதி. புன அனுப்பஜ்ஜமானத்தா. தாதி³ஸோ த⁴ம்மோ பஹானவாயாமஸ்ஸ அட்டா²னத்தா அப்பஹாதப்³போ³னாம. ரூபம்பி ஏதி³ஸமேவ ஹோதீதி வுத்தம் அப்பஹாதப்³ப³ மேவாதி. அட்டா²னத்தா பஹான வாயாமம் ந அரஹதீதி அத்தோ². அத²வா, வினா ஸமுத³யபஹானேன பஹாதும் அஸக்குணேய்யோதி அத்தோ². யதி³ ஏவம் ரூபம் பி⁴க்க²வே ந தும்ஹாகம். தம் பஜஹத². தம் வோ பஹீனம் தீ³க⁴ரத்தம் அத்தா²ய ஹிதாய ஸுகா²ய ப⁴விஸ்ஸதீதி இத³ம் கத²ந்தி. தம்பி தப்³பி³ஸயஸ்ஸ ராக³ஸ்ஸ பஹானம் ஸந்தா⁴ய வுத்தந்தி த³ட்ட²ப்³ப³ம். யதா²ஹ –

ரூபே கோ² ராத⁴ யோ ச²ந்தோ³, யோ ராகோ³, யானந்தீ³, யா தண்ஹா, தம் பஜஹத². ஏவம் தம்ரூபம் பஹீனம் ப⁴விஸ்ஸதி உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மந்தி.

அயம் நயோ அஞ்ஞேஸுபி குஸலாதீ³ஸு அப்பஹாதப்³பே³ஸு வேதி³தப்³போ³தி. ஏவஸத்³தோ³ சேத்த² புரிமபதே³ஸுபி யோஜேதப்³போ³. இதிஸத்³தோ³ ஆதி³அத்தோ², பகாரத்தோ²வா. தேன பாளியம் ஆக³தம் ந ஹேது ஹேதுவிப்பயுத்தந்திஆதி³ம் ஸங்க³ண்ஹாதி. தஸ்ஸ தஸ்ஸ புக்³க³லஸ்ஸ அத்தபா⁴வபரியாபன்னோ த⁴ம்மஸமூஹோ அஜ்ஜ²த்தம்னாம. தஸ்மிம்பிச யத்த² தண்ஹாய அதிரேகதரம் த³ள்ஹபரிக்³க³ஹோ ஹோதி. ஸோ சக்கா²தி³கோ சித்தேன ஸஹ ச²ப்³பி³தோ⁴ த⁴ம்மோ அஜ்ஜ²த்திகோ நாம. அஜ்ஜ²த்தே விதி³தோ பாகடோதி கத்வா. ததா² ஹி ஸோ அஜ்ஜ²த்தஜ்ஜ²த்தந்திபி வுத்தோ. இதரானி பன ரூபாதி³னி ப²ஸ்ஸாதீ³னிச தது³பாதா³ய தண்ஹாபரிக்³க³ஹஸ்ஸ மந்த³த்தா பா³ஹிரானி நாம. யதா² ஹி லோகே மணிவா ஸுவண்ணம்வா ரஜதம்வா ப³ஹிகே³ஹே நித³ஹித்வா த²பிதம் ஹோதி. பச்சி²வா ஸுப்பம்வா க⁴டோவா ஸராவோவா அந்தோ கே³ஹே த²பிதோ. தத்த² பச்சி²மானி ச²ட்³டே³த்வாபி புரிமானி ரக்க²ந்தி. தஸ்மா தானேவ தண்ஹாபரிக்³க³ஹத³ள்ஹதாய அந்தோபரிபோ⁴கா³த்வேவ வுச்சந்தி. பச்சி²மானி பன பா³ஹிர பரிபோ⁴கா³த்வேவ. ஏவம் ஸம்பத³மித³ம் த³ட்ட²ப்³ப³ம். இத⁴பி ஹி யதி³ ஸக்குணேய்ய. ரூபாதீ³னி ப²ஸ்ஸாதி³னிச ஸப்³பா³னி ச²ட்³டே³த்வாபி சக்கா²தி³கம் ச²ப்³பி³த⁴மேவ அவஸ்ஸம் ரக்கி²ஸ்ஸந்தீதி. இதி தண்ஹா பரிக்³க³ஹஸ்ஸ த³ள்ஹமந்த³தா வஸேனேவ தேஸம் த்³வின்னம் அஜ்ஜ²த்திக பா³ஹிரதா வுத்தா. ந பவத்திதே³ஸவஸேனாதி நிட்ட²மேத்த² க³ந்தப்³ப³ம்.

[185] யம் பன விபா⁴வனியம்

‘‘அஜ்ஜ²த்திகரூபம் அத்த²பா⁴வஸங்கா²தம் அத்தானம் அதி⁴கிச்ச உத்³தி³ஸ்ஸ பவத்தத்தா. காமம் அஞ்ஞேபி அஜ்ஜ²த்தஸம்பூ⁴தா அத்தி². ருள்ஹீவஸேன பன சக்கா²தி³கமேவ அஜ்ஜ²த்திகந்தி’’ வுத்தம். தம் ந ஸுந்த³ரம்.

[186] யஞ்ச தத்த²

‘‘அத்தஸங்கா²தம்பா சித்தம் அதி⁴கிச்ச தஸ்ஸ த்³வாரபா⁴வேன பவத்ததீதி² அஜ்ஜ²த்தம். ததே³வ அஜ்ஜ²த்திகந்தி’’ வுத்தம். தம்பி ந ஸுந்த³ரம்.

தஸ்மிம் அத்தே² ஹி ஸதி சித்தஸ்ஸ அஜ்ஜ²த்ததா ந ஸம்பஜ்ஜதி. அஜ்ஜ²த்தத⁴ம்ம அஜ்ஜ²த்திகம்மோனஞ்ச அவிஸேஸோ ஆபஜ்ஜதீதி.

யம் பன தத்த²

அத²வா யதி³ மயம் ந ஹோம, த்வம் கட்ட²கலிங்க³ரூபமோ ப⁴விஸ்ஸதீதி வத³ந்தா விய அத்தபா⁴வஸ்ஸ ஸாதிஸயம் உபகாரகத்தா சக்கா²தி³னேவ விஸேஸதோ அஜ்ஜ²த்திகானீதி வுத்தம். தம் யுத்ததரம்.

ததா² உபகாராதிஸயத்தாஏவ ஹி தேஸு ஸத்தானம் பரிக்³க³ஹ த³ள்ஹதா ஹோதீதி. ஸத்தவித⁴ம்பி த்³வாரரூபம்னாம. யதா²க்கமம் வீதி² சித்தானம் பாணாதிபாதாதி³கம்மானஞ்ச பவத்திமுக²த்தா. தத்த² பன பஞ்ச வித⁴ம் பஸாத³ரூபம் உபபத்தித்³வாரம்னாம. விஞ்ஞத்தித்³வயம் கம்மத்³வாரம்னாமாதி ஓளாரிகரூபம் பகதியா தூ²லஸபா⁴வத்தா க⁴ட்டனஸங்கா²தஸ்ஸச அத்தனோ கிச்சஸ்ஸ ஓளாரிகத்தா. ஸந்திகேரூபம் தூ³ரே பவத்தஸ்ஸபி ஸீக⁴தரம் ஞாணேன க³ஹணயோக்³யத்தா. ஸப்படிக⁴ரூபஞ்சாதி ஏத்த² படிஹனனம் படிகோ⁴. ஸோ து³விதோ⁴ விஸயவிஸயீனம் படிக⁴ட்டனம் மஹா பூ⁴தானம் அஞ்ஞமஞ்ஞபடிக⁴ட்டனந்தி. தத்த² யேன படிக⁴ட்டனேன பஸாத³ த்³வாரானம் ப⁴வங்க³ஸ்ஸச விகாரப்பத்தி ஹோதி. இத³ம் விஸயவிஸயீனம் படிக⁴ட்டனம்னாம. யேன ருப்பனலக்க²ணானம் ரூபத⁴ம்மானம் ருப்பன குப்பன க⁴ட்டன பீளன பி⁴ஜ்ஜனாத³யோ பவத்தந்தி. இத³ம் மஹாபூ⁴தானம் அஞ்ஞமஞ்ஞபடிக⁴ட்டனம் நாம. படிகே⁴ன ஸஹ வத்ததீதி ஸப்படிக⁴ம்.

[187] விபா⁴வனியம் பன

‘‘யோ ஸயம் நிஸ்ஸயவஸேனச ஸம்பத்தானம் அஸம்பத்தானஞ்ச படிமுக²பா⁴வோ அஞ்ஞமஞ்ஞபதனம். ஸோ படிகோ⁴ வியாதி படிகோ⁴. யதா²ஹி படிகா⁴தே ஸதி து³ப்³ப³லஸ்ஸ சலனம் ஹோதி. ஏவம் அஞ்ஞமஞ்ஞபடிமுக²பா⁴வே ஸதி அரூபஸபா⁴வத்தா து³ப்³ப³லஸ்ஸ ப⁴வங்க³ஸ்ஸ சலனம் ஹோதீதி’’ ஏவம் மஹாபூ⁴தக⁴ட்டனம் உபமாமத்தம் கத்வா விஸயவிஸயிக⁴ட்டனமேவ க³ஹிதம். தம் அனுபபன்னம்.

ஏவஞ்ஹி ஸதி யானி லோகே அஜ்ஜ²த்தப³ஹித்³தா⁴ஸந்தானேஸு க⁴ட்டனானி தி³ஸ்ஸந்தி. யேஸம் வஸேன ரூபத⁴ம்மேஸு அஞ்ஞமஞ்ஞம் லக்³க³ன ப³ந்த⁴ன த²ம்ப⁴ன தா⁴ரண சலனாதீ³னிவா வட்³ட⁴ன ஹாயன சே²த³ன பே⁴த³ன விலீன விகிரணாதீ³னிவா பவத்தந்தி. தானி இத⁴ அஸங்க³ஹிதானி ஸியும். நச தானி அனுக்³க³ஹ உபகா⁴த வஸேன பவத்திபூ⁴த ஸன்னிபாத ஸங்கா²தம் க⁴ட்டனம்வினா அஞ்ஞபகாரானிஏவ ஸக்கா ப⁴விதுந்தி. இதரம் ஸோளஸவித⁴ம் வுத்தபடிபக்க²வஸேன ஸுகு²மரூபம் தூ³ரேரூபம் அபடிக⁴ரூபஞ்ச. உபாதி³ன்னரூபம் நாம கத்த²சி யம்கிஞ்சி ஸரீரட்ட²கரூபம் வுச்சதி. கத்த²சி கம்மஸமுட்டா²ன மேவ தது³ப⁴யம்பி தண்ஹாதி³ட்டீ²ஹி துஸம் ஆதி³ன்னபராமட்ட²த்தா உபாதி³ன்னம் நாம நிப்பரியாயதோ பன கம்மஸமுட்டா²னமேவ உபாதி³ன்னம்னாம. கஸ்மா தஸ்ஸேவ ஸத்தஸந்தானே நிச்சகாலம் பவத்திவஸேன ஸாதிஸயம் பு⁴ஸம் ஆதி³ன்னக³ஹிதபராமட்ட²தாஸம்ப⁴வதோதி வுத்தம் கம்மஜம்உபாதி³ன்னரூபந்தி. ஏதம் மமாதிஆதி³னா தண்ஹாதி³ட்டீ²ஹி பு⁴ஸம் ஆதி³யதீதி உபாதி³ன்னம். அட்ட²கதா²யம் பன தண்ஹாதி³ட்டீ²ஹி உபேதேன கம்முனா அத்தனோ ப²லபா⁴வேன ஆதி³ன்னம் க³ஹிதந்தி இமமத்த²ம் த³ஸ்ஸேதி. ஸஹ நித³ஸ்ஸனேன ஸனித³ஸ்ஸனம். நித³ஸ்ஸனந்தி சக்கு²விஞ்ஞாணேன த³ட்ட²ப்³ப³பா⁴வோ வுச்சதி. ஸோ பன த⁴ம்மதோ அனஞ்ஞத்தேபி அஞ்ஞே விய கத்வா உபசரீயதி. ஏவஞ்ஹி ஸதி அத்த²விஸேஸபோ³தோ⁴ ஹோதீதி. நித³ஸ்ஸனந்திவா சக்கு²விஞ்ஞாணகிச்சம் வுச்சதி. தேன ஸஹ வத்ததீதி ஸனித³ஸ்ஸனந்திபி யுஜ்ஜதியேவ. சக்கா²தி³த்³வயம் அஸம்பத்தவஸேன கோ³சரக்³கா³ஹிகம். கா⁴னாதி³த்தயம் ஸம்பத்தவஸேன கோ³சரக்³கா³ஹிகந்தி பஞ்சவித⁴ம்பி கோ³சரக்³கா³ஹிகரூபந்தி யோஜனா. தத்த² பஸாதே³ அல்லீயித்வா லக்³கி³த்வா உப்பன்னம் ஆரம்மணம் ஸம்பத்தம்னாம. கேஸக்³க³மத்தம்பி முஞ்சித்வா உப்பன்னம் அஸம்பத்தம்னாம. கஸ்மா பனேத்த² சக்கா²தி³த்³வயம் அஸம்பத்தமேவ க³ண்ஹாதி. கா⁴னாதி³த்தயம் ஸம்பத்தமேவாதி, பச்சயவிஸேஸதோ. ஆலோகோ ஹி ரூபக³ஹணே சக்கு²ஸ்ஸ பச்சயோ. ஆகாஸோச ஸத்³த³க³ஹணே ஸோதஸ்ஸாதி சக்கு²ரூபேஸுச அஞ்ஞமஞ்ஞம் லக்³கி³த்வா உப்பஜ்ஜமானேஸு ஆலோகபரிவாரஸ்ஸ ஓகாஸோ நத்தி². ததா² ஸோதஸத்³தே³ஸுச ஆகாஸபரிவாரஸ்ஸாதி. வாயுஆபபத²வியோ பன கா⁴னாதி³த்தயஸ்ஸ க³ந்தா⁴தி³க³ஹணே பச்சயா ஹோந்தி. தத்த² வாயுனாம க³ந்தா⁴கட்³ட⁴னகோ நாஸவாதோயேவ, ஸோச ஸம்பத்தஸ்ஸேவ பச்சயோ. ஆபோனாம ஜிவ்ஹாதேமனகோ ஆபோ, ஸோபி ஸம்பத்தஸ்ஸேவ பச்சயோ. ந ஹி ரஸோ ஸுக்க²ஜிவ்ஹாய ப²ரதீதி. பத²வீச க⁴ட்டனத்தா²ய பச்சயோ. ந ஹி து³ப்³ப³லபத²வீஸன்னிஸ்ஸயோ ஆலோகோவா ரஜோவாகாயே பதமானோபி பஸாதே³ க⁴ட்டேதீதி. இதி பச்சயவிஸேஸதோ தேஸம் ஸம்பத்தாஸம்பத்தவஸேன க³ஹண விஸேஸோ ஹோதீதி. தத்த² சக்கு²ஸ்ஸ தாவ அஸம்பத்தக³ஹணம் பாகடம். தஞ்ஹி ஸமீபே அக்கி²வண்ணம்வா ப⁴முகமூலம்வா நபஸ்ஸதி. தூ³ரே பன மஹந்தம் சந்த³மண்ட³லாதி³கம்வா ப²லிகாதி³திரோஹிதம்வா வண்ணம் பஸ்ஸதி. தி³ஸாதே³ஸவவத்தா²னஞ்சஸ்ஸ பஞ்ஞாயதீதி. ஸோதஸ்ஸ பன கத²ந்தி, தத்த² ஹி தூ³ரே ஸத்³தோ³ சிரேன ஸுய்யமானோ தி³ஸ்ஸதி பச்சி²மதி³ஸாபா⁴கே³ உப்பன்னோபி ஸத்³தோ³ அந்தரா மஹந்தே சேதியாதி³கே அந்தரிதே ஸதி த³க்கி²ணபஸ்ஸதோவா ஸுய்யதி. உத்தரபஸ்ஸதோவா. அஸுய்யமானோவா ஹோதீதி. வுச்சதே, உப்பன்னோ ஸத்³த³ஸங்கா⁴டோ ஆஸன்னே டி²தானம் ஆதி³தோ பட்டா²ய யாவ அவஸானா கமேன பாகடீபூ⁴தோ ஹோதி. படிக⁴ட்டனானிக⁴ம்ஸோச ப³லவா ஹோதி. அஹம் ஸுணோமீதி பவத்தா ஸல்லக்க²ணவீதி²யோ ஸீக⁴தரம் நிரந்தரம் விய பவத்தந்தி. தூ³ரே டி²தானம் பன படிக⁴ட்டனானிக⁴ம்ஸோ மந்த³தரோ ஹோதி. ஆதி³தோ அபாகடோ. மஜ்ஜே²வா அவஸானேவா பிண்ட³வஸேன பாகடீபூ⁴தோ. ஸல்லக்க²ணவீதி²யோ சிரேன பரேன பவத்தந்தி. தஸ்மா தேஸம் லஹும் ஸுதோ. சிரேன ஸுதோதி அதிமானோ ஹோதீதி. அபிச, ஸத்³தோ³னாம நிஸ்ஸயதா⁴துபரம்பராய பவத்தித்வா தூ³ரம்பி தே³ஸம் க³ச்ச²தியேவ. ஏவம் க³ச்ச²ந்தோச க³தக³தட்டா²னேஏவ ட²த்வா ஸவனூபசாரே டி²தானம் ஸோதஸஹஸ்ஸம்பி க⁴ட்டேதி. மஹந்தே பன சேதியாதி³கே அந்தரிதே ஸதி யதோ ஆகாஸோ உஜும் விவடோ ஹோதி. ததோ த³க்கி²ணபஸ்ஸதோவா உத்தரபஸ்ஸதோவா க³தக³தடா²னதோவஸோதம் க⁴ட்டேதி. மந்த³தரோ பன ஸத்³தோ³அஸுய்ய மானோபி ஹோதி. ஏவம் க³ச்ச²ந்தோச யாவ ஸோதபஸாதே³ அல்லீயித்வா நுப்பஜ்ஜதி. தாவ அஸம்பத்தோயேவ ஹோதி. யோ பன அல்லீ யித்வா உப்பஜ்ஜதி. ஸோ ஸம்பத்தோனாம ஹோதி. ந ஸோ ஸுய்யதீதி. யதி³ பன ஸோதம் ஸம்பத்தவிஸயம் ஸியா. யதா² அந்தோ குச்சி²க³தோ க³ந்தோ⁴ ப³ஹி நகா⁴யியதி. ததா² அந்தோ குச்சி²க³தோ ஸத்³தோ³பி ப³ஹி நஸுயேய்ய. க³ந்த⁴ஸ்ஸ விய தி³ஸாதே³ஸவவத்தா²னம் விஸ்ஸன ஸியாதி.

[188] விபா⁴வனியம் பன

‘‘க³ந்த்வா விஸயதே³ஸம் தம், ப²ரித்வா க³ண்ஹதீதி சே. அதி⁴ட்டா²ன விதா⁴ நேபி, தஸ்ஸ ஸோ கோ³சரோ ஸியா.’’ திபி விசாரிதம். தம் ந ஸுந்த³ரம்.

ந ஹி சக்கா²தி³த்³வயஸ்ஸ ப³ஹித்³தா⁴ விஸயதே³ஸக³மனஸங்கோ³ அத்தீ²தி. கோ³சரம் க³ண்ஹாதீதி கோ³சரக்³கா³ஹிகம். பஸாத³ மண்ட³பூ⁴தத்தா ஆபாதமாக³தம் ஆரம்மணனிமித்தம் ஸம்படிச்ச²தீதி அத்தோ².

விபா⁴வனியம் பன

விஞ்ஞாணாதி⁴ட்டி²தம் ஹுத்வா தம்தம் கோ³சரக³ஹண ஸபா⁴வத்தாதி வுத்தம்.

வண்ணோதி ரூபாரம்மணஸ்ஸேதம் நாமம். ஓஜாதி ஆஹார ரூப மாஹ. வினிபு⁴ஜ்ஜதீதி வினிப்³போ⁴கோ³. டா²னதோ தே³ஸதோ உப்பத்திகாரணதோ விஸும்விஸும் வவத்த²பீயதீதி அத்தோ². நவினிப்³போ⁴ கோ³தி அவினிப்³போ⁴கோ³. ஸோ ஏவ ரூபந்தி அவினிப்³போ⁴க³ரூபம். ஆசரியானந்த³த்தே²ரேனபனேத்த² க³ந்த⁴ரஸஓஜா கத்த²சி வினீபு⁴த்தா தி³ஸ்ஸந்தீதி பஞ்சவித⁴மேவ அவினிப்³போ⁴க³ரூபம் இச்சி²தம். தம் பரதோ ஆக³மிஸ்ஸதீதி. [ரூபவிபா⁴கோ³].

158. கம்மந்தி ஏகா சேதனாஏவ. ஸாயேவ ஹி பட்டா²னே நானாக்க²ணிக கம்மபச்சயபா⁴வேன வுத்தா. யதா²ஹ-நானாக்க²ணிகா குஸலாகுஸலா சேதனா விபாகானம் க²ந்தா⁴னம் கடத்தாச ரூபானம் கம்மபச்சயேன பச்சயோதி. சித்தந்தி பன ஸஸம்பயுத்தத⁴ம்மம் அதி⁴ப்பேதம். பட்டா²னே சேதஸிகத⁴ம்மானம்பி ரூபஸமுட்டா²பனபா⁴வேன வுத்தத்தா. யதா²ஹ-ஹேதூ ஹேதுஸம்பயுத்தகானம் த⁴ம்மானம் தம் ஸமுட்டா²னானஞ்ச ரூபானம் ஹேது பச்சயேன பச்சயோதிஆதி³. உதூதி தேஜோயேவ. ஸோ ஹி கப்பஸண்டா²பனவஸேன ஸகலம் ஓகாஸ லோகம்பி நானாஸரீரஸண்டா²பனவஸேன ஸக லம் ரூபமயம் காயம் ஸத்தலோகம்பி நானாருக்க²திணாதீ³னம் அப்³ப⁴படலமேக⁴வுட்டி²ஜலஅக்³கி³ வாதாதீ³னஞ்ச ஸண்டா²பனவஸேன ஸகலம் ஸங்கா²ரலோகம்பி உத³யதி பஸவதி ஜனேதி வட்³டே⁴தி. தஸ்மா உதூதி வுச்சதீதி. அரதி க³ச்ச²தி பவத்ததீதி உதூதிபி வத³ந்தி. ஆஹாரோதி ஓஜாஏவ. ரூபவிராக³பா⁴வனாபூ⁴தம் அரூபகுஸலம் கம்மஜரூபம் நஜனேதீதி வுத்தம் பஞ்சவீஸதிவித⁴ம்பீதி. அதிஸங்க²தந்தி அதீதகாலே யதா²கா லந்தரே ரூபம் ஜனேதி, ததா² விஸேஸேத்வா ஸுட்டு²கதம். அஜ்ஜ²த்தி கஸந்தானேதி வுத்தம், அஜ்ஜ²த்தஸந்தானேதி பன வத்தப்³ப³ம். அஜ்ஜ²த்த மேவ அஜ்ஜ²த்திகந்திவா இகஸத்³த³ஸ்ஸ அத்தோ² த³ட்ட²ப்³போ³. படிஸந்தி⁴முபாதா³யாதி படிஸந்தி⁴சித்தஸ்ஸ உப்பாத³க்க²ணம் உபாதா³ய. க²ணேக²ணேதி ஏகேகஸ்ஸ சித்தஸ்ஸ தீஸு தீஸு க²ணேஸு. ஆசரியானந்த³த்தே²ரோ பன ஸப்³பே³ஸம்பி சதுஸமுட்டா²னிகரூபானம் ஏகேகஸ்ஸ சித்தஸ்ஸ உப்பாத³க்க²ணேஏவ உப்பாத³ம் ப⁴ங்க³க்க²ணேஏவ நிரோத⁴ஞ்ச ஆஹ. அஹம் பனஸ்ஸா தி⁴ப்பாயோ-ஸப்³பா³னிபி சதுஸமுட்டா²னிகரூபானி சித்தஸ்ஸ உப்பாத³க்க²ணேஏவ உப்பஜ்ஜந்தி, ந ப⁴ங்க³க்க²ணே. யதா²ஹ –

யஸ்ஸவா பன ஸமுத³யஸச்சம் நிருஜ்ஜ²தி, தஸ்ஸ து³க்க²ஸச்சம் உப்பஜ்ஜதீதி. நோதி.

ததா² தானி சித்தஸ்ஸ ப⁴ங்க³க்க²ணேஏவ நிருஜ்ஜ²ந்தி. ந உப்பாத³க்க²ணே. யதா²ஹ –

யஸ்ஸ குஸலா த⁴ம்மா அகுஸலா த⁴ம்மா உப்பஜ்ஜந்தி, தஸ்ஸ அப்³யாகதா த⁴ம்மா நிருஜ்ஜ²ந்தீதி. நோதி.

அரூபப⁴வம் ஸந்தா⁴ய ஏதம் யமகத்³வயம் வுத்தம். ரூபானி பன சித்தஸ்ஸ ப⁴ங்க³க்க²ணேபி உப்பஜ்ஜந்தி. உப்பாத³க்க²ணேபி நிருஜ்ஜ²ந்தீதி சே. ந. ஏவஞ்ஹி ஸதி –

யஸ்ஸவா பன ஸமுத³யஸச்சம் நிருஜ்ஜ²தி, தஸ்ஸ து³க்க²ஸச்சம் உப்பஜ்ஜதீதி. அரூபே தண்ஹாய ப⁴ங்க³க்க²ணே தேஸம் ஸமுத³யஸச்சம் நிருஜ்ஜ²தி. நோச தேஸம் து³க்க²ஸச்சம் உப்பஜ்ஜதி. பஞ்சவோகாரே தண்ஹாய ப⁴ங்க³க்க²ணே தேஸம் ஸமுத³யஸச்சஞ்ச நிருஜ்ஜ²தி, து³க்க²ஸச்சஞ்ச உப்பஜ்ஜதீதிச.

இதரத்த²ச

அரூபே குஸலானம் உப்பாத³க்க²ணே தேஸம் குஸலா த⁴ம்மா உப்பஜ்ஜந்தி. நோச தேஸம் அப்³யாகதா த⁴ம்மா நிருஜ்ஜ²ந்தி. பஞ்சவோகாரே குஸலானம் உப்பாத³க்க²ணே தேஸம் குஸலா த⁴ம்மாச உப்பஜ்ஜந்தி. அப்³யாகதா த⁴ம்மாச நிருஜ்ஜ²ந்தீதிச.

ஏவம் பரிபுண்ணபஞ்ஹாஏவ உத்³த⁴டா ஸியும். நோதி பன படிஸேதோ⁴வ உத்³த⁴டோ. தஸ்மா நயித³ம் அரூபப⁴வம் ஸந்தா⁴ய வுத்தந்தி ஸக்கா வத்துந்தி. சித்தஜரூபம் ஸந்தா⁴ய வுத்தந்தி சே. தம்பி ந. கம்மஜரூபஸ்ஸ விக³ஹணே விரோத⁴ஸ்ஸ யமகபாட²ந்தரஸ்ஸ அபா⁴வதோ. அனுலோமஸ்ஸேவச பா⁴வதோ. யதா²ஹ –

யஸ்ஸவாபன யத்த² மனிந்த்³ரியம் ந உப்பஜ்ஜதி. தஸ்ஸ தத்த² ஜீவிதிந்த்³ரியம் நஉப்பஜ்ஜதீதி. அஸஞ்ஞஸத்தானம் தேஸம் தத்த² மனிந்த்³ரியம் ந உப்பஜ்ஜதி. நோச தேஸம் தத்த² ஜீவிதிந்த்³ரியம் ந உப்பஜ்ஜதி.

ஸப்³பே³ஸம் சவந்தானம் பவத்தே சித்தஸ்ஸ ப⁴ங்க³க்க²ணே தேஸம் தத்த² மனிந்த்³ரியஞ்ச நஉப்பஜ்ஜதி. ஜீவிதிந்த்³ரியஞ்ச நஉப்பஜ்ஜதீதி.

ஏத்த² ஹி அஸஞ்ஞஸத்தானந்தி ஏதேன ரூபஜீவிதிந்த்³ரிய மேவ வுத்தம். யதி³ச தம் சித்தஸ்ஸ ப⁴ங்க³க்க²ணேபி உப்பஜ்ஜேய்ய, புரிமகோட்டா²ஸே பவத்தே சித்தஸ்ஸ ப⁴ங்க³க்க²ணே அஸஞ்ஞஸத்தானம் தேஸம்.ல. ஜீவிதிந்த்³ரியம் நஉப்பஜ்ஜதீதி வுத்தம் ஸியா, பச்சி²மகோட்டா²ஸேச ஸப்³பே³ஸம் சவந்தானம் இச்சேவ வுத்தம் ஸியாதி. பச்சி²மகோட்டா²ஸே பன அரூப ஜீவிதிந்த்³ரியம் ஸந்தா⁴ய வுத்தந்தி சே. ந. ததா² க³ஹணத்த²ம் யமக பாட²ந்தராபா⁴வதோ ஸப்³ப³ஞ்ஞுவிஸயேச டா²னே பாளியோ ஸம்ஸந்தி³த்வா ப³லவதியா பாளியுத்தியாஏவ டா²தப்³ப³தோதி. யஸ்மாச ரூபத⁴ம்மா நாம த³ந்த⁴பவத்தினோ ஹோந்தி. அரூபத⁴ம்மா லஹுபவத்தினோ டி²திக்க²ணோச தேஸம் விஸும் க³ணனூபகோ³ நத்தி². தஸ்மா அஞ்ஞோயேவ ரூப த⁴ம்மானம் க²ணபப³ந்தோ⁴. அஞ்ஞோ அரூபத⁴ம்மானம். தத்த² ஸப்³பே³பி ரூபத⁴ம்மா ஏகசித்தக்க²ணபரிமாணேன அத்தனோ உப்பாத³க்க²ணேன யுத்தா க²ணே க²ணே நிரந்தரமேவ உப்பஜ்ஜந்தி. படிஸந்தி⁴தோ பட்டா²ய ஸஹுப்பன்னத்தாச பன த்³வின்னம் தேஸம் உப்பாதா³தி³வா நிரோத⁴ந்தோவா யாவஜீவம்பிஸஹேவ ஹோதீதிபி தஸ்ஸ அதி⁴ப்பாயோதி. யமக பாளியோ பன நானாத்தா², நானாப்³யஞ்ஜனா, க³ம்பீ⁴ரோச ஸத்து² அதி⁴ப்பாயோ. தஸ்மா ஸுட்டு² விசாரேத்வா ஸல்லக்கே²தப்³போ³. ந பன த⁴ம்மதா ஏஸா யமகஸ்ஸ. யதி³த³ம் யதா²லாப⁴யோஜனாதி கத்வா அத்தனோ அதி⁴ப்பாயே ட²த்வா தி³ட்ட²ம் தி³ட்ட²ம் யமகபாட²ம் யதா²லாப⁴யோ ஜனாயஏவ ஸக்கா யோஜேதுந்தி. ரூபவிராக³பா⁴வனாவிஸேஸபூ⁴தம் அரூபகுஸலம் தஸ்மிம் லோகே ரூபஸஹிதம் படிஸந்தி⁴ம் நஜனேதி. ஸுத்³த⁴அரூபமேவ ஜனேதி. தஸ்மா ரூபஸந்ததிஸீஸஸ்ஸ ஸப்³ப³ஸோ அபா⁴வா தத்ருப்பன்னானி ஸப்³பா³னி ச²சத்தாலீஸசித்தானி ரூபம் ஜனேதும் ந ந ஸக்கோந்தி. அரூபவிபாகா பன தத்தே²வ நியமுப்பன்னாதி அரூபபாகஸ்ஸேவ க³ஹணம் கதம், தேனேவ அட்ட²கதா²யம், அஞ்ஞானிபி ப³ஹூனி ஆருப்பே உப்பன்னானி அனோகாஸத்தா² ரூபம் நஸமுட்டா²பேந்தீதி வுத்தம் தத்த² அனோகாஸதானாம ஆதி³தோ பட்டா²ய உப்பன்னஸ்ஸ ரூபஸந்ததிஸீஸஸ்ஸ அபா⁴வோ ஏவ த³ட்ட²ப்³போ³தி.

[189] விபா⁴வனியம் பன

‘‘ரூபவிராக³பா⁴வனானிப்³ப³த்தத்தா ஹேதுனோ தப்³பி³து⁴ரதாயா’’திபி காரணம் வுத்தம். தம் அகாரணம்.

ரூபாரூபவிராக³பா⁴வனாபூ⁴தமக்³க³னிப்³ப³த்தஸ்ஸ லோகுத்தரவிபாகஸ்ஸ ரூபோகாஸே ஸதி ரூபஜனகதாத³ஸ்ஸனதோதி. ஜா²னங்க³விரஹேன அங்க³து³ப்³ப³லானிபி ரூபம் ந ஜனேந்தீதி த்³விபஞ்சவிஞ்ஞாணக³ஹணம் கதம். இதரா நிபி பன பன்னரஸகாமரூப படிஸந்தி⁴சித்தானி கீ²ணாஸவானம் பரினிப்³பா³னசுதி சித்தந்தி இமானி சித்தானி ரூபம் ந ஸமுட்டா²பேந்தியேவ. ஏவம்ஸந்தேபி தானி ஸப்³பா³னிபி ப⁴வங்க³காலே அகீ²ணாஸவானஞ்ச சுதிகாலே ஸமுட்டா²பேந்தீதி தேஸம் இத⁴ அக³ஹணம் த³ட்ட²ப்³ப³ம்.

[190] விபா⁴வனியம் பன

படிஸந்தி⁴சித்தம் பன சுதிசித்தஞ்ச ஏகூனவீஸதி ப⁴வங்க³ஸ்ஸேவ அந்தோக³த⁴த்தா சித்தந்தரம் ந ஹோதீதி ந தஸ்ஸ வஜ்ஜனம் கத’’ந்தி வுத்தம். தத்த² ஏகூனவீஸதி ப⁴வங்க³ஸ்ஸேவாதி ந வத்தப்³ப³ம்.

அரூபவிபாகஸ்ஸ ஸரூபதோ வஜ்ஜிதத்தாதி. கஸ்மா பன யதா² வுத்தானி பன்னரஸ படிஸந்தி⁴சித்தானி படிஸந்தி⁴க்க²ணே ரூபம் ந ஸமுட்டா²பேந்தீதி, பரிது³ப்³ப³லத்தா. சித்தஞ்ஹினாம உப்பாத³க்க²ணேஏவ பரிபுண்ணம் பச்சயம் லபி⁴த்வா ப³லவம் ஹோதி. ரூபஞ்ச டி²திக்க²ணேவ.

தஸ்மா அத்தனோ ப³லவந்தக்க²ணே உப்பஜ்ஜமானபா⁴வேன து³ப்³ப³லம் வத்து²ம் நிஸ்ஸாய உப்பன்னத்தா ஸயம்பி பரிது³ப்³ப³லம் ஹோதீதி ஸப்³பா³னிபி தானி ததா³ ரூபம் நஸமுட்டா² பேந்தீதி. ஏத்த²ச கேசி அனந்தராஸேவனாதி³பச்சயா சித்தஸ்ஸ உப்பாத³க்க²ணேஏவ ப²ரந்தி. ரூபஸ்ஸ பன உபத்த²ம்ப⁴கபூ⁴தா உதுஆஹாரா பச்சா²ஜாதபச்சயத⁴ம்மாச டி²திக்க²ணேஏவப²ரந்தீதி தேஸம் யதா²க்கமம் உப்பாத³க்க²ணே டி²திக்க²ணேச பரிபுண்ணபச்சயலாபோ⁴ வேதி³தப்³போ³.

[191] விபா⁴வனியம் பன

‘‘பச்சா²ஜாத பச்சயரஹிதம் பன ஆஹாராதீ³ஹிச அனுபத்த²த்³த⁴ம் து³ப்³ப³லவத்து²ம் நிஸ்ஸாய பவத்தத்தா அத்தனோச ஆக³ந்துகதாய கம்மஜரூபேஹிச சித்தஸமுட்டா²னரூபானம் டா²னம் க³ஹேத்வா டி²தத்தா’’தி காரணம் வுத்தம். தத்த² பச்சா²ஜாத பச்சய ரஹிதந்தி இத³ம் விசாரேதப்³ப³ம்.

படிஸந்தி⁴சித்தஸ்ஸ டி²திக்க²ணே பச்சா²ஜாத பச்சய ரஹிதஸ்ஸ பிஉதுஸ்ஸ ரூபஜனகபா⁴வஸ்ஸ வக்க²மானத்தா. ந ஹி அத்தனா அவிஜ்ஜமானம் பச்சி²மசித்தம் புரிமசித்தக்க²ணே டி²தஸ்ஸ கஸ்ஸசி ரூபஸ்ஸ பச்சா²ஜாத பச்சயோ ஹோதி. அத்தி² பச்சயேகதே³ஸத்தா தஸ்ஸ பச்சயஸ்ஸாதி. கீ²ணாஸவானம் சுதிசித்தம் பன பகதியாவ வூபஸந்தவட்டமூலே ஸந்தானே பவத்தத்தா ஸந்ததரம் ஹோதி. புன ஆயுஸங்கா²ரானம் பரிக்க²யேன து³ப்³ப³லதரே பரியந்தக³தே ச வத்து²ம்ஹி நிஸ்ஸிதத்தா து³ப்³ப³லதரஞ்ச ஹோதீதி தம் ரூபம் நஸமுட்டா²பேதீதி, ஆசரியானந்த³த்தே²ரோ பன ஸப்³ப³ஸத்தானம்பி சுதிசித்தம் ரூபம் நஸமுட்டா²பேதீதி இச்ச²தி. யதா²ஹ-கீ²ணாஸவானம் சுதிசித்தந்தி விஸேஸேத்வா வுத்தம்.

காமாவசரானம் பச்சி²மசித்தஸ்ஸ உப்பாத³க்க²ணே யஸ்ஸ சித்தஸ்ஸ அனந்தரா காமாவசரானம் பச்சி²மசித்தம் உப்பஜ்ஜிஸ்ஸதி. ரூபாவசரே அரூபாவசரே பச்சி²மப⁴விகானம் யேச ரூபாவசரம் அரூபாவசரம் உபபஜ்ஜித்வா பரினிப்³பா³யிஸ்ஸந்தி, தேஸம், சவந்தானம் தேஸம் வசீ ஸங்கா²ரோ நிருஜ்ஜி²ஸ்ஸதி, நோச தேஸம் காயஸங்கா²ரோ நிருஜ்ஜ²தீதி –

பன வசனதோ அஞ்ஞேஸம்பி சுதிசித்தம் ரூபம் நஸமுட்டா²பேதீதி விஞ்ஞாயதி. ந ஹி ரூபஸமுட்டா²பக சித்தஸ்ஸ க³ப்³ப⁴க³மனாதி³ வினிப³த்³தா⁴பா⁴வே காயஸங்கா²ராஸமுட்டா²பனம் அத்தி², ந ச யுத்தம் சுதோச சித்தஸமுட்டா²னஞ்சஸ்ஸ பவத்ததீதி. நாபி சுதிசித்தம் ரூபம் ஸமுட்டா²பேதீதி பாளி அத்தீ²தி.

அனுடீகாயம் பன

தஸ்மிம் பாடே² தேஸம் சவந்தானம் நோச காயஸங்கா²ரோ நிருஜ்ஜ²தீதி வசனம் ந கேவலம் சுதிசித்தஸ்ஸேவ ரூபஸமுட்டா²பனாபா⁴வம் ஸாதே⁴தி, அத²கோ² ததோ புரிமானம் ஸப்³பே³ஸம் மரணாஸன்ன சித்தானம் ரூபஸமுட்டா²பனாபா⁴வம்பி ஸாதே⁴தியேவாதி தீ³பேதி. சுதி சித்தஸ்மிம்ஹி காயஸங்கா²ரஸ்ஸ நிரோதே⁴ படிஸித்³தே⁴ ததோ புப்³பே³ யாவ ஸத்தரஸமசித்தா ஏத்த²ந்தரே தஸ்ஸ உப்பாதோ³பி படிஸித்³தோ⁴ஏவ ஹோதீதி. ஸப்³ப³ஞ்சேதம் விசாரேதப்³ப³ம்.

காயஸங்கா²ரோதி ஹி அஸ்ஸாஸபஸ்ஸாஸோ வுச்சதி. ஸோச ஸுட்டு² ஓளாரிகோ ரூபத⁴ம்மோதி நசுதிசித்தே தன்னிரோதா⁴பா⁴வ வசனேன இதரானி ஸுகு²மானிபி ரூபானி சுதிசித்தம் நஜனேதீதி ஸக்கா வத்தும்.

[192] யஞ்ச தத்த²

ந ஹி ரூபஸமுட்டா²பகசித்தஸ்ஸ க³ப்³ப⁴க³மனாதி³ வினிப³த்³தா⁴பா⁴வே காயஸங்கா²ராஸமுட்டா²பனம் அத்தீ²தி வுத்தம். தம்பி ந யுஜ்ஜதி.

தானிஏவ ஹி க³ப்³ப⁴க³மனாதீ³னி இமஸ்ஸத்த²ஸ்ஸ ஸாத⁴கானி ப⁴விதும் அரஹந்தி ஓளாரிகஸ்ஸ காயஸங்கா²ரஸ்ஸ அஸமுட்டா²பகம்பி சித்தம் இதரம் ஸுகு²மரூபம் பன ஸமுட்டா²பேதியேவாதி.

[193] யம்பி தத்த²

ந ச யுத்தம் சுதோச சித்தஸமுட்டா²னஞ்சஸ்ஸ பவத்ததீதி வுத்தம். தம்பி அகாரணம்.

ந ஹி சுதிதோ பரம் கதிபயக²ணமத்தம் சித்தஜரூபபவத்தியா கோசி விரோதோ⁴ அத்தீ²தி.

யஞ்ச தத்த²

நாபி சுதிசித்தம் ரூபம் ஸமுட்டா²பேதீதி பாளி அத்தீ²தி வுத்தம். தத்த²பி சுதிசித்தம் ரூபம் நஸமுட்டா²பேதீதிபி நத்தி², அஞ்ஞத்ர காயஸங்கா²ராதி ந ந ஸக்கா வத்துந்தி.

ஏவம் பன யுத்தம் ஸியா, யதா² ரூபத⁴ம்மா ஆதி³தோ படிஸந்தி⁴காலே ஏகசித்தக்க²ணமத்தே பச்சயபரித்ததாயவா அத்தனோ த³ந்த⁴வுத்தி தாயவா து³ப்³ப³லா ஹோந்தி, ததா² பரியோஸானேபி மரணகாலே பரிக்கீ²யமானபச்சயதாயவா நிரோதா⁴ஸன்னதாயவா பரிது³ப்³ப³லாஏவ ஹோந்தீதி ஸக்கா வத்தும். தஸ்மா வத்து²ஸ்ஸ ஆதி³அந்தனிஸ்ஸிதானி படிஸந்தி⁴சுதிசித்தானி ஸமது³ப்³ப³லானிஏவ ஹோந்தீதி ஸக்கா விஞ்ஞாதுந்தி.

விபா⁴வனியம் பன

அபி⁴த⁴ம்மத்த²விகாஸனியஞ்ச பாளிவிரோத⁴ம் மஞ்ஞமானோ கிஞ்சிமத்தம்பி அவிசாரேத்வா டீகாஸு வுத்தனயமேவ ஸுட்டு² விகாஸயித்வா க³தோதி.

பத²மப⁴வங்க³முபாதா³யாதி பத²ம ப⁴வங்க³சித்தஸ்ஸ உப்பாத³க்க²ணதோ பட்டா²ய. ஜாயந்தமேவாதி உப்பாத³க்க²ணே உப்பாத³க்க²ணே உப்பஜ்ஜ மானமேவ, ந திட்ட²ந்தம். நச பி⁴ஜ்ஜமானந்தி அத்தோ². காரணம் வுத்தமேவ. தத்தா²தி தஸ்மிம் பஞ்சஸத்ததிவிதே⁴ சித்தே. அப்பனாஜவனந்தி அபி⁴ஞ்ஞாத்³வயவஜ்ஜிதம் ச²ப்³பீ³ஸதிவித⁴ம் அப்பனாஜவனசித்தம். இரியாபத²ந்தி க³மனவஜ்ஜிதம் திவித⁴ம்பி இரியாபத²ம்.

[194] விபா⁴வனியம் பன

‘‘க³மனாதீ³’’தி வுத்தம். தம் ந யுஜ்ஜதி.

ந ஹி அங்க³பச்சங்கா³னம் சலனப²ந்த³னமத்தம்பி விஞ்ஞத்தியா வினா ஸிஜ்ஜ²தி. குதோ க³மனம். நச யதா²வுத்தம் அப்பனாஜவனம் விஞ்ஞத்திம் ஸமுட்டா²பேதும் ஸக்கோதீதி. பி ஸத்³தே³ன தம் நகேவலம் ரூபஸமுட்டா²பகமத்தம்தி த³ஸ்ஸேதி. ஸன்னாமேதீதி ஸந்தா⁴ரேதி அயமேவவா பாடோ² ஸியா, வக்க²மானேஹி சித்தேஹி அபி⁴ஸங்க²தம் யதா²பவத்தம் இரியாபத²ம் அபதமானம் அசலமானம் தா⁴ரேதி உபத்த²ம்பே⁴தீதி அத்தோ². உபத்த²ம்ப⁴னஞ்சேத்த² யதா²பவத்தஸ்ஸ இரியாபத²ஸ்ஸ ரக்க²னமத்தம் த³ட்ட²ப்³ப³ம். நஉக்கி²பித்வா விய அபி⁴னீஹரணம். இதரதா² த²ம்ப⁴னவிஞ்ஞத்தியா பஸங்கோ³ ஸியாதி. ஏத்த²ச யதா²னிஸின்னஸ்ஸவா டி²தஸ்ஸவா ப⁴வங்க³ சித்தே அப்³போ³கிண்ணே பவத்தமானே அங்கா³னி ஓஸீத³ந்தி பதந்தி. ந ததா² இமஸ்மிம் ச²ப்³பீ³ஸதிவிதே⁴ ஜாக³ரணசித்தே வக்க²மானேஸுசத்³வத்திம்ஸ விதே⁴ஸு ஜாக³ரணசித்தேஸுபவத்தமானேஸு. தேஸு பன பவத்தமானேஸு அங்கா³னி உபத்த²த்³தா⁴னி ஹோந்தி. ந ஓஸீத³ந்தி ந பதந்தி. புப்³பே³ யதா² த²பிதானேவ பவத்தந்தீதி வேதி³தப்³ப³ம்.

[195] விபா⁴வனியம் பன

‘‘ந ஏவ மேதேஸு த்³வத்திம்ஸவிதே⁴ஸு வக்க²மானேஸு ச ச²ப்³பீ³ஸதி யா ஜாக³ரணசித்தேஸு பவத்தமானேஸூ’’தி பாடோ².

ந ஏவமேதேஸு ச²ப்³பீ³ஸதியா ஜாக³ரணசித்தேஸு வக்க²மானே ஸுச த்³வத்திம்ஸ விதே⁴ஸு பவத்தமானேஸூதி பன பாடோ² யுத்தோ. வோட்ட²ப்³ப³னந்தி மனோத்³வாரே ஆவஜ்ஜனமாஹ. ந ஹி பஞ்சத்³வாரிகானி ஜவன சித்தானிபி விஞ்ஞத்திம் ஸமுட்டா²பேந்தி. இரியாபது²பத்த²ம்ப⁴ன மத்தம் வா பிஸத்³தே³ன க³ஹித²ம் ஸந்தா⁴ய வோட்ட²ப்³ப³னாதீ³னி பஞ்சத்³வாரிகானிபி க³ஹிதானிதி த³ட்ட²ப்³ப³ம். ஏத்த²ச இரியாபதோ²னாம க³மனாதி³னா தேன தேன அவத்தா²விஸேஸேன பவத்தா ரூபத⁴ம்மாஏவ. ஏவம் ஸந்தேபி கிஞ்சிசித்தம் ரூப ஸாமஞ்ஞமேவ ஜனேதி ந ததோபரம். கிஞ்சி அஞ்ஞசித்தஸ்ஸ வஸேன யதா²பவத்தம் இரியாபத²ம் ரக்கி²தும்ஏவ ஸக்கோதி, ந அப்பவத்தம் இரியாபத²ம் பவத்தேதும். கிஞ்சி விஞ்ஞத்திம் ஸமுட்டா²பேத்வா அப்பவத்தஞ்ச இரியாபத²ம் பவத்தேதும் ஸக்கோதி. அஞ்ஞானிச காயிக வாசஸிக விகாரானி ஜனேதும் ஸக்கோதி. யானிச சித்தானி உத்தரகிச்சம் ஜனேதும் ஸக்கோந்தி. தானி ஹேட்டி²மஹேட்டி²மம் கிச்சம் ஜனேதும் ஸக்கோந்தியேவாதி த³ஸ்ஸனத்த²ம் அயம் விபா⁴கோ³ கதோதி வேதி³தப்³போ³.

[196] யம் பன விபா⁴வனியம்

‘‘யம்பன சித்தம் விஞ்ஞத்திஜனகம், தம் ஏகம்ஸதோ இரியாபது² பத்த²ம்ப⁴கம். இரியா பத²ஸ்ஸ விஞ்ஞத்தியா ஸஹ அவினாபா⁴வதோ’’தி வுத்தம். தம் ந யுஜ்ஜதி.

இத⁴ ஹி இரியாபது²பத்த²ம்ப⁴னம்னாம விஞ்ஞத்திரஹிதமேவா தி⁴ப்பேதம், ந விஞ்ஞத்திஸஹிதம். இதரதா² அப்பனாஜவனானம்பி விஞ்ஞத்திஜனகதா ஆபஜ்ஜேய்யாதி. ஸோமனஸ்ஸஜவனானி தேரஸாதி ஹஸிதுப்பாதே³ன ஸத்³தி⁴ம் லோப⁴மூலதோ மஹா குஸலதோ மஹா க்ரியதோ ச சத்தாரிசத்தாரீதி தேரஸ ஸோமனஸ்ஸஜவனானி. தேஸுபன குஸலா குஸலதோ அட்ட²புது²ஜ்ஜனானம். தி³ட்டி²விப்பயுத்தா குஸலகுஸலதோ ச²ஸேக்கா²னம். க்ரியதோ பஞ்சகீ²ணாஸவானந்தி த³ட்ட²ப்³ப³ம். ஸப்³ப³ம் காயவசீமனோகம்மம் ஞாணபுப்³ப³ங்க³மம் ஞாணானுபரிவத்தந்தி வசனதோ விசாரணகிச்சரஹிதோ ஹஸிதுப்பாதோ³ ஸப்³ப³ஞ்ஞுபு³த்³தா⁴னம் நஸம்ப⁴வதீதி ஏவம் பவத்தோ வாதோ³ அட்ட²கதா²யம் படிக்கி²த்தோயேவ. தஸ்மிம்வாதே³ ஹி ஸதி இதரேஸம்பி அஹேதுகசித்தானம் ஞாணவிப்பயுத்தமஹா க்ரியஜவனானஞ்ச பு³த்³தா⁴னம் அஸம்ப⁴வோ ஆபஜ்ஜதி. தஸ்மா தேஸம் ஹஸிதுப்பாத³சித்தேன பவத்தஸ்ஸ ஸிதகம்மஸ்ஸ புப்³பா³பரபவத்தானம் ஞாணானம் வஸேன ஞாணபுப்³ப³ங்க³மதா ஞாணானுபரிவத்ததா ச வேதி³தப்³பா³தி. ஸீதுண்ஹோது ஸமஞ்ஞாதாதி இத³ம் ஸீதம் இத³ம் உண்ஹந்தி ஏவம் ஸப்³ப³ லோகியமஹாஜனேஹி ஸுட்டு² பரிச்சி²ந்தி³த்வா ஞாதா. டி²திப்பத்தாவாதி அத்தனோ டி²திபா⁴வம் டி²திக்க²ணம்வா பத்தாஏவ. ந பன சித்தமிவ ஜாயந்த மத்தாதி அத்தோ². காரணம் வுத்தமேவ.

[197] யம் பன விபா⁴வனியம்

‘‘பச்சா²ஜாதாதி³பச்சயுபத்த²ம்ப⁴லாபே⁴ன டி²திக்க²ணேஏவ உதுஓஜானம் ப³லவபா⁴வோதி வுத்தம் தேஜோதா⁴து டி²திப்பத்தாதிஆதி³’’. தத்த² பச்சா²ஜாதபச்சயவசனம் ஹேட்டா² விசாரிதமேவ.

அபிச, யதி³ உதுனோ ப³லவபா⁴வோ ரூபுப்பாத³னஞ்ச பச்சா²ஜாதபச்சயாயத்தம் ஸியா. ஏவம் ஸதி ஸோ படிஸந்தி⁴சித்தஸ்ஸ டி²திக்க²ணே ரூபம் ந ஸமுட்டா²பேய்ய, ததா³ பச்சா²ஜாதபச்சயஸ்ஸேவ அபா⁴வதோ. வக்க²திச டி²திகாலமுபாதா³ய உதுஸமுட்டா²னாதி. ஏத்த²ச டி²திகாலந்தி படிஸந்தி⁴சித்தஸ்ஸ டீ²திகாலோ வுத்தோதி. தஸ்மா பச்சா²ஜாதபச்சயவசனம் விசாரேத்வா ஸம்படிச்சி²தப்³ப³ந்தி. ஓஜாஸங்கா²தோ ஆஹாரோதி கம்மஸமுட்டா²னாதி³வஸேன சதுப்³பி³தோ⁴ அஜ்ஜ²த்தஸந்தான க³தோஅஸிதபீதகா²யிதஸாயிதவஸேன சதுப்³பி³தோ⁴, ப³ஹித்³த⁴ஸந்தா நக³தோச ஓஜாஸங்கா²தோ து³விதா⁴ஹாரோ. தது³ப⁴யாபிச ஸம்ஸக்³க³ வஸேன லத்³து⁴பத்த²ம்பா⁴ ஏவரூபம் ஸமுட்டா²பேந்தீதி வுத்தம் அஜ்ஜோ²ஹரண காலேதி. ஏத்த²ச ப³ஹித்³தா⁴ஸம்பூ⁴தேன உதுனா ஸஹ அஜ்ஜ²த்த ஸம்பூ⁴தானம் சதுஸமுட்டா²னானம் உதுஓஜானம் விய ப³ஹித்³தா⁴ஸம்பூ⁴தாய ஓஜாயபி அஜ்ஜ²த்தம் ரூபஸமுட்டா²னம் ஸப்³ப³அட்ட²கதா²ஸு வுத்தம்.

யதா²ஹ-மஜ்ஜி²மட்ட²கதா²யம்

கப³ளீகாராஹாரோ தாவ முகே² த²பிதமத்தோ ஏவ அட்ட²ரூபானி ஸமுட்டா²பேதி. த³ந்தவிசுண்ணிதம் பன அஜ்ஜோ²ஹரீயமானம் ஏகேகம் ஸித்த²ம் அட்ட² அட்ட² ரூபானி ஸமுட்டா²பேதீதி.

ஆசரியத⁴ம்மபாலத்தே²ரேன பன யதி³ ப³ஹித்³த⁴ஸம்பூ⁴தா ஓஜா ரூபம் ஸமுட்டா²பேய்ய, ஏவம் ஸதி யதா² ப³ஹித்³த⁴ஸம்பூ⁴தோ உது அஜ்ஜ²த்தஞ்ச ப³ஹித்³தா⁴ச ரூபம் ஸமுட்டா²பேதி. ததா² ஸா ப³ஹித்³தா⁴பி ரூபம் ஸமுட்டா²பேய்ய. ந பன ஸமுட்டா²பேதி. தஸ்மா ஸா அஜ்ஜ²த்தம் பத்வாபி ரூபம் ந ஸமுட்டா² பேதியேவ. ஏகந்தேன பன அஜ்ஜ²த்தஓஜாஏவ ஸமுட்டா²பேதி. ஸா பன தஸ்ஸா உபத்த²ம்ப⁴னபச்சயோஏவ ஹோதீதி அதி⁴ப்பாயேன முகே² த²பிதமத்தோஏவ. ந ஸங்கா²தி³தோ. தத்தகேனபி அப்³ப⁴ந்தரஸ்ஸ பச்சயோ ஹோதியேவ, கேனாஹ அட்ட² அட்ட² ரூபானி ஸமுட்டா²பேதீதி மஜ்ஜி²மடீகாயம் வுத்தம். யஸ்மா பன உபாதி³ன்னகா உது ஓஜானாம ஸுட்டு² பணீதரூபா ஹோந்தி, தஸ்மா ப³ஹித்³தா⁴ ஓஜாபி அஜ்ஜ²த்தம் பத்வா தேன உதுனா ஸுட்டு² ஸேதி³யமானா தாயச ஓஜாய ஸுட்டு² உபத்த²ம்பீ⁴ய மானா ஸரீரே மேத³ஸினேஹுபசயவஸேன ரூபம் ஸமுட்டா²பேதியேவாதி யுத்தம். அஜ்ஜோ²ஹரணகாலேதி இத³ஞ்ச ஸுட்டு² ப³லவபா⁴வப்பத்த காலம் ஸந்தா⁴ய வுத்தம். விஸுத்³தி⁴மக்³கே³ பன மாதரா பரிபு⁴த்தாஹாரோபி தா³ரகஸ்ஸ ஸரரம் ப²ரித்வா ரூபம் ஸமுட்டா²பேதி. ஸரீரே மக்கி²தாஹா ரோபி ரூபம் ஸமுட்டா²பேதீதி வுத்தம். முகே² த²பிதமத்தோஏவ அட்ட²ரூபானி ஸமுட்டா²பேதீதிச புப்³பே³ வுத்தந்தி. டா²ன பத்தோவாதி அத்தனோ டி²திக்க²ணம் பத்தோஏவ. ஏத்த²ச சதூஸு ஸமுட்டா²னேஸு உதுஏவ மஹந்தோ மஹாதா²மோ மஹாவிப்பா²ரோச ஹோதி. ஸோ ஹி ஸகலஸ்ஸபி ஓகாஸலோகஸ்ஸ ப³ஹித்³தா⁴ ஸங்கா²ரலோகஸ்ஸச ஸமுட்டா² பகோ வினாஸகோ ச ஹோதி. ஸத்தலோகஸ்ஸச ஸோஏவ மஹந்தோ அஜ்ஜ²த்தஸம்பா⁴ரபூ⁴தோ ஹோதி. இதரானி பன தீணி தஸ்ஸ பரிவாரமத்தானிஏவ ஸம்பஜ்ஜந்தீதி.

ஹத³ய இந்த்³ரிய ரூபானி கம்மஜானேவ, ந சித்தஜாதி³னி. யதி³ஏவம் விப்பஸன்னானி கோ² தே ஆவுஸோ ஸாரிபுத்த இந்த்³ரியானி. கதரேன த்வம் ஏதரஹி விஹாரேன விஹரஸீதி கஸ்மா வுத்தந்தி. இந்த்³ரியஸம்பா⁴ரானம் வண்ணானம் ஸமாபத்தி சித்தஸமுட்டி²தானம் விஸத³விப்பஸன்னதாவஸேன உபசரி தத்தாதி. ததா² ஹி ஏகாப³த்³த⁴பவத்தானி சதுஜரூபானி ஏகஸ்மிம் விப்பஸன்னே ஸப்³பா³னி விப்பஸன்னானேவ ஹோந்தி. மிலாதேச மிலாதானேவாதி. உதுசித்தாஹாரா பன தேஸம் நவன்னம் உபத்த²ம்ப⁴னபச்சயா ஹோந்தீதி வேதி³தப்³ப³ம். ஏத்த² ச உப்பலபது³மானி விய கம்மஜரூபானி த³ட்ட²ப்³பா³னி. தேஸம் பீ³ஜம் விய கம்மம். கத்³த³மோத³கானி விய உதுஆஹாராதீ³னி. விஞ்ஞத்தி த்³வயம் சித்தஜமேவ. ததா² ஹி தம் சித்தஸஹபூ⁴ சித்தானுபரிவத்தித⁴ம்மேஸு ப⁴க³வதா நித்³தி³ட்ட²ந்தி. ஸத்³தோ³சித்தோதுஜோதி கஸ்மா வுத்தம். நனுனிதி⁴கண்ட³ஸுத்தே ஸுவண்ணதா ஸுஸரதா ஸுஸண்டா²னம் ஸுரூபதாதிஆதி³னா தாதி³ஸேன கம்மவிஸேஸேன ஸத்³த³ஸம்பத்தினாம வுத்தாதி. ஸச்சம், கம்மவிஸேஸேன பன யதா² ஸுவிஸதோ³ ஸுமது⁴ரோ ஸத்³தோ³ பவத்ததி, ததா² டா²னகரணக³தானம் உபாதி³ன்னகஸரீரானம் ஸுஸண்டி²ததா வாத ஸேம்ஹாதீ³ஹி அபலிபு³த்³த⁴தாச ஹோதி. தஸ்மா தம்மூலிகாஸத்³த³ஸம்பத்தி கம்மப²லேஸு பக்கி²பித்வா ஸுஸரதாதி வுத்தா. ந ஏகந்தேன ஸத்³த³ஸ்ஸ கம்மஜனிதத்தாதி வேதி³தப்³பா³.

லஹுதாதி³த்தயம் உதுசித்தாஹாரேஹி ஸம்போ⁴தீதி கஸ்மா வுத்தம். நனு அப்பாபா³த⁴ஸம்வத்தனிகா ஏஸா மாணவ படிபதா³, யதி³த³ம் அவிஹிம்ஸாதி வுத்தம். அப்பாபா³த⁴ பச்சயஸமுட்டி²தஞ்ச ஏதம் ரூபத்தயம். ததா² ஹி த³ந்த⁴த்தாதி³ கர தா⁴துக்கோ²த படிபக்க²பச்சய ஸமுட்டா²னதா ஏதஸ்ஸ வுத்தாதி. வுச்சதே, கம்மஜரூபானினாம உத³கே பக்கி²த்தானி ஸதபாகதேலானி விய பகதியாவ கம்மானுரூபம் லஹு முது³ கம்மஞ்ஞ பூ⁴தானி ஹோந்தி. தஸ்மா தேஸம் விஸும் லஹுதாதி³ விகாரோனாம நத்தி². யதோ தேஸம் ஏகஸ்மிம்ப⁴வே ஏகாஅத்³தா⁴ பச்சுப்பன்னதாவ லப்³ப⁴தீதி. ஏவஞ்ச கத்வா யமகேஸுபி தேஸம் காலபே⁴தோ³ படிஸந்தி⁴வுதிபரிச்சி²ன்னேன அத்³தா⁴ பச்சுப்பன்னேனேவ க³ஹிதோதி. யஸ்மா பன சித்தம்னாம நானானீவரணபே⁴த³வஸேனவா ஸுக² து³க்க² பீதி பஸ்ஸத்³தி⁴ ஸத்³தா⁴ பஞ்ஞாதி³ வஸேனவா நானா க²ணேஸு நானா அவத்தா² யுத்தம் ஹோதி. ததா² உதுஆஹாராச ஸப்பாயா ஸப்பாயபே⁴த³வஸேன. தஸ்மா தேஹி தீஹி ஸமுட்டி²த ரூபானிஏவ நானாக²ணேஸு க³ருகலஹுகாதி³ வஸேன நானாவிகாரயுத்தானி ஹோந்தி. யதோ தேஸம் ஸந்ததி ஸமய வஸேன காலபே⁴தோ³ லப்³ப⁴தி. ஏவஞ்ச கத்வா யமகேஸுபி அகம்மஜானம் பவத்திகாலே க²ணஸந்ததிவஸேனபி காலபே⁴தோ³ க³ஹிதோதி. நனு கம்மவிபாகஜா ஆபா³தா⁴தி வுத்தம். ஸதிச கம்ம ஸமுட்டா²னே ஆபா³த⁴ரூபே ததோவுட்டா²னபூ⁴தோ கம்மஜோ லஹுதாதி³ கு³ணோபி விஸும் லப்³ப⁴மானோ ஸியாதி. ந. யேஸஞ்ஹி வஸேன இமஸ்மிம் ஸரீரே கம்மவிபாகஜானாம ஆபா³தா⁴ உப்பஜ்ஜந்தி. தானி உபபீளகுப கா⁴தககம்மானிபி க³திகாலபயோக³ விபத்தியோ லப⁴மானானி ஏவ ஸரீரட்ட²கா பத²வாத³யோ வாதபித்தாத³யோச உதுஸமுட்டா²னா தா⁴துயோ கோ²பே⁴த்வா நானாபா³தே⁴ உப்பாதே³ந்தி. உதுஸமுட்டா²னாஸு பன கு²ப்³பி⁴தாஸு இதரானி தத³னுக³திகானி ஏவ ஹோந்தி. தேனேவ ஹி ஸீதேனபி ருப்பதி, உண்ஹேனபி ருப்பதி, ஜிக³ச்சா²யபி ருப்பதி, விபாஸாயபி ருப்பதீதிஆதி³னா உதுபதா⁴னோவ ரூபத⁴ம்மானம் ருப்பனபச்சயோ வுத்தோதி. தஸ்மா கேவலம் கம்மஸமுட்டா²னோ ஆபா³தோ⁴னாம நத்தி². யதோ யதா²வுத்தோ கம்மஜோ லஹுதாதி³கு³ணோனாம விஸும் லப்³ப⁴மானோ ஸியாதி.

யஸ்மா பன அவிஹிம்ஸா கம்மனிப்³ப³த்தா ஸத்தா தேஸம் உபபீளகாதீ³னம் கம்மானம் ஸுவிதூ³ரதாயசேவ ஸரீரகோட்டா²ஸானம் க⁴னஸினித்³த⁴ஸண்டி²தியா து³க்கோ²ப⁴னியதாயச நிப்³ப³த்தப⁴வே நிராபா³தா⁴ ஹோந்தி. தஸ்மா தத³த்த²ம் ஸந்தா⁴ய அப்பாபா³த⁴ஸம்வத்தனிகா ஏஸா மாணவபடிபதா³. யதி³த³ம் அவிஹிம்ஸாதி வுத்தம், ந பன அப்பாபா³த⁴னிமித்தஸ்ஸ லஹுதாதி³த்தயஸ்ஸ கம்மஸமுட்டா²னதாய. ஏவஞ்ச கத்வா ரூபகண்டே³ன கம்மஸ்ஸகடத்தாரூபேஸு ஏவ ஏதம் ரூபத்தயம் நித்³தி³ட்ட²ந்தி த³ட்ட²ப்³ப³ம். ரூபகலாபானாம ஏகஸ்மிம் பரமாணுஸ்மிம்பி ப³ஹுவிதா⁴ ஹுத்வா பவத்தந்தி. தஸ்மா சதுஜரூப கலாபேஸு க⁴னபா⁴வேன பவத்தமானேஸு கலாபந்தரபூ⁴தா ஆகாஸதா⁴துபி தி³ஸ்ஸமானாஏவ ஹோதீதி கத்வா சதுஜேஸு தஸ்ஸா க³ஹணம் கதம். காமம் ஸப்³பா³னிபி அனிப்ப²ன்னரூபானி கேனசி பச்சயேன அனிப்பா²தி³தானி ஹோந்தி. தேஸு பன ந ததா² லக்க²ணரூபானி. யதா² இதரானி சித்தாதி³ பச்சய விஸேஸேன தி³ஸ்ஸமான விஸேஸானி ஹோந்தீதி வுத்தம் லக்க²ணரூபானி ந குதோசி ஜாயந்தீதி. ஜாயமானாதி³ ரூபானந்தி ஜாயமான ஜிய்யமான மிய்யமானானம் ரூபகலாபானம். ஸபா⁴வத்தாதி ஜாதிஜராமரணஸங்கா²தலக்க²ணஸபா⁴வமத்தத்தா. ஏத்த²ச ரூபகண்டே³ உதுஸமுட்டா²னந்தி ச ஆஹாரஸமுட்டா²னந்தி ச வுத்தம் நத்தி². பட்டா²னே ஏவ வுத்தம்.

ஏத்த² ஸியா, ஜரதா அனிச்சதா பாளியமேவ ந குதோசி ஸமுட்டா²னாதி வுத்தா. தஸ்மா இத⁴பி தாஸம் நகுதோசி ஸமுட்டா²னேஸு க³ஹணம் யுத்தம். உபசயஸந்ததியோ பன பாளியம்பி குதோசி ஸமுட்டா²னேஸு வுத்தா. அட்ட²கதா²யம்பி தாஹி ஸத்³தி⁴ம் விஸதி கம்மஜரூபானி ஸத்தரஸ சித்தஜரூபானி சுத்³த³ஸ உதுஜரூபானி தேரஸ ஆஹாரஜ ரூபானி வுத்தானி. தஸ்மா இத⁴ தாஸம் நகுதோசிஸமுட்டா²னதா நவத்தப்³பா³தி. வுச்சதே, ரூபஜனகானம் ஜனனப்³யாபாரோனாம அத்தனா ஜனிதரூபானம் உப்பாத³க்க²ணே ஏவ ப²ரதி. ந-ததோ பரம், தஸ்மா தஸ்மிம் க²ணே லப்³ப⁴மானா உபசயஸந்ததியோயேவ குதோசி ஜாதபரியாயம் அரஹந்தி, ந ஜரதா அனிச்சதாயோதி கத்வா பாளியம் அட்ட²கதா² யம்ச தாஸம்ஏவ குதோசி ஸமுட்டா²னேஸு க³ஹணம் கதம். அபிச, புப்³பே³ அஜாதா த⁴ம்மா பச்சயே ஸதி ஜாயந்தி. அஸதி ந ஜாயந்தீதி அத்தி². ஜாதா பன த⁴ம்மா பச்சயே ஸதி ஜிய்யந்தி, மிய்யந்தி. அஸதி நஜிய்யந்தி நமிய்யந்தீதி நத்தி², தஸ்மா புரிமானம் த்³வின்னம் பவத்தி ஏகந்தேன பச்சயாயத்தா ஹோதி. பச்சி²மானம் த்³வின்னம் பவத்தி பன ஏகந்தேன பச்சய நிரபேக்கா² ஹோதீதி இமினா பரியாயேன தாஸம் தேஸு க³ஹணம் அக³ஹணஞ்ச வேதி³தப்³ப³ம். யம் பன ஸுத்தபதே³ஸு ஜராமரணம் பி⁴க்க²வே ஸங்க²தம் படிச்ச ஸமுப்பன்னந்தி வுத்தம். தம் ஜாதியா ஸதிஏவ தது³ப⁴யம் பஞ்ஞாயதி. அஸதி ந பஞ்ஞாயதீதி இமினா பரியாயேன வுத்தந்தி வேதி³தப்³ப³ம். இத⁴ பன புப்³பே³ வுத்தனயேன இதர அனிப்ப²ன்னரூபானி விய சத்தாரிபி ஏதானி சித்தாதி³பச்சயவிஸேஸேன தி³ஸ்ஸமானவிஸேஸானி ந ஹோந்தீதி சதுன்னம்பி ந குதோசி ஜாததா வுத்தா. ஏவம்ஸந்தேபி ஸாரதரம் பாளினயம் அதிதா⁴வந்தோ விய ஹோதீதி உபசயஸந்த தீனம் குதோசி ஸமுட்டா²னேஸு ஸங்க³ஹோஏவ ஸேய்யோதி. [ரூபஸமுட்டா²னனயோ]

159. ஏகோ ஏவ ஜாதி ஸங்கா²தோ உப்பாதோ³ ஏதேஸந்தி ஏகுப்பாதா³. ஏகோஏவ அனிச்சதாஸங்கா²தோ நிரோதோ⁴ ஏதேஸந்தி ஏகனிரோதா⁴. ஏகஸத்³தோ³ சேத்த² ஸங்கா²னே பவத்தோ. தஸ்மா தேன யானி ரூபானி ஏகாயஏவ ஜாதியா ஜாயந்தி. ஏகாய ஏவ அனிச்சதாய நிருஜ்ஜ²ந்தி. தேஸம் பிண்டி³ இத⁴ ரூபகலாபோனாமாதி த³ஸ்ஸேதி. யே பன கலாபக³த ரூபக³ணனாய ஏகஸ்மிம் கலாபேபி அனேகானி ஜாதிஆதீ³னி கப்பேந்தி, தேஸம் மூலடீகாய நஸமேதி. யுத்திச நத்தி². வுத்தஞ்ஹி தத்த² ஏகேககலாப பரியாபன்னானம் ரூபானம் ஸஹேவ உப்பாதா³தி³பவத்திதோ ஏகேககலாபஸ்ஸ உப்பாதா³த³யோ ஏகேகாவ ஹோந்தீதி யதா² ஏகேகஸ்ஸ கலாபஸ்ஸ ஜீவிதிந்த்³ரியம் கலாபா நுபாலகம் உபாதா³ய ரூபந்தி வுச்சதி. ஏவம் கலாபுப்பாதா³தி³ ஸபா⁴வா ஜாதிஆத³யோ உபாதா³யரூபானிச்சேவ வுச்சந்தி. ஏவம் விகாரபரிச்சே²த³ ரூபானிச யோஜேதப்³பா³னீதி. யதி³ச யோ ஆயதனானம் ஆசயோ. ஸோ ரூபஸ்ஸ உபசயோதிச யோ ரூபஸ்ஸ உபசயோ. ஸாரூபஸ்ஸ ஸந்ததீதிச வுத்தத்தா தானி ஜாதிஆதீ³னி லக்க²ணரூபானி விஸும்விஸும் ரூபானம்ஏவ, நகலாபஸ்ஸாதி வுச்சேய்யும். சதுன்னம் மஹாபூ⁴தானம் உபாதா³ய பஸாதோ³ ரூபீனம் த⁴ம்மானம் ஆயூதிஆதி³னா வுத்தத்தா சக்கா²தி³ ஜீவிதாதீ³னிபி ஏகஸ்மிம் கலாபே அனேகானிஏவ ஆபஜ்ஜேய்யும். தஸ்மா ததா² கப்பனம் அகத்வா ஏகஸ்மிம் கலாபே அஞ்ஞானி உபாதா³ரூபானி விய லக்க²ணரூபானிபி ஏகேகானிஏவாதி நிட்ட²ம் க³ந்தப்³ப³ந்தி.

ஏகோ ஸமானோ மஹாபூ⁴தஸங்கா²தோ நிஸ்ஸயோ ஏதேஸந்தி ஏகனிஸ்ஸயா. ஏத்த² பன ஸமானத்தே² ஏகஸத்³தோ³ யுத்தோ. சதுன்னம் பூ⁴தானம் நிஸ்ஸயதாஸம்ப⁴வதோ. யானிசஏகுப்பாத³தாதீ³ஹிதீஹிலக்க²ணேஹி யுத்தானி. தானி ஏகந்தேன ஸஹவுத்தீனி நாம ஹோந்தீதி வுத்தம் ஸஹவுத்தினோதி. த³ஸபரிமாணானிஅஸ்ஸாதித³ஸகம். த³ஸன்னம் ஸமூஹோ வா த³ஸகம். சக்கு²னா உபலக்கி²தம் த³ஸகந்தி சக்கு²த³ஸகம். சக்கு²பதா⁴னம்வா த³ஸகம் சக்கு²த³ஸகம். ஏஸனயோ ஸேஸேஸுபி. யஸ்மா பன சித்தஜோ ஸத்³தோ³ விஞ்ஞத்திவிகாரேன வினா நபவத்ததி. விஞ்ஞத்திவிகாரோச தேன ஸத்³தே³ன வினா நபவத்ததி. தஸ்மா சித்தஜம் ஸத்³த³னவகம்வா வசீவிஞ்ஞத்தினவகம்வா நஸம்ப⁴வதீதி அதி⁴ப்பாயேன வசீவிஞ்ஞத்தி ஸத்³தே³ ஹி ச ஸஹவசீவிஞ்ஞத்தி த³ஸகந்தி வுத்தம். ஏத்த² பன விஞ்ஞத்தி விகாரோ ஸத்³தே³ன வினா நபவத்ததீதி இத³ம் தாவ யுஜ்ஜதி. யா தாய வாசாய விஞ்ஞத்தி விஞ்ஞாபனா விஞ்ஞாபிதத்தம். இத³ம் தம்ரூபம் வசீவிஞ்ஞத்தீதி ஹி வுத்தம். விஞ்ஞத்திவிகாரரஹிதம் பன சித்தஜம் ஸத்³த³னவகம். அட்ட²கதா²ஸு ஆக³தமேவ. யதா²ஹ-படிச்சஸமுப்பாத³ நித்³தே³ஸேஸு படிஸந்தி⁴க்க²ணதோ உத்³த⁴ம் பவத்தஉதுதோசேவ சித்ததோச ஸத்³த³னவகந்தி.

மஹாஅட்ட²கதா² நயேன விஞ்ஞத்தி ரஹிதோ விதக்க விப்பா²ர ஸத்³தோ³னாம அஸோத விஞ்ஞேய்யோ சித்தஜோ ஸத்³தோ³ லப்³ப⁴தி. ஸோ பன ஸங்க³ஹகாரேன படிஸித்³தோ⁴. யதா²ஹ-பட்டா²னேபி சித்தஸமுட்டா²னம் ஸத்³தா³யதனம் ஸோதவிஞ்ஞாணஸ்ஸ ஆரம்மணபச்சயேன பச்சயோதி ஆவதம். தஸ்மா வினா விஞ்ஞத்திக⁴ட்டனாய உப்பஜ்ஜமானோ அஸோத விஞ்ஞேய்யோ விதக்கவிப்பா²ரஸத்³தோ³னாம நத்தீ²தி. விஸுத்³தி⁴மக்³கே³ அஸ்ஸாஸ பஸ்ஸாஸே சித்தஜம் ஸத்³த³னவகம் வுத்தம். யதா²ஹ-சித்தஜே அஸ்ஸாஸ பஸ்ஸாஸ கோட்டா²ஸேபி ஓஜட்ட²மகஞ்சேவ ஸத்³தோ³சாதி நவாதி, ஸத்³த³னவகேச ஆக³தே ஸத்³த³லஹுதாதி³ த்³வாத³ஸகம்பி ஆக³தமேவ ஹோதி. தஸ்மா ஸுத்³த⁴ட்ட²கம், ஸத்³த³னவகம், காயவிஞ்ஞத்தி நாகம், வசீவிஞ்ஞத்தி த³ஸகம், லஹுதாதே³கா த³ஸகம், ஸத்³த³லஹுதாதி³த்³வாத³ஸகம், காயவிஞ்ஞத்தி லஹுதாதி³ த்³வாத³ஸகம், வசீவிஞ்ஞத்திஸத்³த³லஹுதாதி³ தே ரஸகந்தி அட்ட²சித்தஜகலாபா பச்சேதப்³பா³தி. ஸச்சஸங்கே²பே பன ஸத்³த³ லஹுதாதி³ த்³வாத³ஸகம் விஸும் அக³ஹேத்வா சித்தஜ கலாபா ஸத்தேவ வுத்தா.

டீகாஸு பனஸ்ஸ போராணடீகாயம்

மஹாட்ட²கதா²னயேன விஞ்ஞத்திரஹிதே அஸோத விஞ்ஞேய்யே விதக்க விப்பா²ரஸத்³தே³ ஸத்³த³னவகம் த³ஸ்ஸேத்வா புன வாத³ந்தரம் த³ஸ்ஸேந்தேன. அபிச, மஹாஜனஸன்னிபாதஸ்ஸ தூ³ரதோ அபஞ்ஞாயமானக்க²ரபத³ப்³யஞ்ஜனத்தோ² சித்தஸமுட்டா²னனிகோ⁴ஸஸத்³தோ³ அவிஞ்ஞத்திகோ ஏவாதி வத³ந்தி. ததா² மிக³பக்கீ²னம்ச அஞ்ஞமஞ்ஞம் பா⁴ஸம் அஜானந்தானம் அந்த⁴த³மிளாதி³னம் அவிஞ்ஞத்திகோ சித்தஸமுட்டா²னஸத்³தோ³ அத்தீ²தி வுத்தம்.

தத்த² விஞ்ஞத்திரஹிதோ அஸோதவிஞ்ஞேய்யோ விதக்கவிப்பா²ர ஸத்³தோ³ அட்ட²ஸாலினியம் படிக்கி²த்தோ. மஹாஜனஸன்னிபாதஸ்ஸ சித்த ஸமுட்டா²ன நிகோ⁴ஸஸத்³தோ³பி ஆஸன்னே டி²தானம் பஞ்ஞாயமானக்க²ரபத³ ப்³யஞ்ஜனத்தோ² ஸவிஞ்ஞத்திகோஏவ ஹோதி. இதரதா² ஸப்³பே³பி சித்த ஜஸத்³தா³ தூ³ரதரே டி²தானம் அபஞ்ஞாயமான பத³ப்³யஞ்ஜனாஏவ ஹோந்தீதி ஸப்³பே³பி விஞ்ஞத்திரஹிதா ஸியுந்தி. நச மிக³பக்கி²ஆதீ³னம் சித்தஜோ ஸத்³தோ³ விஞ்ஞத்திரஹிதோ ஹோதி. ஸமானஜாதியானம் பரேஸம் அதி⁴ப்பாயத்த² விஞ்ஞாபனதோதி.

பச்சி²ம டீகாயம் பனஸ்ஸ

ஸத்³த³னவகம் பனேத்த² அச்ச²ரா ஸங்கா⁴த பாணிப்பஹாராதி³ ஸத்³த³ ஸஹிதம் அட்ட²கமேவாதி வுத்தம். தம்பி ந யுத்தம்.

தாதி³ஸோ ஹி ஸத்³தோ³ சித்தபச்சயோ உதுஸமுட்டா²னோஏவ. தஸ்மா விஸுத்³தி⁴மக்³கே³ வுத்தனயேன அஸ்ஸாஸபஸ்ஸாஸேவா அவசீகோ⁴ஸேஸு கதா³சி சித்தஸஹிதேஸு உக்காஸித கி²பித வமித ச²ட்³டி³தஸத்³தா³தீ³ஸு பிவா ஏதம் ஸத்³த³னவகம் வேதி³தப்³ப³ந்தி. உதுஜகலாபேஸு பச்சி²மா த்³வேபி கஸ்மா ப³ஹித்³தா⁴ நலப்³ப⁴ந்தி. நனு ப³ஹித்³தா⁴பி ரூபானம் லஹு க³ரு முது³ த²த்³த⁴ கம்மஞ்ஞதா தி³ஸ்ஸந்தீதி. ஸச்சம், தா பன பூ⁴தானம் ஓமத்தாதி⁴மத்த வஸேன ஹோந்தி, ந பன லஹுதாதி³த்தயவஸேனாதி த³ட்ட²ப்³ப³ம். கஸ்மா பன ஆகாஸதா⁴துச லக்க²ணரூபானிச ரூபகலாபேஸு நக³ஹிதானீதி வுத்தம் கலாபானந்திஆதி³. ஆகாஸதா⁴துகலாபானம் பரிச்சே²த³ மத்தத்தா கஸ்ஸசி ரூபகலாபஸ்ஸ அங்க³பூ⁴தா அவயவபூ⁴தா ந ஹோதி, லக்க²ணரூபானிச ஸப்³பே³ஸம்பி கலாபானம் உப்பாதா³தி³ லக்க²ண மத்தத்தா விகாரரூபானி விய கலாபானம் பே⁴த³கரானி அங்க³பூ⁴தானி கலாபவிஸேஸபஞ்ஞாபனஸ்ஸ காரணபூ⁴தானி ந ஹோந்தி. தஸ்மா தானி தேஸு நக³ஹிதானீதி த³ஸ்ஸேதி. ஏதேன ஏகுப்பாதா³திஆதி³னா புப்³பே³ வுத்தனியமோ நிப்ப²ன்னரூபானஞ்ஞேவ, ந அனிப்ப²ன்னரூபானம். தேஸம் பன கலாப பே⁴த³ கரண மேவ கலாபங்க³ந்தி ச தீ³பேதி. ஏவஞ்ச கத்வா ஏகனிரோத⁴ங்க³ரஹிதஸ்ஸபி விஞ்ஞத்தித்³வயஸ்ஸ கலாபபே⁴த³ கரத்தாஏவ தேஸு க³ஹணம் ஸுட்டு² உபபன்னம் ஹோதீதி வேதி³தப்³ப³ந்தி. [கலாபயோஜனா]

160. யதா²ரஹந்தி ஸபா⁴வகா பா⁴வகானம் பரிபுண்ணாபரி புண்ணிந்த்³ரியானஞ்ச அரஹானுரூபதோ. அனூனானீதி பரிபுண்ணானி. நஞ்ஹி இத³ம் நாமரூபம் காமலோகே பவத்தியம் ந லப்³ப⁴தீதி அத்தீ²தி.

[198] விபா⁴வனியம் பன

‘‘யதா²ரஹந்தி ஸபா⁴வகபரிபுண்ணாயதனானம் அனுரூபதோ’’தி வுத்தம், தம் ந ஸுந்த³ரம்.

ந ஹி அனூனானீதி இத³ம் புக்³க³லவஸேன விஸேஸனம் ஹோதீதி. ஸம்ஸேத³ஜானஞ்சேவஓபபாதிகானஞ்சாதி ஏத்த² மஹாஸீஹனாத³ஸுத்தே-

சதஸ்ஸோ கோ² இமா ஸாரிபுத்த யோனியோ. கதமா சதஸ்ஸோ, அண்ட³ஜா யோனி ஜலாபு³ஜா யோனி ஸம்ஸேத³ஜாயோனி ஓபபாதிகா யோனீதி. யே கோ² தே ஸாரிபுத்த ஸத்தா அண்ட³கோஸம் அபி⁴னிப்³பி⁴ஜ்ஜ அபி⁴னிப்³பி⁴ஜ்ஜ ஜாயந்தி, அயம் வுச்சதி ஸாரிபுத்த அண்ட³ஜா யோனி. யே கோ² தே ஸாரிபுத்த ஸத்தா வத்தி²கோஸம் அபி⁴னிப்³பி⁴ஜ்ஜ அபி⁴னிப்³பி⁴ஜ்ஜ ஜாயந்தி. அயம் வுச்சதி ஸாரிபுத்த ஜலாபு³ஜா யோனி. யே கோ² தேஸாரி புத்தஸத்தாபூதிமச்சே²வா ஜாயந்தி. பூதிகுணபேவா பூதிகும்மாஸேவா சந்த³னிகாயவா ஓளிக³ல்லேவா ஜாயந்தி, அயம் வுச்சதி ஸாரிபுத்த ஸம்ஸேத³ஜா யோனி. தே³வா நேரகா ஏகச்சே ச மனுஸ்ஸா ஏகச்சேச வினிபாதிகா அயம் வுச்சதி ஸாரிபுத்த ஓபபாதிகா யோனீதி வுத்தம்.

அட்ட²கதா²யஞ்ச அண்டே³ ஜாதா அண்ட³ஜா. ஜலாபு³ம்ஹி ஜாதா ஜலாபு³ஜா. ஸம்ஸேதே³ ஜாதா ஸம்ஸேத³ஜா. வினா ஏதேஹி காரணேஹி உப்பத்தித்வா விய நிப்³ப³த்தா அபி⁴னிப்³ப³த்தாதி ஓபபாதிகா. அபி⁴னிப்³பி⁴ஜ்ஜ ஜாயந்தீதி பி⁴ந்தி³த்வா நிக்க²மனவஸேன ஜாயந்தி. பூதி குணபேதிஆதீ³ஹி அனிட்ட²ட்டா²னானேவ த³ஸ்ஸிதானி. இட்டே²ஸு ஸப்பி தேலமது⁴பா²ணிதாதீ³ஸு ஸத்தா ஜாயந்திஏவாதி வுத்தம். ஏத்த²ச புரிமேஸு த்³வீஸு பாளினயேன அண்ட³ம் வுச்சதி அண்ட³கோஸோ. ஜலாபு³வுச்சதி வத்தி²கோஸோ, ததோ ஜாதா விஜாதா நிக்க²ந்தாதி அண்ட³ஜா ஜலாபு³ஜாதிச வுச்சந்தீதி வேதி³தப்³பா³. தத்த² ஜரம் ஜீரணம் பே⁴த³ம் யாதி உபேதீதி ஜலாபூ³தி ஸத்³த³னீதியம் வுத்தம். ஜலம் வுச்சதி கலலம். தம் ஆவுனாதி படிச்சா²தே³தி அவதிவா ரக்க²தீதி ஜலாபு³, க³ப்³ப⁴பலிவேட²னாஸயோ. ஸம்ஸீத³ந்தி ஏத்தா²தி ஸம்ஸேதோ³. பூதிமச்சா² தி³கோ ஸப்பிதேலாதி³கோ பது³மக³ப்³ப⁴வேளுக³ப்³ப⁴ருக்க²ஸுஸிரபுப்ப²ப²லாதி³ கோச அல்லகிலின்னபதே³ஸோ. உபபத்திக்க²ணேஏவ பரிபுண்ணஅங்க³பச்சங்க³த்தா ததோ ததோ உப்பதித்வா விய ஜாயந்தீதி ஓபபாதிகா.

விபா⁴வனியம் பன

அண்ட³ஜாத³யோபி அண்ட³கோஸாதி³ம்ஹி ஓக்கமந்தா உப்பதந்தா ஏவ நாம ஹோந்தீதி தேஸம்பி ஓபபாதிகத்தபஸங்க³ம் மஞ்ஞமானோ உபபாதோ நேஸம் அத்தீ²தி ஓபபாதிகாதி வத்வா உக்கம்ஸக³தி பரிச்சே²த³வஸேன சேத்த² விஸிட்ட²ஓபபாதோ க³ஹிதோ. யதா² அபி⁴ரூபஸ்ஸ கஞ்ஞா தா³தப்³பா³தி வத³தி.

உக்கட்ட²வஸேனாதி பரிபுண்ணாயதனபா⁴வஸங்கா²தேன உக்கம்ஸதாவேன, தத்த² ஓபபாதிகா அங்க³பச்சங்கே³ஹி ஸஹ ஸப்³ப³ஸோ பரிபுண்ணேன அத்தபா⁴வேன ஜாயந்தி. புன தேஸம் வட்³ட⁴னகிச்சம் நத்தி². ஸம்ஸேத³ஜானம் பன ஆயதனானி ஏவ பரிபுண்ணானி ஹோந்தி. அங்க³பச்சங்கா³னி பன புன வட்³டி⁴த்வாஏவ பரிபுண்ணானி ஜாதானீதி வேதி³தப்³ப³ம். ஓமகவஸேனாதி அவகம்ஸவஸேன. சக்கு²ஸோதகா⁴னபா⁴வஸேகானிகதா³சிபி ந லப்³ப⁴ந்தி ஜாதிப³தி⁴ர ஜச்சகா⁴னகானம் அபா⁴வகானஞ்ச ஸம்ப⁴வதோதி அப்போயோ. தத்த² தானி ஸப்³பா³னிபி ஸுக³தி து³க்³க³தி ஜாதியானம் அஹேதுகஸம்ஸேத³ஜானம் கதா³சி நலப்³ப⁴ந்தி. ஸுக³தியம் பன ஓபபாதிகபா⁴வோனாம ஸேட்டோ² அத்தபா⁴வ படிலாபோ⁴தி நயேன கேனசி ஓமகேன கம்மேன லப்³ப⁴தி. தஸ்மா ஸுக³திஜாதி யானம் ஓபபாதிகானம் அபரிபுண்ணிந்த்³ரியதானாம நத்தி² அஞ்ஞத்ர அபா⁴வகேஹி ஆதி³கப்பிகேஹிதி. து³க்³க³திஜாதியானம்பி பன தேஸம் கதா³சி சக்கு² ஸோத பா⁴வ வேகல்லதாஏவ வத்தப்³பா³. ந கா⁴னவேகல்லதா. காமதா⁴துயம் பன அகா⁴னகோ ஓபபாதிகோ நத்தீ²தி ஹி அட்ட² கதா²யம் வுத்தம். ஜிவ்ஹாவேகல்லதானாம ஸப்³பே³ஸம்பி நத்தி² யேவாதி வேதி³தப்³ப³ம். ததா² ஹி த⁴ம்மஹத³யவிப⁴ங்கே³ –

காமதா⁴துயா உபபத்திக்க²ணே கஸ்ஸசி ஏகாத³ஸா யதனானி பாதுப⁴வந்தி. கஸ்ஸசி த³ஸ. கஸ்ஸசிஅபரானி த³ஸ. கஸ்ஸசி நவ. கஸ்ஸசி ஸத்தாயதனானி பாதுப⁴வந்தீதி வுத்தம்.

தத்த² காமதா⁴துயந்தி காமலோகே. உபபத்திக்க²ணேதி படிஸந்தி⁴சித்தஸ்ஸ உப்பாத³க்க²ணே. கஸ்ஸசி ஏகாத³ஸா யதனானீதிஆதி³ஸு சதூஸு வாக்யேஸு ஸம்ஸேத³ஜோபபாதிகா வுத்தா. கஸ்ஸசி ஸத்தாயதனானீதி ஏத்த² பன க³ப்³ப⁴ஸேய்யகோவ வுத்தோ. தத்த² யஸ்மா ஸத்தாயதனம் நாம படிஸந்தி⁴க்க²ணே ந லப்³ப⁴தி. பவத்தி காலேயேவ லப்³ப⁴தி. தஸ்மா ஏகாத³ஸயதனானீதி வுத்தம். கஸ்ஸசி த³ஸாதி சக்கு²வேகல்லவஸேன. கஸ்ஸசி அபரானி த³ஸாதி ஸோத வேகல்லவஸேன. கஸ்ஸசி நவாதி சக்கு²ஸோத த்³வய வேகல்ல வஸேன வுத்தம். யதி³ச அகா⁴னகோ ஓபபாதிகோனாம ஸியா. ததா³ ஸுத்³த⁴ஜச்சகா⁴னகேன ஸத்³தி⁴ம் தயோ த³ஸகவாரா வுத்தா ஸியும். ததா² ஜச்சந்த⁴கா⁴னக ஜச்சப³தி⁴ரகா⁴னகேஹி ஸத்³தி⁴ம் தயோ நவகவாரா ஏகோச அட்ட²கவாரோ வுத்தோ ஸியா திண்ணம் விபன்னானம் வஸேன. ததா² அவுத்தத்தா பன நத்தி² அகா⁴னகோ ஓபபாதி கோதி விஞ்ஞாயதீதி. தஸ்மிம் பன விப⁴ங்கே³ இந்த்³ரியவாரே நபும்ஸகானம் ஓபபாதிகானந்தி அவுத்தத்தா த²பேத்வா ஆதி³கப்பிகே அபா⁴வகோபி ஓபபாதிகோ நத்தி²யேவாதி. பாளியம் அவுத்தம்பி பன ஸம்ஸேத³ஜானம் வுத்தபகாரம் சக்கா²தி³வேகல்லம் அட்ட²கதா²வஸேன வேதி³தப்³ப³ம். யதா²ஹ-ஸத்ததி உக்கம்ஸதோவ ரூபானி ஸம்ஸேத³ஜோபபாத யோனீஸு. அத²வா, அவகம்ஸதோ திம்ஸாதி. தத்த² திம்ஸாதி ஜிவ்ஹாகாய வத்து² த³ஸகானம் வஸேன திம்ஸரூபானீதி ச வுத்தம். இத³ஞ்ஹி வசனம் ஸம்ஸேத³ஜானம் வஸேன வுத்தந்தி மஹாடீகாயம் வுத்தம். ஆசரியா நந்த³த்தே²ரேன பன யமகே கா⁴னஜிவ்ஹானம் அஞ்ஞமஞ்ஞம் அவினாபா⁴வ வுத்திதா வுத்தாதி ஜிவ்ஹா வேகல்லதா விய கா⁴னவேகல்லதாபி நத்தீ²தி இச்சி²தம். இந்த்³ரிய யமகே பன –

யஸ்ஸவா பன இத்தி²ந்த்³ரியம் உப்பஜ்ஜதி, தஸ்ஸ கா⁴னிந்த்³ரியம் உப்பஜ்ஜதீதி. அகா⁴னகானம் இத்தீ²னம் உபபஜ்ஜந்தீனம் தாஸம் இத்தி²ந்த்³ரியம் உப்பஜ்ஜதி, நோச தாஸங்கா⁴னிந்த்³ரியம் உப்பஜ்ஜதீதிச. யஸ்ஸவா பன புரிஸிந்த்³ரியம் உப்பஜ்ஜதி, தஸ்ஸ கா⁴னிந்த்³ரியம் உப்பஜ்ஜதீதி. அகா⁴னகானம் புரிஸானம் உபபஜ்ஜந்தானம் தேஸம் புரிஸிந்த்³ரியம் உப்பஜ்ஜதி, நோச தேஸம் கா⁴னிந்த்³ரியம் உப்பஜ்ஜதீதிச வுத்தம்.

தஸ்மா அட்ட²கதா²யம் வுத்தனயேன கா⁴னவேகல்லதாபி அத்தீ²தி யுத்தம்.