ஸமுச்சய ஸங்க³ஹ பரமத்த²தீ³பனீ

162. ஏவம் ச²ஹி பரிச்சே²தே³ஹி சத்தாரோ பரமத்தே² த³ஸ்ஸேத்வா இதா³னி தேஸம் தம்தம்ராஸிஸங்கா²தம் ஸமுச்சயம் த³ஸ்ஸேந்தோ ஆதி³கா³த² மாஹ. யே ஸலக்க²ணா த்³வாஸத்ததிவிதா⁴ வத்து²த⁴ம்மா மயா வுத்தா. இதா³னி தேஸம் ஸமுச்சயம் யதா²யோக³ம் பவக்கா²மீதி யோஜனா. தத்த² ஸலக்க²ணாவத்து²த⁴ம்மாதி பதே³ஹி த³ஸவிதா⁴னி அனிப்ப²ன்னரூபானி படிக்கி²பதி. ந ஹி தானி அத்தனோ ஆவேனிகபூ⁴தேன ஸபா⁴வ லக்க²ணேன அனிச்சதாதி³ ஸாமஞ்ஞலக்க²ணேனச ஸலக்க²ணானி ஹோந்தி. ஏகந்தபரமத்த²தாய அபா⁴வதோ. ததோயேவச வத்து²த⁴ம்மாச நஹோந்தி. ஸரூபதோ அனுபலப்³ப⁴மானத்தா. த³ப்³ப³வாசகோ ஹி இத⁴ வத்து²ஸத்³தோ³. த³ப்³ப³ஞ்சனாம இத⁴ ஸரூபதோ லப்³ப⁴மானோ ஸபா⁴வோ ஏவ. ஏதேன நிப்³பா³னஸ்ஸபி மக்³க³ப²ல பச்சவேக்க²னஞாணேஸு ஸரூபதோ லப்³ப⁴மான ஸபா⁴வதா வுத்தா ஹோதி. அனிப்ப²ன்னரூபானம் விய ச வத்து²த⁴ம்ம ஸன்னிஸ்ஸயேன தி³ஸ்ஸமானத⁴ம்மமத்தபா⁴வம் வா பஞ்ஞத்தித⁴ம்மானம் விய பரிகப்பிதாகாரமத்தபா⁴வம்வா ஸஸவிஸாண கச்ச²பலோமாதீ³னம் விய ஸப்³ப³ஸோ அபூ⁴த பரிகப்பித மத்தபா⁴வம்வா நிவாரேதீதி வேதி³தப்³ப³ம். ஏத்த²ச த்³வாஸத்ததிவிதா⁴ஸலக்க²ணாவத்து²த⁴ம்மாதி வசனே பயோஜனம் நதி³ஸ்ஸதி. தேஸு ஹி த்³வாஸத்ததிவிதே⁴ஸு ஏகச்சே ஏவ த⁴ம்மா புரிமேஸு தீஸு ஸங்க³ஹேஸு ஆக³தா. பச்சி²மேச ஸப்³ப³ஸங்க³ஹே அனிப்ப²ன்னரூபானிபி அதி⁴ப்பேதானிஏவாதி. ஏத்த²ச வத்து²த⁴ம்மாஸலக்க²ணாதி பதே³ஹி அனிப்ப²ன்னரூபானம் ஸலக்க²ணதா படிக்கி²பனே யம் வத்தப்³ப³ம். தம் ரூபஸமுத்³தே³ஸ தீ³பனியம் வுத்தமேவாதி. ஏகந்தாகுஸலஜாதியானம் ஆஸவ சதுக்காதீ³னம் ஸங்க³ஹோ அகுஸலஸங்க³ஹோ, ந அகுஸல ஸம்பயுத்தத்தாயேவ அகுஸலபூ⁴தானம் சித்தப²ஸ்ஸாதீ³னந்தி. குஸலா குஸலாப்³யாகதமிஸ்ஸகானம் ஸங்க³ஹோ மிஸ்ஸகஸங்க³ஹோ.

போ³தி⁴ வுச்சதி சதூஸு மக்³கே³ஸு ஞாணம், பு³ஜ்ஜ²ந்தி ஏதாயாதி கத்வா. போ³தி⁴யா பக்கா² போ³தி⁴பக்கா². போ³தி⁴ஸம்பா⁴ராதி அத்தோ². போ³தி⁴ பக்கே²ஸு ப⁴வா அந்தோக³தா⁴தி போ³தி⁴பக்கி²யா. தேஸம் ஸங்க³ஹோதி போ³தி⁴பக்கி²யஸங்க³ஹோ. ஸப்³பே³ஸம் அனவஸேஸானம் பரமத்த²த⁴ம்மானம் ஸங்க³ஹோ ஸப்³ப³ஸங்க³ஹோ. சிரபாரிவாஸியட்டே²ன மத³னியட்டே²னச ஆஸவ ஸதி³ஸத்தா ஆஸவா. யதி³ச தது³ப⁴யட்டே²ன ஆஸவானாம ஸியும். இமே லோபா⁴த³யோ ஏவ ஆஸவானாம ஸியும். புப்பா²ஸவாத³யோ ஹி லோகே ச² பஞ்ச ரத்திமத்தம் வா ஸத்தட்ட²ரத்திமத்தம் வா ஸயம்பி கும்பே⁴ஸு பரிவாஸம் க³ண்ஹந்தி. கும்பே⁴ச பரிவாஸம் கா³ஹாபேந்தி. இமே பன அனமதக்³கே³ ஸம்ஸாரே ஸயம்பி ஸத்தஸந்தானே பரிவாஸம் க³ண்ஹந்தி. ஸத்தஸந்தானஞ்ச பரிவாஸம் கா³ஹாபேந்தி. ஸகலம் ஸத்தஸந்தானம் ஸதா³ ஆஸவபூரிதமேவ ஹோதி. யதா²ஹ-சக்கு²ம் லோகே பியரூபம் ஸாதரூபம் ஏத்தே²ஸா தண்ஹா உப்பஜ்ஜமானா உப்பஜ்ஜதி. ஏத்த² நிவீஸமானா நிவீஸதீதிஆதி³. தத்த² ஏஸா தண்ஹா பரியுட்டா²னவஸேன உப்பஜ்ஜமானா ஏத்தே²வ உப்பஜ்ஜதி. உப்பஜ்ஜித்வாச புன அனுஸயபா⁴வேன பரிவாஸம் கத்வா நிவீஸமானா ஏத்தே²வ நிவீஸதீதி அத்தோ². யாவச அரியமக்³க³தோ⁴வனம் நலப்³ப⁴தி. தாவ ஸந்தானம் கூ³த²பூரிதகூபம் விய து³ப்³பி³ஸோத⁴ம் கத்வா பவத்ததி. புப்பா²ஸவாத³யோச மத³ம் ஜனேந்தா முஹுத்தமேவ ஜனேந்தி. இமே பன யாவ அரியமக்³க³ம் நலப⁴தி. தாவ நிச்சமத³ம் ஜனேந்தி. தஸ்மா ஏகந்தேன இமேயேவ சிரபாரிவாஸியட்டே²ன மத³னி யட்டே²னச ஆஸவானாம ப⁴விதும் அரஹந்தீதி.

விஸந்த³னட்டே²னவா ஆஸவஸதி³ஸத்தா ஆஸவா, யதா² ஹி குதி⁴த குட்டி²னோ மஹாவணமுகே²ஹி யூஸஸங்கா²தோ ஆஸவோ விஸந்தி³த்வா பிலோதிகக²ண்டா³னி தூ³ஸேதி, ஏவம் இமேபி ச²ஹித்³வாரேஹி விஸந்தி³த்வா ச²ளாரம்மணானிதூ³ஸேந்தீதி. ஆயதம்வா ஸம்ஸாரது³க்க²ம் ஸவந்திபஸவந்தி வட்³டே⁴ந்தீதி ஆஸவா. அத²வா, ப⁴வதோ ஆப⁴வக்³கா³ த⁴ம்மதோ ஆகோ³த்ரதும்ஹா ஸவந்தி ஆரம்மணகரணவஸேன பவத்தந்தீதி ஆஸவா. ஆஸத்³த³ஸ்ஸ அவதி⁴அத்த²ஜோதகத்தா. அவதி⁴ச து³விதோ⁴ மரியாத³விஸயோ அபி⁴விதி⁴விஸயோசாதி தத்த² யஸ்ஸ ஸம்ப³ந்தி⁴னீக்ரியா அவதி⁴பூ⁴தம் அத்தானம் ப³ஹிகத்வா பவத்ததி. ஸோ மரியாத³விஸயோ நாம. யதா² ஆபாதலிபுத்தா தே³வோ வுட்டோ²தி. யஸ்ஸ ஸம்ப³ந்தி⁴னீக்ரியா அவதி⁴பூ⁴தம் அத்தானம் ப்³யாபேத்வா அந்தோ கத்வா பவத்ததி, ஸோ அபி⁴விதி⁴விஸயோனாம. யதா² ஆப்³ரஹ்மலோகா ப⁴க³வதோ கித்திஸத்³தோ³ அப்³பு⁴க்³க³தோதி. இத⁴ பன அபி⁴விதி⁴விஸயோ த³ட்ட²ப்³போ³. தஸ்மா ப⁴வக்³க³ஞ்ச கோ³த்ரபு⁴ஞ்ச ப்³யாபேத்வா அந்தோ கத்வா ஸவந்தீதி அத்தோ² வேதி³தப்³போ³.

[204] விபா⁴வனியம் பன

அவதி⁴ச மரியாத³அபி⁴விதி⁴வஸேன து³விதோ⁴தி வத்வா புன தம் விபா⁴வேந்தோ ‘‘தத்த² ஆபாதலிபுத்தா தே³வோ வுட்டோ²திஆதீ³ஸுவிய க்ரியம் ப³ஹிகத்வா பவத்தோ மரியாதோ³. ஆப⁴வக்³கா³ஸத்³தோ³ அப்³பு⁴க்³க³தோதிஆதீ³ஸுவிய க்ரியம் ப்³யாபேத்வா பவத்தோ அபி⁴விதீ⁴’’தி வத³தி. தம் ந யுஜ்ஜதி.

ந ஹி அவவிதி⁴விஸயபூ⁴தோ ப⁴வக்³கோ³ லோகத்தயப்³யாபகம் ஸத்³த³ஸ்ஸ அப்³பு⁴க்³க³மனக்ரியம் ப்³யாபேத்வா பவத்ததி. நச அவதி⁴பூ⁴தோ அத்தோ² க்ரியம் ப³ஹிவா அந்தோவா கத்வா பவத்ததீதி யுத்தோ. க்ரியாஏவ பன தம் ப³ஹிவா அந்தோவா கத்வா பவத்ததீதி யுத்தோ. ஏவஞ்ச கத்வா மூலடீகாயம்-து³விதோ⁴ஹி அவதி⁴ அபி⁴விதி⁴விஸயோ அனபி⁴விதி⁴விஸயோச. அபி⁴விதி⁴விஸயம் க்ரியாப்³யாபேத்வா பவத்ததி, ஆப⁴வக்³கா³ ப⁴க³வதோ யஸோ க³தோதி. இதரம் ப³ஹிகத்வா, ஆபாதலிபுத்தா வுட்டோ² தே³வோதி. காமேதி இச்ச²தீதி காமோ. ஸோஏவ ஆஸவோதி காமாஸவோ. காமீயதிவா ஓளாரிகேன காமேன இச்சீ²யதீதி காமோ. பஞ்சகாமகு³ணமுகே²ன தே³ஸிதோ ஸப்³போ³ காமாவசரத⁴ம்மோ. இத⁴ பன தம் நாமேன ததா³ரம்மணா தண்ஹாஏவ அதி⁴ப்பேதா, காமோஏவ ஆஸவோதி காமாஸவோ. காமாவசரத⁴ம்மேஸு அஸ்ஸாத³னாபி⁴னந்த³ன வஸேன பவத்தோ காமராகோ³. தே²ரேன பன அயமத்தோ²வ இச்சி²தோ. வக்க²தி ஹி காமப⁴வ நாமேன தப்³ப³த்து²கா தண்ஹா அதி⁴ப்பேதாதி.

[205] விபா⁴வனியம் பன

புரிமத்தோ²வ வுத்தோ. ஸோ அனுபபன்னோ, தே²ரமதானுக³தஸ்ஸ இதா⁴தி⁴ப்பேதஸ்ஸ அத்த²ஸ்ஸ அவுத்தத்தா.

ப⁴வாஸவோதி ஏத்த² து³விதோ⁴ ப⁴வோ கம்மப⁴வோ உபபத்திப⁴வோ ச. தத்த² மஹக்³க³தகுஸலத⁴ம்மா கம்மப⁴வோ. தம்னிப்³ப³த்தா விபாக த⁴ம்மா உபபத்திப⁴வோ. இத⁴பி ப⁴வஸத்³தே³ன ததா³ரம்மணா தண்ஹாஏவ அதி⁴ப்பேதா. ப⁴வோஏவ ஆஸவோதி ப⁴வாஸவோ. தஸ்மிம் து³விதே⁴ ப⁴வே நிகந்திவஸேன பவத்தோ ரூபாரூபராகோ³.

[206] யம் பன விபா⁴வனியம்

‘‘ஸஸ்ஸத தி³ட்டி²ஸஹக³தோச ராகோ³ ஏத்தே²வ ஸங்க³ய்ஹதீ’’தி வுத்தம். தம் ந யுத்தம்.

ப⁴வாஸவோ சதூஸு தி³ட்டி²க³த விப்பயுத்த லோப⁴ஸஹக³தேஸு சித்துப்பாதே³ஸு உப்பஜ்ஜதீதி ஹி அட்ட²கதா²கண்டே³ வுத்தம். யத்த² பன காமதண்ஹா ப⁴வதண்ஹா விப⁴வதண்ஹாதி ஆக³தம். தத்தே²வ ஸஸ்ஸததி³ட்டி² ஸஹக³தோ ராகோ³ யாகாசி குஸலாகுஸல கம்மப⁴வனிகந்தி யாகாசி உபபத்திப⁴வபத்த²னா. ஸப்³பா³ ப⁴வதண்ஹாயம் ஸங்க³ஹிதாதி யுத்தா. இத⁴ பன யதா²வுத்தம் ப⁴வாஸவம் த²பேத்வா ஸப்³போ³ லோபோ⁴ காமாஸவே ஏவ ஸங்க³ஹிதோதி யுத்தோதி.

[207] ஏதேனேவ யஞ்ச தத்த² வுத்தம்.

‘‘ததியோ பா⁴தி³ட்டி²ஸஹக³தோ’’தி. தம்பி படிக்கி²த்தம் ஹோதி.

யாகாசி தி³ட்டி² தி³ட்டா²ஸவோ. யோகோசி மோஹோ அவிஜ்ஜாஸவோ. ஏத்த² ஸியா, கஸ்மா இமே ஏவ ஆஸவாதி வுத்தா. நனு அஞ்ஞேபி மானாத³யோ சிரபாரிவாஸியட்டா²தி³யுத்தா ஏவ ஹோந்தீதி. ஸச்சம். இமேஸு பன காமாஸவே பரிவுட்டே² ஸதி ஸப்³பே³காமவிஸயா மானாத³யோ பரிவுட்டா²ஏவ ஹோந்தி. தஸ்மிம் விமுத்தே விமுத்தாஏவ, ததா² ப⁴வாஸவே பரிவுட்டே² ஸதி ப⁴வவிஸயா. தி³ட்டா²ஸவேச பரிவுட்டே² ஸதி தி³ட்டி²விஸயாதி. அவிஜ்ஜாபன தேஸம் திண்ணம்பி மூலபூ⁴தாதி. இதி இமே ஏவ பாரிவாஸியட்டா²தீ³ஸு பதா⁴னபூ⁴தா ஹோந்தி. இதரே பன தத³னுப³ந்த⁴மத்தாஏவ ஸம்பஜ்ஜந்தீதி ந தே ஆஸவாதி விஸும் வத்தும் அரஹந்தீதி. அத்தனி பதிதம் ஜனம் அனஸ்ஸாஸிகம் கத்வா அஜ்ஜோ²த்த² ரந்தோ ஹனதி மாரேதீதி ஓகோ⁴. பகதிமஹோகோ⁴. ததா² அவஹனனட்டே²ன து³த்தரட்டே²னச ஓக⁴ஸதி³ஸாதி ஓகா⁴. யதி³ச அவஹஞ்ஞனட்டே²ச து³த்தரட்டே²னச ஓகா⁴னாம ஸியுந்திஆதி³கோ பஸங்கோ³ மானாதீ³னஞ்ச ஓக⁴பா⁴வ பரிஹாரோ வுத்த நயேன வேதி³தப்³போ³.

வட்டஸ்மிம்வா ப⁴வயந்தகேவா ஸத்தே யோஜேந்தீதி யோகா³. ப⁴வந்தரசுதியா ஸஹ ப⁴வந்தரபடிஸந்தி⁴ம் க³ந்தேந்தி க⁴டேந்தீதி க³ந்தா². அபி⁴ஜ்ஜா²தி ஸப்³ப³ஸ்ஸ ராக³ஸ்ஸேதம் நாமம். தஸ்மா ரூபாரூப ராகா³பி ஏத்த² ஸங்க³ஹிதாதி த³ட்ட²ப்³பா³. ப்³யாபாதோ³திபி ஸப்³போ³ தோ³ஸோ ஏவ. இத³ம் ஸச்சாதி நிவேஸோதி இத³மேவ ஸச்சம், மோக⁴மஞ்ஞந்தி பவத்தோ மிச்சா²பி⁴னிவேஸோ. வட்டது³க்க²தோ விமுத்தியா அமக்³க³பூ⁴தம்யேவ கோ³ஸீலகோ³வதாதி³கம் பரதோ ஆமஸனம் ததா² ததா² கப்பேத்வா க³ஹணம் ஸீலப்³ப³தபராமாஸோ. ஏத்த²ச பரதோதி பூ⁴தஸபா⁴வபச்சனிகதோதி அத்தோ². காயஸத்³தோ³ பன ஸப்³ப³த்த² ரூபகாயே நாமகாயேச பவத்தோதி அதிதகாயேன பச்சுப்பன்ன காயம் பச்சுப்பன்னகாயேனச அனாக³தகாயம் க³ந்தே²தி க⁴டேதீதி காயக³ந்தோ². அத²வா, காயே க³ண்டோ²தி காயக³ண்டோ². அஜ்ஜ²த்த க³ண்டோ²தி அத்தோ². நிக³ண்டோ²னாடபுத்தோதிஆதீ³ஸுவிய க³ண்ட²ஸத்³தோ³ க³ண்டி²யம் பவத்தோ. பு⁴ஸம் ஆதி³யந்தி அமுஞ்சனகா³ஹம் க³ண்ஹந்தீதி உபாதா³னானி. கிலேஸபூ⁴தோ காமோஏவ உபாதா³னம் காமு பாதா³னம். வத்து²பூ⁴தம்வா காமம் உபாதி³யதீதி காமுபாதா³னம்.

த்³வாஸட்டி²தி³ட்டி²யோ திவித⁴ மஹாதி³ட்டி²யோ அஞ்ஞாபிவா ஸாஸனே லோகேச ஸந்தி³ஸ்ஸமானா விபரீதகா³ஹபூ⁴தா தி³ட்டி²யோ தி³ட்டு²பாதா³னம். யதா²க³ஹிதம்வா புரிமதி³ட்டி²ம் இத³மேவ ஸச்சம் மோக⁴மஞ்ஞந்தி உபாதி³யதீதி தி³ட்டு²பாதா³னம். கோ³ணகுக்குராதீ³னம் தம்தம்பகதிசாரித்தம் ஸீலம் நாம. தமேவ ஸுட்டு²ம் ஸமாதி³ன்னம் வதம்னாம. தது³ப⁴யம் ஸம்ஸாரமுத்தியா மக்³கோ³தி த³ள்ஹக³ஹணம் ஸீலப்³ப³து பாதா³னம் நாம. அத்தவாது³பாதா³னந்தி ஏத்த² அத்தா வுச்சதி பரிகப்பபு³த்³தி⁴யா க³ஹிதோ ஏகேகஸ்மிம் ஸத்த ஸந்தானே பதா⁴னிஸ்ஸரோ. யம் லோகியமஹாஜனா ஸத்தோதிவா புக்³க³லோதிவா ஜீவோதிவா ததா²க³தோதிவா லோகோதிவா ஸஞ்ஜானந்தி. யஞ்ச நானாதித்தி²யா இஸ்ஸரனிம்மிதம்வா அதி⁴ச்சஸமுப்பன்னம்வா அச்சந்தஸஸ்ஸதம்வா ஏகச்சஸஸ்ஸதம்வா உச்சே²த³ம்வா பஞ்ஞபேந்தீதி. தம் அத்தானம் அபி⁴வத³ந்திசேவ உபாதி³யந்திச ஸத்தா ஏதேனாதி அத்தவா து³பாதா³னம். வீஸதிவிதா⁴ ஸக்காயதி³ட்டி². தத்த² அபி⁴வத³ந்தீதி விஸிட்ட²ம் பதா⁴னம் கத்வா வத³ந்தி. உபாதி³யந்தீதி த³ள்ஹம் ஆதி³யந்தி. யதா²ஹ –

தத்த² கதமா ஸக்காயதி³ட்டி². இத⁴ அஸ்ஸுதவா புது²ஜ்ஜனோ ரூபம் அத்ததோ ஸமனுபஸ்ஸதி. ரூபவந்தம்வா அத்தானம். அத்தனி வா ரூபம். ரூபஸ்மிம்வா அத்தானம். வேத³னம் அத்ததோ ஸமனுபஸ்ஸதி. வேத³னாவந்தம்வா அத்தானம். அத்தனிவா வேத³னம். வேத³னாபவா அத்தானம். ஸஞ்ஞம். ஸங்கா²ரே. விஞ்ஞாணந்தி.

தத்த² ரூபம் அத்ததோ ஸமனுபஸ்ஸதீதி ரூபமேவ அத்தாதி க³ண்ஹாதி. ரூபவந்தம்வா அத்தானந்தி அத்தா மே ரூபவாதி க³ண்ஹாதி. அத்தனி வா ரூபந்தி அத்தானம் படிச்ச ரூபம் திட்ட²தீதி க³ண்ஹாதி. ரூபஸ்மிம்வா அத்தானந்தி ரூபம் படிச்ச அத்தா திட்ட²தீதி க³ண்ஹாதி. கத²ம் ரூபகாயம் உத்³தி³ஸ்ஸ அஜ்ஜ அஹம் த²த்³தோ⁴ம்ஹீதி வா அஜ்ஜ அஹம் முது³கோம்ஹீதிவா வத³ந்தோ பத²வி ஸங்கா²தம் ரூபம் அத்ததோ ஸமனுபஸ்ஸதினாம. அஜ்ஜ மம காயோ த²த்³தோ⁴திவா முதூ³திவா வத³ந்தோ ஸேஸத⁴ம்மேவா த⁴ம்மமுத்தகம்வா அத்தானம் க³ஹேத்வா தம் அத்தானம் பத²வீவந்தம் ஸமனுபஸ்ஸதினாம. அஜ்ஜ த²த்³த⁴பா⁴வோவா முது³பா⁴வோவா மயி ஜாதோதி வத³ந்தோ அத்தனி பத²விம்ஸ மனுபஸ்ஸதினாம. அஜ்ஜாஹம் த²த்³த⁴பா⁴வே டி²தோம்ஹி முது³பா⁴வே டி²தோ ம்ஹீதி வத³ந்தோபத²விம்ஹி அத்தானம் ஸமனுஸ்ஸதினாம. அயம் பத²விம்ஹி சதுராவத்தி²காய ஸம்க்காயதி³ட்டி²யா பவத்தாகாரோ. ஸேஸேஸு ஸத்தவீஸதிரூபேஸு யதா²ஸம்ப⁴வம் வத்தப்³போ³. அஹம் மராமி மரிஸ்ஸாமீதிஆதி³னா ஹி அனிச்சதாயம்பி ஸாதி³ட்டி² பவத்ததியேவ. ஸேஸரூபேஸு வத்தப்³ப³ம் நத்தி². இத³ம் நாம அஹம் புப்³பே³ ஸம்பு⁴ஞ்ஜிம். அஜ்ஜ ஸம்பு⁴ஞ்ஜாமி. பரதோ ஸம்பு⁴ஞ்ஜிஸ்ஸாமீதிவா ஸுகி²தோம்ஹி து³க்கி²தோம்ஹீதிவா வேத³னம் அத்ததோ ஸமனுபஸ்ஸதி. அஜ்ஜ மம காயோ ஸுகி²தோ து³க்கி²தோதிவா மமசித்தம் ஸுகி²தம் து³க்கி²தந்திவா அத்தானம் வேத³னாவந்தம் ஸமனுபஸ்ஸதி. அஜ்ஜஸுக²ம்வா து³க்க²ம்வா மயிஜாதந்தி அத்தனி வேத³னம் ஸமனுபஸ்ஸதி. அஜ்ஜாஹம் ஸுகி²த பா⁴வே டி²தோம்ஹி து³க்கி²தபா⁴வே டி²தோம்ஹீதி வேத³னாய அத்தானம் ஸமனுபஸ்ஸதீதி.

ஸஞ்ஞாய ஸப்³பே³ஸுச பஞ்ஞாஸமத்தேஸு ஸங்கா²ரேஸு விஸும் விஸும் வித்தா²ரேத்வா வத்தப்³போ³. அஹம் பஸ்ஸாமீதி சக்கு²விஞ்ஞாணம் அத்ததோ ஸமனுபஸ்ஸதி. த³ஸ்ஸனம் மேதி அத்தானம் விஞ்ஞாணவந்தம் ஸமனுபஸ்ஸதி. மயித³ஸ்ஸனம்னாம அத்தீ²தி அத்தனி விஞ்ஞாணம் ஸமனுபஸ்ஸதி, அஹம் த³ஸ்ஸனே ஸமத்தோ²ம்ஹீதி விஞ்ஞாணஸ்மிம் அத்தானம் ஸமனுபஸ்ஸதி. ஏஸே வனயோ ஸேஸேஸு பஞ்சஸு விஞ்ஞாணேஸூதி. அஹ மஸ்மி அஹம் ஏகோ ஸத்தோ ஏகோபுக்³க³லோ ஏகோ ஜீவோ ஏகோ லோகோ ஏகோ நரோ மனுஸ்ஸோ தே³வோஸக்கோ ப்³ரஹ்மாதிவா அஹம்க³ச்சா²மி அஹம் திட்டா²மி அஹம் நிஸீதா³மி அஹம் நிப்பஜ்ஜாமி அஹம் ஸமிஞ்ஜேமி பஸாரேமீதிஆதி³னா வா க²ந்த⁴பஞ்சகம்வா ஏகமேகம்வா க²ந்த⁴ம் ஸமூஹதோ க³ஹேத்வா பவத்திபி வத்தப்³பா³. அபரிஞ்ஞாதவத்து²கானஞ்ஹி ஏகமுஹுத்த மத்தேபி யம்கிஞ்சி அத்தனோவா பரஸ்ஸவா அத்தபடிஸம்யுத்தவசனம் கதே²ந்தானம் சித்தம்வா வசனம்வா யதா²வுத்தே ரூபாரூபத⁴ம்மே கதா³சி அத்ததோ உபாதி³யித்வா பவத்ததி. கதா³சி அத்தபரிவார பா⁴வேன. கதா³சி அத்தனிஸ்ஸிதபா⁴வேன. கதா³சி அத்தனிஸ்ஸயபா⁴வேன. கதா³சி ஏகேகத⁴ம்மவஸேன. கதா³சி ஸமூஹத⁴ம்மவஸேனாதி.

யஸ்மா பன அத்தனிமித்தம்னாம வஸவத்தனாகாரம் படிச்ச உபட்டா²தி. வஸவத்தனா காரோச ரூபாரூபத⁴ம்மானம் பச்சயாயத்த வுத்திகத்தம் க²ணி கத்தஞ்ச ஸுட்டு² பஸ்ஸந்தானம் நத்தி². தஸ்மா பரிஞ்ஞாதவத்துகானம் அத்த படிஸம்யுத்தவசனம் கதே²ந்தானம்பி சித்தம் பது³மினிபத்தே உத³கபி³ந்து³ விய தேஸு த⁴ம்மேஸு அலக்³கி³த்வாஏவ பவத்ததீதி வேதி³தப்³ப³ம். ஸத்தானம் சித்தஸந்தானே குஸலே த⁴ம்மே அனுப்பன்னேவா உப்பாதே³தும் உப்பன்னேவா வா ஸேதும் அத³த்வா நீவாரேந்தீதி நீவரணானி. காமனட்டே²ன காமோ, ச²ந்த³னட்டே²னச²ந்தோ³தி காமச்ச²ந்தோ³. ப³லவராகோ³. ஸோஏவனீவரணந்தி காமச்ச²ந்த³னீவரணம். பட்டா²னேஆருப்பேகாமச்ச²ந்த³ம் நீவரணம் படிச்சஉத்³த⁴ச்சனீவரணந்தி வுத்தத்தா பன த²பேத்வா ரூபாரூபராகே³ அவஸேஸோ ஸப்³போ³லோபோ⁴ காமச்ச²ந்தே³ அஸங்க³ஹிதோனாம நத்தி². ஜா²னபடிபக்க²பா⁴வோபன பஞ்சகாமகு³ணிகராக³ஸ்ஸேவ ஹோதீதி வேதி³தப்³போ³. ப்³யாபஜ்ஜனம் ப்³யாபாதோ³. சித்தஸ்ஸ பூதிபா⁴வோதி அத்தோ². யோகோசிதோ³ஸோ. கஸ்மா பனேத்த² தி²னமித்³த⁴ நீவரணந்தி ச உத்³த⁴ச்ச குக்குச்ச நீவரணந்தி ச த்³வே த்³வே த⁴ம்மா ஏகம் நீவரணம் கத்வா வுத்தாதி. கிச்சதோ பச்சயதோ படிபக்க²தோச ஸதி³ஸத்தா. ததா² ஹி கிச்சதோ தாவ தி²னமித்³த⁴த்³வயம் சித்துப்பாதா³னம் லீனபா⁴வா பாத³னகிச்சம். உத்³த⁴ச்சகுக்குச்சத்³வயம் அவூபஸந்தபா⁴வாபாத³னகிச்சம். பச்சயதோ புரிமத்³வயம் தந்தி³விஜம்பி⁴ ததாபச்சயம். பச்சி²மத்³வயம் ஞாதிப்³யஸனாதி³விதக்கபச்சயம். படிபக்க²தோ புரிமத்³வயம் வீரியபடிபக்க²ம். பச்சி²மத்³வயம் ஸமத²படிபக்க²ந்தி.

அனுஸேந்தீதி அனுஸயா. அனுரூபம் காரணம் லபி⁴த்வா உப்பஜ்ஜந்தீதி அத்தோ². அனுஅனு ஸேந்தீதிவா அனுஸயா. யாவ மக்³க³ம் நபடிலப⁴தி. தாவ அந்தரா அபரிக்கி²ய்யமானா ஹுத்வா காரணலாபே⁴ ஸதி புனப்புனம் உப்பஜ்ஜந்தீதி அத்தோ². உப்பஜ்ஜனஞ்சேத்த² அப்பஹீனட்டே²ன உப்பஜ்ஜனா ரஹபா⁴வோ வேதி³தப்³போ³. ந பன ஸரூபதோ உப்பத்தி, கத²ம் விஞ்ஞா யதீதி சே. யஸ்ஸ காமராகா³னுஸயோ உப்பஜ்ஜதி, தஸ்ஸேவ படிகா⁴னுஸயோ உப்பஜ்ஜதீதி வுத்தத்தா. ஏவஞ்ச கத்வா பாளியம் புது²ஜ்ஜனஸ்ஸ ஸத்தபி அனுஸயா அனுஸயவாரே ஸஹ அனுஸேந்தீதி உப்பஜ்ஜனவாரே ஸஹ உப்பஜ்ஜந்தீதி வுத்தா. யதா²ஹ புது²ஜ்ஜனஸ்ஸ அவிஜ்ஜானுஸயோச அனுஸேதி. காமராக³. படிக⁴. மான. தி³ட்டி². விசிகிச்சா². ப⁴வராக³னுஸயோச அனுஸேதீதி. ததா² உப்பஜ்ஜனவாரேபீதி.

அபிச, ஸரூபதோ பரியுட்டா²னம் அபத்வா ஸந்தானே பவத்தமானேஹி குஸலாகுஸலா ப்³யாகதசித்துப்பாதே³ஹி ஸஹ அனுரூபா அவிருத்³தா⁴ ஹுத்வா ஸேந்தி. விஸும் ஸம்பயுத்தத⁴ம்மபா⁴வேன அவுட்டி²தா ஹுத்வா ஸயிதா ஹோந்தீதி அனுஸயா. அனு அனு ஸேந்தீதிவா அனுஸயா. பகதியா யதா²னுஸயிதேஸுஏவ காமராகா³தீ³ஸு புனப்புனம் உப்பஜ்ஜித்வா தி³கு³ண திகு³ணாதி³ வஸேன புனப்புனம் ஸேந்தி. ஸயனாகாரேன உபருபரி பலிவேடே²ந்தீதி அத்தோ².

தீஸு ராகா³தீ³னம் அவத்தா²ஸு பத²மாவத்தா²ய டி²தானம் காமராகா³ தீ³னமேதம் அதி⁴வசனம். திஸ்ஸோ ஹி அவத்தா² அனுஸயாவத்தா² பரியுட்டா²னாவத்தா² வீதிக்கமாவத்தா²தி. தத்த² யே காமராகா³த³யோ உப்பஜ்ஜித்வா காயங்க³வாசங்க³ம் சாலேந்தி, தேஸம் ததா²பவத்தா அவத்தா² வீதிக்கமாவத்தா²னாம. யே மனஸ்மிம் ஏவ ஜவனசித்தஸஹஜாதா ஹுத்வா பவத்தந்தி, தேஸம் ததா²பவத்தா அவத்தா² பரியுட்டா²னாவத்தா²னாம. யே பன ஜவனஸஹஜாதபா⁴வம்பி அபத்வா வாஸனாதா⁴துயோ விய சிக்கஸந்தானா நுஸயிதா ஹுத்வா பரியுட்டா²னப்பத்தியா பீ³ஜபா⁴வேன திட்ட²ந்தி, ஸுப⁴னிமித்தாதி³கேச ஆரம்மணே ஆபாதமாக³தே யேஸம் வஸேன ஆவஜ்ஜனம் ராகா³தி³பாதுபா⁴வத்தா²ய அயோனிஸோ ப⁴வங்க³ம் ஆவட்டேதி, அபா⁴விதஞ்ச சித்தம் யேஸம் வஸேன த³மத²ம் நஉபேதி, தேஸம் ததா² பவத்தா அவத்தா² அனுஸயாவத்தா²னாம. தத³வத்தி²கா காமராகா³த³யோ அனுஸயானாம. தே பன அபரமத்த²பூ⁴தாபி ந ஹோந்தி. ஏகந்தபரமத்த²ஜாதிகத்தா. நச குஸலாப்³யாகதபூ⁴தா ஏகந்தாகுஸலஜாதிகத்தா. நாபி குஸலாப்³யாகதவிருத்³தா⁴, விஸும் ஸம்பயுத்தத⁴ம்மபா⁴வேன அனுபலத்³த⁴த்தா. நாபி காலத்தயவினிமுத்தா, தேகாலிகத⁴ம்மஸன்னிஸ்ஸயேன பவத்தனதோ. யதா³ பன தே ஸமுட்ட² ஹித்வா பரியுட்டா²னபா⁴வம் க³ச்ச²ந்தி, ததா³ விஸும் ஸம்பயுத்தத⁴ம்ம பா⁴வஞ்ச க³ச்ச²ந்தி. ஸாரம்மணாதி³பா⁴வோச தேஸம் பரிப்³யத்தோ ஹோதி. ஏதத³த்த²ம் ஸந்தா⁴ய கதா²வத்து²ம்ஹி தேஸம் ஸாரம்மணத⁴ம்மபா⁴வோ ஸங்கா²ரக்க²ந்த⁴பா⁴வோச பதிட்டா²பிதோ ஹோதீதி.

யதா² பன ப²லதா⁴ரிம்ஹி ருக்க²ம்ஹி விஸகண்டகே தி³ன்னே ருக்கா²னுஸயிதோ ப²லுப்பத்தியா பச்சயபூ⁴தோ ஸினேஹோ பரிக்க²யம் க³ச்ச²தி. ஸமயே உப்பஜ்ஜிஸ்ஸமானானி ப²லானி நுப்பஜ்ஜந்தி. ஏவம் ஸானுஸயே சித்த ஸந்தானே யஸ்மிம் க²ணே மக்³கோ³ பாதுப⁴வதி, தஸ்மிம் ஸஹமக்³கு³ப்பாதா³ ஸோ ஸோ அனுஸயோ பரிக்க²யம் க³ச்ச²தி. பரிக்கீ²ணஸ்ஸ பன புன பரியுட்டா²னம்னாம நத்தி², குதோ வீதிக்கமோதி இமமத்த²ம் ஸந்தா⁴ய மக்³கோ³ அனாக³தஸாமஞ்ஞம் கிலேஸஜாதம் பஜஹதீதி தத்த² தத்த² வுத்தோ. தத்த² அனாக³தஸாமஞ்ஞந்தி அனாக³தஸம்மதம், ந ஏகந்த அனாக³தம். தேனேவ ஹி அட்ட²கதா²யம் மக்³கோ³ யேகிலேஸே பஜஹதி, தே அதீதாகிவா அனாக³தாதிவா பச்சுப்பன்னாதிவா நவத்தப்³பா³தி வுத்தம். ஏதேனச மக்³கோ³ கிலேஸமுகே²ன யானி குஸலாகுஸலகம்மானிச உபாதி³ன்னகக²ந்த⁴பஞ்சகேச பஜஹதி, தே அதீதாதிவாஅனாக³தாதிவா பச்சுப்பன்னாதிவா நவத்தப்³பா³தி தீ³பேதி. யதி³ ஏவம் மக்³கே³ன பஹீனா ஸப்³பே³ தேபூ⁴மகத⁴ம்மா காலவிமுத்தானாம அதங்க²தா நாம அபச்சயானாம ஸியுந்தி.ந. தேகாலிகஜாதிகத்தா ஸங்க²த ஸபச்சயஜாதிகத்தா ச. தே ஹி மக்³கே³ அனுப்பன்னே இமே நாமத⁴ம்மா உப்பஜ்ஜிஸ்ஸந்தி நிருஜ்ஜி²ஸ்ஸந்தீதி ஏவம் ஸங்க²தலக்க²ணம் ஆஹச்ச ஞாணேன க³ஹிதத்தா லக்க²ணவஸேன தேபூ⁴மகாதி³பா⁴வம் ப⁴ஜந்தீதி. ஏவஞ்ச கத்வா விஸும் ஸம்பயுத்தத⁴ம்மபா⁴வம் அபத்தானம் அனுஸயாவத்தா²ய வா வாஸனாவத்தா²யவா கம்மஸமங்கீ³தாவத்தா²யவா ஆஸயஜ்ஜா²ஸயா தி⁴முத்திசரிதவத்தா²ஸுவா டி²தானம் ஸபா⁴வானம் ஜாதிவஸேன பரமத்த² த⁴ம்மதா அகுஸலாதி³தாச பச்சேதப்³பா³ ஹோதீதி.

[208] விபா⁴வனியம் பன

‘‘அப்பஹீனா ஹி கிலேஸா காரணலாபே⁴ ஸதி உப்பஜ்ஜனா ரஹா ஸந்தானே அனுஅனுஸயிதா விய ஹோந்தீதி தத³வத்தா² அனுஸயாதி வுச்சந்தி. தே பன நிப்பரியாயதோ அனாக³த கிலேஸா. அதீதபச்சுப்பன்னாபி தம்ஸபா⁴வத்தா ததா² வுச்சந்தீ’’தி வுத்தம். தத்த² அனுஸயானாம ஸந்தானே கதா³சிபி அனுப்பன்ன புப்³பா³ அனாக³த கிலேஸா ஏவாதி கத்வா ஸந்தானே அனு அனுஸயிதா விய ஹோந்தீதி வுத்தம். தம் ந யுஜ்ஜதி.

ந ஹி தே அனுஅனுஸயிதா விய ஹோந்தி. ஏகந்தேன அனுஸயிதாஏவ ஹோந்தீதி.

[209] யஞ்ச தத்த²

‘‘தே பன நிப்பரியாயதோ அனாக³தகிலேஸா’’தி வுத்தம். தம்பி ந யுத்தம்.

ந ஹி மக்³கே³ன அப்பஹீனா அனுஸயா அனாக³தானாம ஹோந்தி. பஹீனாபிச நிப்பரியாயதோ அனாக³தாதி நஸக்கா வத்தும். அனாக³த ஸாமஞ்ஞஸ்ஸ அதி⁴ப்பேதத்தாதி. ஏதேன அதீதபச்சுப்பன்னாபி தம்ஸபா⁴வத்தாததா² வுச்சந்தீதி இத³ம்விபடிக்கி²த்தம் ஹோதி. அபிச, உப்பாத³ட்டி²திப⁴ங்க³ பத்தானம்ஏவ ஏகந்தேன தேகாலிகதா ஹோதீதி தத³பத்தானம் அனுஸயானம் பச்சுப்பன்னதா பரியாயோவ வத்தும் யுத்தோ. ஏவஞ்ச கத்வா பாளியம் யஸ்ஸ காமராக³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீதிஆதி³னா பச்சுப்பன்னகாலிகோ உப்பாத³வாரோ ஏவ வுத்தோ, ந நிரோத⁴வாரோ, நச அதீதானாக³த வாராதி. யம் பன படிஸம்பி⁴தா³மக்³கே³ ஹஞ்சி பச்சுப்பன்னே கிலேஸே பஜஹதி. தேன ஹி ரத்தோ ராக³ம் பஜஹதி, து³ட்டோ² தோ³ஸம், முள்ஹோ மோஹந்தி வுத்தம். தம் பரியுட்டா²னபத்தானம் ஏகந்தபச்சுப்பன்னக்க²ணம் ஸந்தா⁴ய வுத்தந்தி த³ட்ட²ப்³ப³ம். தேனேவ ஹி அட்ட²கதா²யம் வத்தமானுப்பன்னம் பு⁴த்வா விக³துப்பன்னம் ஓகாஸகதுப்பன்னம் ஸமுதா³சாருப்பன்னந்தி சதுப்³பி³த⁴ம் உப்பன்னம் ந மக்³க³வஜ்ஜ²ம். பூ⁴மிலத்³து⁴ப்பன்னம் ஆரம்மணா தி⁴க்³க³ஹி துப்பன்னம் அவிக்க²ம்பி⁴துப்பன்னம் அஸமுக்³கா⁴டிதுப்பன்னந்தி சதுப்³பி³த⁴ம் மக்³க³வஜ்ஜ²ந்தி வுத்தம். தத்த² வத்தமானுப்பன்னம் ஸமுதா³ சாருப்பன்னந்தி இத³ம் த்³வயம் க²ணபச்சுப்பன்னமேவ. பு⁴த்வாவிக³துப்பன்னம் அதீதமேவ. ஓகாஸ கதுப்பன்னம் அனாக³தமேவ. தது³ப⁴யம் பன பச்சுப்பன்னஸமீபத்தா உப்பன்னந்தி வுத்தம். ஸமீபபச்சுப்பன்னந்தி வுத்தம் ஹோதி.

பூ⁴மிலத்³து⁴ப்பன்னம்னாம அத்தனோ க²ந்தே⁴ஸு அனுஸயிதானம் மக்³கே³ன அப்பஹீனானம் அனுஸயானம்ஏவ நாமம். ஆரம்மணாதி⁴க்³க³ஹிதுப்பன்னம் நாம ஸுப⁴னிமித்தாதி³கே ஆரம்மணே ஸகிம் ஜவித்வா யாவ தம்மூலகோ பரியுட்டா²னவேகோ³ ந வூபஸம்மதி, தாவ அதி⁴மத்ததா²மக³த பா⁴வேன டி²தானம் தேஸஞ்ஞேவ நாமம். அனுஸயா ஹி நாம அனமதக்³கே³ ஸம்ஸாரே புனப்புனம் பரியுட்டா²னபத்தானம் கிலேஸானம் வஸேன உபருபரி தி²ர தர த³ள்ஹதர பத்தியா பகதியாபி தா²மக³தாஏவனாம ஹோந்தி. ந யேனவா தேனவா வாயாமேன பஜஹிதும் ஸக்குணேய்யா. ஏவம் ஸந்தேபி யதா³ யோ யோ அனுஸயோ பச்சயலாபே⁴ன பரியுட்டா²ன ப³ஹுலோ ஹோதி, ததா³ ஸோ ஸோ விஸேஸேன அதி⁴மத்ததா²ம க³தபா⁴வம் பத்வா டி²தோ ஹோதி. யதா³ யோ யோ படிபக்க²த⁴ம்ம ஸமாதா³னேன நிக்³க³ஹபத்தோ ஹோதி, ததா³ ஸோ ஸோ மந்த³தா²ம க³தபா⁴வம் பத்வா டி²தோ ஹோதீதி. அவிக்க²ம்பி⁴துப்பன்னம்னாம ஸமத² விபஸ்ஸனாஹி ஸுட்டு²அனிக்³க³ஹிதானம் தேஸஞ்ஞேவ நாமம். அஸமுக்³கா⁴டி துப்பன்னம்னாம மக்³கே³ன அப்பஹீனானம் பூ⁴மிலத்³தா⁴னம் தேஸம்ஏவ நாமந்தி. யஸ்மா பன லோகுத்தரத⁴ம்மானாம கிலேஸானம் அச்சந்தபடிபக்கா² ஹோந்தீதி ஹேட்டி²மா மக்³க³ட்ட²ப²லட்டா² ஸேக்கா² அத்தனோ மக்³க³ப²லக்க²ணேஸு உபரி மக்³கா³ஜ்ஜே²ஹிபி அனுஸயேஹி ஸானுஸயாதிவா நிரானுஸயாதிவா தா²மவதாதிவா அதா²மக³தாதிவா நவத்தப்³பா³. தஸ்மா அனுஸயானம் தாதி³ஸே பச்சுப்பன்ன பா⁴வே ஸதிபி ஹஞ்சி பச்சுப்பன்னே கிலேஸே பஜஹதி. தேனஹி தா²மக³தோ அனுஸயம் பஜஹதீதி வுத்த தோ³ஸோ நத்தீ²தி வேதி³தப்³போ³தி. காமராகோ³ஏவ அனுஸயோ காமராகா³னுஸயோ.

ஸம்யோஜேந்தி ப³ந்த⁴ந்தீதி ஸம்யோஜனானி, தானி பன ஸக்காயதி³ட்டி² விசிகிச்சா² ஸீலப்³ப³தபராமாஸோ காமச்ச²ந்தோ³ ப்³யாபாதோ³தி பஞ்ச ஓரம்பா⁴கி³யானி. ரூபராகோ³ அரூபராகோ³ மானோ உத்³த⁴ச்சம் அவிஜ்ஜாதி பஞ்ச உத்³த⁴ம்பா⁴கி³யானீதி ஸுத்தந்தே அபி⁴த⁴ம்மேச த³ஸஸம்யோஜனானி ஆக³தானி. இதரானி பன அபி⁴த⁴ம்மேஏவ ஆக³தானீதி ததோ விஸேஸகரணத்த²ம் ஸுத்தந்தேதி வுத்தம். கமோ பன த்³வின்னம்பி பாளியா நஸமேதி. ஸபா⁴க³ த⁴ம்மஸங்க³ஹவஸேன பன இத⁴ அஞ்ஞதா² கமோ வுத்தோ ஸியாதி. சித்தம் கிலிஸ்ஸந்தி விபா³தே⁴ந்தி உபதாபேந்திசாதி கிலேஸா. கிலிஸ்ஸந்திவா மலீனபா⁴வம் நிஹீனபா⁴வஞ்ச க³ச்ச²ந்தி ஸத்தா ஏதேஹீதி கிலேஸா. காமப⁴வனாமேனாதி வத்து²காமதீ³பகேன காமனாமேன ரூபாரூபப⁴வதீ³பகேன ச ப⁴வனாமேன. தாதி³ஸம் காம ப⁴வஸங்கா²தம் ஆரம்மணபூ⁴தம் வத்து² ஏதிஸ்ஸாதி தப்³ப³த்து²கா. ததா² பவத்தந்தி ஸீலப்³ப³தானி பரதோ ஆமஸனாகாரேன இத³ம் மே ஸச்சம் மோக⁴மஞ்ஞந்தி அபி⁴னிவிஸனாகாரேன க²ந்தே⁴ஸு அத்தாபி⁴னிவேஸாகாரேனச பவத்தம். வத்து²தோதி ஸபா⁴வத⁴ம்மதோ. அயம் பாபஸங்க³ஹோ அகுஸலங்க³ஹோ நவதா⁴ வுத்தோதி யோஜனா. [அகுஸலஸங்க³ஹோ]

163. மிஸ்ஸக ஸங்க³ஹே பாணாதிபாதாதீ³னி பாபகம்மானி கரோந்தானம்பி சித்தஸ்ஸ ஆரம்மணே உஜுகரணம்னாம ஜா²னேன வினா ந ஸிஜ்ஜ²தீதி வுத்தம் ஸத்தஜா²னங்கா³னீதி. கல்யாணேவா பாபகேவா ஆரம்மணே உஜுகம் சித்தபடிபாத³னஸங்கா²தஸ்ஸ உபனிஜ்ஜா²யன கிச்சஸ்ஸ அங்கா³னீதி அத்தோ². தத்த² தோ³மனஸ்ஸம் அகுஸலஜ்ஜா²னங்க³ம். ஸேஸானி குஸலாகுஸலாப்³யாகதானீதி. கல்யாணகம்ம பாபகம்மஸங்கா²தாஸு ஸுக³தி து³க்³க³தி விவட்டஸங்கா²தாஸுச நானாதி³ஸாஸு தம்தம்தி³ஸாதி முக²ப்பவத்திஸங்கா²தா சித்தஸ்ஸ க³தினாம ஸம்மாவா மிச்சா²வா பவத்தேஹி த³ஸ்ஸனாதீ³ஹி ஏவ ஸிஜ்ஜ²தீதி வுத்தம் த்³வாத³ஸமக்³க³ங்கா³னீதி. சித்தஸ்ஸ உஜுக³தியாவா வங்கக³தியாவா க³மனஸ்ஸ பத²ங்கா³னி உபாயங்கா³னீதி அத்தோ². தத்த² மிச்சா²தி³ட்டி² மிச்சா²ஸங்கப்ப மிச்சா²வாயாம மிச்சா²ஸமாத⁴யோ பாபகம்ம து³க்³க³திப⁴வ ஸங்கா²தாஸு அஹிததி³ஸாஸு சித்தஸ்ஸ வங்கக³தியா க³மனஸ்ஸ உபாயங்கா³னி, இதரானி கல்யாணகம்ம ஸுக³திப⁴வ விவட்டத⁴ம்மஸங்கா²தாஸு ஹிததி³ஸாஸு உஜுக³தியாதி த³ட்ட²ப்³ப³ம். தத்த² பாணாதிபாதகம்மே விதக்க விசார தோ³மனஸ்ஸேகக்³க³தா ஸங்கா²தம் சதுரங்கி³கஜ்ஜா²னம் மிச்சா²ஸங்கப்ப மிச்சா²வாயாம மிச்சா²ஸமாதி⁴ ஸங்கா²தோ தியங்கீ³கமக்³கோ³ச வேதி³தப்³போ³. ஏவம் ஸேஸேஸு ஸுசரிதது³ச்சரிதகம்மேஸு ஜா²னமக்³கா³ உத்³த⁴ரிதப்³பா³. விப⁴ங்கே³ பன ஸுத்தந்தேஸுச மிச்சா²வாசா மிச்சா²கம்மந்தோ மிச்சா²ஆஜீவோ மிச்சா²ஸதீதி இமேபி சத்தாரோ ஆக³தா. இமே பன விஸும் சேதஸிகத⁴ம்மா நஹோந்தி. ததா² ததா² பவத்தானம் சதுன்னம் க²ந்தா⁴னம் அதி⁴வசனந்தி கத்வா இத⁴ நக³ஹிதா.

[210] யம் பன விபா⁴வனியம்

‘‘ஸுக³தி து³க்³க³தீனம் நிப்³பா³னஸ்ஸ ச அபி⁴முக²ம் பாபனதோ மக்³கா³; தேஸம் பத²பூ⁴தானி அங்கா³னி மங்கா³னீ’’தி வுத்தம்; தம் ந ஸுந்த³ரம்;

ந ஹி அங்கா³னி மக்³கா³னம் பத²பூ⁴தானினாம ஹோந்தி; மக்³க³ஸத்³தோ³யேவ பத²பரியாயோ அட்ட²கதா²ஸு வுத்தோ ந அங்க³ஸத்³தோ³தி;

[211] யஞ்ச தத்த²

‘‘மக்³க³ஸ்ஸவா அட்ட²ங்கி³கஸ்ஸ அங்கா³னி மக்³க³ங்கா³னீ’’தி வுத்தம். தம்பி அனுபபன்னம்.

இத⁴ ஹி கத்த²சி சித்தே தியங்கி³கோ கத்த²சி சதுரங்கி³கோதிஆதி³னா நானாமக்³கோ³வ அதி⁴ப்பேதோதி. ஆதி⁴பச்சட்டே²ன இந்த்³ரியானி. கிஞ்ச ஆதி⁴பச்சம். அத்தாதீ⁴னவுத்திகே த⁴ம்மே அத்தனோ க³தியம் ஸப்³ப³ஸோ வத்தேதும் ஸமத்த²பா⁴வோ. இதி தேஸு தேஸு கிச்சேஸு அத்தனோ ஆதி⁴பச்சஸங்கா²தம் இந்த³ட்ட²ம் கரோந்தி ஸாதே⁴ந்தீதி இந்த்³ரியானி. இந்த³ட்ட²ம் காரேந்தீதிபி இந்த்³ரியானி. இஸ்ஸரா அதி⁴பதினோதி வுத்தம் ஹோதி. தத்த² பஞ்சசக்கா²தீ³னி த³ஸ்ஸனாதி³கிச்சேஸு சக்கு²விஞ்ஞாணாதீ³னம் இஸ்ஸராஹோந்தி. ப³லவது³ப்³ப³லமந்த³ திக்கா²தீ³ஸு அத்தாகாரானுவத்தாபனதோ. பா⁴வத்³வயம் இத்தா²காராதி³வஸேன பவத்தியம் சதுஸமுட்டா²னிக ரூபானம் ஸகலக²ந்த⁴பஞ்சகஸ்ஸேவ வா இஸ்ஸரோ ஹோதி. அஞ்ஞதா² அப்பவத்திதோ. ததா² ஹி யஸ்மிம் ஸந்தானே படிஸந்தி⁴யம் இத்தி²பா⁴வோ பவத்ததி. தஸ்மிம் ஸப்³பே³ கம்மாதி³பச்சயா சதுஸமுட்டா²னரூபஸந்ததிம் ஸமுட்டா²பேந்தா இத்தா²காரஸஹிதமேவ ஸமுட்டா²பேந்தி, நோ அஞ்ஞதா². ச²ந்த³சித்தாதி⁴ப்பாயாபி தஸ்மிம் மந்தா³காரஸஹிதாவ பவத்தந்தி. தப்³பி³பரீதேன புரிஸஸந்தானம் வேதி³தப்³ப³ம். ஜீவிதத்³வயம் ரூபா ரூபஸந்ததீனம் ரத்தி தி³வ மாஸ ஸம்வச்ச²ரானுக்கமேன அத்³தா⁴னப²ரணே ஸஹஜாதத⁴ம்மானம் இஸ்ஸரோ ஹோதி. தேஸம் ததா³யத்தவுத்தி கத்தா. மனோ விஜானனகிச்சே. வேத³னாபஞ்சகம் ததா² ததா² ஆரம்மணரஸானுப⁴வனே. ஸத்³தா⁴ ஆரம்மணாவீமுச்சனே. வீரியம் கம்மனி அலீன வுத்திபா⁴வே. ஸதி ஆரம்மணுபட்டா²னே. ஸமாதி⁴ ஆரம்மணே நிச்சலட்டி² தியம். பஞ்ஞா அஸம்மோஹகிச்சே ஸம்பயுத்தத⁴ம்மானம் இஸ்ஸரோ ஹோதி. அனஞ்ஞாபி⁴ப⁴வனீயபா⁴வேன பவத்தனதோ. யதா² ஹி ஸிலாயம் பத²வீ ஸஹஜாதேஹி அனபி⁴ப⁴வனீயா ஹோதி. அத்தனாவதே அபி⁴ப⁴வித்வா விஸும் அவிஜ்ஜமானேவிய கத்வா பவத்ததி. யதா² ச உத³கே ஆபோ அக்³கி³ம்ஹி தேஜோ வாதே வாயோ. ஏவம் ஸம்பத³மித³ம் த³ட்ட²ப்³ப³ம்.

அஞ்ஞாயித்த² படிவிஜ்ஜி²த்தா²தி அஞ்ஞாதம். ந அஞ்ஞாதம் அனஞ்ஞாதம். சதுஸச்சத⁴ம்மோ. அமதம்வா பத³ம். அனஞ்ஞாதம் ஞஸ்ஸாமி ஜானிஸ்ஸாமீதி அனஞ்ஞாதஞ்ஞஸ்ஸாமி. ஆக்²யாதிகம்பி ஹி பத³ம் ஸஞ்ஞாஸத்³த³பா⁴வே டி²தம் நாமிகட்டா²னே திட்ட²தி. யதா² மக்க²லிகோ³ஸாலோ ஏஹிபஸ்ஸி கோதி. ஏவஞ்ஹி ஸதி தஸ்ஸ பத³ந்தரேன ஸஹ ஸமாஸபா⁴வோ நவிருஜ்ஜ²தீதி. அனஞ்ஞாதஞ்ஞஸ்ஸாமீதி ஏவம் படிபன்னஸ்ஸ இந்த்³ரியம் அனஞ்ஞா தஞ்ஞஸ்ஸாமீதிந்த்³ரியம். ஆதி³மனஸிகாரதோ பட்டா²ய தாதி³ஸேன உஸ்ஸாஹேன ஸஹ விபஸ்ஸனம் ஆரப⁴ந்தஸ்ஸ தஸ்மிம் உஸ்ஸாஹே அபடிபஸ்ஸத்³தே⁴யேவ ஸோதாமத்திமக்³க³ம் படிலப⁴ந்தஸ்ஸ இந்த்³ரியந்தி வுத்தம் ஹோதி. ஆஜானாதீதி அஞ்ஞம். தமேவ இந்த்³ரியந்தி அஞ்ஞிந்த்³ரியம், பத²மமக்³கே³ன அனஞ்ஞாதம் ஞத்வாபி கிலேஸப்பஹானகிச்சஸ்ஸ அபரினிட்டி²தத்தா தஸ்ஸ ஜானனகிச்சஸ்ஸ விப்பகதபா⁴வேன யதா² தி³ட்டே² தஸ்மிம் சதுஸச்சத⁴ம்மே அமதபதே³ஏவ வா புனப்புனம் ஜானனகிச்ச யுத்தானம் இந்த்³ரியந்தி வுத்தம் ஹோதி. அஞ்ஞாதாவிந்த்³ரியந்தி அஞ்ஞா தாவினோ பரினிட்டி²த ஆஜானன கிச்சஸ்ஸ கீ²ணாஸவஸ்ஸ இந்த்³ரியந்தி அஞ்ஞாதாவிந்த்³ரியம். திவித⁴ம் பேதம் ததா²ரூபே ஜானனே ஸம்பயுத்த த⁴ம்மானம் இஸ்ஸரோ ஹோதீதி வேதி³தப்³ப³ம்.

தத்த² இமேஸம் ஸத்தானம் பாகடே ரூபகாயே அத்தகா³ஹத³ள்ஹத்தம் தப்³பி³முத்திச இமேஸம் அபரிஞ்ஞாய பரிஞ்ஞாயச ஹோதீதி தீ³பேதும் ஆதி³தோ பஞ்ச பஸாதி³ந்த்³ரியானி வுத்தானி. தஸ்ஸ அத்தஸ்ஸ இத்தி²பும தாபே⁴தோ³ இமேஸம் வஸேன ஹோதி. தஸ்மிம் வா இத்தி²புரிஸ கா³ஹோ தப்³பி³முத்திச இமேஸம் அபரிஞ்ஞாய பரிஞ்ஞாயச ஹோதீதி தீ³பேதும் கத³னந்தரம் பா⁴விந்த்³ரியத்³வயம் வுத்தம். ஸோச அத்தா இமஸ்ஸ வஸேன ஜீவஸஞ்ஞம் லப⁴தி. தஸ்மிம்வா ஜீவகா³ஹோ தப்³பி³முத்திச இமஸ்ஸ அபரிஞ்ஞாய பரிஞ்ஞாயச ஹோதீதி தீ³பேதும் தத³னந்தரம் ஜீவிதிந்த்³ரியம் வுத்தம். இத³ம் பன பா⁴விந்த்³ரியதோ புரே வத்தப்³ப³ம்பி ரூபாரூப மிஸ்ஸகத்தா இத⁴ வுத்தந்தி த³ட்ட²ப்³ப³ம். நாமகாயே அத்தகா³ஹத³ள்ஹத்தம் தப்³பி³முத்திச இமஸ்ஸ அபரிஞ்ஞாய பரிஞ்ஞாயச ஹோதீதி தீ³பேதும் நாமிந்த்³ரியேஸு மனிந்த்³ரியம் ஆதி³தோ வுத்தம். ஸோச அரூபீ அத்தா இமேஸம் வஸேன ஸம்கிலிட்டோ² விப்ப²ந்தி³தோச ஹோதி. தஸ்மிம்வா ஸுகி²தது³க்கி²தகா³ஹோ தப்³பி³முத்திச இமேஸம் அபரிஞ்ஞாய பரிஞ்ஞாயச ஹோதீதி தீ³பேதும் தத³னந்தரம் பேத³னிந்த்³ரியபஞ்சகம் வுத்தம். தஸ்ஸ ஸம்கிலிட்ட²ஸ்ஸ வோதா³னப்பத்தியா தம்தம்கா³ஹவிமுத்தியாவா படிபத்தித³ஸ்ஸனத்த²ம் தத³னந்தரம் ஸத்³தா⁴தி³பஞ்சிந்த்³ரியம் வுத்தம். தாய படிபத்தியா வோதா³னப்பத்தி யா ஆதி³ மஜ்ஜ² பரியோஸான த³ஸ்ஸனத்த²ம் அந்தே தீணி லோகுத்தரிந்த்³ரியானி வுத்தானீதி.

[212] விபா⁴வனியம் பன

‘‘ஏத்தாவதா அதி⁴ப்பேதத்த²ஸித்³தீ⁴தி அஞ்ஞேஸம் அக³ஹணந்தி’’ வுத்தம். தம் ந யுஜ்ஜதி.

நஹி ஸந்தேஸுபி அஞ்ஞேஸு இந்த்³ரியபா⁴வாரஹேஸு த⁴ம்மேஸு ஏத்தாவதா அதி⁴ப்பேதத்த²ஸித்³தி⁴யா தேஸம் அஞ்ஞேஸம் ப⁴க³வதோ தே²ரஸ்ஸச அக³ஹணந்தி யுத்தம் வத்தும். இந்த்³ரியபா⁴வாரஹஸ்ஸ அஞ்ஞஸ்ஸ அஸம்ப⁴வதோ. யதி³ ஹி ஸம்ப⁴வேய்ய, ஸதம்பி ஸஹஸ்ஸம்பி க³ண்ஹிஸ்ஸதியேவாதி. ப³லியந்தி உப்பன்னுப்பன்னே படிபக்க²த⁴ம்மே ஸஹந்தி மத்³த³ந்தீதி ப³லானி. யதா² அப³லானம் ப³லியந்தி. மத்³த³ந்தேனம் பரிஸ்ஸயாதி. ஏத்த²ச அப³லாதி து³ப்³ப³லா. நந்தி ஹீனவீரியம் ஜனம். ப³லியந்தீதி ப³லஸா கரோந்தி அஜ்ஜோ²த்த²ரந்தி. பரிஸ்ஸயாதி அப³லா ராகா³தி³ பரிஸ்ஸயாதி அத்தோ². அபிச, படிபக்க²த⁴ம்மேஹி அகம்பியட்டே²ன அக்கோ² ப⁴ணியட்டே²ன ப³லானினாம. தஸ்மா அஸ்ஸத்³தி⁴யஸங்கா²தேன படிபக்க²த⁴ம்மேன கம்பேதும் அஸக்குணேய்யதா ஸத்³தா⁴ப³லம்நாம. கோஸஜ்ஜஸங்கா²தேன கம்பேதும் அஸக்குணேய்யதா வீரியப³லம்நாம. முட்ட²ஸச்சேன கம்பேதும் அஸக்குணேய்யதாஸதிப³லம்நாம. உத்³த⁴ச்சேன கம்பேதும் அஸக்குணேய்யதாஸமாதி⁴ப³லம்நாம. அவிஜ்ஜாயகம்பேதும் அஸக்குணேய்யதா பஞ்ஞாப³லம் நாம. ஸேஸது³கத்³வயம் பன அஞ்ஞமஞ்ஞம் படிபக்கே²னயோஜேதப்³ப³ம்.

[213] விபா⁴வனியம் பன

பாபப³லது³கம் படிபக்கே²ன யோஜேதும் நலப்³ப⁴தீதி கத்வா ‘‘அஹிரிகானோத்தப்பத்³வயம் பன ஸம்பயுத்தத⁴ம்மேஸு தி²ரபா⁴வே நேவாதி’’ வுத்தம். தம் ந ஸுந்த³ரம்.

ஸம்பயுத்தத⁴ம்மேஸு தி²ரபா⁴வோதிச படிபக்கே²ஹி அகம்பியதா திச அத்த²தோ நானத்தாபா⁴வதோதி. வீரியஸமாதி⁴ப³லானி குஸலாகுஸலாப்³யாகதானி. அஹிரிகானோத்தப்பானி அகுஸலப³லானி. ஸேஸானி குஸலாப்³யாகதானீதி. அதி⁴பதீதி ஏத்த² பதீதி ஸாமி இஸ்ஸரோ. ஸோ பன பதே³ஸ இஸ்ஸரோ ஸகலிஸ்ஸரோதி து³விதோ⁴. தத்த² இந்த்³ரியானி பரேஸம் விஸயே ஸயம் பரவஸே வத்தித்வா அத்தனோ விஸயேஏவ பரேஹி அத்தனோ வஸே வத்தாபேந்தீதி பதே³ஸிஸ்ஸரா நாம. புப்³பா³தி ஸங்கா²ரவஸேன புப்³பா³க³மனவஸேன வா விஸேஸேத்வா பவத்தம் அதி⁴பதிட்டா²னம் பத்வா பன அஞ்ஞோ து³தியோ இஸ்ஸரோனாம நத்தி². தஸ்மா அதி⁴கோ பதீதி அதி⁴பதி. அத்தா தீ⁴னவுத்தீனம் பதீதி அதி⁴பதீதிச வத³ந்தி.

ச²ந்தோ³ஏவ அதி⁴பதீதி ச²ந்தா³தி⁴பதி. ச²ந்த³வதோ கிம்னாம கம்மம் நஸிஜ்ஜ²தீதி ஏவம் புப்³பா³பி⁴ஸங்கா²ரவஸேனவா புப்³பே³ அதீதப⁴வேஸு ஸுட்டு² ஆஸேவிதச²ந்தா³க³மனவஸேனவா தேஸு தேஸு கல்யாண பாபகம்மேஸு ஸம்பயுத்தத⁴ம்மே மஹோகோ⁴விய திணபண்ணகஸடே அத்தபராதீ⁴னே நிச்சம் பக்³க³ஹிதது⁴ரே கத்வா பவத்தோ கத்துகம்யதா ச²ந்தோ³. ஏஸ நயோ ஸேஸேஸுபி. நனு சேத்த² பச்சி²மா தயோ த⁴ம்மா அதி⁴பதிபா⁴வம் க³ண்ஹந்தா இந்த்³ரியபா⁴வம் அவிஜஹித்வாவ க³ண்ஹந்தீதி அதி⁴பதிபூ⁴தாவ ஸமானா இந்த்³ரியகிச்சவஸேன பரவஸேபி வத்தந்தீதி. ஸச்சம், அஞ்ஞம் பன அதி⁴பதிகிச்சம், அஞ்ஞம் இந்த்³ரியகிச்சந்தி நத்தே²த்த² தோ³ஸோதி. யதா² ஹி ராஜா சக்கவத்தீ ஏகஸ்ஸ அத்தனோ புரோஹிதஸ்ஸ ஸந்திகே ஏகம் தி³ப்³ப³விஜ்ஜம் க³ண்ஹாதி. ந ஏத்தாவதா ராஜா சக்கவத்தினாம நஹோதி. நச விஜ்ஜாஹேது அஞ்ஞஸ்ஸ வஸேன வத்ததி. அஞ்ஞஞ்ஹி சக்கவத்தி ரஜ்ஜகிச்சம், அஞ்ஞம் விஜ்ஜாக³ஹண கிச்சந்தி. ஏவம் ஸம்பத³மித³ம் த³ட்ட²ப்³ப³ம். தத்த² அதி⁴பதிகிச்சம்னாம தம்தம்கிச்ச விஸேஸம் அனபேக்கி²த்வா அதுல்யப³லேன அபி⁴ப⁴வித்வா ஸஹஜாத த⁴ம்மே அத்தனோ அத்தனோ கிச்சேஸு அனிவத்தமானே கத்வா து⁴ர வாஹிதா. இந்த்³ரியகிச்சம் பன விஜானனாதி³கிச்சம் ஆரப்³ப⁴ பவுச்சதீதி.

ஆஹரந்தி ஸஹஜாதாதி³பச்சயஸாமஞ்ஞதோ அதிரேகேன அஸாதா⁴ரணபச்சயஸத்திவிஸேஸேன ஹரந்தி பவத்தேந்தீதி ஆஹாரா. ஆஹரந்திவா அஜ்ஜ²த்தஸம்பூ⁴தா தே தே பச்சயத⁴ம்மா பச்சயுப்பன்னத⁴ம்மாச அத்தானஞ்சேவ அத்தனோ அத்தனோ பச்சயகிச்சம் பச்சயுப்பன்னகிச்சஞ்ச ஸுட்டு² ஹரந்தி வஹந்தி ஏதேஹீதி ஆஹாரா. யதா²ஹஸப்³பே³ ஸத்தா ஆஹாரட்டி²திகாதி. ஏத்த²ச ஸப்³பே³ ஸத்தாதி ஏதேன ஸப்³பே³ அஜ்ஜ²த்தஸம்பூ⁴தா பச்சயபச்சயுப்பன்னத⁴ம்மா வுத்தா. ஆஹாரட்டி²திகாதி பச்சயட்டி²திகா. யதா²ரஹம் சதுவீஸதிபச்சயேஹி டி²திஸபா⁴வாதி அத்தோ². நனுசேத்த² பச்சயாஹாரோவ வுத்தோ. ந ஆஹாரபச்சயோ. இத⁴ பன சதுப்³பி³தோ⁴ ஆஹாரபச்சயத⁴ம்மோவ வுத்தோதி. ஸச்சம், பச்சயட்டே²ன பன ஆஹாரனாமகானம் ஸப்³பே³ஸம் சதுவீஸதிபச்சயத⁴ம்மானம் மஜ்ஜே² யேத⁴ம்மா சத்தாரோ ஆஹாராதி விஸேஸேத்வா வுத்தா. தே தேஸம் பச்சயாஹாரானம்பி ஆஹாரபூ⁴தாதி ஸித்³தா⁴ ஹோந்தீதி. இமஸ்மிம் அத்தே² சதுன்னம் ஆஹாரானம் மஹந்த பா⁴வோ பாகடோ ஹோதீதி.

தத்த² யதா² யவபீ³ஜானம்வா ஸாலிபீ³ஜானம்வா ஆனுபா⁴வோ நாம களிரங்குரானம் உப்பாதா³ன பதா⁴னம் ஹோதி. ததோபரம் பன ஸஸ்ஸபா⁴வம் பத்வா ச² பஞ்ச மாஸே வட்³டி⁴யாவா டி²தியாவா பத²வி ரஸஆபோரஸானம் ஆனுபா⁴வோ பதா⁴னம் ஹோதி. ஏவமேவம் கப³ளீ காராஹாரூபஜீவீனம் காமஸத்தானம் கம்மஸ்ஸ ஆனுபா⁴வோனாம படிஸந்தி⁴ரூபுப்பாத³னே பதா⁴னம் ஹோதி. ததோபரம் பன யாவதாயுகம் வட்³டீ⁴யாவாடி²தியாவா உதுஆஹாரானம் ஆனுபா⁴வோ பதா⁴னம் ஹோதி. கம்மஜரூபானி ஹி யாவ ஆஸன்னமரணா பவத்தமானானிபி உதுஆஹாரேஹி அனுக்³க³ஹிதானிஏவ பவத்தந்தி. உதுச ஆஹாரு பத்த²ம்பி⁴தோயேவ அத்தனோ கிச்சம் கரோதி. தஸ்மா தேஸம் ஸத்தானம் சதுஸந்ததிரூபம் கப³ளீகாராஹாரேன அனுபத்த²ம்பீ⁴யமானம் சிரம் நபவத்ததி. உபத்த²ம்பீ⁴யமானம்ஏவ யாவதாயுகம் பவத்ததி. யதா²ச ஸகுணாவா ட³ம்ஸமகஸா த³யோவா துண்டே³ன ஆஹாரம் க³ஹேத்வா அத்தபா⁴வம் போஸேந்தி. துண்டே³ அஸந்தே ஆஹாரம் அலப⁴ந்தா மரந்தி. ஏவமேவ இமே ஸத்தா ப²ஸ்ஸேன ஆரம்மணேஸு ரஸம் க³ஹேத்வா வேத³னாஸங்கா²தம் உபபோ⁴க³பரிபோ⁴க³ம் ஸம்பாதே³த்வா தண்ஹாவேபுல்லம் பத்வா திவித⁴ம் வட்டம் பூரேத்வா யாவஜ்ஜதனாபி வட்டே அனுகண்ட²மானா பவத்தந்தி.

யதி³ ஹி ப²ஸ்ஸோனாம ந ஸியா, ஆரம்மணரஸம் அலபி⁴த்வா வேத³னா பரிபோ⁴க³ரஹிதேன தண்ஹுப்பத்தியா ஓகாஸோ நத்தீ²தி திவித⁴வட்டமேவ நஸியாதி. யதா²ச தே ஸகுணாத³யோ பக்கே² வியூஹித்வா அந்தரா அபதமானா ருக்க²தோ ருக்க²ம் வனதோ வனம் விசரித்வா அத்தானம் யாபேந்தி. பக்கே²ஸு அஸந்தேஸு க³மனம் அஸம்பாதே³ந்தா பதித்வா மரந்தி. ஏவமேவம் இமே ஸத்தா ஆயூஹனலக்க²ணாய சேதனாய சேதயித்வா கம்மஸமங்கி³தம் ஸம்பாதே³த்வா ப⁴வதோ ப⁴வம் விசரித்வா யாவஜ்ஜதனா வட்டே ஸம்ஸரந்தி. யதி³ ஹி சேதனானாம ந ஸியா, கம்மவட்டஸ்ஸ அபா⁴வோ. தத³பா⁴வேச விபாகவட்டஸ்ஸ அபா⁴வோ. தத³பா⁴வேச தத³னுஸயிதஸ்ஸ கிலேஸவட்டஸ்ஸ அபா⁴வோதி வட்டம்னாம ந ஸியாதி. யதா²ச தே ஸகுணாத³யோ சக்கு²னா கோ³சரட்டா²னம்வா தம்தம்தி³ஸாபா⁴க³ம்வா விபா⁴வேத்வா யாவஜீவம் அத்தானம் யாபேந்தி. சக்கு²ஸ்மிம் அஸந்தே கிஞ்சிக³ஹேதப்³ப³வத்து²ம்வா க³ந்தப்³ப³ட்டா²னம்வா அலபி⁴த்வா தத்தே²வ மரந்தி. ஏவமேவம் ஸம்பயுத்தா த⁴ம்மா ஆரம்மணவிஜானலக்க²ணேன விஞ்ஞாணேன தம்தம்ஆரம்மணம் லபி⁴த்வா தஸ்மிம் தஸ்மிம் ப²ஸ்ஸாத³யோ உப்பாதே³த்வா திவித⁴ம் வட்டம் வட்டேந்தி. யதி³ ஹி விஞ்ஞாணம்னாம ந ஸியா, ப²ஸ்ஸாதீ³னம் ஆரம்மணலாபோ⁴யேவ நத்தீ²தி வட்டமேவ ந ஸியாதி. தேனாஹ சத்தாரோ ஆஹாரா.ல. விஞ்ஞாணம் சதுத்த²ந்தி. ஸம்யுத்தகேச –

சத்தாரோமே பி⁴க்க²வே ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம்வா ஸத்தானம் அனுக்³க³ஹாய கப³ளீகாரோ ஆஹாரோ ஓளாரிகோவா ஸுகு²மோவா, ப²ஸ்ஸோ து³தீயோ, மனோஸஞ்சேதனா ததீயா, விஞ்ஞாணம் சதுத்த²ந்தி வுத்தம்.

தத்த² பூ⁴தானந்தி வுத்³தி⁴ப்பத்தானம். ஸம்ப⁴வேஸீனந்தி கலலாதி³ காலே டி²தானம். சதுன்னம்பன ஆஹாரானம் யதா²ஸம்ப⁴வம் அனமதக்³கே³ ஸம்ஸாரவட்டேவா தஸ்மிம் தஸ்மிம் ப⁴வேவா டி²தியாவா அனுக்³க³ஹாயவா பவத்தி ஆகாரோ வுத்தனயேன வேதி³தப்³போ³. அட்ட²கதா²யம் பன கோபனேத்த² ஆஹாரோ. கிம் ஆஹாரேதீதி. கப³ளீகாரா ஹாரோ ஓஜட்ட²மகரூபானி ஆஹாரேதி. ப²ஸ்ஸாஹாரோ திஸ்ஸோ வேத³னா. மனோஸஞ்சேதனாஹாரோ தயோ ப⁴வே. விஞ்ஞாணா ஹாரோ படிஸந்தி⁴னாமரூபந்தி வுத்தம். தம் பாகடப²லவஸேன வுத்தந்தி த³ட்ட²ப்³ப³ம். ஓஜட்ட²மகரூபுப்பாத³னம் பன கப³ளீகாராஹாரஸ்ஸ மஹந்தம் கிச்சம் நஹோதி. சதுஸந்ததிரூபுபத்த²ம்ப⁴னமேவ மஹந்தம். தேனேவ ஹி பாளியம் டி²தியாதிச அனுக்³க³ஹாயாதிச வுத்தம்.

அபிச யதா² உபனிஸ்ஸயாஸேவனபச்சயா ஸுத்தந்தி கபரியாயா அபி⁴த⁴ம்மபரியாயாதிச து³விதா⁴ ஹோந்தி. ததா² ஆஹாரபச்சயோபி து³விதோ⁴. தத்த² யம் வுத்தம் மனோஸஞ்சேதனாஹாரோ தயோப⁴வேதி. தம் ஸுத்தந்திகபரியாயம் ஸந்தா⁴ய வுத்தம். நஹி பட்டா²னே அரூபா ஹாரா அஸஹஜாதானம் த⁴ம்மானம் ஆஹாரட்டே²ன பச்சயானாம ஹோந்தீதி. பஞ்சவிஞ்ஞாணேஸு ஜா²னங்கா³னி நலப்³ப⁴ந்தி. தானி ஹி து³ப்³ப³லகிச்சட்டா²னவத்து²கத்தா ரூபாதீ³ஸு அபி⁴னிபாதமத்தானி ஹோந்தீதி ந தேஸு விஜ்ஜமானா வேத³னா ஏகக்³க³தா ஜா²னகிச்சம் ஸாதே⁴ந்தீதி. விதக்கபச்சி²மகம் ஜா²னந்திச வுத்தம். ஜா²னங்கா³னம் நாயகபூ⁴தோச விதக்கோ தேஸு நத்தீ²தி தத்த² தாவேத³னா ஏகக்³க³தாயோ தம் ந ஸாதே⁴ந்தீதி. வீரியுபத்த²ம்ப⁴ரஹிதா த⁴ம்மா ஸம்பயுத்தத⁴ம்மேஸு தி²ரபா⁴வப்பத்தா நஹோந்தீதி அவீரியேஸு ஸோளஸாஹேதுகசித்தேஸு ஸமாதி⁴ப³லகிச்சம் ந ஸாதே⁴தி. வீரியபச்சி²மகம் ப³லந்தி ஹி வுத்தந்தி ஆஹ அவீரியேஸு ப³லானி நலப்³ப⁴ந்தீதி. ஹேதுரஹிதா ச த⁴ம்மா வட்டஸ்ஸ விவட்டஸ்ஸச பத்தியா பத²பா⁴வம் நக³ச்ச²ந்தி. ஹேதுபச்சி²மகோ மக்³கோ³தி ஹி வுத்தந்தி ஆஹ அஹேதுகேஸு மக்³க³ங்கா³னி ந லப்³ப⁴ந்தீதி. விசிகிச்சா²ஸம்பயுத்தேசித்தே ஏகக்³க³தா அதி⁴மோக்க²ரஹி தத்தா ஏகந்தேன ஸம்ஸப்பனஸபா⁴வாய விசிகிச்சா²ய அபி⁴பூ⁴தத்தா ச மக்³கி³ந்த்³ரியப³லபா⁴வாய ப³லவதீ நஹோதீதி வுத்தம் விசிகிச்சா² சித்தே ஏகக்³க³தா மக்³கி³ந்த்³ரியப³லபா⁴வம் ந க³ச்ச²தீதி. த்³விஹேதுக திஹேதுக ஜவனேஸ்வேவாதி ஏத்த² த்³விஹேதுக திஹேதுகஸத்³தே³ன மோமூஹத்³வயஹஸனஜவனானி நிவத்தேதி. ஜவனஸத்³தே³ன திபூ⁴மகானி த்³விஹேதுகதிஹேதுகவிபாகானி நிவத்தேதி.

[214] விபா⁴வனியம் பன

‘‘த்³விஹேதுகதிஹேதுகக³ஹணேன ஏகஹேதுகேஸு அதி⁴பதீனம் அபா⁴வம் த³ஸ்ஸேதீ’’தி வுத்தம், ஜவனபா⁴வஸாமஞ்ஞத்தா பன ஹஸனசித்தேபி தேஸம் அபா⁴வோ த³ஸ்ஸேதப்³போ³யேவ ஹோதீதி.

யதா²ஸம்ப⁴வந்தி லத்³த⁴புப்³பா³தி ஸங்கா²ரஸ்ஸ லத்³த⁴புப்³பா³க³மஸ்ஸ ச ஏகேகஸ்ஸ அதி⁴பதினோ ஸம்ப⁴வானுரூபம் ஏகோவ லப்³ப⁴தி. ந து³தியோ. இதரதா² அதி⁴பதிஏவ நஸியாதி. ஏவஞ்ச கத்வா பட்டா²னே யதா² இந்த்³ரியபச்சயவிப⁴ங்கே³ அரூபினோஇந்த்³ரியா ஸம்பயுத்தகானம்த⁴ம்மானம் தம்ஸமுட்டா²னானஞ்ச ரூபானம் இந்த்³ரியபச்சயேன பச்சயோதி வுத்தம். ந ததா² அதி⁴பதிபச்சயவிப⁴ங்கே³. தத்த² பன ச²ந்தா³தி⁴பதி ச²ந்த³ஸம்பயுத்தகானந்திஆதி³னா ஏகேகாதி⁴பதி விபா⁴க³வஸேனேவ வுத்தந்தி. ஏவஞ்ஹி ஸதி அதி⁴பதி இந்த்³ரியானம் விஸேஸோ பாகடோ ஹோதீதி. நவேரிதாதி நவ ஈரிதா கதி²தா. குஸலா குஸலா ப்³யாகதேஹி ஸமாகிண்ணோ குஸலாதி³ ஸமாகிண்ணோ. [மிஸ்ஸகஸங்க³ஹோ]

164. சத்தாரி ஸச்சானி பு³ஜ்ஜ²தீதி போ³தி⁴. பு³ஜ்ஜ²ந்திவா தானி தம் ஸமங்கி³னோ ஏதாயாதி போ³தி⁴. சதுமக்³க³ஞாணம். வுத்தஞ்ஹேதம் மஹா நித்³தே³ஸே போ³தி⁴ வுச்சதி சதூஸு மக்³கே³ஸு-ஞாணந்தி. பக்கோ²தி கோட்டா²ஸோ ஸம்பா⁴ரோ. போ³தி⁴யா பக்கே² ப⁴வாதி போ³தி⁴பக்கி²யா. அதி⁴ஸீலா தி⁴சித்தா தி⁴பஞ்ஞா ஸங்கா²தாஸு தீஸு ஸிக்கா²ஸு பரியாபன்னானம் ஸத்து²ஸாஸனத⁴ம்மானம் ஏதம்னாமம். தே பன கோட்டா²ஸதோ ஸத்த விதா⁴ ஹோந்தீதி ஆஹ சத்தாரோஸதிபட்டா²னாதிஆதி³. ஸம்பயுத்த த⁴ம்மேஸு பமுகா² பதா⁴னா ஹுத்வா காயாதீ³ஸு ஆரம்மணேஸு திட்ட²ந்தி நானாரம்மணேஸு சித்தக³மனம் நிவத்தேத்வா தேஸ்வேவ காயாதீ³ஸு சித்த நிப³ந்த⁴னவஸேன பவத்தந்தீதி பட்டா²னானி. ஸதிஏவ பட்டா²னானீதி ஸதி பட்டா²னானி. சத்தாரிஸதிபட்டா²னானீதி வத்தப்³பே³ த⁴ம்மபா⁴வம் அபேக்கி²த்வா சத்தாரோஸதிபட்டா²னா திவுத்தந்தி த³ட்ட²ப்³ப³ம். காயேஅனுபஸ்ஸனா காயா நுபஸ்ஸனா. ரூபகாயே ரூபஸமூஹே அஸ்ஸாஸபஸ்ஸாஸாதி³கஸ்ஸ அவயவகாயஸ்ஸ தம்தம்காயபா⁴வேனவா அனிச்சாதி³பா⁴வேனவா யாவ தஸ்மிம் தஸ்மிம் காயே ஸம்மோஹோ பஹிய்யதி. தாவ புனப்புனம் நிரந்தரம் ஸமனுபஸ்ஸனாதி அத்தோ². நவப்பபே⁴தா³ஸு வேத³னாஸு ஸுக²வேத³னாதி³ காயஅவயவவேத³னாய தம்தம் வேத³னாபா⁴வேன உத³யப்³ப³யவஸேன ச அனுபஸ்ஸனா வேத³னானுபஸ்ஸனா. ஸோளஸ பபே⁴தே³ஸு ஸராகா³ தீ³ஸு சித்தேஸு ஸராகா³தி³கஸ்ஸ அவயவசித்தஸ்ஸ தம்தம் சித்தபா⁴வேன உத³யப்³ப³யவஸேனச அனுபஸ்ஸனா சித்தானுபஸ்ஸனா. பஞ்சபபே⁴தே³ஸு நீவரணாதீ³ஸு த⁴ம்மேஸு காமச்ச²ந்தா³தி³கஸ்ஸ அவயவத⁴ம்மஸ்ஸ தம் தம் த⁴ம்மபா⁴வேன உத³யப்³ப³யவஸேனச அனுபஸ்ஸனா த⁴ம்மானுபஸ்ஸனா.

[215] யம் பன விபா⁴வனியம்

‘‘குச்சி²தானம் கேஸாதீ³னம் ஆயோதி காயோ. அஸ்ஸாஸ பஸ்ஸாஸானம்வா ஸமூஹோ காயோ’’தி வுத்தம். தம் ந ஸுந்த³ர மேவ.

[216] யஞ்ச தத்த²

‘‘காயஸ்ஸ அனுபஸ்ஸனா காயானுபஸ்ஸனா’’தி வுத்தம். தம்பி ந ஸுந்த³ரம்.

காயே காயானுபஸ்ஸீ விஹரதீதி ஹி வுத்தம். ஏதேன ஹி காயே அனுபஸ்ஸனா காயானுபஸ்ஸனாதி அயமத்தோ²வ பதா⁴னதோ த³ஸ்ஸிதோதி.

[217] யஞ்ச தத்த²

‘‘வேத³னானம் வஸேன அனுபஸ்ஸனா’’தி வுத்தம். தம்பி ந ஸுந்த³ரம். வேத³னாஸு வேத³னானுபஸ்ஸீதி ஹி வுத்தம். ததா² சித்தானுபஸ்ஸனா பதே³பி.

[218] யம்பி தத்த²

‘‘ஸஞ்ஞாஸங்கா²ரானம் த⁴ம்மானம் பி⁴ன்னலக்க²ணானமேவ அனுபஸ்ஸனா த⁴ம்மானுபஸ்ஸனா’’தி வுத்தம். தம்பி ந ஸுந்த³ரமேவ.

ந ஹி கத்த²சி பாளியம் ஸஞ்ஞாஸங்கா²ராவ விஸேஸேத்வா த⁴ம்மாதி வுத்தா அத்தீ²தி. பாளியஞ்ஹி ச²னீவரணா பத²மம் த⁴ம்மாதி வுத்தா. ததோ பஞ்சுபாதா³னக்க²ந்தா⁴. ததோ த்³வாத³ஸாயதனானி. ததோ ஸத்தபோ³ஜ்ஜ²ங்கா³. ததோ சத்தாரி ஸச்சானீதி. யதி³ஏவம் ஏகாய த⁴ம்மானுபஸ்ஸனாய வுத்தாய இதராபி ஸித்³தா⁴தி ஸதிபட்டா²னம் ஏகமேவ வத்தப்³ப³ம், ந சத்தாரோதி.ந. யோ ஹி த⁴ம்மானுபஸ்ஸனாயம் ரூபக்க²ந்தோ⁴ வுத்தோ. ஸோ ருப்பனலக்க²ணானுபஸ்ஸனவஸேன வுத்தோ. ருப்பனலக்க²ணஞ்ஹி நிப்³ப³த்திதபர மத்த²த⁴ம்மோ. ஸோச ததா² அனுபஸ்ஸந்தஸ்ஸ விஸேஸதோ ஸுகு²மஸ்ஸ அத்தவிபல்லாஸஸ்ஸ பஹானாய ஹோதீதி. காயோதி பன தம்தம் ஸமூஹபூ⁴தரூபத⁴ம்மவஸேன வேதி³தப்³போ³. நருப்பனலக்க²ணவஸேன. நச தம்தம் காயபா⁴வேன க³ஹிதோ தம்தம் ரூபத⁴ம்மஸமூஹோ நிப்³ப³த்தித பரமத்த²த⁴ம்மோனாம ஹோதி. பஞ்ஞத்திமிஸ்ஸகத்தா. ஸோச ததா² அனுபஸ்ஸந்தஸ்ஸ விஸேஸதோ ஓளாரிகஸ்ஸ ஸுபா⁴தி³ விபல்லாஸஸ்ஸ பஹானாய ஹோதீதி. ததா² வேத³னாசித்தேஸுபி ஓளாரிகவிபல்லாஸோ ஸுகு²மவிபல்லாஸோதி த்³வே த்³வே விபல்லாஸா ஹோந்தி. தத்த² அத்துபனிப³ந்தா⁴ நிச்சஸுக² விபல்லாஸா ஓளாரிகா. அத்தவிபல்லாஸோ ஸுகு²மோ. தத்த² வேத³னா சித்தா நுபஸ்ஸனா ஓளாரிகவிபல்லாஸானம் பஹானாய விஸும் வுத்தா. த⁴ம்மேஸு வேத³னாக்க²ந்த⁴விஞ்ஞாணக்க²ந்தா⁴ ஸுகு²ம விபல்லாஸ பஹானாயாதி. தஸ்மா சத்தாரோவ ஸதிபட்டா²னா வத்தப்³பா³தி. ஸம்மா பத³ஹந்தி ஏதேஹீதி ஸம்மப்பதா⁴னானி. காமம் தசோச ந்ஹாருச, அட்டி²ச அவஸிஸ்ஸது. உபஸ்ஸுஸ்ஸது மே ஸரீரே மம்ஸலோஹிதம். யந்தம் புரிஸதா²மேன புரிஸபரக்கமேன பத்தப்³ப³ம். ந தம் அபத்வா வீரியஸ்ஸ ஸண்டா²னம் ப⁴விஸ்ஸதீதி ஏவம் அனிவத்தனவுத்தி வஸேன பவத்தஸ்ஸ ஸம்மாவாயாமஸ்ஸ ஏதம் நாமம். ஸோ பன ததா² பவத்தோ ஏகோபி ஸமானோ கிச்சஸித்³தி⁴வஸேன சதுதா⁴ ஹோதீதி. வுத்தம் உப்பன்னானந்திஆதி³.

தத்த² உப்பன்னானம்பாபகானந்தி அஸுகஸ்மிம் காலே தே³ஸே டா²னே வா அஹம் இத³ஞ்சித³ஞ்ச நாம பாபம் அகாஸிம், இத³ஞ்சித³ஞ்சனாம மய்ஹம் உப்பன்னந்தி ஏவம் அத்தனோ ஸந்தானே உப்பன்னபா⁴வேன விதி³தானம் அகுஸலானம். பஹானாயாதி தேஸம் அத்தனோ ஸந்தானே அஜ்ஜதக்³கே³ யாவபரினிப்³பா³னாபுன அனுப்பாத³த⁴ம்மதாபாத³னகரணத்த²ம். வாயாமோதி ஸீல பூரண ஸமத² விபஸ்ஸனாபா⁴வனாகம்மேஸு த³ள்ஹம் வாயாமோ. அனுப்பன்னானந்தி அத்தனோ ஸந்தானே உப்பன்னபுப்³ப³ந்தி அவிதி³தானம் பரஸந்தானேஸுவா ஸுத்தந்தேஸுவா தி³ஸ்வாவா ஸுத்வாவா விதி³தானம். அனுப்பாதா³யாதி யேஸம் அகுஸல மூலானம் அத்தி²தாய இமேஸம் ஸத்தானம் ஈதி³ஸானி கிலேஸஜாதானி வா பாபகம்மானிவா உப்பஜ்ஜந்தி. தானி மயி விஜ்ஜந்திஏவ. அஹம்பி தேஹி கிலேஸேஹிவா கம்மேஹிவா அபரிமுத்தோயேவ. அஹம்பி ஸ்வேவா பரஸுவேவா ப⁴வந்தரேஸுவா தானி அத்தனோ ஸந்தானே உப்பாதே³ஸ்ஸா மியேவாதி ஏவம் பச்சவேக்கி²த்வா தேஸம் அகுஸலமூலானம் அத்தனோ ஸந்தானே உப்பத்தியா பச்சயஸமுச்சி²ந்த³னத்த²ம். அனுப்பன்னானம்குஸலானந்தி சதுபூ⁴மகேஸு குஸலத⁴ம்மேஸு ஸத்தவிஸுத்³தி⁴பபே⁴தே³ஸு இமேனாம விஸுத்³தி⁴த⁴ம்மா மயா அப்பத்தா அனதி⁴க³தாஏவ ஹோந்தீதி ஏவம் ஞத்வா ஸமயே அனதிக்கந்தேஏவ அப்பத்தானம் அனதி⁴க³தானம் உபரி விஸுத்³தி⁴த⁴ம்மானம் அதி⁴க³மனத்தா²ய.

உப்பன்னானம் குஸலானம் பி⁴ய்யோ பா⁴வாயாதி யானி ஸீலாதீ³னி குஸலானி மயி உப்பன்னானி. தானி யாவ நியாமம் நஓக்கமந்தி, தாவ மய்ஹம் ஏதானீதி வத்தும் நாரஹந்தி. ஸ்வேவா பரஸுவேவா ப⁴வந்தரம் பத்வாவா பி⁴ஜ்ஜிஸ்ஸந்தி யேவாதி ஏவம் பச்சவேக்கி²த்வா அத்தனோ ஸந்தானே உப்பன்னானம் தேஸம் ஸப்³ப³ஸோ அகுப்பத⁴ம்மதாபாத³னவஸேன ஸுட்டு²தரம் வட்³ட⁴னத்தா²ய. ஏதேஸு பன சதூஸு முகே²ஸு யேன கேனசி ஏகேன முகே²ன உப்பன்னோ வாயாமோ சதுகிச்சஸாத⁴கோஏவ ஹோதீதி வேதி³தப்³போ³. அட்ட²கதா²யம் பன மக்³க³க்க²ணே ஏவ ஏகஸ்ஸ தஸ்ஸ சதுகிச்சஸாத⁴கதா வுத்தாதி.

இஜ்ஜ²னம் இத்³தி⁴, தஸ்ஸ தஸ்ஸ யோக³கம்மஸ்ஸ ஸித்³தி⁴ ஸமித்³தி⁴ நிப்³ப³த்தீதி அத்தோ². ஸா பன ஸங்கே²பதோ அபி⁴ஞ்ஞேய்யானம் த⁴ம்மானம் அபி⁴ஞ்ஞாஸித்³தி⁴, பரிஞ்ஞேய்யானம் பரிஞ்ஞாஸித்³தி⁴, பஹாதப்³பா³னம் பஹானஸித்³தி⁴, ஸச்சி²கா தப்³பா³னம் ஸச்சி²கரணஸித்³தி⁴, பா⁴வேதப்³பா³னம் பா⁴வனாஸித்³தீ⁴தி பஞ்சவிதா⁴ ஹோதி. இஜ்ஜ²தீதிவா இத்³தி⁴ ஸத்து²ஸாஸனே யோக³கம்மேன இஜ்ஜ²ந்தானம் ஸப்³பே³ஸம் மஹக்³க³த லோகுத்தரத⁴ம்மானம் நாமம். பஜ்ஜதி ஏதேனாதி பாதோ³. இத்³தி⁴யா பாதோ³தி இத்³தி⁴பாதோ³. இத்³தி⁴பத்தியா ப³லவுபாயோ பதா⁴னகாரணந்தி வுத்தம் ஹோதி. ஸோ பன சதுன்னம் அதி⁴பதித⁴ம்மானம் வஸேன சதுதா⁴ ஹோதீதி வுத்தம் சத்தாரோ இத்³தி⁴பாதா³திஆதி³. அதி⁴பதிபூ⁴தோ ச²ந்தோ³வ இத்³தி⁴பாதோ³தி ச²ந்தி³த்³தி⁴பாதோ³. ஏஸனயோ ஸேஸேஸுபீதி. ஏத்த²ச ஸப்³பே³ மஹக்³க³தானுத்தரபூ⁴தா உத்தரிமனுஸ்ஸ த⁴ம்மானாம நபாகதிகேன ச²ந்தே³னவா வீரியேனவா சித்தேனவா பஞ்ஞாய வா அதி⁴க³ந்தப்³பா³ ஹோந்தி. யேன கேனசி பலிபோ³தே⁴ன படிபா³ஹிதும் அஸக்குணேய்யேன அதி⁴பதிபா⁴வபத்தேன ச²ந்தா³தி³னாஏவ அதி⁴க³ந்தப்³பா³. தஸ்மா இமே சத்தாரோ த⁴ம்மா அதி⁴பதிபூ⁴தாவ இத⁴ அதி⁴ப்பேதாதி த³ட்ட²ப்³பா³தி.

[219] யம்பன விபா⁴வனியம்

‘‘இஜ்ஜ²தி அதி⁴ட்டா²னாதி³கம் ஏதாயாதி இத்³தி⁴, இத்³தி⁴வித⁴ஞ்ஞாணம். இத்³தி⁴யா பாதோ³ இத்³தி⁴பாதோ³’’தி வுத்தம். தம் ஸம்யுத்தகே கதமாச பி⁴க்க²வே இத்³தி⁴. இத⁴ பி⁴க்க²வே பி⁴க்கு² அனேகவிஹிதம் இத்³தி⁴வித⁴ம் பச்சனுபோ⁴தி. ஏகோபி ஹுத்வா ப³ஹுதா⁴ ஹோதி.ல. யாவ ப்³ரஹ்மலோகாபி காயேன வஸம் வத்தேதி. அயம் வுச்சதி பி⁴க்க²வே இத்³தீ⁴தி இமாய பாளியா ஸமேதி. ஏவம்ஸந்தேபி இத⁴ அபி⁴த⁴ம்மபரியாயோவ அதி⁴ப்பேதோதி தம் ந யுஜ்ஜதியேவ.

விப⁴ங்கே³ பன பத²மவாரே லோகிய லோகுத்தரமிஸ்ஸகா சித்த சேதஸிகராஸீஏவ இத்³தி⁴பாதா³தி வுத்தா. அட்ட²கதா²யஞ்ச-பத²மஜ்ஜா²ன பரிகம்மம்ஹி இத்³தி⁴பாதோ³னாம. பத²மஜ்ஜா²னம் இத்³தி⁴னாம.ல. நேவஸஞ்ஞா நாஸஞ்ஞாயதனஜ்ஜா²னபரிகம்மம் இத்³தி⁴பாதோ³னாம. நேவஸஞ்ஞானாஸஞ்ஞா யதனஜ்ஜா²னம் இத்³தி⁴னாம. ஸோதாபத்திமக்³க³ஸ்ஸ விபஸ்ஸனா இத்³தி⁴பாதோ³ நாம. ஸோதாபத்திமக்³கோ³ இத்³தி⁴னாம.ல. அரஹத்தமக்³க³ஸ்ஸ விபஸ்ஸனா இத்³தி⁴பாதோ³னாம. அரஹத்தமக்³கோ³ இத்³தி⁴னாமாதிச. பத²மஜ்ஜா²னம் இத்³தி⁴பாதோ³னாம. து³தியஜ்ஜா²னம் இத்³தி⁴னாம. ல. ஆகிஞ்சஞ்ஞாயதனஜ்ஜா²னம் இத்³தி⁴ பாதோ³னாம. நேவஸஞ்ஞா நாஸஞ்ஞா யதனஜ்ஜா²னம் இத்³தி⁴னாம. ஸோதா பத்திமக்³கோ³ இத்³தி⁴பாதோ³னாம. ஸகதா³கா³மிமக்³கோ³ இத்³தி⁴னாம.ல. அரஹத்தமக்³கோ³ இத்³தி⁴னாமாதி ச வுத்தம். தம்தம் பாத³கஜ்ஜா²னம் இத்³தி⁴பாதோ³னாம. ததோ ததோ வுட்ட²ஹித்வா உப்பாதி³தமக்³கோ³ இத்³தி⁴னாமாதிபி வத்தும் வட்டதியேவ. இத⁴ பன உத்தரசூளபா⁴ஜனியே ஆக³தனயேன சத்தாரோ அதி⁴பதித⁴ம்மாஏவ இத்³தி⁴பாதா³தி வுத்தா.

தத்த² பன லோகுத்தரபூ⁴தாஏவ அதி⁴ப்பேதா. இத⁴ லோகிய லோகுத்தர மிஸ்ஸகபூ⁴தாதி. இந்த்³ரியப³லானி அத்த²தோ ஹேட்டா² வுத்தானேவ. பாகடட்டா²னதோ பன சதூஸு ஸோதாபத்தியங்கே³ஸு ஸத்³தா⁴ய தா²மோ வேதி³தப்³போ³. யதா²ஹ-கத்த² பி⁴க்க²வே ஸத்³தி⁴ந்த்³ரியம் த³ட்ட²ப்³ப³ம். சதூஸு ஸோதாபத்தியங்கே³ஸு ஏத்த² ஸத்³தி⁴ந்த்³ரியம் த³ட்ட²ப்³ப³ந்தி. சதூஸு ஸம்மப்பதா⁴னேஸு வீரியஸ்ஸ. யதா²ஹ-கத்த² பி⁴க்க²வே வீரியிந்த்³ரியம் த³ட்ட²ப்³ப³ம். சதூஸு ஸம்மப்பதா⁴னேஸு ஏத்த² வீரியிந்த்³ரியம் த³ட்ட²ப்³ப³ந்தி. சதூஸு ஸதிபட்டா²னேஸு ஸதியா. யதா²ஹ-கத்த² பி⁴க்க²வேஸதிந்த்³ரியம் த³ட்ட²ப்³ப³ம். சதூஸு ஸதிபட்டா²னேஸுஏத்த² ஸதிந்த்³ரியம் த³ட்ட²ப்³ப³ந்தி. சதூஸு ஜா²னேஸு ஸமாதி⁴ஸ்ஸ. யதா²ஹ-கத்த² பி⁴க்க²வே ஸமாதி⁴ந்த்³ரியம் த³ட்ட²ப்³ப³ம். சதூஸு ஜா²னேஸு ஏத்த² ஸமாதி⁴ந்த்³ரியம் த³ட்ட²ப்³ப³ந்தி. சதூஸு அரியஸச்சேஸு பஞ்ஞாய தா²மோ வேதி³தப்³போ³. யதா²ஹ-கத்த² பி⁴க்க²வே பஞ்ஞிந்த்³ரியம் த³ட்ட²ப்³ப³ம். சதூஸு அரியஸச்சேஸு ஏத்த² பஞ்ஞிந்த்³ரியம் த³ட்ட²ப்³ப³ந்தி. ஸம்போ³தி⁴ வுச்சதி சதூஸு மக்³கே³ஸு ஞாணம், ஸமந்ததோ பு³ஜ்ஜ²தி படிவிஜ்ஜ²தி பு³ஜ்ஜ²ந்தி வா ஏதாயாதி கத்வா. ஸா ஹி சதுஸச்சத⁴ம்மம் பு³ஜ்ஜ²மானா ஏகக்க²ணே ஸோளஸஹி அத்தே²ஹி ஸத்³தி⁴ம் ஸமந்ததோ பு³ஜ்ஜ²தி, ந ஏகதே³ஸ தோதி தஸ்ஸா ஸம்போ³தி⁴யா ஸமுட்டா²பனட்டே²ன ஸம்போ³தி⁴யா அங்கோ³ ஸஹகாரீப³லவபச்சயோதி ஸம்போ³ஜ்ஜ²ங்கோ³. ஸதிஏவ ஸம்போ³ஜ்ஜ²ங்கோ³ ஸதிஸம்போ³ஜ்ஜ²ங்கோ³. ஸா ஹி காயாதீ³ஸு சதூஸு அத்தனோ கோ³சரேஸு பா⁴வனாவஸேன ஸுட்டு²ஸம்வட்³ட⁴மானா அனுபுப்³பே³ன ஸப்³ப³பமாத³ பக்க²ம் வித⁴மேத்வா ஸப்³ப³ம் அப்பமாத³பக்க²ஞ்ச பூரேத்வா சதுமக்³க³ஞ்ஞாண ஸங்கா²தம் ஸம்போ³தி⁴ம் ஸமுட்டா²பேதீதி. விபஸ்ஸனாய பூ⁴மிபூ⁴தே அஜ்ஜ²த்த ப³ஹித்³தா⁴த⁴ம்மே விசினாதி கக்க²ளத்தபு²ஸனாதீ³ஹி அனிச்சதாதீ³ஹிச விவிதா⁴ காரேஹி சுண்ணவிசுண்ணம் குருமானோவிய தேஸு த³ட்ட²ப்³பா³காரம் அஸேஸம் உபதா⁴ரேதீதி த⁴ம்மவிசயோ. ஸோஏவ ஸம்போ³ஜ்ஜ²ங்கோ³தி த⁴ம்மவிசய ஸம்போ³ஜ்ஜ²ங்கோ³. ஸோபி ஹி அத்தனோ கோ³சரபூ⁴தேஸு தேஸு த⁴ம்மேஸு பா⁴வனாவஸேன ஸுட்டு²ஸம்வட்³ட⁴மானோ அனுபுப்³பே³ன ஸப்³ப³ம்ஸம்மோஹ பக்க²ம் வித⁴மேத்வா ஸப்³ப³ம் அஸம்மோஹபக்க²ம் பூரேத்வா ஸயம் சதுமக்³க³ஞாண ஸம்போ³தி⁴ ஹுத்வா ஸமுட்ட²ஹதீதி. ஸம்மப்பதா⁴னவீரியமேவ ஸம்போ³ஜ்ஜ²ங்கோ³தி வீரியஸம்போ³ஜ்ஜ²ங்கோ³. தம்பி ஹி சதுப்³பி³தே⁴ஸு அத்தனோ கோ³சரேஸு பா⁴வனாவஸேன ஸுட்டு² ஸம்வட்³ட⁴மானம் அனுபுப்³பே³ன ஸப்³ப³ம் குஸலேஸு த⁴ம்மேஸு லீனஸங்கோச கோஸஜ்ஜபக்க²ம் கிலேஸஜாதம் வித⁴மேத்வா ஸப்³ப³ம் து⁴ரஸம்பக்³க³ஹபக்க²ம் பூரேத்வா வுத்தப்பகாரம் ஸம்போ³தி⁴ம் ஸமுட்டா² பேதீதி.

பீதியேவ ஸம்போ³ஜ்ஜ²ங்கோ³ பீதி ஸம்போ³ஜ்ஜ²ங்கோ³. ஸாபி ஹி வுத்தப்பகாரேஸு கோ³சரேஸு ஸுட்டு² ஸம்வட்³ட⁴மானா குஸலேஸு த⁴ம்மேஸு ஸப்³ப³ம் சித்தஸ்ஸ அரதிஉக்கண்ட²பக்க²ம் வித⁴மேத்வா ஸப்³ப³ம் த⁴ம்மரதி த⁴ம்மனந்தி³த⁴ம்மாராம பக்க²ம் பூரேத்வா வுத்தப்பகாரம் ஸம்போ³தி⁴ம் ஸமுட்டா²பேதி. பஸ்ஸத்³தி⁴ஏவ ஸம்போ³ஜ்ஜ²ங்கோ³ பஸ்ஸத்³தி⁴ ஸம்போ³ஜ்ஜ²ங்கோ³. ஸாபி ஹி வுத்தபகாரேஸு கோ³சரேஸு பா⁴வனாவஸேன ஸுட்டு² ஸம்வட்³ட⁴மானா ஸப்³ப³ம் சித்தஸ்ஸ ஸாரம்ப⁴ த³ரத²பக்க²ம் வித⁴மேத்வா ஸப்³ப³ம் வூபஸந்தஸீதலபக்க²ம் பூரேத்வா வுத்தப்பகாரம் ஸம்போ³தி⁴ம் ஸமுட்டா²பேதி. ஸமாதி⁴ஏவ ஸம்போ³ஜ்ஜ²ங்கோ³தி ஸமாதி⁴ ஸம்போ³ஜ்ஜ²ங்கோ³. தஸ்ஸ ஸம்போ³தி⁴ஸமுட்டா²பனதா பாகடா. தத்ரமஜ்ஜ²த்ததா ஸங்கா²தா உபேக்கா²ஏவ ஸம்போ³ஜ்ஜ²ங்கோ³தி உபேக்கா² ஸம்போ³ஜ்ஜ²ங்கோ³. ஸாபிஹி வுத்தப்பகாரேஸு ஸதிஆதீ³னம் கோ³சரேஸு பா⁴வனாவஸேன ஸுட்டு² ஸம்வட்³ட⁴மானா ஸப்³ப³ம் சித்தஸ்ஸ லீனுத்³த⁴ச்சபக்க²ம் வித⁴மேத்வா ஸமவாஹிதபக்க²ம் பூரேத்வா வுத்தப்பகாரம் ஸம்போ³தி⁴ம் ஸமுட்டா²பேதீதி. ஸம்மா அவிபரீததோ த³ஸ்ஸனம் ஸம்மாதி³ட்டி². ஸா பன து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோ த⁴கா³மினிபடிபதா³ய ஞாணந்தி சதுப்³பி³தா⁴ ஹோதி. ஸம்மா அவிபரீததோ ஸம்கப்பனம் ஸம்மாஸங்கப்போ. யதா² ஸம்மாதி³ட்டி² த³ட்ட²ப்³ப³ஸபா⁴வேஸு ப²ரமானா பவத்ததி ததா² தஸ்ஸா ஸம்விதா⁴னந்தி அத்தோ². தேனேவ ஹி ஸோ பஞ்ஞாக்க²ந்தே⁴ ஸங்க³ஹிதோதி. யதா²ஹ-யாசாவுஸோ விஸாக² ஸம்மாதி³ட்டி², யோச ஸம்மாஸங்கப்போ, இமே த⁴ம்மா பஞ்ஞாக்க²ந்தே⁴ ஸங்க³ஹிதாதி. ஸம்மாவாசா த³யோ புப்³பே³ வுத்தத்தா²யேவ. ஸம்மா வாயமந்தி ஏகேனாதி ஸம்மாவாயாமோ. சதுகிச்சஸாத⁴கம் ஸம்மப்பதா⁴ன வீரியம். பஸ்ஸத்³தி⁴த்³வயம் பஸ்ஸத்³தி⁴ஸாமஞ்ஞேன ஏகம் கத்வா சுத்³த³ஸேதே ஸபா⁴வதோதி வுத்தம். ஸத்ததா⁴தி வுத்தப்பகாரானம் ஸதிபட்டா²னசதுக்க ஸம்மப்பதா⁴னசதுக்காதீ³னம் வஸேன ஸத்ததா⁴. இதா³னி தேஸம் சுத்³த³ஸன்னம் கிச்சானம் டா²னபே⁴த³ம் த³ஸ்ஸேதும் ஸங்கப்பபஸ்ஸத்³தி⁴சாதிஆதி³மாஹ.

[220] யம்பன விபா⁴வனியம்

‘‘ஸத்ததா⁴ தத்த² ஸங்க³ஹோதி வத்வா புன தம் த³ஸ்ஸேதும் ஸங்கப்பபஸ்ஸத்³தி⁴சாதிஆதி³மாஹா’’தி வுத்தம். தம் ந யுஜ்ஜதி.

ந ஹி தத்த² ஸத்த ஸரூபம் லப்³ப⁴தீதி. ஸங்கப்போ விரதித்தயஞ்ச ஏகம் மக்³க³ங்க³ட்டா²னம் பாபுணாதி. பஸ்ஸத்³தி⁴ச பீதிச உபேக்கா²ச ஏகம் போ³ஜ்ஜ²ங்க³ட்டா²னம். ச²ந்தோ³ச சித்தஞ்ச ஏகம் இத்³தி⁴பாத³ட்டா²னந்தி ஏவம் நவத⁴ம்மா ஏகட்டா²னிகா ஹோந்தி. ஏகம் வீரியம் சதுஸம்மப்பதா⁴ன இத்³தி⁴ பாதி³ந்த்³ரிய ப³லபோ³ஜ்ஜ²ங்க³ மக்³க³ங்க³ வஸேன நவட்டா²னிகம். ஏகா ஸதி சதுஸதிபட்டா²ன இந்த்³ரிய ப³ல போ³ஜ்ஜ²ங்க³ மக்³க³ங்க³ வஸேன அட்ட²ட்டா²னிகா. ஏகோ ஸமாதி⁴ இந்த்³ரிய ப³ல போ³ஜ்ஜ²ங்க³ மக்³க³ங்க³ வஸேன சதுட்டா²னிகோ. ஏகாபஞ்ஞா இத்³தி⁴பாதி³ந்த்³ரிய ப³ல போ³ஜ்ஜ²ங்க³ மக்³க³ங்க³ வஸேன பஞ்சட்டா²னிகா. ஏகா ஸத்³தா⁴ இந்த்³ரிய ப³ல வஸேன து³ட்டா²னிகாதி. தே பன ஸத்ததிம்ஸ பபே⁴தா³ த⁴ம்மா புப்³ப³பா⁴கே³ நானாரம்மணா நானாக²ணிகாச ஹோந்தி. மக்³க³ப²லேஸு பன நவட்டா²னிகம் வீரியம் ஏகமேவ நிப்³பா³னம் ஆரம்மணம்கத்வா நவஸுடா²னேஸு அத்த படிபக்கா²னம் பாப த⁴ம்மானம் பச்சய யமுக்³கா⁴தவஸேன நவ கிச்சானி ஸாத⁴யமானம் ஏகமேவ பவத்ததி. ஏஸ நயோ அட்ட²ட்டா²னிகாதீ³ஸு. தஸ்மா தே ஏகக்க²ணே ஏகசித்தே ஸப்³பே³ ஏகதோ உபலப்³ப⁴ந்தீதி வுத்தம் ஸப்³பே³ லோகுத்தரே ஹோந்தீதி. நவாஸங்கப்ப பீதியோதி ஏத்த² வாஸத்³தோ³ க்வசி ஸத்³த³த்தோ². ஸங்கப்போ க்வசி து³தீயஜ்ஜா²னிகா தி³கேபீதிச க்வசி சதுத்த²ஜ்ஜா²னிகாதி³கே லோகுத்தரே நஹோந்தீதி அத்தோ².

லோகியேபீதி ஸீலவிஸோத⁴னாதி³வஸேன பவத்தே காமா வசரகுஸலாதி³கே லோகியகுஸல க்ரியசித்துப்பாதே³பி. யதா² யோக³ந்தி ஸீலவிஸோத⁴னகம்ம ஸமத²கம்மனாமரூபபரிக்³க³ஹாதி³கம்மேஸு யுஜ்ஜிதப்³பா³னம் விரதித்தயாதீ³னம் அனுரூபம். ச²ப்³பி³ஸுத்³தி⁴பவத்தியந்தி ஸீல விஸுத்³தா⁴தீ³னம் ச²ன்னம் விஸுத்³தீ⁴னம் அனுக்கமேன பவத்திகாலே. ஏதேன தி³ட்டே²வ த⁴ம்மே மக்³க³ப²லபதிட்டா²பா⁴வத்தா²ய பூரிதே சதுபாரிஸுத்³தி⁴ ஸீலேபி ஸத்³தா⁴ஸதிஆத³யோ போ³தி⁴பக்கி²யேஸு ஸங்க³ஹிதா ஏவ ஹோந்தி. ததா² மக்³க³பாத³கத்தா²ய உப்பாதி³தேஸு மஹக்³க³தஜ்ஜா²னேஸு மீதி த³ஸ்ஸேதி. ததா² ஹி போ³ஜ்ஜ²ங்க³ஸம்யுத்தகே –

ஏவம் பா⁴விதோ கோ² குண்ட³லிய இந்த்³ரியஸம்வரோ தீணி ஸுசரிதானி பரிபூரேதி. ஏவம் பா⁴விதானி தீணி ஸுசரிதானி சத்தாரோ ஸதிபட்டா²னே பரிபூரேந்தி. ஏவம் பா⁴விதா சத்தாரோ ஸதிபட்டா²னா ஸத்த போ³ஜ்ஜ²ங்கே³ பரிபூரேந்தி. ஏவம் பா⁴விதா ஸத்த போ³ஜ்ஜ²ங்கே³ விஜ்ஜாவிமுத்தியோ பரிபூரேந்தீதி வுத்தம்.

அட்ட²கதா²யம்பி நகேவலம் ப³லவவிபஸ்ஸனா மக்³க³ப²லேஸுஏவ போ³ஜ்ஜ²ங்கே³ உத்³த⁴ரந்தி. விபஸ்ஸனாபாத³க கஸிணஜ்ஜா²ன ஆனாபாணா ஸுக ப்³ரஹ்மவிஹாரஜ்ஜா²னேஸுபி உத்³த⁴ரந்தீதி வுத்தம். [போ³தி⁴பக்கி²யஸங்க³ஹோ]

165. ஸப்³ப³ஸங்க³ஹே பஞ்சக்க²ந்தா⁴தி பஞ்ச ராஸயோ. அதீதாதி³ பே⁴த³ பி⁴ன்னானம் ரூபானம் க²ந்தோ⁴ ராஸீதி ரூபக்க²ந்தோ⁴. ஏகஸ்மிம் ருப்பன லக்க²ணே ராஸிம் கத்வா ஞாணேன பரிக்³க³ஹிதா ரூபத⁴ம்மாஏவ. ததா² ஏகஸ்மிம் வேத³யிதலக்க²ணே ஸஞ்ஜானன லக்க²ணே ராஸிம் கத்வா பரிக்³க³ஹிதா அதீதாதி³பே⁴த³பி⁴ன்னா வேத³னாஸஞ்ஞாயோ வேத³னாக்க²ந்தோ⁴ ஸஞ்ஞாக்க²ந்தோ⁴ சனாம. ஸங்க²ரோந்தீதி ஸங்கா²ரா. ப²ஸ்ஸ சேதனா த³யோ. தேஹி ச²ஸுவா உபபத்தித்³வாரேஸு தீஸுவா கம்மத்³வாரேஸு ஏகதோ ஸங்க³ம்ம ஸமாக³ம்ம பு²ஸனசேதயிதாதீ³ஹி அத்தனோ அத்தனோ கிச்சேஹி த³ஸ்ஸனஸவனாதீ³னி ஸாதா⁴ரணகிச்சானிவா காயிக வாசஸிகமானஸிகானிவா ஸயன நிஸஜ்ஜட்டா²ன க³மன கத²ன சிந்தனாதீ³னி ஸப்³பா³னி கிச்சானி கரோந்தி வித³ஹந்தீதி. வுத்தஞ்ஹேதம் ஸம்யுத்தகே –

கிஞ்ச பி⁴க்க²வே ஸங்கா²ரே வதே³த². ஸங்க²தம் அபி⁴ஸங்க²ரோந்தீதி கோ² பி⁴க்க²வே தஸ்மா ஸங்கா²ராதி வுச்சந்தி. கிஞ்ச ஸங்க²தம் அபி⁴ ஸங்க²ரோந்தி, ரூபம் ரூபத்தா²ய ஸங்க²தம் அபி⁴ஸங்க²ரோந்தி. வேத³னம் வேத³னத்தா²ய ஸங்க²தம் அபி⁴ஸங்க²ரோந்தி. ஸஞ்ஞம் ஸஞ்ஞத்தா²ய ஸங்க²த அபி⁴ஸங்க²ரோந்தி. ஸங்கா²ரே ஸங்கா²ரத்தா²ய ஸங்க²த மபி⁴ஸங்க²ரோந்தி. விஞ்ஞாணம் விஞ்ஞாணத்தா²ய ஸங்க²த மபி⁴ ஸங்க²ரோந்தீதி. ஸங்க²த மபி⁴ஸங்க²ரோந்தீதி கோ² பி⁴க்க²வே தஸ்மா ஸங்கா²ராதி வுச்சந்தீதி.

தத்த² ரூபம் ரூபத்தா²ய ஸங்க²தமபி⁴ஸங்க²ரோந்தீதி யஸ்மிம் யஸ்மிம் காலே ஸயன நிஸஜ்ஜாதி³வஸேன பவத்தா யா யா ரூபவிகதி இச்சீ²யதி, தஸ்மிம்தஸ்மிம் காலே தஸ்ஸா தஸ்ஸா ரூபவிகதியா ஜாதத்தா²ய இரியாபத² பரிவத்தனாதி³ வஸேன தம் தம் ரூபவிகதிம் ஸங்க²தம் அபி⁴ஸங்க²ரோந்தீதி அத்தோ². க²ஜ்ஜபோ⁴ஜ்ஜாதி³கம் வத்தா²லங்காராதி³கம் மஞ்ச பீட² கே³ஹ ரதா²தி³கம் ஸப்³ப³ம் உபபோ⁴க³ பரிபோ⁴க³பூ⁴தம் பா³ஹிர ரூபம்பி க³ஹேத்வா யோஜேதும் வட்டதியேவ. வேத³னந்தி தி³ட்ட²த⁴ம்மிகம் ஸம்பராயிகஞ்ச ஸப்³ப³ம்பி வேத³னம். தத்த² தி³ட்ட²த⁴ம்மிகம் வேத³னம் ஸங்க²தம் அபி⁴ஸங்க²ரோந்தா சித்தகம்மனச்சகீ³தாதீ³னி தம் தம் வேத³னுபகரணானி ஸம்பாத³ன வஸேன ஸம்பராயிகஞ்ச அபி⁴ஸங்க²ரோந்தா மானுஸகம்வா தி³ப்³ப³ம்வா தம்தம் வேத³னம் பத்தே²த்வா தா³ன ஸீலாதி³ ஸம்பாத³ன வஸேன அபி⁴ஸங்க²ரோந்தி. ஏஸனயோ ஸேஸேஸுபி. ஸங்கா²ரேஸு பன ப²ஸ்ஸம் ப²ஸ்ஸத்தா²ய சேதனம் சேதனத்தா²யாதிஆதி³னா தா³னம் தா³னத்தா²ய ஸீலம் ஸீலத்தா²ய பாணாதிபாதம் பாணாதிபாதத்தா²யாதிஆதி³னா வா ஸப்³ப³ம் லோகபவத்திம் ஞத்வா வித்தா²ரேதப்³பா³தி. ஏத்த² ஸியா, கஸ்மா ஸங்கா²ரேஸு பாகடா சேதனாத³யோ விதக்காத³யோ லோபா⁴த³யோ ஸத்³தா⁴ஸதிபஞ்ஞாத³யோச த⁴ம்மே விஸும் விஸும் க²ந்த⁴பா⁴வேன அவத்வா வேத³னாஸஞ்ஞாவ வுத்தாதி. வுச்சதே.

யதா² ஹி சே²கோ மஹாபி⁴ஸக்கோ பே⁴ஸஜ்ஜமூலானி க³ஹேத்வா சுண்ணம் கரோந்தோ தேஸு மூலேஸு இமானி தூ²லானிபி முதூ³னி ஹோந்தி. இமானி கு²த்³த³கானிபி கக்க²ளானி ஹோந்தீதி ஞத்வா ததோ பத²மதரம் கக்க²ளானி விஸும் உத்³த⁴ரித்வா ஸுட்டு² கோட்டேத்வா சுண்ணம் கரோதி. ஸேஸானி பன ஸப்³பா³னி முதூ³னி ஏகதோ கத்வா கோட்டேத்வா சுண்ணம் கரோதி. ததோ உப⁴யானி மிஸ்ஸேத்வா ஸிலாயம் பிஸேத்வா பே⁴ஸஜ்ஜகம்மே உபனேதி. ஏவம் கரோந்தோ நகிலமதி. ஏவமேவம் ப⁴க³வாபி நாமரூபத⁴ம்மேஸு திலக்க²ணம் ஆரோபேத்வா நிச்சஸுக²அத்த விபல்லாஸானம் பஹானத்தா²ய அனுயுஞ்ஜந்தா தே³வமனுஸ்ஸா விபா⁴கே³ அகதே தீஸு த⁴ம்மேஸு கிலமிஸ்ஸந்தீதி ஞத்வா நாமத⁴ம்மேஸு வேத³னாஸஞ்ஞாசித்தஸங்கா²தே தயோ த⁴ம்மே விஸும் உத்³த⁴ரித்வா ஏகமேகம் க²ந்த⁴ம் நாம கத்வா தே³ஸேஸி. ததா² ஹி யதா² மச்சா²னாம உத³கே ஸதி உக்கண்டி²தா நாம நத்தி². அஸதி பன ஏகந்தேன உக்கண்டி²தாயேவ ஹோந்தி. யதா²வா மது⁴கராவா ப⁴மராவா யஸ்மிம் வனே புப்ப²ரஸ ப²லரஸே லப⁴ந்தி, தத்த² உக்கண்டி²தானாம நத்தி². அலப⁴மானா பன ஏகந்தேன உக்கண்டி²தாஏவ ஹோந்தி. ஏவமேவ இமேஸம் ஸத்தானம் ஸுக² ஸஞ்ஞிதேஸு பதிஸரணேஸு வேத³னாஸதி³ஸம் பதிஸரணம்னாம நத்தி². மனுஸ்ஸதே³வப்³ரஹ்மஸம்பத்தியோ அஸ்ஸாதே³ந்தாபி ஸுக²வேத³னத்தா²யஏவ அஸ்ஸாதே³ந்தி. யதி³ச தாஹி வினா யதி²ச்சி²தம் ஸுக²வேத³னம் லபே⁴ய்யும். கோனாம தா ஸாதி³யிஸ்ஸதி. ததா² ப²ஸ்ஸசேதனாதீ³ஹி விதக்கவிசாரவீரியாதீ³ஹி லோப⁴தோ³ஸாதீ³ஹி ஸத்³தா⁴ஸதிபஞ்ஞாதீ³ஹி ச ஸங்கா²ரக்க²ந்த⁴த⁴ம்மேஹி தி³ட்ட²த⁴ம்மிகம் ஸம்பராயிகஞ்ச யம்கிஞ்சி ஸங்க²தம் அபி⁴ஸங்க²ரோந்தாபி ஸுக²வேத³னத்தா²யஏவ அபி⁴ஸங்க²ரோந்தி. யதி³ச தாதி³ஸேன அபி⁴ஸங்க²ரணேன வினாபி யதி²ச்சி²தம் ஸுக²ம் லபே⁴ய்யும், தேஹி த⁴ம்மேஹி அத்தோ² நத்தீ²தி கோனாம தே த⁴ம்மே அபி⁴ஸங்க²ரிஸ்ஸதீதி.

இதி ஸுக²ஸஞ்ஞிதேஸு த⁴ம்மேஸு வேத³னானாம இமேஸம் ஸத்தானம் பரமுக்கம்ஸக³தம் ஸுக²ஸஞ்ஞிதட்டா²னம் ஹோதி. தஸ்மா ப⁴க³வா தம் விஸும் ஏகம் க²ந்த⁴ம் கத்வா க²ந்த⁴தே³ஸனம் தே³ஸேதீதி. ததா² இமேஸம் ஸத்தானம் அத்தஸஞ்ஞிதேஸு பதிஸரணேஸு ஸஞ்ஞாஸதி³ஸம் பதிஸரணம் நாம நத்தி². ததா² ஹி தஸ்மிம் தஸ்மிம் ஸத்தனிகாயே உப்பன்னா தே தே ஸத்தா அத்தானோ அத்தனோ விஸயேஸு ஸப்³ப³ம் ஜானிதப்³ப³ம் ஸஞ்ஞாய ஸஞ்ஜானித்வா விஞ்ஞுத்தம் ஆபஜ்ஜந்தி. ததா² விஞ்ஞுத்தம் ஆபஜ்ஜந்தா யத்தகம் பரே ஜானந்தி. தத்தகம் மயம்பி ஜானாம. கோ அம்ஹாகம் உத்தரிதரோதி ஏவம் லோகே ஞாணஸம்மப⁴ம் ஸஞ்ஞம் பரமம் அத்தானம் கத்வா விசரந்தி. இதி அத்தஸஞ்ஞிதேஸு த⁴ம்மேஸு ஸஞ்ஞானாம இமேஸம் ஸத்தானம் பரமுக்கம் ஸக³தம் அத்தஸஞ்ஞிதட்டா²னம் ஹோதி. தஸ்மா ப⁴க³வாதம்பி விஸும் ஏகம் க²ந்த⁴ம் கத்வா க²ந்த⁴தே³ஸனம் தே³ஸேதீதி. ததா² இமேஸம் ஸத்தானம் நிச்சஸஞ்ஞிதேஸு பதிஸரணேஸு சித்தஸதி³ஸம் பதிஸம்ரணம் நாம நத்தி². ததா² ஹி ஸத்தா ஸுக²ம் து³க்க²ம்னாம அனிச்சம் ஸுக²பத்தானம் து³க்க²ம் நத்தி². து³க்க² பத்தானம் ஸுக²ம் நத்தீ²திவா. ஸஞ்ஞானாம அனிச்சா, கதா³சி பமுஸ்ஸதி கதா³சி நபமுஸ்ஸதீதிவா. வீரியம்னாம அனிச்சம். கதா³சி ஆரப⁴தி, கதா³சி ந ஆரப⁴தீதிவா. லோபோ⁴னாம அனிச்சோ. கதா³சி உப்பஜ்ஜதி, கதா³சி நஉப்பஜ்ஜதீதிவா. தோ³ஸோனாம அனிச்சோ. கதா³சி உப்பஜ்ஜதி, கதா³சி ந உப்பஜ்ஜதீதிவா. ஸத்³தா⁴னாம அனிச்சா. கதா³சி பஸன்னசித்தோ ஹோதி, கதா³சி அப்பஸன்னசித்தோ ஹோதீதிவா. பஞ்ஞானாம அனிச்சா. ஜானிதப்³ப³ம்பி கதா³சி ஜானாதி, கதா³சி ந ஜானாதீதிவா ஏவம் சேதஸிகத⁴ம்மானம் அனிச்ச பா⁴வோனாம கேஸஞ்சி லோகியஜனானம்பி பாகடோ ஹோதி. ந பன சித்தஸ்ஸ. ந ஹி ஸத்தா சித்தம்னாம அனிச்சம். கதா³சி உப்பஜ்ஜதி, கதா³சி ந உப்பஜ்ஜதீதி க³ண்ஹந்தி. தம் பன ஸயம் நிச்சம் பவத்தமானம் ஹுத்வா கதா³சி ஸுகே²ன யுத்தம் ஹோதி, கதா³சி து³க்கே²னாதிஆதி³னா தஸ்மிம் நிச்சஸஞ்ஞமேவ உப்பாதே³ந்தீதி. இதி சித்தம்னாம நிச்சஸஞ்ஞிதேஸு த⁴ம்மேஸு பரமுக்கம் ஸக³தம் நிச்சஸஞ்ஞிதட்டா²னம் ஹோதி. தஸ்மா ப⁴க³வா தம்பி விஸும் ஏகம் க²ந்த⁴ம் கத்வா க²ந்த⁴தே³ஸனம் தே³ஸேதீதி.

[221] யம்பன விபா⁴வனியம்

‘‘பா⁴ஜன போ⁴ஜன ப்³யஞ்ஜன ப⁴த்தகாரக பு⁴ஞ்ஜக விகப்பவஸேன பஞ்சேவ வுத்தா’’தி வத்வா தம் விபா⁴வந்தேன ‘‘ரூபஞ்ஹி வேத³னா நிஸ்ஸயத்தா பா⁴ஜனட்டா²னியம். வேத³னா பு⁴ஞ்ஜிதப்³ப³த்தா போ⁴ஜனட்டா²னியா. ஸஞ்ஞா வேத³னஸ்ஸாத³ லாப⁴ ஹேதுத்தா ப்³யஞ்ஜனட்டா²னியா. ஸங்கா²ரா அபி⁴ஸங்க²ரணதோ ப⁴த்தகாரகட்டா²னியா. விஞ்ஞாணம் உபபு⁴ஞ்ஜகத்தா பு⁴ஞ்ஜகட்டா²னியம். ஏத்தாவதாச அதி⁴ப்பே தத்த²ஸித்³தீ⁴தி பஞ்சேவ வுத்தா’’தி வுத்தம். தம் ஸாரதோ நத³ட்ட²ப்³ப³ம்.

ந ஹி தம் அட்ட²கதா²யம் ஏதப்பரமவினிச்ச²யே ஆக³தம். உபமாதீ³பனேஏவ ஆக³தம். ந ச ப⁴க³வதா பா⁴ஜனாதி³விகப்பஸித்³தி⁴மத்தம் உத்³தி³ஸ்ஸ பஞ்சேவ க²ந்தா⁴ வுத்தாதி ஸக்கா வத்தும். ததா²ஸித்³த⁴ஸ்ஸ அத்த²ஸ்ஸ பயோஜனாபா⁴வதோதி.

[222] யஞ்ச தத்த²

‘‘தே³ஸனாக்கமேபி இத³மேவ காரணம். யத்த² பு⁴ஞ்ஜதி, யஞ்ச பு⁴ஞ்ஜதி, யேனச பு⁴ஞ்ஜதி, யோச போ⁴ஜகோ, யோச பு⁴ஞ்ஜிதா. தேஸம் அனுக்கமேன த³ஸ்ஸேதுகாமத்தா’’தி வுத்தம். தம்பி அஸாரம்.

சதுன்னம் உபாதா³னானம் விஸயபூ⁴தா க²ந்தா⁴ உபாதா³னக்க²ந்தா⁴. ஸப்³ப³ ஸபா⁴க³த⁴ம்ம பரியாதா³னவஸேன ஸாஸவா அனாஸவாச த⁴ம்மா பஞ்சக்க²ந்தா⁴தி வுத்தா, விபஸ்ஸனா பூ⁴மிபரிக்³க³ஹவஸேன ஸாஸவாஏவ பஞ்சுபாதா³னக்க²ந்தா⁴தி வுத்தா. ஆயதந்தி அத்தனோ ப²லுப்பத்தியா பு⁴ஸம் உஸ்ஸஹந்தா விய ஹோந்தீதி ஆயதனானி. ஆயதனஸத்³தோ³ பன ச²ஸு அஜ்ஜ²த்திகேஸு த்³வாரத⁴ம்மேஸு பவத்தமானோ ஸஞ்ஜாதிதே³ஸட்டே²ன நிவாஸட்டா²னட்டே²ன ஆகரட்டே²ன, ச²ஸு பா³ஹிரேஸு ஆரம்மணத⁴ம்மேஸு பவத்தமானோ ஸமோஸரணட்டே²ன, உப⁴யத்த²பி காரணட்டே²ன பவத்ததி. தத்த² சித்த சேதஸிகா த⁴ம்மா ஏகஸ்மிம்வா ப⁴வே அனமதக்³கே³வா ஸம்ஸாரே புனப்புனம் ஸஹ ஜாயமானா சக்கா²தீ³ஸு ச²ஸு த்³வாரபதே³ஸேஸுஏவ ஜாயந்தி, ந அஞ்ஞத்த². ஸந்தானானுப³ந்த⁴வஸேன நிவஸந்தாபி தேஸ்வேவ நிவஸந்தி, ந அஞ்ஞத்த². ஆகிரித்வா த²பிதா விய பவத்தமானாபி தேஸ்வேவ பவத்தந்தி, ந அஞ்ஞத்த². தஸ்மா சக்கா²தீ³னி ச²ஸஞ்ஜாதிதே³ஸட்டே²ன நிவாஸட்டா²னட்டே²ன ஆகரட்டே²னச ஆயதனானினாம. தே³வாயதனம் விய அதி⁴ட்டா²னட்டே²னாதிபி வத்தும் வட்டதியேவ.

யதா²ச ஸம்பன்னபுப்ப²ப²லேஸு கே²மேஸு ருக்கே²ஸு ததோ ததோ பக்கி²னோ நிலினத்தா²ய ஆஹாரத்தா²யச நிச்சம் ஸமோஸரந்தி. ஏவம் ரூபாதீ³ஸு ச²ஸுடா²னேஸு ததோ ததோ சித்தசேதஸிகா த⁴ம்மா ஆரம்மணகரணத்தா²ய நிச்சம் ஸமோஸரந்தி. தஸ்மா ரூபாதீ³னி ச² ஸமோஸரணட்டே²ன ஆயதனானினாம. தது³ப⁴யானி பன தேஸம் சித்த சேதஸிகானம் காரணட்டே²ன ஆயதனானினாம. சக்கு²ச தம் ஆயதனஞ்சாதி சக்கா²யதனம். ஏவம் ஸேஸானி. தத்த² சக்கு²ஸோதானி ஸத்தானம் ஹிதக்ரியாஸு ப³ஹுபகாரத்தா காமரூப ப்³யாபிதத்தா ச பாகடானீதிஆதி³ம்ஹி வுத்தானி. தேஹி ஆஸன்னத்தா தத³னந்தரம் கா⁴னம். ததோ ஜிவ்ஹாதி இமானி சத்தாரி பதே³ஸாயதனானினாம. ததோ ஸகலகாயப்³யாபகோ காயோ. ததோ தேஸம் ஸப்³பே³ஸம் கோ³சரவிஸயக்³கா³ஹகம் மனோதி. ஸேஸானி பன தேஸம் விஸயத்தா தத³னுக்கமேனேவ வுத்தானீதி.

கஸ்ஸசி பன புக்³க³லஸ்ஸவா ஸத்தஸ்ஸவா மனுஸ்ஸஸ்ஸவா தே³வஸ்ஸவா ப்³ரஹ்முனோவா வஸே அவத்தித்வா அத்தனோஏவ ஸபா⁴வம் தா⁴ரேந்தீதி தா⁴துயோ. விஸும் விஸும் வவத்தி²தஸபா⁴வத்தாவா யதா²ஸபா⁴வம் தா⁴ரீயந்தி ஸல்லக்கீ²யந்தி வவத்த²பீயந்தீதி தா⁴துயோ. அபிச, நிஸ்ஸத்த நிஜ்ஜீவட்டே²ன தா⁴துயோ. தத்த² நிஸ்ஸத்தட்டே²னாதி ஸத்தாகாரா பா⁴வட்டே²ன ஸத்தகிச்சாபா⁴வட்டே²ன. கோ பனேத்த² ஸத்தாகாரோ கிம் ஸத்தகிச்சந்தி. ஜீவயோகோ³ ஸத்தாகாரோ. ஈஹாச ப்³யாபாரோ ச ஸத்தகிச்சம். நிஜ்ஜீவட்டே²னாதி ஏகஸ்மிம் ப⁴வே யாவ நமரதி. ப⁴வபரம்பராயவா யாவ ஸம்ஸாரோ ந நிவத்ததி. தாவ அபி⁴ஜ்ஜமானோ அச்சி²ஜ்ஜமானோ ஏகோவ வத்ததீதி ஏவம் க³ஹிதஸ்ஸ ஜீவஸ்ஸ அபா⁴வட்டே²ன. சக்கா²த³யோச த⁴ம்மா ஸப்³ப³ஸோ ஸத்தாகாரரஹிதா ஸத்த கிச்சரஹிதாச ஹோந்தி. நச ஸயம் ஜீவானாம ஹோந்தி. நாபி ஜீவயோகா³தி. இதி நிஸ்ஸத்தட்டே²ன நிஜ்ஜீவட்டே²னசதேதா⁴துயோனாமாதி. தேஸம் பன த³ட்ட²ப்³பா³காரோ அட்ட²கதா²யம் வுத்தோ. யதா²ஹ-பே⁴ரிதலம் விய சக்கு²தா⁴து த³ட்ட²ப்³பா³. த³ண்டோ³ விய ரூபதா⁴து. ஸத்³தோ³விய சக்கு²விஞ்ஞாணதா⁴து. ததா² ஆதா³ஸதலம் விய சக்கு²தா⁴து. முக²ம் விய ரூபதா⁴து. முக²னிமித்தம் விய சக்கு²விஞ்ஞாணதா⁴து. அத²வா, உச்சு²யந்த கிலயந்தம் விய சக்கு²தா⁴து. யந்தசக்கயட்டி² விய ரூபதா⁴து. உச்சு²ரஸ தேலானி விய சக்கு²விஞ்ஞாணதா⁴து. ததா² அத⁴ராரணி விய சக்கு²தா⁴து. உத்தராரணி விய ரூபதா⁴து. அக்³கி³ விய சக்கு²விஞ்ஞாணதா⁴து. ஏஸனயோ ஸோதவிஞ்ஞாணதா⁴துஆதீ³ஸு. மனோதா⁴து பன யதா²ஸம்ப⁴வதோ சக்கு²விஞ்ஞாணதா⁴துஆதீ³னம் புரேசரானுசரா விய த³ட்ட²ப்³பா³.

த⁴ம்மதா⁴துயா வேத³னாக்க²ந்தோ⁴ ஸல்லமிவ ஸூலமிவச த³ட்ட²ப்³போ³. ஸஞ்ஞா ஸங்கா²ரக்க²ந்தா⁴ வேத³னாஸல்ல ஸூலயோகா³ ஆதுரா விய த³ட்ட²ப்³பா³. புது²ஜ்ஜனானம்வா ஸஞ்ஞா ஆஸா து³க்க²ஜனனதோ ரித்தமுட்டி² விய அயதா²பு⁴ச்சனிமித்தகா³ஹதோ வனமிகோ³விய. ஸங்கா²ரா படிஸந்தி⁴யம் பக்கி²பனதோ அங்கா³ரகாஸுயம் கி²பனபுரிஸா விய. ஜாதிது³க்கா²னுப³ந்த⁴தோ ராஜபுரிஸானுப³ந்த⁴சோரோ விய. ஸப்³பா³னத்தா²வஹஸ்ஸ க²ந்த⁴ஸந்தானஸ்ஸ ஹேதுதோ விஸருக்க²பீ³ஜானி விய. ரூபம் நானாவிது⁴பத்³த³வனிமித்ததோ கு²ர சக்கம்விய த³ட்ட²ப்³ப³ம். அஸங்க²தாபிதா⁴து அமததோ ஸந்ததோ கே²மதோ ச த³ட்ட²ப்³பா³. கஸ்மா, ஸப்³பா³னத்த²படிபக்க²பூ⁴தத்தா. மனோவிஞ்ஞாணதா⁴து க³ஹிதாரம்மணம் முஞ்சித்வாபி அஞ்ஞம் க³ஹேத்வா பவத்தனதோ வனமக்கடோ விய, து³த்³த³மனதோ அஸ்ஸக²லுங்கோ³ விய, யத்த² காமனிபாதிதோ வேஹாஸம் கி²த்தத³ண்டோ³ விய, லோப⁴தோ³ஸாதி³ நானாப்பகார கிலேஸயோக³தோ ரங்க³னடோ விய த³ட்ட²ப்³பா³தி. அரியஸச்சானீதி ஏத்த² ஸந்தஸ்ஸ த⁴ம்மஸ்ஸ பா⁴வோ ஸச்சம். ஸந்தஸ்ஸாதி பூ⁴தஸ்ஸ தத²ஸ்ஸ அவிபரீதஸ்ஸ. அபிச, கேனட்டே²ன ஸச்சந்தி. தத²ட்டே²ன அவிதத²ட்டே²ன அனஞ்ஞத²ட்டே²ன. யஞ்ஹி சக்கு²ஸ்ஸ து³க்க²த்தம், தம் தத²ம் ஹோதி அவிதத²ம் அனஞ்ஞத²ம். து³க்க²து³க்க² ஸங்கா²ரது³க்க² விபரிணாமது³க்க² ஸங்கா²தேஹி தீஹி து³க்கே²ஹி தம் ஸமங்கி³புக்³க³லஸ்ஸ அபி⁴ண்ஹபீளனதோ. தத்த² ஸங்கா²ரது³க்க²ம் நாம கம்மஜானம் உப்பத்தியா பகே³வ தம்தம்கம்மா பி⁴ஸங்க²ரணது³க்க²ம். ததா² உதுஜாதீ³னம் உப்பத்தியா பகே³வ தம்தம் உதுசித்தாஹாரானம் அபி⁴ஸங்க²ரணது³க்க²ம்.

சக்கு² ஹி நாம ரூபிப்³ரஹ்மானம்பி புரிமப⁴வே ஜா²னபா⁴வனா ஸங்கா²தம் மஹந்தம் கம்மாபி⁴ஸங்க²ரண து³க்க²ம் அனுப⁴வந்தானம்யேவ உப்பஜ்ஜதி. நோ அஞ்ஞதா². காமஸத்தானம் பன புரிமப⁴வே கம்மஸங்கா²ரது³க்க²ம் அனுப⁴வித்வா உப்பன்னம்பி யாவஜீவம் பவத்தியா ஆஹாராதி³ஸங்கா²ரது³க்க²ஞ்ச படிஜக்³க³ன து³க்க²ஞ்ச அனுப⁴வந்தானஞ்ஞேவ பவத்ததி, நோ அஞ்ஞதா². பவத்தமானஞ்ச பச்சயவேகல்லேவா ஜாதே அந்தராயேவா ஆக³தே யதா³கதா³சி பி⁴ஜ்ஜதி. மரணகாலம் பத்வா பன ஏகந்தேன பி⁴ஜ்ஜதியேவ. தஸ்மா தம் அஸ்ஸாதே³த்வா தத³த்தா²ய கம்மம்வா ஆஹாராதி³பச்சயம்வா படிஜக்³க³னம் வா ஸங்க²ரோந்தானம் அனமதக்³கே³ ஸம்ஸாரே ஸங்கா²ரது³க்க²ஸ்ஸ பரியந்தோனாம நத்தி². இதி ஸப்³ப³ம் சக்கு² அபரியந்தேன ஸங்கா²ரது³க்கே²ன புக்³க³லம் அபி⁴ண்ஹம் பீளேதியேவ. இத³மஸ்ஸ ஸங்கா²ரது³க்க²ம். இத³ம் சக்கு² நாம பச்சயவேகல்லேவா ஜாதே அந்தராயேவா ஆக³தே யதா³ கதா³சி பி⁴ஜ்ஜனஜாதிகம். தஸ்மா தஸ்ஸ பி⁴ஜ்ஜனப⁴யேன பகே³வ பச்சய ஸம்பாத³னது³க்க²ம் ரக்கா²வரணகு³த்திஸம்விதா⁴னது³க்க²ம் பி⁴ஜ்ஜனனிமித்தானி தி³ஸ்வா வா பி⁴ஜ்ஜமானேவா பி⁴ன்னேவா ஸோசனபரிதே³வனாதி³து³க்க²ஞ்ச விபரிணாம து³க்க²ம்னாம. இதி ஸப்³ப³ம் சக்கு² அபரியந்தேன விபரிணாமது³க்கே²ன புக்³க³லம் அபி⁴ண்ஹம் பீளேதியேவ. இத³மஸ்ஸ விபரிணாமது³க்க²ம். து³க்க²து³க்க²ம் பன தது³ப⁴யேன து³க்கே²ன ஸஹேவ ஸிஜ்ஜ²தி. ஏவம் சக்கு² து³க்க²து³க்க² ஸங்கா²ர து³க்க² விபரிணாம து³க்க²ஸங்கா²தேஹி தீஹி து³க்கே²ஹி தம் ஸமங்கி³புக்³க³லம் அபி⁴ண்ஹம் பீளேதியேவ. யஞ்ச தஸ்ஸ ததா²பீளனம், தம் தத²ம் ஹோதி, அவிதத²ம், அனஞ்ஞத²ம். தஸ்மா சக்கு² து³க்க²ஸச்சம்னாம. ஏஸ நயோ ஸோதாதீ³ஸு தேபூ⁴மகத⁴ம்மேஸு.

ஸேஸஸச்சேஸுபி யம் லோப⁴ஸ்ஸேவ து³க்க²ஸமுத³யத்தம். யம் நிப்³பா³னஸ்ஸேவ து³க்க²னிரோத⁴த்தம். யம் அட்ட²ங்கி³கமக்³க³ஸ்ஸேவ து³க்க²னிரோத⁴மக்³க³த்தம் தம் கத²ம் ஹோதீதிஆதி³னா வத்தப்³ப³ம். யாவச லோபோ⁴ ந பஹிய்யதி. தாவ சக்கா²தீ³னி அஸ்ஸாதே³தியேவ. யாவச தானி அஸ்ஸாதே³தி. தாவ தேஸம் பவத்தியா கம்மாதீ³னி ஸங்க²ரோந்தியேவ. யாவச கம்மாதீ³னி ஸங்க²ரோந்தி. தாவ சக்கா²தீ³னி பவத்தந்தியேவ. யாவசதானி பவத்தந்தி. தாவ தேஸம் வுத்தப்பகாரேஹி ஸங்கா²ர து³க்கா²தீ³ஹி நமுச்சதியேவ. தஸ்மா லோப⁴ஸ்ஸ து³க்க²ஸமுத³யத்தம் தத²ம் ஹோதி. சக்கா²தீ³ஸுச பவத்தமானேஸு வுத்தப்பகாரம் ஸப்³ப³ம் து³க்க²ம் ஆக³ச்ச²தியேவ. அபவத்தமானேஸு நாக³ச்ச²தி. தஸ்மா தேஸம் பவத்தினிரோத⁴பூ⁴தஸ்ஸ நிப்³பா³னஸ்ஸேவ து³க்க²னிரோத⁴த்தம் தத²ம் ஹோதி. ததா² லோப⁴பஹானதோ அஞ்ஞோ து³க்க²முத்திமக்³கோ³னாம நத்தி². அட்ட²ங்கி³கமக்³கோ³ச உப்பஜ்ஜ மானோ ஏகந்தேன தம் பஜஹதி. தஸ்மா அட்ட²ங்கி³கமக்³க³ஸ்ஸேவ து³க்க²னிரோத⁴மக்³க³த்தம் தத²ம் ஹோதி, அவிதத²ம், அனஞ்ஞத²ந்தி.

ஏவம்ஸந்தேபி ஸச்சஸத்³தோ³ பரியாய ஸச்சேஸுபி வத்ததீதி வுத்தம் சத்தாரிஅரியஸச்சானீதி. தத்த² து³க்க²ஸச்சே தாவ ஸக்காயபரியா பன்னா அஜ்ஜ²த்தத⁴ம்மாஏவ அரியஸச்சம்னாம. தேயேவ ஹி அஸ்மிமானஸ்ஸ அதி⁴ட்டா²னபூ⁴தா ஹுத்வா யாவதம் மானம் ந ஸமூஹனதி. தாவ து³க்க²கிச்சம் கரோந்தி. து³க்க²பரிஞ்ஞாசனாம யாவதே³வ அஸ்மிமானஸமுக்³கா⁴தாய ஹோதி. அஸ்மிமானோச தேஸ்வேவ அஜ்ஜ²த்தத⁴ம்மேஸு நிவிஸதீதி தேஸு பரிஞ்ஞாதேஸு பரிஞ்ஞாகிச்சம் ஸித்³த⁴மேவ ஹோதீதி. தப்³பி³பரீ தேன பன அனிந்த்³ரிய ப³த்³த⁴த⁴ம்மா மக்³க³ப²லத⁴ம்மாச அட்ட²ங்கி³கவஜ்ஜா உத³யப்³ப³ய பீளனதோ ஸங்கா²ரது³க்க²விபரிணாமது³க்கே²ஹிச அபரிமுத்தத்தா து³க்க²ஸச்சம் நாம. ஸமுத³யஸச்சே ஏகோ லோபோ⁴யேவ அரியஸச்சம்னாம. ஸோஹி அத்தஸமங்கி³னோ ஸத்தே அத்தனிச ஆரம்மணத⁴ம்மேஸுச அஸ்ஸாத³ம் ஜனயித்வா நிச்சம் வட்டது³க்க²தோ அனுக்கண்ட²மானே கரோதீதி தேஸம் லோப⁴ஸதி³ஸோ அஞ்ஞோ ஞாதிவா மித்தோவா ஸஹாயோவா அத்தாவா அத்தனியம்வா நத்தி²விய கா²யதி. தஸ்மா தம்ஸதி³ஸோ அஞ்ஞோ கோசி வட்டது³க்க²ஸம்விதா⁴யகோனாம நத்தி². தஞ்ச பஜஹிதும் ஸக்கோந்தஸ்ஸ அஞ்ஞோ து³ஜ்ஜஹோனாம நத்தி². அவஸேஸாபன ஸப்³பே³பி ஸாஸவா குஸலாகுஸலத⁴ம்மா ஸமுத³யஸச்சம்னாம.

ஏத்த² ஸியா, நனு அவிஜ்ஜாபி ஸப்³ப³ஸ்ஸ வட்டது³க்க²ஸ்ஸ மூலபா⁴வேன வுத்தாதி ஸாபி ஸமுத³யே அரியஸச்சேஏவ வத்தப்³பா³தி. வுச்சதே, யதா²ஹி ஏகோ சே²கோ உய்யானபாலோ ஸம்பத்தியுத்தம் பூ⁴மி பா⁴க³ம் லபி⁴த்வா அத்தனோ ஞாணப³லேன பூ⁴மிபா⁴க³ஞ்ச நானாபீ³ஜானிச அபி⁴ஸங்க²ரித்வா நந்த³னஸதி³ஸம் உய்யானம் மாபேஸி. தத்த² பூ⁴மி உய்யான பாலஸ்ஸ பீ³ஜானம் ருக்கா²னஞ்ச பதிட்டா²னகிச்சம் ஸாதே⁴தி. பீ³ஜானிச அங்குருப்பாத³னகிச்சம் ஸாதே⁴ந்தி, உய்யானபாலோயேவ பன ஸப்³ப³கிச்சானி ஸாதே⁴தி. ஸோ ஹி பூ⁴மியம் பீ³ஜேஸு ருக்கே²ஸுச யம்யம் கத்தப்³ப³ம் ஹோதி. தம் ஸப்³ப³ம் கரோதி. மமேதந்தி பரிக்³க³ண்ஹாதி ரக்க²தி. ததோ உப்பன்னே போ⁴கே³ பு⁴ஞ்ஜதி. தஸ்மா கோ இத³ம் மாபேஸி, கஸ்ஸேத³ம் உய்யானந்தி வுத்தே உய்யானபாலோயேவ மாபேஸி. தஸ்ஸேத³ம் உய்யானம் இச்சேவ வுச்சதி. ந பூ⁴மிம் மாபேஸி. பீ³ஜானி மாபேந்தி. தேஸம் இத³ம் உய்யானந்தி வுச்சதி. கா பன உய்யானஸம்பத்தியா பச்சயபரம்பராதி வுத்தே பன பூ⁴மிஏவ ஆதி³தோ வத்தப்³பா³. ந உய்யானபாலோ. நச பீ³ஜானீதி. ஏவம் ஸம்பத³மித³ம் த³ட்ட²ப்³ப³ம். படிச்சஸமுப்பாத³ நயஞ்ஹி பத்வா பச்சயபரம் பரவஸேன து³க்க² த⁴ம்மானம் பவத்தி நிவத்திவிதா⁴னே அவிஜ்ஜாஏவ ஆதி³ பப⁴வபதா⁴னபூ⁴தா ஹோதி, ந தண்ஹா. ஸச்சதே³ஸனாயம் பன தேஸம் நிப்³ப³த்தகத⁴ம்மவிதா⁴னே தண்ஹாஏவ ஸாமிஜேட்ட²க பதா⁴னபூ⁴தா ஹோதி. ந அவிஜ்ஜாதி நத்தி² ஸமுத³யாரியஸச்சபா⁴வே அவிஜ்ஜாய ஓகாஸோதி த³ட்ட²ப்³போ³. கிலேஸானம் தத³ங்க³னிரோத⁴விக்க²ம்ப⁴ன நிரோதா⁴ நிரோத⁴ஸச்சம்னாம. நிப்³பா³னம் நிரோதா⁴ரியஸச்சம்னாம. ச²ஸு லோகியவிஸுத்³தீ⁴ஸு மக்³க³ங்கா³னி மக்³க³ஸச்சம் நாம. அட்ட²ங்கி³கோ லோகுத்தரமக்³கோ³ஏவ மக்³க³அரியஸச்சம்னாமாதி.

அரியஸத்³தோ³ சேத்த² கத்த²சி கதா³சி கேஸஞ்சி குதோசி கத²ஞ்சி அவிதத²பா⁴வேன உத்தமத்த²வாசகோதி. விபா⁴வனியம் பன அட்ட²கதா²யம் வுத்தனயேன ஸச்சஸத்³த³ஸ்ஸ அத்தோ² விபா⁴விதோ து³க்க²ம்அரிய ஸச்சந்தி ஏத்த² பீளனட்டோ², ஸங்க²தட்டோ², ஸந்தாபட்டோ², விபரிணாமட்டோ²தி இமேஹி சதூஹி அத்தே²ஹி சக்கா²தி³கஸ்ஸ ஏகேகஸ்ஸ தேபூ⁴மகத⁴ம்மஸ்ஸ து³க்க²ஸச்சதா வேதி³தப்³பா³. தத்த² ஸங்க²தட்ட² விபரிணாமட்டா² புப்³பே³ ஸங்கா²ர து³க்க²விபரிணாமது³க்கே²ஸு வுத்தனயாஏவ. பத³த்த²தோபன பச்சயேஹி ஸங்க²ரீயதீதி ஸங்க²தோ. பகே³வ கம்மாதி³பச்சயாபி⁴ஸங்க²ரணது³க்கே²ன வினா ந உப்பஜ்ஜதி, நபவத்ததீதி வுத்தம் ஹோதி. விரூபோ ஹுத்வா பரிணாமோ விபரிணாமோ. பரிஹானிசேவ பரிபே⁴தோ³ச. பீளனட்டோ²தி ஏத்த² பீளிதப்³ப³ந்தி பீளனம். பீளேதீதி பீளனம். பீளீயதே பீளனம். அத்தோ²தி ஸபா⁴வோ. பீளனம் அத்தோ² யஸ்ஸாதி விக்³க³ஹோ. தத்த² யதா² ஏகிஸ்ஸா து³க்³க³தித்தி²யா குச்சி²ம்ஹி புத்தோ உப்பஜ்ஜதி. ஸோச நானாரோகே³ஹி ஸயம் நிச்சம் பீளிதோ ஹுத்வா படிஜக்³க³னது³க்கே²ஹி மாதரஞ்ச நிச்சம் பீளேதியேவ. யஞ்ச தஸ்ஸா குச்சி²ம்ஹி தாதி³ஸஸ்ஸ புத்தஸ்ஸ உப்பஜ்ஜனம், தஞ்ச தஸ்ஸா இத்தி²யா பீளனகிச்சமேவ ஹோதி. ஏவமேவம் யே சக்கா²த³யோ த⁴ம்மா ஜராமரணேஹி நிச்சம் பீளீயந்தி, தே படிஜக்³க³னது³க்கே²ஹி தம் ஸமங்கீ³னம் புக்³க³லம் நிச்சம் பீளேந்தியேவ. யஞ்ச தஸ்ஸ ஸந்தானே தேஸம் உப்பஜ்ஜனம், தஞ்ச தஸ்ஸ பீளனகிச்சமேவாதி. யதா²ஹயோ பி⁴க்க²வே சக்கு²ஸ்ஸ உப்பாதோ³ டி²தி அபி⁴னிப்³ப³த்தி பாதுபா⁴வோ. து³க்க²ஸ்ஸேஸோ உப்பாதோ³. ரோகா³னம் டி²தி ஜராமரணஸ்ஸ பாதுபா⁴வோ. யோ பி⁴க்க²வே ஸோதஸ்ஸ கா⁴னஸ்ஸ ஜிவ்ஹாய காயஸ்ஸ மனஸ்ஸ உப்பாதோ³திஆதி³.

ஸந்தாபட்டோ²தி ராக³க்³கி³ஆதீ³ஹி ஏகாத³ஸஹி அக்³கீ³ஹி பு⁴ஸம் பரித³ய்ஹனட்டோ². யதா²ஹ –

சக்கு²ம் ஆதி³த்தம். கேன ஆதி³த்தம். ராக³க்³கி³னா ஆதி³த்தம். தோ³ஸக்³கி³னா. மோஹக்³கி³னா. ஜாதியா. ஜராய. மரணேன. ஸோகேன. பரிதே³வேன. து³க்கே²ன. தோ³மனஸ்ஸேன. உபாயாஸேன ஆதி³த்தந்தி வதா³மி. ஸோதம் ஆதி³த்தம். கா⁴னம் ஆதி³த்தம். ஜிவ்ஹா ஆதி³த்தா. காயோ ஆதி³த்தோ. மனோ ஆதி³த்தோதி.

ஆதி³பனம் ஸந்தாபனம் பரித³ய்ஹனந்தி இத⁴ அத்த²தோ ஏகந்தி. ஏத்த² ஸியா, அரியமக்³கோ³பி சிரகாலம் பாரமிதாபி⁴ஸங்க²ரணது³க்கே²ன அந்திமப⁴வேச ஸீலாதி³விஸுத்³தி⁴பா⁴வனாபி⁴ஸங்க²ரணது³க்கே²ன புக்³க³லம் ஸுஸம் பீளேதியேவ. ததா² விபரிணாமத⁴ம்மோச. தஸ்மா ஸோபி பிளனாதி³அத்தே²ன து³க்க²ஸச்சஸங்க³ஹோ ஸியாதி.ந. ஸப்³ப³து³க்க²ஸந்தி வம்ஹத்தா. ஸோ ஹி வுத்தப்பகாரம் அபி⁴ஸங்க²ரணது³க்க²ம் பரிபுண்ணம் அனுபூ⁴தஸ்ஸ புக்³க³லஸ்ஸ ஸகிம் உப்பஜ்ஜமானோ ஸப்³ப³ம் கிலேஸஜாதம் கே²பேந்தோ உப்பஜ்ஜதி. நிருஜ்ஜ²மானோச ஸப்³ப³ம் ஆயதிம் அனமதக்³கே³ ஸம்ஸாரே வட்டது³க்க²ம் வூபஸமேந்தோ நிருஜ்ஜ²தி. வூபஸந்தம்ச அனாக³த து³க்க²ம் உபாதா³ய வுத்தப்பகாரம் அபி⁴ஸங்க²ரணது³க்க²ம் க³ணனுபக³ம் நஹோதி. பி⁴ஜ்ஜந்தோச அனுத்தரம் விமுத்திஸுக²ம் த³த்வாவ பி⁴ஜ்ஜதி. தஸ்மா தஸ்ஸ விபரிணாமபச்சயாபி புக்³க³லஸ்ஸ காசி ஹானினாம நத்தீ²தி ந ஸோ து³க்க²ஸச்சஸங்க³ஹோதி. லோகியத⁴ம்மா பன உப்பஜ்ஜமானா பவத்த மானாச புப்³பே³ வுத்தபகாரேஹி ஸங்கா²ரது³க்கே²ஹி பு⁴ஸம் பீளேத்வா ஏவ உப்பஜ்ஜந்தி பவத்தந்திச. நிருஜ்ஜ²மானா மஹந்தம் பரிளாஹது³க்க²ம் ஜனேத்வா அபரியந்தே கு²ரசக்கஸதி³ஸே வட்டது³க்க²யந்தே புக்³க³லம் யோஜேந்தாவ நிருஜ்ஜ²ந்தி. தஸ்மா தேஏவ பீளனாதி³அத்தே²ஹி ஏகந்தது³க்கா² ஹோந்தீதி. ஏதேன நிப்³பா³னஸ்ஸபி ஸம்பாபகபச்சயாபி⁴ஸங்க²ரணலேஸம் க³ஹேத்வா து³க்க²ஸச்சத்தபஸங்கோ³ நிவத்திதோ ஹோதீதி.

து³க்க²ஸமுத³யோ அரியஸச்சந்தி ஏத்த² ப⁴வாப⁴வஸங்கா²தம் து³க்க²க்க²ந்த⁴ம் ஸமுதே³தி. புனப்புனம் அப்³போ³ச்சி²ன்னம் கத்வா உத³யதி உட்டா²பேதி வட்³டே⁴திவாதி து³க்க²ஸமுத³யோ, ஆயூஹனட்டோ², நிதா³னட்டோ², ஸம்யோக³ட்டோ², பலிபோ³த⁴ட்டோ²தி சதூஹி அத்தே²ஹி லோப⁴ஸ்ஸ து³க்க²ஸமுத³யதா வேதி³தப்³பா³. தத்த² ஆயூஹனட்டோ²தி ப⁴வாப⁴வ ஸங்கா²தஸ்ஸ ஏகேகஸ்மிம் ப⁴வேபி வத்து²காமபடிஸம்யுத்தஸ்ஸ து³க்க²க்க²ந்த⁴ஸ்ஸ பி⁴ய்யோ பரிப்³யூஹனட்டோ² ராஸிகரணட்டோ² நிதா³னட்டோ²தி ததே³வ நிரந்தரம் கத்வா அனுப்பதா³னட்டோ² நிய்யாதனட்டோ²தி வுத்தம் ஹோதி. ஸம்யோக³ட்டோ²தி து³க்க²க்க²ந்த⁴ஸ்மிம்ஏவ த³ள்ஹம் ப³ந்த⁴னட்டோ². பலிபோ³த⁴ட்டோ²தி ததோ தஸ்ஸ தஸ்ஸ முச்சனுபாயஸ்ஸ நீவாரண வஸேன பலிபு³ந்த⁴னட்டோ² உபருந்த⁴னட்டோ²தி அத்தோ². து³க்க²னிரோதோ⁴ அரியஸச்சந்தி ஏத்த² வட்டது³க்க²ஸ்ஸ நிருஜ்ஜ²னம் அனுப்பாத³ த⁴ம்மதாபத்தி வஸேன கி²ய்யானம் து³க்க²னிரோதோ⁴. து³க்க²ம் வா நிருஜ்ஜ²தி நபவத்ததி ஏதஸ்மிந்தி து³க்க²னிரோதோ⁴. நிஸ்ஸரணட்டோ² விவேகட்டோ², அஸங்க²தட்டோ², அமதட்டோ²தி சதூஹி அத்தே²ஹி நிப்³பா³னஸ்ஸ து³க்க²னிரோத⁴தா வேதி³தப்³பா³. தத்த² நிஸ்ஸரணட்டோ²தி நிஸ்ஸரண விமுத்தியா விமுச்சனட்டோ². விவேகட்டோ²தி வட்டது³க்க²பலிபோ³த⁴தோ விவிச்சனட்டோ². அஸங்க²தட்டோ²தி ஸங்கா²ரது³க்க²ஸ்ஸ அபா⁴வட்டோ². அமதட்டோ²தி மரணது³க்க²ஸ்ஸ அபா⁴வட்டோ²தி.

து³க்க²னிரோத⁴கா³மினிபடிபதா³தி ஏத்த² து³க்க²னிரோத⁴ம் க³மேதி ஸம்பாபேதீதி து³க்க²னிரோத⁴கா³மினீ. அத்தனோ ஸந்தானே படிலாப⁴கரண வஸேன படிபஜ்ஜிதப்³பா³தி படிபதா³. து³க்க²னிரோத⁴கா³மினீச ஸா படிபதா³ சாதி விக்³க³ஹோ. நிய்யானட்டோ², ஹேத்வட்டோ², த³ஸ்ஸனட்டோ², அதி⁴பதேய்யட்டோ²தி சதூஹி அத்தே²ஹி அட்ட²ங்கி³கமக்³க³ஸ்ஸ து³க்க²னிரோத⁴மக்³க³தா வேதி³தப்³பா³. தத்த² நிய்யானட்டோ²தி அவிஜ்ஜாபச்சயா ஸங்கா²ராதிஆதி³கம் வட்டஸோதம் படினிவத்தேத்வா அவிஜ்ஜானிரோதா⁴ ஸங்கா²ரனிரோதோ⁴திஆதி³கம் வட்டபடிஸோதம் அபி⁴முக²ம் நிக்³க³மனட்டோ². ஹேத்வட்டோ²தி ஸப்³பே³ஸம் அரியகு³ணானம் ஸுப்பதிட்டி²தபா⁴வ ஸாத⁴னட்டோ². த³ஸ்ஸனட்டோ²தி அஞ்ஞாணஅத³ஸ்ஸனஸங்கா²தஸ்ஸ ஸம்மோஹஸ்ஸ பஹான வஸேன சதுஸச்சத⁴ம்மஸ்ஸ படிவிஜ்ஜ²னட்டோ². அதி⁴பதேய்யட்டோ²தி தண்ஹா தா³ஸப்³யவிமுத்தியா பூ⁴ஜிஸ்ஸபா⁴வபத்திவஸேன ஸயமேவ அத்தனோ அதி⁴பதி ஹுத்வா விரோசனட்டோ². லோகியமக்³கா³ ஹி தண்ஹாய ஆரம்மணபா⁴வே டி²தா தண்ஹாதா³ஸப்³யம் நாதிவத்தந்தீதி. ஏத்த²ச இமே ஸத்தானாம ஏகந்தேன து³க்க²படிகூலா ஹோந்தி து³க்க²பீ⁴ருகா. யேச அத்தனி து³க்க²ம் ஜனேந்தி. தேஸு வேரிஸஞ்ஞம் உப்பாதே³ந்தி. அத்தனோ பன ஏகந்தது³க்க²ம்வா ஏகந்தது³க்க²ஜனகம்வா தே நஜானந்தி. தஸ்மா தே அத்தனோ து³க்க²முத்தியா யம் யம் கம்மம் ஆயூஹந்தி. தம் தம் அத்தனோ து³க்க²வட்³டி⁴யாஏவ ஸம்பஜ்ஜதி. கிம் பன ஏகந்தது³க்க²ம், கிம்ச ஏகந்த து³க்க²ஜனகந்தி. அதீதானாக³தபச்சுப்பன்னபூ⁴தா அத்தனோ அத்தனோ அத்தஹாவபரியாபன்னா தேபூ⁴மகத⁴ம்மாஏவ அத்தனோ அத்தனோ ஏகந்தது³க்கா²னாம. கஸ்மா, தேஹி முத்தேஏவ ஸப்³ப³து³க்கே²ஹி முச்சனதோ, அமுத்தேச அமுச்சனதோதி. அத்தனோ தண்ஹாஏவ அத்தனோ ஏகந்தது³க்க²ஜனகம்னாம. கஸ்மா, தாய பஹீனாயஏவ ஏகந்த து³க்கே²ஹி முச்சனதோ, அபஹீனாயச அமுச்சனதோதி.

ததா² இமே ஸத்தா ஏகந்தேன ஸுக²காமா ஹோந்தி ஸுகா²பி⁴னந்தி³னோ. யேச அத்தனி ஸுக²ம் ஜனேந்தி. தேஸு பியமித்தஸஞ்ஞம் உப்பாதே³ந்தி. அத்தனோபன ஏகந்தஸுக²ம்வா ஏகந்தஸுக²மக்³க³ம்வாதே நஜானந்தி. தஸ்மா தே அத்தனோ ஸுக²வட்³டி⁴யா யம் யம் கம்மம் ஆயூஹந்தி. தம் தம் அத்தனோ து³க்க²வட்³டி⁴யாஏவ ஸம்பஜ்ஜதி. கிம் பன ஏகந்தஸுக²ம் கோச ஏகந்த ஸுக²மக்³கோ³தி. ஏகந்தது³க்க²த⁴ம்மஸ்ஸ அபா⁴வோஏவ அத்தனோ ஏகந்த ஸுக²ம்னாம. ஏகந்தது³க்க²ஜனகஸ்ஸ பஹானமக்³கோ³ஏவ அத்தனோ ஏகந்த ஸுக²மக்³கோ³னாமாதி இமமத்த²ம் த³ஸ்ஸேந்தோ இமானி சதுஸச்சபதா³னி கதே²ஸீதி வேதி³தப்³ப³ம்.

[223] யம் பன விபா⁴வனியம்

‘‘து³க்க²ஸ்ஸ அனுப்பாத³னிரோதோ⁴ ஏத்த² ஏதேனாதிவா து³க்க²னிரோதோ⁴’’தி வுத்தம். தத்த² ஏதேனாதி இத³ம் நயுஜ்ஜதி.

ந ஹி நிப்³பா³னம் து³க்க²ஸ்ஸ அனுப்பாத³னிரோத⁴ க்ரியாஸாத⁴னே து³க்கே²ன ஸஹகாரீ காரணம் ஹோதீதி. ஸேஸசேதஸிகாதி வேத³னா ஸஞ்ஞாஹி ஸேஸா பஞ்ஞாஸ சேதஸிகா. அதீதாதி³வஸேன திவித⁴ பி⁴ன்னானம் அஜ்ஜ²த்தாதி³ ஓளாரிகாதி³ ஹீனாதி³ தூ³ராதி³வஸேன து³வித⁴பி⁴ன்னானஞ்ச த⁴ம்மானம் ராஸட்டே²ன க²ந்த⁴வோஹாரோ ஹோதி. நிப்³பா³னஸ்ஸ பன தாதி³ ஸோ பே⁴தோ³ நத்தீ²தி வுத்தம் பே⁴தா³பா⁴வேனாதிஆதி³. தஞ்ஹி அதீதாதி³கே திவித⁴பே⁴தே³ ஏகம்பி ந ஹோதி. கஸ்மா. அனித்³தி³ஸிதப்³ப³ த⁴ம்மத்தா. தஞ்ஹி தேகாலிகத⁴ம்மானம் க²யவிராக³னிரோத⁴பூ⁴தோ அனிமித்த த⁴ம்மோயேவ ஹோதி. தஸ்மா இத³ம் அதீதே அஸுகபு³த்³த⁴காலே நிப்³பா³னம். இத³ம் அனாக³தே. இத³ம் ஏதரஹீதி ஏவம் காலபே⁴தே³ன நித்³தி³ஸிதப்³ப³ம் நஹோதி. ததா² தி³ஸா தே³ஸடா²னபே⁴தே³ன பரினிப்³பு³தபுக்³க³லபே⁴தே³ன ச. கேவலம் பன அனமதக்³கே³ ஸம்ஸாரவட்டே யத்தகானி அனத்த² பதா³னி தி³ஸ்ஸந்தி. தப்படிபக்க²ஸித்³தே⁴ஹி கு³ணபதே³ஹிஏவ தம் கதே² தப்³ப³ந்தி. து³கேஸு பன அஜ்ஜ²த்தது³கம் பத்வா தம் ப³ஹித்³தா⁴ஏவ ஹோதி. ந அஜ்ஜ²த்தம். ஓளாரிகது³கம் பத்வா ஸுகு²மமேவ ஹோதி, ந ஓளாரிகம். ஹீனது³கம் பத்வா பணீதமேவ ஹோதி, ந ஹீனம். தூ³ரே து³கம் பத்வா தூ³ரேஏவ ஹோதி, ந ஸந்திகேதி. க²ந்த⁴ஸங்க³ஹனிஸ்ஸடந்தி க²ந்த⁴ஸங்க³ஹதோ விமுத்தம்.

த்³வாராலம்ப³ணபே⁴தே³னாதி த்³வாரச²க்க ஆரம்மணச²க்கானம் பே⁴தே³ன. ஆயதனானி த்³வாத³ஸ ப⁴வந்தீதி யோஜனா. ஏத்த²ச த்³வாரச²க்கம் த⁴ம்மாரம்மணம்ஏவாதி ஸேஸத⁴ம்மாலம்ப³ணம் ஸந்தா⁴ய ஆரம்மணச²க்கம் வுத்தந்தி த³ட்ட²ப்³ப³ம். த்³வாரா.ல. பரியாயேனாதி ச²ன்னம் த்³வாரானம் ச²ன்னம் ஆலம்ப³ணானம் தேஸு த்³வாராலம்ப³ணேஸு உப்பன்னானம் விஞ்ஞாணானஞ்ச கமேன தா⁴துயோ அட்டா²ரஸ ப⁴வந்தீதி யோஜனா. ஏத்த²பி த்³வாரச²க்கே மனோத்³வாரம் விஞ்ஞாணேகதே³ஸமேவ ஹோதி. த்³வாரச²க்கம் விஞ்ஞாணஸத்தகஞ்ச த⁴ம்மா லம்ப³ணேகதே³ஸமேவாதி. மக்³கோ³ லோகுத்தரோ மக்³கோ³னாம மதோதி யோஜனா. மக்³க³யுத்தா ஏகூனதிம்ஸத⁴ம்மா ப²லபூ⁴தாச ஸத்ததிம்ஸ த⁴ம்மா சதுஸச்ச வினிஸ்ஸடா சதூஹி அரியஸச்சேஹி வினிஸ்ஸடா விமுத்தா. யமேத்த² வத்தப்³ப³ம், தம் ஹேட்டா² வுத்தமேவாதி.

இதி பரமத்த²தீ³பனியானாம அபி⁴த⁴ம்மத்த²ஸங்க³ஹஸ்ஸ

சதுத்த²வண்ணனாய ஸமுச்சய ஸங்க³ஹஸ்ஸ

பரமத்த²தீ³பனா நிட்டி²தா.