வீதி²முத்த ஸங்க³ஹ பரமத்த²தீ³பனீ

143. ஏவம் பவத்திகாலே பவத்திஸங்க³ஹம் த³ஸ்ஸேத்வா இதா³னி படிஸந்தி⁴யம் பவத்திஸங்க³ஹம் த³ஸ்ஸேதும் ஆதி³கா³த² மாஹ. ஏவம் வுத்தனயேன பவத்தியம் பவத்திஸங்க³ஹோனாம வீதி²சித்தவஸேன உதீ³ரிதோகதி²தோ. இதா³னி ஸந்தி⁴யம் பவத்திஸங்க³ஹோ நாம வீதி²முத்த சித்தானம் வஸேன வுச்சதீதி யோஜனா. ஏத்த²ச படிஸந்தி⁴யம் சித்தசேதஸிகானம் பவத்தியா கதி²தாய ததோ பரம் ப⁴வங்க³காலேச சுதிகாலேச தேஸம் பவத்தி கதி²தாயேவ ஹோதீதி கத்வா ஸந்தி⁴யமிச்சேவ வுத்தம்.

[141] விபா⁴வனியம் பன

பரதோ மரணுப்பத்தியம் பத²மம் சுதிம் த³ஸ்ஸேத்வா பச்சா² அனந்தரே படிஸந்தி⁴யா வக்க²மானத்தா இத⁴ ஸந்தி⁴க்³க³ஹணேன அதீதா நந்தர சுதிபி க³ஹேதப்³பா³தி அதி⁴ப்பாயேன யம் வுத்தம் ‘‘ததா³ஸன்னதாய தம்க³ஹணேனேவ க³ஹிதசுதிகாலேசா’’தி. தம் ந யுஜ்ஜதியேவ.

வீதி²முத்தானஞ்ஹி விஸயப்பவத்தினாம அதீதானந்தரப⁴வே மரணுப்பத்தியம்ஏவ ஸித்³தா⁴தி ஏகஸ்மிம் ப⁴வே விஸயப்பபத்தியா ஸஹ தேஸம் படிஸந்தி⁴பமுகா²னம் வீதி²முத்தசித்தானம் பவத்தித³ஸ்ஸனத்த²ம்ஏவ தாய அதீதானந்தரசுதியா ஸத்³தி⁴ம் மரணுப்பத்திவிதா⁴னம் தே²ரேன த³ஸ்ஸிதந்தி. ப⁴வந்தி ஸத்தா ஸங்கா²ராச ஏதாஸூதி பூ⁴மியோ. அயோதி வட்³டி⁴. அத்த²தோ பன ஸுக²ம்ச ஸுக²ஹேது ஸுக²பச்சயாச வேதி³தப்³பா³. யேபு⁴ய்யேன ததோ அயதோ அபக³தா ஏத்த² நிப்³ப³த்தா ஸத்தாதி அபாயோ. ஸோஏவ பூ⁴மீதி அபாயபூ⁴மி. ஓளாரிகேன காமராகே³ன காமீயதீதி காமோ. க³ந்தப்³பா³ உபக³ந்தப்³பா³தி க³தி. க³ச்ச²ந்தி ஸத்தா ஏத்தா²திவா க³தி. அனேகவித⁴ஸம்பத்தீனம் அதி⁴ட்டா²னதாய ஸோப⁴ணாக³தி ஸுக³தி. காமோச ஸோ ஸுக³திசாதி ஸமாஸோ. நத்தி² யதா²வுத்தோ அயோ ஏத்தா²தி நிரயோ. நிச்சம் வா ரயந்தி கம்பந்தி ப²ந்த³ந்தி ஸத்தா து³க்க²ப்பத்தா ஏத்தா²தி நிரயோ. மனுஸ்ஸா விய உத்³த⁴ம் உச்சா அஹுத்வா திரோ அஞ்சிதா ஆயதாதி திரச்சா²னா. யுவந்தி நானா வண்ணஸண்டா²னாபி ஸத்தா ஸமானஜாதிதாய ஏகீபூ⁴தாவிய ஹோந்தி ஏதாயாதி யோனி. ஜாதி.

விபா⁴வனியம் பன

க²ந்தா⁴னம் பவத்திவிஸேஸோதி வுத்தம்.

திரச்சா²னானம் யோனி திரச்சா²னயோனி. பேச்ச இதா க³தாதி பேதா. இதோ அபக்கம்ம சவித்வா ப⁴வந்தரே க³தாதி அத்தோ². யேகேசி காலங்கதா. தி³வங்க³தாபி ஹி லோகே காலங்கதா பேதாதி வுச்சந்தி. இத⁴ பன ஸுக²ஸமுஸ்ஸயதோ பேச்ச பகட்ட²ம் பவாஸம் தூ³ரம் க³தாதி அத்தே²ன யாவ ததோ ந முச்சந்தி. தாவ நிச்சம் து³க்க²ப்பத்தா லக்க²ணஸம்யுத்தாதீ³ஸு ஆக³தா ததீயா அபாயிகஸத்தா அதி⁴ப்பேதா. பேதானம் ஸமூஹோ பேத்தி. பேத்தியா விஸயோதி பேத்தி விஸயோ. விஸயோதிச பவத்திதே³ஸோ வுச்சதி. அஸுரகாயோதி ஏத்த² ஸுரா வுச்சந்தி உபரி தே³வா ஸுரந்தி இத்³தி⁴விஸேஸேஹி தி³ப்³ப³ந்தி, ஸுட்டு²வா ரமந்தி காமஸுக²ரதிம் பச்சனுப⁴வந்தீதி கத்வா. ந ஸுராதி அஸுரா. வேபசித்தி பஹாராதா³த³யோ ஸந்தா⁴ய ஸுரபடிபக்கா² ஸுர ஸதி³ஸாவாதி அத்தோ². வியங்கரமாதா உத்தரமாதாத³யோ வினி பாதிகே ஸந்தா⁴ய கு²த்³த³கஸுரா சூளகஸுராதி அத்தோ². யமராஜா த³யோ வேமானிகபேதே ஸந்தா⁴ய ஏகதே³ஸேன ஸுரஸதி³ஸாதி அத்தோ². வேமானிகபேதாபி ஹி கத்த²சி அஸுரகாயாதி ஆக³தா. லோகந்தரிக நேரயிகே ஸந்தா⁴ய ஸப்³ப³ஸோ ஸுரகு³ண ரஹிதாதி அத்தோ². தேபி ஹி பு³த்³த⁴வம்ஸனிதா³னட்ட²கதா²யம் ஜாதிது³க்க² நித்³தே³ஸேஸுச அஸுரகாயாதி வுத்தா. ததா² காலகஞ்சிகபேதே ஸந்தா⁴ய ஸப்³ப³ஸோ ஸுரபா⁴வரஹிதாதி அத்தோ². இதி பஞ்சன்னம் அஸுரானம் வஸேன அத்த²விபா⁴கோ³ வேதி³தப்³போ³. தி³ப்³பா³ வத போ⁴காயா பரிஹாயிஸ்ஸந்தி, பரிபூரிஸ்ஸந்தி அஸுரகாயாதி இமஸ்மிம் ஸுத்தபதே³ சத்தாரோபி அபாயா அஸுரகாயாதி அட்ட²கதா²யம் வண்ணிதா.

தத்த² வேபசித்தி பஹாராதா³த³யோ அஸுரா தாவ திம்ஸேஸு தே³வேஸு ஸங்க³ஹிதா. வினிபாதிகாஸுரா சாதுமஹாராஜிகதே³வேஸு. ததா² வேமானிகபேதாஸுரா. தேபி ஹி வினிபாதிகாஸுரா விய திஹேதுகாபி து³ஹேதுகாபி அஹேதுகாபி ஹோந்தீதி அட்ட²கதா²ஸு வுத்தா. யமராஜானோ பன வேஸ்ஸபூ⁴ நோத்திச பேத்தி ராஜா ஸோமோ யமோ வேஸ்ஸவணோச ராஜாதி ஏவம் கதா² வத்து²பாளியம் ஆக³தா வேஸ்ஸபூ⁴ஆத³யோ ஸயம் மஹித்³தி⁴கா மஹானுபா⁴வா வேமானிகபேதராஜானோ ஹுத்வாபி நேரயிகேஸு ஸத்தேஸு காருஞ்ஞதம் படிச்ச ஹேட்டா² நிரயலோகேஸுபி ரஜ்ஜம் காரேந்தியேவ. தேனேவ ஹி ஸப்³பே³ பேதலோகாபி நிரயலோகாபி யமலோ காதிச யமவிஸயாதிச வுச்சந்தீதி. யேச சாதுமஹாராஜிகபரி யாபன்னா பாபஜ்ஜா²ஸயா குருரகம்மகாரினோ ரேவதிவிமானே யக்கா²தி ஆக³தா ஸம்கிச்சஜாதகே ரக்க²ஸாதி ஆக³தா யக்க²ரக்க²ஸானாம இதோ க³ந்த்வா உஸ்ஸத³னிரயேஸு நேரயிகானம் நானாகம்ம காரணாயோ கரோந்தோ விசரந்தி. தேஸம்பி காலோ உபகாலோதி ஏவமாதீ³ஹி நாமேஹி நாரத³ஜாதகே ஆக³தானம் நிரய பாலானம் உபரியமராஜானம் ஆணாபவத்ததியேவாதி. லோகந்தரிகா ஸுரா நிரயே ஸங்க³ஹிதா. இத⁴ பன காலகஞ்சிகாத³யோ பேதாஸுராவ அதி⁴ப்பேதா. தேஸம் அஸுரானம் காயோ ஸமூஹோதி அஸுரகாயோ. ஏத்த²ச நிரயபூ⁴மினாம பச்சேகம் ஸோளஸுஸ்ஸத³பரி வாரானம் அட்ட²ன்னம் மஹானிரயானம் வஸேன அந்தோ பத²வியம் டி²தாதி வேதி³தப்³பா³. அரஞ்ஞ பப்³ப³த ஸமுத்³த³ தீ³பகாதீ³ஸுபி நானானிரய பூ⁴மியோ ஹோந்தியேவ. தஸ்மா தாதி³ஸஸ்ஸ விஸும் வவத்தி²தஸ்ஸ ஓகாஸஸ்ஸ அத்தி²தாய நிரயோத்வேவ வுத்தா. ஸேஸானம் பன திஸ்ஸன்னம் அபாயபு⁴ம்மீனம் தாதி³ஸஸ்ஸ ஓகாஸஸ்ஸ நத்தி²தாய யோனி விஸய காய ஸத்³தே³ஹி யோஜேத்வா க²ந்தா⁴வா க²ந்த⁴ப்பவத்திபதே³ஸாவா க³ஹிதாதி. [அபாயபூ⁴மி]

உஸ்ஸிதோ உக்³க³தோ உஸ்ஸன்னோவா மனோ ஏதேஸந்தி மனுஸ்ஸா. தேஹி அனந்தேஸு சக்கவாளேஸுபி இதரபூ⁴மிகானம் ஸத்தானம் திக்க²தரஸூர விசித்ரசித்தா ஹோந்தி. பரிபுண்ணானம் குஸலாகுஸலகம்ம பதா²னம் ஆனந்தரியகம்மானஞ்ச ஏத்தே²வ ஸம்ப⁴வதோதி. தேஸுபி பன ஜம்பு³தீ³பவாஸினோஏவ அதிஸயேன உஸ்ஸிதமனா ஹோந்தி. இதரே பன தேஹி ஸமானவண்ணாதி³தாய மனுஸ்ஸா இச்சேவ வுச்சந்தி. இமஸ்மிம் சக்கவாளே பன வத்தப்³ப³மேவ நத்தி², யதா²ஹ-தீஹி பி⁴க்க²வே டா²னே ஹி ஜம்பு³தீ³பகா மனுஸ்ஸா உத்தரகுருகே மனுஸ்ஸே அதி⁴க்³க³ண்ஹந்தி. தே³வேச தாவதிம்ஸே. கதமேஹி தீஹி டா²னேஹி. ஸூராச ஸதி மந்தோச இத⁴ ப்³ரஹ்மசரியவாஸோசாதி. அக்க²ரசிந்தகா பன வத³ந்தி மனூதி மஹாஸம்மதராஜா வுச்சதி. இமேச ஜனா தேன த²பிதேஸு மரியாத³த⁴ம்மேஸு டி²தா தஸ்ஸ புத்தட்டா²னியா ஹோந்தி. தஸ்மா மனுனோ அபச்சா புத்தாதி மனுஸ்ஸாதி. இத⁴ பன பூ⁴மிபரியாயோதி கத்வா மனுஸ்ஸாதி இத்தி²லிங்க³ம் ஏகவசனஞ்ச கதந்தி த³ட்ட²ப்³ப³ம். ஏவம் ஸேஸே ஸுபி. யேஸு பன சத்தாரோ மஹாராஜானோ ரஜ்ஜம் காரேந்தி. தே தே³வா சாதுமஹாராஜிகா. தத்த² த⁴தரட்டோ² க³ந்த⁴ப்பானம் ராஜா ஹோதி. விருள்ஹகோ கும்ப⁴ண்டா³னம். விரூபக்கோ² நாகா³னம். குவேரோ யக்கா²னம். தத்த² படிஸந்தி⁴வஸேன க³ந்த⁴ருக்கே²ஸு அப்பேந்தி உபக³ச்ச²ந்தீதி க³ந்த⁴ப்பா. க³ந்த⁴ருக்கா²தி⁴வத்தா² தே³வா. தே மூலக³ந்தா⁴தி³வஸேன த³ஸதா⁴ பாளியம் ஆக³தா. கும்ப⁴ண்டா³தி தா³னவரக்க²ஸா. நாகா³ யக்கா²ச பாகடா. ஸப்³பே³ தே யேபு⁴ய்யேன பாபஜ்ஜா²ஸயா குருரகம்மகாரினோ ச ஹோந்தி. தஸ்மா சத்தாரோ மஹாராஜானோ அஞ்ஞமஞ்ஞம்வா மனுஸ்ஸானம் வா அவிஹேட²னத்தா²ய தேஸு நானாராஜானம்வா நானாஸேனாபதிம்வா த²பேஸும்.

ஆடானாடியஸுத்தம்சேத்த²வத்தப்³ப³ம். தத்த² ஹி யக்கோ²யக்கி²னீக³ந்த⁴ப்போ க³ந்த⁴ப்பீ கும்ப⁴ண்டோ³ கும்ப⁴ண்டீ³ நாகோ³ நாகீ³திசதஸ்ஸோ அவருத்³த⁴கஜாதியோ ஆக³தா. தத்த² ஸரீரோபா⁴ஸஸிரிஸம்பத்தியுத்தோ அமனுஸ்ஸோ யக்கோ²திச தே³வோதிச தே³வதாதிச வுச்சதி. ஸரீரோ பா⁴ஸ ஸிரிஸம்பத்திரஹிதோ விக³ச்ச²ரூபோ அமனுஸ்ஸோ யக்கோ²த்வேவ வுச்சதி. ருக்க²ட்ட²கவிமானே ஜாதோ ருக்க²தே³வதானாம. ருக்க²ஸ்ஸ அப்³ப⁴ந்தரே ஜாதோ க³ந்த⁴ப்போனாம. யோ லோகே கட்ட²யக்கோ²தி வுச்சதி. புப்³பே³ நிஹீனகம்மகதா காசி க³ந்த⁴ப்பியோ மனுஸ்ஸித்தீ²னம் ஸரீரப்³ப⁴ந்தரேஸுபி ஜாயந்தி. யா வேத³க³ந்தே²ஸு யோகி³னீதிச லோகே ஜோகி³னீதிச வுச்சந்தி. அபி⁴லக்கி²தரத்தீஸு கோ³சரபஸுத காலே ஜுதிஅத்தே²ன ஜுண்ஹாதிச வுச்சந்தி, குப்³ப⁴ண்டா³னாம மஹோத³ரா விஸாலக்கா² ரக்க²ஸாஏவ. யே லோகே த⁴ன ரக்க²காதி வுச்சந்தி. தே ஹி வேபுல்லபப்³ப³தே மணிரதனம் ரக்க²ந்தி. அந்தோ ஹிமவந்தே அப்³ப⁴ந்தர அம்ப³ருக்கே² ரக்க²ந்தி. ஏவம் ரதனட்டா²னானிவா வனப்பதி ருக்கே²வா தி³ப்³போ³ஸத⁴ருக்கே²வா தி³ப்³ப³க³ந்த⁴ருக்கே²வா உத³கஸரேவா ரக்கி²த்வா அஸந்தி ப⁴க்க²ந்தி. தஸ்மா ரக்க²ஸாதி வுச்சந்தி. நாகோ³ நாகீ³தி ஏத்த² அந்தோ பப்³ப³தேவா அந்தோ பத²வியம்வா நிப்³ப³த்தா வஸுந்த⁴ரதே³வயக்க²ஜாதியோபி இத⁴ நாகா³த்வேவ வுச்சந்தி. யா மஹாபரினிப்³பா³ன ஸுத்தே பூ⁴மிசாலஸுத்தபதே³ பத²வீ தே³வதாதி வுத்தா. யாஸம் கீளாபஸுத வஸேன கதா³சி பூ⁴மிசாலோ ஹோதி. யாஸஞ்ச மந்தபதா³னி வத்து² விஜ்ஜாதிச பூ⁴மிவிஜ்ஜாதிச ப்³ரஹ்மஜாலஸுத்தே வுத்தானி. தேஸுச நானா இத்³தி⁴மந்தா அவருத்³த⁴கா பாபாதிரதா கிப்³பி³ஸகம்மகாரினோ கீளா ஸோண்ட³வஸேனவா கா⁴ஸஸோண்ட³வஸேனவா பேதேஸுசனிரயேஸுச பகதி வண்ணேனவா ஸோணகி³ஜ்ஜ²காகாதி³வண்ணேனவா ஸத்தே விஹேட²யந்தா விசரந்தி. ஸப்³ப³ஞ்சே தம் ஸுத்தந்தேஸுவா ஜாதகேஸுவா வேத³க³ந்தே²ஸுவா குஸலேஹி வேதி³தப்³ப³ந்தி.

ஸஹ புஞ்ஞகாரினோ தேத்திம்ஸ ஜனா மாகே⁴னனாம ஜேட்ட²புரிஸேன ஸஹ ஏத்த² நிப்³ப³த்தாதி தேத்திம்ஸா. ஸாஏவ தாவதிம்ஸா நிருத்தி நயேன. காமஞ்சேத்த² ஸப்³ப³சக்கவாளேஸுபி அயம் து³தீயதே³வ லோகோ ஜனவஸதஸுத்தே ஆக³த நயேன ஸக்கட்டா²னியானம் பஜாபதி வருண ஈஸானாதீ³னம் தேத்திம்ஸ தே³வராஜூனம் நிப³ந்த⁴னோ காஸோ ஹோதி. ஸஹஸ்ஸம் சாதுமஹாராஜிகானம். ஸஹஸ்ஸம் தாவதிம்ஸானந்தி ஹி அங்கு³த்தரே வுத்தம். மாக⁴புரிஸா பன தேஸு ஸமுதா³க³தேஸு தே³வராஜட்டா²னேஸு பச்சாஜாதா ஹோந்தி. ஏதரஹி த⁴ரமானாச தஸ்மா தேஸம் வஸேன அயம் வசனத்தோ² கதோதி வேதி³தப்³போ³. அபரே பன யதா² இந்த³கோ³பகவண்ணாபா⁴. தாவ தி³ஸ்ஸந்தி திம்ஸதீதி இமஸ்மிம் விது⁴ரஜாதகே தாவ ஸத்³தோ³ திம்ஸஸத்³த³பரிவாரமத்தோ ஹோதி. ததா² இதா⁴பீதி கத்வா திம்ஸமத்தானம் ஸக்கட்டா²னியானம் தே³வராஜகுலானம் நிவாஸட்டா² நத்தா தாவதிம்ஸானாமாதி யுத்தம் ஸியா. அட்ட²கதா²ஸு பன யதா²வுத்தம் நிருத்தினயம் கப்பேத்வா மாக⁴வத்தூ²ஸுச தேஸு தேஸுச டா²னேஸு ஸக்கானம் தேத்திம்ஸ ஸங்கா²ஏவ வுத்தாதிபி வத³ந்தி. தம் ந யுஜ்ஜதி. பாளியம்ஏவ ப்³ரஹ்மாஸனங்குமாரோ தேத்திம்ஸே அத்தபா⁴வே அபி⁴னிம்மினித்வா தே³வானம் தாவதிம்ஸானம் பல்லங்கேஸு நிஸீதி³த்வாதி வுத்தத்தா. யாமோதி தஸ்மிம் தே³வலோகே இஸ்ஸரதே³வகுலஸ்ஸ நாமம். ததா² ஸுயாமோதிச. தம் ஸஹசரிதத்தா பன ஸோ தே³வ லோகோபி தத்த² நிப்³ப³த்ததே³வாபி யாமாத்வேவ வுச்சந்தி. விபுலாய ஸிரிஸம்பத்தியா ஸமன்னாக³தத்தா நிச்சம் துஸந்தி அதிவிய ஹட்ட²துட்ட²முகா² ஹோந்தி ஏத்தா²தி துஸிதா. யதா²ருசிதே போ⁴கே³ ஸயமேவ நிம்மினித்வா நிம்மினித்வா ரமந்தி ஏத்தா²தி நிம்மானரதீ. அத்தனோ ருசிம் ஞத்வா பரேஹி நிம்மிதேஸு போ⁴கே³ஸு வஸம் வத்தேந்தி ஏத்தா²தி பரனிம்மிதவஸவத்தீ. ப்³ரூஹந்தி வட்³ட⁴ந்தி அதிபணீதேஹி ஜா²னாதி³ கு³ணேஹி வுத்³தி⁴ம் விருள்ஹிம் வேபுல்லம் ஆபஜ்ஜந்தீதி ப்³ரஹ்மானோ. மஹந்தா ப்³ரஹ்மானோ மஹாப்³ரஹ்மானோதி வத்தப்³பே³ மஹாஸத்³த³ஸ்ஸ லோபோ.

பரிஸதி ப⁴வாதி பாரிஸஜ்ஜா. பரிஸாஸு ஜாதாதிவா பாரிஸஜ்ஜா. பரிசாரிகாதி அத்தோ². மஹாப்³ரஹ்மானம் பாரிஸஜ்ஜாதி ப்³ரஹ்ம பாரிஸஜ்ஜா. புரே உச்சே டா²னே ஓத³ஹந்தி திட்ட²ந்தீதி புரோஹிதா. மஹாப்³ரஹ்மானம் புரோஹிதாதி ப்³ரஹ்மபுரோஹிதா. மஹந்தா ப்³ரஹ்மானோ மஹாப்³ரஹ்மானோ. ஸஹஸ்ஸோப்³ரஹ்மா த்³விஸஹஸ்ஸோப்³ரஹ்மா. திஸஹஸ்ஸோப்³ரஹ்மாதிஆதி³னா ஸங்கா²ருபபத்திஸுத்தே ஆக³தா அதி⁴பதிப்³ரஹ்மானோதி அத்தோ². தத்த² ஸஹஸ்ஸோப்³ரஹ்மாதி சக்கவாளஸஹஸ்ஸம்ஹி இஸ்ஸரோ ப்³ரஹ்மா. த்³விஸஹஸ்ஸோதி த்³வீஸு சக்கவாள ஸஹஸ்ஸேஸு இஸ்ஸரோதி அத்தோ². தயோபேதே ஏகதல வாஸினோ ஹோந்தி. தத்த² லோகே மஹாஜனா விஸும் விஸும் குலதே³வதாயோனாம உபட்ட²ஹந்தி. கேசி மஹாதே³வம்னாம உபட்ட²ஹந்தி. கேசி வாஸுதே³வம்னாம. கேசி மஹேஸரம்னாம. கேசி பரமேஸ்வாரம் நாமாதி. க⁴ரதே³வதா கா³மதே³வதா ருக்க²தே³வதாத³யோபி தேஸம் மஹாதே³வராஜானம் உபட்ட²காஏவ ஸம்பஜ்ஜந்தி. தத்த² மஹாதே³வரா ஜானோவிய மஹாப்³ரஹ்மானோ த³ட்ட²ப்³பா³. க⁴ரதே³வதாத³யோவிய ப்³ரஹ்ம புரோஹிதாத³ட்ட²ப்³பா³, மனுஸ்ஸாவிய ப்³ரஹ்மபாரிஸஜ்ஜாத³ட்ட²ப்³பா³. தத்த²ச க⁴ர தே³வதாத³யோ மஹாதே³வரா ஜானோ அதி³ஸ்வாவ உபட்ட²ஹந்தி. மனுஸ்ஸா ச தேஉபோ⁴பி அதி³ஸ்வாவ உபட்ட²ஹந்தி. ஏவமேவம் ப்³ரஹ்மபுரோஹிதா மஹாப்³ரஹ்மானோபி நபஸ்ஸந்தி. மஹாப்³ரஹ்மானம் நிவாஸட்டா²னம்பி நஜானந்தி. ப்³ரஹ்மபாரிஸஜ்ஜாஉபோ⁴பி நபஸ்ஸந்தி. உபி⁴ன்னம்னிவாஸட்டா²னம்பி நஜானந்தி. யதா³ பன ஓளாரிகம் ரூபம் மாபேத்வா அத்தானம் த³ஸ்ஸேந்தி. ததா³ ஏவ பஸ்ஸந்தி. ஏஸனயோ உபரிபூ⁴மீஸுபி. யம் பன ப்³ரஹ்மனிமந்தன ஸுத்தட்ட²கதா²யம் வுத்தம் ப்³ரஹ்மானம் பகதிரூபம் கஸ்ஸசி ஆபாதம் ந க³ச்ச²தீதி. தம் ப்³ரஹ்மபுரோ ஹிதா தீ³னம் உபரிமானம் ப்³ரஹ்மானம் பகதிரூபம் கஸ்ஸசி ப்³ரஹ்மபாரிஸஜ்ஜாதி³னோவா தே³வஸ்ஸவா மனுஸ்ஸஸ்ஸவாஆபாதம் நக³ச்ச²தீதி கத்வா வுத்தம். ஹேட்டி²மானம் பன பகதிரூபம் உபரிமஸ்ஸ ஆபாதம் ஆக³ச்சி²ஸ்ஸதியேவ. தேனேவ ஹி ஜனவஸப⁴ஸுத்தட்ட²கதா²யம் ஹேட்டி²மஹேட்டி²மாஹி தே³வா உபரிமதே³வானம் ஓளாரிகம் கத்வா மாபிதமேவ அத்தபா⁴வம் பஸ்ஸிதும் ஸக்கோந்தீதி வுத்தம். தத்த²து³தீயதலே பரித்தாபா⁴தி ப்³ரஹ்மபாரிஸஜ்ஜாஏவ. அப்பமாணாபா⁴தி ப்³ரஹ்மபுரோஹிதா ஏவ. ஆப⁴ஸ்ஸராதி மஹாப்³ரஹ்மானோஏவ. தஸ்மிம் தலே அதி⁴பதி ப்³ரஹ்மானோஏவாதி அத்தோ². ஹேட்டி²மதலதோ பன விஸேஸ கரணத்த²ம் ஆபா⁴வஸேன நாமக³ஹணம் ஹோதீதி த³ட்ட²ப்³ப³ம்.

தத்த² பரித்தா ஆபா⁴ ஏதேஸந்தி பரித்தாபா⁴. அப்பமாணா ஆபா⁴ ஏதேஸந்தி அப்பமாணாபா⁴. ஆபா⁴ஸரந்தி நிச்ச²ரந்தி ஏதேஸூதி ஆப⁴ஸ்ஸராதி. ததீயதலே பரித்தஸுபா⁴தி ப்³ரஹ்மபாரிஸஜ்ஜாஏவ. அப்பமாணஸுதாதி ப்³ரஹ்மபுரோஹிதாஏவ. ஸுதகிண்ணாதி மஹாப்³ரஹ்மனோஏவ. தஸ்மிம் தலே அதி⁴பதிப்³ரஹ்மானோ ஏவாதி அத்தோ². தத்த² ஸுபா⁴தி ஏகக்³க⁴னா அசலஸண்டி²தா ஆபா⁴ஏவ வுச்சந்தி. பரித்தா ஸுபா⁴ ஏதேஸந்தி பரித்தஸுபா⁴. அப்பமாணா ஸுபா⁴ ஏதேஸந்தி அப்பமாணஸுபா⁴. ஸுதேஹி ஆகிண்ணாதி ஸுபா⁴கிண்ணா. ஸுப⁴கிண்ஹாதிபி பட²ந்தி. தேஸம் ஆகாரஸ்ஸ ரஸ்ஸோ அந்திமணகாரஸ்ஸ ச ஹகாரோ த³ட்ட²ப்³போ³. இமேஸு பன த்³வீஸு தலேஸு பகதிகாயப்பபா⁴ அதி⁴மத்தா ஹோந்தி. தஸ்மா தாஸம் வஸேன பரித்தாபா⁴திஆதி³கம் நாமம் ஸித்³த⁴ம். ந ப்³ரஹ்மபாரி ஸஜ்ஜாதிஆதி³கம். ஏவஞ்ச கத்வா வேரஞ்ஜஸுத்தே பத²மதலவாஸினோ ப்³ரஹ்மகாயிகா தே³வாதி ஆக³தா. து³தீயதலவாஸினோ ஆபா⁴தே³வாதி. ததீயதலவாஸினோ ஸுபா⁴தே³வாதி சதுத்த²தலே விபுலம் ப²லம் ஏதேஸந்தி வேஹப்ப²லா. அத²வா இஞ்ஜனஜாதிகேஹி ஸோமனஸ்ஸஜ்ஜா²னேஹி நிப்³ப³த்தானம் திண்ணம் ஹேட்டி²மதலானம் தேஜோஸம் வட்டாதி³கேன அந்தராயேன பூ⁴மிதலேன ஸஹ ஆயுகப்பனிவத்திவஸேன இஞ்ஜிதம் புஞ்ஞப²லம் அத்தி². தேஸு ஹி யம் ஸுபா⁴கிண்ணானம் தே³வானம் சதுஸட்டி²கப்பானீதி வுத்தம். தம் தஸ்மிம் தலே ஆதி³கப்பிகானம் வஸேன வுத்தம். பச்சி²மிகானம் பன தேஸட்டி²கப்ப த்³வாஸட்டி²கப்ப ஏகஸட்டி² கப்பாதி³ வஸேன இஞ்ஜிதம் படிலீனம் புஞ்ஞப²லம் ஹோதீதி. ஆனேஞ்ஜஜாதிகேன உபேக்கா²ஜா²னேன நிப்³ப³த்தானம் பன கேனசி அந்தராயேன தாதி³ஸம் இஞ்ஜிதம் புஞ்ஞப²லம் நாம நத்தி². தஸ்மா ஜா²ன ஸாமத்தி²யானுரூபம் விஸேஸேன ஈஹிதம் அபி⁴வட்³டி⁴தம் புஞ்ஞப²லம் ஏத்த² அத்தீ²தி வேஹப்ப²லா.

நத்தி² ஸஞ்ஞாமுகே²ன க³ஹிதா சத்தாரோ அரூபக்க²ந்தா⁴ ஏதேஸந்தி அஸஞ்ஞா. அஸஞ்ஞாச தே ஸத்தாசாதி அஸஞ்ஞஸத்தா. சித்தசே தஸிகானம் பன நத்தி²தாய தேஸம் அஸத்தபஸங்க³தா ஸம்ப⁴வதீதி ஸத்தக³ஹணம் கதந்தி த³ட்ட²ப்³ப³ம். ஏதே த்³வேபி ஏகதலவாஸினோ ஏவ ஹோந்தி. ஏத்த²பி நிப்³ப³த்தகஜ்ஜா²னஸ்ஸ ஹீனமஜ்ஜி²மபணீததா விஸேஸஸ்ஸ அத்தி²தாய தத³னுரூபம் ப்³ரஹ்மானம்பி பாரிஸஜ்ஜ புரோஹித மஹாப்³ரஹ்மத்த விஸேஸோ ஸம்ப⁴வதியேவ. ஆயுவேமத்ததாய பன அஞ்ஞமஞ்ஞ அத³ஸ்ஸனாதீ³னஞ்ச நத்தி²தாய பாரிஸஜ்ஜாதி³வஸேன பூ⁴மிவிபா⁴கோ³ நத்தீ²தி வேதி³தப்³போ³. ஏவம் அவிஹாதீ³ஸுபி. ஓளாரிகானம் காமராக³படிகா⁴னுஸயானம் நத்தி²தாய ஸுத்³தா⁴னம் அனாகா³மிஅரஹந்தானமேவ ஆவாஸாதி ஸுத்³தா⁴வாஸா. தத்த² பத²மபூ⁴மிவாஸினோ அப்பகேன காலேன அத்தனோ டா²னம் நவிஜஹந்தீதி அவிஹா. அத²வா, ஓளாரிகானம் பஞ்சன்னம் ஸம்யோஜனானம் பஹீனத்தா நத்தி² சித்தஸ்ஸ விஹஞ்ஞனம் ஸமத²விபஸ்ஸ நாத⁴ம்மேஸு அவிப்பா²ரிகதாபத்தி ஏதேஸந்தி அவிஹா. து³தீயபூ⁴மி வாஸினோ ந கேனசி சித்தபரிளாஹேன தப்பந்தீதி அதப்பா. ததீய தலவாஸினோ பரிஸுத்³தே⁴ஹி பஸாத³சக்கு² தி³ப்³ப³சக்கு² த⁴ம்மசக்கு² பஞ்ஞா சக்கூ²ஹி ஸம்பன்னத்தா ஸுட்டு² பஸ்ஸந்தீதி ஸுத³ஸ்ஸா. சதுத்த²பூ⁴மிவாஸினோ பன ததோ அதிஸயேன ஸுட்டு² த³ஸ்ஸனபா⁴வேன ஸமன்னாக³தாதி ஸுத³ஸ்ஸினோ. அதிஸயத்தே² ஹி அயம் ஈகாரோதி. பஞ்சமபூ⁴மி வாஸினோ உபரி அஞ்ஞஸ்ஸ பூ⁴மந்தரக³தஸ்ஸ ரூபிப்³ரஹ்முனோ நத்தி²தாய நத்தி² ரூபீனம் ஸத்தானம் மஜ்ஜே² கேனசி கு³ணேன கனிட்ட²பா⁴வோ ஏதேஸந்தி அகனிட்டா².

ஆகாஸானஞ்சாயதனபூ⁴மீதி ஏத்த² யத்தகம் ஆகாஸபதே³ஸம் ப²ரித்வா ஆகாஸானஞ்சாயதன ஸஞ்ஞிதா சதுக்க²ந்தா⁴ பவத்தந்தி. ஸோ க²ந்த⁴ஸஹிதோ ஆகாஸபதே³ஸோ ஆகாஸானஞ்சாயயனபூ⁴மி. ஏவம் ஸேஸாஸு. புது²ஜ்ஜனா ஸோதாபன்னா ஸகதா³கா³மினோசாபி புக்³க³லா ஸுத்³தா⁴வாஸேஸு ஸப்³ப³தா² ஸப்³ப³பகாரேனபி நலப்³ப⁴ந்தீதி யோஜனா. ஏத்த²ச ஸகதா³கா³மீனம் படிக்கே²பேன அனாகா³மி மக்³க³ட்ட²ஸ்ஸபி தத்த² படிக்கே²போ ஸித்³தோ⁴ ஹோதீதி உபரிமானம் திண்ணம் அரியானமேவ தத்த² படிலாபோ⁴ இமாய கா³தா²ய வுத்தோதி வேதி³தப்³போ³. ஸேஸட்டா²னேஸூதி பஞ்சஸுத்³தா⁴வாஸதோ அஸஞ்ஞாபாயதோச அவஸேஸேஸு ஏகவீஸதியா டா²னேஸு, அனரியாதி புது²ஜ்ஜனா. [பூ⁴மிசதுக்கம்]

144. ஓக்கந்திக்க²ணேதி படிஸந்தி⁴க்க²ணே. படிஸந்தி⁴ஹி ப⁴வந்தரே ஓக்கமனம் அனுபவிஸனந்தி² அத்தே²ன ஓக்கந்தீதி வுச்சதி. ததோ பரம் ப⁴வங்க³ம் ஹுத்வாதி யோஜனா. கேசி பன ப⁴வங்க³பரியோஸானேதி பட²ந்தி. தம் ந யுஜ்ஜதி. ஜாதியா அந்தோ⁴ ஜச்சந்தோ⁴. ஆதி³ஸத்³தே³ன ஜாதி ப³தி⁴ர ஜச்சகா⁴னக ஜாதிமூக³ ஜச்சேள ஜச்சும்மத்தக பண்ட³க உப⁴தோ ப்³யஞ்ஜனக நபும்ஸக மம்மாத³யோ ஸங்க³ண்ஹாதி. தத்த² யஸ்ஸ சக்கு²ம் உப்பாதே³தும் அஸமத்தே²ன கம்மேன படிஸந்தி⁴ லத்³தா⁴. ஸோ ஜச்சந்தோ⁴ நாம. ஏஸனயோ ஸேஸேஸுபி. தத்த² பஸாத³ஸோத ரஹிதோ ஜாதிப³தி⁴ரோ நாம. பஸாத³ கா⁴னரஹிதோ ஜச்ச கா⁴னகோ நாம. பஸாத³ஜிவ்ஹாரஹிதோ நாம நத்தி². வசனரஹிதோ ஜாதிமூகோ³னாம. தி³ஸாவிதி³ஸாமத்தம்பி ஸஞ்ஞாபேதும் அஸக்குணேய்யோ ஜாதிஏளோ நாம. ஸப்³ப³காலம்பி விபல்லட்ட²சித்தோ ஜச்சும்மத்தகோனாம. காமஹேது ஆஸித்தகாதி³பா⁴வேன விப்பகாரபத்தோ பண்ட³கோனாம. த்³வீஹி ப்³யஞ்ஜனேஹி ஸமன்னாக³தோ உப⁴தோ ப்³யஞ்ஜனகோனாம. பா⁴வத்³வய ரஹிதோ நபும்ஸகோனாம. பகதிவசனேபி ஏகமேகம் அக்க²ரம் மஹுஸ்ஸாஹேன உப்பாதே³ந்தோ விப³ச்ச²வசனோ மம்மோனாம. ஏத்த²ச சக்கு²ம் உப்பாதே³தும் ஸமத்தே²ன கம்மேன லத்³த⁴படிஸந்தி⁴கஸ்ஸ பவத்திகாலே தம்வா அஞ்ஞம்வா கம்மம் சக்கு²ம் உப்பாதே³தி. அஸமத்தே²னகம்மேன லத்³த⁴படிஸந்தி⁴ கஸ்ஸ பன வத்து²விபன்னஸ்ஸ பவத்திகாலே அஞ்ஞம்பி கம்மம் சக்கு²ம் உப்பாதே³தீதி நத்தி². தஸ்மா க³ப்³ப⁴ஸேய்யகானம்பி ஜச்சந்த⁴பா⁴வோ படிஸந்தி⁴க்க²ணேயேவ ஸித்³தோ⁴தி வேதி³தப்³போ³. ஏஸனயோ ஸேஸேஸு ஜாதி ப³தி⁴ராதீ³ஸு. ஆயதனானம் படிலாபோ⁴ ஜாதீதி வுத்தத்தா சக்கு²ஸ்ஸ உப்பஜ்ஜனாரஹகாலோ சக்கு²ஸ்ஸ ஜாதிகாலோனாம. ததா³ அனுப்பன்ன சக்கு²கோ ஜச்சந்தோ⁴னாமாதி ஏவம் அத்தனோ அத்தனோ உப்பஜ்ஜனாரஹ காலவஸேன தஸ்ஸ தஸ்ஸ ஆயதனஸ்ஸ ஜாதிகாலோ வேதி³தப்³போ³. ஏவஞ்ஹிஸதி ஜாதிமூகா³த³யோபி உபபன்னோ ஹோந்தீதிச வத³ந்தி. விபா⁴வனி யம்பி அயமத்தோ² விபா⁴விதோதி.

[142] யம் பன விபா⁴வனியம்

‘‘அபரே பன ஜச்சந்தோ⁴தி பஸுதியம்யேவ அந்தோ⁴. மாது குச்சி²யம் அந்தோ⁴ ஹுத்வா நிக்க²ந்தோதி அத்தோ². தேன து³ஹேதுகதிஹேதுகானம் மாதுகுச்சி²யம் சக்கு²ஸ்ஸ அவிபஜ்ஜனம் ஸித்³த⁴ந்தி வத³ந்தீதி’’ வுத்தம். தம் ந யுத்தம்.

லோகே மாதுகுச்சி²யம்யேவ அந்தோ⁴ ஹுத்வா நிக்க²ந்தஸ்ஸபி ஏகச்சஸ்ஸ தம் தம் ஸிப்பவிஜ்ஜாடா²னேஸு பஞ்ஞாவேய்யத்தியபா⁴வஸ்ஸ தி³ட்ட²த்தா. த²பேத்வா ஹி மஹாபோ³தி⁴ஸத்தே அஞ்ஞேச பச்சி²மப⁴விகே ஸத்தே அவஸேஸானம் த்³விஹேதுக திஹேதுகானம்பி மாதுகுச்சி²ம்ஹி பரூபக்கமேனவா மாதுயா விஸமபயோகே³னவா நானாபா³தே⁴னவா உப்பன்னானம்பி சக்கு²ஸோதானம் விபத்தினாம நத்தீ²தி ந ஸக்கா நியமேதுந்தி. பு⁴ம்மஸ்ஸிதானஞ்ச வினிபாதிகாஸுரானந்தி ஏத்த² பூ⁴மியம் ஜாதாதி பு⁴ம்மா. பூ⁴மிஸம்ப³ந்தே⁴ஸு ருக்க²ட்ட²க பப்³ப³தட்ட²க விமானேஸு நிப்³ப³த்தா ஆளவக ஸாதாகி³ர ஹேமவதாத³யோ மஹித்³தி⁴கா பு⁴ம்மாதே³வா. யே லோகே ப³லிஹரண வஸேன பூஜனீயட்டே²ன யக்கா²திபி வுச்சந்தி. யே பன பு⁴ம்மதே³வஜாதிகாபி ஸமானா அத்தனோ புஞ்ஞனிப்³ப³த்தஸ்ஸ கஸ்ஸசி போ⁴க³ஸுக²ஸ்ஸ அபா⁴வா கிச்ச²ஜீவி கப்பத்தா விசரந்தி. தே தேஸம் மஹித்³தி⁴கானம் பு⁴ம்மதே³வானம் பரம்பர பாரிஸஜ்ஜேஸு பரியாபன்னத்தா பு⁴ம்மே தே³வே ஸிதா நிஸ்ஸிதாதி அத்தே²ன பு⁴ம்மஸ்ஸிதானாம ஹோந்தி. பு⁴ம்மிஸ்ஸிதாதிபி பாடோ². புஞ்ஞனிப்³ப³த்தஸ்ஸ நிவாஸட்டா²னஸ்ஸ அபா⁴வா ருக்க²கு³ம்ப³லேணகு³ஹாஸுஸானா தீ³ஸு விவித்தேஸு பூ⁴மிபதே³ஸேஸு நிஸ்ஸாய வஸந்தீதி அத்தோ². தேயேவ விரூபா ஹுத்வா ப⁴வந்தரே நிபதந்தீதி வினிபாதிகா. வினிபாதிகாச தே ஹேட்டா²வுத்தட்டே²ன அஸுராசாதி வினிபாதிகா ஸுரா. தே பன கா³மஸமீபேவா அந்தோகா³மேவா விவித்தட்டா²னேஸு வஸித்வா கா³மவாஸீஹி ச²ட்³டி³தானி ப⁴த்தஸித்த²பூவக²ஜ்ஜமச்ச²மம்ஸாதீ³னி பரியேஸித்வாவா தானி அலபி⁴த்வா தா³ரகேவா கி³லானேவா பீளேத்வாவா ஸக்கோந்தா பன அஞ்ஞேபி மனுஸ்ஸே தாஸேத்வா பீளேத்வாவா ஜீவிதம் கப்பேந்தீதி. தேஸம் வினிபாதிகாஸுரானம். ஏகச்சானந்தி அதி⁴ப்பாயோ. ந ஹி ஸப்³பே³ வினிபாதிகா ஸுரானாம அஹேது காஏவாதி ஸக்கா வத்தும். த்³விஹேதுகதிஹேதுகானம்பி ஸப்³பா⁴வதோ. ஏவஞ்ச கத்வா தேஸம் ஏகச்சானம் பியங்கரமாதா உத்தரமாதா த⁴ம்மகு³த்தா பு²ஸ்ஸமித்தாதீ³னம் த⁴ம்மாபி⁴ஸமயோபி அட்ட²கதா²ஸு வுத்தோதி. ஏகச்சே யக்க²ஜாதிகாபி ரக்க²ஸஜாதிகாபி வேமானிகபேதாபி பரத³த்துபஜீவி பேதாபி ஏத்த² ஸங்க³ஹிதாதி த³ட்ட²ப்³பா³.

தேஸூதி யதா²வுத்தபடிஸந்தி⁴ யுத்தேஸு புக்³க³லேஸு. யஸ்மா ஆயுபரிச்சே²தோ³னாம ஏகபூ⁴மிபரியாபன்னானம் ஸப்³ப³ஸத்தானம் அஸேஸஸா தா⁴ரணனியமபரிமாணவஸேன பவத்தோ. அபாயானம் மனுஸ்ஸானம் பு⁴ம்ம தே³வானஞ்ச தாதி³ஸோ நியமபரிமாணோனாம நத்தி². ந ஹி ஸகலசக்க வாளபரியாபன்னா ஏகபூ⁴மகா ஸப்³ப³னிரயா ஏகஆயுபரிச்சே²தா³ ஹோந்தி. திரச்சா²னாதீ³ஸுபி ஏஸேவனயோ. தஸ்மா வுத்தம் சதுன்னம் அபாயானந்திஆதி³. சதுன்னம் அபாயானம் ஆபாயிகபுக்³க³லானம் ஆயுப்பமாண க³ணனாய நியமோ நத்தி², தத்த² யேபு⁴ய்யேன கம்மபமாணத்தா. தத்த² நிரயேஸு அப்³பு³தா³தீ³னம் த³ஸன்னம் நிரயானம் ப⁴க³வதா வுத்தோ ஆயுபரிச்சே²தோ³பி தத்த² தத்த² நிப்³ப³த்தகேன கம்மேனேவஸித்³தோ⁴தி வேதி³தப்³போ³. மனுஸ்ஸானந்தி இத³ம் ஜம்பு³தீ³பகா³ஸீனம் வஸேன வுத்தந்தி வத³ந்தி. தே ஸஞ்ஞேவ ஹி ஆயுகப்பஸ்ஸ ஆரோஹணம் ஓரோஹணஞ்ச அத்தி². ந இதரதீ³பவாஸீனம். தேஸு ஹி உத்தரகுருவாஸீனம் நியமதோ வஸ்ஸ ஸஹஸ்ஸம் ஹோதி. இதரேஸம் த்³வின்னம் பஞ்சவஸ்ஸ ஸதானீதிச வத³ந்தி. ஏவம் ஸந்தே தேஸு தீ³பேஸு ஆதி³கப்பிகானம்பி ஸோஏவ பரிச்சே²தோ³தி ஆபஜ்ஜதி. ஜம்பு³தீ³பவாஸீனம் பன ஸமவிஸமாசாரனிஸந்த³பூ⁴தா சந்த³ஸூரியனக்க²த்தாதீ³னம் விஸமஸமக³திமூலிகாஉதுஆஹாரானம் ஸம்பத்தி விபத்தியோ தேஸம்பி ஸாதா⁴ரணாஏவ ஹோந்தி. தஸ்மா தேஸுபி ஆயுபரிச்சே²தா³னம் ஆரோஹணம் ஓரோஹணஞ்ச நத்தீ²தி நவத்தப்³ப³ம். நிஸந்த³மத்தத்தா ஜம்பு³தீ³பக³தியா ஏகக³திகா நஹோந்தீதி பன வத்தப்³ப³ம். ததா² ஹி பாளியம் உத்தரகுருகா மனுஸ்ஸா அமமா அபரிக்³க³ஹா. நியதாயுகா அவஸேஸாயுனாதி வுத்தம். தத்த² அவஸேஸாயுனாதி அஸங்க்²யேய்யதோ ஓரோஹித்வா நிச்சலம் டி²தேன வஸ்ஸஸஹஸ்ஸேனாதி அத்தோ²தி.

வினிபாதிகாஸுரானந்தி இத³ம் நித³ஸ்ஸனமத்தம் த³ட்ட²ப்³ப³ம். ஸப்³பே³ஸம்பி மஹேஸக்கா²னம் அப்பேஸக்கா²னஞ்ச பு⁴ம்மதே³வானம் வேமானிகபேதாதீ³னஞ்ச இத⁴ அதி⁴ப்பேதத்தா. தேஸஞ்ஹி ஸப்³பே³ஸம்பி கம்மமேவ பமாணந்தி. சாதுமஹாராஜிகானம்பனதே³வானந்தி இத³ம் உபரிமே சாதுமஹாராஜிகே ஸந்தா⁴ய வுத்தம். தி³ப்³பா³னீதி தஸ்மிம் தே³வலோகே ஸித்³தா⁴னி. பஞ்ச வஸ்ஸஸதானீதி இத³ஞ்ச யேபு⁴ய்யவஸேன வுத்தந்தி க³ஹேதப்³ப³ம். யஸ்மா பன கஸ்ஸபபு³த்³த⁴ஸ்ஸ ஸாவகபூ⁴தா ஸோதாபன்னதே³வ புத்தா ஆகாஸட்ட²க விமானேஸு நிப்³ப³த்தா யாவ நிமிராஜகாலாபி திட்ட²ந்தீதி ஜாதகட்ட²கதா²யம் வுத்தா. தஸ்மா கேஸஞ்சி ஆகாஸட்ட²கதே³வானம்பி கம்மபமாணதா ஸித்³தா⁴ ஹோதீதி வேதி³தப்³ப³ம். ந சேத்த² புனப்புனம் நிப்³ப³த்தி சிந்தேதப்³பா³. ந ஹி ஸோதா பன்னானம் ஸத்தக்க²த்துதோ பரம் காமப⁴வே படிஸந்தி⁴னாம அத்தி². ந ச தஸ்மிம் தே³வலோகே ஸஹஸ்ஸக்க²த்தும் நிப்³ப³த்தமானாபி தத்தகம் காலம் ஸம்பாபுணிதும் ஸக்கோந்தீதி. மனுஸ்ஸக³ணனாயாதி மனுஸ்ஸானம் வஸ்ஸக³ணனாய. மனுஸ்ஸலோகே ஹி பஞ்ஞாஸவஸ்ஸானி சாதுமஹாராஜிகே ஏகோ தி³ப்³ப³ரத்திதி³வோ ஹோதி. திம்ஸரத்திதி³வா ஏகோ தி³ப்³ப³மாஸோ. த்³வாத³ஸமாஸா ஏகம் தி³ப்³ப³வஸ்ஸம். தேன தி³ப்³ப³வஸ்ஸேன தேஸம் பஞ்சவஸ்ஸஸதானி மனுஸ்ஸக³ணனாய நவுதிவஸ்ஸஸதஸஹஸ்ஸம் ஹோதீதி. ததோதி சாதுமஹாராஜிகானம் தே³வானம் ஆயுப்பமாணதோ. சதுகு³ணந்தி ஆயுபமாணஸ்ஸ தி³கு³ணவுத்³தி⁴யாசேவ தி³ப்³ப³ஸ்ஸ ரத்திதி³வஸ்ஸ தி³கு³ணவுத்³தி⁴யாச வஸேன சதூஹி பா⁴கே³ஹி கு³ணிதம் வட்³டி⁴தந்தி அத்தோ². ஏஸனயோ ஸேஸேஸுபி. தத்த² ஆயுபமாணஸ்ஸ தி³கு³ணவுத்³தி⁴னாம ஹேட்டி²மானம் தே³வானம் ஆயுபமாணதோ உபரிமானம் தே³வானம் ஆயுபமாணஸ்ஸ தி³கு³ணவுத்³தி⁴. ஏதேன தாவதிம்ஸானம் தி³ப்³ப³ம் ஏகம் வஸ்ஸஸஹஸ்ஸம். யாமானம் த்³வேவஸ்ஸஸஹஸ்ஸானி. துஸிதானம் சத்தாரி, நிம்மானரதீனம் அட்ட². வஸவத்தீனம் தி³ப்³பா³னி ஸோளஸவஸ்ஸ ஸஹஸ்ஸானி ஆயுப்பமாணம் ஹோதீதி ஸித்³த⁴ம் ஹோதி.

தி³ப்³ப³ஸ்ஸ ரத்திதி³வஸ்ஸ தி³கு³ணவுத்³தி⁴னாம ஹேட்டி²மானம் தே³வானம் ரத்திதி³வதோ உபரிமானம் ரத்திதி³வஸ்ஸ தி³கு³ணவுத்³தி⁴. ஏதேன மனுஸ்ஸலோகே ஏகம் வஸ்ஸஸதம் தாவதிம்ஸே ஏகோ தி³ப்³ப³ரத்திதி³வோ. த்³வேவஸ்ஸஸதானி யாமே. சத்தாரி துஸிதே. அட்ட² நிம்மானரதியம். ஸஹஸ்ஸம் ச² சவஸ்ஸஸதானி வஸவத்தியம் ஏகோ தி³ப்³ப³ரத்திதி³வோதி ஸித்³த⁴ம் ஹோதி. ரத்திதி³வானஞ்ச தி³கு³ணவுத்³தி⁴யா ஸித்³தா⁴ய மாஸஸம்வச்ச²ரானம்பி தி³கு³ணவுத்³தி⁴ ஸித்³தா⁴வ ஹோதீதி. ஏவஞ்சஸதி யதா²வுத்தானி தாவதிம்ஸாதீ³னம் தி³ப்³ப³வஸ்ஸஸஹஸ்ஸாதி³னிபி அத்தனோ அத்தனோ ரத்திதி³வமாஸஸம்வச்ச²ரேதிஏவ வேதி³தப்³பா³னீதி ஸித்³த⁴ம் ஹோதி. ததா²ச ஸதி உபரிமானம் ஆயுபரிமாணானி ஹேட்டி²மானம் ஆயுபரிமாணதோ சதுகு³ணானீதி ஸித்³த⁴ம் ஹோதி. தேன வுத்தம். ததோ சதுகு³ணம் தாவதிம்ஸானம். ததோ சதுகு³ணம் யாமானந்திஆதி³. தி³ப்³ப³க³ணனாய ச ததா² ஸித்³தா⁴ய ஸதி மனுஸ்ஸக³ணனாயபி சதுகு³ணபா⁴வோ ஸித்³தோ⁴யேவ ஹோதி. தஸ்மா மனுஸ்ஸக³ணனாயபி ஹேட்டி²மானம் நவுதிவஸ்ஸஸதஸஹஸ்ஸாதீ³னி சதூஹி உபரூபரிகு³ணிதானி உபரிமானம் திகோடிஸட்டி²வஸ்ஸஸத ஸஹஸ்ஸாதி³னி ப⁴வந்தீதி கத்வா தானி ஸப்³பா³னிபி ஆதி³அந்தத³ஸ்ஸன வஸேன நித்³தி³ஸந்தோ நவஸதந்தி கா³த²மாஹ. வஸ்ஸானம் நவஸதம் கோடியோ ச ஏகவீஸ கோடியோ ச ததா²ஸட்டி²வஸ்ஸ ஸதஸஹஸ்ஸானி ச வஸவத்தீஸு தே³வேஸு ஆயுப்பமாணம் ஹோதீதி யோஜனா.

யஸ்மா அவிதக்கவிசாரமத்தம் ஜா²னம் ஓளாரிகஸ்ஸ விதக்கஸ்ஸ ஸமதிக்கமா பத²மஜ்ஜா²னதோ ஸுட்டு²ப³லவம் ஹோதி. ததோயேவ ததீயஜ்ஜா²னதோபி நாதிது³ப்³ப³லஞ்ச ஹோதி. தஸ்மா தம் ததீயஜ்ஜா²னேன ஏகதோ ஹுத்வா ஸமதலே பூ⁴மந்தரே விபாகம் தே³தீதி வுத்தம் து³தீயஜ்ஜா²னவிபாகம் ததியஜ்ஜா²னவிபாகஞ்ச து³தீயஜ்ஜா²னபூ⁴மியந்தி. தேனேவச பூ⁴மீனம் டி²திக்கமோபி சதுத்த²ஜ்ஜா²ன வஸேனேவ ஸித்³தோ⁴. தே²ரேன பன ஹேட்டா² பஞ்சகனயவஸேனேவ ஜா²னானி வுத்தானி. தஸ்மா இத⁴பி தேனேவ நயேன விபாகானி க³ஹேத்வா சதுத்த²ஜ்ஜா²னவிபாகம் ததீயஜ்ஜா²னபூ⁴மியந்திஆதி³ வுத்தம். தேஸூதி தாஹி ச²ஹி படிஸந்தீ⁴தி க³ஹிதபடிஸந்தி⁴கேஸு. கப்பஸ்ஸாதி இத³ம் அஸங்க்²யேய்யகப்பம் ஸந்தா⁴ய வுத்தம். சதுப்³பி³தா⁴ ஹி கப்பாமஹாகப்போ அஸங்க்²யேய்யகப்போ அந்தரகப்போ ஆயுகப்போதி, தத்த² ஆயுகப்போனாம தேஸம் தேஸம் ஸத்தானம் தம்தம் ஆயுபரிச்சே²தோ³ வுச்சதி. அந்தரகப்போனாம ஏகஸ்ஸவிவட்டட்டா²யிஅஸங்க்²யேய்யஸ்ஸ அப்³ப⁴ந்தரே மனுஸ்ஸானம் ஆயுகப்பஸ்ஸ ஹாயனவட்³ட⁴னவஸேன தி³ஸ்ஸமானந்தரா சதுஸட்டி²பபே⁴தா³ சூளகப்பா வுச்சந்தி. பீஸதிபே⁴தா³தி கேசி. அஸீதிபே⁴தா³தி அபரே. சுத்³த³ஸப்ப பே⁴தா³தி வேத³விது³. யே லோகே மன்வந்தரகப்பாதி வுச்சந்தி. ஏகமேகேன மனுனாமகேன மஹாஸம்மதராஜேன உபலக்கி²தா அந்தரகப்பாதி வுத்தம் ஹோதி. கேசி பன ஏகஸ்மிம் விவட்டட்டா²யிம்ஹி மஹாஸம்மதரா ஜானம் ஏகமேவ இச்ச²ந்தி. சதுஸட்டி²அந்தரகப்பா பன ஏகோ அஸங்க்²யே கப்போனாம. ஸோ சதுப்³பி³தோ⁴ ஸம்வட்டோ ஸம்வட்டட்டா²யீ விவட்டோ விவட்டட்டா²யீதி. தத்த² வினஸ்ஸமானோ கப்போ ஸம்வட்டோ. யதா² வினட்ட²ம் திட்ட²மானோ கப்போ ஸம்வட்டட்டா²யீ. வட்³ட⁴மானோ கப்போ விவட்டோ. யதா² விவட்டம் திட்ட²மானோ கப்போ விவட்டட்டா²யீதி வேதி³தப்³போ³. தே பன சத்தாரோ அஸங்க்²யேய்யகப்பா ஏகோ மஹாகப்போனாம. ஏத்த²ச யோ ஜனாயாமவித்தா²ரே ஸேதஸாஸபராஸிம்ஹி வஸ்ஸஸத வஸ்ஸஸதச்சயேன ஏகேகபீ³ஜஹரணேன பரிக்கீ²ணேபி ஏகோ மஹாகப்போ பரிக்க²யம் நக³ச்ச²தி. ஏவம் தி³கோ⁴ மஹாகப்போதி வேதி³தப்³போ³.

தத்த² யதா³ கப்போ தேஜேன ஸம்வட்டதி. ஆப⁴ஸ்ஸரதோ ஹேட்டா² அக்³கி³னா த³ய்ஹதி. யதா³ ஆபேன ஸம்வட்டதி. ஸுபா⁴கிண்ணதோ ஹேட்டா² உத³கேன விலீயதி. யதா³ வாயுனா ஸம்வட்டதி. வேஹப்ப²லதோ ஹேட்டா² வாதேன வித்³த⁴ம்ஸதீதி ஏவம் அட்ட²கதா²யம் வுத்தத்தா அயம் லோகோ நிரந்தரம் ஸத்தஸு வாரேஸு அக்³கி³னா வினஸ்ஸதி. அட்ட²மே வாரே உத³கேன வினஸ்ஸதி. புன ஸத்தஸு அக்³கி³னா. அட்ட²மே உத³கேனாதி ஏவம் அட்ட²ன்னம் அட்ட²கானம் வஸேன சதுஸட்டி²வாரேஸு அந்திமே உத³கவாரே உத³கம் பஹாய வாதவாரோ ஹோதீதி அயமத்தோ² ஸித்³தோ⁴ ஹோதி. கத²ம். யம் வுத்தம் ஆப⁴ஸ்ஸரானம் அட்ட²கப்பானீதி. ஏதேன அட்ட²மே வாரே ஆபோஸம்வட்டோ ஹோதி. அந்தரா ஸத்தஸு ஸத்தஸு வாரேஸு தேஜோஸம்வட்டா ஹோந்தீதி ஸித்³த⁴ம். யஞ்ச வுத்தம் ஸுபா⁴கிண்ணானம் சதுஸட்டி²கப்பானீதி. ஏதேன சதுஸட்டி²மே சதுஸட்டி²மே வாரே வாதஸம்வட்டோஹோதி. அந்தரா தேஸட்டி²யா வாரேஸு தேஜோஸம்வட்டா ஆபோஸம்வட்டாச ஹோந்தீதி ஸித்³த⁴ம் ஹோதீதி. தேனாஹு போராணா –

அக்³கி³னா ப⁴ஸ்ஸரா ஹேட்டா², ஆபேன ஸுபா⁴கிண்ணதோ;

வேஹப்ப²லதோ வாதேன, ஏவம் லோகோ வினஸ்ஸதி.

ஸத்தஸத்தக்³கி³னா வாரா, அட்ட²மே அட்ட²மே த³கா;

சதுஸட்டி² யதா³ புண்ணா, ஏகோ வாயுவாரோ ஸியாதி.

ஏவஞ்ச வினட்டே² லோகே ஏகஸ்மிம் கப்பேபி பத²மஜ்ஜா²னபூ⁴மி அவினட்டா²னாம நத்தி². தஸ்மா ப்³ரஹ்மபாரிஸஜ்ஜானம்தே³வானம் கப்பஸ்ஸததீயோ பா⁴கோ³ ஆயுப்பமாணம், ப்³ரஹ்மபுரோஹிதானம்உபட்³ட⁴கப்போ, மஹா ப்³ரஹ்மானம்ஏகோகப்போதி ஏத்த² அஸங்க்²யேய்ய கப்போவ ஸம்ப⁴வதி. நமஹாகப்போ. தேன வுத்தம் கப்பஸ்ஸாதி இத³ம் அஸங்க்²யேய்யகப்பம் ஸந்தா⁴ய வுத்தந்தி. ஆயுகப்பம் ஸந்தா⁴ய வுத்தந்திபி யுஜ்ஜதியேவ. தேஜோஸம்வட்டகப்பேஸு ஹி பத²மஜ்ஜா²னதலம் விவட்டமானம் ஸப்³ப³பத²மம் விவட்டதி. ஸம்வட்டமானம் ஸப்³ப³பச்சா² ஸம்வட்டதி. தஸ்மா விவட்டஸ்ஸ பச்சி²மட்³டே⁴ன ஸம்வட்டஸ்ஸச புப்³ப³ட்³டே⁴ன ஸஹ ஏகம் விவட்டட்டா²யிகப்பம் க³ஹேத்வா த்³வே அஸங்க்²யேய்யானி தஸ்மிம் தலே ஏகோ ஆயுகப்போதி ஸக்கா வத்துந்தி. து³தீய தலதோ பட்டா²ய பன மஹாகப்போவ க³ஹேதப்³போ³. அப்பகம் ஊனகம்வா அதி⁴கம்வா க³ணனூபக³ம் ந ஹோதீதி கத்வா உபட்³டே⁴ஹி ஸஹ ஸத்தகப்பானி ஸந்தா⁴ய ஆப⁴ஸ்ஸரானம் அட்ட²கப்பானீதி வுத்தம். ஏவம் சதுஸட்டி²கப்பானீதி ஏத்த²பீதி. ஆகாஸானஞ்சாயதனப⁴வம் உபக³ச்ச²ந்தீதி ஆகாஸானஞ்சாயதனுபகா³, தேஸம். ஏகோவ விஸயோ ஆரம்மணம் யஸ்ஸ தம் ஏகவிஸயம். ஏகஜாதியந்தி ஏகஸ்மிம் ப⁴வே. [படிஸந்தி⁴சதுக்கம்.]

145. ஜனேதீதி ஜனகம் உபத்த²ம்பே⁴தீதி உபத்த²ம்ப⁴கம். உபபீளேதீதி உபபீளகம். உபகா⁴தேதீதி உபகா⁴தகம். தத்த² ஜனகம் நாம படிஸந்தி⁴பவத்தீஸு விபாகக்க²ந்த⁴ கடத்தாரூபானம் நிப்³ப³த்திகா குஸலாகுஸலசேதனா. தத்த² படிஸந்தி⁴னிப்³ப³த்திகா கம்மபத²பத்தாவ த³ட்ட²ப்³பா³. பவத்தினிப்³ப³த்திகா பன கம்மபத²ம் பத்தாபி அபத்தாபி அந்தமஸோ பஞ்சத்³வாரிகஜவனசேதனாபி ஸுபினந்தே குஸலாகுஸலசேதனாபீதி. உபத்த²ம்ப⁴கம்னாம விபச்சிதும் அலத்³தோ⁴காஸாவா விபக்கவிபாகா வா ஸப்³பா³பி குஸலாகுஸலசேதனா. ஸா ஹி ஜனகபூ⁴தாபி ஸமானா அத்தனோவிபாகவாரதோ புரேவா பச்சா²வா ஸபா⁴ங்க³ம் கம்மந்த ரம்வாகம்மனிப்³ப³த்தக்க²ந்த⁴ஸந்தானம்வாஉபத்த²ம்ப⁴மானா பவத்ததி. யதா² க³ந்தா²ரப்³பே⁴ ரதனத்தயபணாமசேதனாதி. யம் பன விஸுத்³தி⁴மக்³கே³ உபத்த²ம்ப⁴கம் பன விபாகம் ஜனேதும் நஸக்கோதீதி வுத்தம். தம் அலத்³த⁴விபாகவாரம் ஸந்தா⁴ய வுத்தந்தி க³ஹேதப்³ப³ம். ந ஹி பச்சயஸாமக்³கி³யம் ஸதி கிஞ்சிகம்மம் பவத்திவிபாகமத்தஸ்ஸபி அஜனகம்னாம அத்தீ²தி. தத்த² கம்மந்தரஸ்ஸ உபத்த²ம்ப⁴னம்னாம அலத்³தோ⁴காஸஸ்ஸ அஞ்ஞஸ்ஸ ஜனககம்மஸ்ஸ ஓகாஸகரணம். தம் பன மரணாஸன்னகாலே பாகடம். ததா³ ஹி குஸலே ஜவிதே அஞ்ஞம் படிஸந்தி⁴ஜனகம் குஸலகம்மம் ஓகாஸம் லப⁴தி. அகுஸலே ஜவிதே அஞ்ஞம் அகுஸலகம்மந்தி. வுத்தஞ்ஹேதம் இதி வுத்தகே –

இமஸ்மிம் சாயம் ஸமயே, காலங்கரியாத² புக்³க³லோ;

ஸக்³க³ம்ஹி உபபஜ்ஜேய்ய, சித்தஞ்ஹிஸ்ஸ பஸாதி³தம்.

இமஸ்மிம் சாயம் ஸமயே, காலங்கரியாத² புக்³க³லோ;

நிரயே உபபஜ்ஜேய்ய, சித்தஞ்ஹிஸ்ஸ பதூ³ஸிதந்தி.

பவத்திகாலேபி ஏதம் ப³ஹுலம் லப்³ப⁴தியேவ. கம்மனிப்³ப³த்தக²ந்த⁴ஸந்தானஸ்ஸ உபத்த²ம்ப⁴னம்னாம அஞ்ஞேன லத்³தோ⁴காஸேன குஸலகம்மேனவா அகுஸலகம்மேனவா நிப்³ப³த்தஸ்ஸ க²ந்த⁴ஸந்தானஸ்ஸ ஜீவிதந்தராயே அபனேத்வா ஜீவிதபரிக்கா²ரே ஸமுதா³னேத்வா சிரதர பவத்திகரணம். யதா²ஹ –

அபி⁴வாத³னஸீலிஸ்ஸ, நிச்சம் வுத்³தா⁴பசாயினோ;

சத்தாரோ த⁴ம்மா வட்³ட⁴ந்தி, ஆயு வண்ணோ ஸுக²ம் ப³லந்தி.

ஏத்த² பன குஸலம்பி அகுஸலகம்மனிப்³ப³த்தஸ்ஸ க²ந்த⁴ஸந்தானஸ்ஸ அகுஸலம்பி குஸலகம்மனிப்³ப³த்தஸ்ஸ உபத்த²ம்ப⁴கம்னாம நத்தீ²தி நவத்தப்³ப³ம். அகுஸல கம்ம நிப்³ப³த்தஸ்ஸபி ஹி மஹித்³தி⁴கானம் நாக³ஸுபண்ணாதீ³னம் க²ந்த⁴ஸந்தானஸ்ஸ பவத்திகாலே புப்³ப³கதம் குஸலம் வுத்தனயேன உபப்³ரூஹனம் கரோதியேவ. ததா²குஸலகம்மனிப்³ப³த்தஸ்ஸபி கேஸஞ்சி வினிபாதிகாஸுராதீ³னம் க²ந்த⁴ஸந்தானஸ்ஸ பவத்திகாலே புப்³ப³கதம் அகுஸலம் சிரதரப்பவத்திம் கரோதியேவாதி. உபபீளகஉபகா⁴தகானிபி வுத்தப்பகாரா குஸலாகுஸல சேதனாயோஏவ. தாபி ஹி ஜனகபூ⁴தாபி ஸமானா அத்தனோ விபாகவாரதோ புரேவா பச்சா² வா விபாகவார க³ஹண காலேபி வா கம்மந்தரம்வா கம்மனிப்³ப³த்த க²ந்த⁴ஸந்தானம்வா து³ப்³ப³லதரம் கத்வாவா விபா³த⁴யமானா ஸப்³ப³ஸோவா உபச்சி²ந்த³மானா பவத்தந்தீதி. தத்த² உபபீளகே தாவ கம்மந்தரஸ்ஸ விபா³த⁴னம்னாம அஞ்ஞஸ்ஸ ஜனககம்மஸ்ஸ து³ப்³ப³லபா⁴வகரணம். கம்மஞ்ஹி நாம ஆயூஹனகாலே ப³லவந்தம்பி பச்சா² கதேன உஜுபடிபக்கே²ன கம்மந்தரேன விபா³தி⁴யமானம் புன விஹதஸாமத்தி²யம் ஹோதி. உபரிபூ⁴மி நிப்³ப³த்தகம்பி ஸமானம் ஹேட்டா²பூ⁴மியம் நிப்³ப³த்தேதி. மஹேஸக்கே²ஸு மஹித்³தி⁴கேஸு நிப்³ப³த்தகம்பி ஸமானம் அப்பேஸக்கே²ஸு நிப்³ப³த்தேதி. ததா² உச்சகுலேஸு நிப்³ப³த்தகம்பி நீசகுலேஸு. தீ³கா⁴யுகேஸு நிப்³ப³த்தகம்பி அப்பாயுகேஸு. மஹாபோ⁴கே³ஸு நிப்³ப³த்தகம்பி அப்பபோ⁴கே³ஸு. புரிஸத்த பா⁴வனிப்³ப³த்தகம்பி ஸமானம் இத்த²த்தபா⁴வம்வா நபும்ஸகபா⁴வம் வா நிப்³ப³த்தேதி. வண்ணஸம்பத்தினிப்³ப³த்தகம்பி து³ப்³ப³ண்ணபா⁴வம். இந்த்³ரியஸம்பத்தினிப்³ப³த்தகம்பி அந்த⁴ம்வா ப³தி⁴ரம்வா யம்கிஞ்சி இந்த்³ரியவேகல்லம். அங்க³பச்சங்க³ ஸம்பத்திஜனகம்பி ஹத்த²பாதா³தி³ அங்க³வேகல்லம் ஜனேதி. ததா² ஆயூஹனகாலே மஹானிரயேஸு நிப்³ப³த்தகம்பி அகுஸலம் பச்சா²கதேன ப³லவகுஸலேன விபா³தி⁴யமானம் உஸ்ஸதே³ஸுவா பேதேஸுவா நிப்³ப³த்தேதி. அஜாதஸத்து ராஜா சேத்த² நித³ஸ்ஸனம். உஸ்ஸதே³ஸு நிப்³ப³த்தகம்பி பேதேஸுவா திரச்சா² நேஸுவாதி ஆதி³ஸப்³ப³ம் வத்தப்³ப³ம்.

உபத்த²ம்ப⁴கம்பி தப்³பி³பரியாயேன வேதி³தப்³ப³மேவ. ததா² ஹி கம்மம் நாம கதகாலேது³ப்³ப³லம்பிஸமானம் பச்சா²ஸபா⁴கே³னப³லவதாகுஸலேனவா அகுஸலேனவா உபத்த²ம்பீ⁴யமானம் ஸுட்டு² ப³லவம் ஹோதீதி. கம்மனிப்³ப³த்த க²ந்த⁴ஸந்தானஸ்ஸ விபா³த⁴னம்னாம அஞ்ஞேன கம்மேன நிப்³ப³த்தஸ்ஸ ஸத்தஸ்ஸ க³ஹிதபடிஸந்தி⁴தோ பட்டா²ய யதா³கதா³சி ஸரீரே நானாஅந்தராயே உப்பாதே³த்வாவா டா²னந்தரகே²த்தவத்து² கோ³மஹிம்ஸ த⁴ன த⁴ஞ்ஞபோ⁴க³ ஸம்பத்தீனம் புத்ததா³ரஞாதி மித்தானஞ்ச விபத்திம் கத்வாவா து³க்கு²ப்பத்தி கரணம். து³வித⁴ஞ்ஹி கம்மப²லம்னாம விபாகப²லம் நிஸந்த³ப²லந்தி. தத்த² விபாகப²லம்னாம கம்மகாரகஸ்ஸேவ ஹோதி. ந அஞ்ஞஸ்ஸ. நிஸந்த³ ப²லம் பன அஞ்ஞேஸம்பி ஸாதா⁴ரணமேவ. த⁴ம்மபதே³ ஆனந்த³ஸேட்டி²வத்து² ஏத்த² வத்தப்³ப³ம். சக்கா²தீ³ஸு பன கம்மஜஸந்ததி²ஸீஸேஸு யேன கம்மேன யம்கிஞ்சி ஏகம்வா த்³வேவா தீணிவா ஸப்³ப³ஸோ பி⁴ஜ்ஜந்தி. சக்கு²பாலத்தே² ராதீ³னம் விய. தம் கம்மம் உபகா⁴தகே ஸங்க³ஹிதந்தி யுத்தம். உபகா⁴ தகந்தி பன உபச்சே²த³கந்திச அத்த²தோ ஏகம். ததா² ஹி மஜ்ஜி²மட்ட² கதா²யம் பத²மம் உபச்சே²த³கனாமேன வத்வா உபகா⁴தகந்திபி ஏதஸ்ஸேவ நாமந்தி வுத்தம். அங்கு³த்தரட்ட²கதா²யம் பத²மம் உபகா⁴தகனாமேன வத்வா உபச்சே²த³கந்திபி தஸ்ஸேவேதம் நாமந்தி வுத்தம். விஸுத்³தி⁴ மக்³கே³பி மரணஸ்ஸதினித்³தே³ஸே ததே³வ கம்முபச்சே²த³ககம்மந்தி வுத்தம். இத⁴ச பரதோ உபச்சே²த³ககம்முனாதி வக்க²தி.

இமஸ்ஸபி கம்மந்தருபச்சே²த³னம் மரணாஸன்னகாலே பாகடம். ததா³ஹி பத²மம் பாபகம்மப³லேன து³க்³க³தினிமித்தே உபட்ட²ஹந்தே புன கல்யாண கம்மம் தம் படிபா³ஹித்வா ஸுக³தினிமித்தம் த³ஸ்ஸேத்வா ஸக்³கே³ நிப்³ப³த்தேதி. கல்யாணகம்மப³லேன ஸுக³தினிமித்தே உபட்ட²ஹந்தே புன பாபகம்மம் தம் படிபா³ஹித்வா து³க்³க³தினிமித்தம் த³ஸ்ஸேத்வா அபாயே நிப்³ப³த்தேதி. து³ட்ட² கா³மணிரஞ்ஞோ ஸோணத்தே²ரபிதுச வத்தூ²னி கதே²தப்³பா³னி. அங்கு³த்தரட்ட²கதா²யம் பன குஸலாகுஸலகம்மக்க²ய கரஸ்ஸ மக்³க³கம்மஸ்ஸபி கம்மந்தருபச்சே²த³கஹா வுத்தா. அங்கு³லிமாலத்தே²ராதீ³னம் வியாதி. இமஸ்மிம் ப⁴வே லத்³தா⁴னி மஹக்³க³தகம்மானி யேன அகுஸலேன பரிஹாயந்தி. தஸ்ஸபி கம்மந்தருபச்சே²த³கே ஸங்க³ஹோ யுத்தோ. தே³வத³த்தஸ்ஸ வியாதி. கம்மனிப்³ப³த்தக²ந்த⁴ஸந்தானுபச்சே²த³னம் பன தஸ்மிம் தஸ்மிம் ப⁴வே ஆயு கம்மேஸு விஜ்ஜமானேஸு லத்³தோ⁴காஸஸ்ஸ கஸ்ஸசி அபராத⁴கம்மஸ்ஸ ப³லேன கலலகாலதோ பட்டா²ய அந்தராவ கேனசிரோகே³னவா ப⁴யேனவா உபக்கமேனவா மரந்தானம் வஸேன வேதி³தப்³ப³ம்.

ஏத்த²ச கம்மந்தரஸ்ஸவா கம்மனிப்³ப³த்தக²ந்த⁴ஸந்தானஸ்ஸவா உபத்த²ம்ப⁴னா தீ³னி ஸந்தா⁴ய இமேஸம் சதுன்னம்பி கம்மானம் குஸலாகுஸலபா⁴வோ விஸுத்³தி⁴மக்³கே³ அங்கு³த்தரட்ட²கதா²யஞ்ச வுத்தோ. மஜ்ஜி²மட்ட²கதா²யம் பன ஸம்வண்ணேதப்³ப³ஸுத்தானுரூபம் கம்மனிப்³ப³த்தக²ந்த⁴ஸந்தானஸ்ஸேவ உபத்த²ம்ப⁴னாதீ³னி ஸந்தா⁴ய உபத்த²ம்ப⁴கஸ்ஸ குஸலபா⁴வோ உபபீளகஉபகா⁴தகானம் அகுஸலபா⁴வோ வுத்தோ. ஸோ பன மஜ்ஜி²மடீகாயம் அங்கு³த்தரடீகாயஞ்ச அருச்சமானோ விய வுத்தோ. மஹாடீகாயம் பன ஸோ கேசி வாதோ³பி கதோ. தத்த²பன ஸம்வண்ணேதப்³ப³ஸுத்தானுரூபம் வுத்தத்தா விஸும் பாளினயோதி த³ட்ட²ப்³போ³. ந ச கேசிவாதோ³ கத்தப்³போ³. ஸுத்தஸ்மிம்ஹி அப்பாயுகஸம்வத்தனிகாஏஸா மாணவபடிபதா³, யதி³த³ம் பாணாதிபாதீ ஹோதீதிஆதி³னா உபகா⁴தகம் பாணாதிபாதவஸேனேவ வுத்தம். உபபீளகஞ்ச ப³த்வாபா³த⁴ஸம்வத்தனிகா ஏஸா மாணவ படிபதா³, யதி³த³ம் ஸத்தானம் விஹேட²கஜாதிகோ ஹோதீதிஆதி³னா விஹிம்ஸாதீ³னம் வஸேன வுத்தம். உபத்த²ம்ப⁴கஞ்ச தீ³கா⁴யுகஸம்வத்தனிகா ஏஸா மாணவ படிபதா³. யதி³த³ம் பாணாதிபாதம் பஹாய பாணாதிபாதா படிவிரதோ ஹோதீதிஆதி³னா பாணாதிபாதவிரதிஆதீ³னம் வஸேன வுத்தம். ஸப்³ப³ஞ்சேதம் மனுஸ்ஸத்தம் ஆக³தஸ்ஸேவ ஸத்தஸ்ஸ வஸேனாதி ஏவம் விஸும் பாளினயோ வேதி³தப்³போ³தி. மஹாடீகாயம் பன அங்கு³த்தரடீகாயஞ்ச கம்மந்தருபத்த²ம்ப⁴னாதீ³னி அனிச்ச²ந்தேஹி ஜனகாதி³பா⁴வோனாம விபாகம் படிஇச்சி²தப்³போ³. நகம்மந்தி விபாகஸ்ஸேவ உபகா⁴தகதா யுத்தா விய தி³ஸ்ஸதீதி வுத்தம்.

கிச்சவஸேனாதி ஜனனம் உபத்த²ம்ப⁴னம் உபபீளனம் உபச்சி²ந்த³னந்தி சதுன்னம் கிச்சானம் வஸேன. தத்த² ஏகா பாணாதிபாதசேதனா சத்தாரி கிச்சானி ஸாதே⁴தி. ஸா ஹி யாவ விபச்சிதும் ஓகாஸம் நலப⁴தி. தாவ உபத்த²ம்ப⁴னாதீ³ஸு தீஸு கிச்சேஸு யம்கிஞ்சி லத்³த⁴பச்சயம் கிச்சம் கரோதி. யதா³ விபச்சிதும் ஓகாஸம் லப⁴தி. ததா³ ஏகாய சேதனாய ஏகாஏவ படிஸந்தி⁴ ஹோதீதி ஏவம் ஸாகேதபஞ்ஹே வுத்தனயேன ஏகம் அபாயப⁴வம் ஜனேதி. ததோ பரம் பன படிஸந்தி⁴ஜனனகிச்சம் நத்தி². பவத்தி விபாகஜனனேன ஸஹ இதரானி தீணி கிச்சானி ப⁴வஸதஸஹஸ்ஸேபி கப்பஸதஸஹஸ்ஸேபி ஸாதே⁴தியேவ. த⁴ம்மதி³ன்னாயனாம உக்³க³ஸேன ரஞ்ஞோ தே³வியா வத்து² ஏத்த² வத்தப்³ப³ம். ஸா பன யதா³ அத்தனோ விபாகவாரதோ புரே அரியபூ⁴தஸ்ஸவா புது²ஜ்ஜனபூ⁴தஸ்ஸபி கல்யாண சித்தஸமங்கி³னோவா உபச்சே²த³னம் கரோதி. ததா³ உபச்சி²ந்தி³த்வா கம்மந்த ரஸ்ஸேவ ஓகாஸம் கரோதி. ஸயம் விபாகம் நஜனேதி. யதா³ பன பாபசித்தஸமங்கி³னோ க²ந்த⁴ஸந்தானம் உபச்சி²ந்த³தி. ததா³ஏவ உபச்சி²ந்தி³த்வா அத்தனோ விபாகம் ஜனேதி. ஸகிம் லத்³த⁴படிஸந்தி⁴வாரதோ பன பட்டா²ய அனேகேஸு அத்தபா⁴வ ஸதஸஹஸ்ஸேஸுபி உபச்சே²த³னாதீ³னியேவ கரோதி. ஏத்த² மஹாமோக்³க³லான த்தே²ர வத்து² ஸாமாவதி வத்து² வக்³கு³முதா³தீரியபி⁴க்கு² வத்து² து³ஸ்ஸிமார கலாபு³ராஜவத்தூ²னி கதே²தப்³பா³னி. யஸ்மா பன இத³ம் உபச்சே²த³ககம்மம் நாம திரச்சா²னக³தானம் ப³ஹுலம் லப்³ப⁴தி. தஸ்மா ஸுட்டு² ப³லவம் அகுஸலகம்மம் து³ப்³ப³லஸ்ஸ அகுஸலகம்மஸ்ஸவா அகுஸலகம்மனிப்³ப³த்தக²ந்த⁴ஸந்தானஸ்ஸவா உபச்சே²த³கம்னாம ந ஹோதீதி ந வத்தப்³ப³ம். தேனேவ ஹி மஜ்ஜி²மட்ட²கதா²யம் ப³ஹுகஸ்மிஞ்ஹி அகுஸலகம்மே ஆயூஹிதே ப³லவகம்மம் து³ப்³ப³ல கம்மஸ்ஸ விபாகம் படிபா³ஹித்வா அத்தனோ விபாகஸ்ஸ ஓகாஸம் கரோதீதி வுத்தம்.

அபிச பவத்தியம்பி கம்மந்தரஜனிதம் ப⁴வங்க³ஸந்தானம் அனுபச்சி²ந்தி³த்வா பஞ்சஸு சக்கு² ஸோத கா⁴ன ஜிவ்ஹா பா⁴வ த³ஸக ஸங்கா²தேஸு ஸந்ததி ஸீஸேஸு அஞ்ஞதரஸ்ஸ ஸந்ததிஸீஸஸ்ஸ ஸப்³ப³ஸோ உபச்சி²ந்த³னம்பி இமஸ்ஸேவ கிச்சந்தி யுத்தம். யம் பன மஹாடீகாயம் அங்கு³த்தரடீகாயஞ்ச உபபீளிகம் அஞ்ஞஸ்ஸ விபாகம் சி²ந்த³தி. ந ஸயம் அத்தனோ விபாகம் ஜனேதீதி வுத்தம். தம் அட்ட²கதா²யம் ஸுக²து³க்க²ம் பீளேதி, அத்³தா⁴னம் பவத்திதும் ந தே³தீதி இத³ம் தி³ஸ்வா வுத்தம் ஸியா. அத்³தா⁴னம் பவத்திதும் நதே³தீதி ஏத்த² பன ஸுக²ஸந்தானம்வா து³க்க²ஸந்தானம்வா சிரகாலம் பவத்திதும் நதே³தி இச்சேவத்தோ². ந பன உபகா⁴தகம் விய ப⁴வங்க³ஸந்தானேன ஸஹ அஞ்ஞஸ்ஸ கம்மஸ்ஸ விபாகம் சி²ந்த³தீதி.

[143] யம்பன விபா⁴வனியம்

‘‘ஜனகம் கம்மந்தரஸ்ஸ விபாகம் அனுபச்சி²ந்தி³த்வாவ விபாகம் ஜனேதி. உபகா⁴தகம் உபச்சே²த³னபுப்³ப³கந்தி இத³ம் தாவ அட்ட²கதா²ஸு ஸன்னிட்டா²னந்தி வுத்தம்’’. தம் ந ஸுந்த³ரம்.

இத⁴ புப்³ப³கதேன உபச்சே²த³னககம்மேன மரித்வா ஸக்³கே³ நிப்³ப³த்தானம் வத்தூ²னம் அட்ட²கதா²ஸுயேவ ஆக³தத்தாதி.

[144] யஞ்ச தத்த²

அபரே பன ஆசரியா வத³ந்தீதிஆதி³னா உபகா⁴தகஸ்ஸ ஸயம் விபாகனிப்³ப³த்தகத்தா பா⁴வவசனம் வுத்தம். தம்பி ந ஸுந்த³ரம்.

தேனேவ கம்மேன அபாயே நிப்³ப³த்தானம் து³ஸ்ஸிமார கலாபு³ராஜா தீ³னம் தஸ்ஸ கம்மஸ்ஸ உபச்சே²த³ககம்மபா⁴வேன அட்ட²கதா²ஸு ஆக³தத்தாதி. [ஜனகசதுக்கம்]

146. க³ருகந்தி அஞ்ஞேன கம்மேன படிபா³ஹிதும் அஸக்குணேய்யம் குஸலபக்கே² மஹக்³க³தகம்மம் அகுஸலபக்கே² நியதமிச்சா²தி³ட்டி²யா ஸஹ பஞ்சானந்தரியகம்மம். ஏத்த² ஸியா. மஹக்³க³தகம்மந்தி கஸ்மா வுத்தம். தஞ்ஹி பமாத³வஸேனவா நீவரணத⁴ம்மபவத்தியாவா பரிஹாயியமானம் நிகந்திப³லேனவா படிபா³ஹியமானம் விபாகம் ந தே³தீதி. ததா² ஏகஸ்ஸ ப³ஹூஸு ஆனந்தரியகம்மேஸு கதேஸு ஏகஸ்மிம் விபச்சந்தே ஸேஸானி ந விபச்சந்தீதி. வுச்சதே, மஹக்³க³தகம்மம் தாவத²பேத்வா பமாத³த⁴ம்மனீவரணத⁴ம்மனிகந்தித⁴ம்மே அத்தனோ ப³லவதரஞ்ச மஹக்³க³தகம்மந்தரம் அஞ்ஞேன புஞ்ஞகம்மேன அப்படிபா³ஹனியட்டே²ன க³ருகம் நாம ஹோதி. ஆனந்தரியகம்மானி பன த²பேத்வா அத்தனோ ப³லவதரம் ஆனந்தரியகம்மம் அஞ்ஞேன கேனசி த⁴ம்மேன அப்படிபா³ஹனியட்டே²னாதி ஏவம் யதா²ரஹம் தேஸம் க³ருகதா வேதி³தப்³பா³தி. ஆஸன்னந்தி மரணகாலே அனுஸ்ஸரிதம் ததா³ கதஞ்ச. தத்த² ததா³கதந்தி அந்திம ஜவனவீதி²தோ புப்³ப³பா⁴கே³ ஆஸன்னே கதம் யம்கிஞ்சி குஸலாகுஸலகம்மம். மிச்சா²தி³ட்டி²கம்மம் பன விபஸ்ஸனாதி³வஸேன பவத்தம் ஸம்மாதி³ட்டி²கம்மஞ்ச அந்திமஜவனவீஸியம்பி கதந்தி க³ஹேதப்³ப³ம். யதா²ஹ-மரணகாலே வாஸ்ஸ ஹோதி மிச்சா²தி³ட்டி² ஸம்மாதி³ட்டி² ஸமத்தா ஸமாதி³ன்னாதி. ஏதேன ததோ மிச்சா²தி³ட்டி²கம்மதோ அஞ்ஞம் அந்திமஜவனவீதி²யம் பவத்தம் கம்மம் படிஸந்தி⁴ம் ஜனேதும் ந ஸக்கோதீதி ஸித்³த⁴ம் ஹோதீதி. ஆசிண்ணந்தி தீ³க⁴ரத்தம் அபி⁴ண்ஹஸோ கதம். ஸகிம் கரித்வாபிவா பச்சா² புனப்புனம் ஸோமனஸ்ஸஜனகம் ஸந்தாபஜனகஞ்ச. கடத்தாகம்மந்தி காரியித்தா²தி கம்மந்தி ஏவம் கதகாரணாஏவ கம்மந்தி வத்தப்³ப³ம் கம்மம். க³ருகாதி³பா⁴வேன வத்தப்³ப³ம் கம்மம் ந ஹோதீதி அத்தோ². தத்த² புரிமானி தீணி இமஸ்மிம் ப⁴வே கதானி உபபஜ்ஜவேத³னீயகம்மானிஏவ. கடத்தாகம்மம் பன அதீதப⁴வேஸு கதேஹி அபரபரியாயவேத³னீயேஹி ஸஹ இமஸ்மிம் ப⁴வே கதம் க³ருகா ஸன்னாசிண்ணபா⁴வரஹிதம் கம்மபத²பத்தம் யம்கிஞ்சி உபபஜ்ஜவேத³னீயகம்மம். மஹாடீகாயம் பன கடத்தாகம்மம் புரிம ஜாதீஸு கதம்ஏவ க³ஹிதம். தம் அட்ட²கதா²ய ந ஸமேதி. ஏதேஹி பன தீஹி முத்தம் புனப்புனம் லத்³தா⁴ஸேவனம் கடத்தாவா பன கம்மம்னாம ஹோதீதி ஹி வுத்தம். ந ச அதீதப⁴வேஸு கதானி மாதுகா⁴தகாதீ³னிபி அபரபரியாய கம்மானி ஏதேஹி தீஹி முத்தானீதிவா அமுத்தானீதிவா புனப்புனம் லத்³தா⁴ஸேவனானீதிவா அலத்³தா⁴ஸேவனானீதிவா ஸக்கா விஸேஸேதும். ததா³ ஹி தானி க³ருக கம்மஸந்தானே பவத்தானிபி ஹோந்தி. ஆஸன்னவசிண்ணகம்மஸந்தானே பவத்தானிபீதி.

அங்கு³த்தரட்ட²கதா²யஞ்ச ஏதேஹி பன தீஹி முத்தம் அஞ்ஞாணவஸேனகதம் கடத்தாவா பன கம்மம்னாமாதி வுத்தம். ந தானி அஞ்ஞாணவஸேன கபா⁴னீதி ஸக்கா விஸேஸேதும். தானி ஹி புரிமப⁴வேஸு அஞ்ஞாண வஸேன கதானிபி ஹோந்தி. ஞாணவஸேன கதானிபீதி. தானி பன விஸேஸனானி இமஸ்மிம் ப⁴வே கதானம் க³ருகாதீ³ஹி தீஹி முத்தானம் ஸத்தமஜவன கம்மானம் வஸேன வுத்தானீதி தேஹி ஸஹ புரிமஜாதீஸு கதானி அபரபரியாய கம்மானி கடத்தா கம்மம்னாமாதி வேதி³தப்³பா³னி. ஏவஞ்ச கத்வா யத்த² தம்புப்³ப³கதம் கம்மந்தி ஆக³தம். தத்த²பி இமஸ்மிம் ப⁴வேவா அதீதப⁴வேஸுவா புப்³ப³காலே கதந்தி அத்தோ² வேதி³தப்³போ³தி. இமேஸு பன சதூஸு கம்மேஸு விஜ்ஜமானேஸு க³ருகமேவ அனந்தரே ப⁴வே படிஸந்தி⁴ம் தே³தி. க³ருகே அஸதி ஆஸன்னம். ஆஸன்னே அஸதி ஆசிண்ணம். ஆசிண்ணே அஸதி கடத்தாகம்மம். தேனாஹ பாகதா³னபரியாயேனாதி. பாகதா³னவாரேனாதி அத்தோ². ஏத்த² ஸியா. கஸ்மா இத⁴ ஆஸன்னம் ஆசிண்ணதோ பத²மம் வுத்தம். நனு பாளியம் ஆஸன்னதோ ஆசிண்ணமேவ பத²மம் வுத்தம். யதா²ஹ-யம் க³ருகம் யம் ப³ஹுலம். யதா³ஸன்னம். கடத்தாவா பன கம்மந்தி. அட்ட²கதா²ஸுச தேனேவ கமேன பாகதா³னவாரோ விஹிதோதி. வுச்சதே, ஸபா⁴வதோ ப³லவது³ப்³ப³லக்கமேன பாளியம் ஆசிண்ணம் பத²மம் வுத்தம். ஸோ பன கமோ கதா³சி பாகதா³னபரியாயோபி ஸம்ப⁴வதீதி கத்வா அட்ட²கதா²ஸு தேனேவ கமேன பாகதா³னவாரோ விஹிதோ. ஆஸன்னம்பி ஹிஸமானம் சித்தம் தோஸேதும்வா ஸந்தாபேதும்வா அஸக்கோந்தம் ஹுத்வா து³ப்³ப³லம் ப³லவதோ ஆசிண்ணஸ்ஸ நிவத்தகம் ந ஹோதீதி. யஸ்மா பன மஹாகம்மவிப⁴ங்க³ஸுத்தே புப்³பே³வாஸ்ஸதம் கதம் ஹோதி கல்யாணகம்மம் ஸுக²வேத³னீயம். பச்சா²வாஸ்ஸதம் கதம் ஹோதி கல்யாணகம்மம் ஸுக²வேத³னீயம். மரணகாலேவாஸ்ஸ ஹோதி ஸம்மாதி³ட்டி² ஸமத்தா ஸமாதி³ன்னாதி ஏவம் ஆசிண்ணது³ச்சரிதஸ்ஸபி ஏகச்சஸ்ஸ ஆஸன்னேன கல்யாண கம்மேன ஸக்³க³க³மனம் வுத்தம். ததா² புப்³பே³வாஸ்ஸதம் கதம் ஹோதி பாபகம்மம் து³க்க²வேத³னியம்.ல. மிச்சா²தி³ட்டி² ஸமத்தா ஸமாதி³ன்னாதி ஏவம் ஆசிண்ண ஸுசரிதஸ்ஸபி ஏகச்சஸ்ஸ ஆஸன்னேன பாபகம்மேன அபாயக³மனம் வுத்தம். யஸ்மாச உபி⁴ன்னம்பி ப³லவபா⁴வே ஸதி ஆஸன்னமேவ பரியத்தம் ப⁴விதும் அரஹதி. தஸ்மா இத⁴ தே²ரேன ஆஸன்னமேவ பத²மம் வுத்தந்தி த³ட்ட²ப்³ப³ம். ஏத்த²ச புப்³பே³வாஸ்ஸகதம் ஹோதீதி இத³ம் ஆஸன்னானுஸ்ஸரிதகம்மவஸேன வுத்தந்தி வேதி³தப்³ப³ம். தம்ப³தா³டி²கனாமஸ்ஸ சோரகா⁴தகஸ்ஸ மஹாவாதகாலனாமஸ்ஸச உபாஸகஸ்ஸ வத்து² ஏத்த² கதே²தப்³ப³ந்தி.

[145] விபா⁴வனியம் பன

அட்ட²கதா²யம் ஆக³தம் ஜரக்³க³வோபமம் த³ஸ்ஸேத்வா ஆஸன்னமேவ பத²மம் விபாகம் தே³தீதி ஏகம்ஸேன வுத்தம். தம் ந ஸுந்த³ரம்.

ந ஹி அட்ட²கதா²யம் ஏவம் ஏகம்ஸேன வுத்தம். நச உட்டா²தும்பி அஸக்கோந்தோ ஸோ ஜரக்³க³வோ பஜத்³வாரஸ்ஸ ஆஸன்னே டி²தோபி பத²மதரம் நிக்க²மிஸ்ஸதீதி. [க³ருகசதுக்கம்]

147. தி³ட்ட²த⁴ம்மோ வுச்சதி பச்சக்க²பூ⁴தோ பச்சுப்பன்னோ அத்தபா⁴வோ. வேதி³தப்³ப³ம் அனு ப⁴விதப்³ப³ந்தி வேத³னீயம். ப²லம். தி³ட்ட²த⁴ம்மே வேத³னீயம் ப²லம் ஏதஸ்ஸாதி தி³ட்ட²த⁴ம்மவேத³னீயம்.

[146] விபா⁴வனியம் பன

‘‘தி³ட்ட²த⁴ம்மே வேதி³தப்³ப³ம் விபாகானுப⁴வன வஸேனாதி தி³ட்ட²த⁴ம்மவேத³னீய’’ந்தி வுத்தம். தம் ந ஸுந்த³ரம்.

தி³ட்டே²வ த⁴ம்மே விபாகம் படிஸம்வேதே³தீதி ஹி பாளியம் வுத்தம். ஏத்த² ஹி விபாகம் படிஸம்வேதே³தீதி ஏதேன இத⁴ வேத³னீயஸத்³தோ³ கம்மஸாத⁴னோ விபாகாதிதே⁴ய்யோச ஹோதீதி த³ஸ்ஸேதி. ஏவஞ்ச ஸதி இத⁴ அஞ்ஞபத³த்த²ஸமாஸோ ஏவ லப்³ப⁴தி. ந உத்தரபத³த்த²ஸமாஸோதி. தி³ட்ட²த⁴ம்மம் உபேச்ச தஸ்ஸ அனந்தரே பஜ்ஜித்வா பாபுணித்வா வேதி³தப்³ப³ம் ப²லம் ஏதஸ்ஸாதி உபபஜ்ஜவேத³னீயம். தேனேவ ஹி அட்ட²கதா²யம் உபபஜ்ஜ ஸத்³த³ஸ்ஸ அத்த²ம் வத³ந்தேன உபபஜ்ஜித்வாதி வுத்தம். ஸுத்தபதே³ஸு பன உபபஜ்ஜேவாதி பாடோ² தி³ட்டோ². தஸ்மா தி³ட்ட²த⁴ம்மஸ்ஸ ஸமீபே அனந்தரே பஜ்ஜிதப்³போ³ க³ந்தப்³போ³தி உபபஜ்ஜோ. து³தீயோ அத்தபா⁴வோ உபபஜ்ஜேவேதி³தப்³ப³ம் ப²லம் ஏதஸ்ஸாதி உபபஜ்ஜவேத³னீயந்தி ஏவமத்தோ² பாட²ஸ்ஸ வஸேன வேதி³தப்³போ³. உபபஜ்ஜாதிவா அனந்தரே ப⁴வே பவத்தோ ஏகோ நிபாதோ. யதா² பச்சாதி.

[147] விபா⁴வனியம் பன

‘‘தி³ட்ட²த⁴ம்மதோ அனந்தரம் உபபஜ்ஜித்வா வேதி³தப்³ப³ந்தி உபவஜ்ஜவேத³னீய’’ந்தி வுத்தம். தம் ந ஸுந்த³ரம்.

உபபஜ்ஜவா விபாகம் படிஸம்வேதே³தீதி ஹி பாளியம் வுத்தம். பரியாயதி புனப்புனம் ஆக³ச்ச²தீதி பரியாயோ. அபரோச ஸோ பரியா யோசாதி அபரபரியாயோ. தி³ட்ட²த⁴ம்மா நாக³தா நந்தர ப⁴வேஹி அஞ்ஞோ அத்த பா⁴வ பரிவத்தோ. தே நேவ ஹி மஹாடீகாயம் அங்கு³த்த ரடீகாயஞ்ச அபரபரியாயேதி தி³ட்ட²த⁴ம்மானந்தரானாக³ததோ அஞ்ஞஸ்மிம் அத்தபா⁴வபரியாயே அத்தபா⁴வபரிவத்தேதி வுத்தம். ஸுத்தபதே³ஸு பன அபரேவா பரியாயேதிச அபராபரேவா பரியாயேதிச த்³விதா⁴ பாடோ² தி³ட்டோ². தத்த² பச்சி²மஸ்மிம் பாடே²ஸதி இத⁴ மஜ்ஜே² ஏகஸ்ஸ அபரஸத்³த³ஸ்ஸ லோபோ த³ட்ட²ப்³போ³. ஸங்க³ஹபோட்ட²கேஸு பன மஜ்ஜே² தீ³கோ⁴ யாகாரனட்டோ²ச அபராபரியஸத்³தோ³ தி³ஸ்ஸதி. ஸோ ப³ஹூஸு அட்ட²கதா²ஸு நத்தி². பாளியாச ந ஸமேதி.

[148] யஞ்ச விபா⁴வனியம்

‘‘அபரே அபரே தி³ட்ட²த⁴ம்மதோ அஞ்ஞஸ்மிம் யத்த²கத்த²சி அத்தபா⁴வே வேதி³தப்³ப³ம் கம்மம் அபராபரிய வேத³னீய’’ந்தி வுத்தம். தத்த² தி³ட்ட²த⁴ம்மதோதி இத³ம் தாவ நயுஜ்ஜதி.

ந ஹி மஜ்ஜே² உபபஜ்ஜப⁴வம் வஜ்ஜேத்வா பத²மோ தி³ட்ட²த⁴ம்மோவ இத⁴ ததீயே பதே³ அதி⁴கதோதி யுத்தோ.

[149] அத்த²தோ பன ப்³யஞ்ஜனதோச ஸப்³ப³ம் பாளியா ந ஸமேதி.

அபரேவா பரியாயே விபாகம் படிஸம்வேதே³தீதி ஹி பாளியம் வுத்தம். அபராபரேவா பரியாயேதிவா. அஹோஸினாமகம் கம்மம் அஹோஸிகம்மம். அஹோஸிகம்மம். ப⁴விஸ்ஸதிகம்மம். அத்தி²கம்மம். நதஸ்ஸ விபாகோதி ஏவம் வுத்தபாட²வஸேன ஆசரியேஹி ததா²க³ஹிதனாம தே⁴ய்யம் ஸப்³ப³ஸோ அலத்³த⁴விபாகவாரம் கம்மந்தி வுத்தம் ஹோதி. தத்த² ஸத்தஸு குஸலாகுஸலஜவனேஸு பத²மஜவனசேதனா தி³ட்ட²த⁴ம்மவே த³னீயம்னாம. ஸா ஹி அலத்³தா⁴ஸேவனதாய ஸப்³ப³து³ப்³ப³லத்தா அசிரட்டி² திகாச ஹோதி அப்பதரவிபாகாசாதி. பச்சயம் லத்³தா⁴ தி³ட்ட²த⁴ம்மேஏவ அஹேதுகமத்தம் ப²லம் த³த்வா விக³ச்ச²தி. ந ஏகம்பி மரணகாலம் அதிக்கம்ம ஸந்தானம் அனுப³ந்தி⁴தும் ஸக்கோதி. பச்சயம் பன அலப⁴மானா அஹோஸிகம்னாம ஹோதி. பச்சயோதிச அத்தனோ ப²லுப்பத்தியா ஓகாஸதா³யகோ நானா இரியாபதே²ஸு இட்டா²னிட்டா²ரம்மணஸமா க³மாதி³கோ யோகோசி பச்சயோபி யுஜ்ஜதியேவ. டீகாஸு பன படிபக்கே²ஹி அனபி⁴பூ⁴ததாயாதிஆதி³னா மஹந்தம் கத்வா பச்சயோ வுத்தோ. ஸோ காகவலியாதீ³னம் விய பாகடதரப²லதா³னம் ஸந்தா⁴ய வுத்தோதி வேதி³தப்³போ³. ந ஹி கம்மபத²ஜவனஸந்தானே பவத்தமானா இதராபிவா பத²மஜவனசேதனா இட்டா²னிட்ட²ஸமாயோக³வஸேனபி லத்³த⁴ பச்சயா காசி அத்தனோ ப³லானுரூபம் ப²லம் ந தே³தீதி அத்தி². நசதாய தி³ய்யமானம் ஸப்³ப³ம்பி ப²லம் மஹாஜனஸ்ஸவா கம்மகாரகஸ்ஸேவ வாபாகடமேவ ஸியாதி ஸக்கா வத்துந்தி. யம் பன ஞாணவிப⁴ங்க³ட்ட² கதா²யம் ஏகம் தி³ட்ட²த⁴ம்மவேத³னீயம் விபாகம் தே³தி. ஸேஸானி அவிபாகானீதி வுத்தம். தம் அலத்³த⁴பச்சயானி ஸேஸானி ஸந்தா⁴ய வுத்தந்தி க³ஹேதப்³ப³ம். ந ஹி ஏகோ தி³ட்ட²த⁴ம்மோ ஏகஸ்ஸேவ தி³ட்ட²த⁴ம்மவேத³னீ யஸ்ஸ ஓகாஸோதி ஸக்கா விஞ்ஞாதுந்தி. அத்த²ஸாதி⁴கா பன ஸன்னிட்டா²பகபூ⁴தா ஸத்த²மஜவனசேதனா உபபஜ்ஜ வேத³னீயம்னாம. ஸா ஹி லத்³தா⁴ஸேவனதாய தோ²கம் ஸாரபூ⁴தா ஹோதீதி பத²மசேதனா விய ஸீக⁴தரம் விபச்சிதும் நஸக்கோதி. ப³லவதீச ஹோதீதி ஏகம் ப⁴வம் ஜனேதும் ஸக்கோதி. பதித ஜவ நேஸு பன அந்திமஜவனதாய மஜ்ஜி²மசேதனாயோ விய சிரட்டி²திகா ந ஹோதீதி பச்சயம் லத்³தா⁴ அனந்தரே ஏவ ப⁴வே படிஸந்தி⁴ம்வா பவத்தி ப²லமேவவா த³த்வா விக³ச்ச²தி. அலத்³தா⁴ பன அஹோஸிகம்மமேவ ஹோதி. ந து³தீயம் மரணகாலம் அதிக்கமிதும் ஸக்கோதி. யம்பன ஞாணவிப⁴ங்க³ட்ட²கதா²யம் ஏகம் உபபஜ்ஜவேத³னீயம் படிஸந்தி⁴ம் ஆகட்³ட⁴தி. ஸேஸானி அவிபாகானீதி வுத்தம். தம்பி படிஸந்தி⁴விபாகம் ஸந்தா⁴ய வுத்தந்தி க³ஹேதப்³ப³ம். ஸேஸானிபி ஹி யாவ து³தீயசுதி நாக³ச்ச²தி. தாவ லத்³த⁴பச்சயானி பவத்தி விபாகம் தே³ந்தியேவ. இத⁴ மிஸ்ஸக கம்மானி கத்வா அனந்தரப⁴வே மிஸ்ஸககம்மப²லம் அனுபோ⁴ந்தானி வேமானிக பேதவத்தூ²னி அஞ்ஞானிச தம்தம்கம்மம் கத்வா அனந்தரப⁴வே ஏவ ஸுக³தி யம் கப்³பி³பாகபூ⁴தம் விபத்திம் அனுப⁴வந்தானி து³க்³க³தியம்வா தப்³பி³பாகபூ⁴தம் ஸம்பத்திம் அனுப⁴வந்தானி அனேகானி வத்து²ஸதானி ஏத்த² கதே² தப்³பா³னீதி.

[150] யம் பன விபா⁴வனியம்

‘‘ஸாச படிஸந்தி⁴ம் த³த்வாவ பவத்திவிபாகம் தே³தி. படிஸந்தி⁴யா பன அதி³ன்னாய பவத்திவிபாகம் தே³தீதி நத்தீ²’’தி வுத்தம். தம் ந யுஜ்ஜதி.

யதா²வுத்தவத்தூ²ஹி ஸத்³தி⁴ம் விருஜ்ஜ²னதோ.

[151] யஞ்ச தத்த²

‘‘சுதி அனந்தரஞ்ஹி உபபஜ்ஜவேத³னீயஸ்ஸ ஓகாஸோ’’தி காரணம் வுத்தம். தம்பி அகாரணம்.

புதிஅனந்தரதோ பட்டா²ய யாவஜீவம்பி ஓகாஸஸம்ப⁴வதோ.

[152] யஞ்ச தத்த²

‘‘படிஸந்தி⁴யா பன தி³ன்னாய ஜாதிஸதேபி பவத்திவிபாகம் தே³தீதி வுத்தம்’’. தம்பி ந க³ஹேதப்³ப³ம்.

கம்மஸங்கராபத்திதோ. அங்கு³த்தரட்ட²கதா²யஞ்ச தி³ட்ட²த⁴ம்மவேத³னீயம் உபபஜ்ஜவேத³னீயம் அபரபரியாய வேத³னீயந்தி தேஸம் ஸங்கமனம் நத்தி². யதா²டா²னேயேவ பதிட்ட²ந்தீதி வுத்தம். ந சேத்த² படிஸந்தி⁴வஸேன ஏவம் வுத்தந்தி ஸக்கா வத்தும். தத³த்த²ஸாத⁴கஸ்ஸ அட்ட²கதா²பதே³ஸஸ்ஸவா வத்து²ஸ்ஸவா யுத்தியாவா அபா⁴வதோதி. மஜ்ஜே² பன பஞ்சஜவன சேதனா அபரபரியாய வேத³னீயம்னாம. ஏதா ஹி ஸுட்டு² ப³லவந்தீ ஸாரபூ⁴தாச ஹோந்தீதி ந ஸீக⁴ம் விபச்சிதும் ஸக்கோந்தி. சிரட்டி²திகா பன ஹோந்தி. தஸ்மா ததீயப⁴வதோ பட்டா²ய யதா³ ஓகாஸம் லப⁴ந்தி. ததா³ பஞ்சவாரே படிஸந்தி⁴ம் த³த்வா ஸம்ஸாரபவத்தியா ஸதி கப்பஸதஸஹஸ்ஸேபி பவத்திவிபாகம் தே³ந்தீதி. இமானியேவ பன தீணி கம்மானி அத்தனோ அத்தனோ கே²த்தே ஸப்³ப³ஸோ விபாகவாரம் அலப⁴மானானி அஹோஸிகம்மம்னாம. கே²த்தஞ்ச நேஸம் பத²மஸ்ஸ தி³ட்ட² த⁴ம்மசுதியா பரிச்சி²ன்னம். து³தீயஸ்ஸ அனாக³தானந்தரப⁴வசுதியா. ததீயஸ்ஸ பரினிப்³பா³னசுதியாதி த³ட்ட²ப்³ப³ம். [தி³ட்ட²த⁴ம்மசதுக்கம்]

148. பாகட்டா²னவஸேனாதி அபாயாதி³கஸ்ஸ விபச்சனட்டா²னஸ்ஸ வஸேன ததா² சத்தாரி கம்மானினாம ஹோந்தீதி யோஜனா. தத்தா²தி தேஸு அகுஸலாதீ³ஸு சதூஸு கம்மேஸு. கம்மத்³வாரவஸேனாதி கம்மஸித்³தி⁴யா அங்க³பூ⁴தானம் காயாதி³ கம்மத்³வாரானம் வஸேன. பாணம் அதிபாதேந்தி ஏதேனாதி பாணாதிபாதோ. அதிபாதனஞ்சேத்த² ஸரஸதோ பதிதும் அத³த்வா அந்தராஏவ பயோக³ப³லேன பாதனம் த³ட்ட²ப்³ப³ம். அதி³ன்னம் ஆதி³யந்தி ஏதேனாதி அதி³ன்னாதா³னம். அக³மனீ யவத்து²ஸங்கா²தேஸு வத்து²காமேஸு மிச்சா² சரந்தி ஏதேனாதி காமேஸுமிச்சா²சாரோ. தத்த² பரபாணே பாணஸஞ்ஞினோ தஸ்ஸ ஜீவிதிந்த்³ரியஸந்தானுபச்சே²த³கஸ்ஸ காயவசீபயோக³ஸ்ஸ ஸமுட்டா²பிகா வத⁴கசேதனா பாணாதிபாதோனாம. ஸயமேவ அத்தனோ ஜீவிதிந்த்³ரியம் பாதேந்தஸ்ஸ பாணாதிபாதோனாம நத்தி². பரபரிக்³க³ஹிதே பரபரிக்³க³ஹிதஸஞ்ஞினோ ததோ வியோக³காரணஸ்ஸ காய வசீபயோக³ஸ்ஸ ஸமுட்டா²பிகா அச்சி²ந்த³கசேதனா அதி³ன்னாதா³னம்னாம. அக³மனீயவத்தூ²ஸு மக்³கே³னமக்³க³படிபாத³கஸ்ஸ காயபயோக³ஸ்ஸ ஸமுட்டா²பிகா அஸ்ஸாத³சேதனா காமேஸுமிச்சா²சாரோனாம. கேசி பனஏத்த²பி அக³மனீய வத்து²ஸஞ்ஞினோதி பத³ம் இச்ச²ந்தி. தம் அட்ட²கதா²ய ந ஸமேதி. அக³மயனீவத்து² தஸ்மிம் ஸேவனசித்தந்தி ஹி தத்த² வுத்தம். ஏதேன அக³மனீயவத்து²ம்ஹி ஸதி க³மனீய ஸஞ்ஞாயவா அக³மனீய ஸஞ்ஞாயவா ஸேவந்தஸ்ஸ கம்மபதோ² ஹோதி யேவாதி ஸித்³த⁴ம் ஹோதி. இதரதா² அக³மனீயவத்து² ததா² ஸஞ்ஞிதா தஸ்மிம் ஸேவனசித்தந்தி வுத்தம் ஸியாதி.

அபரே பன ஸயம் பயோக³ம் கத்வா அத்தனி பரேன கரீயமானம் மக்³கே³ன மக்³க³படிபாத³னம் அஸ்ஸாதே³ந்தஸ்ஸ ஸேவனசித்தே ஸதிபி நத்தி² கம்மப்பத²பே⁴தோ³. பயோக³ஸ்ஸ அபா⁴வாதி வத³ந்தி. ஸேவனசித்தே பன ஸதி பயோகோ³ அப்பமாணந்தி ஏகே. ஏவஞ்ச ஸதி தியங்கி³கோவ மிச்சா²சாரோ, ந சதுரங்கி³கோதி ஆபஜ்ஜதி. அட்ட²கதா²யம் பன ஸேவன பயோகே³ன ஸஹ சதுரங்கி³கோவ வுத்தோதி அஞ்ஞே. ஸேவனபயோகோ³ பன யேபு⁴ய்யேன லப்³ப⁴மானத்தாயேவ வுத்தோ. ந பன ஏகந்தஅங்க³பா⁴வதோ. இதரதா² இத்தீ²னம் யேபு⁴ய்யேன பயோக³கிச்சம் நத்தீ²தி தாஸம் மிச்சா²சாரோ து³ல்லபோ⁴ ஸியாதி ச வத³ந்தி. பி⁴க்கு²னிதூ³ஸனம்பி ஏத்தே²வ ஸங்க³ய்ஹதி. ஸா ஹி ரக்கி²தாஸு ஸங்க³ஹிதாதி. டீகாஸு பன ஸா த⁴ம்மரக்கி²தாபி ந ஹோதி. குதோ மாதாதி³ரக்கி²தா. த⁴ம்மோதி ஹி இத⁴ பாஸண்டி³யத⁴ம்மோவ அட்ட²கதா²யம் வுத்தோதி வத³ந்தி. ஸாஸனத⁴ம்மோபி நன யுத்தோ. ஸப்³ரஹ்மசாரி நியோபி உபஜ்ஜா²யினீ ஆதி³கா தஸ்ஸா மாதாதி³ட்டா²னியாஏவ ஹோந்தி. ததா² ஹி ஸிக்கா²பத³விப⁴ங்க³ட்ட²கதா²யம் மிச்சா²சாரோபி து³ஸ்ஸீலாய.ல. ஸாமணேரியா, புது²ஜ்ஜனபி⁴க்கு²னியா, ஸோதாபன்னாய, ஸகதா³கா³மினியா, ததோ அனாகா³மினியா வீதிக்கமோ மஹாஸாவஜ்ஜோ. கீ²ணாஸவாய பன ஏகந்தமஹாஸாவஜ்ஜோவாதி வுத்தம்.

கஸ்மாபனேத்த² ஸுராபானம் நக³ஹி தம். தம்பிஹி அபாயஸம்வத்தனி கபா⁴வேன வுத்தம். யதா²ஹ-ஸுராமேரயபானம் பி⁴க்க²வே ஆஸேவிதம் பா⁴விதம் ப³ஹுலீகதம் நிரயஸம்வத்தனிகம் திரச்சா²னயோனிஸம்வத்தனிகம் பேத்திவிஸயஸம்வத்தனிகம். யோச ஸப்³ப³லஹுகோ ஸுராமேரய பானஸ்ஸ விபாகோ. ஸோ மனுஸ்ஸபூ⁴தஸ்ஸ உம்மத்தகஸம்வத்தனிகோ ஹோதீதி. அட்ட²கதா²ஸுபி கோட்டா²ஸதோ பஞ்சபி பாணாதிபாதா த³யோ கம்மபதா²ஏவாதி வுத்தந்தி. வுச்சதே, மூலடீகாயம் தாவ தஸ்ஸ ஸபா⁴க³த்தேன மிச்சா²சாரே உபகாரகத்தேன த³ஸஸுபி கம்மபதே²ஸு அனுபவேஸோதி வுத்தம். தத்த² ஸபா⁴க³த்தம் க³ஹேத்வா விபா⁴வனியம் ஸுராபானம்பி ஏத்தே²வ ஸங்க³ய்ஹதீதி வத³ந்தி ரஸஸங்கா²தேஸு காமேஸு மிச்சா²சாரபா⁴வதோதி வுத்தம். உபகாரகத்தம் க³ஹேத்வா படிஸம்பி⁴தா³மக்³க³டீகாயம் குஸலாகுஸலாபிச படிஸந்தி⁴ஜனகாயேவ கம்மபதா²தி வுத்தா. வுத்தாவஸேஸா படிஸந்தி⁴ஜனனே அனேகந்தி கத்தா கம்ம பதா²தி ந வுத்தாதி இமஸ்ஸ வாக்யஸ்ஸ ஸம்வண்ணனாயம் வுத்தாவஸே ஸாதி ஸுராபானாத³யோ தப்³பி³ரமணாத³யோச. ஸுராபானஞ்ஹி மத³ஸ்ஸ பச்சயோ. மதோ³ அபுஞ்ஞபத²ஸ்ஸ. தப்³பி³ரதிபி நிம்மத³தாய. ஸாச புஞ்ஞபத²ஸ்ஸாதி கம்மபதூ²பனிஸ்ஸயானி தானி ததா³ஸன்னகம்மவஸேன ஸந்தி⁴ஜனகானிபி ஹோந்தீதி வுத்தம். தத்த² ததா³ஸன்னகம்மவஸேனாதி தஸ்ஸ ஸுராபானஸ்ஸவா ஸுராபானவிரதியாவா ஆஸன்னே பவத்தானம் தம்மூலகானம் அபுஞ்ஞகம்மானம்வா புஞ்ஞகம்மானம்வா வஸேனாதி அத்தோ². இத³ம் வுத்தம் ஹோதி-யோ ஸுரம் பிவித்வா ஸுராமத³ஹேது பாணா பாதாதீ³ஸு யம்கிஞ்சி கம்மம் கரோதி, தஸ்ஸ ஸுராபானம் தஸ்ஸதி கம்மஸ்ஸ ப³லவூபனிஸ்ஸயோ ஹோதி புப்³ப³சேதனாடா²னியஞ்ச. ததே³வ விஸும் படிஸந்தி⁴ம் ஜனேதி, ந இதரந்தி. யதா² ஹி புப்³பா³பரசேதனா யோபி கம்மபத²பத்தஸ்ஸ கம்மஸ்ஸ பரிவாரபூ⁴தாஏவ படிஸந்தி⁴ம் ஜனேந்தி, ந இதரா. ஏவமித³ம்பீதி. ந ஹி கம்மபத²ஸுத்தேஸு ஸரூபதோ ஆக³தானிஏவ படிஸந்தி⁴ம் ஜனேந்தி. ந இதரானீதி ஸக்கா நியமேதும். யானி பன ஏகந்தேன படிஸந்தி⁴ஜனனஸாமத்தி²ய யுத்தானி, தானேவ தத்த² ஸரூபதோ வுத்தானி. யானிபன படிஸந்தி⁴ஜனனே அனேகந்திகானி ஹோந்தி. தானி தத்த²ஸரூபதோ ந வுத்தானீதி ஸக்கா விஞ்ஞாதும். ததா² ஹி படிஸம்பி⁴தா³ மக்³க³ட்ட²கதா²யம் குஸலாகுஸலாபிச படிஸந்தி⁴ஜனகாயேவ கம்மபதா²தி வுத்தா. வுத்தாவஸேஸா படிஸந்தி⁴ஜனனே அனேகந்தி கத்தா கம்மபதா²தி ந வுத்தாதி வுத்தம். தஸ்மா இத³ம்பி படிஸந்தி⁴ஜனனே அனேகந்திகத்தா தத்த² ஸரூபதோ ந வுத்தந்திச. யம் ததா³ ஸன்னகம்மவஸேன படிஸந்தி⁴ஜனகந்தி புப்³பே³ வுத்தம். தம் தத்த² ஸரூபதோ வுத்தேஸு ததா³ ஸன்னகம்மேஸு அனுபவிட்ட²ந்திச ஸக்கா வத்துந்தி. தஸ்ஸ பன து³வித⁴ம் கிச்சம் படிஸந்தி⁴ஜனனம் கம்மஜனனஞ்சாதி. தத்த² படிஜனனதோ கம்மஜனனமேவஸ்ஸ மஹந்தம் மஹாவிப்பா²ரஞ்ச ஹோதீதி கத்வா ஸக்கேன தே³வானமிந்தே³ன கும்ப⁴ஜாதகே –

யம் வே விவித்வா து³ச்சரிதம் சரந்தி,

காயேன வாசாய சேதஸாச;

நிரயம் வஜந்தி து³ச்சரிதம் சரித்வா,

தஸ்ஸா புண்ணம் கும்ப⁴மிமம் கிணாதா²தி.

ஏவம் ததா³ஸன்னகம்மவஸேனேவ தஸ்ஸ அபாயகா³மிதா வுத்தா. தது³ப⁴யம் பனஸ்ஸ கிச்சம் க³ஹேத்வா ஸுராமேரயபானம் பி⁴க்க²வே ஆஸேவிதம்.ல. ஸம்வத்தனிகந்தி அங்கு³த்தரே வுத்தந்தி வேதி³தப்³ப³ம். அயஞ்ஹிஸுத்தபதே³ஸு த⁴ம்மதா. யதி³த³ம் ஸம்வத்தனிகந்தி வுத்தட்டா²னே யதா²லாப⁴யோஜனாதி. ததா²ஹி மூலடீகாயம்புனப்³ப⁴வம்தே³திபுனப்³ப⁴வாய ஸம்வத்தேதீதி பாடே² கம்மஸஹஜாதா புனப்³ப⁴வம்தே³தி. கம்மஸஹாயபூ⁴தா அகம்மஸஹஜா தாபுனப்³ப⁴வம் ஸம்வத்தேதீதி வுத்தம். கேசி பன இமமத்த²ம் அனுபதா⁴ரேத்வா இமாய பாளியா தஸ்ஸ விஸும் ஏகந்தகம்மபத²பா⁴வம் மஞ்ஞந்தி. யம் பன கோட்டா²ஸதோ பஞ்சபி கம்மபதா²ஏவாதி அட்ட²கதா²வாக்யம். தத்த² ஏவஸத்³தே³ன தேஸம் சேதனாத⁴ம்மத்தா ஜா²னாதி³கோட்டா²ஸிகத்தம் நிவத்தேதி. சேதனா ஹி கம்மபத²ம் பத்தாபி அபத்தாபி கோட்டா²ஸதோ கம்ம பத²கோட்டா²ஸிகாஏவ ஹோதீதி. தேனேவ மூலடீகாயம் கம்மபதா² ஏவாதி கம்மபத²கோட்டா²ஸிகாஏவாதி வுத்தம். அனுடீகாயஞ்ச கம்ம பத²கோட்டா²ஸிகாஏவ. ந ஜா²னாதி³கோட்டா²ஸிகாதி வுத்தம். கேசிபன இமமத்த²ம் அஸல்லக்கே²த்வா இமினா வாக்யேன தஸ்ஸ விஸும் கம்மபத²பா⁴வம் வத³ந்தி.

கு²த்³த³கபாட²ட்ட²கதா²யம் பன ஸப்³பே³னஸப்³ப³ம் தஸ்ஸ கம்மபத²பா⁴வோ படிக்கி²த்தோயேவ, தத்த² ஹி புரிமானம் சதுன்னம் காயகம்மாதி³பா⁴வஞ்ச கம்மபத²பா⁴வஞ்ச விஸும் வத்வா ஸுராபானம்பத்வா காயகம்மமேவாதி வுத்தம். ஏதேன வசீகம்மபா⁴வஞ்ச கம்மபத²பா⁴வஞ்ச படிக்கி²பதீதி. தா⁴துஸம்யுத்தட்ட²கதா² யஞ்ச படிக்கி²த்தோ. யதா²ஹ-ததீயம்பஞ்சகம்மவஸேன பு³ஜ்ஜ²னகானம் அஜ்ஜா²ஸயவஸேன வுத்தம். சதுத்த²ம் ஸத்தகம்மபத²வஸேன பஞ்சமம் த³ஸ கம்மபத²வஸேனாதி. தத்த² ஹி ததீயே ஸுராபானமிஸ்ஸகத்தா பஞ்சகம்மவஸேன இச்சேவ வுத்தம். ந பஞ்சகம்மபத²வஸேனாதி. ஏதாஸுபிச படிஸந்தி⁴ஜனனே அனேகந்தி கத்தாஏவ படிக்கி²த்தோதி ந நஸக்கா வத்தும் ஏவஞ்ஹி ஸதி ஸப்³பா³ பாளிட்ட²கதா²டீகாயோ ஸம்ஸந்தி³தா ஹோந்தீதி. காயகம்மந்தி ஏத்த² காயோ திவிதோ⁴ ஸஸம்பா⁴ரகாயோ பஸாத³காயோ சோபனகாயோதி. இத⁴ காயவிஞ்ஞத்திஸங்கா²தோ சோபனகாயோ அதி⁴ப்பேதோதி வுத்தம் காயவிஞ்ஞத்திஸங்கா²தேதி. சோபனகாயோ ஹி கதா³சி காயங்கே³ன அத்தனோஅதி⁴ப்பாயம் பரஸ்ஸ விஞ்ஞா பனத்தா²யபி கரீயதீதி காயவிஞ்ஞத்தீதி வுச்சதீதி. ஸோ யேவச கம்மானம் பவத்திமுக²த்தா த்³வாரந்தி காயத்³வாரம். தஸ்மிஞ்ஹி தேன தேன உபக்கம கிச்சேன பவத்தமானேஏவ ஜீவிதிந்த்³ரியுபச்சே²தா³தி³கிச்சஸித்³தி⁴தோ தம்ஜன கஸ்ஸ சேதனாத⁴ம்மஸ்ஸ ஆயூஹன கிச்சனிப்³ப³த்திச காயகம்மனாம லாபோ⁴ச ஹோதீதி. தஸ்மிம் காயத்³வாரே. ஏத்த²ச யஸ்மாஸப்³பா³னிபி கம்மானி புப்³ப³ங்க³மபூ⁴தேன ஸம்பயுத்தமனேன வினா நஸிஜ்ஜ²ந்தி. மனோபுப்³ப³ங்க³மா த⁴ம்மா. மனோஸேட்டா² மனோமயாதி ஹி வுத்தம். த⁴ம்மாதி சேத்த² ஸுசரிதது³ச்சரிதத⁴ம்மா வுச்சந்தி. தஸ்மா மனோத்³வாரம் ஸப்³ப³கம்மஸாதா⁴ரணத்தா கம்மானி விஸேஸேதும் நஸக்கோதி. அஸாதா⁴ரணபூ⁴தா பன காயவசீயோ ஏவ ஸகோந்தி. யஸ்மாச புரிமானி ஸத்தவிதா⁴னி கம்மானி கேவலம் மனோமத்தேன நஸிஜ்ஜ²ந்தி. தம்ஸமுட்டி²தேஹி பன காய வசீபயோகே³ஹி ஏவ ஸிஜ்ஜ²ந்தி. தஸ்மா தேஏவ தேஸம் கம்மானம் பவத்திமுக²ஸங்க்²யம் க³ச்ச²ந்தீதி வுத்தம் காயத்³வாரேதி. பரதோ வசீத்³வாரேதி ச.

யஸ்மா பன காயத்³வாரே வுத்திதோ காயகம்மம் நாம. வசீத்³வாரே வுத்திதோ வசீகம்மம்னாமாதி ஏத்தகமத்தே வுத்தே பாணாதிபாதாதீ³னி தீணி காயகம்மம்னாம. முஸாவாதா³தீ³னி சத்தாரி வசீகம்மம்னாமாதி ஏவம் த்³வாரேன கம்மானம் நாமவவத்தா²னம் அஸித்³த⁴ம் ஸியா. கத²ம். யதா³ ஹி புரிமானி த்³வே ஆணத்திவஸேன அப்பகேன வசீத்³வாரே பி⁴ஜ்ஜ²ந்தி. ததா³ தானி காயகம்மந்தி நாமம் ஜஹேய்யும். வசீகம்மந்தி ஸங்க்²யம் க³ச்சே²ய்யும் கஸ்மா வசீத்³வாரே வுத்திதோ வசீகம்மம்னாமாதி வுத்தத்தா. த்³வேவா நேஸம் நாமானி ப⁴வேய்யும். உப⁴யத்³வாரேஸுபி ஸந்தி³ஸ்ஸனதோ. யதா³பன மஜ்ஜி²மானி சத்தாரி ஹத்த²முட்டா²தி³வஸேன அப்பகேன காயத்³வாரே ஸிஜ்ஜ²ந்தி. ததா³ தானிபி வசீகம்மந்தி நாமம் ஜஹேய்யும். காயகம்மந்தி ஸங்க்²யம் க³ச்சே²ய்யும். கஸ்மா காயத்³வாரே வுத்திதோ காயகம்மம்னாமாதி வுத்தத்தா. த்³வேவா நேஸம் நாமானி ப⁴வேய்யும். உப⁴யத்³வாரேஸுபி ஸந்தி³ஸ்ஸனதோ. ஏவஞ்சஸதி பாணாதிபாதோ.ல. மிச்சா²சாரோசேதி காயகம்மம்னாமாதி இத³ம் வவத்தா²னமேவ நிரத்த²கம் ஸியா. ததா² பரதோ முஸாவாதோ³.ல. ப்பலாபோசேதி வசீகம்மம்னாமாதி. பா³ஹுல்லவுத்திதோதி வுத்தேபன ஏகமேகேன பா³ஹுல்லஸத்³தே³ன ச²ப்³பி³தா⁴னி தானி வஜ்ஜானி வஜ்ஜேத்வா வுத்தப்பகாரம் த்³வாரேன கம்மவவத்தா²னம் ஸித்³த⁴ம் ப⁴வதி. யதா² வனசரகோ ஸங்கா³மாவசரோதி.

மனோகம்மானி பன த்³வாரந்தரேஸு சரந்தானிபி சரணமத்தானி ஏவ ஹோந்தி. ந த்³வாரந்தரானி தேஸம் கம்மஸித்³தி⁴யா அங்க³ம் ஹோந்தி. தஸ்மா தானி விஸும் கதானீதி வேதி³தப்³ப³ம். யஸ்மா பன காயத்³வாரஸ்ஸ காயோதி நாமம் அனேகேஸு ஸுத்தஸஹஸ்ஸேஸு ஸயமேவ ஸித்³த⁴ம் பாகடஞ்ச. ததா² வசீத்³வாரஸ்ஸ வாசாதி நாமம். குஸலாகுஸல ஜவனசித்தஸங்கா²கஸ்ஸ மனோத்³வாரஸ்ஸச மனோதி நாமம். தஸ்மா ஸப்³ப³த்த² காயத்³வாரம் வசீத்³வாரம் மனோத்³வாரந்தி வுத்தே கம்மேன த்³வாரஸ்ஸ வவத்தா²ன கிச்சம்னாம நத்தி². யத்த² பன காயகம்மத்³வாரம் வசீகம்மத்³வாரம் மனோகம்மத்³வாரந்தி ஆக³தம். தத்தே²வ த்³வாரகதா²தீ³ஸு கம்மேன த்³வாரவவத்தா²னம்பி விஸும் வத்தப்³ப³ம் ஹோதீதி த³ட்ட²ப்³ப³ம்.

[153] ஏதேன யம் வுத்தம் விபா⁴வனியம்

‘‘காயகம்மஸ்ஸச பவத்திமுக²பூ⁴தம் காயத்³வாரந்தி வுச்சதீதி’’. தம் படிக்கி²த்தம் ஹோதி.

[154] யஞ்ச தத்த²

‘‘ததா² முஸாவாதா³தி³ம் காயவிகாரேன கரோந்தஸ்ஸ வசீகம்மம் காயத்³வாரேபி பவத்ததீதி கம்மேன த்³வாரவவத்தா²னம்பி நஸியாதி’’ வுத்தம். தம்பி ந யுஜ்ஜதி.

ந ஹி காயவிகாரேன கரீயமானம் வசீகம்மம் காயத்³வாரே பவத்தமானம்பி தஸ்ஸ த்³வாரஸ்ஸ நாமம் பி⁴ந்தி³தும்வா அத்தனோ நாமம் தா³தும்வா ஸக்கோதி. ஸபா⁴வ ஸித்³த⁴த்தா தஸ்ஸ நாமஸ்ஸாதி.

[155] ஏதேனேவ யஞ்ச தத்த²

வுத்தம் ‘‘ததா² காயகம்மமேவ யேபு⁴ய்யேன காயத்³வாரே பவத்ததி. ந இதரானி. தஸ்மா காயகம்மஸ்ஸ யேபு⁴ய்யேன ஏத்தே²வ பவத்தனதோ காயகம்மத்³வாரபா⁴வோ ஸித்³தோ⁴. ப்³ராஹ்மணகா³மாதீ³னம் ப்³ராஹ்மணகா³மாதி³ பா⁴வோவியாதி’’. தம்பி படிக்கி²த்தம் ஹோதி.

ந ஹி காயகம்மத்³வாரந்தி நாமம் இத⁴ வுத்தம் அத்தீ²தி. [காயகம்மம்]

149. முஸாதி அபூ⁴தத்தே² நிபாதோ. முஸா வத³ந்தி ஏதேனாதி முஸாவாதோ³. விஸதி பரேஸம் அஞ்ஞமஞ்ஞஸம்மோத³பா⁴வஸங்கா²தம் ஸாமக்³கி³ரஸம் ஸம்சுண்ணேதி பரிபி⁴ந்த³தி மிது² பே⁴த³ம் கரோதி ஏதாயாதி பிஸுணா. அத்தனோ பியபா⁴வம் பரேஸஞ்ச மித்தஸுஞ்ஞபா⁴வம் கரோதி ஏதாயாதிவா பிஸுணா. நிருத்தினயேன. வத³ந்தி ஏதாயாதி வாசா. பிஸுணாச ஸா வாசாசாதி பிஸுணவாசா. யேன ஸுய்யதி, தஸ்ஸ ஹத³யம் ப²ரமானா உஸதி த³ஹதீதி ப²ருஸா. ப²ருஸாச ஸா வாசாசாதி ப²ருஸவாசா. ஸாது⁴ஜனேஹி அதி⁴க³ந்தப்³ப³ம் ஸம்ஸுக²ம் ஹிதஞ்ச ப²லதி விஸரதி வினாஸேதி ஹிதஸுக²மக்³க³ம் பி⁴ந்த³தீதி ஸம்ப²ம். தம்வா ப²லதி பி⁴ஜ்ஜதி ஏதேனாதி ஸம்ப²ம். அத்த²த⁴ம்மாபக³தஸ்ஸ படிபா⁴ணசித்தஸ்ஸ பா⁴ரதயுத்³த⁴ஸீதாஹரணா தி³கஸ்ஸ வாசா வத்து²மத்தஸ்ஸேதம் நாமம். யத்த² தி³ட்ட²த⁴ம்மஹிதபு³த்³தி⁴யாவா ஸம்பராயிக ஹிதபு³த்³தி⁴யாவா உபாயதீ³பகம் கிஞ்சி அத்த²த⁴ம்மவினயபத³ம் நத்தி². ஸம்ப²ம் பலபந்திபகாரேன கத²யந்தி ஏதேனாதி ஸப்ப²ப்பலாபோ. தத்த² பரஸ்ஸவிஸம் வாத³னபுரேக்கா²ரேன விஸம் வாத³க காயவசீபயோக³ஸமுட்டா²பிகா அகுஸலசேதனா முஸாவாதோ³. ஸோ பரஸ்ஸ அத்த²ப⁴ஞ்ஜனகோவ கம்மபத²பே⁴தோ³. இதரோ கம்மமேவ. ஏத்த² ச கம்ம பதோ²தி படிஸந்தி⁴ஜனகானம் கம்மானம் உட்டா²னமுக²மக்³கோ³ வுச்சதி. யதா² ஹி ரஜானம் உட்டா²னபதே³ஸோ ரஜபதோ²தி வுச்சதி. ததா² லோகே ஸந்தி³ஸ்ஸமானேஸு ஸத்தானம் காயவசீசித்தாபி⁴ஸங்க²ரணகிச்சேஸுயேஹி கிச்சேஹி படிஸந்தி⁴ஜனகானி கம்மானி உட்ட²ஹந்தி. யேஸுவா கிச்சேஸு தானி உட்ட²ஹந்தி பவத்தந்தி. தானி காயவசீசித்தா பி⁴ஸங்க²ரணகிச்சானி படிஸந்தி⁴ஜனகானம் கம்மானம் உட்டா²னமுக²மக்³க³த்தா கம்மபதோ²தி வுச்சந்தி. கதமானி பன தானீதி. அங்க³ஸம்பன்னானி அகுஸலேஸு பாணகா⁴த கிச்சாதீ³னி குஸலேஸு தப்³பி³ரமணகிச்சாதீ³னி த³ஸவிதா⁴னி கிச்சானீதி. கம்மானியேவ ஸுக³திது³க்³க³தீனம் தது³ப்பஜ்ஜனகஸுக²து³க்கா²னஞ்ச பத²பூ⁴தத்தா கம்மபதோ²னாமாதிபி வத³ந்தி.

பரஸ்ஸ பே⁴த³புரேக்கா²ரேன பே⁴த³ககாயக³சீபயோக³ஸமுட்டா² பிகா ஸம்கிலிட்ட²சேதனா பிஸுணாவாசா. ஸாபி பரே பி⁴ன்னேயேவ கம்மபத²பே⁴தோ³. அபி⁴ன்னே கம்மமேவ. பரஸ்ஸ மம்மச்சே²த³ககாய வசீபயோக³ஸமுட்டா²பிகா து³ட்ட²சேதனா ப²ருஸவாசா. ஏத்த²ச மரந்தி ஸத்தா, மரணமத்தம்வா து³க்க²ம் நிக³ச்ச²ந்தி ஏதஸ்மிம் க⁴ட்டியமானேதி மம்மம். து³ட்ட²வணோ. மம்மம் சி²ந்த³தி பி⁴ந்த³தி க⁴ட்டேதீதி மம்மச்சே²த³கோ. வணக⁴ட்டனபயோகோ³. இத⁴ பன மம்மம்வியாதி மம்மம். ஜாதிஆதீ³ஸு த³ஸஸு அக்கோஸவத்தூ²ஸு யம்கிஞ்சி. மம்மச்சே²த³கோதி ஜாதிஆதீ³ஸு க⁴ட்டன வஸேன பவத்தோ ப²ருஸ காயவசீ பயோகோ³. அய மத்தோ² ஸீலக்க²ந்த⁴ டீகா வஸேன வேதி³தப்³போ³. அத²வா. மமாயதீதி மமோ. மித்தோ. மமஸ்ஸ பா⁴வோ மம்மம். மேத்தாசித்தம். மம்மம் சி²ந்த³தீதி மம்மச்சே²த³கோ. அயம்பி அக்கோஸிதப்³ப³ஸ்ஸ ஸம்முகா²ஏவ கம்மபத²பே⁴தோ³தி கேசி. பரம்முகா²பீதி அபரே. யதா² பன பரம் அக்கோஸித்வா க²மாபேந்தஸ்ஸ க²மாபனகம்மம் பரஸ்ஸ தூ³ரே டி²தஸ்ஸபி மதஸ்ஸபி ஸம்பஜ்ஜதி. ஏவம் அக்கோஸனகம்மம்பீதி தீ³க⁴மஜ்ஜி²மடீகாகாரா இச்ச²ந்தி. அக்கோஸாதி⁴ப்பாயேன சண்டா³ மஹிம்ஸீ தம் அனுப³ந்த⁴தூதிவா சோரா தம் க²ண்டா³ க²ண்டி³கம் கரோந்தூதிவா முத்³தா⁴ தே ப²லது ஸத்ததா⁴திவா ஏவமாதி³னா நயேன பரம் அபி⁴ஸபந்தஸ்ஸபி கம்மபத²பே⁴தோ³ ஹோதியேவாதிச வத³ந்தி.

அனத்த²விஞ்ஞாபன காயவசீபயோக³ ஸமுட்டா²பிகா பாபசேதனா ஸம்ப²ப்பலாபோ. ஸோபி பா⁴ரதயுத்³த⁴ ஸீதாஹரணாதி³கேஸு படிபா⁴ணசித்தேஸு வாசாவத்து²மத்தேஸுஏவ கம்மபத²பே⁴தோ³. ஸோசகோ² பரே தம் அனத்த²ம் ஸச்சதோ க³ண்ஹந்தேயேவ. அக³ண்ஹந்தே பன கம்மமேவ. ததா² ராஜகதா²தீ³ஸு த்³வத்திம்ஸ திரச்சா²ன கதா²பபே⁴தே³ஸுபி கம்மமேவ. தஞ்ச கோ² தத³ஸ்ஸாத³வஸேன கதே²ந்தஸ்ஸேவ. அத்த²த⁴ம்மவினயனிஸ்ஸிதம் கத்வா கதே²ந்தஸ்ஸ பன ஸப்³ப³ம்பி ஸத்த²கமேவ ஹோதீதி வேதி³தப்³ப³ம். வசீகம்மந்தி ஏத்த² வசீதி வாசாயேவ. ஸா சதுப்³பி³தா⁴ ஸத்³த³வாசா விரதிவாசா சேதனாவாசா சோபனவாசாதி. இத⁴ பன ஸத்³த³ஸஹிதா வசீவிஞ்ஞத்திஸங்கா²தா சோபன வாசா அதி⁴ப்பேதாதி வுத்தம் வசீவிஞ்ஞத்திஸங்கா²தேதி. சோபனவாசா ஹி கதா³சி வாசங்கே³ன அத்தனோ அதி⁴ப்பாயம் பரஸ்ஸ விஞ்ஞாபனத்தா²யபி கரீயதீதி வசீவிஞ்ஞத்தீதி வுச்சதீதி. ஸாயேவச கம்மானம் பவத்தி முக²த்தா த்³வாரந்தி வசீத்³வாரம். தாய ஹி தம்தம்வசீபயோக³கிச்சேன பவத்தமானாய ஏவ விஸம்வாத³னாதி³கிச்சஸித்³தி⁴தோ தம்ஸமுட்டா²பகஸ்ஸ சேதனாத⁴ம்மஸ்ஸ ஆயூஹனக்ரியானிப்³ப³த்திச வசீகம்மனாமலாபோ⁴ச ஹோதீதி. தஸ்மிம் வசீத்³வாரே. யமேத்த² வத்தப்³ப³ம், தம் காயகம்மே வுத்தமேவாதி. [வசீகம்மம்]

150. அபி⁴ஜ்ஜா²யந்தி அஸ்ஸாத³மத்தே அட்ட²த்வா பரப⁴ண்ட³ஸ்ஸ அத்தனோ பரிணாமனவஸேன அதிரேகதரம் ஜா²யந்தி நிஜ்ஜா²யந்தி ஏதாயாதி அபி⁴ஜ்ஜா². ப்³யாபாதே³ந்தி பரஸத்தே வினாஸம் ஆபன்னே கத்வா சிந்தேந்தி ஏதேனாதி ப்³யாபாதோ³. மிச்சா²தி³ட்டீ²தி ஏத்த² மிச்சா²தி விபரீதத்தே² நிபாதோ. அத்தி²தி³ன்னந்திஆதி³னயபவத்தம் ஸப்³ப³ம் ஸப்புரிஸ மக்³க³ம் ஸப்புரிஸபஞ்ஞத்தம் பி⁴ந்தி³த்வா நத்தி² தி³ன்னந்திஆதி³னயேன தப்³பி³பரீ ததோ பஸ்ஸந்தி ஏதாயாதி மிச்சா²தி³ட்டி². தத்த² பரஸந்தகம் தி³ஸ்வா கேவலம் அஸ்ஸாத³னாபி⁴னந்த³னரஜ்ஜனமத்தேஸு அட்ட²த்வா அஹோவத இத³ம் மமஸ்ஸாதி ஏவம் அத்தனோ கத்வா சித்தேன பரிணாமேந்தஸ்ஸேவ அபி⁴ஜ்ஜா²கம்மபத²பே⁴தோ³ ஹோதி. பரஸந்தகபா⁴வேயேவ த²பேத்வா லாபா⁴வதிமே. யே ஈதி³ஸம் பரிபு⁴ஞ்ஜந்தி. அஹோவதாஹம்பி தாவகாலிகம் பரிபு⁴ஞ்ஜேய்யம். யாசித்வாவா கிணித்வாவா அத்தனோ கரேய்யம். அஞ்ஞம்வா ஈதி³ஸம் லபே⁴ய்யந்தி ஏவம் அஸ்ஸாதே³ந்தஸ்ஸ கம்மமேவ. வுத்தஞ்ஹேதம் அட்ட²கதா²ஸு பரப⁴ண்ட³வத்து²கே ஹி லோபே⁴ உப்பன்னேபி ந தாவ கம்மபத²பே⁴தோ³ ஹோதி. யாவ ந அஹோவத இத³ம் மமஸ்ஸாதி அத்தனோ பரிணாமேதீதி. அந்தமஸோ ட³ம்ஸமகஸாதி³கேபி ஆரப்³ப⁴ இமே நஸ்ஸந்து வினஸ்ஸந்து. அஹோவதிமே நஸ்ஸேய்யும் வினஸ்ஸேய்யும். அவட்³டி⁴தாவா ப⁴வேய்யும் சிரம்வா நதிட்டே²ய்யும். கதா³வா நஸ்ஸந்தி வினஸ்ஸந்தீதி ஏவம் பர ஸத்தஸ்ஸ க²ந்த⁴ஜீவவினாஸம் சிந்தேந்தஸ்ஸேவ ப்³யாபாதோ³. இதரோ கம்மமேவ. வுத்தஞ்ஹேதம் பரஸத்தவத்து²கே ஹி கோதே⁴ உப்பன்னேபி ந தாவ கம்மபத²பே⁴தோ³ ஹோதி. யாவ ந அஹோவதாயம் உச்சி²ஜ்ஜேய்ய வினாஸேய்யாதி தஸ்ஸ வினாஸம் சிந்தேதீதி. கம்மஸ்ஸவா கம்மவிபாகஸ்ஸவா ஸப்³ப³ஸோ படிபா³ஹிகா நத்தி²காஹே துகாக்ரியவஸேன திவிதா⁴ நியத மிச்சா²தி³ட்டி²ஏவ கம்மபத²பே⁴தோ³. த³ஸவத்து²கமிச்சா²தி³ட்டி² பன நத்தி²கதி³ட்டி²பபே⁴தா³ஏவ. ஸப்³ப³ஞ்ஞுதே³ஸனம் படிபா³ஹித்வா பவத்தா அரிட்ட²கண்டகாதீ³னம் தி³ட்டி²யோபி கம்மபதா²ஏவாதி வத³ந்தி. வீஸதிவத்து²கா ஸக்காயதி³ட்டி²வா த்³வாஸட்டி²தி³ட்டி²க³தானிவாகம்மமேவாதி.

நியதாதி சேத்த² யதா² தீணி லக்க²ணானி யத்தகம் பஸ்ஸித்வா ஸத்³தா⁴தி⁴மோக்கே²ன ஸன்னிட்டா²னம் க³ச்ச²ந்தஸ்ஸ சித்துப்பாதோ³ அத்தனோ அனந்தரம் ப²லதா³னனியமேன நியதோ ஹோதி. தத்தகம் பஸ்ஸந்தோ குஸலேஸு த⁴ம்மேஸு நியாமம் ஓக்கமதீதி வுத்தோ. ததா²தி³ட்டி²ட்டா² நானி காரண படிரூபகானி யத்தகம் பஸ்ஸித்வா மிச்சா²தி⁴மோக்கே²ன ஸன்னிட்டா²னம் க³ச்ச²ந்தஸ்ஸ சித்துப்பாதோ³சுதிஅனந்தரேப²லதா³னனியமேன நியதோ ஹோதி. தத்தகம் பஸ்ஸித்வா ஸன்னிட்டா²னம் க³ச்ச²ந்தோ அகுஸலேஸு த⁴ம்மேஸு நியாமம் ஓக்கமதி, அதேகிச்சோ²னாம ஹோதி. ததா² பன அபஸ்ஸித்வா கேவலம் மிச்சா²தி⁴மோக்க²மத்தேன ஏவமேவ ப⁴விஸ்ஸதீதி ஸன்னிட்டா²னம் க³ந்த்வா ஸகம் ஆசரியகம் ஸமயம் பக்³க³ண்ஹித்வா டி²தோ அதேகிச்சோ²னாம நஹோதி. கஸ்மா, ப²லதா³ன நியமாபா⁴வாதி. அயஞ்ச அத்தோ² மிச்ச²த்தத்திகேன தீ³பேதப்³போ³. தத்த² ஹி ப²லதா³ன நியமவஸேனேவ உபி⁴ன்னம்பி ஸம்மத்தமிச்ச²த்தத⁴ம்மானம் நியதஸஞ்ஞாபடிலாபோ⁴ அட்ட²கதா²யம் வுத்தோதி. ஸுத்தந்தஸம்வண்ணனாஸு பன க³ஹணனியமவஸேனாபி தஸ்ஸா நியதபா⁴வோ வுத்தோதி.

அஞ்ஞத்ராபிவிஞ்ஞத்தியாதி விஞ்ஞத்தித்³வயேன வினாபி. விஞ்ஞத்தித்³வயம் அஸமுட்டா²பேத்வாபீதி அத்தோ². அபிஸத்³தே³ன பன விஞ்ஞத்தித்³வயேன ஸஹாபீதி த³ஸ்ஸேதி. இமானி ஹி தீணி கம்மானி யதா³ காயங்க³வா சங்கா³னி அசோபேத்வா மனஸ்மிம்ஏவ ஸிஜ்ஜ²ந்தி. ததா³விஞ்ஞத்தியா வினாவ பவத்தந்தி. யதா³ பன தானி சோபேத்வா காயவசீத்³வாரேஸு ஸிஜ்ஜ²ந்தி, ததா³ விஞ்ஞத்தியா ஸஹேவ பவத்தந்தீதி. ஏதேன இமேஸம் தீஸுபி த்³வாரேஸு பவத்திம் தீ³பேதி. ஏவம்ஸந்தேபி இமானி மனோத்³வாரேஏவ ப³ஹுலம் பவத்தந்தி. காயவசீத்³வாரேஸு பன அப்பகமேவ பவத்தந்தீதி வுத்தம் மனஸ்மிம்யேவபா³ஹுல்லவுத்திதோதி. தத்த² மனஸ்மிம் யேவாதி குஸலா குஸலஜவனசித்தஸங்கா²தே மனோத்³வாரேஏவ. ஏதேன புரிமேஸுபி காயத்³வாரே வசீத்³வாரேதி பதே³ஸு ஏவஸத்³த³ஸம்ப⁴வோ தீ³பிதோ ஹோதி. ஏவஞ்ஹி ஸதி தத்த²பி த்³வாரேன கம்மவவத்தா²னம் ஸுட்டு²தரம் உபபன்னம் ஹோதீதி. இதரதா² உபலக்க²ணாதி³வஸேன அத்த²ந்தரபஸங்கோ³பி ஸியாதி. அபிச, இத⁴ ஏவஸத்³தே³ன அயம்பி விஸேஸத்தோ² தீ³பிதோ ஹோதி. பாணவதா⁴தீ³ஸு ஹி வதா⁴மி நம் அவஹராமி ந ந்திஆதி³னா ஸம்விதா⁴னாகாரேன பவத்தா சேதயிதக்ரியாஏவ பதா⁴னம் ஹோதி. ஸாச காயவசீபயோகே³ஹி வினா நஸிஜ்ஜ²தி. தஸ்மா தேஸு காய வசீ பயோகா³ கம்மஸித்³தி⁴யா ஏகம் அங்க³ம் ஹோந்தி. தம் ஸஹஜாதாச அபி⁴ஜ்ஜா²த³யோ சேதனாபக்கி²காஏவ ஹுத்வா அப்³போ³ஹாரிகத்தம் க³ச்ச²ந்தி. பரப⁴ண்டா³ பி⁴ஜ்ஜா²யனாதீ³ஸு பன அபி⁴ஜ்ஜா²தீ³னம் அத்தபதா⁴னானம் காயவசீத்³வாரேஸு பவத்தானம்பி காய வசீபயோகா³கம்மஸித்³தி⁴யா அங்க³மேவ நஹோந்தி. ததா² சிந்தாபவத்தி மத்தேனேவ தத்த² கம்மஸித்³தி⁴தோ. இதி இமேஸு கம்மேஸு காய வசீத்³வாரானம் ஸப்³பே³னஸப்³ப³ம் அங்க³பா⁴வபடிக்கி²பனத்த²ம் மனஸ்மிம் யேவாதி ஏவ க³ஹணம் இதே⁴வ கதந்தி த³ட்ட²ப்³ப³ம். தேஸு பன த்³வாரேஸு பவத்திமத்த ஸப்³பா⁴வம் ஸந்தா⁴ய பா³ஹுல்லஸத்³தோ³பி இத⁴ க³ஹிதோதி.

[156] யம் பன விபா⁴வனியம்

‘‘விஞ்ஞத்திஸமுட்டா²பக சித்தஸம்பயுத்தாசேத்த² அபி⁴ஜ்ஜா²த³யோ சேதனாபக்கி²காவ ஹோந்தீதி’’ வுத்தம். தம் இத⁴ ந யுஜ்ஜதி.

ந ஹி விஞ்ஞத்திஸமுட்டா²பகசித்தஸம்பயுத்தாபி கேவலம் மனோகம்ம கிச்சவிஸேஸேன பவத்தமானா அபி⁴ஜ்ஜா²த³யோ சேதனாபக்கி²கா ஹோந்தி. சேதனாஏவ பன அபி⁴ஜ்ஜா²தி³பக்கி²கா ஹோதீதி. [மனோகம்மம்]

151. ஏத்த² ச த³ஸன்னம்பி இமேஸம் கம்மபதா²னம் புப்³பா³பரசேதனாயோ படிஸந்தி⁴ஆகட்³ட⁴னே அனேகந்திகபக்க²ம் க³தாதி படிஸம்பி⁴தா³ மக்³க³டீகாயம் வுத்தா. தஸ்மா தாபி இமம் ஸத்தம் மாரேஸ்ஸாமி இமம் ப⁴ண்ட³ம் அதி³ன்னம் ஆதி³யிஸ்ஸாமீதிஆதி³னா நயேன ஆதி³தோ பட்டா²ய பவத்தா ப³லவபச்சயே லத்³தா⁴ படிஸந்தி⁴ம் ஆகட்³ட⁴ந்தி. அலத்³தா⁴ நாகட்³ட⁴ந்தீதி யுத்தா. யானி பன குஸலாகுஸலானி கம்மபத²பே⁴த³ம் அப்பத்தானி ஹோந்தி. தானி காயத்³வாரே தி³ஸ்ஸமானானி காயகம்மானினாம ஹோந்தி. வசீத்³வாரே தி³ஸ்ஸமானானி வசீகம்மானினாம. ஸுத்³தே⁴ மனோத்³வாரே தி³ஸ்ஸமானானி மனோகம்மானினாமாதி வேதி³தப்³பா³னீதி. தோ³ஸமூலேனாதி தோ³ஸஸங்கா²தமூலேன தோ³ஸமூலகசித்தேனாதி த்³விதா⁴ அத்தோ². தத்த² புரிமோ ப்³யாபாத³வஜ்ஜேஹி த்³வீஹி யுஜ்ஜதி, பச்சி²மோ தீஹிபி. லோப⁴மூலேனாதி ஏத்த² ஏஸனயோ. தத்தா²பிதி புரிமோ அபி⁴ஜ்ஜா²வஜ்ஜேஹி த்³வீஹி யுஜ்ஜதி. பச்சி²மோ தீஹீதி. த்³வீஹி மூலேஹீதி கதா³சி தோ³ஸமூலேன கதா³சி லோப⁴மூலேனாதி ஏவம் த்³வீஹி மூலேஹி ஸம்ப⁴வந்தி. மோஹோ பன ஸப்³ப³ஸாதா⁴ரணத்தா விஸேஸகரோ ந ஹோதீதி இத⁴ ந க³ஹிதோ.

[157] யம் பன விபா⁴வனியம்

‘‘நிதி⁴பாட²கபமாணதோ து³ட்ட²னிக்³க³ஹத்த²ம் பரஸந்தகம் ஹரந்தானம் ராஜூனம் ப்³ராஹ்மணானஞ்ச ஸப்³ப³மித³ம் ப்³ராஹ்மணானம் ராஜூஹி தி³ன்னம். தேஸம் பன ஸப்³ப³து³ப்³ப³லபா⁴வேன அஞ்ஞே பு⁴ஞ்ஜந்தி. அத்தஸந்தகமேவ ப்³ராஹ்மணா பரிபு⁴ஞ்ஜந்தீதி ஏவமாதீ³னி வத்வா ஸகஸஞ்ஞாய ஏவ யம்கிஞ்சி ஹரந்தானம் கம்மப²லஸம்ப³ந்தா⁴பவாதீ³னஞ்ச மோஹமூலேனா’’தி வுத்தம். தம் இத⁴ ந யுஜ்ஜதி.

ஸஹஜாதமூலஞ்ஹி இத⁴ அதி⁴ப்பேதம் அஸாதா⁴ரணபூ⁴தஞ்ச. தேஸஞ்ச ததா²ஹரந்தானம் ஹரணம் ஹரணகாலே கதா³சிதோ³ஸமூலேன கதா³சி லோப⁴மூலேனாதி ஏவம் த்³வீஹி மூலேஹி ஏவ ஸம்ப⁴வதீதி. யோ பன மோஹோ மஹாஸம்மதாதீ³னம்த⁴ம்மிகராஜூனம் காலே பவத்தம் போராணக நிதி⁴ஸத்த²ம் த²பேத்வா பச்சா² அத⁴ம்மிகானம்ராஜூனம் காலே பவத்தேஸு யேபு⁴ய்யேன அத⁴ம்மிகேஸு த⁴ம்மஸத்த² ராஜஸத்த² ஸங்கா²தேஸு நிதி⁴பாடே²ஸு த⁴ம்மிகஸஞ்ஞீனம் ராஜூனம் உப்பன்னோ. யோச ராஜூனம் அபி⁴ஸேககாலே தி³ன்னஞ்ஞேவஸமணப்³ராஹ்மணானம்திணகட்டோ²த³கந்தி வசனம் உபாதா³ய ஸப்³ப³மித³ம் ப்³ராஹ்மணானம் ராஜூஹி தி³ன்னந்தி ஏவம் ஸஞ்ஞீனம் ப்³ராஹ்மணானம் உப்பன்னோ. யோச நத்தி² ஸுகத து³க்கடானம் கம்மானம் ப²லம் விபாகோதி ஏவம் தி³ட்டி²கானம் கம்மப²லஸம்ப³ந்தா⁴ பவாதீ³னம் உப்பன்னோ. ஸோஸப்³போ³பி உபனிஸ்ஸயமோஹோ நாம ஹோதி. ஸோ இத⁴ நாதி⁴ப்பேதோ. இதரதா² லோபோ⁴ நிதா³னம் கம்மானம் ஸமுத³யாய. தோ³ஸோ நிதா³னம் கம்மானம் ஸமுத³யாய. மோஹோ நிதா³னம் கம்மானம் ஸமுத³யாயாதி வசனதோ ஸப்³பே³பி அகுஸலகம்ம பதா²தி மூலகாஏவ இத⁴ வத்தப்³பா³ ஸியுந்தி. ஏவம்பனேத்த² வத்தப்³ப³ம் ஸியா, கம்மேஸுச கம்மப²லேஸுச ஸஞ்ஜாதகங்கா²னம் ஜனானம் கங்கா² பரியுட்டா²ன சித்தேனஸஹேவதத³னுரூபானிஅதி³ன்னாதா³னாதீ³னி சத்தாரிகம்மானி கரோந்தானம் தானி கம்மானி ஸுத்³தே⁴ன மோஹமூலேன ஜாயந்தீதி. ஏவஞ்ஹி ஸதி பரதோ விசிகிச்சா² சேதனாய படிஸந்தி⁴ஜனகேஸு க³ஹணம்பி உபபன்னம் ஹோதீதி. [அகுஸலகம்மம்].

152. காமாவசரகுஸலம்பி காயத்³வாரே பவத்தம் காய கம்மந்தி ஏத்த² த்³வே பரியாயா வேதி³தப்³பா³. கத²ம், வக்க²மானேஸு ஹி புஞ்ஞக்ரியவத்தூ²ஸு யம்கிஞ்சி புஞ்ஞக்ரியவத்து²ம் காயங்க³ம் சோபேத்வா பவத்திதம் காயகம்மம் நாம. வாசங்க³ம் சோபேத்வா பவத்திதம் வசீகம்மம் நாம. காயங்க³ வாசங்கா³னி அசோபேத்வா மனோத்³வாரேஏவ பவத்திதம் மனோகம்மம் நாமாதி அயமேகோ பரியாயோ. அயம் பன மேத்தம் காயகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவிசேவ ரஹோ ச. மேத்தம் வசீகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவிசேவ ரஹோச. மேத்தம் மனோகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவிசேவ ரஹோசாதிச. ஸப்³ப³ம் காயகம்மம் ஞாணபுப்³ப³ங்க³மம் ஞாணானுபரிவத்தம். ஸப்³ப³ம் வசீகம்மம் ஞாணபுப்³ப³ங்க³மம் ஞாணானுபரிவத்தம். ஸப்³ப³ம் மனோகம்மம் ஞாணபுப்³ப³ங்க³மம் ஞாணானுபரிவத்தந்தி ச.

பத³க்கி²ணம் காயகம்மம், வாசாகம்மம் பத³க்கி²ணம்;

பத³க்கி²ணம் மனோகம்மம், பணீஹிதே பத³க்கி²ணே திச.

ஏவமாதீ³ஸு ஸுத்தபதே³ஸு ஆக³தோ. அபிச, அட்ட²ஸாலினியம் ஸகலாய நவகம்மத்³வாரகதா²ய அயமத்தோ² தீ³பேதப்³போ³. தத்த² ஹி தா³னமயம்பி காயவசீ மனோகம்மவஸேன திதா⁴ விப⁴த்தம். ததா² ஸீலமயம் பா⁴வனாமயஞ்சாதி. யஸ்மிம் பன து³ஸ்ஸில்யே பவத்தமானே காயோ அபரிஸுத்³தோ⁴ ஹோதி. காயஸம்வரோ பி⁴ஜ்ஜதி. யம் பன குஸலம் பவத்தமானம் தத³ங்க³பஹானாதி³வஸேன தம் து³ஸ்ஸில்யம் பஜஹித்வா காயத்³வாரம் ஸோத⁴யமானம் காயஸம்வரம் பூரயமானம் பவத்ததி. தம் காயசோபன ரஹிதம்பி காயங்க³ ஸம்வரண கிச்சத்தா கிச்சஸீஸேன காயத்³வாரே பவத்தம் காயகம்மம்னாம. காயஸுசரிதந்திபி வுச்சதி. ஏத்த²ச தம் து³ஸ்ஸில்யம் பஜஹித்வாதி யஸ்மிம் சித்தே உப்பஜ்ஜமானே பாணகா⁴தாதி³கம் காயது³ஸ்ஸில்யம் உப்பஜ்ஜேய்ய. தஸ்ஸ சித்தஸ்ஸ உப்பஜ்ஜிதும் அப்பதா³னவஸேன தம் காயது³ஸ்ஸில்யம் பஜஹித்வா. காயத்³வாரம் ஸோத⁴ யமானந்தி யஸ்மிம் து³ஸ்ஸில்யே உப்பஜ்ஜமானே காயங்க³ம் அஸுத்³த⁴ம் ஹோதி. தஸ்ஸ உப்பஜ்ஜிதும் அப்பதா³னவஸேன காயத்³வாரம் ஸோத⁴யமானம். காயஸம்வரம் பூரயமானந்தி ஸயம் காயங்க³ஸம்வரணகிச்சஸம்பாத³னேன காயஸம்வரம் பூரேந்தந்தி அத்தோ². வசீகம்மேபி ஏஸேவ நயோ. அவயேஸம் பன ஸப்³ப³ம்பி கல்யாணகம்மம் தீஸு த்³வாரேஸு பவத்தம்பி மனோத்³வாரம்ஏவ ஸோத⁴யமானம் மனோஸம்வரம்ஏவ பூரயமானம் பவத்ததீதி மனோத்³வாரே பவத்தம் மனோகம்மம்னாம. மனோஸுசரிதந்திபி வுச்சதி. அயமேகோ பரியாயோ. அயம் பன அனேகஸதேஸு கம்மபத²ஸுத்தேஸு ஆக³தோ. அபிச, அட்ட²ஸாலினியம் ஸகலாய த்³வாரகதா²க அயமத்தோ² தீ³பேதப்³போ³தி. இமேஸு பன த்³வீஸு பரியாயேஸு ஸத்துஸாஸனே கல்யாணத⁴ம்மபூரணம்னாம யாவதே³வ பாபத⁴ம்மபஹானத்தா²ய ஏவ ஹோதீதி பச்சி²மோயேவ பதா⁴னந்தி வேதி³தப்³போ³தி. தி³ய்யதி ஏதேனாதி தா³னம். வத்து²பரிச்சாக³சேதனா. ஸீலயதீதி ஸீலம். காய வசீகம்மானி ஸாவஜ்ஜானி நீவாரேத்வா அனவஜ்ஜானி ஸுஸமாஹிதானி கத்வா ஸம்மாத³ஹதி த²பேதி, உபரிமே குஸலத⁴ம்மேச உபதா⁴ரேதி. தேஸம் பதிட்டா² ஹுத்வா தா⁴ரேதீதி அத்தோ². பா⁴வேந்தி ஏதாயாதி பா⁴வனா. அதி⁴குஸலத⁴ம்மே அனுப்பன்னேவா உப்பாதே³ந்தி உப்பன்னேவா வட்³டே⁴ந்தீதி அத்தோ². அபசாயந்தி ஏதேனாதி அபசாயனம். பூஜேந்தி காயவாசாஹி அத்தானம் நீசவுத்திம் த³ஸ்ஸேந்தீதி அத்தோ².

விஸேஸேன ஆவரந்தி உஸ்ஸுக்கம் ஆபஜ்ஜந்தீதி ப்³யாவடானம் பா⁴வோ கம்மம்வா வேய்யாவச்சம். பஜ்ஜித்தா²தி பத்தி. அத்தனி லத்³த⁴புஞ்ஞகோட்டா²ஸஸ்ஸ நாமம். பாபீயதீதிவா பத்தி. பரேஹி அனுமோத³ந்தேஹி லத்³த⁴ப்³ப³ஸ்ஸ புஞ்ஞானிஸந்த³ஸ்ஸேதம் நாமம். பத்திம் த³த³ந்தி ஏதேனாதி பத்திதா³னம். ததே³வ பரேஹி தி³ன்னம் அனுமோத³ந்தி. ஸாது⁴காரம் த³த³ந்தி ஏதேனாதி பத்தானுமோத³னம். த⁴ம்மம் ஸுணந்தி ஏதேனாதி த⁴ம்மஸவனம். த⁴ம்மம் தே³ஸேந்தி ஏதாயாதி த⁴ம்மதே³ஸனா. அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோதிஆதி³னா த³ஸவத்து²கம் ஸம்மாதி³ட்டி²ம் உஜும் கரோந்தி ஏதேனாதி தி³ட்டி²ஜுகம்மம். ஸப்³பா³னி பன தானி புனேந்தி சித்தஸந்தானம் ஸோதே⁴ந்தி ஏதேஹீதி புஞ்ஞானி. பூஜனீயபா⁴வம் நிப்³ப³த்தேந்தீதி புஞ்ஞானீதிபி வத³ந்தி. தானிஏவ அவஸ்ஸம் கத்தப்³ப³ட்டே²ன க்ரியானிசாதி புஞ்ஞக்ரியானி. தானியேவ ஸுக²விஸேஸானம் அதி⁴ட்டா²னட்டே²ன வத்தூ²னிசாதி புஞ்ஞக்ரியவத்தூ²னீதி. ஏத்த² ஏகமேகம் திவித⁴ம் ஹோதி புரிமம் மஜ்ஜி²மம் பச்சி²மந்தி. தத்த² தா³னே தாவ படிக்³கா³ஹகஸ்ஸ பரிச்சாக³கரணம் மஜ்ஜி²மம்னாம. ததோ புப்³பே³ இமினா பச்சயேன தா³னமயம் புஞ்ஞம் பவத்தயிஸ்ஸாமீதி ஏவம் பச்சயுப்பாத³னதோ பட்டா²ய தா³னம் ஆரப்³ப⁴ தா³னம் உத்³தி³ஸ்ஸ தீஸு த்³வாரேஸு பவத்தா குஸலசேதனா புரிமம்னாம. பச்சா² பா⁴கே³ பன அத்தனா தி³ன்னதா³னம் ஆரப்³ப⁴ புனப்புனம் அத்தமனசித்தம் உப்பாதே³ந்தஸ்ஸ பவத்தா குஸலசேதனா பச்சி²மம்னாமம். ஸப்³ப³ம்பி சேதம் அகுஸலே வுத்தனயேன ப³லவபச்சயே லத்³தா⁴ படிஸந்தி⁴ம் தே³தி. அலத்³தா⁴ ந தே³தீதி வேதி³தப்³ப³ம்.

புன ஹீன மஜ்ஜி²மபணீதவஸேன திவித⁴ம் ஹோதி. தத்த² ஹீனேன ச²ந்தே³ன சித்தேன வீரியேன வீமம்ஸாயவா பவத்திதம் ஹீனம், மஜ்ஜி²மேன ச²ந்தா³தி³னா பவத்திதம் மஜ்ஜி²மம், பணீதேன பணீதம். யஸகாமதாயவா பவத்திதம் ஹீனம். புஞ்ஞப²லகாமதாயவா பவத்திதம் மஜ்ஜி²மம். கத்தப்³ப³மே வித³ந்தி அரியபா⁴வம் நிஸ்ஸாய பவத்திதம் பணீதம். அத்துக்கம்ஸன பரவம்ப⁴னாதீ³ஹி உபக்கிலிட்ட²ம்வா ஹீனம். அனுபக்கிலிட்ட²ம் லோகியஸுக²பா⁴கி³தாய பவத்திதம் மஜ்ஜி²மம். மக்³க³ப²லஸுக²பா⁴கி³தாய பவத்திதம் பணீதம். தண்ஹாவஸேனவா ப⁴வபோ⁴க³த்தா²ய பவத்திதம் ஹீனம். அத்தனோ விமோக்க²த்தா²ய பவத்திதம் மஜ்ஜி²மம். ஸப்³ப³ஸத்தவிமோக்க²த்தா²ய பவத்திதம் பாரமிதாதா³னம் பணீதந்தி அயமத்தோ² விஸுத்³தி⁴மக்³கே³ ஸீலனித்³தே³ஸம் நிஸ்ஸாய வேதி³தப்³போ³தி. யதா² சேத்த², ஏவம் ஸேஸேஸுபியதா² ஸம்ப⁴வம் திகத்³வயம் விப⁴ஜித்வா வத்தப்³ப³ந்தி. தத்த² ஸீலம் நாமபி⁴க்கு²ஸீலம், பி⁴க்கு²னிஸீலம், ஸாமணேரஸீலம், க³ஹட்ட²ஸீலந்தி சதுப்³பி³த⁴ம் ஹோதி. தத்த² புரிமானம் த்³வின்னம் ஸமாதா³னகிச்சம் கம்மவாசாய ஸித்³த⁴ம்ஹோதி. அந்திமவத்து²அஜ்ஜா²பன்னேனவா ஸிக்கா²பச்சக்கா²னேனவா கம்மவாசாய பி⁴ன்னாய ஸப்³ப³ம் ஸமாதா³னம் பி⁴ன்னம் ஹோதி. ஸப்³பா³னி உபஸம்பன்ன ஸீலானி பி⁴ன்னானி ஹோந்தி. ததா³ பி⁴க்கு²படிஞ்ஞம் அவிஜஹித்வா டி²தோ து³ஸ்ஸீலோனாம ஹோதி. த²பேத்வாபன அந்திமவத்து²ம் அஞ்ஞஸிக்கா² பதா³னி வீதிக்கமந்தஸ்ஸ யம் வீதிக்கமதி. தஸ்மிம்யேவ ஸம்வரபே⁴தோ³ ஹோதி. ந ஸமாதா³ன பே⁴தோ³. ந ஹி தம் புன கம்மவாசாய ஸமாதா³தப்³ப³ந்தி அத்தீ²தி. படிகம்மம் கரோந்தஸ்ஸ பன ஸம்வரோ பாகதிகோ ஹோதி. ஸஞ்சிச்ச வீதிக்கமந்தோவா படிகம்மம் அகரோந்தோவா அலஜ்ஜீனாம ஹோதி. ந து³ஸ்ஸீலோதி. ஏஸனயோ ஸாமணேரஸீலேபி. தத்த² பன ஸரணக³மனேனேவ ஸமாதா³னம்ஸித்³த⁴ம் ஹோதி. லிங்க³னாஸனங்க³ம் கத்வா ஸரணக³மனே பி⁴ன்னே ஸப்³ப³ம் ஸமாதா³னம் பி⁴ஜ்ஜதி. இதரேஸு பன யம் வீதிக்கமதி, தஸ்மிம்யேவ ஸம்வரபே⁴தோ³ ஹோதீதி வேதி³தப்³ப³ம்.

க³ஹட்ட²ஸீலே பன பகதி க³ஹட்டா²னம் க³ஹணவஸேனேவ ஸமாதா³னம் ஸித்³த⁴ம் ஹோதி. தஸ்மா ஏகதோக³ண்ஹந்தே ஸப்³பா³னி ஸமாதி³ன்னானி ஹோந்தி. ஏகஸ்மிம்ச பி⁴ன்னே ஸப்³பா³னி பி⁴ன்னானி ஹோந்தி. ஸப்³பா³னி புன ஸமாதா³தப்³பா³னி. விஸும் விஸும் க³ண்ஹந்தே பன யம் வீதிக்கமதி, ஏததே³வபி⁴ஜ்ஜதி. ததே³வ புன ஸமாதா³தப்³ப³ம் ஹோதீதி. பரிச்சி²ன்னகாலா திக்கமனே பன ஸப்³ப³ம் ஸமாதா³னம் வூபஸம்மதியேவ. து³ஸ்ஸீலபா⁴வோ பனேத்த² பஞ்சன்னம் நிச்சஸீலானம் பே⁴தே³ன வேதி³தப்³போ³. நிச்சானிச்சேஸு பன யம் நிச்சமேவ வட்டதி. அனிச்சம் நவட்டதி ஸாவஜ்ஜம் ஹோதி. தம் நிச்சஸீலம் நாம. யம் பன நிச்சம்பி வட்டதி. மஹந்தம் புஞ்ஞாபி⁴ஸந்த³ம் ஹோதி. அனிச்சம்பி வட்டதி ஸாவஜ்ஜம் ந ஹோதி. தம் அனிச்சஸீலம்னாம. தத்த² பி⁴க்கு² பா⁴வே டி²தஸ்ஸ பி⁴க்கு²ஸீலம் ஸாமணேரபா⁴வே டி²தஸ்ஸ ஸாமணேரஸீலம் பகதிக³ஹட்டா²னம்பஞ்சஸீலம் பப்³ப³ஜிதஸங்கே²பக³தானம் உபாஸகானம் தாபஸபரிப்³பா³ஜகானஞ்ச த³ஸஸீலம் நிச்சஸீலம்னாம. தேஸஞ்ஹி தம் தம் யதா²ஸகம் ஸீலம் நிச்சம் ஸுத்³த⁴ம் கத்வா ரக்கி²துமேவ வட்டதி. அரக்க²ந்தானம் பி⁴க்கு²பா⁴வாதி³கோ ஸாவஜ்ஜோ ஹோதி அஸுத்³தோ⁴. கஸ்மா, அத்தனோ அனுரூபஸ்ஸ ஆசாரஸ்ஸ விபத்திதோ. பகதிக³ஹட்டா²னம் பன அட்ட²ங்கு³போஸத²ஸீலம் அனிச்சஸீலம்னாம. தஞ்ஹி தேஸம் வுத்தனயேன நிச்சம்பி வட்டதி. அனிச்சம்பி வட்டதி. ததா² த³ஸஸீலஞ்ச. தஞ்ஹி பகதி க³ஹட்டா²னம் அனிச்சஸீலமேவ ஹோதி. கி³ஹினிவத்த²ம் பஹாய காஸாயவத்த²தா⁴ரணேன பப்³ப³ஜிதஸங்கே²பக³தானம் ஏவ நிச்சஸீலம். யதா² ஹி பகதிமனுஸ்ஸானம் பஞ்சஸீலம் ஸமாதி³ன்னம்பி அஸமாதி³ன்னம்பி நிச்சம் ரக்கி²துமேவ வட்டதி. வீதிக்கமிதும் நவட்டதி. ததா² பப்³ப³ஜிதவேஸதா⁴ரீனம் த³ஸஸீலம் ஸமாதி³ன்னம்பி அஸமாதி³ன்னம்பி நிச்சம் ரக்கி²துமேவ வட்டதி. வீதிக்கமிதும் நவட்டதி. வேஸதா⁴ரணேன ஸஹ ஸித்³த⁴த்தாதி.

உபரி வுச்சமானா ஸமத²விபஸ்ஸனாவஸேன து³விதா⁴ பா⁴வனா பா⁴வனானாம. ஸா இத⁴ அப்பனம் அபத்தாவ அதி⁴ப்பேதா. த⁴ம்மவினயபரி யத்தியா ஸஹ அனவஜ்ஜகம்மஸிப்பவிஜ்ஜாடா²னேஸு பரிசயகரண சேதனாபி ஏத்தே²வ ஸங்க³ய்ஹதி. ரதனத்தயே பன மாதாபிதூஸு குலேஜேட்டே²ஸு ஆசரியேஸு த⁴ம்மிகஸமணப்³ராஹ்மணேஸு அஞ்ஞேஸுச கு³ணவயவுத்³தே⁴ஸு யதா²ரஹம் பச்சுட்டா²னம் வந்த³னம் அஞ்ஜலிகரணம் ஸாமிசிகரணம் வத்தபடிவத்தகரணந்தி ஏவமாதி³ஸப்³ப³ம் அபசாயனம்னாம. தேஸஞ்ஞேவ அஞ்ஞேஸஞ்ச ஆக³ந்துகக³மிகஅத்³தி⁴கானம் கி³லானானம் ஜிண்ணானம் கிச்ச கரணீயேஸு ஸப்³ரஹ்மசாரீனம் சீவரகம்மாதீ³ஸு பரேஸம் தம்தம்புஞ்ஞ கம்மேஸுச பரிஸுத்³தே⁴ன ஹிதப²ரணசித்தேன அத்தனோகிச்சேஸு விய காயவாசாஹி வாயாமகரணம் வேய்யாவச்சம்னாம. அத்தனா கதஸ்ஸ யஸ்ஸகஸ்ஸசி புஞ்ஞஸ்ஸ பரேஹி ஸாதா⁴ரணகரணம் பத்திதா³னம்னாம. பரேஹி தி³ன்னாய பத்தியா அனுமோத³னம் அத்தமனதாபவேத³னம் பத்தா நுமோத³னம்னாம. அதி³ன்னஸ்ஸ புஞ்ஞஸ்ஸ அனுமோத³னம் பன அனுமோத³னமேவ ஹோதி. ந பத்தானுமோத³னம். பத்தியாஏவ அபா⁴வதோ. பத்திச து³விதா⁴ உத்³தி³ஸிகா அனுத்³தி³ஸிகாதி. தத்த² அத்தானம் உத்³தி³ஸிகம் அனுமோத³ந்தஸ்ஸேவ தி³ட்ட²த⁴ம்மவேத³னீயம் ஜாதந்தி வேதி³தப்³ப³ம். இத³ம் பன த்³வயம் தா³னபுஞ்ஞேஸுஏவ விஸேஸதோ பாகடம். தஞ்ஹி உத்³தி³ஸகம் கத்வா தே³வதானம்வா பரத³த்துபஜீவிபேதானம்வா வேமானிகபேதானம்வா வினிபாதிகாஸுரானம்வா தி³ன்னம் அனுமோதி³தஞ்ச தேஸம் தங்க²ணேஏவ தி³ட்ட²த⁴ம்ம வேத³னீயம் ஜாதந்தி. அத்த²ஹித படிஸம்யுத்தாய த⁴ம்மகதா²ய யோனிஸோ மனஸிகாரே ட²த்வா ஸவனஞ்ச கத²னஞ்ச த⁴ம்மஸவனம் த⁴ம்ம தே³ஸனாசனாம. நிரவஜ்ஜகம்மஸிப்பவிஜ்ஜாடா²னானம் ஸவனகத²னசேதனாச ஏத்தே²வஸங்க³ய்ஹந்தி.

நத்தி² தி³ன்னம் நத்தி²யிட்ட²ந்திஆதி³னயபவத்தாய த³ஸவத்து²காய மிச்சா² தி³ட்டி²யாவா இஸ்ஸரனிம்மானாதி³தி³ட்டி²யாவா தி³ட்ட²மங்க³லாதி³தி³ட்டி²யாவா விஸுத்³த⁴ம் கத்வா தேஹி தேஹி வத்தூ²ஹிவா யுத்தீஹிவா காரணேஹிவா கம்மஸகதா ஞாணஸங்கா²தாய ஸம்மாதி³ட்டி²யா வோதா³னகரணம் தி³ட்டு²ஜுகம்மம்னாமாதி. யத்த² பன திவித⁴மேவ புஞ்ஞக்ரியவத்து² ஆக³தம். தத்த² பத்திதா³னானுமோத³னானி தா³னே ஸங்க³ய்ஹந்தி. இஸ்ஸாமச்சே²ரானம் படிபக்க²பா⁴வேன தம் ஸபா⁴வத்தா. அபசாயனவேய்யாவச்சானி ஸீலே ஸங்க³ய்ஹந்தி. தேஸம் சாரித்த ஸீலத்தா. ஸேஸானி தீணி பா⁴வனாமயே ஸங்க³ய்ஹந்தி. தம் ஸபா⁴வத்தா. கம்மட்டா²னவினிமுத்தோ த⁴ம்மோனாம நத்தீ²தி ஹி வுத்தம். தி³ட்டு²ஜுகம்மஞ்ச ஞாண வட்³ட⁴னமேவாதி. தீஸ்வேவவா ஏதம் ஸங்க³ய்ஹதி. தி³ட்டு²ஜுகம்மம் ஸப்³பே³ஸம் நியம லக்க²ணந்திதி அட்ட²கதா²யம் வுத்தம். ஸதியேவ ஹி கம்மஸகதாஞாணே தா³னாதீ³னி தீணி ஸம்பஜ்ஜந்தீதி. மனோகம்மமேவாதி மனஸ்மிம்ஏவ கம்மபத² கிச்சஸித்³தி⁴தோ மனோகம்மம்ஏவ.

[158] விபா⁴வனியம் பன

‘‘விஞ்ஞத்திஸமுட்டா²பகத்தா பா⁴வேன காய த்³வாராதீ³ஸு அப்பவத்தனதோதி’’ வுத்தம். தம் ந ஸுந்த³ரம்.

ந ஹி விஞ்ஞத்திஸமுட்டா²பகம் அபி⁴ஞ்ஞாகுஸலம் காயத்³வாராதீ³ஸு பவத்தமானம்பி காயவசீகம்மஸங்க்²யம் க³ச்ச²தி, காயவாசானம் கம்மபத² அங்க³பா⁴வாஸம்ப⁴வதோதி. தஞ்ச பா⁴வனாமயந்தி தா³னஸீலவஸேன அப்பவத்தனதோ. கேவலம் பா⁴வனாகம்மவிஸேஸத்தா தஞ்ச மஹக்³க³த குஸலம் பா⁴வனாகம்ம மேவ ஹோதி. யம் பன படிஸம்பி⁴தா³ மக்³கே³ பத²மஜ்ஜா²னேன நீவரணானம். து³தீயேன விதக்கவிசாரானம். ததீயேன பீதியா. சதுத்தே²ன ஸுக²து³க்கா²னம் பஹானம் ஸீலம். வேரமணி ஸீலம். சேதனா ஸீலம். ஸம்வரோ ஸீலம். அவீதிக்கமோ ஸீலந்தி வுத்தம். தம் பரியாயேன வுத்தந்தி வேதி³தப்³ப³ம். அப்பனாபத்தந்தி பா⁴வனா ப³லேன ஆரம்மணே அனுபவிஸித்வா அசலட்டி²திபா⁴வேன பவத்தனதோ அப்பனாபத்தம் கம்மம் ஹோதி.

[159] விபா⁴வனியம் பன

‘‘புப்³ப³பா⁴க³பவத்தானம் காமாவசரபா⁴வதோதி’’ காரணம் வுத்தம். தம் ந ஸுந்த³ரம்.

ந ஹி தேஸம் காமாவசரதாமத்தம் அப்பனாபத்தியா காரணம் ஹோதீதி. ஜா²னங்க³பே⁴தே³னாதி வுத்தம். ஜா²னபே⁴தே³னாதி பன வத்தப்³ப³ம். ஜா²னங்க³பே⁴தே³னாதிவா ஜா²னங்க³ஸமுதா³யபே⁴தே³னாதி அத்தோ², ஜா²னபே⁴தே³ன இச்சேவ வுத்தம் ஹோதி. குஸலகம்மம்

153. ஏத்தா²தி ஏதஸ்மிம் பாகட்டா²னசதுக்கே. உத்³த⁴ச்சரஹிதந்தி உத்³த⁴ச்சஸஹக³தசேதனாவஜ்ஜிதம். கஸ்மா பன உத்³த⁴ச்சசேதனா இத⁴ பஜ்ஜிதாதி. படிஸந்தி⁴அனாகட்³ட⁴னதோ. கத²ம் விஞ்ஞாயதீதி சே. த⁴ம்மஸங்க³ஹே த³ஸ்ஸனேன பஹாதப்³பே³ஸு தம் அவத்வா பா⁴வனாய பஹாதப்³பே³ஸு ஏவ வுத்தத்தா. யதா²ஹ-சத்தாரோ தி³ட்டி²க³தஸம்பயுத்தசித்துப்பாதா³ விசிகிச்சா²ஸஹக³தோ சித்துப்பாதோ³, இமே த⁴ம்மா த³ஸ்ஸனேன பஹாதப்³பா³திச, உத்³த⁴ச்சஸஹக³தோ சித்துப்பாதோ³, இமேத⁴ம்மா பா⁴வனாயபஹா தப்³பா³திச, ஸேஸா பன சத்தாரோ தி³ட்டி²க³தவிப்பயுத்தசித்துப்பாதா³ த்³வே படிக⁴ஸம்பயுத்தசித்துப்பாதா³ச ஸியா த³ஸ்ஸனேனபஹாதப்³பா³ ஸியா பா⁴வனாய பஹாதப்³பா³தி தத்த² வுத்தா. கத²ஞ்ச விஞ்ஞாயதி. யோ த³ஸ்ஸனேனபஹாதப்³பே³ஸு ந வுத்தோ, ஸோ அகுஸலத⁴ம்மோ படிஸந்தி⁴ம் நாகட்³ட⁴தீதி. பட்டா²னே த³ஸ்ஸனேனபஹாதப்³ப³த⁴ம்மேஸுஏவ நானாக்க²ணிக கம்மபச்சயஸ்ஸ உத்³த⁴டத்தா இதரத்த² தஸ்ஸ அனுத்³த⁴டத்தாதி. யதா²ஹ-ஸஹஜாதா த³ஸ்ஸனேனபஹாதப்³பா³ சேதனா ஸம்பயுத்தகானம் த⁴ம்மானம் சித்தஸமுட்டா²னானஞ்ச ரூபானம் கம்மபச்சயேனபச்சயோ. நானாக்க²ணிகா த³ஸ்ஸனேன பஹாதப்³பா³ சேதனா விபாகானம் க²ந்தா⁴னம் கடத்தாச ரூபானம் கம்மபச்சயேன பச்சயோதிச ஸஹஜாதா பா⁴வனாய பஹாதப்³பா³ சேதனாஸம்பயுத்தகானம்த⁴ம்மானம் சித்தாஸமுட்டா²னானஞ்சரூபானம் கம்மபச்சயேன பச்சயோதிச. நச நானாக்க²ணிக கம்மபச்சயஸத்தியா வினா விபாகுப்பாத³னம்னாம அத்தீ²தி. யதி³ஏவம் ஸா பவத்திவிபாகம்பி நஜனேதீதி ஸக்கா வத்துந்திசே.ந. படிஸம்பி⁴தா³விப⁴ங்கே³ தஸ்ஸா விபாகஸ்ஸ உத்³த⁴டத்தா. யதா²ஹ-கதமே த⁴ம்மா அகுஸலா. யஸ்மிம் ஸமயே அகுஸலம் சித்தம் உப்பன்னம் ஹோதி உபேக்கா²ஸஹக³தம் உத்³த⁴ச்சஸம்பயுத்தம் ரூபாரம்மணம்வா.ல. இமே த⁴ம்மா அகுஸலா. இமேஸு த⁴ம்மேஸு ஞாணம் த⁴ம்மபடிஸம்பி⁴தா³. தேஸம் விபாகே ஞாணம் அத்த²படிஸம்பி⁴தா³தி. தேனாஹ பவத்தியம் பன ஸப்³ப³ம்பி த்³வாத³ஸவித⁴ந்திஆதி³.

[160] யம் பன விபா⁴வனியம்

‘‘அதி⁴மோக்க²விரஹேன ஸப்³ப³து³ப்³ப³லம்பி விசிகிச்சா²ஸஹக³தம் படிஸந்தி⁴ம் ஆகட்³ட⁴தி. அதி⁴மோக்க²ஸம்பயோகே³ன ததோ ப³லவந்தம்பி உத்³த⁴ச்சஸஹக³தம் நாகட்³ட⁴தீதி’’ வுத்தம். தம் ந ஸுந்த³ரம்.

ந ஹி அதி⁴மோக்க²விரஹமத்தேன விசிகிச்சா²ஸஹக³தம் ஸப்³ப³து³ப்³ப³லந்திச அதி⁴மோக்க²ஸம்பயோக³மத்தேன உத்³த⁴ச்சஸஹக³தம் ததோ ப³லவந்தந்திச ஸக்கா வத்தும். ஸத்த²ரி கங்க²தி த⁴ம்மே கங்க²தீதி ஏவமாதி³னா நயேன வுத்தாய விசிகிச்சா²ய அத்தனோ விஸயே மஹாஹத்தி²னாக³ஸ்ஸ விய ப³லவதரத்தா அதிவிய காளகத⁴ம்மத்தாசாதி. ததா² ஹிஸா ஏகந்தேன த³ஸ்ஸனேனபஹாதப்³பே³ஸு பதா⁴னபா⁴வேன வுத்தா. ததோயேவச படிஸந்தி⁴ஆகட்³ட⁴னம்பி தஸ்ஸா விஞ்ஞாதப்³ப³ம் ஹோதீதி. ஸபா⁴வவிருத்³த⁴த்தாயேவ பன விசிகிச்சா²ஸஹக³தம் அதி⁴மோக்க²ரஹிதம் ஹோதீதி யுத்தம். தஸ்மா உத்³த⁴ச்சஸஹக³தமேவ ஸப்³ப³து³ப்³ப³லந்தி வேதி³தப்³ப³ம். ஸப்³ப³த்தா²பீதி ஸுக³திது³க்³க³திவஸேன ஸப்³ப³ஸ்மிம்பி. யதா²ரஹந்தி தேஸு லோகேஸு லத்³த⁴வத்து²த்³வாரானுரூபம். விபச்சதீதி விபாசேதி விபக்கபா⁴வம் ஆபாதே³தி. ஸப்³ப³ம்பிவாத்³வாத³ஸவித⁴ம் அகுஸலகம்மம் ஸத்தா குஸலபாகானி ஹுத்வா விபச்சதி, விபக்கபா⁴வம் க³ச்ச²தீதி அத்தோ².

யஸ்மா குஸலகம்மானி அபாயபூ⁴மியம்பி பவத்தியம் மஹாஸம்பத்தியோ ஸமுட்டா²பேத்வா மஹித்³தி⁴கானம் நாக³ஸுபண்ணாதீ³னம் ஸந்தானே ஸயமேவ அத்தனோவிபாகஸ்ஸ ஓகாஸம் கத்வா ஸுக²விபாகம் ஜனயந்தி. அஞ்ஞேஸம்பி ஆபாயிகானம் தேன தேன காரணேன இட்டா²ரம்மண ஸமாயோகே³ ஸதி அத்தனோ விபாகஸ்ஸ ஓகாஸம் லபி⁴த்வா ஸுக²விபாகம் ஜனயந்தி. தஸ்மா ததா²பவத்தியஞ்சாதிஆதி³ மாஹ. ந ஹி தானி ஸுக²விபாகானி அகுஸகம்மஸ்ஸ விபாகானி ப⁴விதும் அரஹந்தி. வுத்தேஞ்ஹேதம் விப⁴ங்கே³ அட்டா²னமேதம் அனவகாஸோ, யம் காயது³ச்சரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்யாதிஆதி³. தத்த² மஹாவிபாகானி ஸுக³தி காமலோகே அஹேதுகானி அட்ட²பி ஸப்³ப³ஸ்மிம் காமலோகே தேஸுச பஞ்சசக்கு²விஞ்ஞாண ஸோதவிஞ்ஞாண ஸம்படிச்ச²ன ஸந்தீரண யுக³ளானி ரூபலோகே விபச்சதீதி வுத்தம் யதா²ரஹம் விபச்சதீதி. ரூபாவசர குஸலஞ்ஹி கம்மஸமுட்டா²னரூபானி ஜனயந்தம்பி ஸயம் விபச்சமானம் ஆரம்மணந்தரே அஞ்ஞபூ⁴மிக விபாகபா⁴வேன நவிபச்சதி. காமவிராக³பா⁴வனாபா⁴வேன பன அப்பனாபத்த கம்ம விஸேஸத்தா காமதண்ஹாய அவிஸயபூ⁴தே நிமித்தா ரம்மணே அத்தனா ஸப்³ப³ஸோ ஸதி³ஸேன மஹக்³க³தபா⁴வபத்தேன ரூப விபாகபா⁴வேனேவ விபச்சதி. தஸ்மா ரூபலோகேபி தானி பஞ்சவிபாகானி காமாவசரகுஸலஸ்ஸேவாதி வேதி³தப்³பா³னீதி. த்³வீஸு கம்மஸ்ஸ விபச்சனட்டா²னேஸு படிஸந்தி⁴னாம மஹந்தம்டா²னம் ஹோதி. தஸ்மா ததா³ விபச்சந்தம் கம்மம் அத்தனோ ஸாமத்தி²யானுரூபம் நாதிஹீனம் விபாகம் ஜனேதும் ஸக்கோதி. பவத்தியம் பன நானாடா²னேஸு நானாகிச்சேஹி விபச்சதி. தஸ்மா ததா³ விபச்சந்தம் கம்மம் அத்தனோ ஸாமத்தி²யானுரூபம் விபச்சேதும் நஸக்கோதி. பஞ்சவிஞ்ஞாணட்டா²னாதீ³ஸு பரித்தகேஸு விபச்சமானம் டா²னா நுரூபம் விபச்சதி. ததா³ரம்மணட்டா²னே விபச்சமானம் யேபு⁴ய்யேன ஜவனா நுரூபம் விபச்சதி. தஸ்மா ஸோளஸகமக்³கோ³ த்³வாத³ஸகமக்³கோ³ அஹேது கட்ட²கந்தி ஏவம்ஏகேகஸ்ஸ கம்மஸ்ஸ விபாகப்பபே⁴தோ³ பவத்தோதிதம் பபே⁴த³ம்த³ஸ்ஸேதும் தத்தா²பீதிஆதி³மாஹ.

குஸலம் து³வித⁴ம் ஸம்பஜானகதம் அஸம்பஜானகதந்தி. தத்த² கம்மா யூஹனகாலே அந்தமஸோ ஹேட்டா² வுத்தம் தி³ட்டு²ஜுகம்மஞாணம்பி ஸுட்டு² யோஜேத்வா கதம் ஸம்பஜானகதம்னாம. யதா²ஹ-கம்மஞ்ச கம்மப²லஞ்ச ஸத்³த³ஹித்வா கதம் ஸம்பஜானகதம் நாமாதி. தி³ட்டு²ஜுகம்மஞாண மத்தம்பி அயோஜேத்வா தம் அஸம்பஜானகதம் நாம. யதா²ஹ-கம்மம்பி கம்மப²லம்பி அஜானித்வா கதம் அஸம்பஜானகதம் நாமாதி. தத்த² ஸம்பஜானகதம் திஹேதுகம் ஹோதி. அஸம்பஜானகதம் து³ஹேதுகம். யதா²ஹ-ஸம்பஜானகரணம் பன சதுஞாணஸம்பயுத்தேஹி ஹோதி. அஸம்பஜான கரணம் சதூஹி ஞாணவிப்பயுத்தேஹீதி. தத்த² ஏகமேகம் உக்கட்ட²ம் ஓமகந்தி து³வித⁴ம் ஹோதி. தத்த² குஸலஸமயே பரியுட்டி²தே நீவரணத⁴ம்மேவா அத்துக்கம்ஸன பரவம்ப⁴னாதி³கே பாபத⁴ம்மேவா ஸுட்டு² ஸோதே⁴த்வா கதம் உக்கட்ட²ம் நாம. அஸோதே⁴த்வா கதம் தேஹிவோகிண்ணம் ஓமகம்னாம. அபிச, யம் கத்வா பச்சா² லாபா⁴ வத மே. நச வத மே அலாபா⁴. ஸுலத்³த⁴ம் வத மே. நச வத மே து³ல்லத்³த⁴ம். யஸ்ஸ மே ஈதி³ஸம் புஞ்ஞம் பஸுதந்தி ஏவம் புனப்புனம் அனுமோதி³தம். தம் உக்கட்ட²ம். யம் கத்வா பச்சா² யேனகேனசி காரணேன து³ட்டு²கதம் மயாதி விப்படிஸாரோ உப்பஜ்ஜதி. தம்ஓமகம். ஏவம் சதுப்³பி³த⁴ஸ்ஸ கம்மஸ்ஸ வஸேன சதுப்³பி³த⁴ம் விபாக கோட்டா²ஸம் விப⁴ஜித்வா த³ஸ்ஸேதும் ததா²பீதிஆதி³ மாஹ. தத்தா²பீதி தஸ்மிம் காமாவசரகுஸலேபி. திஹேதுகமுக்கட்ட²ந்தி உக்கட்ட²பூ⁴தம் பணீதபூ⁴தம் சதுப்³பி³த⁴ம் திஹேதுகம். திஹேதுகபடிஸந்தி⁴ந்தி சதுப்³பி³த⁴ம் திஹேதுக படிஸந்தி⁴விபாகம். ஏத்த²ச ஏகசேதனா ஏகமேவ படிஸந்தி⁴ம் தே³தி. பவத்திவிபாகம் பன அஸங்க்²யேய்யேஸுபி ப⁴வேஸு தே³தியேவ. ஏத்த² ஸியா –

ஏகபுப்ப²ம் யஜித்வான, ஸஹஸ்ஸகப்பகோடியோ;

தே³வேஸுச மனுஸ்ஸேஸு, ஸேஸேன பரினிப்³பு³தோதி ஹி வுத்தம்.

தஸ்மா ஏகா சேதனா ஏகமேவ படிஸந்தி⁴ம் தே³தீதி இத³ம் ந யுஜ்ஜதீதி. ந ந யுஜ்ஜதி. புப்³பா³பரசேதனாஹி ஸத்³தி⁴ம் ஸஹஸ்ஸகப்ப கோடி பரிமாணஸ்ஸ வத்தப்³ப³த்தா. சித்தஞ்ஹினாம ஏகச்ச²ரக்க²ணேபி அனேகஸத ஸஹஸ்ஸ கோடிஸங்க²ம் உப்பஜ்ஜதி. ததோசிரதரேகாலேவத்தப்³ப³மேவ நத்தீ²தி. ஸஹஸ்ஸ கப்பகோடியோதி ச ஸஹஸ்ஸஆயுகப்பகோடியோ ஸஹஸ்ஸ அத்தபா⁴வகோடியோதி நேத்திஅட்ட²கதா²யம் வுத்தம். புப்³பா³பரசேதனானஞ்ச படிஸந்தி⁴தா³னபா⁴வோ கோஸலஸம்யுத்தகேன தீ³பேதப்³போ³. ஏகபிண்ட³பாததா³னஸ்மிம்ஹி ஏகாசேதனாத்³வே படிஸந்தி⁴யோ ந தே³தி. புப்³ப³பச்சி²மசேதனாவஸேன ஸத்தக்க²த்தும் ஸக்³கே³ ஸத்தக்க²த்தும் ஸேட்டி²குலே நிப்³ப³த்தோதி ஹி ஸம்யுத்தட்ட²கதா²யம் வுத்தம். திஹேது கம்பி கம்மம் படிபக்கே²ஹி அபி⁴பு⁴ய்யமானம் விஹதஸாமத்தி²யம் ஹுத்வா திஹேதுகவிபாகம் ஜனேதும் ந ஸக்கோதி. நச தம் அதிது³ப்³ப³லம்பி ஸமானம் கோஸல்லஸங்கா²தேன ஞாணேன யுத்தத்தா அதிப்³யாமுள்ஹபச்சய பூ⁴ஹம் ஜச்சந்தா⁴தி³விபத்திஸஹிதம் அஹேதுகவிபாகம் ஜனேதீதி வுத்தம் திஹேதுகமோமகந்திஆதி³. த்³வாத³ஸவிபாகானிவிபச்சதி. அயம் த்³வாத³ ஸகமக்³கோ³னாம அஹேதுகவிபாகானேவ விபச்சதி. இத³ம் அஹேது கட்ட²கம்னாம. ஏவம் திபிடகசூளனாக³த்தே²ரவாத³வஸேன விபாகப்பவத்திம் த³ஸ்ஸேத்வா இதா³னி மோரவாபிவாஸி மஹாத³த்தத்தே²ரவாத³ம் த³ஸ்ஸேதும் கா³த²மாஹ. ஸோ ஹி தே²ரோவிபாகானம் அஸங்கா²ரிகதா ஸஸங்கா²ரிகதாச கம்மவஸேனேவ ஸித்³தா⁴பி கத்வா அஸங்கா²ரம் கம்மம் ஸஸங்கா²ரவிபாகானி ந பச்சதி. ஸஸங்கா²ரம்கம்மம் அஸங்கா²ரவிபாகானி நவச்சதீதி வத³தி.

யதா² முக²னிமித்தம் நாம முகே² ஸன்னிஸின்னே ஸன்னிஸீத³தி. சலந்தே சலதி. ஏவம் பயோகே³ன அஸாத⁴னீயானம் விபாகானம் திக்க²மந்த³தா விஸேஸபூ⁴தோ ஸங்கா²ரபே⁴தோ³ கம்மவஸேனேவ வத்தப்³போ³. ந பயோக³வஸேன. இதரதா² கம்மவிஸேஸேன திக்க²மந்த³ஜாதானம் தேஸம் ஸன்னிஹிதபச்சயமத்தேன மந்த³திக்க²தாபத்தினாம ஸியாதி. அஹேது கவிபாகானம் பன பரிது³ப்³ப³லத்தா அபரிப்³யத்தோவ திக்க²மந்த³தா விஸேஸோதி உப⁴யகம்மனிப்³ப³த்தந்தி அதி⁴ப்பாயோ. யஸ்மா பன தேஸம் ஸஸங்கா²ராஸங்கா²ரபா⁴வோ படிஸந்தி⁴வஸேனவா ததா³ரம்மணவஸேனவா உப்பத்திகாலே புப்³ப³பயோக³ஸங்கா²தஸ்ஸ பச்சயவிஸேஸஸ்ஸ பா⁴வாபா⁴வேன வத்தும் யுத்தோ. ந கம்மாக³மனவஸேன, ந ஹி கம்மப⁴வே ஸங்கா²ரோ ப⁴வந்தரே விபாகானி விஸேஸேதும் யுத்தோ. தஸ்மா இமம் வாத³ம் கேசிவாத³ம்னாம கரோந்தோ கேசனாதி ஆஹ.

இமஸ்மிம் கேசிவாதே³ அஸங்கா²ரிககம்மே ஸஸங்கா²ரிக விபாகானி ஸஸங்கா²ரிககம்மேச அஸங்கா²ரிகவிபாகானி வஜ்ஜேத்வா சதூஸு திஹே துகுக்கட்டே²ஸு கம்மேஸு அஸங்கா²ரிகத்³வயே விபாகானி படிஸந்தி⁴யம் த்³வே, பவத்தியம் த்³வாத³ஸ. ஸஸங்கா²ரிகத்³வயே படிஸந்தி⁴யம் த்³வே, பவத்தியம் த்³வாத³ஸ. சதூஸு த்³விஹேதுகோமககம்மேஸு அஸங்கா²ரிகத்³வயே படிஸந்தி⁴யம் த்³வே, பவத்தியம் த³ஸ. ஸஸங்கா²ரிகத்³வயே படிஸந்தி⁴யம் த்³வே, பவத்தியம் த³ஸ. ததா² சதூஸு த்³விஹேதுகுக்கட்டே²ஸு. சதூஸு த்³விஹேதுகோமகேஸு பன படிஸந்தி⁴யம் ஏகம் அஹேதுகம் பவத்தியம் அட்ட²அஹேதுகானீதி ஏவம் விபாகானம் த்³வே த்³வாத³ஸகமக்³கா³ சத்தாரோ த³ஸகமக்³கா³ ஏகம் அஹேதுகட்ட²கஞ்ச ஹோந்தி, தம்ஸப்³ப³ம் ஸங்க³ஹேத்வா த³ஸ்ஸேதும் தேஸந்தி கா³த²மாஹ.

தேஸந்தி தேஸம் கேஸஞ்சி தே²ரானம் வாதே³. அட்ட²ஸாலினியம் பன திஹேதுகேன கம்மேன படிஸந்தி⁴திஹேதுகாவ ஹோதி. ந து³ஹேதுகா நசஅஹேதுகா. து³ஹேதுகேன கம்மேன படிஸந்தி⁴ து³ஹேதுகாபி ஹோதி அஹேதுகாபி. திஹேதுகா பன நஹோதீதி ஏவம் பவத்தோ மஹாத⁴ம்மரக்கி²தத்தே²ரவாதோ³பி ஆக³தோ. தத்த² யதா² து³ஹேதுகேன ஹீனேன கம்மேன அஹேதுகா படிஸந்தி⁴ அவஸ்ஸம் இச்சி²தப்³பா³ ஹோதி. ததா² திஹேதுகேனபி ஹீனேன கம்மேன து³ஹேதுகாபி படிஸந்தி⁴ அவஸ்ஸம் இச்சி²தப்³பா³யேவாதி கத்வா இத⁴ அயம்வாதோ³ தே²ரேன ந க³ஹிதோதி வேதி³தப்³போ³. படிஸம்பி⁴தா³மக்³கே³ பன-க³திஸம்பத்தியா ஞாணஸம்பயுத்தே அட்ட²ன்னம் ஹேதூனம் பச்சயா உபபத்தி ஹோதி. குஸலஸ்ஸ கம்மஸ்ஸ ஜவனக்க²ணே தயோ ஹேதூ குஸலா. நிகந்திக்க²ணே த்³வே ஹேதூ குஸலா. படிஸந்தி⁴க்க²ணே தயோ ஹேதூ அப்³யாகதாதிச க³தி ஸம்பத்தியா ஞாண விப்பயுத்தே ச²ன்னம் ஹேதூனம் பச்சயா உபபத்தி ஹோஹி. குஸலஸ்ஸ கம்மஸ்ஸ ஜவனக்க²ணே த்³வே ஹேதூ குஸலா. நிகந்திக்க²ணே த்³வே ஹேதூ அகுஸலா. படிஸந்தி⁴க்க²ணே த்³வே ஹேதூ அப்³யாகதாதிச ஏவம் திஹேதுகேன கம்மேன படிஸந்தி⁴ திஹேதுகாவ வுத்தா. த்³விஹேதுகேன கம்மேன த்³விஹேதுகாவ. ந பன க³திஸம்பத்தியா ஞாணவிப்பயுத்தே ஸத்தன்னம் ஹேதூனம் பச்சயாதிஆதி³னா திஹேதுகேன கம்மேன த்³விஹேதுகா படிஸந்தி⁴ வுத்தா. நச சதுன்னம் ஹேதூனம் பச்சயாதிஆதி³னா த்³விஹேதுகேன கம்மேன அஹேதுகா படிஸந்தீ⁴தி.

தத்த² பன தீஸு க²ணேஸு ஸஹஜாத ஹேதூனம் வஸேன ஹேது மூலகோவ அயம் தே³ஸனாவாரோதி கத்வா அனோகாஸதாய அஹேதுகபடிஸந்தி⁴ தத்த² நவுத்தா. ந பன அலப்³ப⁴மானதாய. த்³விஹேதுக படிஸந்தி⁴ பன அனோகாஸாயேவ நஹோதி. அலப்³ப⁴ மானத்தாயேவ ஸா நவுத்தாதி ஸக்கா விஞ்ஞாதும். தஸ்மா யுத்திதோ பாளியேவ ப³லவதராதி கத்வா மஹாத⁴ம்மரக்கி²தத்தே²ரவாதோ³வ பாளியா ஸமேதீதி படிஸம்பி⁴தா³மக்³க³ட்ட²கதா²யம் வுத்தோ. டீகாகாரா பன கம்மஸரிக்க²க விபாகத³ஸ்ஸனத்த²ம் ஸாவஸேஸ பாடோ²வ மஹாதே²ரேன வுத்தோதி இச்ச²ந்தி. ஏவஞ்ச கத்வா அட்ட²ஸாலினியம்பி திபிடகசூளனாக³த்தே²ரவாதோ³வ பமாணம் கத்வா வுத்தோதி.

விபா⁴வனியம் இதா³னி ஏகாய சேதனாய த்³வாத³ஸவிபாகானி ஏத்தே²வ த³ஸகமக்³கோ³பி அஹேதுகட்ட²கம்பிதி ஆக³தஸ்ஸ மோரவாபிவாஸி மஹாத⁴ம்மரக்கி²தத்தே²ரஸ்ஸாதி பாடோ².

மோரவாபிவாஸிமஹாத³த்தத்தே²ரஸ்ஸாதி பன வத்தப்³போ³. மஹாத⁴ம்ம ரக்கி²தத்தே²ரவாதோ³பி பன ஏத்த² ஏகதே³ஸேன ஸங்க³ஹிதோயேவ. தஸ்மிம்பி ஹி அஸங்கா²ரிகம் கம்மம் அஸங்கா²ரிகவிபாகமேவ தே³தி. நோ ஸஸங்கா²ரிகம். ஸஸங்கா²ரிகம் கம்மம் ஸஸங்கா²ரிகவிபாகமேவ தே³தி. நோ அஸங்கா²ரிகந்தி ஆக³தமேவாதி. [காமாவசரகம்மம்]

154. ரூபாவசரகம்மே பரித்தந்தி து³வித⁴ம் பரித்தம் அபகு³ணதா யவா ஹீனதாயவா. தத்த² யம் பணீதேஹி ச²ந்தா³தீ³ஹி யுத்தம்பி அபா⁴விதம் ஹோதி படிலத்³த⁴மத்தம், தம் அபகு³ணதாய பரித்தம்னாம. யம் ஸந்தா⁴ய யம் அபகு³ணம் ஹோதி, உபரி ஜா²னஸ்ஸ பச்சயோ ப⁴விதும் ந ஸக்கோதி, இத³ம் பரித்தம்னாமாதி அட்ட²ஸாலினியம் வுத்தம். யம் பன ஸுபா⁴விதம்பி ஸமானம் ஹீனேஹி ச²ந்தா³தீ³ஹி யுத்தம் ஹோதி. தம் ஹீனதாய பரித்தம்னாம. யம் ஸந்தா⁴ய யஸ்ஸ ஆயூஹனக்க²ணே ச²ந்தோ³வா ஹீனோ ஹோதி. வீரியம்வா, சித்தம்வா, வீமம்ஸாவா, தம் ஹீனம்னாமாதி தத்தே²வ வுத்தம். மஜ்ஜி²மம்பி து³வித⁴ம். தத்த² நாதிபகு³ண தாய மஜ்ஜி²மம் ஸந்தா⁴ய நாதிஸுபா⁴விதோ மஜ்ஜி²மோதி விஸுத்³தி⁴மக்³கே³ வுத்தம். மஜ்ஜி²மேஹி ச²ந்தா³தீ³ஹி யுத்ததாய மஜ்ஜி²மம் ஸந்தா⁴ய யஸ்ஸ ஆயூஹனக்க²ணே தே த⁴ம்மா மஜ்ஜி²மா ஹோந்தி. தம் மஜ்ஜி²மந்தி அட்ட² ஸாலினியம் வுத்தம். பணீதம்பி து³வித⁴ம். தத்த² அதிபகு³ணதாய பணீதம் ஸந்தா⁴ய ஸுபா⁴விதோ வஸிப்பத்தோ பணீதோதி விஸுத்³தி⁴மக்³கே³ வுத்தம். பணீதேஹி பன ச²ந்தா³தீ³ஹி யுத்ததாய பணீதம் ஸந்தா⁴ய யஸ்ஸ ஆயூஹனக்க²ணே தே த⁴ம்மா பணீதா ஹோந்தி. தம் பணீதந்தி அட்ட²ஸாலினியம் வுத்தம். தத்த² யானி அபகு³ணதாதி³ வஸேன பரித்தாதீ³னி வுத்தானி, தானி இத⁴ நாதி⁴ப்பேதானி. யானி பன ஹீனாதீ³ஹி ச²ந்தா³தீ³ஹி யுத்ததாய பரித்தாதீ³னி வுத்தானி, தானேவ இதா⁴தி⁴ப்பேதானி. இமானேவ ஹி திவிதா⁴ஸு பூ⁴மீஸு திவித⁴ம் ப்³ரஹ்முபபத்திபே⁴த³ம் ஸாதே⁴ந்தீதி. இத்தீ²னம் ஜா²னேஸு வஸீபத்தானம்பி ச²ந்தா³தீ³னம் அபணீததாய மஹாப்³ரஹ்மேஸு அனுப்பஜ்ஜனஞ்சேத்த² ஸாத⁴கம். தேனேவச அட்ட²கதா²யம் ச²ந்தா³தி³வஸேன ஸித்³தா⁴னி ஹீன மஜ்ஜி²ம பணீதானி அட்டா²ரஸபபே⁴தே³ன விப⁴ஜித்வா இமானி அட்டா²ரஸ கம்மத்³வாரானி நாம இமேஹி பபா⁴விதத்தா இமேஸம் வஸேன அட்டா²ரஸக²த்தியா அட்டா²ரஸ ப்³ராஹ்மணா அட்டா²ரஸ வேஸ்ஸா அட்டா²ரஸ ஸுத்³தா³ அட்ட²சத்தா லீஸ கோ³த்த சரணானி வேதி³தப்³பா³னீதி வுத்தம். ஏதேன ஹி தே³வானம்பி ப்³ரஹ்மூனம்பி லப்³ப⁴மானம் உபபத்திபே⁴த³ம் உபலக்கே²தீதி.

[161] விபா⁴வனியம் பன

‘‘படிலத்³த⁴மத்தம் அனாஸேவிதம் பரித்தந்தி அவிஸேஸதோவ அட்ட²கதா²யம் வுத்தம். ததா² நாதி ஸுபா⁴விதம் அமரிபுண்ணவஸீபா⁴வம் மஜ்ஜி²மம். அதிவியஸுபா⁴விதம் பன ஸப்³ப³ஸோ பரிபுண்ண வஸீபா⁴வம் பணீத’’ந்தி வுத்தம். தம் ஸப்³ப³ம் இத⁴ நயுஜ்ஜதியேவ.

தஞ்ஹி உபரி ஜா²னஸ்ஸ பச்சயோ ப⁴விதும் ஸமத்தா²ஸமத்த²ம்வா ஹான பா⁴கி³யதாதி³ விஸேஸம் வா ஸந்தா⁴ய வுத்தம். ந பன உபபத்தி பே⁴த³ஜனக விஸேஸந்தி.

[162] யஞ்ச தத்த²

‘‘ஆசரியேன பனேத்த² பரித்தம்பி ஈஸகம் லத்³தா⁴ஸேவனமேவ அதி⁴ப்பேதந்தி தி³ஸ்ஸதி. ததா² ஹானேன நாமரூபபரிச்சே²தே³-

ஸமானாஸேவனே லத்³தே⁴, விஜ்ஜமானே மஹப்³ப³லே;

அலத்³தா⁴ தாதி³ஸம் ஹேது, மபி⁴ஞ்ஞா ந விபச்சதீதி.

ஸமானபூ⁴மிகதோவ ஆஸேவன லாபே⁴ன ப³லவ பா⁴வதோ மஹக்³க³தத⁴ம்மானம் விபாகதா³னம் வத்வா தத³பா⁴வதோ அபி⁴ஞ்ஞாய அவிபச்சனம் வுத்த’’ந்தி வுத்தம். தம்பி விசாரேதப்³ப³மேவ.

யதா² ஹி அரியமக்³க³சேதனா அத்தனா ஸமானபூ⁴மகஜவனதோ அலத்³தா⁴ஸேவனாபி ஸமானா விபாகம் ந தே³தீதி நத்தி². ததா² ஆதி³ கம்மிகவீதி²யம் ஏகவாரமத்தபூ⁴தா ஸப்³ப³ஸமாபத்தி வீதீ²ஸுச ஸப்³ப³பத² மபூ⁴தா மஹக்³க³தசேதனாபி ஸமானபூ⁴மகத⁴ம்மதோ அலத்³தா⁴ஸேவன தாய து³ப்³ப³லத்தா விபாகம் நதே³தீதி நத்தீ²தி ந ந ஸக்கா விஞ்ஞாதுந்தி. ஏத்த² ஸியா- தஸ்ஸேவ ரூபாவசரஸ்ஸ குஸலஸ்ஸ கம்மஸ்ஸ கதத்தா உபசிதத்தா விபாகம்.ல. பத²மம் ஜா²னம் உபஸம்பஜ்ஜ விஹரதீதி வுத்தம். ந ச ஸா சேதனா உபசிதானாம ஹோதி. ஸமானபூ⁴மக த⁴ம்மதோ அலத்³தா⁴ஸேவனத்தாதி.ந. மக்³க³சேதனாயபி அவிபாகதாபத்திதோ. ஸாபிஹி தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகம். ல. பத²மம் ஜா²னம் உபஸம்பஜ்ஜ விஹரதீதி வுத்தா. நச ஸாபி ஸமானபூ⁴மகத⁴ம்மதோ லத்³தா⁴ஸேவனா ஹோதீதி. உப⁴யத்த² பன பத²மஸமன்னாஹாரதோ பட்டா²ய உபசினித்வா பா⁴வேத்வா ஆக³தத்தா அஸமானபூ⁴மிக ஜவனேஹிபி லத்³தா⁴ஸேவன பா⁴வம் படிச்ச உபசிததா பா⁴விததாச வுத்தாதி ஸக்கா வத்துந்தி. தஸ்மா ஆதி³ கம்மிகபூ⁴தாபி மஹக்³க³தசேதனா மரணா ஸன்னே லத்³தா⁴ அப்³பு⁴ண்ஹா ஆஸன்னகம்மபூ⁴தா விபாகம் நதே³தீதி ந வத்தப்³பா³. அபி⁴ஞ்ஞாசேதனா ச ஸமானபூ⁴மகேஹிபி நானாவஜ்ஜனவீதி²ஜவனேஹி ஸுட்டு²தரம் லத்³தா⁴ஸேவனத்தா திக்க²தரபூ⁴தா கத²ம் து³ப்³ப³லானாம ஸியா. தேனேவ அயம் வாதோ³ அனுடீகாயம் படிக்கி²த்தோ. வுத்தஞ்ஹி தத்த² கேசி பன ஸமான பூ⁴மகதோ ஆஸேவனலாபே⁴ன ப³லவந்தானி ஜா²னானீதி தானி விபாகம் தே³ந்தி. அபி⁴ஞ்ஞா பன ஸதிபி ஜா²னபா⁴வே தத³பா⁴வதோ தஸ்மிம் தஸ்மிம் ஆரம்மணே ஆக³ந்துகத்தாவா து³ப்³ப³லா. தஸ்மா விபாகம் ந தே³ந்தீதி வத³ந்தி. தம் அகாரணம். புனப்புனம் பரிகம்மவஸேன அபி⁴ஞ்ஞா யபி வஸீபா⁴வஸம்ப⁴வதோதி. சதுத்த²ஜ்ஜா²னஸமாதி⁴ஸ்ஸ பன ஆனிஸம்ஸபூ⁴தா அபி⁴ஞ்ஞாசேதனா தஸ்ஸ ப²லஸதி³ஸா ப²லட்டா²னே டி²தா, தஸ்மா ஸா விபாகம் நதே³தீதி இச்ச²ந்தி டீகாகாரா. தஸ்ஸ பன இத்³தி⁴ விகுப்³ப³னாதி³கிச்சம் விபச்சனகிச்சதோபி மஹந்ததரம் ஹோதி. ஸப்³ப³தா² மேனச விகுப்³ப³னாதி³கிச்சம் ஸாதே⁴ந்தியா விபச்சனதா²மேபி தேன தா²மேன ஸஹ பரிக்க²யம் க³ச்ச²தி. தஸ்மா ஸா புன விபாகம் நதே³தீதிபி யுஜ்ஜதியேவ. பஞ்சமஜ்ஜா²னந்தி அபி⁴ஞ்ஞாபா⁴வம் அபத்தம் பரித்தாதி³பே⁴தே³ன திவித⁴ம் பஞ்சமஜ்ஜா²னம். ததே³வாதி பஞ்சமஜா²னமேவ. ஸஞ்ஞாவிராக³ம் பா⁴வேத்வாதி சித்தே ஸதி ரஜ்ஜன து³ஸ்ஸன முய்ஹனானி ஹோந்தி. தஸ்மிம் அஸதி தி³ட்ட²த⁴ம்மனிப்³பா³னப்பத்தோனாம ஹோதீதி ஏவம் சித்தே ஏவ ஆதீ³னவம் தி³ஸ்வா அசித்தகப⁴வபத்த²னா ஸஹிதம் வாயோகஸிணேவா கேஸஞ்சி மதேன பரிச்சி²ன்னாகாஸ கஸிணேவா ஸஞ்ஞாவிராக³ம் பா⁴வேத்வா. அஸஞ்ஞஸத்தேஸு உப்பஜ்ஜந்தீதி யேன யேன இரியாபதே²ன இத⁴ மரந்தி, தேனேவ தத்த² உப்பஜ்ஜந்தி. கம்மகிரியவாதி³தித்தி²யா ஏவாதி அதி⁴ப்பாயோ. ந ஹி அகம்மகிரியவாதீ³னம் ஜா²னபா⁴வனா நாம அத்தீ²தி. அனாகா³மினோ பன ஸுத்³தா⁴வாஸேஸு உப்பஜ்ஜந்தீதி ஸுத்³தா⁴வாஸேஸு பன அனாகா³மினோ ஏவ உப்பஜ்ஜந்தி. ந அஞ்ஞே ஸகதா³கா³மிஆத³யோதி அத்தோ². ஏதேன அனாகா³மீனம் அஞ்ஞஸ்மிம்பி ப்³ரஹ்மலோகே உப்பத்தி அப்படிஸித்³தா⁴ ஹோதி. அனாகா³மீஸுச ஸத்³தா⁴தி⁴கோ அவிஹேஸு உப்பஜ்ஜதி, வீரியாதி⁴கோ அதப்பேஸு. ஸதாதி⁴கோ ஸுத³ஸ்ஸேஸு. ஸமாதா⁴தி⁴கோ ஸுத³ஸ்ஸீஸு. பஞ்ஞாதி⁴கோ அகனிட்டே²ஸூதி. யதா²க்கமம் பா⁴வேத்வா யதா²க்கமம் அரூபேஸு உப்பஜ்ஜந்தீதி யோஜனா. ஏத்த²ச பத²மஜ்ஜா²னம் பரித்தம் பா⁴வேத்வாதிஆதி³ ஸப்³ப³ம் பத²மஜ்ஜா²னாதீ³னம் யதா² ஸகம் விபச்சனபூ⁴மி வவத்தா²னவஸேன வுத்தம். ஸமாபத்திலாபி⁴னோ பன புது²ஜ்ஜன ஸோதாபன்ன ஸகதா³கா³மினோ அத்தனா லத்³த⁴ஸமாபத்தீனம் விபச்சனபூ⁴மீஸு இச்சி²தபூ⁴மியம் நிப்³ப³த்தந்தி. தேஸு புது²ஜ்ஜனோ நிகந்தியா ஸதி காமலோகேபி நிப்³ப³த்ததியேவ. இதரே பன ஜா²னே அபரி ஹீனே ஸதி காமலோகேபி நிப்³ப³த்ததியேவ. இதரே பன ஜா²னே அபரிஹீனே ஸதி காமப⁴வே நிகந்தினாம தேஸம் ந ஸம்ப⁴வதீதி பரிஹீனஜ்ஜா²னாஏவ தத்த² நிப்³ப³த்தந்தி.

[163] விபா⁴வனியம் பன

தேஸம்பி ஸோதாபன்னஸகதா³கா³மீனம் நிகந்திவஸேன காமப⁴வேனிப்³ப³த்திம் இச்ச²ந்தேன ‘‘ததா² காமப⁴வேபி காமாவசர கம்மப³லேன. இஜ்ஜ²தி பி⁴க்க²வே ஸீலவதோ சேதோபணிதி⁴ விஸுத்³த⁴த்தாதி ஹி வுத்த’’ந்தி வுத்தம். தம் ந யுஜ்ஜதி.