வீதி² ஸங்க³ஹ பரமத்த²தீ³பனீ

136. ஏவம் சித்தப்பபே⁴த³ ஸங்க³ஹோ, சேதஸிகப்பபே⁴த³ ஸங்க³ஹோ, உப⁴யப்பபே⁴த³ ஸங்க³ஹோதி சித்தசேதஸிகானம் கயோபபே⁴த³ ஸங்க³ஹே த³ஸ்ஸேத்வா இதா³னி வீதி²சித்தப்பவத்திஸங்க³ஹோ வீதி²முத்த சித்தப்பவத்திஸங்க³ஹோதி தே ஸஞ்ஞேவ த்³வே பவத்திஸங்க³ஹே த³ஸ்ஸேதும் சித்துப்பாதா³னமிச்சேவந்திஆதி³மாஹ. தத்த² உப்பஜ்ஜந்தீதி உப்பாதா³. தத்த² உப்பஜ்ஜந்தி. அஞ்ஞஸ்ஸ அஸு தத்தாசித்தே இச்சேவ லப்³ப⁴தி. இதி சித்தஞ்ச சித்தேஉப்பாதா³சாதி சித்துப்பாதா³. சித்தசேதஸிகாதி வுத்தம் ஹோதி. தேஸம் சித்துப்பாதா³னம். இச்சேவந்திஆதி³தோ பட்டா²ய வுத்தப்பகாரேன. ஸங்க³ஹமுத்தரந்தி ஜாதினித்³தே³ஸோ யம். உத்தரே உத்தமே தயோ பபே⁴த³ஸங்க³ஹே கத்வாதி ஸம்ப³ந்தோ⁴. பூ⁴மிபுக்³க³லபே⁴தே³னாதி ஸஹத்தே² கரணவசனம். காமாவசராதி³பூ⁴மிபே⁴தே³ன து³ஹேதுகாதி³ புக்³க³லபே⁴தே³ன ஸத்³தி⁴ந்தி அத்தோ². புப்³பா³பரனியாமிதந்தி ஆவஜ்ஜனாதி³ சக்கு²விஞ்ஞாணாதி³ புப்³ப³ சித்தாபரசித்தானுக்கமேன நியாமிதம் வவத்தி²தம். பவத்திஸங்க³ஹம்னாமாதிபி ஜாதினித்³தே³ஸோயேவ. ஏவம் நாமகே த்³வே பவத்திஸங்க³ஹேதி அத்தோ². படிஸந்தி⁴பவத்தியந்தி படிஸந்தி⁴பவத்தீஸு. வசனவிபல்லாஸோ ஹேஸ. படிஸந்தி⁴காலேபவத்திகாலேசாதி அத்தோ². படிஸந்தி⁴காலே பவத்திஸங்க³ஹஞ்ச பவத்திகாலே பவத்திஸங்க³ஹஞ்சாதி த்³வே ஸங்க³ஹேபவத்தி பவக்கா²மீதி வுத்தம் ஹோதி. அயஞ்ச அத்தோ² உபரிஸங்க³ஹே ஆரப்³ப⁴ கா³தா²ய பாகடோ. கேசி பன நித்³தா⁴ரணே பு⁴ம்மந்தி வத³ந்தி. ஏவம்ஸதி உபரி ஸங்க³ஹோ படிஸந்தி⁴ஸங்க³ஹோனாம ஸியா. ந பவத்தி ஸங்க³ஹோ நாம. ஏவஞ்ச ஸதி உபரி வீதி²முத்தஸங்க³ஹே ஆரப்³ப⁴ கா³தா²யம் ஸந்தி⁴யம் பவத்திஸங்க³ஹோனாம இதா³னி வுச்சதீதி இமினா ந ஸமேதி.

[115] டீகாஸு பன

‘‘உத்தரம் வேத³னாஸங்க³ஹாதி³விபா⁴க³தோ உத்தம’’ந்தி வுத்தம். தம் விசாரேதப்³ப³ம்.

ஏவஞ்ஹி ஸதி பகிண்ணகஸங்க³ஹோவ இத⁴ ஸங்க³ஹஸத்³தே³ன க³ஹிதோ ஸியாதி. யஸ்மாபன திண்ணம் த்³வின்னஞ்ச பபே⁴த³ஸங்க³ஹானம் மஜ்ஜே² ட²த்வா அயம் அனுஸந்தி⁴கா³தா² பவத்தா. தஸ்மா புப்³பே³ தயோபி பபே⁴த³ஸங்க³ஹா இத⁴ ஸங்க³ஹஸத்³தே³ன க³ஹேதும் யுத்தாதி த³ட்ட²ப்³பா³. அயம் பன பவத்திஸங்க³ஹோ வத்து²த்³வாராலம்ப³ணேஹி ஸத்³தி⁴ம் யோஜேத்வா வுத்தோ ஸுவுத்தோதி தானி தீணி ச²க்கானிபி புன இத⁴ நிக்கி²த்தானி.

[116] விபா⁴வனியம் பன

‘‘வத்து²த்³வாராலம்ப³ண ஸங்க³ஹா ஹேட்டா² கதி²தாபி பரிபுண்ணம் கத்வா பவத்திஸங்க³ஹம் த³ஸ்ஸேதும் புன நிக்கி²த்தா’’தி வுத்தம். தம் ந ஸுந்த³ரம்.

ந ஹி ஸகலா வத்து²த்³வாராலம்ப³ணஸங்க³ஹா இத⁴ நிக்கி²த்தாதி. விஸயானம் த்³வாரேஸு பவத்தி விஸயபவத்தி. ஏத்த²ச பவத்தீதி ஆபாதாக³மனமேவ வுச்சதி. வக்க²தி ஹி ஏகசித்தக்க²ணா தீதானிவாதிஆதி³ம். ஸா பன காசி ஸீக⁴தமா, காசி ஸீக⁴தரா, ஸீகா⁴, த³ந்தா⁴, த³ந்த⁴தரா, த³ந்த⁴தமாதி ச²தா⁴ ஹோதீதி. கம்மாதீ³னம் விஸயானம் த்³வாரேஸு பவத்தி பச்சுபட்டா²னம் ஆபாதாக³மனம் விஸயப்பவத்தி. வக்க²தி ஹி கம்மம்வா கம்மனிமித்தம்வா க³தினிமித்தம்வா கம்மப³லேன ச²ன்னம் த்³வாரானம் அஞ்ஞதரஸ்மிம் பச்சுபட்டா²தீதி.

[117] விபா⁴வனியம் பன

‘‘விஸயேஸுச சித்தானம் பவத்தி விஸயப்பவத்தீ’’திபி வுத்தம். தம் ந ஸுந்த³ரம்.

ஏவஞ்ஹி ஸதி அதிபரித்தாரம்மணே விஸயப்பவத்தினாம அனுபபன்னா ஆபஜ்ஜதீதி. தத்தா²தி தேஸு ச²க்கேஸு. தா⁴துபே⁴த³ம் பத்வாதா⁴துனானத்தம் பமாணந்தி மனனம் விஜானனதோ விஸும் கத்வா மனோதா⁴து விஸும் வுத்தா. விஞ்ஞாணபே⁴த³ம் பத்வா பன யம்கிஞ்சி மனனம் விஜானனே அந்தோ க³த⁴மேவாதி வுத்தம் சக்கு²விஞ்ஞாணம்.ல. ச²விஞ்ஞாணானீதி ச²வீதி²யோ பன த்³வாரப்பவத்தா சித்தபவத்தியோ யோஜேதப்³பா³தி ஸம்ப³ந்தோ⁴. சக்கு²த்³வாரே பவத்தா வீதி² சக்கு²த்³வாரவீதி². சக்கு²த்³வாரவிகாரம் படிச்ச பவத்தோ சித்தப்பப³ந்தோ⁴தி அத்தோ². ஏவம் ஸேஸேஸு. அஸாதா⁴ரணேன சக்கு²விஞ்ஞாணேன உபலக்கி²தா வீதி² சக்கு²விஞ்ஞாணவீதி². ஸுத்³தோ⁴ பன மனோவிஞ்ஞாணபப³ந்தோ⁴ மனோவிஞ்ஞாணவீதி².

விபா⁴வனியம் பன

‘‘சக்கு²விஞ்ஞாணஸம்ப³ந்தி⁴னீ வீதி² தேன ஸஹ ஏகாரம்மண ஏக த்³வாரிகதாய ஸஹ சரணபா⁴வதோ சக்கு²விஞ்ஞாண வீதீ²’’தி வுத்தம்.

த்³வாரப்பவத்தாதி த்³வாரே உப்பன்னா. தம் தம் த்³வாரவிகாரம் படிச்ச உப்பன்னாதி அத்தோ². சித்தப்பவத்தியோதி சித்தபப³ந்தா⁴. அதிமஹந்தந்தி ஸாமி அத்தே² பச்சத்தவசனம். அதிமஹந்தஸ்ஸ பஞ்சாலம்ப³ணஸ்ஸ பவத்தி.ல. அதிபரித்தஸ்ஸ பஞ்சாலம்ப³ணஸ்ஸ பவத்திசாதி பஞ்சத்³வாரே சதுதா⁴. மனோத்³வாரே பன விபூ⁴தஸ்ஸ ச²ளாரம்மணஸ்ஸ பவத்தி அவிபூ⁴தஸ்ஸ ச²ளாரம்மணஸ்ஸ பவத்திசாதி த்³விதா⁴தி ச²தா⁴விஸயப்பவத்தி வேதி³தப்³பா³தி யோஜனா. அதிமஹந்தாதி³பா⁴வோ சேத்த² ஆலோகாதி³ பச்சய வஸேனவா வத்து² அதிமஹந்தாதி³வஸேனவா வேதி³தப்³போ³. தத்த² ஸண்ஹஸுகு²மம்பி தூ³ரம்பி ரூபாதீ³னம் அதி⁴ட்டா²னவத்து²னாம ஆலோகாதி³ பச்சய ஸம்பத்தியா ஸதி அதிமஹந்தமேவ. ததா² ஹி பு³த்³த⁴ஸ்ஸ ப⁴க³வதோ பத²மாதி நீஹாரகாலாதீ³ஸு லோக விவரண பாடிஹாரியபவத்தி காலே அவீசினிரயேபி அகனிட்டே²பி பரசக்கவாளேஸுபி ஸண்ஹஸுகு²மானிச தூ³ரானிச ரூபானி இத⁴ டி²தாவ பஸ்ஸந்தி. ததா³ ஹி உளாரோ ஓபா⁴ஸோ பாதுரஹோஸி. தஸ்ஸ வஸேன ஸப்³பே³பி பத²விஸினேரு சக்கவாள ஸிலுச்சயாத³யோ ஜாதிப²லிகக்க²ந்தா⁴ விய ஸம்பஜ்ஜந்தி. மஹந்தோ உளாரோ ஓபா⁴ஸோ பாதுரஹோஸி அதிகம்மதே³வானம் தே³வானுபா⁴வந்தி ஹி வுத்தம். உபபத்திதே³வப்³ரஹ்மாதீ³னம் பன பஸாத³னிஸ்ஸயபூ⁴தானம் ஓபா⁴ஸஜாததாயபி பத²விபப்³ப³தாத³யோ சக்கு²ரூபாதீ³னம் அந்தரம் காதும் நஸக்கோந்தீதி. ததா² தூ³ரேபி பப்³ப³தாதி³ரூபானி வத்து² அதிமஹந்ததாய சந்த³ஸூரிய தாரகாதி³ ரூபானி விஸய வத்து² மஹந்ததாய ஓபா⁴ஸ ஜாததாய ச அதி மஹந்தானி நாம ஹோந்தீதி. ஆலோகாதி³பச்சயானம் பன அதி⁴ட்டா²னவத்தூ²னஞ்ச து³ப்³ப³ல து³ப்³ப³லதர து³ப்³ப³லதமானுக்கமேன மஹந்தாதி³பா⁴வோ வத்தப்³போ³தி. யானி பன பஞ்சாலம்ப³ணானி ஏகசித்தக்க²ணம் அதிக்கம்ம ஆபாதம் ஆக³ச்ச²ந்தி, தானி அதிமஹந்தாரம்மணானினாம. யானி த்³வத்திசித்தக்க²ணானி அதிக்கம்ம, தானி மஹந்தாரம்மணானி. யானி சது பஞ்ச ச² ஸத்த அட்ட² நவ சித்தக்க²ணானி அதிக்கம்ம, தானி பரித்தாரம்மணானி. யானிபன த³ஸேகாத³ஸத்³வாத³ஸ தேரஸ சுத்³த³ஸ பன்னரஸ சித்தக்க²ணானி அதிக்கம்ம ஆபாதம் ஆக³ச்ச²ந்தி. தானி அதிபரித்தா ரம்மணானீதி. பக்க²திச ஏகசித்தக்க²ணாதீதானிவாதிஆதி³. விபூ⁴தஸ்ஸாதி பாகடஸ்ஸ, அவிபூ⁴தஸ்ஸாதி அபாகடஸ்ஸ. ஏவம் ச²ச²க்கானி ஸரூபதோ நித்³தி³ஸித்வா இதா³னி தானி ஸப்³பா³னி ஏகதோ யோஜேத்வா வீதி²சித்தப்பவத்திம் வித்தா²ரேந்தோ கத²ந்தி புச்சி²த்வா ரூபாரூபானம் தாவ அத்³தா⁴னபரிச்சே²த³ம் த³ஸ்ஸேதும் உப்பாத³ட்டி²தீதிஆதி³ மாஹ. தத்த² கத²ந்தி கேன பகாரேன வீதி²சித்தப்பவத்தி ஹோதீதி அத்தோ².

[118] விபா⁴வனியம் பன

‘‘கத²ந்தி கேன பகாரேன அதிமஹந்தாதி³வஸேன விஸய வவத்தா²னம் ஹோதீதி புச்சி²த்வா சித்தக்க²ணவஸேன தம் பகாஸேதும் உப்பாத³ட்டி²தீதிஆதி³ ஆரத்³த⁴’’ந்தி வுத்தம். தம் யுத்தம் விய ந தி³ஸ்ஸதி.

ஏவஞ்ஹி ஸதிஆதி³தோ பஞ்சன்னம் ச²க்கானம் ஓகாஸோனாம நஸியா. நச உப்பாத³ட்டி²தி.ல. ரூபத⁴ம்மானமாயூதி இத³ம் விஸய வவத்தா²னத்த²மேவ வுத்தந்தி ஸக்கா விஞ்ஞாதுந்தி. உப்பஜ்ஜனம் உப்பாதோ³. ஸபா⁴வ படிலாபோ⁴தி அத்தோ². டா²னம் டி²தி. யதா²லத்³த⁴ஸபா⁴வஸ்ஸ அனிவத்தீதி அத்தோ². ப⁴ஞ்ஜனம் ப⁴ங்கோ³. தஸ்ஸ பரிஹாயித்வா அந்தரதா⁴னந்தி அத்தோ². ஏகசித்தக்க²ணம்னாமாதி ஏகஸ்ஸ சித்தஸ்ஸ க²ணோனாம. ஸோ பன க²ணோ அச்ச²ராஸங்கா⁴டக்க²ணஸ்ஸ அக்கி²னிம்மிலனக்க²ணஸ்ஸச அனேககோடி ஸதஸஹஸ்ஸபா⁴கோ³ த³ட்ட²ப்³போ³. அச்ச²ராஸங்கா⁴டக்க²ணே அனேககோடிஸதஸஹஸ்ஸஸங்கா² வேத³னா உப்பஜ்ஜந்தீதி ஹி அட்ட²கதா²யம் வுத்தம். ஆசரியானந்த³த்தே²ரமதேன பனேத்த² உப்பாத³ப⁴ங்க³ வஸேனக²ணத்³வயம் ஏகசித்தக்க²ணம்னாமாதி வத்தப்³ப³ம். யதா² ஹி லோகே விஜ்ஜுனாம வத்³த⁴னானந்தரமேவ பி⁴ஜ்ஜதி. ந பனஸ்ஸா வத்³த⁴னஸ்ஸ பி⁴ஜ்ஜனஸ்ஸச அந்தரா டி²தினாம விஸும் பஞ்ஞாயதி. யதா² ச உத்³த⁴ம் உஜும் கி²த்தம் லேட்³டு³ உப்பதித்வா பததி. ந பன உப்பதனஸ்ஸ பதனஸ்ஸ ச அந்தரா டி²தினாம விஸும் தி³ஸ்ஸதி. ததா² சித்தம்பி. தம்பி ஹி உத³ய பா⁴கா³னந்தரமேவ வயபா⁴கே³ பததி. ந பனஸ்ஸ ரூபத⁴ம்மானம் விய தேஸம் த்³வின்னம் பா⁴கா³னம் மஜ்ஜே² விஸும் ஏகோ க³ணனூபகோ³ டி²திபா⁴கோ³னாம உபலப்³ப⁴தி. ஏவஞ்ச கத்வா யமகேஸு சித்தஸ்ஸ உப்பாத³ப⁴ங்கா³வ தத்த² தத்த² வுத்தா. விஸேஸதோ பன சித்தயமகே உப்பன்னம் உப்பஜ்ஜமானந்தி. ப⁴ங்க³க்க²ணே உப்பன்னம். நோ ச உப்பஜ்ஜமானம். உப்பாத³க்க²ணே உப்பன்னஞ்சேவ உப்பஜ்ஜமானஞ்சாதிஆதி³னா ப⁴ங்கு³ப்பாதா³வ சித்தஸ்ஸ வுத்தா. கதா²வத்து²ம்ஹிச ஏகம் சித்தம் தி³வஸம் திட்ட²தீதி ஆமந்தா. உபத்³த⁴தி³வஸோ உப்பாத³க்க²ணோ. உபத்³த⁴தி³வஸோ வயக்க²ணோதி. ந ஹேவம் வத்தப்³பே³. ஏகம் சித்தம் த்³வே தி³வஸே திட்ட²தீதி ஆமந்தா. ஏகோ தி³வஸோ உப்பாத³க்க²ணோ. ஏகோ தி³வஸோ வயக்க²ணோதி நஹேவம் வத்தப்³பே³. ஏகம் சித்தம் சத்தாரோ தி³வஸே திட்ட²தீதி ஆமந்தா. த்³வே தி³வஸா உப்பாத³க்க²ணோ. த்³வே தி³வஸா வயக்க²ணோதி ந ஹேவம் வத்தப்³பே³.ல. மாஸம். த்³வே மாஸே. சத்தாரோமாஸே.ல. ஸம்வச்ச²ரம், த்³வே ஸம்வச்ச²ரானி. சத்தாரி ஸம்வச்ச²ரானி.ல. கப்பம். த்³வே கப்பே. சத்தாரோ கப்பேதிஆதி³னா த்³வே உப்பாத³வயபா⁴கா³வ சித்தஸ்ஸ வுத்தா. ந டி²திபா⁴கோ³. யதி³ ஸோ விஸும் உபலப்³பே⁴ய்ய. ஏகம் சித்தம் தி³வஸம் திட்ட²தீதி ஆமந்தா. தி³வஸஸ்ஸ பத²மோ பா⁴கோ³ உப்பாத³க்க²ணோ. து³தீயோ டி²திக்க²ணோ. ததீயோ வயக்க²ணோதி ஏவம் மஹாதே²ரேன விசாரிதோ ஸியா. தயோ தி³வஸே தயோ மாஸே தீணி ஸம்வச்ச²ரானி தயோ கப்பேதி இமானிபி அவஜ்ஜே தப்³பா³னிஏவ ஸியுந்தி. ஏத்த² ஸியா, நனு ஸுத்தந்தேஸு தீணி மானி பி⁴க்க²வே ஸங்க²தஸ்ஸ ஸங்க²த லக்க²ணானி. கதமானிதீணி, உப்பாதோ³ பஞ்ஞாயதி. வயோ பஞ்ஞாயதி. டி²தஸ்ஸ அஞ்ஞத²த்தம் பஞ்ஞாயதீதி வுத்தம். ததா² வேத³னாய உப்பாதோ³ பஞ்ஞாயதி. வயோ பஞ்ஞாயதி. டி²தாய அஞ்ஞத²த்தம் பஞ்ஞாயதி. ஸஞ்ஞாய. ஸங்கா²ரானம். விஞ்ஞாணஸ்ஸ உப்பாதோ³.ல. பஞ்ஞாயதீதி வுத்தம். தஸ்மா சித்தஸ்ஸ ததீயோ டி²திபா⁴கோ³ விஸும் உபலப்³ப⁴தி யேவாதி.ந. பப³ந்த⁴டி²தியா ஏவ தத்த² வுத்தத்தாதி. கத²ம் விஞ்ஞாயதீதி சே, உப்பாத³வயே பத²மம் வத்வா பச்சா² புன விஸும் டி²தஸ்ஸ அஞ்ஞத²த்த²ம் பஞ்ஞாயதீதி இமஸ்ஸ வுத்தத்தாதி. இதரதா² உப்பாதோ³ பஞ்ஞாயதி. டி²தஸ்ஸ அஞ்ஞத²த்தம் பஞ்ஞாயதி. வயோ பஞ்ஞாயதீதி வுத்தம் ஸியாதி. நனு பப³ந்த⁴டி²தி நாம பஞ்ஞத்தி ஹோதி. ஸாச அஸங்க²தா, ஸுத்தந்தானிச ஸங்க²த லக்க²ண விஸயானி. தஸ்மா ஸா பப³ந்த⁴ட்டி²தி தத்த² வுத்தாதி நஸக்கா விஞ்ஞாதுந்தி சே. ந ந ஸக்கா. அபி⁴த⁴ம்மேபி ஸங்க²தத⁴ம்மனித்³தே³ஸேஸு ஸமூஹ ஸண்டா²ன ஸந்ததி பஞ்ஞத்தீஹிபி நித்³தே³ஸஸ்ஸ தி³ட்ட²த்தா. ததா² ஹி ரூபாயதனனித்³தே³ஸாதீ³ஸு தீ³க⁴ம் ரஸ்ஸம் ஸண்ஹம் து²லம் வட்டம் பரிமண்ட³லம் சதுரஸ்ஸம் ச²ளம்ஸம் அட்ட²ம்ஸம் ஸோளஸம்ஸம் நின்னம் த²லந்திஆதி³னா, விப⁴ங்கே³ ச கேஸா லோமா நகா² த³ந்தாதிஆதி³னா பஞ்ஞத்திஸிஸேன ஸங்க²தத⁴ம்மா நித்³தி³ட்டா²தி. ஸுத்தந்தேஸு வத்தப்³ப³மேவ நத்தி². ஈதி³ஸேஸு ஹி டா²னேஸு பஞ்ஞத்திவஸேன பவத்தாபி தே³ஸனா ஸங்க²தத⁴ம்மமேவ ஆஹச்ச திட்ட²தி. தஸ்மா யதா² உப்பாத³ப⁴ங்கா³னம் பச்சேகம் ஏகேகோ க²ணோ சித்தஸ்ஸ லப்³ப⁴தி. ந ததா² டி²தியாதி. அயம் ஆசரியானந்த³த்தே² ரஸ்ஸ அதி⁴ப்பாயோ. அயஞ்ச வாதோ³ ஸம்யுத்தட்ட²கதா²யம் ஏவ ஆக³தோ. ஸோச ஸங்க³ஹகாரேன படிக்கி²த்தோ. வுத்தஞ்ஹி தத்த², அபரே பன வத³ந்தி. அரூபத⁴ம்மானம் ஜராக²ணோனாம நஸக்கா பஞ்ஞபேதும். ஸம்மா ஸம்பு³த்³தோ⁴ச வேத³னாய உப்பாதோ³ பஞ்ஞாயதி. வயோ பஞ்ஞாயதி. டி²தாய அஞ்ஞத²த்த²ம் பஞ்ஞாயதீதி வத³ந்தோ அரூபத⁴ம்மானம்பி தீணி லக்க²ணானி பஞ்ஞபேதி. பா⁴னிஅத்தி²க்க²ணம் உபாதா³ய லப்³ப⁴ந்தீதி வத்வா –

அத்தி²தா ஸப்³ப³த⁴ம்மானம், டி²தினாம பவுச்சதி;

தஸ்ஸேவ பே⁴தோ³ மரணம்; ஸப்³ப³தா³ ஸப்³ப³பாணினந்தி.

இமாய ஆசரியகா³தா²ய தமத்த²ம் ஸாதே⁴ந்தி. அத²வா, ஸந்ததிவஸேன டா²னம் வேதி³தப்³ப³ந்திச வத³ந்தி. இமஸ்மிம் பன ஸுத்தே அயம் விஸேஸோ நத்தி². தஸ்மா ஆசரியகா³தா²ய ஸுத்தம் அப்படிபா³ஹேத்வா ஸுத்தமேவ பமாணம் காதப்³ப³ந்தி. தத்த² ஜராக²ணோனாம உப்பாத³க்க²ணப⁴ங்க³க்க²ணானம் மஜ்ஜே² விஸும் ஜராய கே²த்தபூ⁴தோ டீ²திக்க²ணோ வுச்சதி. அஞ்ஞத²த்தந்தி ஜராஏவ. அத்தி²க்க²ணந்தி க²ணத்³வயமேவ. படிக்கி²த்தோபி பன அயம் வாதோ³ கதா²வத்து² பாளியா ஸத்³தி⁴ம் ஸுட்டு² ஸமேதியேவ. அபிச, உத்³த⁴ம் உப்பதிதஸ்ஸ லேட்டுஸ்ஸ உப்பதனனிவத்தி விய யா சித்தஸ்ஸ உத³யஸங்கா²தஸ்ஸ வட்³ட⁴னஸ்ஸ நிவத்தினாம அத்தி². ந ஹி உத³யே அனிவத்தந்தே வயோனாம ஸம்ப⁴வதிதீ. ஸா ஏவ உத³ய பரியந்தமத்தபூ⁴தா இத⁴ டி²திபரியாயோதி ஸக்கா வத்தும். ஸோ பன விஸும் க³ணனூபகோ³ ஏகோ க²ணோனாம நஹோதீதி கத்வா அபி⁴த⁴ம்மே த்³வேஏவ க²ணா சித்தஸ்ஸ வுத்தா. உத³யபா⁴க³ஸ்ஸ பன ஆதி³ கோடிம் வயபா⁴க³ஸ்ஸஅந்தகோடிஞ்ச த²பேத்வா மஜ்ஜே²பா⁴க³த்³வயனிஸ்ஸிதா பரிபச்சன லக்க²ணா ஜரானாம அரூபத⁴ம்மானம்பி லப்³ப⁴தியேவ. தம் ஸந்தா⁴ய தா⁴துகதா²யம் ஜராத்³வீஹிக²ந்தே⁴ஹிஸங்க³ஹிதாதிவுத்தந்தி த³ட்ட²ப்³ப³ம்.

[119] யம் பன விபா⁴வனியம்

‘‘உப்பாத³ப⁴ங்கா³வத்தா²ஹி பி⁴ன்னா ப⁴ங்கா³பி⁴முகா²வத்தா²பி இச்சி²தப்³பா³. ஸா டி²தினாமா’’தி வுத்தம். தம் கதா²வத்து²பாளியா ஸஹ ந ஸமேதி.

உபத்³த⁴தி³வஸோ உப்பாத³க்க²ணோ. உபத்³த⁴தி³வஸோ வயக்க²ணோ. பத²மோ தி³வஸோ உப்பாத³க்க²ணோ. து³தீயோ வயக்க²ணோதி ஹி விசாரேந்தேன உப்பாத³ப⁴ங்கா³வத்தா² ஹி பி⁴ன்னா ததீயா அவத்தா² தஸ்ஸம் பாளியம் படிக்கி²த்தாயேவ ஹோதீதி.

[120] ஏதேன யஞ்ச தத்த²

‘‘பாளியம் பன வேனேய்யஜ்ஜா²ஸயா நுரோமதோ நயத³ஸ்ஸனவஸேன ஸா ந வுத்தா. அதித⁴ம்மதே³ஸனாபி ஹி கதா³சி வேனேய்யஜ்ஜா²ஸயானுரோதே⁴ன பவத்ததி. யதா², ரூபஸ்ஸ உப்பாதோ³ உபசயோ ஸந்ததீதி த்³விதா⁴ பி⁴ந்தி³த்வா தே³ஸிதோ’’தி வுத்தம். தம்பி படிக்கி²த்தம் ஹோதி. விபா⁴கா³ரஹஸ்ஸ ஹி த⁴ம்மஸ்ஸ விபா⁴க³கரணம்னாம வேனேய்யவஸேனாதிபி த⁴ம்மவஸேனாதிபி யுஜ்ஜதி. விஜ்ஜமானே ஸதி விஸும் கத்வா வத்தப்³ப³ஸ்ஸ அபி⁴த⁴ம்மே அவசனம் பன வேனேய்யவஸேனாதி ந யுத்தமேதந்தி.

[121] யம்பி தத்த²

‘‘ஸுத்தேச தீணி மானி பி⁴க்க²வே ஸங்க²தஸ்ஸ ஸங்க²தலக்க²ணானி. கதமானி தீணி. உப்பாதோ³ பஞ்ஞாயதி. வயோ பஞ்ஞா யதி. டி²தஸ்ஸ அஞ்ஞத²த்தம் பஞ்ஞாயதீதி ஏவம் ஸங்க²தத⁴ம்மஸ்ஸேவ லக்க²ணத³ஸ்ஸனத்த²ம் உப்பாதா³தீ³னம் வுத்தத்தா நஸக்கா பப³ந்த⁴ஸ்ஸ பஞ்ஞத்திஸபா⁴வஸ்ஸ அஸங்க²தஸ்ஸ டி²தி தத்த² வுத்தாதி விஞ்ஞாது’’ந்தி வுத்தம். தம்பி ந க³ஹேதப்³ப³ம்.

அபி⁴த⁴ம்மேபி ஹேட்டா² வுத்தனயேன பஞ்ஞத்திஸீஸேன ஸங்க²தத⁴ம்மானம் நித்³தே³ஸஸ்ஸ தி³ட்ட²த்தாதி.

[122] யம்பி தத்த²

‘‘உபஸக்³க³ஸ்ஸச தா⁴த்வத்தே²யேவ பவத்தனதோ பஞ்ஞாயதீதி ஏதஸ்ஸ விஞ்ஞாயதீதி அத்தோ²’’தி வுத்தம். தம்பி ந யுத்தம்.

யதா²னுலோமஸாஸனஞ்ஹி ஸுத்தம். தஸ்மா தத்த² வினேய்யானம் ஸுட்டு² பஞ்ஞாயனமேவ அதி⁴ப்பேதந்தி. அரூபம் அரூபிஸபா⁴வத்தா லஹுபரிணாமம். ரூபம் பன ரூபித⁴ம்மத்தாயேவ த³ந்த⁴பரிணாமந்தி வுத்தம் தானிபன.ல. ரூபத⁴ம்மான மாயூதி.

[123] விபா⁴வனியம் பன

‘‘கா³ஹகக³ஹேதப்³ப³ பா⁴வஸ்ஸ தம்தம் க²ணவஸேன நிப்பஜ்ஜனதோ’’தி காரணம் வுத்தம். தம் அகாரணம்.

ந ஹி கா³ஹகம் அரூபம் க³ஹேதப்³ப³ஞ்ச ரூபம் க³ஹணஸம்பஜ்ஜனத்த²ம் லஹும் பரிணமதி க³ரும் பரிணபதீதி ஸக்கா வத்துந்தி. தானி தாதி³ஸானி ஸத்தரஸன்னம் சித்தானம் க²ணானி ஸத்தரஸவா தானி சித்தக்க²ணானி ரூப த⁴ம்மானமாயூதி யோஜனா. ஸத்தரஸ சித்தக்க²ணஸமபமாணானி க²ணானி விஞ்ஞத்தி ரூபலக்க²ண ரூபவஜ்ஜானம் ரூபத⁴ம்மானம் ஆயுனாமாதி வுத்தம் ஹோதி. க²ணமத்ததோ பன அட்ட²கதா²னயேன ஏகபஞ்ஞாஸக²ணானி ஹோந்தி, மூலடீகானயேன த்³வத்திம்ஸக²ணானி. தத்த²ச ஆதி³ம்ஹி த்³வே க²ணானி ரூபத⁴ம்மானம் ஏகம் உப்பாத³க்க²ணமேவ. அந்தே த்³வே ஏகம் ப⁴ங்க³க்க²ணமேவ. மஜ்ஜே² அட்ட²வீஸ க²ணானி தேஸம் ஏகம் டி²திக்க²ணமேவாதி த³ட்ட²ப்³ப³ம். ந ஹி த³ந்த⁴பரிணதானம் ரூபானம் உப்பாத³ப⁴ங்கா³பி சித்தஸ்ஸ விய லஹுகா ப⁴விதும் அரஹந்தீதி. தத்த² விஞ்ஞத்தித்³வயம் ஏகசித்தக்க²ணிகம். உபசயஸந்ததியோ உப்பாத³மத்தா அனிச்சதா ப⁴ங்க³மத்தா. ஜரதா ரூப த⁴ம்மானம் டி²திக்க²ணமத்தாதி த³ட்ட²ப்³பா³. மூலடீகானயேன பனேத்த² தானி பன ஸோளஸசித்தக்க²ணானி ரூபத⁴ம்மானமாயூதி வத்தப்³ப³ம். டீகாசரியோ ஹி படிச்சஸமுப்பாத³விப⁴ங்கே³ ஆக³தம் மஹாட்ட²கதா²வசனம் பதிட்ட²பேந்தோ ஸோளஸசித்தக்க²ணாயுகபா⁴வம் ஸம்பா⁴வேதி, ஏவம் ஸந்தேபி க²ந்த⁴ விப⁴ங்கே³யேவ தாவ ரூபானம் உப்பாத³னிரோத⁴விதா⁴னஸ்ஸ மஹாஅட்ட²கதா² வாத³ஸ்ஸ யமகபாளிவிரோத⁴ம் த³ஸ்ஸேத்வா ஸங்க³ஹகாரேன படிஸித்³த⁴த்தா ந ஸக்கா தம் பதிட்ட²பேதுந்தி. தஸ்மிம் வாதே³ ஹி படிஸித்³தே⁴ தத்த² ஆக³தா ஸோளஸாயுகதாவா அதிரேகஸோளஸாயுகதாவா படிஸித்³தா⁴யேவ ஹோதீதி.

[124] யம் பன விபா⁴வனியம்

தம் டீகானயம் தயித³மஸாரந்தி படிக்கி²பித்வா தத³த்த²ம் ஸா தே⁴ந்தேன ‘‘படிஸந்தி⁴சித்தேன ஸஹுப்பன்னம் ரூபம் ததோ பட்டா²ய ஸத்தரஸமேன ஸத்³தி⁴ம் நிருஜ்ஜ²தி. படிஸந்தி⁴சித்தஸ்ஸ டி²திக்க²ணே உப்பன்னம் ரூபம் அட்டா²ரஸமஸ்ஸ உப்பாத³க்க²ணே நிருஜ்ஜ²தீதிஆதி³னா அட்ட²கதா²யமேவ ஸத்தரஸசித்தக்க²ணஸ்ஸ ஆக³தத்தா’’தி காரணம் வுத்தம். தம் ந ஸுந்த³ரம்.

யஞ்ஹி ஸங்க³ஹகாரஸ்ஸ ஸத்தரஸாயுகவசனம் டீகாகாரேன விசாரிதம். ததே³வ த³ஸ்ஸேத்வா டீகானயோ படிக்கி²த்தோதி ந யுத்தமே தந்தி. ஏகசித்தஸ்ஸ க²ணம் விய க²ணம் ஏகசித்தக்க²ணம். அத்த²தோ அபி⁴ன்னம்பி ஹி க²ணம் இத³ம் சித்தஸ்ஸ இத³ம் ரூபானந்தி கப்பனாவஸேன பி⁴ன்னம் விய கத்வா உபசரீயதீதி. ஏகசித்தக்க²ணம் அதீதம் ஏதேஸந்தி ஏகசித்தக்க²ணாதீதானி. அதிமஹந்தபூ⁴தானி பஞ்சாரம்மணானி.

[125] விபா⁴வனியம் பன

‘‘ஏதானிவா தம் அதீதானீதி ஏகசித்தக்க²ணாதீ கானீ’’திபி வுத்தம். தம் ந ஸுந்த³ரம்.

ந ஹி நிருத்³த⁴த⁴ம்மவிஸயோ அதீதஸத்³தோ³ கிஞ்சி அதிக்கமித்வா உத்³த⁴ம் ஆக³தானி பச்சுப்பன்னரூபானி தீ³பேதீதி ஸக்கா வத்துந்தி. ப³ஹூனி சித்தக்க²ணானி அதீதானி ஏதேஸந்தி ப³ஹுசித்தக்க²ணாதீதானி. மஹந்தாதி³ பூ⁴தானி பஞ்சாரம்மணானி. ரூபத⁴ம்மானம் பன ரூபத⁴ம்மேஸ்வேவ ஆபாதாக³மனே தோ²கம் ப³லவந்ததா இச்சி²தப்³பா³. தேச டி²திக்க²ணேயேவ பரிபுண்ணபச்சயுபலத்³தா⁴ ஹுத்வா ப³லவந்தா ஹோந்தீதி வுத்தம் டி²திபத்தானேவாதி. ஏவஸத்³தே³ன டீகாகாரஸ்ஸ வாத³ம் நீவாரேதி. ஸோ ஹி உப்பஜ்ஜமானமேவ ரூபம் பஸாதே³ க⁴ட்டேதீதி இச்ச²தீதி. பஞ்சாலம்ப³ணானி பஞ்சத்³வாரே ஆபாதமாக³ச்ச²ந்தீதி ஏத்த² ரூபஸத்³தா³ரம்மணானி அஸம்பத்த வஸேன இதரானிச ஸம்பத்தவஸேன கோ³சரபா⁴வம் உபக³ச்ச²ந்தி. அயஞ்ச விஸேஸோக⁴ட்டனவிஸேஸேன வேதி³தப்³போ³. புரிமானிஹி த்³வே நிமித்தவஸேனேவ க⁴ட்டேந்தி. ந வத்து²வஸேன. பச்சி²மானி பன தீணிவத்து²வஸேன க⁴ட்டேந்தி. ந நிமித்தமத்தவஸேன நிமித்தக⁴ட்டனஞ்சனாம அஸம்பத்தானஞ்ஞேவ ந ஸம்பத்தானம். வத்து²க⁴ட்டனம் பன ஸம்பத்தானஞ்ஞேவ. நோ அஸம்பத்தா ஹோதி. நந்தி. யதா² ஹி தீரே க³ச்ச²ந்தானம்ஸரீரனிமித்தானி போக்க²ரணி யாஉத³கே தி³ஸ்ஸந்தி. தஸ்மிம் உத³கே ஓரோஹந்தானம் பன தானி தத்த² ந தி³ஸ்ஸந்தி. ஏவமேவ ஸம்பத்தானி ரூபஸத்³தா³ரம்மணானி நக⁴ட்டேந்தி. கஸ்மா, விஸயவிஸயீனம் மஜ்ஜே² ஆலோகஸ்ஸ ஆகாஸஸ்ஸச அபா⁴வேன நிமித்தோகாஸஸ்ஸ அபா⁴வதோ. அஸம்பத்தானியேவ பன அத்தனோ நிமித்துபட்டா²பனவஸேன க⁴ட்டேந்தி. கஸ்மா, நிமித்தோகாஸஸ்ஸ லத்³த⁴த்தா. இதரானி பன தீணி யதா²ஜாதவத்து²வஸேனேவ க⁴ட்டேந்தி. தஸ்மா தானி ஸம்பத்தானியேவ க⁴ட்டேந்தி. நோ அஸம்பத்தானீதி. தத்த² யானி அஸம்பத்தானியேவ ஹுத்வா க⁴ட்டேந்தி. தானி ஸயம் தூ³ரே ட²த்வா நிமித்த அப்பனாவஸேன க⁴ட்டிதத்தா ஏகேகஸ்மிம் பஸாதே³ சந்த³மண்ட³ல ஸூரிய மண்ட³லாதி³வஸேன அஸனிஸத்³த³மண்ட³ல மேண்ட³ஸத்³த³மண்ட³லாதி³வஸேன ச மஹந்தானிபி ப³ஹூனிபி ஆபாதமாக³ச்ச²ந்தியேவ. இதரானி பன தீணி ஸம்பத்தானியேவ க⁴ட்டேந்தீதி ஏகேகஸ்மிம் பஸாதே³ ஏகேகமேவ ஆபாதமாக³ச்ச²ந்தீதி த³ட்ட²ப்³ப³ம். இத³ஞ்ச பஞ்சத்³வாரவஸேன வுத்தம். மனோ த்³வாரே பன ஸப்³பா³னிபி ஆரம்மணானி அஸம்பத்தானியேவ ஆபாதமாக³ச்ச²ந்தீதி. ஏத்த²ச பஞ்சத்³வாரேதி இத³ம் அஸாதா⁴ரண த்³வாரத³ஸ்ஸனவஸேன வுத்தம். தானி பன பஞ்சாலம்ப³ணானி யதா³ஸகஸகத்³வாரே க⁴ட்டேந்தி. ததா³ மனோத்³வாரேபி அபாத மாக³ச்ச²ந்தியேவ. ஏகேகம் ஆரம்மணம் த்³வீஸு த்³வீஸு த்³வாரேஸு அபாத மாக³ச்ச²தீதி ஹி அட்ட²கதா²யம் வுத்தம். தஸ்மா யதா³ சந்த³ம்வா ஸூரியம்வா பப்³ப³தம்வா ருக்க²ம்வா யம்கிஞ்சிவா பஸ்ஸந்தி. ததா³ ஏகேகஸ்மிம் சக்கு²பஸாதே³ ஏகேகானி மனோத்³வாரே ஏகந்தி அனேகானி சந்த³மண்ட³லாதீ³னி ஏகக்க²ணே உபட்ட²ஹந்தி, ஏவம் ஸேஸாரம்மணே ஸூதி த³ட்ட²ப்³ப³ம். அபாதாக³மனஞ்சேத்த² லஞ்ச²கானம் தாலபண்ணே லஞ்ச²னக²ந்த⁴ம் த²பேத்வா முக்³க³ரேன பஹரணகாலே லஞ்ச²னக²ந்த⁴ஸ்ஸ தாலபண்ணே ஆபாதேத்வா அக்க²ருபட்டா²பனம் விய த³ட்ட²ப்³ப³ம். யதோ த்³வாரானம் விகாரப்பத்தி ஹோதீதி.

[126] யம் பன விபா⁴வனியம்

‘‘ஆபோ⁴கா³னுரூபம் அனேககலாபக³தானி ஆபாதம் ஆக³ச்ச²ந்தீ’’தி வுத்தம். தத்த² ஆபோ⁴கா³னுரூபந்தி இத³ம் விசாரேதப்³ப³ம்.

யத்தகானி ஹி பஞ்சாலம்ப³ணானி சக்கா²தி³பதே² ஆலோகாதி³ ஸஹிதானி ஹுத்வா டி²தானி ஹோந்தி. தத்தகானி ஸப்³பா³னி நித்³தா³யந்தஸ்ஸபி விஸஞ்ஞி பூ⁴தஸ்ஸபி அஞ்ஞவிஹிதஸ்ஸபி யம்கிஞ்சி ஜா²னம்வா ப²லம்வா நிரோத⁴ம்வா ஸமாபஜ்ஜந்தஸ்ஸபி ஆபோ⁴கே³ன வினா அத்தனோ த்³வாரேஸு ஆபாதமாக³ச்ச²ந்தியேவ. நகேவலம் அத்தனோத்³வாரேஸு ஏவ. அத²கோ² மனோத்³வாரேபி. நகேவலம் ப⁴வங்க³மனோத்³வாரேஏவ. ஆவஜ்ஜனாதீ³ஸு பன சதுப்³பூ⁴மக வீதி²சித்தேஸுபி ஆபாதம் ஆக³ச்ச²ந்தியேவ. அயம்னாம மனோ மனோத்³வாரம் நஹோதீதி நவத்தப்³போ³தி ஹி த்³வாரகதா²யம் வுத்தம். அயஞ்ச அத்தோ² பத²மஜ்ஜா²னஸ்ஸ ஸத்³தோ³ கண்டகோதி இமினா பாடே²ன தீ³பேதப்³போ³. பத²மஜ்ஜா²னம் ஸமாபன்னஸ்ஸ ஹி ஸத்³தோ³ ஸோதம்ஹி க⁴ட்டேத்வா ஜா²னசித்தஸங்கா²தே மனோத்³வாரே ஆபாதமாக³ச்ச²தி. ததா³ ஜா²னசித்த ஸந்ததி சலித்வா வோச்சி²ஜ்ஜதி. ஜா²னா வுட்டா²தி. ப⁴வங்க³பாதோ ஹோதி. தம் ஸத்³தா³ரம்மணம் வீதி²சித்தம் பவத்ததீதி. து³தீயஜ்ஜா²னாதீ³னி ஸமாபஜ்ஜந்தோ பன அப்பகேன ஸத்³தே³ன நவுட்டா²தி. அதி⁴மத்தஸத்³தே³ன பன வுட்டா²தியேவ. ந ஹி தானி ஆனேஞ்ஜபத்தானினாம ஹோந்தி. அரூபஜ்ஜா²னானிஏவ பன ஆனேஞ்ஜபத்தானினாம ஹோந்தி. தஸ்மா தானி ஸமாபஜ்ஜந்தோ அதி⁴மத்தஸத்³தே³னபி நவுட்டா²தியேவாதி. தேஸு பன ததா² ஆபாதமாக³தேஸு ததா³ரம்மணானி வீதி²சித்தானி பவத்தந்தியேவாதி நவத்தப்³ப³ம். ப⁴வங்க³ ஸந்ததியாவா ஜவனஸந்ததியாவா வோச்சி²ன்னாய பவத்தந்தி. அவோச்சி²ன்னாய நபவத்தந்தி. பவத்தமானானிபி ஆரம்மணா தி⁴மத்தாதி³வஸேன லத்³த⁴பச்சயவிஸேஸே ஏகேகஸ்மிம் ஆரம்மணேஏவ பவத்தந்தி. ந ஏகக்க²ணே பஞ்சஸூதி த³ட்ட²ப்³ப³ம். ஏத்த²ச அத்த²வஸா விப⁴த்தி பரிணாமோதி கத்வா ஏகசித்தக்க²ணாதீதானி டி²திபத்தானேவ பஞ்சா லம்ப³ணானி ஏகசித்தக்க²ணாதீதே டி²திப்பத்தே ஏவ பஞ்சத்³வாரே ப³ஹு சித்தக்க²ணாதீதானி ப³ஹுசித்தக்க²ணாதீதேதி யோஜேதப்³ப³ம்.

[127] விபா⁴வனியம் பன

‘‘தே பன பஸாதா³ ப⁴வங்க³சலனஸ்ஸ அனந்தரபச்சயபூ⁴தேன ப⁴வங்கே³ன ஸத்³தி⁴ம் உப்பன்னா’’தி வுத்தம்.

ஏவம் பன ஸதி ப³ஹுசித்தக்க²ணாதீதானிபி பஞ்சாலம்ப³ணானி ஏகசித்தக்க²ணாதீதேஏவ பஞ்சத்³வாரே ஆபாதமாக³ச்ச²ந்தீதி ஆபஜ்ஜதி. ஏத ரஹி பன ஏகக்க²ணே ஸஹுப்பன்னானஞ்ஞேவ வத்தா²ரம்மணானம் க⁴ட்டனம் இச்ச²ந்தி. ஸஹுப்பன்னானிவா பன ஹோந்து நானுப்பன்னானிவா, ப³லவபா⁴வோயேவ பமணந்தி அம்ஹாகம் க²ந்தி. ஸப்³ப³ம் விசாரேத்வா க³ஹேதப்³ப³ம்.

[128] யம் பன விபா⁴வனியம்

‘‘ஆவஜ்ஜனேன ஸத்³தி⁴ம் உப்பன்னாதி அபரே’’தி வுத்தம். தம் ந யுஜ்ஜதி.

ஏவஞ்ஹி ஸதி அஞ்ஞதே³வ பஞ்சாரம்மணானம் ஆபாதாக³மனவத்து². அஞ்ஞதே³வ பஞ்சவிஞ்ஞாணானம் நிஸ்ஸயவத்தூ²தி ஏவம் விருத்³த⁴ஸ்ஸ அத்த²ஸ்ஸ ஆபஜ்ஜனதோதி. ஏவம் பஞ்சத்³வாரே விஸயபவத்தியா ஆதி³லக்க²ணம் த³ஸ்ஸேத்வா இதா³னி ஸப்³ப³பாரிபூரம் விஸயபவத்திவிபா⁴க³ம் வீதி²சித்தபவத்திஞ்ச த³ஸ்ஸேந்தோ தஸ்மாதிஆதி³மாஹ. ததோதி தஸ்மா சக்கு²ஸ்ஸ ஆபாதாக³மனபச்சயா. சக்கு²ஸ்ஸ ஆபாதாக³மனேன ஸஹேவ ப⁴வங்க³ஸ்ஸபி ஆபாதம் ஆக³ச்ச²தியேவாதி வுத்தம் த்³விக்க²த்தும்ப⁴வங்கே³சலிதேதி. சலனஞ்சேத்த² யதா² க³ஹிதம் கம்மாதி³ ஆரம்மணம் முஞ்சித்வா இதா³னி அத்தனி ஆபாதம் ஆக³ச்ச²ந்தம் அபி⁴னவாரம்மணம் க³ஹேதும் உஸ்ஸாஹஜாதஸ்ஸ விய ப⁴வங்க³ஸந்தானஸ்ஸ விகாரப்பத்தி த³ட்ட²ப்³ப³ம். ஏத்த²ச சக்கு²ஸ்ஸ ஆபாதாக³மனம் சக்கு²விஞ்ஞாணுப்பத்தியா ஏவ காரணம். ந ஆவஜ்ஜனுப்பத்தியா. ப⁴வங்க³ஸ்ஸ ஆபாதாக³மனமேவ பன ஆவஜ்ஜனுப்பத்தியாபி காரணம் ஹோதீதி த³ட்ட²ப்³ப³ம்.

[129] விபா⁴வனியம் பன

மனோத்³வாரேபி ஆபாதாக³மனம் விஸும் அபத்வா ரூபாதீ³னம் சக்கா²தி³ஸு க⁴ட்டனம்னாம யோக்³யதே³ஸாவட்டா²னம் ஏவ. தமேவச ப⁴வங்கு³ பச்சே²த³ஸ்ஸபி காரணம் ஹோதீதி கத்வா ‘‘பஞ்சஸு ஹி பஸாதே³ஸு யோக்³யதே³ஸாவட்டா²ன வஸேன ஆரம்மணே க⁴ட்டிதே பஸாத³க⁴ட்டனானுபா⁴வேன ப⁴வங்க³ஸந்ததி வோச்சி²ஜ்ஜமானாதிஆதி³’’ வுத்தம். தம் ததா² ந த³ட்ட²ப்³ப³ம்.

ந ஹி யோக்³யதே³ஸாவட்டா²னமேவ க⁴ட்டனந்தி ஸக்கா வத்தும். யோக்³யதே³ஸேபன ட²த்வா நிமித்தக⁴ட்டனவஸேன வத்து²க⁴ட்டனவஸேனச அஸனி நிபாதோவிய பஸாதே³ஸு யுஜ்ஜ²னம் மந்த²னம் கோ²ப⁴கரணம் க⁴ட்டனந்தி ச ஆபாதாக³மனந்தி ச வுச்சதீதி த³ட்ட²ப்³ப³ம். அயஞ்ச அத்தோ² ஹேட்டா² வுத்தோயேவ. ஏத்த²ச அயம்பி ஏகோ த⁴ம்மனியாமோயேவாதி கத்வா நானா டா²னியேஸு த்³வீஸு த்³வீஸு த்³வாரேஸு ஸஹேவ ஆபாதாக³மனம் பச்சேதப்³ப³ம். ரூபாதி³னா பஸாதே³ க⁴ட்டிதே தம் நிஸ்ஸிதஸ்ஸேவ பஞ்சவிஞ்ஞாணஸ்ஸ சலனம் ஸியா. கத²ம் பன ஹத³யவத்து²னிஸ்ஸிதஸ்ஸ ப⁴வங்க³ஸ்ஸாதி ந சோதே³தப்³ப³ந்தி.

[130] விபா⁴வனியம் பன

தமேவ சோத³னம் ஸமுட்டா²பேத்வா தம் பரிஹரந்தோ ‘‘ஸந்ததி வஸேன ஏகாப³த்³த⁴த்தா’’திஆதி³மாஹ. தத்த² ஸந்ததிவஸேனாதி நவத்தப்³ப³ம். ஸண்டா²னவஸேனாதி பன வத்தப்³ப³ம். ஸப்³ப³ஞ்சேதம் ஸாரதோ ந பச்சேதப்³ப³ம்.

கஸ்மா, தாதி³ஸஸ்ஸ அனுக்கமசலனஸ்ஸ அட்ட²கதா²யமேவ த³ள்ஹம் படிக்கி²த்தத்தா. வுத்தஞ்ஹி தத்த² ஏகேகம் ஆரம்மணம் த்³வீஸு த்³வீஸு த்³வாரேஸு ஆபாதமாக³ச்ச²தீதி. ரூபாரம்மணஞ்ஹி சக்கு²பஸாத³ம் க⁴ட்டேத்வா தங்க²ணேயேவ மனோத்³வாரே ஆபாதம் ஆக³ச்ச²தி. ப⁴வங்க³சலனஸ்ஸ பச்சயோ ஹோதீதி அத்தோ². ஸத்³த³ க³ந்த⁴ ரஸ போ²ட்ட²ப்³பே³ஸுபி ஏஸேவ நயோ. யதா² ஹி ஸகுணோ ஆகாஸேனாக³ந்த்வா ருக்க²க்³கே³ நிலீயமானோவ ருக்க²ஸாக²ஞ்ச க⁴ட்டேதி. சா²யாசஸ்ஸ பத²வியம் படிஹஞ்ஞதி. ஸாகா²க⁴ட்டன சா²யாப²ரணானி அபுப்³ப³ம் அசரிமம் ஏகக்க²ணேயேவ ப⁴வந்தி. ஏவம் பச்சுப்பன்னரூபாதீ³னம் சக்கு²பஸாதா³தி³க⁴ட்டனஞ்ச ப⁴வங்க³சாலன ஸமத்த²தாயமனோத்³வாரேஆபாதாக³மனஞ்சஅபுப்³ப³ம் அசரிமம் ஏகக்க²ணேயேவ ஹோதீதி. ஏவம் ஸகுணோபமாய ஸஹதங்க²ணேயேவாதி ச அபுப்³ப³ம்அசரிமம் ஏகக்க²ணே யேவாதிச வத்வா த³ள்ஹம் படிபி⁴த்³த⁴த்தா தம் அனுக்கமசலனம் அசிந்தேத்வா த⁴ம்மனியாமவஸேன ஏகப்பஹாரசலனமேவ பச்சேதப்³ப³ந்தி. ப⁴வங்க³ஸோதம்வோச்சி²ந்தி³த்வாதி ப⁴வங்க³பவாஹம் ஸப்³ப³ஸோ அவச்சி²ன்னம் கத்வா. ஆவஜ்ஜந்தந்தி அதி³ஸ்வாவ கிம்னாமேதந்தி ஆவஜ்ஜ மானம். பஸ்ஸந்தந்தி அத்த பச்சக்க²ம் குருமானம். ஸம்படிச்ச²ந்தந்தி முஞ்சிதும் அத³த்வா யதா²தி³ட்ட²ம் ரூபம் படி க³ண்ஹந்தம். ஸந்தீரயமானந்தி ஸுட்டு² தீரேந்தம்விசாரேந்தம். வவத்த²பேந்தந்தி ஸுட்டு² அஸங்கரதோ த²பேந்தம் ஸல்லக்கே²ந்தந்தி அத்தோ². யோனிஸோமனஸிகாராதி³வஸேன லத்³தோ⁴பச்சயோ யேனாதி லத்³த⁴பச்சயம். யம்கிஞ்சி ஜவனம் ஜவதீதி ஸம்ப³ந்தோ⁴. தம் பன ஜவனம் ஆரம்மணஸ்ஸ து³ப்³ப³லகாலேவா முச்சா² மரணாஸன்னகாலேஸுவா ச²க்க²த்தும் வா பஞ்சக்க²த்துமேவவா ஜவதீதி வுத்தம் யேபு⁴ய்யேனாதி. ஜவதீதி அஸனினிபாதஸதி³ஸேன ஜவேன பவத்ததி. தத்த² பத²மஜவனம் அலத்³தா⁴ ஸேவனத்தா ஸப்³ப³து³ப்³ப³லம் ஹோதி. ததோ து³தீயம் ப³லவம். ததோ ததீயம். ததோ சதுத்த²ம். இத³ம் பன ஸப்³ப³ப³லவம் முத்³த⁴பத்தம் ஹோதி. இதோ பட்டா²ய அனுக்கமேன பரிஹாயமானம் பவத்ததி. ஸத்தமவாரே க³தே பரிக்கீ²ணஜவம் ஹோதீதி வேதி³தப்³ப³ம். ஜவனா நுப³ந்தா⁴னிதி யதா² படிஸோதம் க³ச்ச²ந்திம் நாவம் உத³கம் தோ²கம் அனுப³ந்த⁴தி அனுக³ச்ச²தி. ஏவம் ஜவனம் அனுப³ந்தா⁴னி. த்³வே ததா³ரம்மணபாகானீதி த்³விக்க²த்தும் ததா³ரம்மணகிச்சானி விபாகசித்தானி பவத்தந்தி. யதா²ரஹந்தி ஆரம்மணஜவன ஸத்தானுரூபம். ப⁴வங்க³பாதோதி இமஸ்மிம் அதிஹந்தாரம்மணே ஆவஜ்ஜனதோ பத²மப⁴வங்க³சலனதோயேவவா பட்டா²ய உட்டி²தம் ஸமுட்டி²தம் சித்தஸந்தானம் யாவசதுத்த²ஜவனா ஸமுட்ட²ஹித்வா பஞ்சமஜவனதோ பட்டா²ய பதிதமேவ ஹோதி. ஏவம் ஸந்தேபி ஸமுட்டி²தவேக³ஸ்ஸ ஸப்³ப³ஸோ அபரிக்கீ²ணதாய பதிதந்தி நவுச்சதி. து³தீயததா³ரம்மணதோ பரம் பன ஸமுட்டி²தவேக³ஸ்ஸ ஸப்³ப³ஸோ பரிக்கீ²ணத்தா ததா³ ஏவ தம்சித்தஸந்தானம் பதிதம்னாம ஹோதி. தஸ்மா பதனம் பாதோ. ப⁴வங்க³பா⁴வேனசித்தஸந்தானஸ்ஸ பாதோ ப⁴வங்க³பாதோ, ப⁴வங்க³ம் ஹுத்வா பாதோதி அத்தோ² த³ட்ட²ப்³போ³. ப⁴வங்க³கிச்சே ப⁴வங்க³ட்டா²னே ப⁴வங்கா³ரம்மணேச பாதோ ப⁴வங்க³பாதோதிவா. இமஸ்மிம் டா²னே தோ³வாரிகோபமா, கா³மில்லோபமா, அம்போ³பமாச வத்தப்³பா³. தாஸப்³பா³பி அட்ட²கதா²யம் க³ஹேதப்³பா³. ஏத்தாவதா ஸத்தரஸ்ஸ சித்தக்க²ணானி பரிபூரேபாதி ஸம்ப³ந்தோ⁴. ஏத்த²ச ச²ச²க்கயோஜனா வத்தப்³பா³. யத்த² ஹி ரூந்தீ ரம்மணம் க⁴ட்டேதி. தம் சக்கு²வத்து²ம் நிஸ்ஸாய தத்த² க⁴ட்டிதம் ரூபாரம்மணம் ஆரப்³ப⁴ சக்கு²விஞ்ஞாணம் உப்பஜ்ஜதி. இதரானி பன ஆவஜ்ஜனாதீ³னி மனோ விஞ்ஞாணானி அத்தனோ அத்தனோ அதீதானந்தரசித்தேன ஸஹுப்பன்னம் ஹத³யவத்து²ம் நிஸ்ஸாய தமேவாரம்மணம் ஆரப்³ப⁴ உப்பஜ்ஜந்தி. சக்கு²த்³வார மனோத்³வாரானி ஸப்³பே³ஸம்பி வீதி²சித்தானம் த்³வாரகிச்சம் ஸாதே⁴ந்தி. அயஞ்ச வீதி² சக்கு²த்³வாரே உப்பன்னத்தா சக்கு²த்³வாரவீதீ²தி. சக்கு²விஞ்ஞாணேன உபலக்கி²தத்தா சக்கு²விஞ்ஞாணவீதீ²திச வுச்சதி. ஏகசித்தக்க²ணம் அதிக்கம்ம க⁴ட்டனஸமத்தே² அதிப³லவா ரம்மணே உப்பன்னத்தா அதிமஹந்தாரம்மண வீதீ²திச வுச்சதீதி. ஏத்த²ச யத்தகானி ரூபாரம்மணானி சக்கு²பதே² உப்பஜ்ஜித்வா டி²திப்பத்தானி ஹோந்தி. தானி தத்தகானி டி²திப்பத்தேஸு புப்³பா³பரபூ⁴தேஸு ஏகூன பஞ்ஞாஸபரிமாணேஸு சக்கு²பஸாதே³ஸு கிஸ்மிம்சி நக⁴ட்டேந்தீதி நவத்தப்³பா³னி. தேஸு பன யதே³வ ஏகம் சக்கு² இமிஸ்ஸா வீதி²யா யதா²ரஹம் வத்து²பா⁴வம் த்³வாரபா⁴வஞ்ச ஸாதே⁴தி. யத்த²ச க⁴ட்டிதம் ரூபம் ஆரப்³ப⁴ அயம் வீதி² பவத்ததி. ஏததே³வ கிச்ச ஸாத⁴னம் நாம ஹோதி. யம் மஜ்ஜி²மாயுகந்தி வத³ந்தி, இதரானி பன மோக⁴ வத்தூ²னினாம ஹோந்தி, யானிமந்தா³யுகானீதிஅமந்தா³யுகானீதிச வத³ந்தி. தானிபன யதா²வுத்த கிச்ச ஸாத⁴னதோ புரிமானி பச்சி²மானீதி து³விதா⁴னி ஹோந்தி, தது³ப⁴யானிபி சக்கு²விஞ்ஞாணஸ்ஸ உப்பாத³க்க²ணே டி²திபா⁴வேன லப்³ப⁴மானானி அட்ட²சத்தாலீஸமத்தானி வேதி³தப்³பா³னீதி. அவஸேஸானி பன ததோ புரிமதரானி பச்சி²மகரானிச லத்³த⁴க⁴ட்டனானிபி வத்து²த்³வாரகிச்சஸித்³தி⁴பா⁴வே அனாஸங்கிதப்³ப³த்தா இத⁴ நக³ஹிதானீதி. ஏத்த² ஸியா இமாய வீதி²யா உப்பத்திஸமயே ஸோ புக்³க³லோ அஹம் இத³ம் நாம பஸ்ஸாமீதி ஜானாதி, ந ஜானாதீதி. நஜானாதி. கதா³ பன ஜானாதீதி. ஸல்லக்க²ணவீதி²யா பவத்தமானாய. ததா² ஹி ஸப்³ப³பத²மம் சக்கு²த்³வாரவீதி² பவத்ததி. ததோ தத³னுவத்திகா மனோத்³வாரவீதி². ததோ ஸமுதா³யகா³ஹிகா. ததோ வண்ணஸல்லக்க²ணா. ததோ வத்து²கா³ஹிதா. ததோ வத்து²ஸல்லக்க²ணா ததோ நாமகா³ஹிகா. ததோ நாமஸல்லக்க²ணாதி. தத்த² வண்ணஸல்லக்க²ணாய பவத்தமானாய அஹம் நீலவண்ணம் பஸ்ஸாமீதிஆதி³னா வண்ணம் ஸல்லக்கே²தி. வத்து²ஸல்லக்க²ணாய ஸண்டா²னம் ஸல்லக்கே²தி. நாம ஸல்லக்க²ணாய நாமம் ஸல்லக்கே²தீதி. இதி தம்தம் ஸல்லக்க²ணவீதி² யா பவத்தமானாயஏவ தம்தம்பஸ்ஸாமீதி ஜானாதீதி. ஏத்த²ச அலாதசக்கஸ்ஸ கா³ஹிகாவிய புரிமாஹி த்³வீஹி வீதீ²ஹி புனப்புனம் க³ஹிதானம் ரூபானம் ஸமுதா³யதோ கா³ஹிகா ததீயா மனோத்³வாரவீதி² ஸமுதா³ய கா³ஹிகானாம, ந ஹி ஸமுதா³யக³ஹணேன வினா பரிப்³யத்தவண்ணக³ஹணம் ஸம்ப⁴வதீதி. யாவ ததா³ரம்மணுப்பாதா³ பன அப்பஹோந்தாதீதகந்தி த்³விக்க²த்தும் யாவ ததா³ரம்மணுப்பாதா³ பவத்திதும் அப்பஹோந்தம் ஹுத்வா அதீதத்³வத்திசித்தக்க²ணிகம். யஸ்ஸ ஹி த்³வேவா தீணிவா சித்தக்க²ணானி அதீதானி ஹோந்தி. தம் யாவ ததா³ரம்மணுப்பாதா³ பவத்திதும் நப்பஹோதி ந ஸக்கோதி. ஏவம் அப்பஹோந்தம் ஹுத்வா அதீதகந்தி அத்தோ². அபாதமாக³தந்தி சக்கு²த்³வாரே மனோத்³வாரேச ஆபாதம் ஆக³தம். நத்தி² ததா³ரம்மணுப்பாதோ³தி ஏத்த² யஸ்ஸ தீணி சித்தக்க²ணானி அதீதானி ஹோந்தி. தஸ்ஸ சுத்³த³ஸ சித்தக்க²ணாயுகாவஸே ஸஸ்ஸ ஆரம்மணஸ்ஸ ஸத்தமஜவனேன ஸஹேவ நிருத்³த⁴த்தா தஸ்மிம் நத்தி² ததா³ரம்மணுப்பாதோ³தி யுத்தமேதம். ந ஹி ஏகாவஜ்ஜனவீதி²யம் சித்தானி த⁴ம்மவஸேன விய காலவஸேனாபி நானாரம்மணானி இச்ச²ந்தி அட்ட²கதா²சரியாதி. யஸ்ஸ பன த்³வே சித்தக்க²ணானி அதீதானி. தஸ்மிம் ஸத்தமஜவனதோ பரம் ஏகசித்தக்க²ணாயுகாவஸேஸே ஆரம்மணே ஏகேன ததா³ரம்மணேன உப்பஜ்ஜிதப்³ப³ந்தி சே.ந. ந ஹி தாதி³ஸம் நிரோதா⁴ ஸன்னம் ஆரம்மணம் ஏகவாரம்பி ததா³ரம்மணுப்பத்தியா பச்சயோ ப⁴விதும் ஸக்கோதீதி. ததா² ஹி மஹாஅட்ட²கதா²யம் விபாகுத்³தா⁴ரே சித்தப்பவத்திக³ணனாயம் ததா³ரம்மணானி த்³வேதி த்³வேஏவ ததா³ரம்மண வாரா ஆக³தாதி.

யம் பன விபா⁴வனியம்

‘‘த்³விக்க²த்துமேவ ஹி ததா³ரம்மணுப்பத்தி பாளியம் நியமிதா’’தி வுத்தம். தத்த² பாளியந்தி அட்ட²கதா²தந்திம் ஸந்தா⁴ய வுத்தந்தி க³ஹேதப்³ப³ம். ந ஹி ஸா நாம பாளி அத்தி², யத்த² த்³விக்க²த்தும் ததா³ ரம்மணுப்பத்தி நியமிதாதி.

மஜ்ஜி²மபா⁴ணகாபன ததா³ரம்மணம் ஏகம்பி இச்ச²ந்தி. ஸங்க³ஹகாரேன பன தம் படிஸித்³த⁴ந்தி இத⁴பி தம் தே²ரேன படிக்கி²த்தந்தி த³ட்ட²ப்³ப³ம். யதி³ ஏவம் கஸ்மா பரமத்த²வினிச்ச²யே ஸகிம்த்³வேவா ததா³லம்ப³ந்தி தே²ரேன வுத்தந்தி. மஜ்ஜி²மபா⁴ணகானம் மதேன வுத்தந்தி த³ட்ட²ப்³ப³ந்தி. ஆசரியானந்த³த்தே²ரோ பன ஏகம்பி இச்ச²தியேவ. யதா² ஹி ஆக³ந்துகப⁴வங்க³ம் ஏகம் பவத்ததி. ததா² ததா³ரம்மணம்பி ஏகம் நபவத்ததீதி நஸக்கா வத்தும். யஞ்ச சித்தப்பவத்திக³ணனாயம் ததா³ரம்மணானி த்³வேதி வுத்தம். தம்பி உக்கட்ட²பரிச்சே²த³வஸேன வுத்தந்தி, ந நஸக்கா வத்துந்தி. யாவ ஜவனுப்பாதா³பி பவத்திதும் அப்பஹோந்தாதீதகந்தி ஸம்ப³ந்தோ⁴. யஸ்ஸ ஹி ஆரம்மணஸ்ஸ சத்தாரி பஞ்ச ச² ஸத்த அட்ட²னவ வா சித்தக்க²ணானி அதீதானி ஹோந்தி. தம் யாவ ஜவனுப்பாதா³ பவத்திதும் நப்பஹோதி. ஏவம் அப்பஹோந்தம் ஹுத்வா அதீதகந்தி அத்தோ². ஜவனம்பி அனுப்பஜ்ஜித்வாதி ஜவனஸ்ஸபி அனுப்பஜ்ஜனதோ. அயஞ்ஹி த்வாபச்சயோ பா⁴வத்தே²ஏவ த³ட்ட²ப்³போ³. ந கத்துஅத்தே². கஸ்மா. அத்தனோ பதா⁴னக்ரியாய ஸமானகத்துகதாய அபா⁴வதோதி.

[131] விபா⁴வனியம் பன

‘‘ஹேதும்ஹிசாயம் த்வாபச்சயோ’’தி வுத்தம். தம் ந ஸுந்த³ரம்.

ந ஹி பா³ஹிரத்த²பூ⁴தோ ஹேதுஅத்தோ² கிதகபச்சயானம் விஸயோ ஹோதீதி. தஸ்மா இத⁴ பா⁴வத்தே²ஏவ த்வாபச்சயோ. ததோச ஹேதுஅத்தே² பச்சத்தவசனந்தி த³ட்ட²ப்³ப³ம். ஏதேன யா லக்க²ணே ஹேதும்ஹிசமானந்தபச்சயானம்பி பவத்தி கத்த²சி வுத்தா. ஸாபிபடிக்கி²த்தா ஹோதி. நஹி பா³ஹிரத்த²பூ⁴தா லக்க²ணஹேதுயோ தேஸம் விஸயா ஹோந்தீதி. ஏத்த²ச யஸ்ஸ ஆரம்மணஸ்ஸ நவசித்தக்க²ணானி அதீதானி ஹோந்தி. தஸ்ஸ அவஸேஸ அட்ட²சித்தக்க²ணா யுகஸ்ஸ து³தீய வோட்ட²ப்³ப³னேன ஸஹேவ நிருத்³த⁴த்தா தஸ்மிம் ஜவனம்பி அனுப்பஜ்ஜித்வாதி யுத்தமேதம். காரணம் வுத்தமேவ. யஸ்ஸ பன சத்தாரி.ல. அட்ட²வா சித்தக்க²ணானி அதீதானி. தஸ்மிம் ஜவனேன உப்பன்னேன ப⁴விதப்³ப³ந்தி சே.ந. அவஸேஸச²சித்தக்க²ணாயுகம்பி ஹி ஆரம்மணம் ஜவனுப்பத்தியா பச்சயோ ப⁴விதும் ந ஸக்கோதி. ஜவனஞ்ஹி உப்பஜ்ஜமானம் ஸத்தக்க²த்தும் பவத்திதும் பஹோனகே ஆரம்மணே ஏவ உப்பஜ்ஜதி. பகதினியாமேன ஜவனஸ்ஸ ஸத்தக்க²த்து பரமதாய ஸம்ப⁴வதோதி. ஏத்த² பன யதா² விஸஞ்ஞிகால முச்சா²கால மரணகாலேஸு வத்து²ஸ்ஸ அவிஸத³தாய து³ப்³ப³லதா யச ஜவனம் ச²பஞ்சவாரேபி பவத்ததி. ததா² பகதிகாலேபி ஆரம்மணஸ்ஸ து³ப்³ப³லபா⁴வே ஸதி ச²பஞ்சவாரேபி பவத்ததியேவாதி. த்³வத்திக்க²த்துந்தி த்³விக்க²த்தும்வா திக்க²த்தும்வா. ததா² ஹி அட்ட²கதா²யம் வோட்ட²ப்³ப³னே ட²த்வா ஏகம்வா த்³வேவா சித்தானி பவத்தந்தி. ததோ ஆஸேவனம் லபி⁴த்வா ஜவனட்டா²னே ட²த்வா புன ப⁴வங்க³ம் ஓதரதீதி வுத்தம். ஏத்த² ஹி ததோ ஆஸேவனம் லபி⁴த்வா ஜவனட்டா²னே ட²த்வாதி ஏதேன ததீயஸ்ஸ வோட்ட²ப்³ப³னஸ்ஸ பவத்திம் த³ஸ்ஸேதி. இதரதா² ஏகம்வா த்³வேவா சித்தானி பவத்தந்தி. ததோ ப⁴வங்க³ம் ஓதரதீதி வுத்தம் ஸியாதி. ஏகம்வாதி பன வாசா ஸிலிட்ட²மத்தம் த³ட்ட²ப்³ப³ம். யதா² தி³ரத்த திரத்தம்தி. அத²வா, ததோதி ஏகசித்ததோவா த்³விசித்ததோவாதி அத்தோ². தத்த² பத²மேன த்³விக்க²த்தும் து³தீயேன திக்க²த்தும் வோட்ட²ப்³ப³னஸ்ஸ உப்பத்தி வுத்தா ஹோதீதி. ஆஸேவனம் லபி⁴த்வாதி இத³ம் பன உபசாரவசனமத்தம் த³ட்ட²ப்³ப³ம். ந ஹி வோட்ட²ப்³ப³னஸ்ஸ ஆஸேவனதா பட்டா²னே வுத்தாதி. ஆசரியானந்த³த்தே²ரேன பனேத்த² வோட்ட²ப்³ப³னதோ பரம் சதுபஞ்ச சித்தக்க²ணாவஸேஸே ஆரம்மணே சதுபஞ்சஜவனுப்பத்தியா ஏவ பரித்தாரம்மணவாரோ இச்சி²தோ. ந வோட்ட²ப்³ப³ன பரியோஸானவஸேன. பட்டா²னேஹி ப⁴வங்க³ம் ஆவஜ்ஜனாய அனந்தரபச்சயேன பச்சயோ த்வேவவுத்தோ. ந பன வுத்தோ ஆவஜ்ஜனா ப⁴வங்க³ஸ்ஸ அனந்தரபச்சயேன பச்சயோதி. யதா² ச முச்சா²மரணகாலேஸு வத்து²து³ப்³ப³லதாய ச² பஞ்சஜவனவாரா இச்சி²தப்³பா³. ததா² இத⁴பி ஆரம்மணது³ப்³ப³லதாயாதி ந ந ஸக்கா வத்துந்தி. ஏத்த² ச ஸந்தீரணதோ பரம் ஏகசித்தக்க²ணா வஸேஸே ஆரம்மணே ஏகம் வோட்ட²ப்³ப³னம் த்³விசித்தக்க²ணாவஸேஸே த்³வே தது³த்தரி தீணீதி யுத்தம் ஸியா. ஏதரஹி பன த்³விவோட்ட²ப்³ப³னிகா ச²பரித்தாரம்மணவீதி²யோதி வோட்ட²ப்³ப³னிகா பஞ்சாதி யோஜேஸும். ஏவம் ஸந்தே கீதி³ஸே பரித்தாரம்மணே த்³விவோட்ட²ப்³ப³னிகா, கீதி³ஸே திவோட்ட²ப்³ப³னிகாதி விசாரேதப்³பா³ ஸியுந்தி. யம் பன ஆரம்மணம் த்³வத்திக்க²த்தும்வோட்ட²ப்³ப³னுப்பத்தியா அப்பஹோனகம் ஹோதி. தம் ஆவஜ்ஜனப்பத்தியாபி பச்சயோ ந ஹோதீதி வுத்தம் தத்த² ப⁴வங்க³சலனமேவ ஹோதி. நத்தி² வீதி²சித்துப்பாதோ³தி. தத்த² ப⁴வங்க³சலனமேவாதி த்³விக்க²த்தும் ப⁴வங்க³ஸ்ஸ சலனமத்தமேவ ஹோதி. இச்சேவம் சக்கு²த்³வாரேதி இதி ஏவம் யதி³ ஏகசித்தக்க²ணாதீதகம் ரூபாரம்மணம் சக்கு²ஸ்ஸ அபாதமாக³ச்ச²தீதிஆதி³னா வுத்தனயேன சக்கு²த்³வாரே சதுன்னம் வாரானம் வஸேன சதுதா⁴ விஸயப்பவத்தி வேதி³தப்³பா³, ததா² ஸோதத்³வாராதீ³ஸு சாதியோஜனா. ஸப்³ப³தா²பி சதுதா⁴ வேதி³தப்³பா³தி ஸம்ப³ந்தோ⁴. அதிபரித்தாரம்மணம்பி ஆபாதாக³தமத்தேன மோக⁴வாரஸ்ஸ ஆரம்மணம்னாம ஹோதி. ந ஆரம்மணகரணவஸேன. இதரானி பன உப⁴யதா²பி இதரேஸம் வாரானம் ஆரம்மணானினாம ஹோந்தீதி வுத்தம் சதுன்னம் வாரானம் யதா²க்கமம் ஆரம்மணபூ⁴தாதி.

விபா⁴வனியம் பன

ஆரம்மணபூ⁴தாதி இமஸ்ஸ அதிபரித்தாரம்மணம் ஸந்தா⁴ய பச்சயபூ⁴தாதி அத்தோ² வுத்தோ. தஞ்ஹி மோக⁴வார பஞ்ஞா பனாய பச்சயோ ஹோதீதி.

பஞ்சத்³வாரேவீதி²சித்தானி யதா²ரஹம் கிச்சவஸேன ஸத்தேவ. சித்துப்பாதா³ சித்தானம் உப்பத்திக²ணவஸேன சதுத்³த³ஸ. வித்தா²ரா சித்தஸரூபவித்தா²ரதோ சதுபஞ்ஞாஸாதி யோஜனா. ஏத்தா²தி பரித்தஜவனவாரே.

137. மனோத்³வாரே பன ஆரம்மணத⁴ம்மா பரித்தக²ணாபி அதீதானாக³தாபி காலவிமுத்தாபி ஆபாதம் ஆக³ச்ச²ந்தியேவ. தஸ்மா தத்த² ஏகசித்தக்க²ணாதீதானிவா ப³ஹுசித்தக்க²ணாதீதானிவா டி²திப்பத்தானேவ ஆபாதமாக³ச்ச²ந்தீதி இத³ம் விதா⁴னம் நத்தீ²தி வுத்தம் மனோத்³வாரேபன யதி³விபூ⁴தமாலம்ப³ணம் ஆபாதமாக³ச்ச²தீதி. தத்த² மனோத்³வாரேதி ஸுத்³த⁴மனோத்³வாரே. சக்கா²தீ³ஸு ஹி க⁴ட்டனேன ஸஹேவ யத்த² அபாதமாக³ச்ச²தி. தம் மிஸ்ஸகத்³வாரந்தி வுச்சதி. இத⁴ பன ஸுத்³த⁴மேவா தி⁴ப்பேதந்தி. தம்பி பஞ்சத்³வாரானுப³ந்த⁴கம் விஸும் ஸித்³த⁴ந்தி து³வித⁴ம் ஹோதி. தத்த² யதா² க⁴ண்டே³ த³ண்ட³கேன ஏகவாரம் பஹடே க⁴ண்ட³ஸரீரபூ⁴தா ரூப கலாபா சிரம்பி காலம் அஞ்ஞமஞ்ஞம் க⁴ட்டேத்வா அனுரவஸத்³த³ஸந்தானம் பவத்தேந்தி. ததா² பஞ்சத்³வாரே ஆரம்மணேன ஏகவாரம் க⁴ட்டிதே பஞ்ச த்³வாரிகவீதி²யா நிருத்³தா⁴யபி அதீதம் பஞ்சாலம்ப³ணம் மனோத்³வாரே யதா² பாதாக³தமேவ ஹுத்வா அனேகஸஹஸ்ஸானிபி மனோத்³வாரிகவீதி²சித்த ஸந்தானானி பவத்தேதியேவ. தேஸம் பன த்³வாரபூ⁴தம் ப⁴வங்க³ஸந்தானம் அனுப³ந்த⁴கம்னாம ஹோதி. தானிச சித்தானி அனுப³ந்த⁴கவீதி²சித்தானினாம ஹோந்தி. யத்த² பன பஞ்சத்³வாரக⁴ட்டனா நுப³ந்த⁴பா⁴வேன வினா கேவலம் ததா² ததா² ச²ளாரம்மணத⁴ம்மா ஆபாதம் ஆக³ச்ச²ந்தி. தம் விஸும் ஸித்³த⁴ம் நாம ஹோதி. கத²ம் பன தஸ்மிம் விஸும் ஸித்³தே⁴ மனோத்³வாரே ஆரம்மண த⁴ம்மா ஆபாதம் ஆக³ச்ச²ந்தீதி. வுச்சதே. தி³ட்ட²தோ தி³ட்ட²ஸம்ப³ந்த⁴தோ ஸுததோ ஸுதஸம்ப³ந்த⁴தோ ஸத்³தா⁴ய ருசியா ஆகாரபரிவிதக்கேன தி³ட்டி²னிஜ்ஜா²னக²ந்தியா நானாகம்மப³லேன நானாஇத்³தி⁴ப³லேன தா⁴துக்கோ²த வஸேன தே³வதோபஸம்ஹாரவஸேன அனுபோ³த⁴வஸேன படிவேத⁴வஸேனாதி ஏவமாதீ³ஹி காரணேஹி ஆபாதம் ஆக³ச்ச²ந்தீதி. தத்த² தி³ட்ட²ம்னாம புப்³பே³ பஞ்சஹித்³வாரேஹி க³ஹிதம் பஞ்சாலம்ப³ணம். தம்பி காலந்தரே காரணலாபே⁴ ஸதி ஸுத்³தே⁴ மனோத்³வாரே ஆபாதம் ஆக³ச்ச²தியேவ. தி³ட்ட²ஸம்ப³ந்த⁴ம்னாம தி³ட்ட²ஸதி³ஸம் வுச்சதி. புப்³பே³ ஹி கிஞ்சி தி³ஸ்வா அஞ்ஞம் யம்கிஞ்சி அனுமானேந்தஸ்ஸ அதி³ட்ட²ம்பி தம்ஸதி³ஸம் அதீதம்பி அனாக³தம்பி பச்சுப்பன்னம்பி ப³ஹுஆபாதம் ஆக³ச்ச²தியேவ. ஸுதம்னாம பரதோ ஸுத்வா க³ஹிதம் ச²ளாரம்மணம். தம் பன மஹாவிஸயம் ஹோதி. ஸப்³ப³ஞ்ஞுதே³ஸனம் ஸுத்வா க³ஹிதம் ந கிஞ்சி அனாரம்மணம்னாம அத்தீ²தி. ஸுதஸம்ப³ந்த⁴ம்னாம ஸுதஸதி³ஸம். ஸத்³தா⁴னாம பரஸ்ஸ ஸத்³த³ஹனா. ருசினாம அத்தனோ மதி. ஆகார பரிவிதக்கோ நாம அத்த²ச்சா²யம் ப்³யஞ்ஜனச்சா²யம் காரணச்சா²யஞ்ச நிஸ்ஸாய ததா² ததா² பரிவிதக்கனம். தி³ட்டி²னிஜ்ஜானக²ந்தினாம பஞ்ஞாயவா அத்தனோ லத்³தி⁴யாவா புனப்புனம் உபபரிக்கி²த்வா ஏவமேவாதி ஸன்னிட்டா²னம் பாபேத்வா க³ஹணம். ஸேஸம் பாகடமேவ. ஏத்த²ச அனந்தரூபனிஸ்ஸய பச்சயபா⁴வோனாம சித்தஸந்தானஸ்ஸ மஹாவிப்பா²ரோ ஹோதி. ஸகிம்பி ஆரம்மணம் ஸுட்டு² ஆஸேவித்வா நிருத்³த⁴காலதோ பட்டா²ய வஸ்ஸஸதேபி வஸ்ஸஸஹஸ்ஸேபி ப⁴வந்தரேபி தம்ஆரம்மணம் படிச்ச ப⁴வங்க³ சலனஸ்ஸ பச்சயோ ஹோதி. சித்தஞ்சனாம தி³ட்டா²தீ³ஹி யதா²வுத்தகாரணேஹி ஸம்வத்³தி⁴தம் மஹாவிப்பா²ரம் ஹோதி. கிஞ்சி நிமித்தம் லபி⁴த்வா ஏகஸ்மிம் க²ணே அனேகஸஹஸ்ஸேஸுபி தி³ட்டா²தீ³ஸு ஆரம்மணேஸு ப²ரமானம் பவத்ததி. தேஹிச காரணேஹி நிச்சம் சோதீ³யமானம் சித்தஸந்தானம் காயகே³லஞ்ஞாதி³கே சித்தது³ப்³ப³லபச்சயே அஸதி நிச்சகாலம்பி ப⁴வங்க³தோ வுட்டா²தும் அஜ்ஜா²ஸயயுத்தம் ஹோதி. ந ஹி சித்தம்னாம அவிபூ⁴தே ஆரம்மணே ரமதி. விபூ⁴தேஏவ ரமதி. தஸ்மா ப⁴வங்க³ஸம்பயுத்தோ மனஸிகாரோ புனப்புனம் ப⁴வங்க³ம் சாலேத்வா லத்³த⁴பச்சயேஸு ஆரம்மணேஸு புனப்புனம் ஆவஜ்ஜனம் நியோஜேதியேவ. ததா³ தானி ஆரம்மணானி தத³பி⁴னின்னாகார பவத்தமனஸிகார ஸம்பயுத்தஸ்ஸ ப⁴வங்க³ சித்தஸ்ஸ ஆபாதம் ஆக³ச்ச²ந்தி. ந ஹி அஞ்ஞம் ஆரம்மணம் க³ஹேத்வா பவத்தமானஸ்ஸ சித்தஸ்ஸ ஆரம்மணந்தரே அபி⁴னின்னாகாரோனாம நத்தீ²தி ஸக்கா வத்துந்தி. ததா³ரம்மணபாகானி பவத்தந்தீதி இத³ம் காமஸத்தவஸேன வுத்தம். ரூபாரூபஸத்தானம் பன விபூ⁴தாரம்மணேபி ததா³ரம்மணுப்பாதோ³ நத்தி²யேவ. யதா² சேத்த². ஏவம் பஞ்சத்³வாரேபி ரூபஸத்தானம் அதிமஹந்தாரம்மணேஸு ததா³ரம்மணுப்பாதோ³ நத்தீ²தி. அவிபூ⁴தே பனா லம்ப³ணே ஜவனாவஸானே ப⁴வங்க³பாதோவ ஹோதீதி இத³ஞ்ச உக்கட்ட² பரிச்சே²த³வஸேன வுத்தந்தி த³ட்ட²ப்³ப³ம். ஞாணவிப⁴ங்க³ட்ட²கதா²யம் பன த்³வத்திக்க²த்தும் வோட்ட²ப்³ப³னப்பவத்திவஸேன அவிபு⁴தே ஆலம்ப³ணே வோட்ட²ப்³ப³னவாரோபி ஆக³தோ. யோச பஞ்சத்³வாரேப⁴வங்க³சலனமத்தவஸேன மோக⁴வாரோ நாம சதுத்தோ² வாரோ வுத்தோ. ஸோபி இத⁴ லத்³து⁴ம் வட்டதியேவ. ஸுத்³த⁴மனோத்³வாரேபி ஹி ஆரம்மணே ஆபாதமாக³தே வீதி²சித்தம் அனுப்பஜ்ஜித்வா த்³விக்க²த்தும் ப⁴வங்கே³ சலிதே நிவத்தனகவாரானம் பமாணம் நப⁴விஸ்ஸதியேவ, விஸயேச ஆபாதாக³தே ப⁴வங்கே³ச சலிதே ஸதி விஸயப்பவத்தினாம ந ந ஹோதீதி. இதி இமஸ்மிம் மனோத்³வாரேபி ததா³ரம்மண ஜவன வோட்ட²ப்³ப³ன மோக⁴வார ஸங்கா²தானம் சதுன்னம் வாரானம் யதா²க்கமம் ஆரணபூ⁴தா விஸயப்பவத்தி சதுதா⁴ வேதி³தப்³பா³தி. தத்த² ததா³ரம்மணவாரஸ்ஸ ஆரம்மணபூ⁴தா அபி⁴விபூ⁴தானாம ஜவன வாரஸ்ஸ விபூ⁴தானாம. வோட்ட²ப்³ப³னவாரஸ்ஸ அவிபூ⁴தானாம. மோக⁴வாரஸ்ஸ ஆரம்மணபூ⁴தா அதிஅவிபூ⁴தானாமாதி யோஜேதப்³பா³.

ஏத்த²ச ஆரம்மணஸ்ஸவா சித்தஸ்ஸவா அதிப³லவதாய அபி⁴விபூ⁴ததா வேதி³தப்³பா³. து³ப்³ப³லேபி ஹி சித்தே பத²விபப்³ப³தாதி³வஸேன அதிப³லவந்தம் ஆரம்மணம் அதிவிபூ⁴தம்னாம ஹோதி. அதிப³லவந்தே ச சித்தே அதிஸுகு²மம்பி நிப்³பா³னம் அதிவிபூ⁴தம்னாம ஹோதீதி. ஏவம் ஸேஸேஸுபீதி. வாரபே⁴தோ³ பனேத்த² அனுப³ந்த⁴கோ, விஸும் ஸித்³தோ⁴தி து³விதோ⁴. தத்த² அனுப³ந்த⁴கோ சக்கு²த்³வாரானுப³ந்த⁴காதி³வஸேன பஞ்சவிதோ⁴. ஏகேகஸ்மிஞ்சேத்த² அதீதக³ஹணம், ஸமுதா³ய க³ஹணம், வத்து²க³ஹணம், நாமக³ஹணந்தி சத்தாரோ சத்தாரோ வாரா. தேஸுச ததா³ரம்மணவாராத³யோ யதா²ரஹம் யோஜேதப்³பா³. விஸும் ஸித்³தோ⁴ பன தி³ட்ட² வாரோ, தி³ட்ட²ஸம்ப³ந்த⁴வாரோ, ஸுதவாரோ, ஸுதஸம்ப³ந்த⁴வாரோ, விஞ்ஞாதவாரோ, விஞ்ஞாதஸம்ப³ந்த⁴வாரோதி ச²ப்³பி³தோ⁴ ஹோதி. ஏத்த²ச ஸத்³தா⁴ ருசி ஆகார பரிவிதக்காதி³ வஸேன பவத்தவாரா விஞ்ஞாதவாரோ, விஞ்ஞாத ஸம்ப³ந்த⁴வாரோதி வுத்தாதி த³ட்ட²ப்³பா³. அட்ட²ஸாலினியம் பன ஸத்³தா⁴ருசியாதி³வ ஸேனக³ஹிதம் ஆரம்மணம் ததா²பி ஹோதி. அஞ்ஞதா²பி ஹோதி. தஸ்மா அட்ட²கதா²யம் ந க³ஹிதந்தி வுத்தம். ததா²வா ஹோது அஞ்ஞதா²வா. வீதி²சித்தபவத்தியா ஸதி க³ஹேதப்³ப³மேவ. தத்த² ஏகேகஸ்மிம்வாரே ததா³ரம்மணவாராதி³வஸேன சத்தாரோ சத்தாரோ வாரா. தேஸுச காம மஹக்³க³தா நுத்தர பஞ்ஞத்தி வஸேன பச்சுப்பன்னாதீதானாக³தகால விமுத்தவஸேனச ஆரம்மணத⁴ம்மா யதா²ரஹம் யோஜேதப்³பா³தி. ஏதரஹி பன அதீதப⁴வங்க³வஸேன ததா³ரம்மணவஸேன ச வாரபே⁴த³ம் கப்பேந்தி. தத்த² அதீதப⁴வங்க³வஸேன வாரபே⁴த³கப்பனம் நிரத்த²கம். ந ஹி மனோத்³வாரே பஞ்சத்³வாரே விய ஆரம்மணானம் க²ணவஸேன ப³லவ து³ப்³ப³லதா ஸம்ப⁴வோ அத்தி². ததா³ அவிஜ்ஜமானானம்பி அதீதானாக³தானம் காலவிமுத்தானஞ்ச தத்த² ஆபாதாக³மனதோதி. ஏத்த² ஸியா, ஏகாவஜ்ஜனவீதி²யா ஆரம்மணம்னாம த⁴ம்மதோச காலதோச அபி⁴ன்ன மேவ இச்ச²ந்தி அட்ட²கதா²சரியா. இமேச ஸத்தா தம் தம் ஆகாரம் ஸல்லக்கே²த்வா அஞ்ஞமஞ்ஞஸ்ஸ சித்தம் ஜானந்தியேவ. பரசித்தவிது³னியோ பன தே³வதா ஆகாரஸல்லக்க²ணேன வினாபி ஜானந்தி. தத்த² பச்சுப்பன்னம் பரஸ்ஸ சித்தம் ஜானனகாலே ஆவஜ்ஜனம் பா⁴வயம் பரஸ்ஸ சித்தம் அத்தனா ஸஹுப்பன்னம். தம் வா ஆவஜ்ஜதி. உதா³ஹு பரதோ தம் தம் ஜவனேன ஸஹுப்பன்னம்வா. ஜவனானிச யம் ஆவஜ்ஜனேன ஸஹுப்பன்னம் தம் வா ஜானந்தி, பச்சேகம் அத்தனா ஸஹுப்பன்னம்வாதி. கிஞ்சேத்த², யதி³ தாவ ஆவஜ்ஜனேன ஸஹுப்பன்னம் ஆவஜ்ஜதி ஜானந்திச. ஏவம் ஸதி த⁴ம்மதோ அபி⁴ன்னம் ஹோதி. காலதோ பி⁴ன்னம். தஞ்ஹி சித்தம் ஆவஜ்ஜனஸ்ஸ பச்சுப்பன்னம் ஹோதி. ஜவனானம் பன அதீதந்தி. அத² பச்சேகம் அத்தனா ஸஹுப்பன்னம் ஆவஜ்ஜதி ஜானந்திச. ஏவஞ்ச ஸதி காலதோ அபி⁴ன்னம் ஹோதி. த⁴ம்மதோ பி⁴ன்னமேவ. அத²பி யம் பச்சேகம் ஸஹுப்பன்னம் ஜானந்தி. ததே³வ ஆவஜ்ஜதி. ஏவம்பி பி⁴ன்னமேவ ஹோதீதி. ஏத்த² அட்ட²கதா²யம் தாவ யம் ஆவஜ்ஜனேன ஸஹுப்பன்னம். ததே³வ ஆவஜ்ஜதி ஜானந்திசாதி த⁴ம்மதோ அபி⁴ன்னம் வத்வா தம் சித்தம் நிருத்³த⁴ம்பி அத்³தா⁴வஸேன ஸந்ததிவஸேனச க³ஹிதம் ஜவனானம்பி பச்சுப்பன்னமேவ ஹோதீதி வினிச்சி²தம். ஆசரியானந்த³மதேன பன பரஸ்ஸ தம் தம் ஆகாரம் ஸல்லக்கே²த்வா தம் தம் அதி⁴ப்பாயஜானனகாலே ஆவஜ்ஜனஜவனானி பச்சேகம் அத்தனா ஸஹுப்பன்னம் சித்தம் ஆவஜ்ஜதி ஜானந்தி ச. ந சேத்த² த⁴ம்மதோ காலதோச பி⁴ன்னம்னாம ஹோதி. ஸப்³பே³ஸம்பி ஹி ஆரம்மணம் சித்தமேவ ஹோதி பச்சுப்பன்னஞ்சாதி. நச ஜவனானி நிராவஜ்ஜனானினாம ஹோந்தி. ஆவஜ்ஜனேனபி ஹி சித்தந்தேவ ஆவஜ்ஜிதம் ஹோதி. ஜவனானிச சித்தந்தேவ ஜானந்தீதி. யதி³ பன ஆவஜ்ஜனே ந சித்தந்தி ஆவஜ்ஜிதே ஜவனானி ரூபந்தி ஜானந்தி. ரூபந்திவா ஆவஜ்ஜிதே சித்தந்தி ஜானந்தி, நீலந்திவா ஆவஜ்ஜிதே பீதந்தி ஜானந்தி. ஏவம் ஸதி ஜவனானி த⁴ம்மதோ நிராவஜ்ஜனானி நாம ஹோந்தி. ததா² அதீதந்தி ஆவஜ்ஜிதே பச்சுப்பன்னந்தி. ஏவஞ்ச ஸதி தானி காலதோ நிராவஜ்ஜனானினாம ஹோந்தீதி. யஸ்மா ச அதீதோ த⁴ம்மோ பச்சுப்பன்னஸ்ஸ த⁴ம்மஸ்ஸ அனந்தரபச்சயேன பச்சயோதி பட்டா²னே வுத்தோ. தஸ்மா இத⁴ க²ணவஸேனேவ பச்சுப்பன்னம் வத்தும் யுத்தம். ந அத்³தா⁴ஸந்ததி வஸேனாதி. இதரதா² ஸப்³ப³ வீதி²சித்தவாரேஸுபி ஆரம்மணானம் அதீதாதி³பா⁴வோ அத்³தா⁴ஸந்ததிவஸேனேவ வத்தப்³போ³ ஸியாதி. கா³தா²யம் தீணேவாதி கிச்சவஸேன தீணி ஏவ. சித்துப்பாதா³ த³ஸேரிதாதி சித்துப்பத்திக்க²ணவஸேன த³ஸ ஈரிதானி கதி²தானி. வித்தா²ரேனாதி சித்தஸரூபவித்தா²ரேன. ஏத்தா²தி மனோத்³வாரே. ஏகசத்தாலீஸாதி பஞ்சவிஞ்ஞாணமனோதா⁴தூஹி வஜ்ஜிதானம் காமாவசரசித்தானம் வஸேன ஏகசத்தாலீஸம். ஏத்தா²தி பரித்தஜவனவாரே. [பரித்தவாரோ]

138. விபூ⁴தாவிபூ⁴தபே⁴தோ³ நத்தி² ஏகம் விபூ⁴தமேவ லப்³ப⁴தீதி அதி⁴ப்பாயோ. ந ஹி அவிபூ⁴தே ஆரம்மணே அப்பனானாம ஸம்ப⁴வதீதி. ததா² ததா³ரம்மணுப்பாதோ³ச நத்தி². ந ஹி அதிஸந்ததரம் அப்பனாஜவனம் ததா³ரம்மணம் அனுப³ந்த⁴தீதி. தத்த² ஹி ச²ப்³பீ³ஸதி மஹக்³க³த லோகுத்தர ஜவனேஸு யம்கிஞ்சி ஜவனம் அப்பனாவீதி²மோதரதீதி ஸம்ப³ந்தோ⁴. ஞாணரஹிதம் த்³விஹேதுகஜவனம் அதி²ரஸபா⁴வத்தா அப்பனாய அனந்தரூபனிஸ்ஸயோ நஹோதீதி வுத்தம் ஞாணஸம்பயுத்த காமாவசரஜவனானமட்ட²ன்னந்தி. பரிகம்மோபசாரானுலோமகோ³த்ரதுனாமேனாதி ஏத்த² இந்த்³ரியஸமதாதீ³ஹி பரிதோபா⁴கே³ஹி அப்பனா கரீயதி ஸஜ்ஜீயதி ஏதேனாதி பரிகம்மம். அப்பனம் உபேச்ச சரதீதி உபசாரோ. ஸமீபசாரோதி அத்தோ². ஸமீபசரணஞ்சேத்த² ஆஸன்னேகாலே அப்பனாவஹஸமத்த²பா⁴வேன த³ட்ட²ப்³ப³ம். யஸ்ஸ பவத்தியா அசிரம் காலம் அப்பனா ஸம்ப⁴வோ ஹோதீதி. அனுலோமந்தி அப்பனாபவத்தியா பச்சனீகத⁴ம்மவித⁴மனேன அப்பனாய அனுகூலம் அப்பனாஹிதம் அப்பனா வஹந்திச்சேவ அத்தோ², யஸ்ஸ பவத்தியா அப்பனா விப³ந்த⁴கோ பச்சனீ கோனாம நத்தீ²தி. க³மீயதி பு³ஜ்ஜீ²யதி அத்தோ² ஏதேனாதிவோ. அபி⁴தா⁴னம் பு³த்³தி⁴ச. தம் து³வித⁴ம்பி க³வம் தாயதி ரக்க²தீதி கோ³த்தம். பரித்த ஜாதிஸங்கா²தோ அன்வயோ. கோ³த்தம் அபி⁴பு⁴ய்யதி சி²ஜ்ஜதி ஏத்தா²தி கோ³த்ரபு⁴. ஏத்த² ச சத்தாரிபி ஜவனானி பரிகம்மஜவனானீதி வா உபசாரஜவனானிதிவா அனுலோமஜவனானீதிவா வுச்சந்தியேவ. கோ³த்ரபூ⁴தி பன பச்சி²மஸ்ஸேவ நாமம். இத⁴ பன சதுன்னம்பி நாமானம் ஸங்க³ஹணத்த²ம் பரிகம்மோ பசாரானுலோம கோ³த்ரபு⁴னாமேனாதி ஏவம் வுத்தந்தி த³ட்ட²ப்³ப³ம். ஏவஞ்ச கத்வா கஸ்மா பத²மமேவ பரிகம்மம்னாம. நனு இதரானிபி அப்பனம் பரிஸங்க²ரோந்தியேவாதி ஏவமாதி³கா சோத³னா அனோகாஸா ஹோதீதி. சதுக்க²த்தும் திக்க²த்துமேவவாதி சதுக்க²த்துமேவவா திக்க²த்துமேவவா. தத்த² பத²மேன ஏவ ஸத்³தே³ன பஞ்சமம் கோ³த்ரபு⁴ஸம்ப⁴வோ படிக்கி²த்தோ ஹோதி. ததா³ ஹி ஜவனம் பதிதம்னாம ஹோதி. பவேத⁴தி கம்பதி. காமகோ³த்தம் அபி⁴க்கமித்வா உபரிபூ⁴மந்தரப்பத்தியா பச்சயோ ப⁴விதும் ந ஸக்கோதீதி. து³தீயேன து³தீயம் கோ³த்ரபு⁴ ஸம்ப⁴வோ படிக்கி²த்தோ ஹோதி. ததா³ ஹி அலத்³தா⁴ஸேவனம் அனுலோமம் அத்தனோ அனந்தரே சித்தம் கோ³த்ரபு⁴பா⁴வம் பாபேதும் ந ஸக்கோதீதி. ஏதேனேவ பஞ்சமதோ பரம் சதுத்த²தோச ஓரம் அப்பனாய அஸம்ப⁴வோ ஸாதி⁴தோ ஹோதீதி. வாஸத்³தே³ன பன மந்த³பஞ்ஞஸ்ஸ சதுக்க²த்துமேவ. ந திக்க²த்தும். திக்க²பஞ்ஞஸ்ஸ திக்க²த்துமேவ. ந சதுக்க²த்துந்தி த³ஸ்ஸிதம் ஹோதி. அட்ட²ஸாலினியம் பன மந்த³மஜ்ஜி²ம மஹாபஞ்ஞவஸேன திதா⁴ பி⁴ந்தி³த்வா பஞ்சக்க²த்தும்பி பரிகம்மஜவனானம் உப்பத்தி அனுஞ்ஞாதா விய தி³ஸ்ஸதி. இதரட்ட²கதா²ஸு பன ஸுட்டு² விசாரேத்வா படிஸித்³த⁴த்தா ஸா ந க³ஹேதப்³பா³வாதி.

யம் பன விபா⁴வனியம்

‘‘ச²ட்ட²ம் ஸத்தமம் ப⁴வங்க³ஸ்ஸ ஆஸன்னபா⁴வேன பபாதாஸன்னபுரிஸோ விய அப்பனாவஸேன பதிட்டா²தும் ந ஸக்கோதீ’’தி வுத்தம்.

தத்த² ப⁴வங்க³ஸ்ஸ ஆஸன்னபா⁴வேனாதி ப⁴வங்க³பா⁴வஸ்ஸ ஆஸன்ன பா⁴வேனாதி அத்தோ². பஞ்சமஜவனதோ ஹி பட்டா²ய ஜவனஸந்தானம் அனுபுப்³பே³ன பரிக்கீ²ணஜவம் ஹோதி. ப⁴வங்க³பா⁴வத்தா²ய பரிணமதீதி. ஏவஞ்ச கத்வா பபாதாஸன்னபுரிஸோபமாபி உபபன்னா ஹோதீதி. நிருத்³தா⁴னந்தரமேவாதி நிருத்³தே⁴ அனந்தரமேவாதி பத³ச்சே²தோ³. கஸ்ஸ அனந்தரந்தி, அஞ்ஞஸ்ஸ அஸுதத்தா நிருத்³த⁴ஸ்ஸாதி அத்த²தோ லத்³த⁴மேவாதி. யஸ்மா பன அப்பனானாம உப்பஜ்ஜமானா சதுத்த²தோவா பஞ்சமதோவா பட்டா²ய உப்பஜ்ஜதி. ந ச²ட்ட²தோவா ஸத்தமதோவா. ஸாஹி வஸீபூ⁴தாபி சதுத்த² பஞ்சமேஸு உப்பத்திம் அலப⁴மானா ஸப்³ப³ஸோ நுப்பஜ்ஜதியேவ. லப⁴மானா பன தி³வஸம்பி நிரந்தரம் பவத்ததியேவ. தஸ்மா சதுத்த²ம்வா பஞ்சமம்வாதி இத³ம் ஆதி³மத்தனியமனத்த²ம் வுத்தந்தி த³ட்ட²ப்³ப³ம். தேனேவ ஹி அப்பனாவீதி²மோதரதீதி ச ததோபரம் அப்பனாவஸானே ப⁴வங்க³பாதோவ ஹோதீதி ச வக்க²தீதி. யதி³ பன பஞ்சமதோ பட்டா²ய ஜவனம் பதிதம் நாம ஹோதி. ஏவம் ஸதி கஸ்மா ததோ பட்டா²ய பதனகே²த்தே அப்பனாஜவனம் பவத்ததீதி. வுச்சதே, ஹத்தே² த²பிதலேட்³டு³ஸ்ஸ பதனகே²த்தம்னாம ஹத்த²தோ முத்தமத்தே ஹோதி. ஏவம் ஸந்தேபி ஹத்த²ப³லேன கி²பிதம் லேட்³டு³ தூ³ரம்பி க³ச்ச²தியேவ. ஏத்த² ச லேட்³டு³ஸ்ஸ ஜவோனாம ஹத்த²ஜவமூலகோ ஹோதி. ஹத்த²ஜவோச ஸரீரப³லமூலகோ. தத்த² லேட்³டு³ விய அப்பனாஜவனம் த³ட்ட²ப்³ப³ம். லேட்³டு³ஸ்ஸ பதனகே²த்தம் விய சதுத்த²தோ பச்சா²காலோ. ஹத்த²ஜவோவிய கோ³த்ரபு⁴ஜவோ. ஸரீரப³லம் விய புரிமானம் பரிகம்மஜவனானம் ப³லம் த³ட்ட²ப்³ப³ம். உத்தானஸேய்யஸ்ஸ பா³லதா³ரகஸ்ஸ ப³லம் விய ஆதி³கம்மிகவீதி²யம் காமஜவனானம் ப³லம். வுத்³தி⁴பத்தஸ்ஸ புரிஸஸ்ஸப³லம் விய ஸமாபத்திவீதி²யம் காமஜவனானம் ப³லம். யதா² ச பா³லதா³ரகேன கி²த்தம் லேட்³டு³ ஹத்த²தோ முத்தமத்தேபி பததி. ஏவம் ஆதி³கம்மிகவீதி²யம் அப்பனாஜவனம் ஏகவாரம் ஜவித்வா பததி. யதா²வுத்³தி⁴பத்தேன கி²த்தம் லேட்³டு³ பதனகே²த்தேபி அபதித்வா தூ³ரம்பி தூ³ரதரம்பி க³ச்ச²தி. ததா² ஸமாபத்திவீதி²யம் அப்பனாஜவனம் சிரம்பி சிரதரம்பி பவத்ததீதி. மூலடீகாயம் பன அப்பனாஜவனம் பதனகே²த்தே பவத்தம்பி பூ⁴மந்தரபத்தியாவா ஆரம்மணந்தரலத்³தி⁴யாவா பதிதம்னாம நஹோதீதி வுத்தம். ஏத்த² ஸியா, கஸ்மா பஞ்சமதோ பட்டா²ய ஜவனம் பதிதந்தி வுத்தம். நனு அபதி தத்தா ஏவ ஸுட்டு² ப³லவபா⁴வதோ ஸத்தமஜவனசேதனா ஸீக⁴ம் அனந்தரே ப⁴வே விபாகதா³யினீச ஆனந்தரியகம்மஞ்ச ஹோதி. மஜ்ஜே² பஞ்சசேதனா ததா² ப³லவபா⁴வாபா⁴வதோ சிரேன ததீயப⁴வாதீ³ஸு விபாகதா³யினீச ஹோந்தி, அனந்தரியபா⁴வஞ்ச ந க³ச்ச²ந்தீதி. நகோ² பனேதம் ஏவம் த³ட்ட²ப்³ப³ம். யதி³ ஹி ஸீக⁴ம் விபாகதா³னதாய ப³லவதீனாம ஸியா. ஏவம்ஸதி பட²மசேதனா ஸப்³ப³ப³லவதீனாம ஸியா. ஸா ஹி இமஸ்மிம்யேவ ப⁴வே விபாகம் தே³தீதி. இத³ம் பனேத்த² ஸன்னிட்டா²னம். ஏக வஸ்ஸஜீவீனம் திணருக்கா²னம் பரிணாமோவிய பத²மசேதனாய பரிணாமோ த³ட்ட²ப்³போ³. த்³விவஸ்ஸஜீவீனம் விய ஸத்தமசேதனாய. மஹாஸாலானம் விய மஜ்ஜி²மசேதனானந்தி. தத்த² ஏகவஸ்ஸஜீவினோ திணருக்கா²னாம அஸாரா ஹோந்தி. அஸாரத்தாச து³ப்³ப³லா அனத்³த⁴னியா அசிரட்டி²கா. தஸ்மா தேஸம் ஸீக⁴தரபரிணாமோ ஹோதி. தே ஹி ஸீக⁴தரம் ருஹந்தி. வுத்³தி⁴ம் விருள்ஹிம் ஆபஜ்ஜந்தி. ஸீக⁴தரம் புப்ப²ந்தி ப²லந்தி பதந்தி அந்தரதா⁴யந்தி. ஏகம் நிதா³க⁴ஸமயம் அதிக்கமிதும் நஸக்கோந்தி. து³தீயம் வஸ்ஸம் ந பாபுணந்தி. ஏத்த²ச நிதா³க⁴ஸமயோ விய மரணகாலோ வேதி³தப்³போ³. த்³விவஸ்ஸஜீவினோ பன தோ²கம் ஸாரபூ⁴தா ஹோந்தி. ஸாரபூ⁴தத்தாச தோ²கம் ப³லவந்தா அத்³த⁴னியா. ததோ யேவசதேஸம் சிரபரிணாமோ ஹோதி. தே ஹி பத²மம் வஸ்ஸம் ருஹந்தி வுத்³தி⁴ம் விருள்ஹிம் ஆபஜ்ஜந்தி. புப்பி²தும்வா ப²லிதும்வா நஸக்கோந்தி. து³தீயவஸ்ஸேஏவ புப்ப²ந்தி ப²லந்தி பதந்தி அந்தரதா⁴யந்தி. து³தீயம் பன நிதா³க⁴ ஸமயம் அதிக்கமிதும் ந ஸக்கோந்தி. ததீயம் வஸ்ஸம் ந பாபுணந்தி. மஹாஸாலா பன ஸப்³ப³ஸாரபூ⁴தா ஹோந்தி. ப³லவந்தா சிரதரட்டா²யினோ. தஸ்மா தே ஸணிகமேவ பரிணாமம் க³ச்ச²ந்தி. தே ஹி ஏக த்³வே வஸ்ஸானி வித³த்தி²ரதனமத்தாவ ஹோந்தி. வுத்³தி⁴ம் விருள்ஹிம் நாபஜ்ஜந்தி. புப்பி²தும்வா ப²லிதும்வா ந ஸக்கோந்தி. அதிசிரட்டா²யினோ பன ஹோந்தி. ச² பஞ்ச வஸ்ஸஸதானி ட²த்வாவ பதந்தி. ஏவமேவ பத²மஜவனசேதனா ஸப்³ப³ஸோ அலத்³தா⁴ஸேவனதாய அஸாரா அப³லா ஹோதி. விஸும் ஏகம் ப⁴வம் நிப்³ப³த்தேதும் ஏகஞ்ச மரணகாலம் அதிக்கமிதும் ந ஸக்கோதி. இமஸ்மிம் ப⁴வேஏவ விபச்சித்வாவா அவிபச்சித்வாவா கி²ய்யதி. ஸத்தம ஜவனசேதனா பன லத்³தா⁴ஸேவனதாய தோ²கம் ஸாரபூ⁴தா ஹோதி. விஸும் ஏகம் ப⁴வம் நிப்³ப³த்தேதும் ஸக்கோதி. ஸாரபூ⁴தத்தா யேவச ஸணிகமேவ பரிணாமம் க³ச்ச²தி. இமஸ்மிம் ப⁴வே விபச்சிதும் ந ஸக்கோதி. ப⁴வந்தரம் பத்வாவ விபச்சதி. பதிதஜவனேஸு பன அந்திம ஜவனதாய து³ப்³ப³லத்தா து³தீயம் மரணகாலம் அதிக்கமிதும் ந ஸக்கோதி. து³தீயப⁴வேஏவ விபச்சித்வாவா அவிபச்சித்வாவா கி²ய்யதி. அவஸேஸானம் பன பஞ்சன்னம் மஜ்ஜி²மசேதனானம் ஸுட்டு² லத்³தா⁴ஸேவனானம் ஸணிக தர பரிணதபா⁴வோ வுத்தனயானுஸாரேன வேதி³தப்³போ³தி. நம் கேவலஞ்சேத்த² திண ருக்கோ² பமாய பாணோபமாயாபி அயமத்தோ² தீ³பேதப்³போ³. யேஹிகேசி க³ப்³ப⁴ஸேய்யகா பாணா அப்பாயுகஜாதிகா ஹோந்தி. தே ஸீக⁴தரம் க³ப்³ப⁴வாஸம் வஸந்தி, ஸீக⁴தரம் விஜாயந்தி. அங்க³மங்கா³னிச நேஸம் ஸீக⁴தரம் தா²மக³தானி ஹோந்தி. இந்த்³ரியானிச ஸீக⁴தரம் பரிபாகக³தானி ஹோந்தி. தத³ஹேவ உட்ட²ஹித்வா க³ச்ச²ந்தி. கோ³சரம் க³ண்ஹந்தி. அத்தனோ அத்தனோ விஸயே ஸீக⁴தரம் விஞ்ஞுத்தம் ஆபஜ்ஜந்தி. ஸீக⁴தரம் ஜிண்ணா ஹோந்தி மரந்தி. தீ³கா⁴யுகஜாதிகானம் பன க³ப்³ப⁴வாஸாதீ³னி ஸப்³பா³னி ஸணிக மேவ ஸிஜ்ஜ²ந்தீதி. ஏத்த²ச மஹக்³க³த குஸலானி ஸத்தம ஜவனட்டா²னே டி²தானீதி வேதி³தப்³பா³னி. பரிகம்மஜவனானி ஹி சிரட்டி²திகட்டே²ன ஸுபக்க ஸாலித⁴ஞ்ஞஸதி³ஸானி. அப்பனாஜவனானி அசிரட்டி²திகட்டே²ன ஸுபக்க ஸாலிப⁴த்தஸதி³ஸானீதி தானிபி அசிரதரட்டி²திகானிஏவ ஹோந்தி. து³தீயே ப⁴வே விபச்சித்வாவா அவிபச்சித்வாவா கி²ய்யந்தி. இமஸ்மிம் ப⁴வேபி அப்பகேன காமச்ச²ந்தா³தி³னா பச்சனீகத⁴ம்மேன படிபா³ஹிதானி ஸப்³ப³ஸோ அவிபாகபா⁴வம் ஆபஜ்ஜந்தி. தஸ்மாதானி தேன பரியாயேன து³ப்³ப³லானி நாம ஹோந்தீதி.

யஸ்மா ச ஆனந்தரியகம்மானம் ப²லதா³னனியததானாம காலனியமேன வினா ந ஸம்ப⁴வதி. காலனியமோசனாம ஏகந்தேன ஸத்தமஜவனஸ்ஸேவ ஹோதி. ந மஜ்ஜி²மஜவனானம். தேஸஞ்ஹி அஸுகஸ்மிம் ப⁴வேஏவ விபச்சந்தீதி ஏவம் நியமோ நத்தீ²தி. தஸ்மா து³வித⁴ஸ்ஸ நியமஸ்ஸ ஸித்³த⁴த்தா ஏவ ஸத்தமஜவனசேதனாய அனந்தரியகம்மதா ஸித்³தா⁴ ஹோதி. ந ப³லவதரதாயாதி நிட்ட²மேத்த²க³ந்தப்³ப³ந்தி. மூலடீகாயம் பன நனுச ஸத்தமஜவனசேதனாய ப³லவதாய உபபஜ்ஜவேத³னீயபா⁴வோ ஹோதி ஆனந்தரியதாபீதி சோத³னம் ஸமுட்டா²பேத்வா தத்தா²யம் அதி⁴ப்பாயோ ஸியா. படிஸந்தி⁴யா அனந்தரபச்சயபா⁴வினோ விபாகஸந்தானஸ்ஸ அனந்தரபச்சயபா⁴வேன அந்திமஜவனசேதனாய ஸுஸங்க²தத்தாஸா ஸத்தமஜக³னசேதனா உபபஜ்ஜவேத³னீயா ஆனந்தரியகாச ஹோதி. ந அபதிதஜவனசேதனா விய ப³லவதாயாதி உத்தரம் வத³தி. தம் யுத்தம் விய ந தி³ஸ்ஸதி. ஏவஞ்ஹி ஸதி பத²மஜவனசேதனா கஸ்ஸ அனந்தரபச்சயபா⁴வேன ஸுஸங்க²தத்தா தி³ட்ட²த⁴ம்மவேத³னீயானாம ஜாதாதி வத்தப்³பா³ ஹோதீதி. மஹாடீகாயம் பன து³ப்³ப³லாபி அந்திமஜவன சேதனா ஸன்னிட்டா²னகிச்சவிஸேஸயுத்ததாய ப²லவிபச்சனே ஸத்திவிஸே ஸயுத்தா ஹோதீதி உபபஜ்ஜவேத³னீயா ஆனந்தரியகாச ஸா ஹோதீதி வுத்தம். யதா²ரஹந்தி தம் தம் புக்³க³லானுரூபம். யதா²பி⁴னீஹார வஸேனாதி தஸ்ஸ தஸ்ஸ பரிகம்மபா⁴வனா சித்தஸ்ஸ கஸிணனிமித்தா தீ³ஸுவா அனிச்சலக்க²ணாதீ³ஸுவா அபி⁴னீஹரணானுரூபம். அப்பனாவீதி²ந்தி அப்பனாபப³ந்த⁴ம். இத³ஞ்ச அனேகவாரே பவத்தானம் அப்பனாஜவனானம் ஸங்க³ஹணத்த²ம் வுத்தம். தேனேவாஹ ததோபரம் அப்பனாவஸானே ப⁴வங்க³பாதோவ ஹோதீதி. தத்த² ததோதி சதுத்த²தோவா பஞ்சமதோ வா. இமஸ்மிம் அத்தே² ஸதி பஞ்சமேவா ச²ட்டே²வா ஏகந்தேன ப⁴வங்க³பாதோ ஹோதீதி ஆபஜ்ஜதி. தஸ்மா புன அப்பனாவஸானேதி வுத்தம். ப⁴வங்க³பாதோவஹோதி. நத்தி² ததா³ரம்மணுப்பாதோ³தி அதி⁴ப்பாயோ.

விபா⁴வனியம் பன

‘‘கத்த²சி அப்பனாவாரே ஸத்தஜவன பரிபூரணத்த²ம் அப்பனாவஸானேபி காமாவசரஜவனப்பவத்திம் வத³ந்தானம் நிகாயந்தரிகானம் வாதோ³ இத⁴ ஏவஸத்³தே³ன நிவத்திதோ’’தி வுத்தம்.

தத்தா²தி தஸ்மிம் அப்பனாஜவனவாரே. நிரந்தரபவத்தானம் ஜவனானம் பி⁴ன்னவேத³னதானாம நத்தீ²தி வுத்தம் ஸோமனஸ்ஸஸஹக³த ஜவனா நந்தரந்திஆதி³.

[132] விபா⁴வனியம் பன

‘‘பி⁴ன்னவேத³னானம் அஞ்ஞமஞ்ஞம் ஆஸேவனபச்சயபா⁴வஸ்ஸ அனுத்³த⁴டத்தா’’திகாரணம் வுத்தம். தம் ந ஸுந்த³ரம்.

ந ஹி இத⁴ ஆஸேவனபச்சயபா⁴வோ பமாணம். கஸ்மா, ஆஸேவன பச்சனிகானம் ப²லஜவனானம்பி பரிகம்மஜவனேஹி அஞ்ஞமஞ்ஞஞ்ச அபி⁴ன்னவேத³னதாய இச்சி²தப்³ப³த்தாதி. பாடிகங்கி²தப்³பா³தி அவஸ்ஸம் இச்சி²தப்³பா³.

[133] விபா⁴வனியம் பன

‘‘பஸம்ஸிதப்³பா³’’தி வுத்தம். தம் ந ஸுந்த³ரம்.

ந ஹி தாதி³ஸோ ஸம்வண்ணனாபதே³ஸோ தி³ஸ்ஸதீதி. அரஹத்த ப²லே மக்³க³வீதி²யம் மக்³க³குஸலானந்தரம் பவத்தமானேபி அயம் புப்³பா³பர நியமோ பரிகம்மஜவனேஹி ஏவ ஸஹ அப்பனாஜவனானம் ஹோதீதி கத்வா க்ரியஜவனானந்தரம் அரஹத்தப²லஞ்சாதி வுத்தம். ஸுக²புஞ்ஞம்ஹா பரம் த்³வத்திம்ஸ அப்பனாஜவனானி ஸம்ப⁴வந்தி. உபேக்க²கா புஞ்ஞம்ஹா பரம் த்³வாத³ஸ, ஸுகி²தக்ரியதோ பரம் அட்ட². உபேக்க²கா க்ரியதோ பரம் ச² அப்பனாஜவனானி ஸம்ப⁴வந்தீதி யோஜனா. தத்த² த்³வத்திம்ஸாதி அரஹத்தப²லஸப்³ப³பஞ்சமஜ்ஜா²னவஜ்ஜிதானம் சதுன்னம் ரூபகுஸலானம் ஸோளஸன்னம் மக்³க³குஸலானம் த்³வாத³ஸன்னம் ஹேட்டி²மப²லானஞ்ச வஸேன த்³வத்திம்ஸ. த்³வாத³ஸாதி பஞ்சமஜ்ஜா²னிகானம் ரூபாரூபமக்³க³குஸலானம் ஹேட்டி²மப²லானஞ்ச வஸேன த்³வாத³ஸ. அட்டா²தி பஞ்சமஜ்ஜா²னவஜ்ஜிதானம் சதுன்னம் ரூபக்ரியானம் சதுன்னம் அரஹத்தப²லானஞ்ச வஸேன அட்ட². சா²தி பஞ்சமஜ்ஜா²னிகானம் பஞ்சன்னம் ரூபாரூபக்ரியானம் அரஹத்தப²லஸ்ஸச வஸேன ச². புது²ஜ்ஜனானம் ஸேக்கா²னஞ்ச காமபுஞ்ஞதிஹேதுதோ பரம் சதுசத்தாலீஸ அப்பனா ஸம்ப⁴வந்தி. வீதராகா³னம் அரஹந்தானம் திஹேதுகாமக்ரியதோ பரம் சுத்³த³ஸ அப்பனா ஸம்ப⁴வந்தீதி யோஜனா.

139. ஸப்³ப³தா²பீதி அதிமஹந்தாதி³னா ஸப்³ப³பகாரேனபி. ஏத்தா²தி ஏதேஸு யதா²வுத்தேஸு பஞ்சத்³வார மனோத்³வாரேஸு. ஸப்³ப³த்தா²பி பன அனிட்டே² திவா பாடோ². தேனேவ டீகாஸு ஸப்³ப³த்தா²பீதி பஞ்சத்³வார மனோத்³வாரேபீதி வுத்தம். இச்சி²தப்³ப³ந்தி இட்ட²ம். கேன இச்சி²தப்³ப³ந்தி. லோகியமஹாஜனேன. தத்த² ச அதிஉக்கட்டே² அதிது³க்³க³தேச ஜனே அக³ஹேத்வா மஜ்ஜி²மகேன மஹாஜனேன. ஏவஞ்ஹி ஸதி இட்டா²னிட்டா²னம் ஸுட்டு²வவத்தா²னம் ஹோதீதி அட்ட²கதா²யம் வுத்தம். யஸ்மிம் ஆரம்மணேகுஸல விபாகம் உப்பஜ்ஜதி, ததே³வ இட்ட²ம்னாம. யஸ்மிம் பன அகுஸலவிபாகம் உப்பஜ்ஜதி, ததே³வ அனிட்ட²ம்னாம. ந ஹி ஸக்கா இட்ட²ம்வா அனிட்ட²ம்வா ஆரம்மணம் விபாகசித்தம் வஞ்சேதுந்திச. அபிச த்³வாரவஸேனாபி இட்டா²னிட்ட²தா வேதி³தப்³பா³தி ச வுத்தம். தஸ்மா இந்த்³ரியானிந்த்³ரியப³த்³த⁴ஸந்தானக³தே ஏகே கஸ்மிம் ரூபகலாபே வண்ணாதீ³ஸு ரூபேஸு கிஞ்சி இட்ட²ம் ஹோதி. கிஞ்சி அனிட்ட²ம். கதா³சி இட்ட²ம் ஹோதி. கதா³சி அனிட்ட²ம், தத்த² கிஞ்சி இட்ட²ம் ஹோதி கிஞ்சி அனிட்ட²ந்தி யதா² கிம்ஸ்மிம்சி ஏகஸ்மிம் புப்பே² வண்ணோ இட்டோ². க³ந்தோ⁴ அனிட்டோ², ரஸோ அனிட்டோ², போ²ட்ட²ப்³போ³ அனிட்டோ², க²ரஸம்ப²ஸ்ஸோ. கிம்ஸ்மிம்சி வண்ணோபி இட்டோ², க³ந்தோ⁴பி இட்டோ², ரஸாத³யோ அனிட்டா²யேவ. ததா² பு³த்³த⁴ஸ்ஸ ஸரீரக³தேபி ஏகஸ்மிம் கலாபே வண்ணோ இட்டோ² ஹோதி. க³ந்தோ⁴ அனிட்டோ². மதகண்ஹஸுனக²ஸ்ஸ உத்³து⁴மாதஸரீரேபி வண்ணோ இட்டோ² ஹோதி. க³ந்தோ⁴ அனிட்டோ². ஸோ ஹி வண்ணோ யதி³ நிவத்த²பாருதஸ்ஸ வத்த²ஸ்ஸ ப⁴வேய்ய. தம் வத்த²ம் மஹக்³க⁴ம் ஹோதீதி. கதா³சி இட்ட²ம் கதா³சி அனிட்ட²ந்தி அக்³கி³னாம ஹேமந்தே இட்டோ² ஸுக²விபாகஸ்ஸ பச்சயோ. கி³ம்ஹே அனிட்டோ² து³க்க²விபாகஸ்ஸ பச்சயோ. ஸீதுத³கம் கி³ம்ஹே இட்ட²ம். ஹேமந்தே அனிட்ட²ம். ததா² ஸுக² ஸம்ப²ஸ்ஸம் வத்த²ம் பகதிகாயே இட்ட²ம் ஹோதி. வணம் பத்வா அனிட்ட²ம். தேனவா ஸணிகம் பு²ஸந்தஸ்ஸ இட்ட²ம், கா³ள்ஹம் பு²ஸந்தஸ்ஸ அனிட்ட²ந்தி. நஇட்ட²ந்தி அனிட்ட²ம். தஸ்மிம் அனிட்டே². இட்டே²தி இட்ட²மஜ்ஜ²த்தே, குஸலவிபாகானி பஞ்சவிஞ்ஞாண ஸம்படிச்ச²ன ஸந்தீரண ததா³ரம்மணானீதி ஸம்ப³ந்தோ⁴. ஸந்தீரண ததா³ரம்மணானி சேத்த² உபேக்கா²ஸஹக³தானிஏவ வேதி³தப்³பா³னி. தேனேவாஹ அதிஇட்டே²பனாதிஆதி³. தத்த² அபி⁴இட்டே²தி ஸுவண்ண ரஜத மணிவண்ணாதி³கே ஹரிதாலவண்ணாதி³கே கோஸேய்ய வத்த²வண்ணாதி³ கே தே³வச்ச²ராவண்ணாதி³கேச அதிவிய லோகியமஹாஜனேன இச்சி²தப்³பே³ ச²ளாரம்மணே. யஸ்மா சேத்த² அனிட்டா²ரம்மண ஸமாயோகோ³ அகுஸலகம்மஸ்ஸேவ விபச்சனோகாஸோ ஹோதி. இட்டா²ரம்மணஸமாயோகோ³ச குஸலகம்மஸ்ஸேவ, தஸ்மா அனிட்டே² அகுஸலவிபாகானேவ. இட்டே² குஸலவிபாகானேவாதி அயம் நியமோ ஸித்³தோ⁴. வேத³னானியமோ பன ஆதா³ஸே முக²னிமித்தஸ்ஸ விய அத்தனோ உஸ்ஸாஹ ப³லேன வினா கேவலம் கம்மப³லேன நிப்³ப³த்தானம் விபாகானம் பரிது³ப்³ப³லத்தா ததா² ததா² கப்பேத்வா பகப்பேத்வா க³ஹணா பா⁴வதோ யதா²ரம்மணமேவ ஸித்³தோ⁴ ஹோதீதி த³ட்ட²ப்³ப³ம். ந கேவலஞ்ச விபாகானம் ஏவ. அத²கோ² விபல்லாஸரஹிதே கி²ணாஸவஸந்தானே பவத்தானம் காமக்ரியஜவனானம் வியதா²ரம்மணமேவ வேத³னாயோகோ³ ஹோதீதி அதி⁴ப்பாயேன வுத்தம் தத்தா²பி ஸோமனஸ்ஸஸஹக³த க்ரியஜவனாவஸானே திஆதி³. தத்தா²பீதி தேஸு விபாகேஸுபி. ஸோமனஸ்ஸஸஹக³த க்ரிய ஜவனா வஸானேதி பு³த்³த⁴வண்ணாதி³கே அதிஇட்டா²ரம்மணே பவத்தானம் ஸோமனஸ்ஸ ஸஹக³த க்ரியஜவனானம் அவஸானே. உபேக்கா²ஸஹக³த க்ரிய ஜவனா வஸானேதி அனிட்டே² இட்ட²மஜ்ஜ²த்தேச பவத்தானம் உபேக்கா²ஸஹக³தக்ரியஜவனானம் அவஸானே. அயஞ்ச க்ரியஜவனாவஸானே ததா³ரம்மணனியமோ அட்ட²கதா²யம்பி வுத்தோயேவ. வுத்தஞ்ஹி தத்த² காமாவசர திஹேதுக ஸோமனஸ்ஸ ஸஹக³தக்ரியத்³வயம் ததா³ரம்மணவஸேன பஞ்சன்னம் ஸோமனஸ்ஸஸஹக³த விபாகானம் அனந்தரபச்சயோதிஆதி³. இத³ஞ்ச பகதினீஹாரேன பவத்தானம் க்ரியஜவனானம் வஸேன வுத்தம். ததா² ரூபேன பன சித்தாதிஸங்கா²ரேன பவத்தானம் க்ரியஜவனானம் இட்டே²பி உபேக்கா²வேத³னாயோகோ³ அனிட்டே²பி ஸோமனஸ்ஸ வேத³னாயோகோ³ ஹோதியேவ. யதா²ஹ –

கத²ஞ்சானந்த³ அரியோ ஹோதி பா⁴விதிந்த்³ரியோ. இதா⁴னந்த³ பி⁴க்கு²னோ சக்கு²னா ரூபம் தி³ஸ்வா உப்பஜ்ஜதி மனாபம் உப்பஜ்ஜதி அமனாபம். உப்பஜ்ஜதி மனாபாமனாபம். ஸோ ஸசே ஆகங்க²தி படிகூலே அப்படிகூலஸஞ்ஞீ விஹரேய்யந்தி. அப்படிகூலஸஞ்ஞீ தத்த² விஹரதி. ஸசே ஆகங்க²தி அப்படிகூலே படிகூல ஸஞ்ஞீ விஹரேய்யந்தி. படிகூலஸஞ்ஞீ தத்த² விஹரதீதி.

ஸப்³ப³ம் உபரிபண்ணாஸகே இந்த்³ரியபா⁴வனாஸுத்தம் ஆஹரிதப்³ப³ம். தத்த² உப்பஜ்ஜதி மனாபம் உப்பஜ்ஜதி அமனாபம். உப்பஜ்ஜதி மனாபாமனாபந்தி ஏதேன கீ²ணாஸவானம் காமக்ரியஜவனானம் பகதினீஹாரேன இட்டே² ஸோ மனஸ்ஸயோகோ³ அனிட்டே² உபேக்கா² யோகோ³ த³ஸ்ஸிதோ ஹோதி. ஸோஸசே ஆகங்க²தி படிகூலே அப்படிகூலஸஞ்ஞீ விஹரேய்யந்தி. அப்படிகூலஸஞ்ஞீ தத்த² விஹரதீதிஆதி³னா பன தேஸம் ததா²ரூபே சித்தாபி⁴ஸங்கா²ரே ஸதி இட்டே²பி உபேக்கா²யோகோ³ அனிட்டே²பிஸோமனஸ்ஸ யோகோ³ வுத்தோ ஹோதீதி. யம் பன கீ²ணாஸவானம் ஸததவிஹாரஸுத்தே இத⁴ பி⁴க்கு²னா ரூபம் தி³ஸ்வா நேவ ஸுமனோ ஹோதி. ந து³ம்மனோ. உபேக்க²கோ விஹரதி ஸதோ ஸம்பஜானோதிஆதி³னா ச²ஸுத்³வாரேஸு ஸோமனஸ்ஸ படிக்கி²பனம் வுத்தம். தம்பி தேஸம் ததா² ரூபசித்தாபி⁴ஸங்கா²ரபா³ஹுல்லவஸேன வுத்தந்தி க³ஹேதப்³ப³ம். யஸ்மா வா கீ²ணாலவாபி பு³த்³த⁴ரூபத³ஸ்ஸனாதீ³ஸு பதா⁴னஸாருப்பட்டா²னத³ஸ்ஸனாதீ³ஸு ச ஸோமனஸ்ஸிதா ஹோந்தியேவ. தஸ்மா கேவலம் ராகா³தி³வத்து² பூ⁴தானி ரூபாரம்மணாதீ³னி இட்டா²னிட்டா²னி ஸந்தா⁴ய இத³ம் வுத்தந்திபி யுத்தம். ஏத்த² ச. கத²ம் படிகூலே அப்படிகூலஸஞ்ஞீ விஹரதி. அனிட்ட²ஸ்மிம் வத்து²ஸ்மிம் மேத்தாயவா ப²ரதி. தா⁴துதோவா உபஸம்ஹரதி. ஏவம் படிகூலே அப்படிகூலஸஞ்ஞீ விஹரதி. கத²ம் அப்படிகூலே படிகூலஸஞ்ஞீ விஹரதி இட்ட²ஸ்மிம் வத்து²ஸ்மிம் அஸுபா⁴யவா ப²ரதி. அனிச்சதோ வா உபஸம்ஹரதி. ஏவம் அப்படிகூலே படிகூலஸஞ்ஞீ விஹரதீதிஆதி³னா படிஸம்பி⁴தா³மக்³க³னயேன இத⁴ ததா²ரூபோ சித்தாபி⁴ஸங்கா²ரோ நாம வேதி³தப்³போ³. அபரே பன வத³ந்தி-கீ²ணாஸவா யதா³ தே³வச்ச²ரா வண்ணாதி³கம் அதிஇட்டா²ரம்மணம் ஆபாதமா க³ச்ச²தி. ததா³ தத்த² அஸுபா⁴யவாப²ரந்தி. அனிச்சதோவா உபஸம்ஹரந்தி தத்த² அனிட்ட²பூ⁴தம் அஸுப⁴ லக்க²ணம்வா அனிச்சலக்க²ணம்வா உபேக்கா² க்ரிய ஜவனானம் ஆரம்மணம் ஹோதி. ந அதிஇட்டா²ரம்மணபூ⁴தம் தே³வச்ச²ராவண்ணாதி³கம்.

ததா² யதா³ குதி⁴ப⁴குட்ட²ஸரீராதி³கம் அதிஅனிட்டா²ரம்மணம் ஆபாதமாக³ச்ச²தி. ததா³ தத்த² மேத்தாயவா ப²ரந்தி. தா⁴துதோவா உபஸம்ஹரந்தி. தத்த² இட்ட²பூ⁴தம் அவேரதாவாதி³லக்க²ணமேவ ஸோமனஸ்ஸக்ரியஜவனானம் ஆரம்மணம் ஹோதி. ந அதிஅனிட்ட²பூ⁴தம் குதி⁴த குட்ட²ஸரீராதி³கம். தஸ்மா தானி ஜவனானி காமவிபாகானிவிய ஸப்³ப³தா³பி ஆரம்மணானுரூபமேவ வேத³னாயுத்தானி ஹோந்தீதி. தம் நயுஜ்ஜதி. ந ஹி தானி லக்க²ணானி தே³வச்ச²ராவண்ணாதீ³ஹி வினா விஸும் லப்³ப⁴ந்தி. தேஹி பன ஸஹேவ லப்³ப⁴ந்தி. தஸ்மா யதா² ஆனிஸம்ஸத³ஸ்ஸனேன பா⁴வனாய புப்³பா³பரியவிஸேஸத³ஸ்ஸனேனச உத்³து⁴மாதகாதீ³ஸு அதி அனிட்டே²ஸுபி ஸோமனஸ்ஸுப்பத்தி அட்ட²கதா²யம் வுத்தா. யதா²ச மஹா மோக்³க³லானத்தே²ரஸ்ஸ பு³த்³த⁴ஸுபு³த்³த⁴தாத³ஸ்ஸனேன அத்தஸம்பத்தித³ஸ்ஸனேனச அனிட்ட²பூ⁴தேபி அட்டி²கங்கலிகபேதரூபே ஸோமனஸ்ஸுப்பத்தி பாளியம் வுத்தா. யதா² ச மஹாகஸ்ஸபத்தே²ரஸ்ஸ ததா²ரூபேன சித்தாபி⁴ ஸங்கா²ரேன குட்டி²னோ ஹத்த²தோ லத்³தே⁴ அனிட்ட²பூ⁴தே பூதிகும்மாஸேபி ஸோமனஸ்ஸுப்பத்தி அட்ட²கதா²யம் வுத்தா. ஏவமேவம் இத⁴பி அஸுப⁴ப²ரணாதி³கோ சித்தாபி⁴ஸங்கா²ரோ அதிஇட்டே² உபேக்கா²ஜவனானம் அதிஅனிட்டே²ச ஸோமனஸ்ஸஜவனானம் உப்பத்தியா பச்சயோ ஹோதீதி த³ட்ட²ப்³ப³ம். அயஞ்ஹி ஆரம்மணானம் இட்டா²னிட்ட²பா⁴வோனாம லோகியமஹாஜனானம் இச்சா²வஸேன ஸித்³தோ⁴ ஹோதி அக³ம்பீ⁴ரோ விபல்லாஸத⁴ம்மானம் கிலேஸானஞ்ச வத்து²பூ⁴தோ. யதா²ஹ-தத்த² கதமம் ரூபம் ஹீனம். யம் ரூபம் தேஸம் தேஸம் ஸத்தானம் உஞ்ஞாதம் அவஞ்ஞாதந்திஆதி³. ஏத்த² ஹி தேஸம் தேஸம் ஸத்தானந்தி ஏதேன ஆரம்மணத⁴ம்மானம் இட்டா²னிட்ட²பா⁴வோ நாம லோகியமஹாஜன ஸம்முதியா ஸித்³தோ⁴தி த³ஸ்ஸேதி. தஸ்மா யஞ்ச அப்பஹீனவிபல்லாஸானம் லோகியமஹாஜனானம் தே³வச்ச²ராவண்ணா தீ³ஸு அதி இட்டே²ஸு அதிஇட்டா²காரதோ க³ஹணம். யஞ்ச பு³த்³த⁴வண்ணா தீ³ஸு அதிஇட்டே²ஸு அனிட்டா²காரதோ க³ஹணம். தது³ப⁴யம்பி தேஸம் விபல்லாஸவஸேனேவ ஹோதி. யம்பன பஞ்ஞவந்தானம் பு³த்³த⁴ஸாவகானம் தே³வச்ச²ராவண்ணாதீ³ஸு அனிட்டா²காரதோ க³ஹணம். யஞ்ச பு³த்³த⁴வண்ணாதீ³ஸு அதிஇட்டா²காரதோ க³ஹணம். தது³ப⁴யம்பி பஞ்ஞாப³லேனேவ ஹோதீதி வேதி³தப்³ப³ம்.

[134] யம் பன விபா⁴வனியம்

‘‘குஸலாகுஸலானம் பன அப்பஹீனவிபல்லாஸேஸு ஸந்தானேஸு பவத்தியா அதிஇட்டே²பி இட்ட²மஜ்ஜ²த்தஅனிட்டா²காரதோ அனிட்டே²பி இட்ட²இட்ட²மஜ்ஜ²த்தாகாரதோ க³ஹணம் ஹோதீதி’’ வுத்தம்.

யஞ்ச தத்த²

‘‘கீ²ணாஸவானம் சித்தவிபல்லாஸாபா⁴வேன க்ரியஜவனானிபி யதா²ரம்மணமேவ பவத்தந்தீ’’தி வுத்தம். தம் விசாரேதப்³ப³மேவ.

யே ஹி தே த⁴ம்ம சக்கு²ரஹிதா ஹோந்தி. தேயேவ விபல்லாஸ வஸேன சித்தவஸானுகா³ ஆரம்மணவஸானுகா³ச ஹோந்தீதி குஸலா குஸலானியேவ யேபு⁴ய்யேன யதா²ரம்மணம் பவத்தந்தி. ந பன க்ரிய ஜவனானி. ந ஹி கீ²ணாஸவா லோகியமஹாஜனஸம்மதேஸு இட்டா²னிட்டே²ஸு சித்தவஸானுகா³ ஆரம்மணவஸானுகா³ச ஹோந்தீதி. யதா²ஹ –

ரூபா ஸத்³தா³ க³ந்தா⁴ ரஸா, போ²ட்ட²ப்³பா³ச மனோரமா;

இட்ட²த⁴ம்மா அனிட்டா²ச, ந பவேத⁴ந்தி பண்டி³தாதி.

தஸ்மா ஸோமனஸ்ஸ க்ரிய ஜவனானந்தரம்பி ததா³ரம்மணானி ஸோமனஸ்ஸுபேக்கா² வேத³னாயுத்தானி ஏவ ஸியும். ததா² உபேக்கா²க்ரியஜவனானந்தரம்பீதி. மூலடீகாயம் பனேத்த² பட்டா²னே-குஸலாகுஸலே நிருத்³தே⁴ விபாகோ ததா³ரம்மணதாஉப்பஜ்ஜதீதி குஸலகுஸலானந்தரம் ஏவ ததா³ரம்மணம் வுத்தம். ந அப்³யாகதானந்தரம் நச கத்த²சி க்ரியானந்தரம் ததா³ரம்மணஸ்ஸ வுத்தட்டா²னம் தி³ஸ்ஸதி. விஜ்ஜமானேச தஸ்மிம் அவசனே காரணம்னத்தி². ப⁴வங்க³ஞ்சனாமேதம் நதி³ஸோதோவிய படிஸோதகா³மினாவம் ஸவிப்பா²ரிகம் ஏவஜவனம் அனுப³ந்த⁴தீதி யுத்தம். ந பன ச²ளங்கு³பேக்கா²வதோ கீ²ணாஸவஸ்ஸ ஸந்தவுத்திக்ரியஜவனம். தஸ்மா க்ரியஜவனானந்தரம் ததா³ரம்மணவிதா⁴னம் உபபரிக்கி²தப்³ப³ந்தி வுத்தம். பட்டா²னே பன குஸலத்திகே பஞ்ஹா வாரே ஆரம்மணபச்சயவிப⁴ங்கே³ தீஸு அப்³யாகதபதா³வஸானவாரேஸு ஸேக்க²புது²ஜ்ஜனானம் ததா³ரம்மணமேவ பதா⁴னம் ஹோதி. ந குஸலா குஸலஜவனம். தஸ்மா த்³வீஸுபி வாரேஸு ஸேக்கா²வா புது²ஜ்ஜனாவா குஸலம் அனிச்சதோ விபஸ்ஸந்தி குஸலம் அஸ்ஸாதே³ந்தீதிஆதி³கம் வத்வா புனச குஸலே நிருத்³தே⁴ அகுஸலே நிருத்³தே⁴ விபாகோ ததா³ரம்மணதா உப்பஜ்ஜதீதி வுத்தம். அரஹதோ பன ஜவனம்பி ததா³ரம்மணம்பி பதா⁴ன மேவ ஹோதி. தஸ்மா அரஹா குஸலம் அனிச்சதோ து³க்க²தோ அனத்ததோ விபஸ்ஸதி இச்சேவ வுத்தம். நபன வுத்தம் க்ரியாப்³யாகதே நிருத்³தே⁴ விபாகோ ததா³ரம்மணதா உப்பஜ்ஜதீதி. யதி³ சேதம் வுச்சேய்ய ததா³ரம்மணமேவ பதா⁴னம் கதம்னாம ஸியா. அவுத்தேபிச தஸ்மிம் விபஸ்ஸதீதி இமினா ததா³ரம்மணம்பி க³ஹிதமேவ ஹோதீதி. தஸ்மா யம் வுத்தம் பட்டா²னே குஸலா.ல. உப்பஜ்ஜதீதி குஸலாகுஸலானந்தரமேவ ததா³ரம்மணம் வுத்தம். ந அப்³யாகதானந்தரந்திச. விஜ்ஜமானேச தஸ்மிம் அவசனே காரணம் நத்தீ²தி ச வுத்தம். தம் ந யுஜ்ஜதியேவ. அனந்தரபச்சயவிப⁴ங்கே³ஸு பன குஸலம் வுட்டா²னஸ்ஸ அகுஸலம் வுட்டா²னஸ்ஸ க்ரியம் வுட்டா²னஸ்ஸாதிச விபாகத⁴ம்மத⁴ம்மா க²ந்தா⁴ வுட்டா²னஸ்ஸ நேவவிபாக நாவிபாகத⁴ம்மத⁴ம்மா க²ந்தா⁴ வுட்டா²னஸ்ஸாதிச ஏவமாதி³னா க்ரியஜவனானந்தரம் ப⁴வங்கே³ன ஸஹ ததா³ரம்மணஸ்ஸபி வுட்டா²னனாமேன வுத்தட்டா²னம் தி³ஸ்ஸதியேவ. தஸ்மா யஞ்ச வுத்தம் ந கத்த²சி க்ரியானந்தரம் ததா³ரம்மணஸ்ஸ வுத்தட்டா²னம் தி³ஸ்ஸதீதி. தம்பி ந யுஜ்ஜதியேவ. நச ச²ளங்கு³பேக்கா²வ தோ கீ²ணாஸவஸ்ஸ ஸந்தவுத்திபி க்ரியஜவனம் ஸவிப்பா²ரிகம் ந ஹோதி. குஸலஜவனஸ்ஸ விய தஸ்ஸபி ஓளாரிககாயவசீ பயோக³ஸமுட்டா² பனதோதி.

[135] விபா⁴வனியம் பன

டீகாவாத³ஸ்ஸ உத்தரம் வத³ந்தேன யம் வுத்தம் ‘‘யதி³ அப்³யாகதா நந்தரம்பி ததா³ரம்மணம் வுச்சேய்ய. பரித்தாரம்மணே வோட்ட²ப்³ப³னா நந்தரம்பி தஸ்ஸ பவத்திம் மஞ்ஞேய்யுந்தி க்ரியஜவனானந்தரம் ததா³ ரம்மணம் ந வுத்த’’ந்தி. தம் ந ஸுந்த³ரம்.

ந ஹி பட்டா²னே இமஸ்மிம் வுத்தே இத³ம்னாம மஞ்ஞேய்யுந்தி அவுத்தம்னாம அத்தி². ந ச அரஹா குஸலம் அனிச்சதோ து³க்க²தோ அனத்ததோ விபஸ்ஸதீதிஆதி³னா விபஸ்ஸனாசாரவஸேன வுத்தட்டா²னே பஞ்சத்³வாரிக பரித்தாரம்மண வாரபஸங்கோ³ அத்தீ²தி. தோ³மனஸ்ஸ.ல. உபேக்கா² ஸஹக³தானேவ ப⁴வந்தி. ந ஸோமனஸ்ஸஸஹக³தானி. கஸ்மா, ஸோமனஸ்ஸ தோ³மனஸ்ஸானம் அஞ்ஞமஞ்ஞவிருத்³த⁴த்தா. தேனேவ ஹி பட்டா²னே தேஸம் இதரீதரானந்தரபச்சயதா நவுத்தாதி. ஏத்த²ச க்ரியஜவன தோ³மனஸ்ஸஜவனான மேவ அனந்தரம் ததா³ரம்மண நியமம் த³ஸ்ஸேந்தேன தே²ரேன இதரேஸம் குஸலாகுஸலஜவனானம் அனந்தரம் பன தாதி³ஸோ நியமோ நத்தீ²தி த³ஸ்ஸிதோ ஹோதி. தஸ்மா அட்ட²ன்னம் காமகுஸலானம் அட்ட²ன்னம் லோப⁴மூலானம் த்³வின்னம் மோஹமூலானந்தி அட்டா²ரஸன்னம் ஜவனானம் அனந்தரம் ஆரம்மணானுரூபம் ஸப்³பா³னி ததா³ரம்மணானி ப⁴வங்கா³னி ச பவத்தந்தி. யேபு⁴ய்யேன பன அகுஸலஜவனானந்தரம் ததா³ரம்மணம் அஹேதுகமேவ. த்³விஹேதுகஜவனானந்தரம் த்³விஹேதுகமேவ. திஹேதுகஜவனானந்தரம் திஹேதுகமேவாதி அயம் யேபு⁴ய்யனியமோ. யஸ்ஸ பன த்³விஹேதுகானிவா திஹேதுகானிவா குஸலஜவனானி ப³ஹுலம் ஸமுதா³சரந்தி. தஸ்ஸ கதா³சி அகுஸலஜவனேஸு ஜவிதேஸு அகுஸலானந்தரம்பி த்³விஹேதுகானிவா திஹேதுகானிவாததா³ரம்மணானி பவத்தந்தி. யஸ்ஸ அகுஸலஜவனானி ப³ஹுலம் ஸமுதா³சரந்தி. தஸ்ஸ கதா³சி த்³விஹேதுகேஸுவா திஹேதுகேஸுவா குஸலஜவனேஸு ஜவிதேஸு குஸலானந்தரம்பி அஹேதுகததா³ரம்மணானி பவத்தந்தி. வுத்தஞ்ஹேதம் பட்டா²னே-அஹேதுகே க²ந்தே⁴ அனிச்சதோ.ல. தோ³மனஸ்ஸம் உப்பஜ்ஜதி. குஸலாகுஸலே நிருத்³தே⁴ ஸஹேதுகோ விபாகோ ததா³ ரம்மணதா உப்பஜ்ஜதி. அஹேதுகோ விபாகோ ததா³ரம்மணதா உப்பஜ்ஜதீதி. ஏகானிஹி ததா³ரம்மணானினாம படிஸந்தி⁴ஜனகேன ஏகேன கம்மேன நிப்³ப³த்தானிபி நானாவீதீ²ஸு நானாப்பகாரானி ஹோந்தி. பவத்தி விபாகஜனகேஹி பன நானாகம்மேஹி நிப்³ப³த்தே²ஸு வத்தப்³ப³மேவ நத்தீ²தி. தஸ்மாதி யஸ்மா தோ³மனஸ்ஸானந்தரம் ஸோமனஸ்ஸுப்பத்தி நாம நத்தி², தஸ்மா. ஸோமனஸ்ஸபடிஸந்தி⁴கஸ்ஸாதி சதூஸு ஸோமனஸ்ஸமஹா விபாகேஸு ஏகமேகேன க³ஹித படிஸந்தி⁴கஸ்ஸ ஸத்தஸ்ஸ. ததா³ரம்மணஸம்ப⁴வோதி ததா³ரம்மணுப்பத்தி காரணம். ததா³ரம்மணுப்பத்தி யேவவா. யம்கிஞ்சீதி இட்டா²னிட்ட²பூ⁴தேஸு ரூபாரம்மணாதீ³ஸு யம்கிஞ்சி. பரிசிதபுப்³ப³ந்தி இமஸ்மிம் ப⁴வேயேவ தங்க²ணதோ புரிமக²ணேஸு க³ஹண ப³ஹுலதா வஸேன பரிசிதம். அபி⁴ண்ஹஸேவிதந்தி அத்தோ². பரித்தாரம்மணந்தி பரித்தத⁴ம்மபூ⁴தம் ஆரம்மணம். ஆரப்³பா⁴தி ஆலம்பி³த்வா. உபேக்கா²ஸஹக³த ஸந்தீரணந்தி த்³வீஸு உபேக்கா²ஸஹக³தஸந்தீ ரணேஸு இட்டே² குஸலவிபாகம் அனிட்டே² அகுஸலவிபாகம் உபேக்கா² ஸஹக³த ஸந்தீரணம். யேஸம் பன பகதியா இதரானி சத்தாரி உபேக்கா²ஸஹக³த விபாகானி ப³ஹுலம் பவத்தந்தி. தேஸம் தானிபி ஆக³ந்துகப⁴வங்க³ம் நஹோந்தீதி ந வத்தப்³பா³னி. அட்ட²கதா²யம் பன மஹாத⁴ம்மரக்கி²தத்தே²ரவாதே³ யேபு⁴ய்யனியமஸோதே பதிதத்தா அகுஸலஜவனானுரூபம் அஹேதுகம் உபேக்கா² ஸந்தீரண த்³வய மேவ வுத்தம். தேனேவ ஹி பரதோ தே²ரவாதா³னம் விசாரிதட்டா²னே அகுஸலஜவனானந்தரம் அஹேதுக ததா³ரம்மண மேவ தீ³பேந்தஸ்ஸ தஸ்ஸ தே²ரவாத³ஸ்ஸ அபரிபுண்ணவாத³பா⁴வம் த³ஸ்ஸேத்வா யதா³ குஸலஜவனானம் அந்தரந்தரா அகுஸலம் ஜவதி, ததா³ குஸலாவஸானே ஆசிண்ண ஸதி³ஸமேவ அகுஸலாவஸானே ஸஹேதுகம் ததா³ரம்மணம் யுத்தந்தி அட்ட²கதா²யம் வுத்தம். ததா³ரம்மணேசயுத்தே ஏதம்பி யுஜ்ஜதியேவ. தஸ்மா ச²பி உபேக்கா²ஸஹக³தவிபாகானி ஆக³ந்துகப⁴வங்க³ம் ஹோந்தியேவாதி த³ட்ட²ப்³ப³ம். ஏத்த²ச உபேக்கா²படிஸந்தி⁴கஸ்ஸ தாவ அதிமஹந்தாதி விபூ⁴தேஸுபி பு³த்³த⁴வண்ணாதீ³ஸு அபி⁴இட்டா²ரம்மணேஸு தோ³மனஸ்ஸம் உப்பாதே³ந்தஸ்ஸ ததா³ரம்மணஸம்ப⁴வோ நத்தீ²தி தோ³மனஸ்ஸ ஜவனானந்தரம் ப⁴வங்க³பாதோவ ஹோதி. ஸோமனஸ்ஸபடிஸந்தி⁴கஸ்ஸ பன ஸப்³பே³ஸுபி இட்டா²னிட்ட²பூ⁴தேஸு மஹந்தேஸு அவிபூ⁴தேஸுச ச²ளாரம்மணேஸு தோ³மனஸ்ஸ உப்பாதே³ந்தஸ்ஸ நேவ ததா³ரம்மணஸம்ப⁴வோ அத்தி². நசமூலப⁴வங்க³ ஸம்ப⁴வோதி கத்வா தோ³மனஸ்ஸானந்தரம் ச²ஸு உபேக்கா²ஸஹக³தவிபாகேஸு யதா²ரஹம் ஏகம் ஆக³ந்துக ப⁴வங்க³பா⁴வேன பவத்ததி. ததா² தஸ்ஸேவ பு³த்³த⁴வண்ணாதீ³ஸு அதிஇட்ட²பூ⁴தேஸு அதிமஹந்தேஸு அதிவிபூ⁴தேஸுச ச²ளாரம்மணேஸுவா மஹக்³க³தபஞ்ஞத்தீஸுவா தோ³மனஸ்ஸம் உப்பாதே³ந்தஸ்ஸாதி. ஏத்த² ச யஸ்மா அபி⁴த⁴ம்மே தா⁴துவிப⁴ங்கே³ ஸப்³ப³த⁴ம்மேஸுவா பன பத²ம ஸமன்னாஹாரோதி வுத்தம். மஹாஹத்தி²பதோ³பம ஸுத்தேச அஜ்ஜ²த்தி கஞ்சேவ ஆவுஸோ சக்கு² அபரிபி⁴ன்னம் ஹோதி. பா³ஹிராச ரூபாஆபாதம் ஆக³ச்ச²ந்தி. நோச தஜ்ஜோ ஸமன்னாஹாரோ ஹோதி. நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதி. யதோச கோ² ஆவுஸோ அஜ்ஜ²த்திகஞ்சேவ சக்கு² அபரிபி⁴ன்னம் ஹோதி. பா³ஹிராச ரூபா ஆபாத மாக³ச்ச²ந்தி. தஜ்ஜோச ஸமன்னாஹாரோ ஹோதி. ஏவம் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதி. அஜ்ஜ²த்திகஞ்சேவ ஆவுஸோ ஸோதம்.ல. கா⁴னம்.ல. ஜிவ்ஹா.ல. காயோ.ல. மனோ அபரிபி⁴ன்னோ ஹோதி. பா³ஹிராச த⁴ம்மா ஆபாதம் ஆக³ச்ச²ந்தி. நோச தஜ்ஜோ ஸமன்னாஹாரோ ஹோதி. நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதி. யதோச கோ² ஆவுஸோ அஜ்ஜ²த்திகோசேவ மனோ அபரிபி⁴ன்னோ ஹோதி. பா³ஹிராச த⁴ம்மா ஆபாதம் ஆக³ச்ச²ந்தி. தஜ்ஜோச ஸமன்னாஹாரோ ஹோதி. ஏவம் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதீதி வுத்தம். தஸ்மா வீதி²சித்தானினாம ஆவஜ்ஜனேனவினானஉப்பஜ்ஜந்தி. ஸசே ஆவஜ்ஜனேன த⁴ம்மதோவா காலபோ⁴வா யம்யம் நியமேத்வா ஆவஜ்ஜிதம் ஹோதி. தம் ததே³வ தானிபி க³ண்ஹந்தி. யதி³ அனியமேத்வா யம்கிஞ்சி ஆவஜ்ஜிதம் ஹோதி. தானிபி ஆவஜ்ஜி தப்பகாரமேவ க³ண்ஹந்தி. ந பன ஏகாவஜ்ஜன வீதி²யம் ஸப்³பா³னி வீதி²சித்தானி ஆவஜ்ஜனேனவா அஞ்ஞமஞ்ஞம்வா த⁴ம்மதோவா காலதோவா பி⁴ன்னா லம்ப³ணானி ஹோந்தீதி வேதி³தப்³ப³ந்தி.

ஏத்த² ஸியா. யதி³ சே தம் ஆக³ந்துகப⁴வங்க³ம் ஏகவீதி²யம் ஆதி³ம்ஹி ஆவஜ்ஜனேன ஆவஜ்ஜிதம் ஆரம்மணம் அக³ஹேத்வா அஞ்ஞம் யம் கிஞ்சி பரிசிதபுப்³ப³ம் பரித்தாரம்மணம் ஆரப்³ப⁴ உப்பஜ்ஜதி. ஏவம் ஸதி நிராவஜ்ஜனம்னாம ஏதம் ஸியா. ஆவஜ்ஜனாதீ³ஹிச ஸத்³தி⁴ம் த⁴ம்மதோ காலதோ ச பி⁴ன்னாரம்மணம்னாம ஸியாதி. ஸச்சம், யதா² பன மக்³க³வீதி²யம் கோ³த்ரபு⁴வோதா³னானி ப²லஸமாபத்திவீதி²யம் ப²லானி நிரோத⁴தோ வுட்ட²ஹந்தஸ்ஸச ப²லசித்தம் நிராவஜ்ஜனமேவ ஹோந்தி பி⁴ன்னாரம்மணஞ்ச. ஏவமேதஸ்ஸபி நத்தி² நிராவஜ்ஜனதாய பி⁴ன்னாரம்மணதாயச தோ³ஸோதி. யஞ்ச ஏகஸ்மிம்ப⁴வே ப⁴வங்க³ஸ்ஸ படிஸந்தி⁴யா ஸஹ த⁴ம்மதோச ஆரம்மண தோச அபி⁴ன்னத்தம் தத்த² தத்த² வுத்தம். தம்பி மூலப⁴வங்க³ம் ஸந்தா⁴ய வுத்தம். இத³ஞ்ச ஆக³ந்துகப⁴வங்க³ந்தி நத்தி² தோ³ஸோதி. தமனந்தரித்வாதி தம் ஆக³ந்துகப⁴வங்க³ம் அத்தனோ அனந்தரபச்சயம் கத்வா. வத³ந்தி ஆசரியா. பாளியம் பன மஹாஅட்ட²கதா²யம்ச ஏதம் விதா⁴னம் நத்தீ²தி அதி⁴ப்பாயோ. காமாவசரஜவனாவஸானேயேவ ததா³ரம்மணம் இச்ச²ந்தி. ந மஹக்³க³தானுத்தரஜவனாவஸானே. கஸ்மா இதி சே. காமாவசர ஜவனானம் ஏவ ஸவிப்ப²ந்த³னத்தா. இதரேஸஞ்ச அவிப்ப²ந்த³னத்தா.

[136] விபா⁴வனியம் பன

‘‘காமதண்ஹா நிதா³ன கம்மனிப்³ப³த்தத்தா’’தி காரணம் வுத்தம். தம் அகாரணம்.

அபிச அபி⁴ஞ்ஞாவஜ்ஜிதானி மஹக்³க³தானுத்தரஜவனானி அபரித்தாரம்மணானி ஹோந்தி. ததா³ரம்மணானி பன பரித்தாரம்மணானேவாதி நதேஸம் அவஸானே ததா³ரம்மணுப்பத்தி பஸங்கோ³ அத்தி². அபி⁴ஞ்ஞாஜவனானிச கானிசி பரித்தாரம்மணானிபி ஸந்ததரானி ஹோந்தீதி தேஸம்பி அவஸானே தது³ப்பத்தி நத்தி²யேவாதி.

[137] ஏதேன

அஜனகத்தா ஜனக ஸமானத்தாபா⁴வதோதிஆதி³பி படிக்கி²த்தம் ஹோதி.

காமாவசரஸத்தானம்ஏவ ததா³ரம்மணம் இச்ச²ந்தி. ந ரூபாரூபஸத்தானம். ந ஹி தேஸு உப்பன்னானம் பரித்தாரம்மணானம்பி காமாவசரஜவனானம் அவஸானே ததா³ரம்மணுப்பத்தி அத்தி². ததா³ரம்மணூப நிஸ்ஸயஸ்ஸ காம ப⁴வங்க³ஸ்ஸ அபா⁴வதோ மஹக்³க³த ப⁴வங்க³ஸ்ஸ ச ஸந்த தரஸ்ஸ ததா³ரம்மண கிச்சா பா⁴வதோதி. சக்கு²விஞ்ஞாண ஸோத விஞ்ஞாணானி பன ரூபஸத்தானம் சக்கு²ஸோதஇந்த்³ரிய பவத்திஆனுபா⁴வதோ ஸம்படிச்ச²னஸந்தீரணானிச த்³வாரவீதி²பே⁴தே³ சித்தனியமஸித்³தி⁴தோ ரூபஸத்தேஸு பவத்தந்தி யேவாதி. காமாவசரத⁴ம்மேஸ்வேவ ஆரம்மணபூ⁴தேஸு ததா³ரம்மணம் இச்ச²ந்தி, ந மஹக்³க³தானுத்தரபஞ்ஞத்தித⁴ம்மேஸு. ஏகந்தபரித்தாரம்மணத்தா ததா³ரம்மணானம். தேஸம் பன ஏகந்தபரித்தா ரம்மணபா⁴வே காரணம் ஹேட்டா² வுத்தமேவாதி.

[138] விபா⁴வனியம் பன

‘‘அபரிசிதத்தா’’தி காரணம் வுத்தம். தம் அகாரணம்.

சித்தஞ்ஹி நாம விகப்பப³லேவா அப்பனாபத்தபா⁴வனாகம்மவிஸேஸே வா ஸதி நிப்³பா³னே விய அபரிசிதேபி ஆரம்மணே பவத்ததியேவாதி.

[139] யஞ்ச விபா⁴வனியம்

‘‘காமதண்ஹாயத்தகம்மஜனிதத்தாபீ’’தி காரணம் வுத்தம். தம்பி ஹேட்டா² படிக்கி²த்தமேவ. தேனேவ ஹி அட்ட²கதா²யம் கிம்வா ஏதாய யுத்திசிந்தாயாதி வத்வா ஸப்³பா³னி விபா⁴வனியம் வுத்த காரணானி படிக்கி²த்தானீதி.

காமே ஜவன ஸத்தாலம்ப³ணானம் நியமேஸதீதி காமபூ⁴மிபரியாபன்னானம் ஜவனானம் ஸத்தானம் ஆரம்மணானஞ்ச வஸேன திவிதே⁴ நியமே ஸதி. விபூ⁴தே திமஹந்தேச ததா³ரம்மணமீரிதந்தி ஏதேன ததா³ரம்மணம்னாம பவத்தமானம் விபூ⁴தாரம்மணேவா அதிமஹந்தாரம்மணே வா பவத்ததீதி அயமேவ நியமோ த³ஸ்ஸிதோ. ந பன யத்த² ததா³ ரம்மணம் பவத்ததி. ஏததே³வ விபூ⁴தஞ்ச அதிமஹந்தஞ்ச நாமாதி நியமோ. தஸ்மா உளாரகம்மனிப்³ப³த்தானம் ஸுவிஸத³வத்து²கானம் ரூபப்³ரஹ்மானம் உப்பன்னாவீதி²யோ யேபு⁴ய்யேன விபூ⁴தாரம்மணாஏவ அதிமஹந்தா ரம்மணாஏவச ஹோந்தீதி வேதி³தப்³பா³. கேசி பன இமமத்த²ம் அஸல்லக்கே²த்வா ரூபாரூபபூ⁴மீஸு விபூ⁴தாரம்மணவீதி²யோ அதிமஹந்தாரம்மணவீதி²யோச நலப்³ப⁴ந்தீதி வத³ந்தி. [ததா³ரம்மணனியமோ].

140. ஜவனேஸுசாதி சஸத்³தோ³ பன ஸத்³த³த்தோ². ச²க்க²த்து மேவவா ஜவந்தி. பகதிகாலேபி ஆரம்மணஸ்ஸ து³ப்³ப³லபா⁴வே ஸதீதி அதி⁴ப்பாயோ. அட்ட²கதா²யம்பி ஹி பகதிகாலே ஆரம்மணது³ப்³ப³ லட்டா²னேஏவ காமாவசரஜவனானம் ச²க்க²த்தும் பவத்தி வுத்தாதி. கேசி பன ச²க்க²த்துந்தி இத³ம் முச்சா²காலவஸேன வுத்தந்தி மஞ்ஞந்தி. மந்த³வத்தியந்தி மரணாஸன்னகாலே ப³ஹுசித்தக்க²ணாதீதகஸ்ஸ வத்து²ஸ்ஸ து³ப்³ப³லத்தா இதரகாலேஸுச முது³தரபா⁴வேன கேனசி உபத்³து³த பா⁴வேன அஜ்ஜோ²த்த²டபா⁴வேனச வத்து²ஸ்ஸ து³ப்³ப³லத்தா தன்னிஸ்ஸிதானம் ஜவனானம் மந்தீ³பூ⁴தவேக³தா வஸேன பவத்திகாலே. மரணகாலாதீ³ஸூதி மரணாஸன்னகாலே முச்சா²காலே விஸஞ்ஞிபூ⁴த காலே அதிதருணகாலேச, தத்த² முச்சா²காலோனாம அஸய்ஹ ரூபேஹி து³க்க²த⁴ம்மேஹி அதிபூ⁴தானம் அதி⁴மத்ததோ கரஜகாயஸ்ஸ விஹஞ்ஞப்பத்திகாலோ. விஸஞ்ஞி பூ⁴தகாலோனாம பீதிவேகே³னவா நித்³தா³பி⁴பூ⁴ததாயவா யக்க²க³ஹணேனவா ஸுராமதா³தி³ வஸேனவா பகதிஸஞ்ஞாய விக³தகாலோ. அதிதருணகாலோனாம க³ப்³ப⁴க³தஸ்ஸவா ஸம்பதிஜாதஸ்ஸவா தா³ரகஸ்ஸ அஜ்ஜ²த்த வத்தூ²னம் அதிமுது³காலோ. தாதி³ஸேஸு ஹி காலேஸு அந்தரந்தரா ச²த்³வாரிகவீதி²யோ பவத்தமானாபி யேபு⁴ய்யேன பரிபுண்ணஜவனவாரா ந பவத்தந்தி. த்³வத்திவோட்ட²ப்³ப³னிகாவா சதுபஞ்சஜவனிகாஏவவா பவத்தந்தீதி. ஏத்த²ச த்³வத்திவோட்ட²ப்³ப³னிகவாரா அட்ட²கதா²யம் வுத்தா. சதுபஞ்ச ஜவனிகவாரா மூலடீகாயம் வுத்தா. பஞ்சவாரமேவாதி இத³ம் பன மரணா ஸன்னகாலவஸேன வுத்தம். நமுச்சா²காலாதி³வஸேன. தஞ்ச கோ²பாகதிகஸத்தானம் வஸேனேவ. யே பன ஜா²னஸமனந்தரம்வா பச்சவேக்க²ண ஸமனந்தரம்வா அபி⁴ஞ்ஞாஸமனந்தரம்வா சவந்திவா பரினிப்³பா³யந்திவா. தேஸம் ஜா²னாதீ³னியேவ பஞ்சவாரதோ அதி⁴கானிவா ஊனானிவா மரணா ஸன்னஜவனானினாம ஹோந்தீதி த³ட்ட²ப்³ப³ம். அயஞ்ச அத்தோ² உபரி மரணுப்பத்தியம் ஆவிப⁴விஸ்ஸதீதி. ப⁴க³வதோ பன யமகபாடிஹாரிய காலாதீ³ஸூதி ஏத்த² அஞ்ஞேஸம்பி மஹாமோக்³க³லானத்தே²ராதீ³னம் ஏவரூபோ லஹுப்பவத்திகாலோ ஆதி³ஸத்³தே³ன ஸங்க³ஹிதோதி த³ட்ட²ப்³போ³. வுத்தஞ்ஹி விஸுத்³தி⁴மக்³கே³ அயம் பன மத்த²கபத்தா வஸீ ப⁴க³வதோ யமகபாடிஹாரியே லப்³ப⁴தி. அஞ்ஞேஸம்வா ஏவரூபே காலேதி. ஸகலேன பன வாக்யேன த²பேத்வா யமகபாடிஹாரியஸதி³ஸம் லஹுக பவத்திகாலம் அஞ்ஞஸ்மிம் காலே ப⁴க³வதோபி ச²வா ஸத்தவா பச்சவேக்க²ணசித்தானி பவத்தந்தி. அஞ்ஞேஸம் பன வத்தப்³ப³மேவ நத்தீ²தி த³ஸ்ஸேதி. சத்தாரி பஞ்சவா பச்சவேக்க²ணசித்தானி ப⁴வந்தீதி ஏத்த²பி ப⁴க³வதோபி லஹுகப்பவத்தியம் பஞ்ச பச்சவேக்க²ணசித்தானி ப⁴வந்தி. லஹுகதரபவத்தியம் சத்தாரீதி அத்தோ²பி யுஜ்ஜதியேவ.

விபா⁴வனியம் பன

ப⁴க³வதோ சத்தாரி அஞ்ஞேஸம் பஞ்சபீதி யுத்தம் விய தி³ஸ்ஸதீதி வுத்தம்.

தத்த² யமகபாடிஹாரியம் கரோந்தோ ப⁴க³வா அக்³கி³க்க²ந்த⁴உத³க தா⁴ராதீ³னம் த்³வின்னம் த்³வின்னம் பாடிஹாரியானம் பவத்தனத்த²ம் பத²மம் தேஜோகஸிணே பாத³கஜ்ஜா²னம் ஸமாபஜ்ஜி. ததோ த்³வே ஜா²னங்கா³னி பச்சவேக்கி². ததோ உபரிமகாயதோ அக்³கி³க்க²ந்தோ⁴ பவத்ததூதி அதி⁴ட்டா²ஸி. ததோ தஸ்மிம்யேவ கஸிணே அபி⁴ஞ்ஞம் ஸமாபஜ்ஜி. அபி⁴ஞ்ஞாவஸேன உபரிமகாயதோ அக்³கி³க்க²ந்தோ⁴ பவத்ததி. ததோ ஆபோகஸிணே பாத³கஜ்ஜா²னம் ஸமாபஜ்ஜி. ததோ த்³வே ஜா²னங்கா³னி பச்சவேக்கி². ததோ ஹேட்டி²மகாயதோ உத³கதா⁴ரா பவத்தந்தூதி அதி⁴ட்டா²ஸி. ததோ தஸ்மிம்யேவ கஸிணே அபி⁴ஞ்ஞம் ஸமாபஜ்ஜி. அபி⁴ஞ்ஞாவஸேன ஹேட்டி²ம காயதோ உத³கதா⁴ரா பவத்தந்தி. ஸேஸயமகேஸுபி ஏஸேவ நயோ. ஏத்த²ச லஹுகப்பவத்தியா இச்சி²தத்தா த்³வே த்³வே பச்சவேக்க²ணவாரா சதுபஞ்சஜவனிகாஏவ ப⁴வந்தி. த்³வின்னஞ்ச ஜவனவாரானம் அந்தரா த்³வே ஏவ ப⁴வங்கா³னி ப⁴வந்தி. தானிச த்³வே பாடிஹாரியானி பஸ்ஸந்தானம் ஏகப்பஹாரேனேவ பவத்தானி விய பஞ்ஞாயந்தீதி. ஏதரஹி பன கேசி ஆதி³கம்மிகஜ்ஜா²னபச்சவேக்க²ணேஸுபி சத்தாரி பஞ்சவாஜவனானி வத³ந்தி. ஆதி³கம்மிகஸ்ஸாதி யோக³கம்மஸித்³தி⁴யா ஆதி³ம்ஹி நியுத்தஸ்ஸ. பத²மம் உப்பன்னா அப்பனா பத²மகப்பனா. தஸ்ஸம் பத²மகப்பனாயம். ஆதி³கம்மிகஅப்பனாவீதி²யந்தி அத்தோ². ததா³ ஹி ஸப்³பா³னிபி மஹக்³க³தஜவனானி புன ஆஸேவனாபா⁴வதோ பரிது³ப்³ப³லானி ஹோந்தீதி ஏகவாரமேவ ஜவந்தீதி. அபி⁴ஞ்ஞாஜவனானி பன இத்³தி⁴விகுப்³ப³னாதி³. கிச்சஸித்³தி⁴யாஏவ பயுத்தானீதி கிச்சஸித்³தி⁴தோ பரம் கத்தப்³பா³பா⁴வதோ ஆதி³கம்மிககாலேபி வஸீபூ⁴தகாலேபி ஏகவாரமேவ ஜவந்தீதி வுத்தம் அபி⁴ஞ்ஞாஜவனானிச ஸப்³ப³தா³பீதி. யதா²ச அபி⁴ஞ்ஞாஜவனாதி³ ஏவம் மக்³க³ஜவனானிபி தம் தம் கிலேஸப்பஹானகிச்சஸித்³தி⁴தோ பரம் கத்தப்³பா³ பா⁴வதோ ஏகவாரமேவ ஜவந்தீதி வுத்தம் சத்தாரோ பன.ல. ஏக சித்தக்க²ணிகாவாதி. அத²வா, மக்³க³சேதனாய அனந்தரிகப²லத்தா ஸகிம் உப்பன்னேயேவ மக்³கே³ ப²லஸ்ஸவாரோ ஆவதோதி நத்தி² மக்³க³சித்தஸ்ஸ புனுப்பத்தியா ஓகாஸோதி வுத்தம் சத்தாரோ பன.ல. ஏகசித்தக்க²ணிகாவாதி. ஜவனுப்பத்தியா பகதியா ஸத்தக்கு²பரமத்தா மந்த³ஸ்ஸ பஞ்சமம் உப்பன்னமக்³க³தோ பரம் த்³வே ப²லசித்தானி உப்பஜ்ஜந்தி. திக்க²ஸ்ஸ சதுத்த²ம் உப்பன்னமக்³க³தோ பரம் தீணீதி வுத்தம் ததோ பரம்.ல. உப்பஜ்ஜந்தீதி. நிரோத⁴ஸமாபத்திகாலே பன புப்³ப³பா⁴கே³யேவ தாதி³ ஸஸ்ஸ பயோகா³பி⁴ஸங்கா²ரஸ்ஸ கதத்தா த்³வின்னம் வாரானம் உபரி சித்தப்பவத்தி நத்தீ²தி வுத்தம் நிரோத⁴.ல. ஜவதீதி. ஏத்த²ச த்³விக்க²த்துந்தி இத³ம் உக்கட்ட² நித்³தே³ஸவஸேன வுத்தம். ஏகம்வா த்³வேவா சித்தவாரே அதிக்கமித்வா அசித்தகோ ஹோதீதி ஹி வுத்தம். சதுத்தா²ருப்பஜவனந்தி அனாகா³மினோ குஸலபூ⁴தம் அரஹதோ க்ரியபூ⁴தம் நேவஸஞ்ஞானாஸஞ்ஞா யதன ஜவனம். வுட்டா²னகாலேச நிரோத⁴ஸ்ஸ நிஸந்த³மத்தத்தா ஏகவாரமேவ வஜனம் பவத்ததீதி வுத்தம் வுட்டா²னகாலேசாதிஆதி³. தத்த² அனாகா³மி ப²லம்வா அரஹத்தப²லம்வாதி அனாகா³மிப²லேவா அரஹத்தப²லேவா. பா⁴வேன பா⁴வலக்க²ணே ஹேதம் பச்சத்தவசனம். தேனாஹ நிருத்³தே⁴தி. ஸப்³ப³த்தா²பி ஸமாபத்திவீதி²யந்தி ஜா²னஸமாபத்தி ப²லஸமாபத்திவஸேன ஸகலாயபி ஸமாபத்திவீதி²யம். ப⁴வங்க³ஸோதோவிய வீதி²னிய மோ நத்தீ²தி இத³ம் சிண்ணவஸீபூ⁴தகாலம் ஸந்தா⁴ய வுத்தம். அகதா தி⁴காரஸ்ஸ பன ஜா²னஸமாபத்தியம் ஆதி³தோ பட்டா²ய த்³வே தீணி சத்தாரீதிஆதி³னா ஜா²னஜவனானி அனுக்கமேன வத்³த⁴மானானி பவத்தந்தி. கதா தி⁴காரானம் பன மஹாபுரிஸஜாதிகானம் படிலத்³த⁴காலதோ பட்டா²ய சிண்ணவஸீபா⁴வானேவ ஹோந்தி. ததா² ப²லஜவனானிச ஸப்³பே³ஸம்பி ப²லட்டா²னந்தி த³ட்ட²ப்³ப³ம். ப³ஹூனிபீதி பிஸத்³தோ³ ஸம்பிண்ட³னத்தோ². தேன ஆதி³கம்மிககாலாதீ³ஸு ஏகவாராதி³வஸேனபி அவஸேஸானம் பவத்திம் ஸம்பிண்டே³தீதி. [ஜானனியமோ].

141. ஏவம் புப்³பா³பரனியாமவஸேன வீதி²சித்தானம் பவத்திம் த³ஸ்ஸேத்வா இதா³னி புக்³க³லபே⁴த³வஸேன பூ⁴மிபே⁴த³வஸேனச தேஸம் பவத்திம் த³ஸ்ஸேந்தோ து³ஹேதுகானந்திஆதி³மாஹ. படிஸந்தி⁴விஞ்ஞாணஸஹக³தா த்³வே ஹேதுயோ ஏதேஸந்தி து³ஹேதுகா. சதூஹி ஞாணவிப்ப யுத்தமஹாவிபாகேஹி க³ஹிதபடிஸந்தி⁴கா. த்³வீஹி பன அஹேதுக விபாகேஹி க³ஹித படிஸந்தி⁴கா அஹேதுகா நத்தி² படிஸந்தி⁴ஹேது ஏதேஸந்தி கத்வா. தேஸம் த்³வின்னம்பி விபாகாவரணஸப்³பா⁴வதோ மஹக்³க³ தஜ்ஜா²னானிபி தாவ நுப்பஜ்ஜந்தி. குதோ லோகுத்தரானி. க்ரியஜவனானி பன கீ²ணாஸவானமேவ ஆவேனிக பூ⁴தானீதி வுத்தம் க்ரியஜவனானி சேவஅப்பனாஜவனானிச ந லப்³ப⁴ந்தீதி. தத்த² விபாகா வரணம் நாம அஹேதுக படிஸந்தி⁴கதா த்³விஹேதுக படிஸந்தி⁴கதாச. ததா² ஞாணஸம்பயுத்தவிபாகானிச ஸுக³தியந்தி ஸுக³தி ப⁴வே பரியாபன்னானம் தேஸம் த்³வின்னம் ததா² ஞாணம்பயுத்தமஹாவிபாகானிச ந லப்³ப⁴ந்தீதி அத்தோ². ஏத்த²ச ஸுக³தியந்தி ஏதேன து³க்³க³திபரியாபன்னே அஹேதுக புக்³க³லே நிவத்தேதி. ந ஹி தேஸம் இமஸ்மிம் வாக்யே இதரேஸம் அனுஞ்ஞாதானி ஞாணவிப்பயுத்தவிபாகானிபி லப்³ப⁴ந்தீதி. தேனாஹ து³க்³க³தி யம் பனாதிஆதி³. தத்த² து³க்³க³தியம் பரியாபன்னானம் அஹேதுகானம் ஞாணஸம்பயுத்தவிபாகானிச ஞாணவிப்பயுத்தானி மஹாவிபாகானிச ந லப்³ப⁴ந்தீதி பரிபுண்ண யோஜனா த³ட்ட²ப்³பா³. ஏத்த² ஸியா. கஸ்மா பனேத்த² ஸுக³திபரியாபன்னானம் அஹேதுகானம் சத்தாரி ஞாணஸம்பயுத்தவிபாகானி து³க்³க³திபரியாபன்னானஞ்ச அட்ட²பி ஸஹேதுக மஹாவிபாகானி ந லப்³ப⁴ந்தீதி வுத்தம். நனு பட்டா²னே ஸஹேதுகம் ப⁴வங்க³ம் அஹேதுகஸ்ஸ ப⁴வங்க³ஸ்ஸ அனந்தரபச்சயேன பச்சயோதி வுத்தம். ஏத்த² ஹி ஏகஸ்மிம் ப⁴வே ஏகஸ்ஸ ஸத்தஸ்ஸ கதா³சி ஸஹேதுகம் ப⁴வங்க³ம் கதா³சி அஹேதுகம் ப⁴வங்க³ந்தி ஏவம் மூலப⁴வங்கே³ பவத்திபே⁴தோ³ நத்தீ²தி கத்வா ஸஹேதுகம் ப⁴வங்க³ந்தி இத³ம் ததா³ரம்மணஸங்கா²தம் ஆக³ந்துகப⁴வங்க³ம் ஸந்தா⁴ய வுத்தந்தி விஞ்ஞாயதி. ஸஹேதுகந்திச ஸாமஞ்ஞவசனத்தா த்³விஹேதுகம் திஹேதுகஞ்ச ததா³ரம்மணம் விஞ்ஞாதப்³ப³ம் ஹோதி. அஹேதுகஸ்ஸ ப⁴வங்க³ஸ்ஸாதி இத⁴ பன தஸ்ஸ ததா³ரம்மணஸ்ஸ அனந்தரம் உப்பன்னம் மூலப⁴வங்க³மேவ அதி⁴ப்பேதம். இத⁴பி ஸாமஞ்ஞவசனத்தா த்³வீஸு அ- அஹேதுகப⁴வங்கே³ஸு யம்கிஞ்சி க³ஹேதப்³ப³மேவாதி. தஸ்மா த்³வின்னம் அஹேதுகானம்பி அட்ட²ஸஹேதுக ததா³ரம்மணானிபி லப்³ப⁴மானானிஏவ ஸியும். து³ஹேதுகானம் பன வத்தப்³ப³மேவ நத்தீ²தி. வுச்சதே, அஹேது கேஸு தாவ து³க்³க³திபரியாபன்னானம் ஸஹேதுகததா³ரம்மணஸம்ப⁴வோ ஸப்³ப³அட்ட²கதா²ஸு படிக்கி²த்தோ. தஸ்மா அஹேதுகஸ்ஸ ப⁴வங்க³ஸ்ஸாதி இத³ம் குஸலவிபாகபூ⁴தம் அஹேதுகப⁴வங்க³ம் ஸந்தா⁴ய வுத்தந்தி யுத்தம். அயஞ்ஹி பட்டா²னே த⁴ம்மதா. யதி³த³ம் யதா²லாப⁴க³ஹணந்தி. இதரதா² ஸப்³ப³அட்ட²கதா²விரோதோ⁴ ஸியாதி. யதா²ச குஸலானம் யோக³ஸாத⁴னீயத்தா பவத்தியம்பி யோக³கம்மவஸேன ஞாணயோகோ³ ஹோதி. ந ததா² விபாகானம். தேஸம் பன அயோக³ஸாத⁴னீ யத்தா பவத்தியம் ப⁴வங்க³ஞாணஸங்கா²தேன உபனிஸ்ஸயஞ்ஞாணேன வினா ஞாணயோகோ³ ந ஸம்ப⁴வதி. தஸ்மா ஸஹேதுகம் ப⁴வங்க³ந்தி இத⁴பி ஞாணவிப்பயுத்தபூ⁴தம் ஸஹேதுகததா³ரம்மணமேவ க³ஹேதும் யுத்தந்தி கத்வா த்³விஹேதுகானம் அஹேதுகானஞ்ச ஞாணஸம்பயுத்தததா³ரம்மண படிக்கே²போ தே²ரேன கதோதி. ஆசரியபு³த்³த⁴த³த்தத்தே²ரேன பன யேன விபாகசித்தேன படிஸந்தி⁴ம் க³ண்ஹந்தி. தேன ஸதி³ஸம் வா ததோ ஹீனம் வா ததா³ரம்மணம் தேஸம் ஸம்ப⁴வதி. ந பணீதந்தி கத்வா த்³வின்னம்பி அஹேதுகானம் அட்ட²மஹாவிபாகானி படிக்கி²பித்வா ஸத்ததிம்ஸசித்தபடி லாபோ⁴ வுத்தோ. ஸோ பன யதா² வுத்தபட்டா²னபாளியா விருஜ்ஜ²தி. அபரே பன யதா² அஹேதுகானம் ஸுக³திபரியாபன்னானம் த்³விஹேதுக ததா³ரம்மணம் ஹோதி. ஏவம் த்³விஹேதுகானம்பி திஹேதுகததா³ரம்மணம் ஸம்ப⁴வதீதி வத³ந்தி. தம் யுத்தம்விய தி³ஸ்ஸதி. அட்ட²கதா²யஞ்ஹி கத்த²சி தேஸம் த்³வின்னம்பி அவிஸேஸேன அட்ட²மஹாவிபாகபவத்தி வுத்தாதி. படிஸந்தி⁴விஞ்ஞாண ஸஹக³தா தயோ ஹேதூ ஏதேஸந்தி திஹேதுகா. தே பன காமரூபாரூபவஸேன திவிதா⁴ ஹோந்தி. புது²ஜ்ஜனோ அட்ட²அரியாசாதி நவவிதா⁴. தேஸு கீ²ணாஸவானம் குஸலாகுஸல ஜவனானிச நலப்³ப⁴ந்தி. ஸப்³ப³ஸோ அனுஸயபஹானேன ஸப்³பே³ஸம் குஸலாகுஸலானம் ஸஹ நிருத்³த⁴த்தா அனுஸய படிப³த்³தோ⁴ ஹி தேஸம் தப்³பா⁴வோதி. ததா²ஸத்³தோ³ பக்க²ந்தரத்தோ². அபரினிட்டி²தஸிக்கா²கிச்சதாய ஸிக்க²னஸீலயுத்தா ஸத்தஅரியா ஸேக்கா²னாம. இத⁴ பன தயோ ஹேட்டி²மப²லட்டா² அதி⁴ப்பேதா. தேஸஞ்ஹி ஆதி³தோ ஸோதாபத்திமக்³கே³னேவ தி³ட்டி²விசிகிச்சா²னம் பஹீனத்தா தம் ஸஹக³தானி பஞ்சஜவனானி நலப்³ப⁴ந்தீதி. அனாகா³மிபுக்³க³லானம் பன படிக⁴ஜவனானிச ந லப்³ப⁴ந்தி. அனாகா³மிமக்³கே³ன பஹீனத்தா. மக்³க³ஸ்ஸ பன ஏகசித்தக்க²ணிகத்தா. சதுன்னம் மக்³க³ட்டா²னம் பச்சேகம் யதா²ஸகம் மக்³க³ஜவனானிஏவ லப்³ப⁴ந்தி. உபரிமானஞ்ச ப²லானம் ஹேட்டி²மேஹி புக்³க³லேஹி அனமிக³தத்தா ஹேட்டி²மானஞ்ச உபரிமேஸு புக்³க³லந்தரேஸு அனுப்பஜ்ஜனதோ சதுன்னம் ப²லட்டா²னம்பி பச்சேகம் யதா²ஸகம் ப²லஜவனானிஏவ லப்³ப⁴ந்தீதி வுத்தம் லோகுத்தர.ல. ஸமுப்பஜ்ஜந்தீதி. ஏத்த²ச உபரிமக்³கே³ ஆக³தே ஹேட்டி²மமக்³கா³னுபா⁴வஸ்ஸ ஸப்³ப³ஸோ படிபஸ்ஸத்³தி⁴வஸேன உபரிமானம் புக்³க³லந்தரதாஸித்³தி⁴ வேதி³தப்³பா³தி. இதா³னி தேஸம் தேஸம் புக்³க³லானம் பாரிஸேஸதோ லப்³ப⁴மானவீதி²சித்தானி த³ஸ்ஸேதும் கா³த²மாஹ. பரினிட்டி² தஸிக்கா²கிச்சத்தா நத்தி² ஸிக்கி²தப்³ப³கிச்சம் ஏதேஸந்தி அஸேக்கா². கீ²ணாஸவா. தேஸம் தேவீஸதிகாமவிபாக வீஸதிக்ரிய அரஹத்தப²ல வஸேன சதுசத்தாலீஸ வீதி²சித்தானி ஸம்ப⁴வா யதா²ஸம்ப⁴வம் உத்³தி³ஸே. ஸத்தன்னம் ஸேக்கா²னம் தி³ட்டி²விசிகிச்சா²ஜவனவஜ்ஜிதானம் ஸத்தன்னம் அகுஸலானம் ஏகவீஸதியா குஸலானம் தேவீஸதியா காமவிபாகானம் திண்ணம் ஹேட்டி²மப²லானம் ஆவஜ்ஜனத்³வயஸ்ஸச வஸேன ச²பஞ்ஞாஸ வீதி²சித்தானி ஸம்ப⁴வா உத்³தி³ஸே. அவஸேஸானம் சதுன்னம் புது²ஜ்ஜனானம் காமவிபாக லோகியகுஸலாகுலாவஜ்ஜன த்³வயவஸேன சதுபஞ்ஞாஸ வீதி²சித்தானி ஸம்ப⁴வா உத்³தி³ஸேதி யோஜனா. புக்³க³ல பே⁴தே³ன வீதி²சித்தானம் பே⁴தோ³ புக்³க³லபே⁴தோ³.

142. ஸப்³பா³னிபி வீதி²சித்தானி உபலப்³ப⁴ந்தி புக்³க³லானம் த்³வாரானஞ்ச ஏத்தே²வ பரிபுண்ணஸம்ப⁴வதோ. யதா²ரஹந்தி தம் தம் பூ⁴மிபுக்³க³லானம் உப்பத்திஅரஹானுரூபம். ரூபாவசரபூ⁴மியம் வஜ்ஜிதப்³பே³ஸு ஸோளஸவீதி² சித்தேஸு ச²ன்னம் சித்தானம் உபரிவாக்யே வுச்சமானத்தா படிக⁴ஜவன ததா³ரம்மண வஜ்ஜிதானீதி வுத்தம். அரூபாவசரபூ⁴மியம் பத²மமக்³க³ ரூபாவசரஹஸன ஹேட்டி²மாருப்பவஜ்ஜிதானி படிக⁴ஜவன ததா³ரம்மணவஜ்ஜிதானிச வீதி² சித்தானி லப்³ப⁴ந்தீதி யோஜனா. ஏத்தா²பி வஜ்ஜிதப்³பே³ஸு அட்ட²திம்ஸ வீதி²சித்தேஸு ஸோளஸன்னம் சித்தானம் உபரிவுச்சமானதா த³ட்ட²ப்³பா³. ஸப்³ப³த்தா²பீதி ஸப்³பா³ஸுபி ரூபாரூபபூ⁴மீஸு. தம்தம் பஸாத³ரஹிதானம் தம்தம்த்³வாரிகவீதி²சித்தானி ந லப்³ப⁴ந்தேவாதி ரூபாவசரபூ⁴மியம் தாவ கா⁴னாதி³த்தயம் நத்தீ²தி கா⁴னஜிவ்ஹாகாயபஸாத³ ரஹிதானம் ரூபீப்³ரஹ்மானம் கா⁴ன ஜிவ்ஹாகாயத்³வாரிகானி ச² வீதி²சித்தானி நலப்³ப⁴ந்தேவ. யானி ஸந்தா⁴ய ச²ன்னம் சித்தானம் உபரிவாக்யே வுச்சமானத்தாதி ஹேட்டா² வுத்தம். அரூபபூ⁴மியம் பன பஞ்சபி பஸாதா³ நத்தீ²தி பஞ்சத்³வாரிகானி த்³விபஞ்சவிஞ்ஞாண மனோதா⁴ துத்திக ஸந்தீரணத்தயவஸேன ஸோளஸவீதி²சித்தானி நலப்³ப⁴ந்தேவ. யானி ஸந்தா⁴ய ஸோளஸன்னம் சித்தானம் உபரி வுச்சமானதாதி வுத்தம். காமபூ⁴மியம் பன தம்தம் பஸாத³ரஹிததா ஜச்சந்தா⁴தீ³னம் வஸேன யோ ஜேதப்³பா³. காமே அஸீதி வீதி²சித்தானி யதா²ரஹம் லப்³ப⁴ரே லப்³ப⁴ந்தி. ரூபே சதுஸட்டி² ததா² யதா²ரஹம் லப்³ப⁴ரே. அரூபே த்³வே சத்தாலீஸ யதா²ரஹம் லப்³ப⁴ரேதி யோஜனா. ஏத்த²ச ப்³ரஹ்மலோகேவா உபரி ச²காமாவசர தே³வலோகேஸுவா அனிட்டா²ரம்மணானி நாம நத்தி². தஸ்மா ரூபாவசரபூ⁴மியம் சதுன்னம் அகுஸலவிபாகானம் லப்³ப⁴மானதாவசனம் தத்த² ட²த்வாவா இத⁴ ஆக³ந்த்வாவா இத⁴ அனட்டே²ஹி ரூபஸத்³தே³ஹி ஸமாக³ச்ச²ந்தானம் வஸேன த³ட்ட²ப்³ப³ம். கேசி பன இத⁴ ஆக³தானம்யேவ ப்³ரஹ்மானம் அனிட்டா²ரம்மணஸமாயோகோ³ ஹோதீதி தா²னி சத்தாரி ரூபபூ⁴மியம் லத்³தா⁴னினாம ந ஹோந்தி. தஸ்மா தத்த² ஸட்டி²யேவ வீதி²சித்தானீதி வத³ந்தி. தம் ந யுஜ்ஜதி. இத⁴ ஆக³தானம்யேவ உப்பன்னானிபி ப்³ரஹ்மத்தபா⁴வே உப்பன்னத்தா ப்³ரஹ்மலோகே உப்பன்னானி இச்சேவ வத்தப்³ப³த்தா. நச தத்த² டி²தாபி இத⁴ அனிட்டா²னி நக³ண்ஹந்தி. தூ³ரேபி ஆரம்மணம் க³ஹேதும் ஸமத்த²த்தா ப்³ரஹ்மானந்தி.

[140] யஞ்ச விபா⁴வனியம்

தஸ்ஸ வாத³ஸ்ஸ படிக்கி²பனத்த²ம் வுத்தம் ‘‘இத⁴ பன தத்த² ட²த்வாபி இமம் லோகம் பஸ்ஸந்தானம் அனிட்டா²ரம்மணஸ்ஸ அஸம்ப⁴வோ ந ஸக்கா வத்து’’ந்தி. தேன தத்த² ட²த்வா இமம் லோகம் பஸ்ஸந்தானம் உப்பன்னானி தானி சத்தாரி சித்தானி தத்த² லத்³தா⁴னினாம ஹோந்தி. இத⁴ ஆக³தானம் உப்பன்னானி இத⁴ லத்³தா⁴னினாம ஹோந்தீதி அனுஞ்ஞாதம் ஹோதி. தஞ்ச ந யுத்தம்.

தம் தம் பூ⁴மிபரியாபன்னே ஸத்தஸந்தானே உப்பன்னானிஏவ தம்தம்பூ⁴மியம் உப்பன்னானீதி ஸித்³த⁴த்தா. இச்சேவந்திஆதி³ மஹானிக³மனம். யதா²ஸம்ப⁴வந்தி தம் தம் பூ⁴மிபுக்³க³லத்³வாராரம்மணேஸு ஸம்ப⁴வானுரூபம். ப⁴வங்கே³ன அந்தரிதா ப⁴வங்க³ந்தரிதா. யாவதாயுகந்தி தஸ்மிம் தஸ்மிம் ப⁴வே ப⁴வனிகந்தி வீதி²தோ பட்டா²ய யத்தகம் காலம் ஜீவிதஸந்தானம் பவத்ததி. தத்தகம் காலந்தி அத்தோ². அப்³போ⁴ச்சி²ன்னா பவத்ததி அஸதி நிரோத⁴ ஸமாபத்தியந்தி அதி⁴ப்பாயோ.

இதி பரமத்த²தீ³பனியானாம அபி⁴த⁴ம்மத்த²ஸங்க³ஹஸ்ஸ

சதுத்த²வண்ணனாய வீதி² ஸங்க³ஹஸ்ஸ

பரமத்த²தீ³பனா நிட்டி²தா.