சேதஸிகஸங்க³ஹ பரமத்த²தீ³பனீ

68. ஏவம் சித்தங்க³ஹம் த³ஸ்ஸேத்வா இதா³னி அனுபத்தம் சேதஸிக ஸங்க³ஹம் த³ஸ்ஸேந்தோ சதூஹி ஸம்பயோக³லக்க²ணேஹி ஸஹ வசனத்த²ஞ்ச ஸரூபத்த²ஞ்ச தாவ த³ஸ்ஸேதும் ஆதி³ கா³த²மாஹ. தத்த² ஏகுப்பாத³னிரோதா⁴சஏகாலம்ப³ணவத்து²காதி சதுஸ்ஸம்பயோக³லக்க²ணத³ஸ்ஸனம். சேதோ யுத்தாதி வசனத்த²த³ஸ்ஸனம். சேதஸியுத்தா சேதஸாவா யுத்தா சேதஸிகாதி த³ஸ்ஸனதோ. த்³விபஞ்ஞாஸத⁴ம்மாதி ஸரூபத³ஸ்ஸனம். சேதஸிகாதி பன ஸித்³த⁴பத³ த³ஸ்ஸனம். தத்த² த⁴ம்மானம் அனாக³தபா⁴வஸங்கா²தா புப்³ப³ந்ததோ உத்³த⁴ம் பஜ்ஜனம் க³மனம் ஸரூபதோ பாதுப⁴வனம் உப்பாதோ³. ஜாதீதி வுத்தம் ஹோதி. ஸப்³பே³பிஹி ஸங்க²த த⁴ம்மா அனாக³தபா⁴வபுப்³பா³ ஏவ ஹோந்தி. ததோ பச்சயஸாமக்³கி³ம் லபி⁴த்வா பச்சுப்பன்னபா⁴வம் க³ச்ச²ந்தி. ததோ நிருஜ்ஜி²த்வா அதீதபா⁴வம் க³ச்ச²ந்தீதி. நிருஜ்ஜ²னம் நிரோதோ⁴. ஸரூபவினாஸோ ப⁴ங்கோ³ அனிச்சதா மரணந்தி வுத்தம் ஹோதி. யா சித்தஸ்ஸ ஜாதி, ஸாயேவ ப²ஸ்ஸாதீ³னம். யா சித்தஸ்ஸ ஜரா, யம் சித்தஸ்ஸ மரணம், யம் சித்தஸ்ஸ ஆரம்மணம் வத்து². ததே³வ ப²ஸ்ஸாதீ³னந்திஆதி³னா ஹேட்டா² வுத்தனயேன ஏகோ உப்பாதோ³ ஏதேஸந்தி ஏகுப்பாதா³. ஏகோ நிரோதோ⁴ ஏதேஸந்தி ஏகனிரோதா⁴. ஏகுப்பாதா³ச தே ஏகனிரோதா⁴சாதி ஏகுப்பாத³னிரோதா⁴. உத்தரபதே³ ஏகஸத்³த³ஸ்ஸ லோபோ. ஏவம் பரத்த²பி. ஏகம் ஆலம்ப³ணம் ஏதேஸந்தி ஏகாலம்ப³ணா. ஏகம் வத்து² ஏதேஸந்தி ஏகவத்து²கா. ஏகாலம்ப³ணாச தே ஏகவத்து²காசாதி ஏகாலம்ப³ணவத்து²கா. ஆலம்ப³ணம் பனேத்த² ஏகசித்தஸ்ஸபி ப³ஹுதே³வ ஹோதி. ஏகத்தம்பன உபனேத்வா ஏகம் ஆலம்ப³ணந்தி வுத்தந்தி த³ட்ட²ப்³ப³ம்.

[71] விபா⁴வனியம் பன

‘‘ஏகதோ உப்பாதோ³ச நிரோதோ⁴ச யேஸம், தே ஏகுப்பாத³னிரோதா⁴’’தி வுத்தம். தம் ந ஸுந்த³ரம்.

ந ஹி ஏகக்க²ணே ஏகதோ உப்பாத³மத்தேன ஏகுப்பாத³தா இத⁴ அதி⁴ப்பேதா. அத²கோ² வுத்தனயேனேவ அதி⁴ப்பேதா. வுத்தஞ்ஹேதம் மூலடீகாயம் –

ஏககலாபபரியாபன்னானம் ரூபானம்ஸஹேவஉப்பாதா³தி³ப்பவத்திதோ

ஏகஸ்ஸகலாபஸ்ஸஉப்பாதா³த³யோ ஏகேகாவ ஹோந்தீதி.

தத்ராயம் யோஜனா. ஏகுப்பாத³னிரோதா⁴ச ஏகாலம்ப³ணவத்து²கா ச ஹுத்வா யேத⁴ம்மா சேதோயுத்தா. தே த்³விபஞ்ஞாஸத⁴ம்மா சேதஸிகா மதாதி. பா⁴வபதா⁴னம்பிவா ஏத்த² யுத்தம். விஸேஸனேச நிஸ்ஸக்கவசனம். ஏகுப்பாத³னிரோத⁴பா⁴வேன ஏகாலம்ப³ண வத்து²க பா⁴வேனச யேத⁴ம்மா சேதோயுத்தா. தே த்³விபஞ்ஞாஸத⁴ம்மா சேதஸிகானாம மதா ஞாதாதி. ஏத்த²ச யே சேதோயுத்தா. தே சேதஸிகாதி வுத்தே சித்தஸ்ஸ ஸஹஜாதபச்சயுப்பன்னரூபானிபி ததா³யத்தவுத்திதாய ஏகந்தேன சித்தஸம்ப³ந்தீ⁴னி ஹுத்வா சேதோயுத்தானி சேதஸிகானி நாம ஸியும். தஸ்மா தேஸம் நிவத்தனத்த²ம் ஏகுப்பாத³னிரோதா⁴ச, ஏகா லம்ப³ணவத்து²காதி வுத்தம். தானிஹி சித்தேன க²ணதோ ஸஹுப்பன்னானிபி பி⁴ன்னஸந்தானத்தா யா சித்தஸ்ஸ ஜாதி, ஸாஏவ தேஸந்தி இமம் லக்க²ணம்பி நானுபோ⁴ந்தி. அஞ்ஞம்ஹி ரூபஸந்தானம். அஞ்ஞம் அரூபஸந்தானந்தி. ப²ஸ்ஸாதீ³னம்பன உப்பாத³மத்தமேவ சித்தேன ஸஹ ஏகம் நஹோதி. அத²கோ² நிரோதோ⁴பி ஆலம்ப³ணம்பி வத்து²பி ஸப்³ப³ம் ஏகமேவாதி ஞாபனத்த²ம் ஏக நிரோதா⁴தி³க்³க³ஹணம் வுத்தந்தி த³ட்ட²ப்³ப³ம். ந ஹி ஏவம் அவுத்தே ஸக்கா ததா² ஜானிதுந்தி. யஸ்மாபன யதா² ப³ஹுஜனஸந்தகோ ஏகோ கோ³ணோ திஸ்ஸஸ்ஸ கோ³ணோ த³த்தஸ்ஸ கோ³ணோதி ஏவம் விஸும் விஸும்பி வத்தப்³போ³யேவ ஹோதி. ஏவமேவம் உப்பாதோ³ நிரோதோ⁴ச ஏகஸ்மிம் ரூபாரூபகலாபே ஏகோவஸமானோபி ப²ஸ்ஸஸ்ஸ உப்பாதோ³ வேத³னாய உப்பாதோ³ பத²விதா⁴துயா உப்பாதோ³ ஆபோதா⁴துயா உப்பாதோ³தி ஏவமாதி³னா நயேன விஸும் விஸும்பி வத்தப்³போ³யேவ. தஸ்மா ஸுத்தந்தேஸு –

வேத³னாய உப்பாதோ³ பஞ்ஞாயதி. வயோ பஞ்ஞாயதி. டி²காய அஞ்ஞத்த²ம் பஞ்ஞாயதி. ஸஞ்ஞாய. ஸங்கா²ரானம். விஞ்ஞாணஸ்ஸ. ல. பஞ்ஞாயதீதி வுத்தம். ததா² யோ பி⁴க்க²வே பத²விதா⁴துயா உப்பாதோ³ டி²திஅபி⁴னிப்³ப³த்தி பாதுபா⁴வோ. து³க்க²ஸ்ஸேஸோ உப்பாதோ³ ரோகா³னம் டி²தி ஜரா மரணஸ்ஸ பாதுபா⁴வோ. யோ பி⁴க்க²வே ஆபோதா⁴துயா. யோ பி⁴க்க²வே தேஜோ தா⁴துயா. யோ பி⁴க்க²வே வாயோதா⁴துயா. யோ பி⁴க்க²வே சக்கு²ஸ்ஸ.ல. மனஸ்ஸ உப்பாதோ³.ல. ஜராமரணஸ்ஸ பாதுபா⁴வோதி.

வுத்தந்தி த³ட்ட²ப்³ப³ம். இதரதா² ஜீவிதிந்த்³ரியாதீ³னபி ஏகஸ்மிம் கலாபே ப³ஹுபா⁴வோ வத்தப்³போ³ ஸியா. யோ அரூபீனம் த⁴ம்மானம் ஆயு டி²தி அவட்டி²தீதி ஹி வுத்தம். ததா² விகாரரூபானம். ஸப்³பே³ஸம்பிவா சக்கா²தீ³னம் உபாதா³ரூபானம். சதுன்னம் சஹாபூ⁴தானம் உபாதா³யரூபந்திச சதுன்னம் மஹாபூ⁴தானம் உபாதா³ய பஸாதோ³திச வுத்தந்தி. காயலஹுதா சித்தலஹுதாத³யோபன அத்த²விஸேஸதீ³பனத்த²ம் த்³விதா⁴ பி⁴ந்தி³த்வா வுத்தா. ஸோச அத்த²விஸேஸோஉபரி ஆவி ப⁴விஸ்ஸதீதி. அயமேத்த²பரமத்த²தீ³பனா.

[72] விபா⁴வனியம் பன

இமமத்த²ம் அஸல்லக்கே²த்வா யம் வுத்தம் ‘‘யதி³ ஏகுப்பாத³மத்தேனேவ சேதோயுத்தாதி அதி⁴ப்பேதா. ததா³ சித்தேன ஸஹ உப்பஜ்ஜமானானம் ரூபத⁴ம்மானம்பி சேதோயுத்ததா ஆபஜ்ஜேய்யாதி ஏக நிரோத⁴க்³க³ஹணம். ஏவம்பி சித்தானுபரிவத்தினோ விஞ்ஞத்தித்³வயஸ்ஸ பஸங்கோ³ நஸக்கா நீவாரேதும். ததா² ஏகதோ உப்பாதோ³ வா நிரோதோ⁴வா ஏதேஸந்தி ஏகுப்பாத³னிரோதா⁴தி பரிகப்பேந்தஸ்ஸ புரேதரமுப்பஜ்ஜித்வா சித்தஸ்ஸ ப⁴ங்க³க்க²ணே நிருஜ்ஜ²மானானம்பி ரூபத⁴ம்மானந்தி ஏகாலம்ப³ணக்³க³ஹணம். யே ஏவம் திவித⁴லக்க²ணா. தே நியாமதோ ஏகவத்து²கா யேவாதி த³ஸ்ஸனத்த²ம். ஏகவத்து²கக்³க³ஹணந்தி. அலமதிபபஞ்சேனா’’தி. ஸப்³ப³ம் தம் நிரத்த²கமேவ.

69. கத²ஞ்ச த்³விபஞ்ஞாஸ ஹோந்தீதி புச்சி²த்வா பத²மம் த்³விபஞ்ஞாஸ ஸரூபம் தீஹி ராஸீஹி விப⁴ஜித்வா த³ஸ்ஸேந்தோ கத²ந்திஆதி³மாஹ. தத்த² பு²ஸதீதி ப²ஸ்ஸோ. பு²ஸந்தி ஸம்பயுத்தகா த⁴ம்மா ஏதேனாதி ப²ஸ்ஸோ. பு²ஸனமத்தமேவவா ஏதந்தி ப²ஸ்ஸோ. பு²ஸனஞ்சேத்த² ஆரம்மணஸ்ஸ இட்டா²னிட்ட²ரஸம் ஆஹச்ச உபஹச்ச க³ஹணம் த³ட்ட²ப்³ப³ம். யதோ தத³னுப⁴வந்தி வேத³னா பாதுப⁴வதி. ப²ஸ்ஸபச்சயா வேத³னாதி ஹி வுத்தம். ஸ்வாயம் பு²ஸனலக்க²ணோ. நனுசாயம் அரூபத⁴ம்மோ. நச அரூபத⁴ம்மா அப்படிக⁴ஸபா⁴வா கிஞ்சி பு²ஸந்தீதி. ஸச்சம், அயம்பன பு²ஸனா காரேனச பவத்ததி. யஞ்ச பு²ஸந்தேஹி ஸாதே⁴தப்³ப³ம். தஞ்ச கிச்சம் ஸாதே⁴தி. தஸ்மா அயம் ப²ஸ்ஸோதிச பு²ஸனலக்க²ணோதிச வுத்தோ. கிம்பன ஸாதே⁴தீதி. ஆரம்மணரஸானுரூபம் சித்தஸ்ஸ விகாரபத்தி. வேத³னாவிஸேஸுப்பத்திம்வா. அயஞ்ச அத்தோ² அம்பி³லகா²தா³தி³கே தி³ஸ்வா அபரஸ்ஸ கே²ளுப்பாதா³தீ³ஸு பாகடோதி.

[73] விபா⁴வனியம் பன

‘‘கே²ளுப்பாதா³தி³விய த³ட்ட²ப்³போ³’’தி வுத்தம். ஏவஞ்சஸதி இத³ம் உபமா மத்தம் ஸியா. அதிபாகடாயபன ப²ஸ்ஸப்பவத்தியா த³ஸ்ஸன மித³ந்தி த³ட்ட²ப்³ப³ம்.

70. வேத³யதீதி வேத³னா. ஆரம்மணரஸம் அனுப⁴வதி. அவிதி³தம்வா ஆரம்மணரஸம் ஸம்பயுத்தானம் தம்ஸமங்கி³புக்³க³லானம் வா விதி³தம்பாகடம் கரோதீதி அத்தோ². விந்த³ந்திவ ஏதாய ஸத்தா ஸாதம்வா அஸாதம்வா லப⁴ந்தீதி வேத³னா. வேத³யிதமத்தமேவவா ஏதந்தி வேத³னா. பாளியம்பன –

வேத³யதி வேத³யதீதி கோ² பி⁴க்க²வே தஸ்மா வேத³னாதி வுச்சதி. கிஞ்ச வேத³யதி, ஸுக²ம்பி வேத³யதி. து³க்க²ம்பி வேத³யதி. அது³க்க²மஸுக²ம்பி வேத³யதீதி வுத்தம்.

நனு ஸப்³பே³பி சித்தசேதஸிகா த⁴ம்மா ஆரம்மணரஸானுப⁴வனப்ப கதிகாஏவாதி தேபி வேத³னானாம ஸியுந்தி. நஸியும். தேஹி கிச்சந்தரப்³யாவடா ஹோந்தி. ஆரம்மணரஸம் உஜும் அனுப⁴விதும் நஸக்கோந்தி. அத்தனோ அத்தனோ கிச்சம் கரோந்தாவ ஏகதே³ஸமத்தேன அனுப⁴வந்தி. வேத³னாயேவபன அனஞ்ஞகிச்சதாய அனுப⁴வனகிச்சே ஆதி⁴பச்சயோக³தாயச இஸ்ஸரபா⁴வேன அனுப⁴வதீதி ஸாஏவ வேத³னானாம ப⁴விதும் அரஹதீதி. ஏவஞ்சகத்வா ராஜக்³க³போ⁴ஜன ரஸானுப⁴வனே தேஸம் ஸூத³ஸதி³ஸதா வேத³னாயஏவச ராஜஸதி³ஸதா வுத்தாதி.

71. ஸஞ்ஜானாதீதி ஸஞ்ஞா. புன ஜானனத்த²ம் ஸஞ்ஞாணம் கரோதீதி அத்தோ². அயஞ்ஹி புப்³பே³ க³ஹிதஸஞ்ஞானேன ஸஞ்ஜானனகாலேபி புன ஜானனத்த²ம் ஸஞ்ஞாணம் கரோதியேவாதி. ஸாஹி ஏவம் புனப்புனம் ஸஞ்ஞாணம் கத்வா உப்பஜ்ஜமானா தி²ரஸஞ்ஞாபா⁴வம் பத்வா யாவதாயுகம்பி ப⁴வந்தரம் பத்வாபி ஸத்தானம் அப்பமுட்ட²பா⁴வம் ஸாதே⁴தி. மிச்சா² பி⁴னிவேஸஸஞ்ஞாபா⁴வம் பத்வாச இமே ஸத்தே ஸப்³ப³ஞ்ஞு பு³த்³தே⁴ஹிபி போ³தே⁴தும் அஸக்குணேய்யே கரோதீதி. ததா²ஹி ஸா புன ஸஞ்ஜானனத்த²ம் நிமித்தகரணே தா³ருதச்ச²கஸதி³ஸாதிச. யதா²க³ஹித நிமித்தவஸேன அபி⁴னிவேஸகரணே ஹத்தி²த³ஸ்ஸக அந்த⁴ஸதி³ஸாதிச. உபட்டி²தவிஸயக்³க³ஹணே திணபுரிஸகேஸு மிக³போதகஸதி³ஸாதிச வுத்தாதி. பாளியம்பன –

ஸஞ்ஜானாதி ஸஞ்ஜானாதீதிகோ² பி⁴க்க²வே தஸ்மா ஸஞ்ஞாதி வுச்சதி. கிஞ்ச ஸஞ்ஜானாதி. நீலம்பி ஸஞ்ஜானாதி. பீதகம்பி ஸஞ்ஜானாதீதிஆதி³ வுத்தந்தி.

72. சேதயதீதி சேதனா. ஸம்பயுத்தத⁴ம்மே தஸ்மிம் தஸ்மிம் ஆரம்மணேவா கிச்சேவா அபி⁴ஸந்த³ஹதி புனப்புனம் க⁴டேதி, தத்த² பப³ந்த⁴வஸேன நிரந்தரம் பவத்தமானே கரோதீதி அத்தோ². பகப்பேதி வா தே. ஸம்வித³ஹதி ஆரம்மணபடிலாபா⁴யவா கம்மஸித்³தி⁴யா அபி⁴ஸங்க²ரோதி. ஆயூஹதிவா தே. ஆரம்மணே ஸம்பிண்டே³தி ஏகதோ ஸமோ ஸரந்தே கரோதீதி அத்தோ². ததா²ஹி ஸா ஆயூஹனரஸாஹிச ஸம்விதா⁴னபச்சுபட்டா²னாதிச வுத்தா. தாயஹி தஸ்மிம் நிரந்தரம் உஸ்ஸுக்கன ப்³யாபாரவஸேன பவத்தமானாய தம் ஸம்பயுத்தாபி அத்தனோ அத்தனோ கிச்சம் குருமானா தஸ்மிம் ததே²வ பவத்தந்தீதி. தேனேவ ஸா ஸகிச்ச பரகிச்ச ஸாத⁴க ஜேட்ட²ஸிஸ்ஸ மஹாவட்³ட⁴கி ஆதி³ஸதி³ஸாதி வுத்தாதி.

[74] விபா⁴வனியம் பன

சேதேதி ஸங்க²தாபி⁴ஸங்க²ரணே ப்³யாபாரமாபஜ்ஜதீதி வத்வா தத³த்த²ஸாத⁴னத்த²ம் யம் வுத்தம் ‘‘விப⁴ங்கே³ ஸுத்தந்தபா⁴ஜனியே ஸங்கா² ரக்க²ந்த⁴ம் விப⁴ஜந்தேன ஸங்க²தமதிஸங்க²ரோந்தீதி ஸங்கா²ராதி வத்வா’’தி. தம் ந யுஜ்ஜதி.

ந ஹி விப⁴ங்கே³ ஸுத்தந்தபா⁴ஜனியே ஸங்க²தம பி⁴ஸங்க²ரோந்தீதி ஸங்கா²ராதி வுத்தம் அத்தி². க²ந்த⁴ஸம்யுத்தகே பனேதம் வுத்தந்தி.

73. ஏகத்தாரம்மணஸங்கா²தோ அக்³கோ³ கோட்டா²ஸோ கோடி வா ஏதஸ்ஸாதி ஏகக்³க³ம். சித்தம், தஸ்ஸ பா⁴வோ ஏகக்³க³தா. ஆரம்மணஞ்ஹி நாம ஏகம்பி நானாஸபா⁴வம் ஹோதி. தஸ்மா தஸ்ஸ ஏகஸ்ஸபி நானாஸபா⁴வேஸு விக்கே²பம் அபத்வா ஏகஸ்மிம் ஸபா⁴வே க²ணமத்தம்பி பவத்தஸ்ஸ சித்தஸ்ஸ யோனிச்சலாகாரோ அத்தி² அயம் தஸ்மிம் ஏகக்³கா³பி⁴தா⁴னஸ்ஸ ஏகக்³க³பு³த்³தி⁴யாச பவத்திஹேதுபா⁴வேன க³ய்ஹதீதி. தே நேவ ஹி ஸா நிவாதே தீ³பச்சீனம் டி²திவிய சேதஸோ டி²தீதி த³ட்ட²ப்³பா³தி வுத்தா.

[75] விபா⁴வனியம் பன

‘‘ஏகம் ஆரம்மணம் அக்³க³ம் இமஸ்ஸாதி ஏகக்³க³’’ந்தி வுத்தம். தத்த²பி அக்³க³ஸத்³தோ³ கோட்டா²ஸேவா கோடியம்வா பவத்தோதி யுத்தோ. கேசிபன ஆரம்மணே பவத்தோதி வத³ந்தி. தம் ந ஸுந்த³ரம்.

ந ஹி அக்³க³ஸத்³தோ³ ஆரம்மணபரியாயோ கத்த²சி தி³ட்டோ²தி.

74. ஜீவந்தி ஸம்பயுத்தாத⁴ம்மா ஏதேனாதி ஜீவிதம். இந்தோ³தி இஸ்ஸரோ. இத⁴ பன இஸ்ஸரபா⁴வோ வுச்சதி. இந்த³ம் இஸ்ஸரபா⁴வம் காரேதீதி இந்த்³ரியம். ஜீவிதஞ்ச தம் இந்த்³ரியஞ்சாதி ஜீவிதிந்த்³ரியம். தஞ்ஹி மயா வினா தும்ஹாகம் ஜீவிதம் நத்தி². தஸ்மா தும்ஹாகம் ஜீவனகிச்சே மம் இஸ்ஸரம் கரோதா²தி வத³ந்தமிவ ஸஹஜாதத⁴ம்மே அபி⁴ப⁴வித்வா பவத்ததீதி. ததா² ஹி தம் பவத்தஸந்ததாதி⁴பதேய்யந்தி ச பது³முப்ப லானுபாலகமுத³கம் வியாதிச வுத்தம். தத்த² யாவ க²ந்த⁴பரினிப்³பா³னா அனுப்பப³ந்த⁴வஸேன பவத்தமானா சித்தஸந்ததி பவத்தஸந்ததினாம. அதி⁴பதிபா⁴வோ ஆதி⁴பதேய்யம். பவத்தஸந்ததியம் ஆதி⁴பதேய்யம் அஸ்ஸாதி ஸமாஸோ. புனப்புனம் நிருத்³த⁴ம்பி ஹி சித்தஸந்தானம் தஸ்ஸ ப³லேன புனப்புனம் ஜீவந்தம் ஹுத்வா யாவ க²ந்த⁴பரினிப்³பா³னா புனப்புனம் பவத்ததியேவ.

ந ஹி ஜீவிதரஹிதேஸு அனிந்த்³ரியப³த்³த⁴த⁴ம்மேஸு தாதி³ஸோ பவத்தஸந்ததி விஸேஸோனாம அத்தீ²தி.

75. மனஸ்மிம் ஆரம்மணம் அஸுஞ்ஞம் மனம்வா ஆரம்மணே நிச்சனின்னம் கரோதீதி மனஸிகாரோ. ஸோ பன திவிதோ⁴ வீதி²படிபாத³கோ ஜவனபடிபாத³கோஆரம்மணபடிபாத³கோதி. தத்த² பஞ்சத்³வாராவஜ்ஜனம் வீதி² படிபாத³கோ நாம. தஞ்ஹி பஞ்சத்³வாரிக சித்தஸந்ததிம் ஆரம்மணே படிபாதே³தி யோஜேதீதி. மனோத்³வாராவஜ்ஜனம் ஜவனபடிபாத³கோ நாம. தம்பி ஜவன ஸந்ததிம் ஆரம்மணே படிபாதே³தி யோஜேதீதி. இத³மேவ த்³வயம் தத்த² தத்த² யோனிஸோ மனஸிகாரோதிச அயோனிஸோ மனஸிகாரோ திச வுத்தம். தஞ்ஹி பகதியா ஸமுதா³சிண்ணனின்னனியாமிதாதீ³ஹி பச்சயே ஹி உபத்த²ம்பி⁴தம் ஹுத்வா சித்தஸந்தானம் யோனிஸோ அயோனிஸோவா ஆரம்மணே நின்னம் கரோதீதி. படிஸந்தி⁴சித்ததோ பன பட்டா²ய பவத்தமானா சித்தஸந்ததி ஆரம்மணம் முஞ்சித்வா நிருஜ்ஜி²த்வாபி புன உப்பஜ்ஜமானா யஸ்ஸ த⁴ம்மஸ்ஸ வஸேன தஸ்மிம்யேவ ஆரம்மணே உப்பஜ்ஜதி அஸதி காரணவிஸேஸே. ஸோ ஆரம்மணபடிபாத³கோனாம. அயமிதா⁴ தி⁴ப்பேதோ. அயஞ்ஹி ஆரம்மணம் சித்தே சித்தம்வா ஆரம்மணே படிபாதே³தி யோஜேதீதி. ததா² ஹி அயம் ஸாரண லக்க²ணோதி ச ஸம்பயுத்தானம் ஆரம்மணேன ஸம்பயோஜனரஸோதிச ஆரம்மணபடிபாத³கட்டே²ன ஸம்பயுத்தானம் ஸாரதீ²விய த³ட்ட²ப்³போ³திச வுத்தோ. தத்த² ஸாரணலக்க²ணோதி ஸாரதீ²விய அஸ்ஸானம் ஸம்பயுத்தத⁴ம்மானம் உஜும் ஆரம்மணாபி⁴முக²ம் பவத்தயனலக்க²ணோதி அத்தோ². ஸமம் தா⁴ரேந்திதி ஸாதா⁴ரணா. ஸப்³பே³ஸம் சித்தானம் ஸாதா⁴ரணா ஸப்³ப³சித்தஸாதா⁴ரணா.

76. விதக்கேதீதி விதக்கோ. ததா² ததா² ஸங்கப்பேத்வா ஆரம்மணம் ஆரோஹதீதி அத்தோ². தஸ்மிம் பன தம் கதா² ஆரோஹந்தே ஸம்பயுத்தத⁴ம்மாபி தம் ஆரோஹந்தி. ததா³ ஸோயேவ தே ஆரம்மணம் அபி⁴னிரோபேந்தோனாம ஹோதீதி கத்வா ஆரம்மணா பி⁴னிரோபனலக்க²ணோ விதக்கோதி வுத்தோ. ராஜவல்லப⁴ம் நிஸ்ஸாய ஜனபத³கா³ஸினோ ராஜகே³ஹாரோஹனஞ்சேத்த² நித³ஸ்ஸனம். அவிதக்கம்பி ஹி சித்தம் ஸவிதக்கத⁴ம்மஸந்தானே விதக்கேன ஸஹ பவத்தபரிசய ப³லேன ஆரோஹனதோ விதக்கேன அதினிரோவிதமேவனாம ஹோதீதி. அபிச, அவிதக்கம்பி பஞ்சவிஞ்ஞாணம் வத்தா²ரம்மண ஸங்க⁴ட்டனவஸேன ஆரோஹதி. து³தீயஜ்ஜா²னாதீ³னிச உபசாரபா⁴வனாவஸேன ஆரோஹந்தி. மஜ்ஜி²மட்ட²கதா²யம் பன கிம்வா ஏதாய யுத்தியாதி வத்வா இமமத்த²ம் த³ஸ்ஸேதி. சித்தம்பி ஹி ஆரம்மணம் ஆருஹதியேவ. தஸ்ஸ பன நிச்சம் ஸஹாயோ மனஸிகாரோ. தஸ்மிஞ்ஹி அஸதி தம் நியாமகரஹி தா நாவாவிய யம்வாதம்வா ஆரம்மணம் க³ஹேத்வா பவத்தேய்யாதி. இதி பஞ்சவிஞ்ஞாணம் மனஸிகாரஸஹாயம் ஹுத்வா அத்தனோ ஆரம்மணவிஜானனஸத்திவஸேனேவ ஆரம்மணம் ஆரோஹதி. அகுஸலம் பத்வா பன சித்தம்பி லோபா⁴த³யோபி ஆரம்மணாருஹனே தா²மவதா ஏவ ஹோந்தி. பாபஸ்மிம் ரமதே மனோதி ஹி வுத்தம். து³தீயஜ்ஜா²ன சித்தாதீ³னிச மனஸிகார வீரியஸ்ஸதீனம்பி வஸேன ஆரோஹந்தி. விதக்கோ பன ததா² ததா² ஸங்கப்பேத்வா அத்தஸஹிதே த⁴ம்மே ஆரம்மணாருஹனே ஸுட்டு²தரம் ப³லவந்தே கரோதி. இதி தஸ்மிம் கிச்சே அஞ்ஞேஸம் ஸாபி⁴ஸயப்³யாபாரதாயஏவ அயம் விதக்கோதி வுத்தோதி. ஏவம் பன வத்தப்³ப³ம். நனு அஞ்ஞேபி அரூபத⁴ம்மா ஸாரம்மணஸபா⁴வா ஆரம்மணம் ஆரோஹந்தி. அத² ச பன கஸ்மா அயமேவ விதக்கோதி வுத்தோதி. அஞ்ஞேஸம் பன ஆருஹனம் கிச்சந்தரயோக³வஸேனேவ ஸித்³த⁴ம். இமஸ்ஸ பன இதோ அஞ்ஞம் கிச்சம் நாம நத்தி². தஸ்மா அயமேவ ததா² வுத்தோதி.

77. விசரதீதி விசாரோ. விசாரேதிவா ஸம்பயுத்தகேத⁴ம்மே, தே வா த⁴ம்மா விசரந்தி ஏதேனாதி விசாரோ. விசரணஞ்சேத்த² விதக்கா ருள்ஹே தஸ்மிம்யேவ ஆரம்மணே ஸபா⁴வாகாரபாதுபா⁴வத்த²ம் புனப்புனம் அனுமஜ்ஜனவஸேன பவத்தனம் த³ட்ட²ப்³ப³ம். ஏத்த²ச விதக்கோ ஓளாரிகோ புப்³ப³ங்க³மோ ஆரம்மணே சித்தஸ்ஸ பத²மாபி⁴னிபாதபூ⁴தோச ஹோதீதி க⁴ண்டா³பி⁴கா⁴தோ விய த³ட்ட²ப்³போ³. விசாரோ ஸுகு²மோ அனுசரோ தஸ்மிம்யேவ ஆரம்மணே சித்தஸ்ஸ அனுப³ந்த⁴னபூ⁴தோ ச ஹோதீதி க⁴ண்டா³னுரவோவிய த³ட்ட²ப்³போ³தி.

78. அதி⁴முச்சனம் அதி⁴மோக்கோ². ஆரம்மணே ஏவம் நுகோ² நோ நுகோ²தி ஏவம் பவத்தம் ஸம்ஸப்பனம் அதி⁴ப⁴வித்வா விச்சி²ந்தி³த்வா பக்க²கோ முச்சனவஸேன சித்தஸ்ஸ பவத்தீதி வுத்தம் ஹோதி. ஏவஞ்ச கத்வா ஸோ ஆரம்மணே ஸன்னிட்டா²னலக்க²ணோதி ச ஆரம்மணே நிச்சலபா⁴வேன இந்த³கீ²லஸதி³ஸோதிச வுத்தோ.

79. வீரஸ்ஸ கம்மஸூரஸ்ஸ பா⁴வோ கம்மவா வீரியம். தம்ஸமங்கீ³ புக்³க³லோ ஹி கம்மஸூரோ ஹோதி. மஹந்தம்பி கம்மம் அப்பகதோ க³ண்ஹாதி. து³க்கரம்பி ஸுகரதோ, பா⁴ரியம்பி அபா⁴ரியதோ க³ண்ஹாதி. அத்தகிலமத²ம் நக³ணேதி. கம்மஸித்³தி⁴யா நிச்சம் பக்³க³ஹித காய சித்தோவ ஹோதி. தஸ்மா தம் தஸ்ஸ புக்³க³லஸ்ஸ ததா²பவத்தியா ஹேதுபா⁴வோசேவ ததா²பவத்தஸ்ஸ ச தஸ்ஸ புக்³க³லஸ்ஸ காய சித்தக்ரியாபூ⁴தம் ஹோதீதி. விதி⁴னாவா நயேன உபாயேன வீரியவதோ கிம் நாமகம்மம் ந ஸிஜ்ஜ²தீதிஆதி³கேன புப்³பா³பி⁴ஸங்கா²ரேன ஈரயிதப்³ப³ம் பவத்தயிதப்³ப³ந்தி வீரியம். விஸேஸேனவா ஸகபரஹிதஹேது ஈரந்தி கம்பந்தி தம் ஸமங்கி³னோ ஏதேனாதி வீரியம். ஏத்த²ச வீரியு பத்த²ம்பி⁴தா ஸம்பயுத்தத⁴ம்மா ஸதா³ அனிக்கி²த்தது⁴ரா பக்³க³ஹிதஸீஸாவிய ஹுத்வா அத்தனோ அத்தனோ கிச்சஸம்பத்தியா நிச்சம் உஸ்ஸாஹஜாதாவ ஹோந்தி, தேஸுச ததா²ஹோந்தேஸு தம்ஸமங்கி³னோ புக்³க³லாபி அத்தனோவா பரேஸம்வா ஹிதஹேது நிச்சம் ப்³யாவடகாயசித்தா ஹோந்தி. தஸ்மா ஈரந்தி கம்பந்தீதி வுச்சந்தீதி. ததா² ஹி தம் உபத்த²ம்ப⁴னலக்க²ணந்தி ச பக்³க³ஹலக்க²ணந்தி ச உஸ்ஸாஹலக்க²ணந்தி ச கே³ஹஸ்ஸ தூ²ணூபத்த²ம்ப⁴ன ஸதி³ஸந்தி ச ஸம்மா ஆரத்³த⁴ம் ஸப்³ப³ஸம்பத்தீனம் மூலந்தி ச வுத்தந்தி.

80. வினயதி காயசித்தம் தப்பேதி, துட்ட²ம் ஸுஹிதம் ஜனேதி, ஸுபுப்பி²தபது³மம்வியவா வட்³டே⁴தீதி பீதி, வினந்திவா ஏதாய தம் ஸமங்கி³னோ புண்ணசந்தோ³விய விரோசமான காயசித்தா ஹோந்தீதி பீதி. ஸா பஞ்சவிதா⁴ கு²த்³தி³கா பீதி, க²ணிகாபீதி, ஓக்கந்திகா பீதி, உப்³பே³கா³ பீதி, ப²ரணாபீதீதி.

81. ச²ந்த³னம் ச²ந்தோ³. இச்சா² பத்த²னா அபி⁴ஸந்தீ⁴தி வுத்தம் ஹோதி. ஸோபன து³விதோ⁴ தண்ஹாச²ந்தோ³, கத்துகம்யதா ச²ந்தோ³தி. இத⁴ கத்துகம்யதா ச²ந்தோ³ அதி⁴ப்பேதோ. ஏத்த²ச கத்தும் காமேதி இச்ச²தீதி கத்துகாமோ. ச²ந்த³ஸமங்கி³புக்³க³லோ. தஸ்ஸ பா⁴வோ கத்துகம்யம். ததே³வ கத்துகம்யதா, யதா² தே³வோயேவ தே³வதாதி. ஏத்த²ச கத்துஸத்³தோ³ ஸப்³பே³ஸம் தா⁴துஸத்³தா³னம் அத்தே² ஸங்க³ஹேத்வா பவத்தோ. தஸ்மா கத்துகம்யதாதி ஏதேன கதே²துகம்யதா சிந்தேதுகம்யதா த³ட்டு²கம்யதா ஸோதுகம்யதாதி ஏவமாதீ³னி ஸப்³ப³ க்ரியாபதா³னி ஸங்க³ஹிதானி ஹோந்தீதி த³ட்ட²ப்³ப³ம். ஸோ பன ஆரம்மணம் இச்ச²ந்தோபி தண்ஹா விய அஸ்ஸாத³ன ரஜ்ஜன லக்³க³ன வஸேன நஇச்ச²தி. யேன யேன பன அத்தி²கோ ஹோதி. தம் தம் அத்த²ம் ஆராதே⁴து காமதாவஸேனேவ இச்ச²தி. யதா² ரஞ்ஞோ இஸ்ஸாஸா த⁴னேனவா யஸேனவா அத்தி²கா ராஜவேரீனம் விஜ்ஜ²னவஸேன ச²ட்³டி³தப்³ப³யுத்தகேபி ஸரே ப³ஹூ இச்ச²ந்தியேவ. ஏவமேவம் அயம்பி பரஸ்ஸ விஸ்ஸஜ்ஜிதப்³ப³யுத்த கானிபி தா³னவத்தூ²னி அலத்³தா⁴னிபி லத்³து⁴ம் இச்ச²தி. லத்³தா⁴னிபி ரக்கி²தும் இச்ச²தீதி. அயஞ்ச அத்தோ² விபா⁴வனியம்பி வுத்தோயேவ.

வுத்தஞ்ஹி தத்த²

தா³னவத்து²விஸ்ஸஜ்ஜனவஸேன பவத்தகாலேபி சேஸ விஸ்ஸஜ்ஜி தப்³பே³ன தேன அத்தி²கோயேவ. கி²பிதப்³ப³உஸூனம் க³ஹணே அத்தி²கோ இஸ்ஸாஸோவியாதி.

தத்த² யத³க்³கே³ன தா³னம் த³ஸ்ஸாமீதி தா³னவத்து²பரியேஸனாதி³வஸேன பவத்தா புப்³ப³பா⁴க³சேதனா தா³னவத்து²விஸ்ஸஜ்ஜன ஸங்காதே தா³னே ஸங்க³ஹிதா ஹோதி. தத³க்³கே³ன தஸ்ஸா புப்³ப³பா⁴க³சேதனாய பவத்திகாலோ இத⁴ தா³னவத்து² விஸ்ஸஜ்ஜனவஸேன பவத்த காலோதி வேதி³தப்³போ³. விஸ்ஸஜ்ஜிதப்³பே³னாதி விஸ்ஸஜ்ஜிதப்³ப³ யுத்தகேன. தேன அத்தி²கோயேவ பரஸ்ஸ விஸ்ஸஜ்ஜனத்தா²யாதி அதி⁴ப்பாயோ. கி²பிதப்³ப³உஸூனம் க³ஹணேதி தேஸம் அகதானம் கரணவஸேன அலத்³தா⁴னம் பரியேஸனவஸேன க³ஹணே. ஏத்த² பன கேசி இஸ்ஸாஸோ உஸூனிகி²பித்வாபி லப⁴மானோ தேஹி உஸூஹி அத்தி²கோயேவாதி ஏவ மத்த²ம் வத³ந்தி. ஸோ நயுஜ்ஜதி. ஏவஞ்ஹி ஸதி கி²பிதஉஸூனந்தி வுத்தம் ஸியா. யதா² கதி²தம் லபிதம் ததா²க³தேனாதி. ததா² விஸ்ஸஜ்ஜிதப்³பே³ நாதி ஏத்த²பீதி. கேசி இஸ்ஸாஸோ உஸூஹி அனத்தி²கோ கி²பந்தோ நஹோதி. அத்தி²கோயேவ ஸமானோ அஞ்ஞம் ஆனிஸம்ஸம் இச்ச²ந்தோ கி²பதீதி ஏவம் அத்த²ம் வத³ந்தி. ஸோபி நயுஜ்ஜதி. ஏவஞ்ஹி ஸதி உஸூஹி அத்தி²கோயேவ தானி கி²பந்தோ இஸ்ஸாஸோவியாதிவுத்தம் ஸியாதி. அத்த²தோ பன தது³ப⁴யம்பி அவஹஸிதப்³ப³மேவ ஹோதீதி. யஸ்மாச ச²ந்த³ஸம்பயுத்தம் சித்தம் ஆரம்மணம் க³ண்ஹந்தம் ச²ந்த³வஸேன அதி இச்ச²மானம் விய விலுப்பமானம் விய க³ண்ஹாதி. தஸ்மா அயம் ஆரம்மணக்³க³ஹணே சேதஸோ ஹத்த²ப்பஸாரணம்வியாதி வுத்தோ. ஏத்த²ச ஹத்த²ப்பஸாரணம்வியாதி இத³ம் அபூ⁴தபரிகப்பவசனம் த³ட்ட²ப்³ப³ம். ந ஹி சித்தஸ்ஸ ஹத்தோ²னாம அத்தி². அத்த²விஸேஸபாகடத்த²ம் பன அபூ⁴தம்பி பூ⁴தம் விய கப்பேத்வா வுத்தந்தி த³ட்ட²ப்³ப³ம். அபிச, அயம் ச²ந்தோ³னாம தா²மபத்தோ தண்ஹாய ப³லவதரோ ஹோதி. ததா² ஹேஸ அதி⁴பதிபூ⁴தோ இத்³தி⁴பாத³பூ⁴தோச ஹோதீதி. யதி³ ஹி ஸோ தண்ஹாய ஸமானப³லோ ஸியா. இமே ஸத்தா தண்ஹாய ஹத்தே² டி²தா தண்ஹா பரிக்³க³ஹிதானி த⁴னபோ⁴க³ரஜ்ஜஸுகா²னிவா தி³ப்³ப³ப்³ரஹ்மஸம்பத்தியோவா ச²ட்³டே³த்வா வட்டது³க்க²தோ நிய்யாதும் நஸக்கி²ஸ்ஸந்தி யேவாதி.

82. ஸோப⁴ணா ஸோப⁴ணேஸு சித்தேஸு பகிரந்தீதி பகிண்ணா. கேஏவ பகிண்ணகா. அஞ்ஞேஹி அஞ்ஞேஸம்வா ஸமானா அஞ்ஞஸமானா. யதா³ ஸோப⁴ணசித்தேஸு யுத்தா, ததா³ தேஹி அஸோப⁴ணதோ அஞ்ஞேஹி ஸமானா. யதா³ அஸோப⁴ணசித்தேஸு யுத்தா, ததா³ தேஹி ஸோப⁴ணதோ அஞ்ஞேஹி ஸமானா ஸதி³ஸாதி வுத்தம் ஹோதி.

அஞ்ஞஸமானராஸிம்ஹி பரமத்த²தீ³பனா.

83. இதா³னி அகுஸலராஸிம் த³ஸ்ஸேந்தோ மோஹோதிஆதி³மாஹ. தத்த² முய்ஹதீதி மோஹோ. முய்ஹந்தி ஸத்தா ஏதேனாதிவா மோஹோ. முய்ஹனமத்தம்வா மோஹோ, சதுரங்க³தமஸ்ஸ விய சக்கு²ஸ்ஸ ஸப்³ப³ஸோ கல்யாணபக்க²ம் படிச்சா²தே³த்வா சித்தஸ்ஸ அந்த⁴பா⁴வகரணந்தி வுத்தம் ஹோதி. பாபபக்க²ம் பன பத்வா ஸோ ஞாணக³திகோ ஹோதீதி த³ட்ட²ப்³போ³. ததா² ஹேஸ பாளியம் மிச்சா²ஞாணந்தி வுத்தோ. அட்ட²கதா²ஸுச மிச்சா²ஞாணந்தி பாபக்ரியாஸு உபாயசிந்தாவஸேனபவத்தோ மோஹோதி வுத்தம். அவிஜ்ஜாயச அப்படிபத்தி மிச்சா²படிபத்திவஸேன து³வித⁴பா⁴வோ வுத்தோ. ஏத்த²ச அப்படிபத்தீதி கல்யாணபக்கே² அஞ்ஞாணமேவ வுச்சதி. மிச்சா²படிபத்தீதி பாபபக்கே² மிச்சா²ஞாணமேவ வுச்சதீதி, ததா² ஹி பாபபக்க²ம் பத்வா பஞ்சத⁴ம்மா ஞாணக³திகா ஹோந்தி மோஹோ, லோபோ⁴, தி³ட்டி², விதக்கோ, விசாரோதி. சித்தேன பன ஸத்³தி⁴ம் ச²ப்³பி³தா⁴ ஹோந்தி. தேஹி பகதியா விஞ்ஞுஜாதிகேஸு ஸுதபரியத்திஸம்பன்னேஸுச உப்பன்னா பாபக்ரியாஸு தம் தம் உபாயத³ஸ்ஸனவஸேன தேஸம் தத்த² சே²கபா⁴வம் படிப³லபா⁴வஞ்ச ஸாதே⁴ந்தீதி.

84. நஹிரியதி காயது³ச்சரிதாதீ³ஹி நலஜ்ஜதி நஜிகு³ச்ச²தீதி அஹிரீ. ஹிரிப்படிபக்கா²வா அஹிரீ, ஸாஏவ அஹிரிகம். தஞ்ஹி பாப க்ரியாஸு பச்சுபட்டி²தாஸு ஹிரியா ஓகாஸம் அத³த்வா தாஸு ருசிம் உப்பாதே³த்வா பவத்ததீதி. ததா² ஹி தம் காயது³ச்சரிதாதீ³ஹி அஜிகு³ச்ச²னலக்க²ணந்திச அலஜ்ஜாலக்க²ணந்திச வுத்தம்.

85. நஓத்தப்பதீதி அனோத்தப்பம். காயது³ச்சரிதாதீ³ஹி நபா⁴யதி நஉத்ரஸதீதி அத்தோ². ஓத்தப்பப்படிபக்க²ம்வா அனோத்தப்பம். தம்பி ஹி தாஸு பச்சுபட்டி²தாஸு ஓத்தப்பஸ்ஸ ஓகாஸம் அத³த்வா சித்தம் தாஸு அஸாரஜ்ஜமானம் கத்வா பவத்ததீதி. ததா² ஹேதம் காயது³ச்சரி தாதீ³ஹி அஸாரஜ்ஜலக்க²ணந்தி ச அனுத்தாஸலக்க²ணந்தி ச வுத்தம். வுச்சதி ச –

அஜேகு³ச்சீ² அஹிரிகோ, பாபாகூ³தா²வ ஸூகரோ;

அபீ⁴ருச அனோத்தப்பீ, ஸலபோ⁴ விய பாவகாதி.

86. உத்³த⁴ரதீதி உத்³த⁴டம். பாஸாணபிட்டே² வட்டேத்வா விஸ்ஸட்ட² கே³ண்டு³கோ விய நானாரம்மணேஸு விக்கி²த்தம் சித்தம், உத்³த⁴டஸ்ஸ பன சித்தஸ்ஸ உத்³த⁴ரணாகாரப்பவத்தியா பச்சயபூ⁴தோ த⁴ம்மோ உத்³த⁴ச்சம். தம் பன வாதேரிதம் ஜலம் விய த⁴ஜபடாகா வியச த³ட்ட²ப்³ப³ம்.

87. லுப்³ப⁴தீதி லோபோ⁴, லுப்³ப⁴ந்தி ஸம்பயுத்தா த⁴ம்மா ஏதே நாதி லோபோ⁴, லுப்³ப⁴னமத்தமேவவா ஏதந்தி லோபோ⁴. ஏத்த²ச லுப்³ப⁴னம்னாம ஆரம்மணாபி⁴ஸஜ்ஜனம் த³ட்ட²ப்³ப³ம். ஸோபன ஆரம்மணே லக்³க³ நட்டே²ன மக்கடாலேபோவிய அபி⁴கங்க²ட்டே²ன தத்தகபாலே கி²த்தமம்ஸ பேஸி விய அபரிசாக³ட்டே²ன தேலஞ்ஜன ராகோ³விய தண்ஹானதி³பா⁴வேன வட்³டி⁴த்வா ஸத்தானம் அபாயாவஹட்டே²ன ஸப்³பா³னி ஸுக்க²கட்ட² ஸாகா²பலாஸ திணகஸடானி மஹாஸமுத்³த³ம் வஹந்தீ ஸீக⁴தோதா நதீ³ விய த³ட்ட²ப்³போ³.

88. த³ஸ்ஸனம் தி³ட்டி². த⁴ம்மானம் யாதா²வஸபா⁴வேஸு ஞாணத³ஸ்ஸனம் விய தேஸமேவ அயாதா²வஸபா⁴வேஸு மிச்சா²த³ஸ்ஸனந்தி வுத்தம் ஹோதி. ஸாஹி ஏகச்சானம் பண்டி³தமானீனம் மிச்சா²விதக்கப³ஹுலானம் உப்பன்னா தா²மக³தா அயாதா²வபக்கே² படிவேத⁴ஞ்ஞாணக³திகா ஹோதீதி. ஸாபன மிச்சா²பி⁴னிவேஸலக்க²ணா பரமம்வஜ்ஜந்தி த³ட்ட²ப்³பா³.

89. மஞ்ஞதீதி மானோ. அஹம் லோகே ஏகோ புக்³க³லோ அஸ்மி. ந கட்ட²கலிங்க³ரோவிய அவமஞ்ஞனாரஹோதி ஏவம் அத்தானம் த³ள்ஹம் பக்³க³ஹேத்வா ஸமனுபஸ்ஸதீதி அத்தோ². ஸோபன ஜாதி குலத⁴ன போ⁴க³ யஸ இஸ்ஸரியாதீ³ஹி சேவ ஸீல ஸுத லாப⁴ஸக்காரா தீ³ஹிச கு³ணேஹி உபத்த²ம்பி⁴தோ அதிரேகதரம் வத்³தி⁴த்வா அத்தானம் ஜனமஜ்ஜே² கேதும்விய அச்சுக்³க³தம் மஞ்ஞதி. தஸ்மா ஸோ உன்னதிலக்க²ணோதிச உம்மாதோ³வியாதிச வுத்தோ.

90. து³ஸ்ஸதீதி தோ³ஸோ. ஸோபன சண்டி³க்கட்டே²ன பஹதா ஸிவிஸோவிய விஸப்பனட்டே²ன அஸனிபாதோவிய அத்தனோ நிஸ்ஸய த³ஹனட்டே²ன தா³வக்³கி³விய து³ஸ்ஸனட்டே²ன லத்³தோ⁴காஸோ ஸபத்தோவிய ஸப்³ப³ஸோ அஹிதராஸி பா⁴வட்டே²ன விஸ ஸம்ஸட்ட² பூதிமுத்தம் விய த³ட்ட²ப்³போ³.

91. இஸ்ஸதீதி இஸ்ஸா. பரஸம்பத்திம் உஸ்ஸூயதீதி அத்தோ². ஸாஹி பரேஸம் பகதியா லத்³த⁴ஸம்பத்திம் தி³ஸ்வா வா ஸுத்வாவா நஸஹதி. தஸ்ஸா ஸம்பத்தியா விபத்திம் இச்ச²தி ஆகங்க²தி. அஸுகோ இத³ம்னாம லபி⁴ஸ்ஸதீதி ஸுத்வாபி நஸஹதி. தஸ்ஸ அலாப⁴ம் இச்ச²தி ஆகங்க²தி. தஸ்மா ஸா பரஸம்பத்தீனம் உஸ்ஸூயனலக்க²ணாதி வுத்தா.

92. மம ஏவ இத³ம் கு³ணஜாதம்வா வத்து²வா ஹோது. மா அஞ்ஞஸ்ஸாதி ஏவம் அத்தனோ ஸம்பத்திஹேது அவிப்பா²ரிகதாவஸேன சரதி பவத்ததீதி மச்ச²ரம், ததா² பவத்தம் சித்தம். மச்ச²ரஸ்ஸ பா⁴வோ மச்ச²ரியம். இத³ம்ச இஸ்ஸா விய து³வித⁴ம் அத்தனா லத்³த⁴ஸம்பத்தி லபி⁴தப்³ப³ஸம்பத்தி வஸேன. தத்த² பகதியா லத்³த⁴ஸம்பத்தியம் தாவ தம் பரேஹி ஸா தா⁴ரணம்வா யேன கேனசிவா காரணேன அத்தஸந்தகபா⁴வதோ முச்சித்வா பரேஸம் ஸந்தகபா⁴வம் க³மிஸ்ஸமானம் தி³ஸ்வா வா ஸுத்வாவா சிந்தேத்வா து³க்கீ² து³ம்மனோ ஹோதி, லபி⁴தப்³ப³ஸம்பத்தியம்பி அஸுகஸ்மிம் தே³ஸே வாகாலேவா இத³ம்னாம ப⁴விஸ்ஸதீதி ஸுத்வாவா சிந்தேத்வாவா தம் அத்தனாவ லத்³து⁴ம் இச்ச²தி. அஞ்ஞேஸம் லாப⁴ம் நஇச்ச²தி. அஞ்ஞே லபி⁴ஸ்ஸந்தீதி ஸுத்வாவா சிந்தேத்வாவா து³க்கீ² து³ம்மனோ ஹோதீதி. ததா² ஹேதம் லத்³தா⁴னம்வா லபி⁴தப்³பா³னம்வா அத்தனோ ஸம்பத்தீனம் நிக்³கு³ஹனலக்க²ணந்தி வுத்தம். ஏத்த²ச லபி⁴தப்³ப³ஸம்பத்தியம் யஸ்ஸ லாப⁴ம் நஇச்ச²தி. ஸோலப⁴தீதிவா லபி⁴ஸ்ஸதீதிவா ஸுத்வாவா சிந்தேத்வாவா சித்தவிகா⁴தோ இஸ்ஸானாம. யம் யம் அத்தனா லத்³து⁴ம் இச்ச²தி. தம் தம் அத்தனா அலப்³ப⁴மானகம் சிந்தேத்வா சித்தவிகா⁴தோ மச்ச²ரியம்னாம. ந ஹி ஏதே த்³வே ஏகதோ உப்பஜ்ஜந்தீதி.

93. குக்குச்சந்தி ஏத்த² கிரியா கதம். குச்சி²தம் கதந்தி குகதம். குச்சி²தகிரியாதி அத்தோ². பண்டி³தேஹி ஏகந்தேன நிந்தி³தப்³போ³ சித்தப்பவத்திவிஸேஸோதி வுத்தம் ஹோதி. அத்த²தோ பன அகதம் வத மே கல்யாணம் கதம் பாபந்தி ஏவம் அனுஸோசனவஸேன பவத்தோ குக்குச்ச ஸம்பயுத்தசித்துப்பாதோ³யேவ, ஸோ ஹி ததா² பவத்தமானோபி புப்³பே³ அகதம்வா கல்யாணம் புன கதம் காதும் ந ஸக்கோதி. புப்³பே³ கதம் வா பாபம் புன அகதம் காதும் நஸக்கோதி. அத²கோ² குஸலத⁴ம்மேஸு சித்தபரியாதா³னாயஏவ ஸம்வத்ததி. தஸ்மா குச்சி²தகிரியா மத்தத்தா குகதந்தி வுச்சதீதி. வுத்தஞ்ஹேதம் அட்ட² கதா²யம் கதாகதஸ்ஸ ஸாவஜ்ஜானவஜ்ஜஸ்ஸ அபி⁴முக²க³மனம் படிஸாரோனாம. யஸ்மா பனேஸோ கதம்வா பாபம் அகதம் நகரோதி. அகதம்வா கல்யாணம் கதம் நகரோதி. தஸ்மா விரூபோ குச்சி²தோ வா படிஸாரோதி விப்படிஸாரோதி. ஏத்த²ச விப்படிஸாரோதி குக்குச்ச மேவ. குக்குச்சேச குச்சி²தே ஸதி தம் ஸம்பயுத்தசித்துப்பாதோ³பி குச்சி²தோயேவ. யேனச காரணேன குக்குச்சம் குச்சி²தம்னாம ஹோதி. தேனேவ காரணேன ஸோ சித்துப்பாதோ³பி குச்சி²தோனாம ஹோதீதி கத்வா ஸோ சித்துப்பாதோ³வ குகதபதே³ க³ஹேதும் யுத்தோதி வேதி³தப்³போ³. ஸுதி³ன்னகண்ட³ட்ட²கதா²யம் பன அயமத்தோ² உஜுகதோவ வுத்தோ. யதா²ஹ-விஞ்ஞூஹி அகத்தப்³ப³தாய குச்சி²தகிரியாபா⁴வதோ குக்குச்சந்தி.

[76] விபா⁴வனியம் பன

இமமத்த²ம் அஸல்லக்கே²த்வா யம் வுத்தம் ‘‘குச்சி²தம் கதந்தி குகதம். கதாகத து³ச்சரிதஸுசரித’’ந்தி. தம் ந யுஜ்ஜதியேவ. ஏதேன யஞ்ச தத்த² வுத்தம் ‘‘அகதம்பி ஹி குகதந்தி வோஹரந்தி. யம் மயா அகத²ம். தம் குகதந்திச. இத⁴ பன கதா கதம் ஆரப்³ப⁴ உப்பன்னோ விப்படிஸாரசித்துப்பாதோ³ குகத’’ந்திச. தம்பி ஸப்³ப³ம் படிக்கி²த்தமேவ ஹோதீதி.

குகதஸ்ஸ யதா²வுத்தசித்துப்பாத³ஸ்ஸ ததா²பவத்தி ஹேதுபா⁴வோ குக்குச்சம். அபிச, தா⁴துபாடே²ஸு குசஸத்³த³ம் ஸங்கோசன மனோ விலேக²னத்தே²ஸு பட²ந்தியேவ. தஸ்மா குச்சி²தேன ஆகாரேன கோசதி ஸங்கோசதி ந பாபஜிகு³ச்ச²னாகாரேனாதி குக்குசோ. குச்சி²தேனவா ஆகாரேன கோசதி விலிக²தி நகிலேஸஸல்லீக²னா காரேனாதி குக்குசோ. ததா² பவத்தத⁴ம்மஸமூஹோ. ஸோஹி குச்சி²தேன அகதம் வத மே கல்யாணம் கதம் பாபந்தி ஏவம் பவத்தேன அனுத்து²னனாகாரேன ஸங்கோசதி. குஸலத⁴ம்மஸமாதா³னே சித்தம் நமிதும்பி நதே³தி. மனம்வா விலேக²தி. ஸத்³தா⁴தீ³னம் ஸாரத⁴ம்மானம் தனுகரணேன சித்தம் குஸலத⁴ம்மஸமாதா³னே பரியாதி³ன்னதா²மப³லம் கரோதி. தஸ்மா குக்குசோதி வுச்சதி. யேன பன த⁴ம்மேன யுத்தத்தா ஸோ ததா² பவத்தோ ஹோதி. ஸோ குக்குச்சம்னாம குக்குசஸ்ஸ பா⁴வோதி கத்வா. தம் பன யஸ்மா புப்³பே³ அகதஞ்ச கல்யாணம் கதஞ்ச பாபம் ஆரப்³ப⁴ பச்சா² அனுதாபனவஸேன அனுஸோசனவஸேனச பவத்ததி. தஸ்மாதம் பச்சா²னுதாபலக்க²ணம் கதாகதானுயோசன ரஸந்தி ச வுத்தம். ஏத்த²ச பச்சா²னுதாபலக்க²ணந்தி புப்³பே³ கல்யாணஞ்ச அகத்வா பாபஞ்ச கத்வா ஆக³தத்தா பச்சி²மே காலே அனுதாபலக்க²ணந்தி அத்தோ². தேன குக்குச்சஸ்ஸ ஏகந்தேன அதீதாரம்மணதா ஸித்³தா⁴ ஹோதி. பச்சுப்பன்னானாக³தாரம்மணதாச படிஸித்³தா⁴தி. கதாகதா நுஸோசனரஸந்தி ஏத்த² கதஞ்ச பாபம் அகதஞ்ச கல்யாணந்தி யோ ஜேதப்³ப³ம். வுத்தஞ்ஹேதம் மஹானித்³தே³ஸே –

த்³வீஹாகாரேஹி குக்குச்சம் உப்பஜ்ஜதி கதத்தா ச அகதத்தா ச. கத²ஞ்ச த்³வீஹா.ல. அகதத்தாச. அகதம் மே காயஸு சரிதம். கதம் காயது³ச்சரிதந்தி உப்பஜ்ஜதி குக்குச்சம். அகதம் மே வசீஸுசரிதம்.ல. கதம் மனோது³ச்சரிதந்தி உப்பஜ்ஜதி குக்குச்சம். அகதாமே பாணாதிபாதா வேரமணீ. கதோ பாணாதி பாதோதி உப்பஜ்ஜதி குக்குச்சம்.ல. அகதா மே ஸம்மாதி³ட்டி². கதா மிச்சா²மிட்டீ²தி உப்பஜ்ஜதி குக்குச்சந்தி.

ஏதேன பன அகதஸுசரிதா ரம்மணதாய கதது³ச்சரிதா ரம்மணதாயச வஸேன குக்குச்சஸ்ஸ த்³விதா⁴பா⁴வோயேவ ஸித்³தோ⁴ ஹோதி. த்³வீஹாகாரேஹீதி ஹி வுத்தம். ஸோச கோ² புப்³பே³ பாபம் கத்வா பச்சா² அபாயப⁴யதஜ்ஜிதானஞ்சேவ அபாயேஸு பதித்வா புப்³பே³ அத்தனா கதகம்மம் அனுஸ்ஸரந்தானஞ்ச ஹோதி. நஅஞ்ஞேஸம், அகதம் மே காயஸுசரிதம். கதம் காயது³ச்சரிதந்தி ஹி வுத்தம். யதா² பன மானோ து³விதோ⁴ ஹோதி யாதா²வமானோ அயாதா²வமானோதி. ததா² குக்குச்சம்பி, யாதா²வகுக்குச்சம், அயாதா²வ குக்குச்சந்தி து³வித⁴ம் ஹோதி. தத்த² அயாதா²வ குக்குச்சம்பி உப்பஜ்ஜமானம் த்³வீஹாகாரேஹோ உப்பஜ்ஜதி அகதம் வத மே கல்யாணம் கதம் பாபந்தி. கதமம் பன தந்தி. யஞ்ச புப்³பே³ கல்யாணகம்மேபி பாபஸஞ்ஞீ பாபதி³ட்டி² அகத்வா பாபகம்மேபி கல்யாணஸஞ்ஞீ கல்யாணதி³ட்டி² கத்வா பச்சா² அனுஸோசனவஸேன உப்பஜ்ஜதி. யஞ்ச புப்³பே³ கல்யாணே கல்யாணஸஞ்ஞீ கத்வா பச்சா² பாபஸஞ்ஞினோ பாபேச பாஸஞ்ஞீ அகத்வா பச்சா² கல்யாணஸஞ்ஞினோ உப்பஜ்ஜதி. இத³ம் அயாதா²வகுக்குச்சம்னாம. அனவஜ்ஜே ஸாவஜ்ஜஸஞ்ஞீ, கப்பியே அகப்பியஸஞ்ஞீ, அனாபத்தியம் ஆபத்திஸஞ்ஞீதிஆதி³னாபி யோஜேதப்³ப³ம். இத³ஞ்ச ஸப்³ப³ம் உப்பஜ்ஜமானம் த்³வீஹா காரேஹேவ உப்பஜ்ஜதி. தஸ்மா த்³வீஸுஏவ ஸங்க³ஹிதந்தி த³ட்ட²ப்³ப³ம். யம் பன மஹானித்³தே³ஸேயேவ ஹத்த²குக்குச்சகம்பி குக்குச்சம். பாத³குக்குச்சகம்பி குக்குச்சம். ஹத்த²பாத³குக்குச்சகம்பி குக்குச்சந்தி நித்³தி³ட்ட²ம். தம் அஸம்யத குக்குச்சம்னாம. யம் பன தம் பி⁴க்கு² குக்குச்சாயந்தா நபடிக்³க³ண்ஹிம்ஸூதி வினயே ஆக³தம். யஞ்ச கத²ம் குக்குச்சப்பகததாய ஆபஜ்ஜதி கப்பியே அகப்பியஸஞ்ஞிதா அகப்பியே கப்பியஸஞ்ஞிதாதி ஆக³தம். தம் வினயகுக்குச்சம்னாம. தம்பன வினயஸம்ஸயோஏவ. ஸோச கோ² அத்தனோ அவிஸயே கப்பதி நுகோ² நோனுகோ²தி ஸம்ஸப்பனாகாரேன பவத்தோ குஸல க்ரிய சித்துப்பாதோ³. ஸோபன யேஸம் உப்பஜ்ஜதி. தேஸு யே ஸிக்கா²காமா, தே தம்கம்மம் நகரோந்தி. தே ஸந்தா⁴ய குக்குச்சாயந்தா நபடிக்³க³ண்ஹிம்ஸூதி வுத்தம். யே பன கரோந்தியேவ. தே கப்பியவத்து²ஸ்மிம்பி ஆபத்திம் ஆபஜ்ஜந்தி. தே ஸந்தா⁴ய குக்குச்சப்பகததாய ஆபத்திம் ஆபஜ்ஜதீதி வுத்தம்.

94. தி²யதிசித்தம் மந்த³மந்த³ம் கத்வா அஜ்ஜோ²த்த²ரதீதி தி²னம். தி²யியனா தி²யிதத்தந்தி ஹி பாளியம் நித்³தி³ட்ட²ம்.

95. மேத⁴தி சேதஸிகே த⁴ம்மே அகம்மஞ்ஞபூ⁴தே கத்வா விஹிம் ஸதீதி மித்³த⁴ம். ததா² ஹி ஆரம்மணே விப்பா²ரவஸேன தம் தம் இரியா பத²ம் ஸந்தா⁴ரேத்வா பவத்தமானேஸு ஸம்பயுத்தத⁴ம்மேஸு முக்³க³ரேன போதே²த்வா விய தே ஆரம்மணதோ ஓலியாபேத்வா இரியாபத²ம்பி ஸந்தா⁴ரேதும் அஸமத்தே² கத்வா தி²னம் சித்தம் அபி⁴ப⁴வதி. மித்³த⁴ம் சேதஸிகேதி.

96. விசிகிச்சா²தி ஏத்த². சிகிச்ச²னம் சிகிச்சா². ஞாணப்படிகா ரோதி அத்தோ². திகிச்சி²தும் து³க்கரதாய விக³தா சிகிச்சா² ஏதாயாதி விசிகிச்சா². ஸபா⁴வம் விசினந்தா கிச்ச²ந்தி கிலமந்தி ஏதாயாதிவா விசிகிச்சா². விசிகிச்ச²திவா த்³வேள்ஹகபா⁴வேன பவத்ததீதி விசிகிச்சா². ஸா நீவரணபூ⁴தா, படிரூபகாதி து³விதா⁴. தத்த² பு³த்³தா⁴தீ³ஸு அட்ட²ஸு வத்தூ²ஸு விமதிவஸேன பவத்தமானா நீவரணபூ⁴தா. ததோ அஞ்ஞாபன அஸப்³ப³ஞ்ஞூனம் தேஸு தேஸு ஆரம்மணேஸு கத²ம் நுகோ² ஏவம் நுகோ² இத³ம்னுகோ²தி வேமதிகபா⁴வேன பவத்தா ஸப்³பா³ விசிகிச்சா² படிரூபகானாம. ஸா பன குஸலாபி ஹோதி, அகுஸலாபி கீ²ணா ஸவானம் உப்பன்ன க்ரியாப்³யாகதாபீதி. இத⁴ பன ஏகந்தாகுஸலபூ⁴தா நீவரணவிசிகிச்சா²வ அதி⁴ப்பேகாதி.

அகுஸலராஸிம்ஹி பரமத்த²தீ³பனா.

97. ஸத்³த³ஹதீதி ஸத்³தா⁴. யதா² அச்ச²ம் பஸன்னம் நிஸின்னம் உத³கம் சந்த³ ஸூரியாதீ³னி ரூபனிமித்தானி ஸுட்டு² அத்தனி த³ஹதி. ஏவம் அயம் பு³த்³த⁴கு³ணா தீ³னி ஸுட்டு² அத்தனி த³ஹதி தா⁴ரேதி த²பேதிவாதி அத்தோ². ஸத்³த³ஹந்திவா ஏதாயாதி ஸத்³தா⁴. ஸத்³த³ஹனமத்தமேவவா ஏதந்தி ஸத்³தா⁴. ஸாபி பு³த்³தா⁴ தீ³ஸு ஸத்³தே⁴ய்யவத்தூ²ஸு அகாலுஸ்ஸியபா⁴வேன பவத்தமானாஏவ இத⁴ அதி⁴ப்பேதா. ததோ அஞ்ஞாபன தித்தி²யேஸுவா தித்தி²யத⁴ம்மேஸு வா ஏவரூபேஸு அஸத்³தே⁴ய்யவத்தூ²ஸு ஸத்³த³ஹனவஸேன பவத்தா ஓகப்பனா ஸத்³தா⁴ படிரூபகானாம ஹோதி. ஸா பன அத்த²தோ மிச்சா²தி⁴மோக்கோ² யேவாதி. யதா² பன மனுஸ்ஸா ஹத்தே² அஸதி ரதனானி தி³ஸ்வா பி-க³ஹேதும் ந ஸக்கோந்தி. வித்தே அஸதி தேஸம் ஸப்³ப³போ⁴கா³ ந ஸம்பஜ்ஜந்தி. பீ³ஜே அஸதி ஸஸ்ஸாதீ³னி நஸம்பஜ்ஜந்தி. ஏவம் ஸத்³தா⁴ய அஸதி புஞ்ஞக்ரியாவத்தூ²னி நஸம்பஜ்ஜந்தி. தஸ்மா ஏஸா ஹத்த²வித்தபீ³ஜ ஸதி³ஸாதி வுத்தா.

98. ஸரதீதி ஸதி. அத்தனா கதானி கத்தப்³பா³னி ச கல்யாணகம்மாவா பு³த்³த⁴கு³ணாதீ³னிவா அப்பமஜ்ஜனவஸேன உபக³ச்ச²தீதி அத்தோ². ஸாபி ஸம்மாஸதி மிச்சா²ஸதி து³விதா⁴ ஹோதி. தத்த² ஸம்மாஸதி இத⁴ அதி⁴ப்பேதா. இதரா பன ஸதியேவ ந ஹோதி. கதஸ்ஸ கத்தப்³ப³ஸ்ஸச பாபகம்மஸ்ஸ அப்பமஜ்ஜனவஸேன பவத்தோ ஸதிபடிரூபகோ அகுஸலசித்துப்பாதோ³யேவ. யஸ்மா பனேஸா சித்தம் ஸப்³பே³ஹி அகுஸலத⁴ம்மேஹிச ரக்கி²தும் குஸலத⁴ம்மேஹிச யோஜேதும் ஸக்கோதி. தஸ்மா ஸா ரஞ்ஞோ ஸப்³ப³கம்மிக மஹாஅமச்சோ விய த³ட்ட²ப்³பா³தி. ஸதிம்க்²வாஹம் பி⁴க்க²வே ஸப்³ப³த்தி²கம் வதா³மீதி ஹி வுத்தம்.

99. ஹிரியதீதி ஹிரி. காயது³ச்சரிதாதீ³ஹி லஜ்ஜதி ஜிகு³ச்ச²தி உக்கண்ட²தீதி அத்தோ².

100. தேஹியேவ ஓத்தப்பதீதி ஓத்தப்பம். உப்³பி³ஜ்ஜதீதி அத்தோ². ஏத்த²பி ஹிரிஓத்தப்பப்படிரூபகானாம அத்தி², வுத்தஞ்ஹி –

லஜ்ஜிதப்³பே³ நலஜ்ஜந்தி, அலஜ்ஜியேஸு லஜ்ஜரேதி ச;

பா⁴யிதப்³பே³ நபா⁴யந்தி, அப⁴யே ப⁴யத³ஸ்ஸினோதி ச.

யஸ்மா பன ஸப்புரிஸா ஹிரியா அத்தனி ஓத்தப்பேனச பரேஸு ஆரக்க²தே³வதாதீ³ஸு கா³ரவம் உப்பாதே³த்வா பாபதோ வஜ்ஜேத்வா ஸுத்³த⁴ம் அத்தானம் பரிஹரந்தி. தஸ்மா இமே த்³வே லோகபாலத⁴ம்மாதி வுத்தா.

101. லோப⁴ப்படிபக்கோ² அலோபோ⁴. ஸோ ஹி யேஸு அத்தனோ ஹிதஸஞ்ஞிதேஸு ஆரம்மணேஸு லோபோ⁴ லக்³க³னவஸேன பவத்ததி, தேஸ்வேவ தம் லோப⁴ம் வித⁴மித்வா லோப⁴வத்து²பூ⁴தா ப⁴வபோ⁴க³ஸம்பத்தியோ கூ³த²ராஸிம்விய ஹீளேத்வா ஜிகு³ச்சி²த்வா ஏகானேக்க²ம்ம தா⁴துனாம ஹுத்வா பவத்ததீதி.

102. தோ³ஸப்படிபக்கோ² அதோ³ஸோ. ஸோபி ஹி யேஸு அத்தனோ அஹிதஸஞ்ஞிதேஸு ஆரம்மணேஸு தோ³ஸோ து³ஸ்ஸனவஸேன பவத்ததி. தேஸ்வேவ தம்தோ³ஸம் வித⁴மித்வா தி³ட்ட²தி³ட்டே²ஸு ஸத்தேஸு புண்ணசந்த³ஸதி³ஸம் ஸோம்மஹத³யம் உப்பாதே³த்வா ஏகா அப்³யாபாத³தா⁴து நாம ஹுத்வா பவத்ததீதி. அயமேவச ப்³ரஹ்மவிஹாரேஸு மேத்தாதி வுத்தா. அமோஹோபி இத⁴ வத்தப்³போ³. மோஹப்படிபக்கோ² அமோஹோ. ஸோபி ஹி யேஸு த⁴ம்மேஸுவா அத்தே²ஸுவா சதூஸு அரியஸச்சேஸுவா மோஹோ அந்த⁴காரம் கத்வா பவத்ததி. தேஸ்வேவ தம் மோஹம் வித⁴மித்வா சந்த³ஸூரியஸஹஸ்ஸம் உட்டா²பேந்தோவிய விஜ்ஜானாம ஹுத்வா பவத்ததீதி.

103. தத்ரமஜ்ஜ²த்ததாதி ஏத்த² அத்தா வுச்சதி ஸபா⁴வோ. லீனுத்³த⁴ச்சாதீ³னம் உபி⁴ன்னம் விஸமபக்கா²னம் மஜ்ஜே² பவத்தோ அத்தா ஏதஸ்ஸாதி மஜ்ஜ²த்தா. ஸமப்பவத்தோ ஸம்பயுத்தத⁴ம்மஸமூஹோ. தஸ்ஸ பா⁴வோ மஜ்ஜ²க்கதா. தேஸு தேஸு ஸம்பயுத்தத⁴ம்மேஸு தி³ஸ்ஸமானா மஜ்ஜ²த்ததா தத்ரமஜ்ஜ²த்ததா தேஸு தேஸுவா ஹிதகம்மேஸு சித்தசேதஸிகானம் மஜ்ஜ²த்ததா தத்ரமஜ்ஜ²த்ததா. ததா² ஹி ஸா ஸமப்பவத்தானம் ஸம்பயுத்த த⁴ம்மானம் அஜ்ஜு²பேக்க²னவஸேன ஸமப்பவத்தானம் ஆஜானேய்யானம் அஜ்ஜு²பேக்க²னஸாரதீ²விய த³ட்ட²ப்³பா³தி வுத்தா. அயமேவச ப்³ரஹ்மவிஹாரேஸு உபேக்கா²தி வுத்தா.

104. காயப்பஸ்ஸத்³தா⁴தீ³ஸு காயோதி வேத³னாதி³க்க²ந்த⁴த்தய ஸங்கா²தோ சேதஸிகஸமூஹோ வுச்சதி. சித்தந்தி ஸோப⁴ணசித்தம். காயஸ்ஸ பஸ்ஸத்³தி⁴ காயப்பஸ்ஸத்³தி⁴. சித்தஸ்ஸ பஸ்ஸத்³தி⁴ சித்தப்பஸ்ஸத்³தீ⁴திஆதி³னா ஸமாஸோ. பஸ்ஸம்ப⁴னம் பஸ்ஸத்³தி⁴. ஸந்தஸீதலபா⁴வோதி அத்தோ². யேஸம் இத³ம் த்³வயம் து³ப்³ப³லம் ஹோதி. தே புஞ்ஞகம்மேஸு சித்தஸுக²ம் நபிந்த³ந்தி. ப³ஹித்³தா⁴ஏவ நேஸம் சித்தம் பக்க²ந்த³தி. ஸந்தத்தே பாஸாணபிட்டே² த²பிதமச்சோ²விய ஹோதி. யேஸம் பன ப³லவம் ஹோதி. தேயேவ தத்த² தம் விந்த³ந்தி. தேஸம் சித்தம் ஸீதலே உத³கே பக்கி²த்த மச்சோ² விய ஹோதி.

105. லஹுபா⁴வோ லஹுதா. அக³ருதா அத³ந்த⁴தாதி அத்தோ². யேஸம் இத³ம் து³ப்³ப³லம். தேஸம் சித்தம் புஞ்ஞகம்மேஸு நபஸாரேதி ஸங்கோசதி. தத்தபாஸாணே பக்கி²த்தபது³மபுப்ப²ம் விய ஹோதி. யேஸம் பன ப³லவம். தேஸம் சித்தம் தத்த² பஸாரேதி. ஸீதலே உத³கே பக்கி²த்த பது³மபுப்ப²ம் விய ஹோதி.

106. முது³பா⁴வோ முது³தா. யேஸம் இத³ம் து³ப்³ப³லம். தேஸம் சித்தம் புஞ்ஞகம்மேஸு த²த்³த⁴ம் ஹோதி. வேரீனம் மஜ்ஜே² க³தமஹாயோதோ⁴விய ஹோதி. யேஸம் பன ப³லவம். தேஸம் சித்தம் தத்த² முது³ ஹோதி. வியஞ்ஞாதீனம் மஜ்ஜே² க³தமஹாயோதோ⁴ விய ஹோதி.

107. கம்மனி ஸாது⁴ கம்மஞ்ஞம். ததே³வ கம்மஞ்ஞதா. யேஸம் இத³ம் து³ப்³ப³லம். தேஸம் சித்தம் புஞ்ஞகம்மேஸு யதி²ச்சி²தம் த²பேதும் நலப்³ப⁴தி, விக்கிரதி. படிவாதே கி²த்தது²ஸமுட்டி²விய ஹோதி. யேஸம் பன ப³லவம். தேஸம்யேவ தம் தத்த² யதி²ச்சி²தம் த²பேதும் லப்³ப⁴தி நவிக்கிரதி. படிவாதே கி²த்தஸுவண்ணக்க²ந்தோ⁴விய ஹோதி.

108. பகு³ணஸ்ஸ பா⁴வோ பாகு³ஞ்ஞம். ததே³வ பாகு³ஞ்ஞதா. யேஸம் இத³ம் து³ப்³ப³லம். தேஸம் சித்தம் புஞ்ஞகம்மேஸு விகம்பதி விஹஞ்ஞதி. க³ம்பீ⁴ரே உத³கே கி²த்தவானரோவிய ஹோதி. யேஸம் பன ப³லவம், தே ஸம் தம் தத்த² நவிகம்பதி நவிஹஞ்ஞதி. க³ம்பீ⁴ரே உத³கே கி²த்த கும்பி⁴லோ விய ஹோதி.

109. உஜுஏவ உஜுகம், உஜுகஸ்ஸ பா⁴வோ உஜுகதா. யேஸம் இத³ம் து³ப்³ப³லம். தேஸம் சித்தம் புஞ்ஞகம்மேஸு விஸமக³ஹிகம் ஹோதி. கதா³சி லீனம். கதா³சி உத்³த⁴டம். கதா³சி ஓனதம். கதா³சி உன்னதம். ஸுராமத³மத்தஸ்ஸ மக்³க³க³மனம் விய ஹோதி. யேஸம் பன ப³லவம், தேஸம் தம் வுத்தவிபரிய யேன வேதி³தப்³ப³ந்தி.

110. ஏத்த²ச ஸித்³தே⁴ஸுபி சித்தப்பஸ்ஸத்³தா⁴தி³கேஸு வுத்தேஸு விஸும் காயப்பஸ்ஸத்³தா⁴தீ³னம் வசனம் தேஸம் வஸேன ரூபகாயஸ்ஸபி பஸ்ஸத்³தா⁴தி³ தீ³பனத்த²ந்தி வேதி³தப்³ப³ம். தத்த² தம் தம் ஸுத்தந்தம் ஸுத்வா கே³லஞ்ஞவுட்டா² நாதீ³ஸு ரூபகாயஸ்ஸ பஸ்ஸத்³த⁴பா⁴வோ பாகடோ இத்³தி⁴மந்தானம் இத்³தி⁴யா ஆகாஸக³மனாதீ³ஸு லஹு பா⁴வோ. காயம் கு²த்³த³கம் வா மஹந்தம் வா கத்வா நிம்மினனேஸு முது³பா⁴வோ. அந்தோபத²வியம்வா அந்தோபப்³ப³தே ஸுவா அஸஜ்ஜமானம் கத்வா க³மனாதீ³ஸு கம்மஞ்ஞபா⁴வோ. நாக³வண்ணம்வா க³ருளவண்ணம்வா கத்வா நிம்மினனாதீ³ஸு பகு³ணபா⁴வோ தேஸ்வேவ ஸப்³பே³ஸு யதா²னிம்மிதவஸேன சிரப்பவத்திபா⁴வேஸு உஜுகபா⁴வோ பாகடோ ஹோதீதி வேதி³தப்³போ³. ஸமம் தா⁴ரேந்தீதி ஸாதா⁴ரணா, ஸப்³பே³ஹி ஸோப⁴ணசித்தேஹி, தேஸம்வா ஸாதா⁴ரணா ஸோப⁴ண ஸாதா⁴ரணா.

111. ஸம்மாவாசாதி ஏத்த² திவிதா⁴ ஸம்மாவாசா கதா², சேதனா, விரதிவஸேன, தத்த² அத்த²த⁴ம்மப்படிஸம்யுத்தா ஸுபா⁴ஸிதா வாசா கதா² ஸம்மாவாசானாம. தம்ஸமுட்டா²பிகா குஸலக்ரியசேதனா சேதனாஸம்மாவாசானாம. யா பன முஸாவாதா³ வேரமணாதீ³னி ஸிக்கா²பதா³னி ஸமாதி³யந்தஸ்ஸவா அதி⁴ட்ட²ஹந்தஸ்ஸவா ஸம்பத்தம் வத்து²ம் அவீதிக்கமந்தஸ்ஸவா பாபவிரமணாகாரேன சித்தஸ்ஸ பவத்தி. அயம் விரதி ஸம்மாவாசானாம. ஸா இத⁴ அதி⁴ப்பேதா. ஸம்மா வத³ந்தி ஏதா யாதி ஸம்மாவாசா. ஏதாயாதி சேத்த² கரணத்தே² ஹேதுஅத்தே² வா கரணவசனம் த³ட்ட²ப்³ப³ம். தத்த² வாசாய ஸிக்கா²பதா³னி ஸமாதி³யந்தஸ்ஸ ஸமாதா³னவசனானி ஸந்தா⁴ய கரணத்தோ² ஹேதுஅத்தோ² ச யுஜ்ஜதி. ததோ யதா²ஸமாதி³ன்னானிவா யதா²தி⁴ட்டி²தானிவா ஸிக்கா²பதா³னி ஸுட்டு²ரக்கா²மாதி யானி அனவஜ்ஜானிஏவ வசனானி வத³ந்தா விசரந்தி. தானி ஸந்தா⁴ய கரணத்தா²னுகூலோ ஹேது அத்தோ²யேவ யுஜ்ஜதீதி. அத²வா, ததா² வத³ந்துவா மாவா. அயம்பன வத³மானேஸு ஸதி தேஸம் ஸம்மா வத்தும்ஏவ தே³தி. நமிச்சா² வத்துந்தி கத்வா ஸம்மா வாசாத்வேவ வுச்சதி. அபிச, அயம் வசீது³ச்சரிதானம் பஜஹனவஸேன பவத்தமானா வசீத்³வாரஸுத்³தி⁴யா ஏவ ஹோதீதி ஸம்மாவாசாதி வுச்சதீதி.

112. ஸம்மாகம்மந்தோபி திவிதோ⁴ க்ரியா, சேதனா, விரதி வஸேன. தத்த² யம்கிஞ்சி அனவஜ்ஜம் கம்மம் கரோந்தஸ்ஸ காயிகக்ரியா க்ரியாகம்மந்தோனாம. தம்ஸமுட்டா²பிகா சேதனா சேதனாகம்மந்தோ நாம. யா பன பாணாதிபாதா வேரமணாதீ³னி ஸிக்கா²பதா³னி ஸமாதி³ யந்தஸ்ஸவா அதி⁴ட்ட²ஹந்தஸ்ஸவா ஸம்பத்தம் வத்து²ம் அவீதிக்கமந்தஸ்ஸவா பாபவிரமணாகாரேன சித்தஸ்ஸ பவத்தி. அயம் விரதி ஸம்மாகம்மந்தோ நாம. ஸம்மா கரோந்தி ஏதேனாதி ஸம்மாகம்மம், ததே³வ ஸம்மா கம்மந்தோ ஸுத்தந்தோ வனந்தோவிய. ஸேஸமேத்த² வுத்தனயமேவ.

113. ஸம்மாஆஜீவோபி வீரிய, விரதிவஸேன து³விதோ⁴. தத்த² பகதியா அனவஜ்ஜானி கஸிகம்மாதீ³னிவா பி⁴க்கா²சரியாதீ³னிவா கத்வா ஜீவிதம் கப்பேந்தானம் உட்டா²னப³லஸங்கா²தோ வாயாமோ வீரியஸம்மாஆஜீவோனாம. யா பன ஆஜீவஸுத்³தி⁴ம் அபேக்கி²த்வா அத்தனோ ஆஜீவஸீலவிபத்திகாரணானி காயவசீது³ச்சரிதானி பஜஹந்தானம் பாபவிரமணாகாரேன சித்தஸ்ஸ பவத்தி. அயம் விரதி ஆஜீவோனாம. அயமிதா⁴தி⁴ப்பேதோ. ஸம்மா ஆஜீவந்தி ஜீவிதம் பவத்தேந்தி ஏதேனாதி ஸம்மாஆஜீவோ. ஸேஸமேத்த² வுத்தனயமேவாதி.

114. ஏகேகாபி சேத்த² ஸம்பத்த விரதி, ஸமாதா³ன விரதி, ஸமுச்சே²த³விரதிவஸேன திவிதா⁴. தத்த² யா ஸிக்கா²பதா³னி அஸமா தி³யித்வாவா ஸமாதி³ன்னானிபிவா தானி அனபேக்கி²த்வா கேவலம் ஹிரி ஓத்தப்பப³லேனேவ ஸம்பத்தம் வத்து²ம் அவீதிக்கமந்தானம் உப்பன்னா விரதி. அயம் ஸம்பத்தவிரதினாம. ஸா பச்சுப்பன்னாரம்மணாயேவ. பஞ்சஸிக்கா² பதா³ பச்சுப்பன்னாரம்மணாதி ஹி வுத்தம். யா பன ஸிக்கா²பதா³னி ஸமாதி³ யந்தஸ்ஸவா அதி⁴ட்ட²ஹந்தஸ்ஸவா யதா²ஸமாதி³ன்னானிவா யதா²தி⁴ட்டி²தானி வா ஸுட்டு²ரக்கா²மீதி ஸம்பத்த வத்து²ம் அபீதிக்கமந்தஸ்ஸவா உப்பன்னா. அயம் ஸமாதா³னவிரதினாம. ஸா பன பச்சுப்பன்னாரம்மணாவா ஹோதி அனாக³தாரம்மணாவா. ததா² ஹி பஞ்சஸிக்கா²பதா³ பச்சுப்பன்னாரம்மணாதி இத³ம் ஸம்பத்தவிரதிவஸேன வுத்தந்தி அட்ட²கதா²யம் வுத்தம். மக்³க³க்க²ணே பன ஸப்³ப³து³ச்சரிதானம் பச்சயஸமுச்சே²த³வஸேன உப்பன்னா ஸமுச்சே²த³விரதினாம. ஸா பன நிப்³பா³னாரம்மணாஏவ. ப²லவிரதிபி ஏத்தே²வ ஸங்க³ஹிதாதி. தத்த² லோகியவிரதியோ ஜீவிதிந்த்³ரியாதீ³னி வீதிக்கமிதப்³ப³வத்தூ²னி ஆரம்மணம் கத்வா பாணாதிபாதாதீ³னி விரமிதப்³ப³வத்தூ²னி பஜஹந்தி. லோகுத்தரவிரதியோ பன நிப்³பா³னம் ஆரம்மணம் கத்வா தானியேவ விரமிதப்³ப³வத்தூ²னி பஜஹந்தீதி த³ட்ட²ப்³ப³ம்.

115. பரது³க்கே² ஸதி காருணிகானம் ஹத³யகே²த³ம் கரோதீதி கருணா. கிரதிவா பரது³க்க²ம் விக்கி²பதி, கிணாதிவா பரது³க்க²ம் ஹிம்ஸதீதி கருணா. கிரீயதி து³க்கி²தேஸு பஸாரீயதீதிவா கருணா. அபிச கலி உணாதி சே²தோ³. கலீதி து³க்க²ம் வுச்சதி, யதா²-கலி ஸம்ப⁴வே ப⁴வேதி. கலீதிவா பாபபி பராஜயோபி வுச்சதி. பாபே கலி பராஜயேதி ஹி வுத்தம். ஸப்³ப³ஞ்சேதம் காருணிகா நம் காருஞ்ஞஹேதுபூ⁴தமேவ ஹோதி. இதி கலிம் து³க்க²ம்வா பாபம்வா ஸப்³ப³ஸம்பத்திதோ பராஜயம்வா ஸத்தேஹி அவந்தி ரக்க²ந்தி, ஸத்தேவா ததோ வித⁴கலிதோ அவந்தி ரக்க²ந்தி காருணிகா ஜனா ஏதாயாதி கருணா.

116. பரஸம்பத்திம் தி³ஸ்வா மோத³ந்தி ஏதாயாதி முதி³தா. நத்தி² பமாணம் ஏதேஸந்தி அப்பமாணா, ஸத்தா. அப்பமாணேஸு ப⁴வாதி அப்பமஞ்ஞா. ஏதாஹி ஏத்தகேஸுயேவ ஸத்தேஸு பவத்தேதப்³பா³. ந இதோ அஞ்ஞேஸூதி ஏவம் பரிச்சே²த³ப்பமாணஸ்ஸ அபா⁴வா ஏகஸ்மிம் ஸத்தே பவத்தாபி அப்பமஞ்ஞாஏவனாம ஹோந்தீதி.

[77] டீகாஸு பன

அப்பமாணஸத்தா ரம்மணத்தா அப்பமாணா. தாஏவ அப்பமஞ்ஞாதி வுத்தம். தம் ந ஸுந்த³ரம்.

117. பஞ்ஞிந்த்³ரியந்தி ஹேட்டா² வுத்தோ அமோஹோஏவ. ஸோ ஹி பஜானனட்டே²ன பஞ்ஞா, அதி⁴பதியட்டே²ன இந்த்³ரியஞ்சாதி கத்வா பஞ்ஞிந்த்³ரியந்தி வுச்சதீதி.

ஸோப⁴ணராஸிம்ஹி பரமத்த²தீ³பனா.

118. ஏத்தாவதாதிஆதி³ திண்ணம் ராஸீனம் ஸங்க³ஹோ. ஏவம் த்³விபஞ்ஞாஸ ஸரூபம் த³ஸ்ஸேத்வா இதா³னி சேதோயுத்தப்பகாரம் த³ஸ்ஸேந்தோ தேஸந்திஆதி³மாஹ. இதோ சேதஸிகானம் ஸரூபத³ஸ்ஸனதோ பரம் தேஸம் சித்தாவியுத்தானம் சித்தேன அவியுத்தானம் சேதஸிகானம் சித்துப்பாதே³ஸு பச்சேகம் ஸம்பயோகோ³ ததா²யோக³ம் வுச்சதேதி யோஜனா. சித்துப்பாதே³ஸூதி சித்தேஸு இச்சேவ அத்தோ². உப்பஜ்ஜந்தி சேதஸிகா ஏதேஸூதி உப்பாதா³. சித்தானிஏவ உப்பாதா³ சித்துப்பாதா³தி கத்வா. த்³விபஞ்சவிஞ்ஞாணானம் ஸப்³ப³து³ப்³ப³லத்தா தேஸு ச² பகிண்ணகா நுப்பஜ்ஜந்தி. பா⁴வனாப³லேன பஹீனத்தா விதக்கோ து³தீயஜ்ஜா²னிகாதீ³ஸு, விசாரோ ததீயஜ்ஜா²னிகாதீ³ஸு, பீதி சதுத்த²ஜ்ஜா²னிகாதீ³ஸு நுப்பஜ்ஜதி. ஸன்னிட்டா²னஸபா⁴வத்தா அதி⁴மோக்கோ² அஸன்னிட்டா²னஸபா⁴வே விசிகிச்சா² சித்தே நுப்பஜ்ஜதி. வீரியம் ப³லனாயகத்தா து³ப்³ப³லேஸு பஞ்சத்³வாராவஜ்ஜனா தீ³ஸு ஸோளஸசித்தேஸு நுப்பஜ்ஜதி. பீதி ஸம்பியாயனஸபா⁴வத்தா தோ³மனஸ்ஸுபேக்கா² ஸஹக³தேஸு நுப்பஜ்ஜதி. ச²ந்தோ³ இச்சா²ஸபா⁴வத்தா இச்சா²ரஹிதேஸு அஹேதுகேஸு மோமூஹசித்தேஸுச நுப்பஜ்ஜதீதி ஆஹ பகிண்ணகேஸுபன விதக்கோ.ல. மோமூஹவஜ்ஜிதசித்தேஸூதி. தே பன சித்துப்பாதா³ பகிண்ணகவிவஜ்ஜிதா ஸபகிண்ணகாதி ஸம்ப³ந்தோ⁴.

119. அகுஸலேஸூதி அகுஸலசேதஸிகேஸு. ஸப்³பா³குஸல ஸாதா⁴ரணானாம. தஸ்மா ஸப்³பே³ஸுபி த்³வாத³ஸாகுஸலசித்தேஸு லப்³ப⁴ந்தீதி யோஜனா.

[78] விபா⁴வனியம் பன

பச்சி²மம் புரிமஸ்ஸ ஸமத்த²னவசனந்தி அதி⁴ப்பேதம். தம் ந ஸுந்த³ரம்.

இத³ஞ்ஹி டா²னம் சித்தேஸு லப்³ப⁴மானதாத³ஸ்ஸனபதா⁴னந்தி. யஸ்மா பன ஸப்³பா³னி அகுஸலசித்தானி இமேஹி சதூஹி வினா நுப்பஜ்ஜந்தி. ந ஹி தானி பாபேஸு ஆதீ³னவம் பஸ்ஸித்வா டி²தானம் உப்பஜ்ஜந்தி. நச தேஹி லஜ்ஜாயவா ப⁴யேனவா உக்கண்டி²தானம். நாபி குஸலேஸு த⁴ம்மேஸு ஸமாஹிதானந்தி. தஸ்மா தே ஸப்³பே³ஸு தேஸு லப்³ப⁴ந்தீதி. யஸ்மாச தி³ட்டி²மானா க²ந்தே⁴ஸு அஸ்ஸாத³ம் அமுஞ்சித்வாவ தேஸு ததா² ததா² ஆமஸித்வா பவத்தந்தி. தஸ்மா தே லோப⁴மூலசித்தேஸ்வேவ உப்பஜ்ஜந்தி. தத்த² உப்பஜ்ஜந்தேஸு பன தேஸு தி³ட்டி² க²ந்தே⁴ஸு அத்தக்³கா³ஹம் த³ள்ஹம் க³ஹேத்வா தம் அத்தம் நிச்சதாதீ³ஹி மிச்சா²ஸபா⁴வேஹிஏவ பராமஸந்தீ பவத்ததி. மானோ பன க²ந்தே⁴ அஹந்தி த³ள்ஹம் க³ஹேத்வா தம் க³ஹிதாகாரம் ஸேய்ய தாதீ³ஹிஏவ ஆமஸந்தோ பவத்ததி. தஸ்மா தே ஆமஸனாகாரதோ அஸதி³ஸவுத்தினோஏவ ஹோந்தீதி ஆஹ. தி³ட்டி²சதூஸு.ல. விப்பயுத்தேஸூதி. யே பன தி³ட்டி²க³திகா தி³ட்டி²யா யதா²க³ஹிதம் அத்தானமேவ அஹந்தி க³ண்ஹந்தி. தேஸம்பி தி³ட்டி²மானா ஆமஸனாகாரம் பத்வா அஸதி³ஸவுத்திகாஏவ ஹோந்தி. ந ஹி மானஸ்ஸ விய தி³ட்டி²யா அத்த ஸம்பக்³க³ஹணே ப்³யாபாரோ அத்தி². ந ச தி³ட்டி²யா விய மானஸ்ஸ த⁴ம்மானம் அயாதா²வபக்க²பரிகப்பனேதி. தேனேவ ஹி அஹம்கா³ஹோ மானோ அனாகா³மீனம்பி பவத்ததி. அத்தக்³கா³ஹபூ⁴தா பன தி³ட்டி² புது²ஜ்ஜனான மேவாதி.

[79] விபா⁴வனியம் பன

‘‘மானோபி அஹம்மானவஸேன பவத்தனதோ தி³ட்டி²ஸதி³ஸோவ பவத்ததீதி தி³ட்டி²யா ஸஹ ஏகசித்துப்பாதே³ நபவத்ததீ’’தி வத்வா கேஸர ஸீஹோ பமாய தம் அத்த²ம் ஸாதே⁴தி. தம் ந ஸுந்த³ரம்.

ஸதி³ஸப்பவத்தி ஹி நாம ஸஹபவத்தியா ஏவ காரணந்தி. மச்ச²ரியம் பன அத்தஸம்பத்தீஸு லக்³க³னலோப⁴ஸமுட்டி²தம்பி தாஸம் பரேஹி ஸாதா⁴ரணபா⁴வம் அஸஹனாகாரேன பவத்தத்தா ஏகந்தேன படிக⁴ஸம்ப யுத்தமேவ ஹோதீதி வுத்தம் தோ³ஸோ.ல. சித்தேஸூதி. அகம்மஞ்ஞ லக்க²ணம் தி²னமித்³த⁴ம் கம்மஞ்ஞஸபா⁴வேஸு அஸங்கா²ரிகேஸு நஸம்ப⁴வதீதி வுத்தம் தி²னமித்³த⁴ம் பஞ்சஸு ஸஸங்கா²ரிக சித்தேஸூதி. சத்தாரோ ஸப்³பா³ குஸலஸாதா⁴ரணா. தயோ லோப⁴ தி³ட்டி²மானா. சத்தாரோ தோ³ஸாத³யோ. த்³வயம் தி²னமித்³த⁴ம். விசிகிச்சா² சித்தேசாதி சஸத்³தோ³ அவதா⁴ரணே. விசிகிச்சா²சித்தேஏவாதி அத்தோ². சதுத்³த³ஸ அகுஸல சேதஸிகா.

120. ஸோப⁴ணேஸூதி ஸோப⁴ணசேதஸிகேஸு. லோகுத்தரே அட்ட²ங்கி³கமக்³கே³ தீஸு க²ந்தே⁴ஸு பஞ்ஞாக்க²ந்தே⁴ ஸம்மாஸங்கப்போ நாம ஸம்மாதி³ட்டி²பச்சி²மகோவ ஹோதி. தஸ்மா பாத³கஜ்ஜா²னாதி³வஸேன தஸ்மிம் அஸதிபி பஞ்ஞாக்க²ந்தோ⁴ நபரிஹாயதி. ஸீலஸமாதி⁴க்க²ந்த⁴த⁴ம்மேஸு பன ஏகோ ஏகஸ்ஸ கிச்சம் நஸாதே⁴தி. தஸ்மா லோகுத்தர மக்³கோ³ ஸத்தங்கி³கதோ ஹேட்டா² நபவத்ததீதி ஆஹ விரதியோ பன திஸ்ஸோபி.ல. லப்³ப⁴ந்தீதி. நியதாவ ஏகதோவ ஸப்³ப³தா²பி லப்³ப⁴ந்தீதி யோஜனா. தத்த² நியதாவாதி ந லோகியேஸுவிய கதா³சிஏவ லப்³ப⁴ந்தி. அத²கோ² ஸப்³ப³தா³பி நியதா ஹுத்வாவ லப்³ப⁴ந்தி. கஸ்மா, லோகுத்தரத⁴ம்மானம் நிச்சம் ஸீலேஸு பரிபூரகாரிதாவஸேன பவத்தத்தா. ந ஹி தே லோகியா விய கதா³சி தா³னவஸேன கதா³சி ஸுதபரியத்திவஸேன கதா³சி கஸிணபா⁴வனாதி³வஸேன பவத்தந்தீதி. ஏகதோ வாதி நலோகியேஸு விய விஸும் விஸும் லப்³ப⁴ந்தி. அத²கோ² திஸ்ஸோபி ஏகதோ ஹுத்வாவ லப்³ப⁴ந்தி. கஸ்மா, அபி⁴ன்னாரம்மணத்தா. ந ஹி தே லோகியா விய வீதிக்கமிதப்³ப³வத்து²ஸங்கா²தானி ஜீவிதிந்த்³ரியாதீ³னி நானாரம்மணானி ஆரப்³ப⁴ பவத்தந்தி. ஏகம்பன நிப்³பா³னமேவ ஆரப்³ப⁴பவத்தந்தீதி. ஸப்³ப³தா²பீதி ந லோகியேஸு விய ஏகதே³ ஸப்பஹானவஸேன லப்³ப⁴ந்தி. அத²கோ² திஸ்ஸோபி அனவஸேஸ து³ச்சரித து³ராஜீவப்பஹானாகாரேன லப்³ப⁴ந்தி. லோகியேஸுஹி ஸகிம் உப்பன்னா ஸம்மாவாசா சதுப்³பி³தா⁴னி வசீது³ச்சரிதானி ஸப்³பா³னி ஏகதோ பஜஹிதும் நஸக்கோதி. முஸாவாத³விரதி முஸாவாத³மேவ பஜஹிதும் ஸக்கோதி. ந இதரானி. முஸாவாத³ம்பி ஸமூலம் ஸானுஸயம் பஜஹிதும் நஸக்கோதி. ததா² பிஸுணவாசா விரதி பிஸுணவாசமேவ பஜஹிதும் ஸக்கோதி. ந இதரானி. பிஸுணவாசம்பி ஸமூலம் ஸானுஸயம் பஜஹிதும் ந ஸக்கோதி. ஸப்³ப³ம் வித்தா²ரேதப்³ப³ம். லோகுத்தரேஸு பன ஸகிம் உப்பன்னா ஸம்மாவாசா ஸப்³பா³னி வசீது³ச்சரிதானி ஸமூலானி ஸானுஸயானி பஜஹதி. ஸகிம் உப்பன்னோ ஸம்மாகம்மந்தோ ஸப்³பா³னி காயது³ச்சரிதானி ஸமூலானி ஸானுஸயானி பஜஹதி. ஸகிம் உப்பன்னோ ஸம்மாஆஜீவோ ஸப்³பா³னி ஆஜீவஹேதுகானி காயவசீது³ச்சரிதானி ஸமூலானி ஸானுஸயானி பஜஹதி. இதி திஸ்ஸோ லோகுத்தரேஸுஏவ ஸப்³ப³தா²பி லப்³ப⁴ந்தீதி. விஸத்³தோ³ அவயவஸம்பிண்ட³னத்தோ². ஸகிம் உப்பன்னா ஏகா ஸம்மாவாசா முஸாவாத³ப்பஹானவஸேனாபி லப்³ப⁴தி. நகேவலஞ்ச தப்பஹானவஸேனேவ. அத²கோ² பிஸுணவாசாபஹானவஸேனபி லப்³ப⁴தீதி ஸப்³ப³ம் வத்தப்³ப³ம். ஏத்த²ச து³ச்சரிதானி ஸமூலானி ஸானுஸயானீதி ஏத்த² காயவசீசோபன பா⁴கி³யானி காமராகா³னுஸயாதீ³னி உபரிமக்³க³வஜ்ஜா²னி கிலேஸஜாதானி அரூபஸேக்கா²னம்பி ஸந்தியேவ. காமரூபஸேக்கா²னம் பன வத்தப்³ப³மேவ நத்தி². தஸ்மா தேஸம் பஜஹனவஸேன உபரிமக்³க³ ப²லவிரதீனம் து³ச்சரிதப்பஹானம் த³ட்ட²ப்³ப³ம். காமாவசரகுஸலேஸ்வேவ, நபன காமாவசரவிபாகக்ரியசித்தேஸு, நாபிமஹக்³க³தசித்தேஸூதி அதி⁴ப்பாயோ. காமாவசரகுஸலேஸுபி காமபூ⁴மியம் உப்பன்னேஸுஏவ, நரூபாரூபபூ⁴மியம் உப்பன்னேஸு. ந ஹி ப்³ரஹ்மானம் விரமிதப்³ப³வத்து² ஸங்கா²தானி காயவசீது³ச்சரிதானினாம அத்தி². நச லோகியவிரதியோ விரமிதப்³ப³ வத்து²ரஹிதேஸு புக்³க³லேஸு பவத்தந்தீதி. உபரி ச²காமாவசரதே³வே ஸுபி நபவத்தந்தீதி வத³ந்தி. தம் கதா²வத்து²ம்ஹி விசாரிதமேவ. யதி³ ஏவம் மனுஸ்ஸலோகேபி தீஸு ஹேட்டி²மப²லட்டே²ஸு தாஸம் அப்பவத்தி ஆபஜ்ஜதி. ந ஹி தேஸம்பி பாணாதிபாதாதீ³னி விரமிதப்³ப³வத்தூ²னினாம அத்தீ²தி. ஸச்சம், இத⁴ பன ஸத்தவித⁴ஆபத்திக்க²ந்தா⁴பி விரமிதப்³ப³வத்து²ட்டா²னே டி²தா. ததா² திவித⁴குஹனவத்தூ²னிச. தானிச கானிசி தேஸம் ப²லட்டா²னம்பி ஸாதா⁴ரணானிஏவ. மனுஸ்ஸானஞ்ச யானி கானிசி தஸ்ஸ தஸ்ஸ ஸமாதி³ன்னஸ்ஸ ஸிக்கா²பத³ஸ்ஸ வத்தூ²னிபி விரமிதப்³ப³வத்தூ²னிஏவ. யானிபி காமஸேக்கா²னம் காயவாசா விப்ப²ந்த³னகரானி கிலேஸஜாதானி ஸமுச்சே²த³விரதீனம் வத்து²பூ⁴தானி ஸந்தி. தானி தேஸம் தத³ங்க³ விரதீனம்பி வத்தூ²னிஏவாதி. கதா³சி ஸந்தி³ஸ்ஸந்தீதி ஸமாதா³னஸம்பத்தவிரதீனம் அஞ்ஞதரவஸேன பவத்தகாலேஏவ ஸந்தி³ஸ்ஸந்தி. ஏவம் ஸந்தி³ஸ்ஸ மானாபி பி⁴ன்னாரம்மணத்தா நஏகதோ ஹுத்வா ஸந்தி³ஸ்ஸந்தீதி வுத்தம் விஸும் விஸுந்தி. விஸும்விஸும் ஸந்தி³ஸ்ஸமானாபி ஏகேகது³ச்சரிதப்பஹானவஸேனேவ ஸந்தி³ஸ்ஸந்தி. ந லோகுத்தரேஸு விய ஸப்³ப³தா²பீதி த³ட்ட²ப்³ப³ம்.

121. அப்பனாபத்தானம் அப்பமஞ்ஞானம் ஸோமனஸ்ஸஸஹக³தபா⁴வோவ விப⁴ங்கே³ வுத்தோதி வுத்தம் பஞ்சமஜ்ஜா²னவஜ்ஜிதமஹக்³க³தசித்தேஸூதி. ஏதாஹி பரஸத்தானம் ஹேது அதி⁴மத்தப்³யாபாரா ஹோந்தி, தஸ்மா அதிஸந்தாய நிப்³யாபாராய பஞ்சமஜ்ஜா²னுபேக்கா²ய ஸஹ நபவத்தந்தீதி. அப்பனாபுப்³ப³பா⁴க³பூ⁴தானம் பன தாஸம் உபேக்கா²வேத³னாயபி ஸம்பயோகோ³ அட்ட²கதா²யம் அனுஞ்ஞாதோயேவாதி வுத்தம் காமாவசர.ல. சித்தேஸுசாதி. கதா³சீதி காருஞ்ஞப்பகதிகஸ்ஸ அனிஸ்ஸுகினோச பரேஸம் விபத்திஸம்பத்தித³ஸ்ஸனகாலே. நானாஹுத்வா ஜாயந்தீதி தேஸம் விபத்தித³ஸ்ஸனகாலே அனுகம்பனவஸேன கருணா ஏவ ஜாயதி, நமுதி³தா. ஸம்பத்தித³ஸ்ஸனகாலே பன மோத³னவஸேன முதி³தாவ ஜாயதி, நகருணாதி ஏவம் விஸும் விஸும் ஹுத்வா ஜாயந்தீதி அத்தோ². யஸ்மா பனேதா தோ³ஸஸமுட்டி²தானம் விஹிம்ஸா அரதீனம் நிஸ்ஸரணபூ⁴தாதி ஸுத்தந்தேஸு வுத்தா. தோ³மனஸ்ஸபடிபக்க²ஞ்சஸோ மனஸ்ஸமேவ ஹோதி. தஸ்மா தாஸம் அப்பனாபுப்³ப³பா⁴க³பூ⁴தானம்பி நிச்சம் ஸோமனஸ்ஸயோக³மேவ கேசி இச்ச²ந்தீதி வுத்தம் உபேக்கா²ஸஹக³தேஸு.ல. கேசி வத³ந்தீதி. ஸோ பன தேஸம் வாதோ³ அட்ட²கதா²யபி ஸஹ விருத்³தோ⁴. தஸ்மா தம் ப³ஹூ விஞ்ஞுனோ ந ஸம்படிச்ச²ந்தீதி கத்வா ஸோவாதோ³ தே²ரேன கேசிவாதோ³னாம கதோ. யஸ்மாச ஸப்³பே³ஸம்பி லோகிய லோகுத்தரஜ்ஜா²னானம் புப்³ப³பா⁴க³ பா⁴வனா நாம அப்பனாஸன்னகாலேஏவ ஸோமனஸ்ஸஜ்ஜா²னானம் புப்³ப³பா⁴கா³ ஸோமனஸ்ஸஸஹக³தா ஹோந்தி. உபேக்கா²ஜா²னானம் புப்³ப³பா⁴கா³ உபேக்கா²ஸஹக³தா ஹோந்தி. அனாஸன்னகாலே பன ஸப்³பே³ஸம்பி தேஸம் புப்³ப³பா⁴கா³ கதா³சி ஸோமனஸ்ஸஸஹக³தா, கதா³சி உபேக்கா²ஸஹக³தாஹோந்தி. தஸ்மா ஸோ வாதோ³ கேசிவாதோ³வ காதும் யுத்தோதி. ஏத்த²ச ஸப்³பா³னிபி ஸமத²விபஸ்ஸனாபா⁴வனாசித்தானினாம ஆதி³ம்ஹி யேபு⁴ய்யேன உபேக்கா²ஸஹக³தானிஏவ ப⁴வேய்யும், யதி³யி தானி ஆதி³தோயேவ பட்டா²ய ஸோமனஸ்ஸஸஹஜாதானி ஸியும். ததா³ இமே ஸத்தா ஸோ மனஸ்ஸஜாதேஸு கம்மேஸு அனபி⁴ரதானாம நத்தீ²தி அஞ்ஞம் கம்மம் ச²ட்³டே³த்வா பா⁴வனாகம்மமேவ அனுயுஞ்ஜேய்யுந்தி. பச்சா² பன அத்தனோ பா⁴வனாய புப்³பா³பரியவிஸேஸத³ஸ்ஸனகாலேஏவ ஸோமனஸ்ஸ ஸஹஜாதானி ப⁴வந்தி. படிகூலா ரம்மணேஸு பன அஸுப⁴பா⁴வனாசித்தேஸு து³க்கி²தஸத்தாரம்மணேஸுச கருணாபா⁴வனாசித்தேஸு வத்தப்³ப³மேவ நத்தி². அபிச இமா கருணாமுதி³தானாம பகதிகாலேபி உப்பஜ்ஜந்தியேவ. தாஸு பன முதி³தா தாவ இட்ட²ஸம்பத்திவிஸயாதி ஸாயேபு⁴ய்யேன ஸோமனஸ்ஸ ஸஹஜாதாதி யுத்தமேதம். கருணா பன அனிட்ட²விபத்திவிஸயாதி ஸா யேபு⁴ய்யேன உபேக்கா²ஸஹஜாதா ஏவ ஸியா. நச ஏதா பரஸத்தஹேது அதி⁴மத்த ப்³யாபாராதி கத்வா உபேக்கா²வேத³னாய ஸஹ விருத்³தா⁴ஏவாதி ஸக்கா வத்தும். ஸா ஹி அப்பனம் அபத்தா வேத³னுபேக்கா²னாம ஆரம்மணரஸானுப⁴வனேஏவ நிப்³யாபாராஹோதி. ந அஞ்ஞகிச்சேஸு. ததா² ஹி ஸத்தா உபேக்கா²ஸஹக³த சித்தேஹி அதி³ன்னம்பி ஆதி³யந்தி, தா³னம்பி தே³ந்தி, அஞ்ஞானிபி மஹந்தானி புஞ்ஞாபுஞ்ஞகம்மானி கரோந்தியேவாதி. தஸ்மா அப்பனா பத்தானஞ்ஞேவ தாஸம் வேத³னுபேக்கா²ய ஸஹ விருத்³த⁴பா⁴வோ வத்தும் யுத்தோதி.

[80] ஏத்தாவதா யம் வுத்தம் விபா⁴வனியம்

‘‘கருணாமுதி³தா பா⁴வனாகாலே அப்பனாவீதி²தோ புப்³பே³ பரிசயவஸேன உபேக்கா²ஸஹக³தசித்தேஹிபி பரிகம்மம் ஹோதி. யதா²தம் பகு³ணக³ந்த²ம் ஸஜ்ஜா²யந்தஸ்ஸ கதா³சி அஞ்ஞவிஹி தஸ்ஸாபி ஸஜ்ஜா²யனம், யதா²ச பகு³ணவிபஸ்ஸனாய ஸங்கா²ரே ஸம்மஸந்தஸ்ஸகதா³சி பரிசயப³லேன ஞாணவிப்பயுத்தசித்தேஹிபி ஸம்மஸனந்தி உபேக்கா² ஸஹக³தகாமாவசரேஸு கருணா முதி³தானம் அஸம்ப⁴வவாதோ³ கேசிவாதோ³ கதோ’’தி. தம் படிக்கி²த்தம் ஹோதீதி த³ட்ட²ப்³ப³ம்.

கிஞ்சாபி கஸிணனிமித்தாதீ³னி ஆரம்மணானி அக³ம்பீ⁴ரானிஏவ ஹோந்தி. ததா²பி யோக³கம்மப³லேன சித்தஸமாதா⁴னப³லேன கிலேஸ தூ³ரீபா⁴வேனச ததா³ரம்மணேஸு ஜா²னசித்தேஸு ஞாணம் ஏகந்தேன பவத்த தியேவாதி ஆஹ ஸப்³பே³ஸுபி பஞ்ச.ல. சித்தேஸுசாதி.

122. தயோ விரதித⁴ம்மா. த்³வயம் அப்பமஞ்ஞாயுக³ளம். ஏவம் ஸோ ப⁴ணசேதஸிகா ஸோப⁴ணேஸ்வேவ சித்தேஸு சதுதா⁴ சதூஹி பகாரேஹி ஸம்பயுத்தாதி யோஜனா. இதா³னி ஸப்³பே³ஸம்பி சேதோ யுத்தானம் நியதா நியதயோகி³விபா⁴க³ம் த³ஸ்ஸேதும் இஸ்ஸாதிஆதி³மாஹ. கருணா ஆதி³ யஸ்ஸாதி கருணாதி³. அப்பமஞ்ஞா த்³வயம். இஸ்ஸாமச்சே²ரகுக்குச்சானிச விரதியோச கருணாதி³ச இஸ்ஸாமச்சே² ரகுக்குச்சவிரதிகருணாத³யோ. தே நானாச ஜாயந்தி, கதா³சிச ஜாயந்தி. மானோச கதா³சிஏவ ஜாயதி. தி²னமித்³த⁴ஞ்ச ததா² கதா³சி ஏவ ஜாயதி. ஜாயமானம் பன அஞ்ஞமஞ்ஞம் ஸஹேவ ஜாயதி. நனானாதி யோஜனா. ஏத்த²ச அப்பமஞ்ஞாவிரதீனம் நானா கதா³சி யோகோ³ ஹேட்டா²ச வுத்தோ. உபரிச வக்க²தி. இஸ்ஸாதீ³னம்ச உபரி வக்க²தி. மானதி²னமித்³தா⁴னம் பன இத⁴ வத்தப்³போ³தி. தத்த² மானோ சதூஸு தி³ட்டி²விப்பயுத்தேஸு லப்³ப⁴மானோபி கதா³சி தேஸம் ஸேய்யோ ஹமஸ்மீதிஆதி³னா பவத்தகாலேஏவ லப்³ப⁴தி, நஅஞ்ஞதா³. தி²னமித்³த⁴ம் பஞ்சஸு ஸஸங்கா²ரிகேஸு லப்³ப⁴மானம்பி கதா³சி தேஸம் நித்³தா³திபூ⁴தவஸேன அகம்மஞ்ஞதாய பவத்திகாலேஏவ லப்³ப⁴தி. ந அஞ்ஞதா³. ததா³ லப்³ப⁴மானம்பன த்³வயம் ஸஹேவ லப்³ப⁴தி. ந நானாதி.

[81] விபா⁴வனியம் பன

‘‘தி²னமித்³த⁴ம் கதா³சி இஸ்ஸாமச்சே²ரகுக்குச்சேஹிசேவ மானேனச ஸஹ ஜாயதி. கதா³சி தேஹி தேனச நானா ஜாயதீ’’தி யோஜனா வுத்தா. ஸா ஸாரதோ ந பச்சேதப்³பா³.

ந ஹி தேஹி தேனச தஸ்ஸ ஸஹபா⁴வோ நானாபா⁴வோச கிச்சாரம்மணவிரோதா⁴விரோத⁴பா⁴வேன ஸித்³தோ⁴தி.

யாச டீகாயம்

மானோச தி²னமித்³த⁴ஞ்ச கதா³சி நானா ஜாயதி. காரணம் வுத்தமேவ. யோஜனா வுத்தா. ஸாபி ந ஸுந்த³ரா. கதா³சி ஸஹஜாயதீதி.

யதா²வுத்தானுஸாரேனாதி ஸத்தஸப்³ப³த்த²யுஜ்ஜந்தீதிஆதி³னா வுத்தப்பகாரம் அனுஸாரேன ஸேஸாதி ஏகாத³ஸஹி அனியத யோகீ³ஹி அவஸேஸா ஏகசத்தாலீஸத⁴ம்மா. தே யதா²வுத்தானுஸாரேன அத்தனா லப்³ப⁴மான சித்துப்பாதே³ஸு அனியதயோகி³னோ வேதி³தப்³பா³தி யோஜனா.

123. ஏவம் சேதஸிகானம் யோக³ட்டா²னபரிச்சி²ந்த³னவஸேன ஸம்பயோக³னயம் த³ஸ்ஸேத்வா இதா³னி யுத்தத⁴ம்மராஸிபரிச்சி²ந்த³னவஸேன ஸங்க³ஹ நயம் த³ஸ்ஸேந்தோ ஸங்க³ஹஞ்சாதிஆதி³மாஹ. இதா³னி தேஸம் ஸங்க³ஹஞ்ச யதா²ரஹம் பவக்கா²மீதி யோஜனா. ச²த்திம்ஸாதிஆதி³ ஸங்க³ஹனயஸ்ஸ உத்³தே³ஸகா³தா². ஸத்தபஞ்ஞத்தாரம்மணா அப்பமஞ்ஞா நிப்³பா³னா ரம்மணேஸு நலப்³ப⁴ந்திதி வுத்தம் அப்பமஞ்ஞாவஜ்ஜிதாதி ததா² அட்ட²ஸு து³தீயஜ்ஜா²னிகசித்தேஸு விதக்கவஜ்ஜா அஞ்ஞஸமானா த்³வாத³ஸசேத ஸிகா அப்பமஞ்ஞாவஜ்ஜிதா தேவீஸதி ஸோப⁴ணசேதஸிகாசேதி பஞ்சத்திம்ஸ த⁴ம்மா ஸங்க³ஹம் க³ச்ச²ந்தீதிஆதி³னயம் ததா²ஸத்³தே³ன நித்³தி³ஸதி. தேஏவாதி விதக்க விசார பீதிஸுக²வஜ்ஜா உபேக்கா²ஸஹக³தா தே ஏவ தேத்திம்ஸத⁴ம்மா. அட்ட²ஸூதி ஏத்த² அட்ட²ச அட்ட²ச அட்டா²தி ஏகஸேஸனித்³தே³ஸோ, விச்சா²லோபனித்³தே³ஸோவா த³ட்ட²ப்³போ³. பஞ்சகஜ்ஜா²ன வஸேனாதி பாளியம் பஞ்சகனயேன வுத்தஸ்ஸ ஜா²னபே⁴த³ஸ்ஸ வஸேன, சதுக்கனயேன வுத்தஸ்ஸ ஜா²னபே⁴த³ஸ்ஸ வஸேன பன சதுதா⁴வ ஸங்க³ஹோ ஹோதீதி அதி⁴ப்பாயோ. த்³வீஸு ரூபபத²மஜ்ஜா²னலாபீ⁴ஸு து³தீயஜ்ஜா²னம் உப்பாதே³ந்தேஸு மந்தோ³ விதக்கமோ அதிக்கமிதும் ஸக்கோதி. தஸ்ஸ சதுரங்கி³கம் து³தீயஜ்ஜா²னம் உப்பஜ்ஜதி. திக்க²பஞ்ஞோ பன விதக்க விசாரே ஏகதோ அதிக்கமிதும் ஸக்கோதி. தஸ்ஸ தியங்கி³கம் து³தீயஜ்ஜா²னம் உப்பஜ்ஜதீதி அயம் தேஸம் நயானம் விஸேஸோ.

124. கிச்சாரம்மணவிருத்³த⁴த்தா விரதியோ மஹக்³க³தேஸு நுப்பஜ்ஜந்தீதி ஆஹ விரதித்தயவஜ்ஜிதாதி. விரதியோ ஹி காயவசீ விஸோத⁴னகிச்சா ஹோந்தி. மஹக்³க³தஜ்ஜா²னானி பன ஸுவிஸுத்³த⁴காயவசீ பயோக³ஸ்ஸேவ சித்தவிஸோத⁴னகிச்சானி. விரதியோச வீதிக்கமிதப்³ப³ வத்து²ம்வா நிப்³பா³னம்வா ஆரப்³ப⁴ பவத்தந்தி. மஹக்³க³தஜ்ஜா²னானி பன பஞ்ஞத்தி யோவா மஹக்³க³தத⁴ம்மேவாதி.

125. கிச்சாரம்மணவி ருத்³த⁴த்தாயேவ விரதிஅப்பமஞ்ஞாயோ ஏகஸ்மிம் சித்தே த்³வே நலப்³ப⁴ந்தீதி வுத்தம். அப்பமஞ்ஞா விரதியோ பனேத்த².ல. யோஜேதப்³பா³தி. விரதியோ ஏகந்தேன து³ஸ்ஸில்யப்பஹான கிச்சத்தா தப்பஹான கிச்சரஹிதேஸு லோகியாப்³யாகதேஸு நலப்³ப⁴ந்தீதி வுத்தம் விரதிவஜ்ஜிதாதி. பஞ்சஸிக்கா²பதா³ குஸலாயேவாதி ஹி பாளியம் வுத்தம். இத³ஞ்ச லோகியஸிக்கா²பதா³னி ஸந்தா⁴ய வுத்தந்தி த³ட்ட²ப்³ப³ம். அப்பமஞ்ஞானம் ஸத்தபஞ்ஞத்தாரம்மணத்தா மஹாவிபாகானஞ்ச ஏகந்த பரித்தாரம்மணத்தா தாஸம் தேஸு ஸம்ப⁴வோ நத்தீ²தி வுத்தம் அப்பமஞ்ஞா விரதிவஜ்ஜிதாதி. நனு காமகுஸலம் ஸத்தபஞ்ஞத்தாதி³ ஆரம்மணம்பி ஹோதீதி தப்³பி³பாகேனபி தேன ஸதி³ஸா ரம்மணேன ப⁴விதப்³ப³ந்தி. ந. விகப்பரஹிதத்தா. பஞ்ஞத்தியோ ஹி அவிஜ்ஜமானத்தா மஹக்³க³தானுத்தரத⁴ம்மாச ஸண்ஹஸுகு²மத⁴ம்மத்தா ததா² ததா² விகப்பேத்வாவா படிவிஜ்ஜி²த்வாவா க³ண்ஹந்தானம் குஸலாதீ³னம் ஏவ ஆரம்மணபூ⁴தா ஹோந்தி. காமவிபாகானி பன ஸயம் அதிது³ப்³ப³லதாய ஆரம்மணம் விகப்பேத்வா விக³ஹேதும் நஸக்கோந்தி, குதோ படிவிஜ்ஜி²த்வா க³ஹேதும். தஸ்மா தானி பஞ்ஞத்தியோவா மஹக்³க³தானுத்தரத⁴ம்மேவா ஆலம்பி³தும் ந ஸக்கோந்தீதி த³ட்ட²ப்³ப³ம். மஹக்³க³தவிபாகானி பன விகப்பரஹிதானிபி அப்பனாபத்தகம்மவிஸே ஸனிப்³ப³த்தத்தா பா⁴வனாப³லனிம்மிதானி பஞ்ஞத்திவிஸேஸானி ஆலம்பி³தும் ஸக்கோந்தீதி.

[82] விபா⁴வனியம் பன

காமதண்ஹாதி⁴னகம்மஜனிதத்தா காமவிபாகானி காமதண்ஹாய ஆரம்மணபூ⁴தே காமத⁴ம்மேஏவ ஆலம்பி³தும் லப⁴ந்தீதி அதி⁴ப்பாயேன ‘‘காமதண்ஹாதி⁴னஸ்ஸ ப²லபூ⁴தத்தா’’தி வத்வா தா³ஸிபுத்தோபமாய தத³த்த²ம் விபா⁴வேதி. தம் விசாரேதப்³ப³ம்.

ஏவஞ்ஹி ஸதி மஹக்³க³தவிபாகானிபி ரூபாரூபதண்ஹாதி⁴ன கம்மஜனிதானி ஏவ ஹோந்தீதி தானிபி ரூபாரூபதண்ஹானம் ஆரம்மணபூ⁴தே மஹக்³க³த த⁴ம்மேஏவ ஆலம்பே³ய்யுந்தி. அபிச, காமதண்ஹாபி காமத⁴ம்மேஏவ ஆரம்மணம் கரோதி. ந பஞ்ஞத்தித⁴ம்மேதி நத்தி². நச இத்தி²புரிஸாதி³ ஹத்த² பாதா³தி³ பஞ்ஞத்தீஸு அஸ்ஸாத³வஸேன பவத்தா தண்ஹா காமதண்ஹா நாம நஹோதீதி அத்தி². ஸுபே⁴தி குஸலே. மனேதி நித்³தா⁴ரணே பு⁴ம்மம். ஸுபே⁴ க்ரியே பாகேதி நித்³தா⁴ரணீயம் த³ட்ட²ப்³ப³ம். ஸஹேது. ல. மனே த்³வாத³ஸதா⁴வ ஸங்க³ஹோதிவா யோஜேதப்³ப³ம். நவிஜ்ஜந்தேத்தா²தி வஜ்ஜிதானம் ஸங்க³ஹோ. ஏத்தா²தி ஸோப⁴ணசித்தேஸு. த்³வயந்தி விரதிஅப்பமஞ்ஞாது³கம். அனுத்தரேதி விஸேஸகானம் ஸங்க³ஹோ. ஜா²ன த⁴ம்மாதி விதக்காத³யோ. மஜ்ஜி²மே மஹக்³க³தே அப்பமஞ்ஞாச ஜா²னத⁴ம்மா ச. பரித்தேஸு காமஸோப⁴ணேஸு அப்பமஞ்ஞாச விரதி ஞாணபீதி யோச விஸேஸகா, ஸங்க³ஹனய பே⁴த³காரகாதி அத்தோ².

126. ஸத்தரஸத⁴ம்மா லோப⁴தி³ட்டீ²ஹி ஸத்³தி⁴ம் ஏகூனவீஸதி ஹுத்வா ஸங்க³ஹம் க³ச்ச²ந்தீதி யோஜனா. பீதிவஜ்ஜிதா அஞ்ஞஸமானா த்³வாத³ஸ சேதஸிகா அகுஸலஸாதா⁴ரணா சத்தாரோசாதி ஸோளஸத⁴ம்மா லோப⁴தி³ட்டீ²ஹி ஸஹ அட்டா²ரஸ ஹுத்வா ஸங்க³ஹம் க³ச்ச²ந்தீதி யோஜனா. இஸ்ஸாமச்ச²ரிய குக்குச்சானி கிச்சதோ ஆரம்மணதோ ச பி⁴ன்னானி ஹோந்தீதி வுத்தம் இஸ்ஸா.ல. யோஜேதப்³பா³னீதி. ஸப்³பே³ஸுபி அகுஸலசித்துப்பாதே³ஸு ஸம்பயுத்தத⁴ம்மா த⁴ம்மதோ அஸதி³ஸாஏவ ஹோந்தி. க³ணனதோ பன ஏகச்சே ஏகச்சேஹி ஸதி³ஸா ஏவ ஹோந்தீதி வுத்தம் த்³வாத³ஸ.ல. ஸங்க³ஹிதாப⁴வந்தீதி. ஏத்த²ச பஞ்சஸு அஸங்கா²ரிகேஸு பத²மது³தீயேஸு ஏகூனவீஸதி. ததீயசதுத்தே²ஸு அட்டா²ரஸ. பஞ்சமே வீஸதி. பஞ்சஸு ஸஸங்கா²ரிகேஸு பத²மது³தீயேஸு ஏகவீஸதி. ததீயசதுத்தே²ஸு வீஸதி. பஞ்சமே த்³வாவீஸதி. மோமூஹத்³வயே பன்னரஸாதி ஏவம் அகுஸலேஸு ஸத்த ஸங்க³ஹா ப⁴வந்தி. தேனாஹ ஏகூனவீஸாதிஆதி³ம். ஸாதா⁴ரணாதி ஸப்³பா³ குஸலஸாதா⁴ரணா. ஸமானாதி அஞ்ஞஸமானா. அபரேதி ச²ந்த³பீதிஅதி⁴மோக்கே² த²பேத்வா ஏகச்சே.

127. ஹஸனசித்தேதி ஹஸிதுப்பாத³சித்தே. வோட்ட²ப்³ப³னேதி மனோத்³வாராவஜ்ஜனே. ஸுக²ஸந்தீரணேதி ஸோமனஸ்ஸ ஸந்தீரணே. மனோ தா⁴துத்திகா ஹேதுக படிஸந்தி⁴ யுக³ளேதி பஞ்சத்³வாராவஜ்ஜன ஸம்படிச்ச²னத்³வயஸங்கா²தே மனோதா⁴துத்திகேசேவ உபேக்கா² ஸந்தீரண த்³வயஸங்கா²தே அஹேதுக படிஸந்தி⁴யுக³ளேச. ஸப்³ப³த்த² ஸப்³பே³ஸு அஹேதுகேஸு ஸத்த, ததோ ஸேஸா பகிண்ணகா பன யதா²ரஹம் யுஜ்ஜந்தி, இதி தேத்திம்ஸ வித⁴ஸங்க³ஹோ மயா வுத்தோதி யோஜனா.

128. இதா³னி அயம் சேதஸிகனித்³தே³ஸோதி கத்வா சித்தஸ்ஸ விய ஏகஸ்ஸபி சேதஸிகஸ்ஸ பூ⁴மிஜாதி ஸம்பயோகா³தி³ பே⁴தே³ன விபா⁴கோ³ கதே²தப்³போ³தி தம் த³ஸ்ஸேதும் அந்திமகா³த²மாஹ. இத்த²ம் இமினா யதா²வுத்தப்பகாரேன சித்தாவியுத்தானம் சேதஸிகானம் ஸோளஸவித⁴ம் ஸம்பயோக³ஞ்ச தேத்திம்ஸவித⁴ம் ஸங்க³ஹஞ்ச ஞத்வா தேஸம் யதா² யோக³ம் சித்தேன ஸமம் பே⁴த³ம் உத்³தி³ஸேதி யோஜனா. ப²ஸ்ஸோ தாவ ஏகூனனவுதியா ஏகவீஸஸதேஸுவா சித்தேஸு யுத்தத்தா ஏகூனனவுதி ஏகவீஸஸதவிதே⁴வாதி ஏவம் த்³விபஞ்ஞாஸசேதஸிகே விஸும் விஸும் உத்³த⁴ரித்வா யதா²யோக³ம் பூ⁴மிஜாதிஸம்பயோகா³தி³பே⁴தே³ஹி தேஸம் விபா⁴க³ம் கதே²ய்யாதி அத்தோ².

இதி பரமத்த²தீ³பனியானாம அபி⁴த⁴ம்மத்த²ஸங்க³ஹஸ்ஸ

சதுத்த²வண்ணனாய சேதஸிக ஸங்க³ஹஸ்ஸ

பரமத்த²தீ³பனா நிட்டி²தா.