து³தீயகா³தா²-பரமத்த²தீ³பனீ

11. ஏவம் ஆதி³கா³தா²யதம்தம் பயோஜன ஸஹிதே பஞ்ச அத்தே² த³ஸ்ஸேத்வா இதா³னி தே அபி⁴த⁴ம்மத்தே² உத்³தே³ஸதோ த³ஸ்ஸேந்தோ து³தீயகா³த²மாஹ. தத்த² தத்தா²தி பா⁴ஸிஸ்ஸம் அபி⁴த⁴ம்மத்த² ஸங்க³ஹந்தி வுத்தே தஸ்மிம் அபி⁴த⁴ம்மத்த²ஸங்க³ஹபதே³ மயா வுத்தா அபி⁴த⁴ம்மத்தா² ஸப்³ப³தா²பரமத்த²தோ சதுதா⁴ ஹோந்தீதி யோஜனா. ஏத்த²ச -

[12] டீகாயம் தாவ

தத்த² தஸ்மிம் அபி⁴த⁴ம்மத்த²ஸங்க³ஹபகரணேதிவா அபி⁴த⁴ம்மத்த² பதே³திவா அபி⁴த⁴ம்மேதிவா தஸத்³த³த்தோ² நித்³தி³ட்டோ². விபா⁴வனியம் பன தஸ்மிம் அபி⁴த⁴ம்மேதி. ஸப்³ப³ம் நஸுந்த³ரம்.

ந ஹி அபி⁴த⁴ம்மத்த² ஸங்க³ஹபகரணே மயா வுத்தா அபி⁴த⁴ம்மத்தா²தி யுஜ்ஜதி. பகரணம்பி ஹி உபரி வுச்சமானமேவ ஹோதி. நது வுத்தம். குதோ அபி⁴த⁴ம்மத்தா²தி. ந ச ஸம்வண்ணனாபகரணேஸு ஆதி³ம்ஹியேவ தாவ தஸத்³தோ³ அப்பதா⁴னபதா³னி பச்சாமஸதீதி அத்தி². தஸ்மா அட்ட²ஸாலினியம் ஆதி³ம்ஹி தத்த² கேன ட்டே²ன அபி⁴த⁴ம்மோதி வாக்யேவிய இத⁴ தஸத்³த³த்தோ² வேதி³தப்³போ³தி. ஏவஞ்ஹி ஸதி –

[13] டீகாஸு

ஸப்³ப³தா² வுத்தாதி யோஜனாபி படிக்கி²த்தா ஹோதி.

ஸா ஹி வக்க²மானேஹி ஸப்³ப³யாபி த்³வாத³ஸ, ஸப்³ப³தா²பி அட்டா²ரஸாதிஆதீ³ஹி நஸமேதீதி. தத்த ஸப்³ப³தா²தி த⁴ம்மஸங்க³ணியம் வுத்தேன குஸலாதி³னா ஸப்³ப³ப்பகாரேனபி சதுதா⁴வ ஹோந்தி, விப⁴ங்கே³ விப⁴த்தே ந க²ந்தா⁴தி³னா ஸப்³ப³ப்பகாரேனபி சதுதா⁴வ ஹோந்தீதி அத்தோ². தா⁴து கதா²யம் வுத்தேனாதிஆதி³னாபி வத்தப்³ப³ம்.

12. பரமத்த²தோதி பரமத்த² ஸச்சதோ. த்³வே ஹி ஸச்சானி ஸம்முதிஸச்சம், பரமத்த²ஸச்சந்தி, தத்த² ஸத்த புக்³க³ல அத்த ஜீவாதி³கா பஞ்ஞத்திஅத்தா² ஸபா⁴வதோ அவிஜ்ஜமானாயேவ ஹோந்தி. த⁴ம்மவவத்தா²னஞ்ஞாணரஹிதானம்பன மஹாஜனானம் சித்தே மஹந்தமஹந்தாபி ஹுத்வா விஜ்ஜமானாவிய பஞ்ஞாயந்தி, தேச மஹாஜனா ஸமக்³கா³ ஹுத்வா தேஸம் ஏகந்தேன அத்தி²பா⁴வம் க³ஹேத்வா ததா² ததா² வோஹரந்தி சேவ ஸம்படிச்ச²ந்திச. தஸ்மா தே மஹாஜனேஹி ஸமக்³கே³ஹி ஸம்மதத்தாததோயேவச வசீஸச்சவிரதிஸச்சானம் வத்து²பூ⁴தத்தாஸம்முதி ஸச்சந்தி வுச்சந்தி. தஸ்மிம் ஸம்முதிஸச்சே ட²த்வா ஸம்மா படிபஜ்ஜந்தா ஸப்³ப³ லோகியஸம்பத்தியோச ஸப்³ப³போ³தி⁴ஸம்பா⁴ர த⁴ம்மேச ஆராதே⁴ந்தி. மிச்சா²படிபஜ்ஜந்தா அபாயபூரகா ஹோந்தி. ஏவம் மஹந்தஞ்ஹி ஸம்முதி ஸச்சந்தி. பரமத்த²ஸச்சம் பன பத்வா தம் ஸச்சமேவ நஹோதி. தஞ்ஹி ஸயம் அவிஜ்ஜமானம்யேவ ஸமானம் மஹாஜனே விஜ்ஜமானந்த்வேவ க³ண்ஹாபேதி. ஸக்காயதி³ட்டி² த்³வாஸட்டி²தி³ட்டி² திவித⁴மிச்சா²தி³ட்டீ²னம் வத்து² ஹுத்வா பா³லஜனானம் வட்டது³க்க²தோ நிய்யாதும் நதே³தி. ஏவம் விபரீதஞ்ஹி ஸம்முதிஸச்சம். ஏவம் மஹாஸாவஜ்ஜஞ்சாதி. பரமத்த²ஸச்சம்பன து³வித⁴ம் ஸபா⁴வஸச்சம் அரியஸச்சந்தி. தத்த² த⁴ம்மஸங்க³ணிஆதீ³ஸு ஸத்தஸு பகரணேஸு விப⁴த்தா குஸலாத³யோ த⁴ம்மா ஸபா⁴வஸச்சம்னாம. தே ஹி ஸயம் ஸபா⁴வதோ விஜ்ஜமானத்தா குஸலானாம த⁴ம்மா அத்தி² ஸுகா²னாம வேத³னா அத்தீ²தி க³ண்ஹந்தேன விஸம்வாதே³ந்தீதி. தம் பன அரியஸச்சம் பத்வா கிஞ்சி அஸச்சம்பி ஹோதியேவ. ததா²ஹி அனுப⁴வனபே⁴த³மத்தம் உபாதா³யேவ வேத³னா ஸுகா² து³க்கா² அது³க்க²மஸுகா²தி வுத்தா. ந ஸப்³பா³காரதோ ஸுக²பூ⁴தத்தா. ஸப்³பே³ஹி பன அனிச்சதா ஸங்க²ததாதீ³ஹி அனேகஸதேஹி ஆகாரேஹி ஸப்³பா³பி வேத³னா து³க்கா²ஏவ. ததா² அனவஜ்ஜஸுக²விபாகட்டே²ன குஸலபா⁴வோபி அகுஸலம் உபாதா³யேவ வுத்தோ. ஸப்³பே³பி ஹி தேபூ⁴மகா குஸலஸம்மதா த⁴ம்மா ஸாஸவதா ஸம்கிலேஸிகதா ஓக⁴னிய யோக³னிய உபாதா³னியதா ஸங்கா²தேஹி வஜ்ஜேஹி ஸாவஜ்ஜாஏவ ஹோந்தி. து³க்க²ஸச்சபூ⁴தானஞ்ச விபாகானம் ஜனனட்டே²ன ஏகந்தேன து³க்க²விபாகாஏவ ஹோந்தி. அஜ்ஜ²த்தத்திகஞ்ச ஸப்³ப³லோகியஸம்மதம் உபாதா³ய வுத்தம். ஸப்³பே³பி ஹி சதுப்³பூ⁴ மகத⁴ம்மா ஏகந்தேன அத்தாபினாம நத்தி². குதோ அஜ்ஜ²த்தானாம. ப³ஹித்³தா⁴ஏவ ஹோந்தி. ஸங்கா²ரே பரதோ பஸ்ஸாதி ஹி வுத்தந்தி. அயம் நயோ ஸேஸத்திக து³கத⁴ம்மேஸுபி யதா²ரஹம் நேதப்³போ³. அரிய ஸச்சம்னாம ஸப்³பே³ஸம் தேபூ⁴மகத⁴ம்மானம் ஏகந்த து³க்க²பா⁴வோ தண்ஹாய ஏகந்த து³க்க²ஸமுத³ய பா⁴வோ நிப்³பா³னஸ்ஸேவ து³க்க²னிரோத⁴ பா⁴வோ அட்ட²ங்கி³கஸ்ஸ மக்³க³ஸ்ஸேவ து³க்க²னிரோத⁴மக்³க³பா⁴வோசாதி. இத⁴மேவ ஹி பரிஸுத்³த⁴பு³த்³தீ⁴னம் அரியானம் ஞாணே அசலமானம் ஸப்³பா³காரபரிபுண்ணம் நிப்பரியாயஸச்சம் ஹோதீதி. தேஸு இத⁴ ஸம்முதிஸச்சம் நிவத்தேந்தோ பரமத்த²தோதி இத³ மாஹ. தேன வுத்தம் பரமத்த²தோதி பரமத்த²ஸச்சதோதி. தத்த² அத்தோ² து³விதோ⁴ ஸபா⁴வஸித்³தோ⁴ச பரிகப்பஸித்³தோ⁴ச. தத்த² யோ வினா அஞ்ஞாபதே³ஸேன கேவலம் விஸும் விஸும் அத்தனோ லக்க²ணேன விஜ்ஜமானோ ஹுத்வா ஸித்³தோ⁴. ஸோ சித்தாதி³கோ அத்தோ² ஸபா⁴வஸித்³தோ⁴னாம. யோபன அத்தனோ லக்க²ணேன விஜ்ஜமானோயேவ நஹோதி. விஜ்ஜமானஸ்ஸபன அத்த²ஸ்ஸ நானா பவத்திஆகாரே உபாதா³ய சித்தேன பரிகப்பேத்வா ஸவிக்³க³ஹம் கத்வா க³ஹிதோ சித்தமயோ சித்தனிம்மிதோ ஹுத்வா சித்தேஏவ உபலப்³ப⁴மானோ ஹோதி. ஸோ ஸத்தபுக்³க³லாதி³கோ அத்தோ² பரிகப்பஸித்³தோ⁴ நாம. தேஸு ஸபா⁴வஸித்³தோ⁴யேவ பரமத்தோ²னாம. ஸோ ஹி ஸந்தி ப⁴வந்தி பு³த்³தி⁴ஸத்³தா³ ஏத்தா²தி அத்தோ². ஏகந்தவிஜ்ஜமானட்டே²ன இதரதோ பரமோ உக்கம்ஸக³தோ அத்தோ²தி பரமத்தோ². அபி ச, யே அயம் அத்தி² அயம் உபலப்³ப⁴தீதி க³ஹேத்வா தஸ்ஸ அபி⁴ஞ்ஞேய்யஸ்ஸ அபி⁴ஞ்ஞத்தா²ய, பரிஞ்ஞேய்யஸ்ஸ பரிஞ்ஞத்தா²ய, பஹாதப்³ப³ஸ்ஸ பஹானத்தா²ய, ஸச்சி²காதப்³ப³ஸ்ஸ ஸச்சி²கரணத்தா²ய, பா⁴வேதப்³ப³ஸ்ஸ பா⁴வனத்தா²ய படிபஜ்ஜந்தி. தேஸம் தத³த்த²ஸாத⁴னே அவிஸம்வாத³கட்டே²ன பரமோ உத்தமோ அத்தோ²தி பரமத்தோ². இதரோபன அவிஜ்ஜமானத்தா தஸ்ஸ அபி⁴ஞ்ஞாதி³அத்தா²ய படிபஜ்ஜந்தானம் தத³த்த²ஸாத⁴னே விஸம்வாத³கோயேவ ப⁴விஸ்ஸதி. நபன தத³த்த²ம் ஸாதே⁴ஸ்ஸ தீதி பரமத்தோ²தி வத்தும் நாரஹதீதி.

[14] விபா⁴வனியம் பன

‘‘பரமஸ்ஸவா உத்தமஸ்ஸ ஞாணஸ்ஸ அத்தோ² கோ³சரோதி பரமத்தோ²’’திபி வுத்தம். தம் ந ஸுந்த³ரம்.

ந ஹி பரமஸத்³தோ³ஞாணே வத்தமானோ தி³ஸ்ஸதி. நச அத்த²ஸத்³தோ³ கோ³சரேதி. யஞ்ச அனுடீகாயம் ஸச்சமேவ ஸச்சிகம். ஸோ ஏவ அத்தோ² அவிபரீதஸ்ஸ ஞாணஸ்ஸ விஸயபா⁴வட்டே²னாதி ஸச்சிகட்டோ²தி வுத்தம். தம்பி அவிபரீதேன ஞாணேன அரணீயதோ உபக³ந்தப்³ப³ தோ அத்தோ²தி இமமத்த²ம் த³ஸ்ஸேதி. நபரமஸத்³த³ஸ்ஸ அத்த²ந்தி. [பரமத்த²பத³ம்]

13. சித்தந்தி ஏத்த² சிந்தேதீதி சித்தம். ஏத்த²ச சிந்தனக்ரியா நாம நிச்சம் ஆரம்மணாபேக்கா² ஹோதி. ந ஹி ஸா ஆரம்மணேன வினா லப்³ப⁴தீதி. தஸ்மா ஆரம்மணக்³க³ஹண ஆரம்மணுபலத்³தி⁴யேவ இத⁴ சிந்தனாதி த³ட்ட²ப்³பா³தி. ஏவஞ்ஹி ஸதி ப⁴வங்க³ஸமய விஸஞ்ஞிஸமயேஸு சித்தம் ஆரம்மணேன வினாபி பவத்ததீதி ஏவம் வாதீ³னம் வாதோ³ படிக்கி²த்தோ ஹோதி. ஸந்தேஸுபிச நிஸ்ஸய ஸமனந்தராதீ³ஸு தஸ்ஸ பச்சயேஸு தேஹி நாமம் அலபி⁴த்வா ஆரம்மணபச்சயவஸேனேவஸ்ஸ நாமம் ஸித்³த⁴ந்தி த³ட்ட²ப்³ப³ம். சிந்தேந்தி ஸம்பயுத்தகா த⁴ம்மா ஏதேனாதி சித்தம். தஞ்ஹி ஆரம்மணக்³க³ஹணகிச்சே புப்³ப³ங்க³மபூ⁴தந்தி தம் ஸம்பயுத்தத⁴ம்மாபி ஆரம்மணம் க³ண்ஹந்தா தஸ்ஸ வஸேனேவ க³ண்ஹந்தீதி. சிந்தனமத்தம்வா சித்தம். ஸப்³பே³பி ஹி த⁴ம்மா தம்தம் க்ரியாமத்தாவ ஹோந்தி. ந தேஸு த³ப்³ப³ம்வா ஸண்டா²னம் வா விக்³க³ஹோவா உபலப்³ப⁴தி. பச்சயாயத்த வுத்தினோ ச ஹோந்தி. ந தே அத்தனோ தா²மேனவா ப³லேனவா வஸேனவா ஸத்தியாவா உப்பஜ்ஜிதும்பி ஸக்கோந்தி. பகே³வ சிந்தேதும்வா பு²ஸேதும்வாதி. க²ணமத்தட்டா²யினோச ஹோந்தி, ந கதா³சி கஸ்ஸசி வஸே வத்திதும் ஸக்கோந்தீதி. தஸ்மா தேஸு இத³ம் த³ப்³ப³ம், அயம் ஸத்தி, அய க்ரியாதி ஏவம் விபா⁴கோ³ நலப்³ப⁴தீதி த³ட்ட²ப்³ப³ம். ஏவஞ்ச கத்வா ஸப்³பே³ஸு பரமத்த²பதே³ஸு ஏகம் பா⁴வஸாத⁴னமேவ பதா⁴னதோ லப்³ப⁴தி. தத³ஞ்ஞ ஸாத⁴னானிபன பரியாயதோவ லப்³ப⁴ந்தீதி வேதி³தப்³ப³ம். ஏத்த² ச த³ப்³பா³தி³வஸேன அபே⁴த³ஸ்ஸ சிந்தனஸ்ஸ அத்த²விஸேஸஞாபனத்த²ம் விபா⁴க³ கப்பனாவஸேன பே⁴த³கரணம் பரியாயகதா²தி த³ட்ட²ப்³ப³ம். யதா² ஸிலா புத்தகஸ்ஸஸரீரந்தி, ததா² கரணஞ்ச தம் தம் க்ரியாஸங்கா²த த⁴ம்மவிமுத்தஸ்ஸ பரபரிகப்பிதஸ்ஸ காரகபூ⁴தஸ்ஸ அத்த ஜீவ ஸத்த புக்³க³லஸ்ஸ ஸப்³ப³ஸோ அபா⁴வதீ³பனத்த²ம். ஸதி ஹி அத்தாதி³ம்ஹி கிம் அபே⁴த³ஸ்ஸ பே⁴த³கப்பனாயாதி.

விபா⁴வனியம் பன

ஸஸவிஸாணம் விய அபூ⁴தஸ்ஸ பூ⁴த கப்பனா வுத்தா விய தி³ஸ்ஸதி. அயமஸ்ஸாதி⁴ப்பாயோ-த⁴ம்மேஸு கத்தாவா காரே தாவா கோசி நத்தி². லோகேபன அத்தப்பதா⁴னோ க்ரியா நிப்பா²த³கோ கத்தானாம ஸித்³தோ⁴. தஸ்மா சிந்தனகிச்சே அத்தப்பதா⁴னதா தீ³பனத்த²ம் தம் கத்துபா⁴வம் சித்தே ஆரோபேத்வா சிந்தேதீதி சித்தந்தி வுத்தம்.

சித்தஸ்ஸச ப³லேன தம்ஸம்பயுத்தானம்பி தஸ்மிம் கிச்சே தத³னுகூலப்பவத்திதீ³பனத்த²ம் புனகரணபா⁴வம் சித்தே கத்துபா⁴வஞ்ச தேஸு ஆரோபேத்வா சிந்தேந்தி ஸம்பயுத்தகா த⁴ம்மா ஏதேனாதி சித்தந்தி வுத்தந்தி. அபி சேத்த² சித்தஸத்³தோ³ விசித்ரத்த²வாசகோ த³ட்ட²ப்³போ³. வுத்தஞ்ஹே தம் ஸம்யுத்தகே –

தி³ட்ட²ம் வோ பி⁴க்க²வே சரணம்னாம சித்தந்தி. ஏவம் ப⁴ந்தே. தம்பி கோ² பி⁴க்க²வே சரணம் சித்தம் சித்தேனேவ சிந்திதந்தி. தேனாபி கோ² பி⁴க்க²வே சரணேன சித்தேன சித்தஞ்ஞேவ சித்ததரந்தி, நா ஹம் பி⁴க்க²வே அஞ்ஞம் ஏகனிகாயம்பி ஸமனுபஸ்ஸாமி யம் ஏவம் சித்தம். யத²யித³ம் பி⁴க்க²வே திரச்சா²னக³தா பாணா. தேபி கோ² பி⁴க்க²வே திரச்சா²னக³தா பாணா சித்தேனேவ சித்திகதா. தேஹிபி கோ² பி⁴க்க²வே திரச்சா²ன க³தேஹி பாணேஹி சித்தஞ்ஞேவ சித்ததரந்தி.

தத்த² சரணம்னாம சித்தந்தி யத்த²விசித்ரானி தி³ப்³ப³விமானாதீ³னி சித்தகம்மானி கத்வா இத³ஞ்சித³ஞ்ச புஞ்ஞம் கரோந்தா இத⁴சித⁴ச நிப்³ப³த்தாதி த³ஸ்ஸேந்தோ விசரந்தி. தஸ்ஸ படகோட்ட²கஸ்ஸேதம் நாமம். சித்தேனாதி நிஸ்ஸக்கே கரணவசனம். யத²யித³ந்தி யதா² இமே. சித்திகதாதி விசித்ரா கதா. ஏத்த²ச சித்தவிசித்தகாய ஸஞ்ஞாவிசித்தா. ஸஞ்ஞாவிசித்ததாய தண்ஹாவிசித்தா. தண்ஹாவிசித்ததாய கம்மானி விசித்தானி. கம்மவிசித்த தாய யோனியோ விசித்தா. யோனிவிசித்ததாய தேஸம் திரச்சா² நக³தானம் விசித்ததா வேதி³தப்³பா³. [வசனத்தோ²]

தம் தம் ஸபா⁴வோ லக்க²ணம், கிச்சஸம்பத்தியோ ரஸோ;

க³ய்ஹாகாரோ ப²லம்வாபி, பச்சுபட்டா²ன ஸஞ்ஞிதம்.

ஆஸன்னகாரணம் யம் தம், பத³ட்டா²னந்தி தம் மதம்;

த⁴ம்மானம் வவத்தா²னாய, அலம் ஏதே விபு³த்³தி⁴னோ.

ஆரம்மணவிஜானனலக்க²ணம் சித்தம், புப்³ப³ங்க³மரஸம், ஸந்தா⁴னபச்சுபட்டா²னம், நாமரூபபத³ட்டா²னம். [சித்தம்]

14. சேதஸிகந்தி ஏத்த² சேதஸி ப⁴வம் ததா³யத்தவுத்திதாயாதி சேதஸிகம். ப²ஸ்ஸாதி³ த⁴ம்மஜாதம். ஏத்த²ச ததா³யத்தவுத்திதா நாம ஏகுப்பாத³தாதீ³ஹி லக்க²ணேஹி சித்தேன ஸஹ ஏகீ பூ⁴தஸ்ஸ விய பவத்தி. ஏதேன யா சித்தஸ்ஸ ஜாதி. ஸாஏவ ப²ஸ்ஸாதீ³னம். யா சித்தஸ்ஸ ஜரா, யம் சித்தஸ்ஸ மரணம், யம் சித்தஸ்ஸ ஆரம்மணம், யம் சித்தஸ்ஸ வத்து², ததே³வ ப²ஸ்ஸாதீ³னந்தி ஏவம் ஏகபுப்ப² மஞ்ஜரியம் ஏகவண்டுபனிப்³ப³ந்தா⁴னி புப்பா²னி விய சித்தேன ஸஹ ஏகஜாதியாதி³ உபனிப்³ப³ந்தா⁴ ப²ஸ்ஸாத³யோ த⁴ம்மா இத⁴ சேதஸிகம்னாமாதி ஸித்³தா⁴ ஹோந்தி. ஏவஞ்ச ஸதி சித்தம்பி தேஹி ப²ஸ்ஸாதீ³ஹி ஸஹ ததே²வ ஆயத்தம் பவத்ததீதி தம்பி ப²ஸ்ஸிகம் வேத³னிகந்திஆதி³னா வத்தப்³ப³ந்தி சே. ந. சித்தஸ்ஸேவ ஜேட்ட²கத்தா. மனோபுப்³ப³ங்க³மா த⁴ம்மா, மனோஸேட்டா² மனோமயாதி ஹி வுத்தம். ஏத்த²ச மனோமயாதி மனஸாஏவ பகதா நிம்மிதா சித்தக்ரியா பூ⁴தாதி அத்தோ². ஏதேன தே ப²ஸ்ஸாத³யோ த⁴ம்மா சித்தேன வினா நுபலப்³ப⁴ந்தீதி த³ஸ்ஸேதி. சித்தம்பன தேஹி கேஹிசி வினாபி பவத்ததியேவ. பஞ்சவிஞ்ஞாண சித்தஞ்ஹிதேஹி கேஹிசி விதக்காதீ³ஹி வினா உப்பஜ்ஜதீதி. தஸ்மா தேஸஞ்ஞேவ ததா³யத்த வுத்திதா வத்தப்³பா³ ந சித்தஸ்ஸாதி.

[15] விபா⁴வனியம் பன

ஏகாலம்ப³ணதா மத்தேன தேஸம் ததா³யத்தவுத்திதம் சேதஸி கத்தஞ்ச விபா⁴வேதி. தம் ந ஸுந்த³ரம்.

ந ஹி ஏகாலம்ப³ணதாமத்தேன சேதஸிகம்னாம ஜாதந்தி. ஏத்த² ச லோகே நானாவண்ணதா⁴துயோ உத³கே க⁴ம்ஸித்வா வத்து²ம்ஹி நானா சித்தகம்மானி கரோந்தி, தத்த² வத்து²ம்ஹி ப²ரணம் ப³ந்த⁴னஞ்ச உத³கஸ்ஸேவ கிச்சம், ந வண்ணதா⁴தூனம். நானாரூப த³ஸ்ஸனம் வண்ணதா⁴தூனமேவ கிச்சம், ந உத³கஸ்ஸ. தத்த² வத்து²விய ஆரம்மணம் த³ட்ட²ப்³ப³ம். உத³கம்விய சித்தம். நானா வண்ணதா⁴துயோவிய சேதஸிகத⁴ம்மாதி. [சேதஸிகம்]

15. ரூபந்தி ஏத்த² ருப்பதீதி ரூபம். ஸீதுண்ஹாதீ³ஹி விரோதி⁴ பச்சயேஹி விஸம பவத்தி வஸேன விகாரம் ஆபஜ்ஜதி, தேஹி வா விகாரம் ஆபாதீ³யதீதி அத்தோ². யதா²ஹ –

ருப்பதீதி கோ² பி⁴க்க²வே தஸ்மா ரூபந்தி வுச்சதி. கேன ருப்பதி. ஸிதேனபி ருப்பதி. உண்ஹேனபி ருப்பதி. ஜிக⁴ச்சா²யபி ருப்பதி. விபாஸாயபி ருப்பதி. ட³ம்ஸ மகஸ வாதாதப ஸரிம் ஸப ஸப்ப²ஸ்ஸேஹிபி ருப்பதீதி. ருப்பதீதிச ருப்பதி, குப்பதி, க⁴ட்டீயதி, பிளீ யதி, பி⁴ஜ்ஜதீதி.

மஹானித்³தே³ஸே வுத்தம். அயமேத்த² பிண்ட³த்தோ², யே த⁴ம்மா சிரட்டி²திகாச ஹோந்தி ஸப்படிக⁴ஸபா⁴வாச. தேஸஞ்ஞேவ டி²திக்க²ணேஸு விரோதி⁴பச்சயேஹி ஸமாக³மோனாம ஹோதி. நபனஞ்ஞேஸம் பரித்தக்க²ணானம் அப்படிக⁴ஸபா⁴வானந்தி. தேஸஞ்ஹி அப்படிக⁴ஸபா⁴வானம் ஸுகு²ம ரூபானம்பி ப³ஹித்³தா⁴ ஸீதாதீ³ஹி ஸமாக³மோனாம நத்தி². குதோ பரித்தக்க²ணானம் அப்படிக⁴ஸபா⁴வானஞ்ச அரூபத⁴ம்மானந்தி. யதி³ஏவம் ஸுகு²மரூபானம் அரூபதாபத்தி ஸியாதி. நஸியா. ஓளாரிகரூபேஹி ஸமானக³தி கத்தா. தானிஹி ஓளாரிகேஸு ருப்பமானேஸு ருப்பந்தியேவாதி. ஸமாக³மோச நாம இத⁴ த²பேத்வா ஆபாதக³மனம் ஆரம்மணகரணஞ்ச அஞ்ஞமஞ்ஞவிருத்³தா⁴னம் டி²திபத்தானம் ஓளாரிகரூபானம் மஹாபூ⁴தானமேவவா அஞ்ஞமஞ்ஞாபி⁴க⁴ட்டனம் வுச்சதி, ருப்பதி க⁴ட்டீயதி பீளீயதீதி ஹி வுத்தம். ருப்பனஞ்சனாம பரஸேனாயுத்³தே⁴ன ரட்ட²கோ²போ⁴விய கலாபந்தரக³ததா⁴தூனம் குப்பனம் பி⁴ஜ்ஜனம்ச வுச்சதி. குப்பதி பி⁴ஜ்ஜதீதி ஹி வுத்தம். ஏத்த²ச குப்பதீதி கோ²ப⁴தி சஞ்சலதி, பி⁴ஜ்ஜதீதி விகாரம் ஆபஜ்ஜதி. யஸ்மிம் க²ணே விரோதி⁴பச்சயஸமாக³மம் லப⁴ந்தி. ததோ பட்டா²ய ஸயம்பி விகாரபத்தா ஹோந்தி. ஓமத்தாதி⁴மத்தரூபஸந்ததீனம் உப்பத்தியா பச்சயபா⁴வம் பத்தா ஹோந்தீதி அத்தோ². அபிசேத்த² ருப்பனம் து³வித⁴ம் வட்³ட⁴னம், ஹாயனஞ்ச. தது³ப⁴யம்பி கப்பவுட்டா²னே கப்பஸண்டா²னே நானாஆயுகப்ப ஸம்வச்ச²ர உது மாஸ ரத்தி தி³வாதீ³னம் பரிவத்தனேச பாகடம் ஹோதீதி. கஸ்மா பன ரூபந்தி நாமம் க⁴ட்டனவஸேன ருப்பனத⁴ம்மானமேவ ஸித்³த⁴ந்தி. தேஸமேவ ஸவிக்³க³ஹத்தா. ரூபத⁴ம்மா ஹி ஸமூஹஸண்டா²னாதி³ பா⁴வபத்தியா ஸவிக்³க³ஹா ஹோந்தி. தஸ்மா தேஸமேவ ருப்பனம் பச்சக்க²தோபி லோகஸ்ஸ பாகடந்தி தேஸ்வேவ ரூபந்தி நாமம் ஸித்³த⁴ந்தி த³ட்ட²ப்³ப³ம். அரூபத⁴ம்மா பன அவிக்³க³ஹாதி ந தேஸம் விகாரோ பச்சக்க²தோ லோகஸ்ஸ பாகடோ ஹோதி. தம் தம் ரூபவிகாரம் தி³ஸ்வாவா ஸுத்வா வா புச்சி²த்வாயேவ வா ஸோ லோகேன ஜானிதப்³போ³ அஞ்ஞத்ர பரசித்தவிதூ³ஹி. தஸ்மா தேஸம் ரூபதாபத்தி நத்தீ²தி.

[16] விபா⁴வனியம் பன

தேஸம் ரூபதாபத்திப்பஸங்கோ³ ஸீதாதி³க்³க³ஹண ஸாமத்தி²யேன நிவத்திதோ. யஸ்மா பன வோஹாரோனாம லோகோபசாரேன வினா நஸிஜ்ஜ²தி. லோகோபசாரோச பாகடனிமித்தவஸே நேவ பவத்தோ. தஸ்மா இத⁴ ஸீதாதி³க்³க³ஹணேன வினாபி தப்பஸங்க³னிவத்தி லோகதோவ ஸித்³தா⁴தி த³ட்ட²ப்³பா³.

யஸ்மா ச ப்³ரஹ்மலோகே ப்³ரஹ்மானம் காயவிகார வசீவிகாரா ச இத்³தி⁴விகுப்பனாவஸப்பவத்தா நானாரூபவிகாராச தி³ஸ்ஸந்தியேவ. தேச ஏகேன பரியாயேன ருப்பனாகாராஏவ நாம ஹோந்தி, தஸ்மா தேஸம் வஸேன தத்த² ரூபானம் ரூபதாஸித்³தி⁴ ஹோதீதி வேதி³தப்³ப³ம். ரூபயதி வா அத்தனோ ஸபா⁴வேன பகாஸதீதி ரூபம். அரூபத⁴ம்மா ஹி ந அத்தனோ ஸபா⁴வேன பாகடா ஹோந்தி. ரூபஸன்னிஸ்ஸயேனேவ க³ஹேதப்³பா³. இத³ம் பன அத்தனோ ஸபா⁴வேனேவ பாகடம் பஞ்சவிஞ்ஞாணேஹிபி க³ஹேதப்³ப³ந்தி. இமஸ்மிம் அத்தே² ஸதி ப்³ரஹ்மலோகே ரூபானம்பி உஜு கதோவ ரூபதாஸித்³தி⁴ ஹோதீதி.

[17] விபா⁴வனியம் பன

அனுக்³கா³ஹகானம் ஸீதாதீ³னம் வஸேன தம் ஸபா⁴வா நாதிவத்தன வஸேனச தத்த² ரூபதாஸித்³தி⁴ விபா⁴விதா. யஸ்மாபன ஸீதே நாபி உண்ஹேனாபீதிஆதி³வசனம் நித³ஸ்ஸனமத்தம் ஹோதி. கம்ம சித்தாஹாரானம்பி வஸேன ருப்பனஸ்ஸ ஸம்ப⁴வதோ, ததா²ஹி ஸஞ்ஞா விஞ்ஞாணானிபி ரூபாரம்மணரஸாரம்மணேஹி ஏவ பாளியம் நித்³தி³ட்டா²னி. ந ஹி ஸஞ்ஞா ரூபம்ஏவ ஸஞ்ஜானாதி. ந ச விஞ்ஞாணம் ரஸ மேவ விஜானாதி. நித³ஸ்ஸனமத்தேன தே³ஸனா ஹோதீதி விஞ்ஞாயதீதி. தஸ்மா ஸீதாதி³க்³க³ஹணம் அமுஞ்சித்வாவ தத்த² ரூபதாஸித்³தி⁴விபா⁴வனேன பயோஜன நத்தீ²தி. [ரூபம்]

16. நிப்³பா³னந்தி ஏத்த² நிப்³பா³யந்தி ஸப்³பே³ வட்டது³க்க²ஸந்தாபா ஏதஸ்மிந்தி நிப்³பா³னம். நிப்³பா³யந்தீதி யே கிலேஸாவா க²ந்தா⁴வா அபா⁴விதமக்³க³ஸ்ஸ ஆயதிம் உப்பஜ்ஜனாரஹபக்கே² டி²தா ஹோந்தி. தேயேவ பா⁴விதமக்³க³ஸ்ஸ அனுப்பஜ்ஜனாரஹபக்க²ம் பாபுணந்தீதி அத்தோ². ந ஹி க²ணத்தயம் பத்வா நிருத்³தா⁴ அதீதத⁴ம்மா நிப்³பா³யந்தி நாம. பச்சுப்பன்னேஸு ஆயதிம் அவஸ்ஸம் உப்பஜ்ஜமானேஸுச த⁴ம்மேஸு வத்தப்³ப³மேவ நத்தீ²தி. வட்டது³க்க²ஸந்தாபாதி கிலேஸவட்ட கம்மவட்ட விபாகவட்ட து³க்க²ஸந்தாபா. ந ஹி திவித⁴ வட்டது³க்க²ஸந்தாபரஹிதானம் ருக்கா²தீ³னம் அனுப்பாத³னிரோதோ⁴ நிப்³பா³னம்னாம ஹோதீதி. ஏதஸ்மிந்தி விஸயே பு⁴ம்மம். யதா² ஆகாஸே ஸகுணா பக்க²ந்தீதி. யேஹி தே நிப்³பா³யந்தி. தேஸம் தப்³பி³னிமுத்தம் அஞ்ஞம் நிப்³பு³திட்டா²னம்னாம கிஞ்சி நத்தீ²தி. நிப்³பா³யந்தி வா அரியஜனா ஏதஸ்மிந்தி நிப்³பா³னம். நிப்³ப³ந்தி தீ⁴ரா யத²யம் பதீ³போதி ஹி வுத்தம். நிப்³பா³யந்தீதி தம் தம் கிலேஸானம்வா க²ந்தா⁴னம்வா புன அப்படிஸந்தி⁴கபா⁴வம் பாபுணந்தீதி அத்தோ². ஏகஸ்மிந்தி விஸயேஏவ பு⁴ம்மம், ஏதஸ்மிம் அதி⁴ க³தேதிபி யோஜேந்தி. டீகாஸுபன ப⁴வாப⁴வம் வினனதோ ஸம்ஸிப்³ப³ன தோ வானம் வுச்சதி தண்ஹா. ததோ நிக்க²ந்தந்தி நிப்³பா³னந்தி வுத்தம்.

[18] விபா⁴வனியம் பன

‘‘நிப்³பா³பி⁴வா ஏதேன ராக³க்³கி³ஆதி³கோதி நிப்³பா³ன’’ந்திபி வுத்தம். தம் ந ஸுந்த³ரம்.

ந ஹி மக்³கே³விய நிப்³பா³னே கத்த²சி கரணஸாத⁴னம் தி³ட்ட²ம், நச நிப்³பா³னம் நிப்³பூ³தி க்ரியாஸாத⁴னே ராகா³தி³கஸ்ஸ கத்துனோ ஸஹ காரிபச்சயோ ஹோதீதி. [நிப்³பா³னம்]

து³தீயகா³தா²ய பரமத்த²தீ³பனா நிட்டி²தா.