15. ஸாமி

கிந்தம் ஸாமித்தமிச்சாஹ-‘ஸஸ்ஸாமிஸம்ப³ந்தோ⁴’தி, காய கிரியாய ஜனிதோதி ஆஹ-‘பரிபாலனாதி³கிரியாய ஜனிதோ’தி, தஞ்சாதி ஸாமித்தாபேக்கோ² நபும்ஸகனித்³தே³ஸோ, ஸம்ப³ந்த⁴ஸ்ஸானேகவித⁴த்தா ஆஹ‘ஸப்³ப³த்த² ஸம்ப³ந்தே⁴’தி, ஆக்²யாயதேதீமஸ்ஸ அத்தோ² விதீ⁴யதே ஞாபீயதேதி, தி³ட்ட²ந்தோ-பனீதோத்தோ² ஸுகே²ன படிபத்தும் ஸக்காதி பஸித்³த⁴மனுவதி³யமானமப்பஸித்³த⁴ஞ்ச விதீ⁴யமானம் தி³ட்ட²ந்தமாஹ-‘யதா² யோ குண்ட³லீ ஸோ தே³வத³த்தோ’தி, குண்ட³லித்தம்பஸித்³த⁴ம், தே³வத³த்தத்தமப்பஸித்³த⁴மிச்சாஹ-‘குண்ட³லித்தானுவாதே³னே’ச்சாதி³. யதே²வோப⁴யாதி⁴ட்டா²னத்தேப்யுபஸஜ்ஜனதோவ ச²ட்டீ² ‘ரஞ்ஞோ புரிஸோ’தி, ந விஸேஸ்ஸதோ ‘புரிஸஸ்ஸ ராஜா’தி, ததா² ஸம்ப³ந்தா⁴பி⁴ப்³யஞ்ஜனகேனாதி⁴னா யோகே³பி விஸேஸனதோவ ப⁴வதி, நாஞ்ஞதோதி ஆஹ-‘தத்தா²’திஆதி³. ப்³யதிரேகமாபாதீ³யதீதி காரகச²க்கதோ ப்³யதிரித்தத்தா ஸம்ப³ந்தோ⁴ ப்³யதிரேகோ தம் ஆபாதீ³யதி பாபீயதீதி அத்தோ², உப⁴யதோதி ஸம்தோ ஸாமிதோ ச, அதி⁴ப்³ரஹ்மத³த்தே பஞ்சாலாதி ப்³ரஹ்மத³த்தஸ்ஸ பஞ்சாலா ஸந்தகா [ஸாமினோ (போத்த²கே)] தி அத்தோ², ஸந்தகா [ஸாமினோ (போத்த²கே)] ஹி பஞ்சாலா, ந ஸாமி [நஸம் (போத்த²கே)], அதி⁴பஞ்சாலேஸு ப்³ரஹ்மத³த்தோதி பஞ்சாலானம் ப்³ரஹ்மத³த்தோ ஸாமீத்யத்தோ².