114. லோபோ

அகாரஸ்ஸந்தரங்க³த்தே காரணமாஹ-‘பகதினிஸ்ஸிதத்தா’தி, பகதியா இத³ம் பாகதம் ‘‘ணோ’’தி (4-34) ணோ, லோபஸ்ஸ ப³ஹிரங்க³த்தே காரணமாஹ-‘பச்சயனிஸ்ஸிதத்தா’தி, அந்தரங்கே³ச்சாதி³னா ‘‘அந்தரங்க³ப³ஹிரங்கே³ஸ்வந்தரங்க³விதி⁴ ப³லவா’’தி பரிபா⁴ஸமுபலக்கே²தி, அங்க³ஸத்³தோ³-வயவவாசீ, அந்தே ஸத்³தோ³ ஸத்தம்யத்தே², அங்கே³ ப⁴வமந்தரங்க³ம் விப⁴த்த்²யத்தே²-ஸங்க்²யஸமாஸோ ‘‘ஏஓனம வண்ணே’’தி (1-37) அத்தம் ராக³மோ, அங்க³தோ ப³ஹி ப³ஹிரங்க³ம் ‘‘பய்யபாப³ஹிதிரோ புரேபச்சா² வா பஞ்சம்யா’’தி (3-5) அஸங்க்²யஸமாஸோ, அத்ர சாந்தரங்க³ம் ப³ஹிரங்க³ந்தி நாங்கே³ப⁴வமந்தரங்க³ம், அபித்வந்தரங்க³னிஸ்ஸிதம் காரியமந்தரங்க³ம், நாப்யங்க³தோ ப³ஹிபூ⁴தோ ஸமுதா³யோ ப³ஹிரங்க³ம், கிந்து ப³ஹிரங்க³னிஸ்ஸிதம் காரியம்ப³ஹிரங்க³ம் யதா² மஞ்சனிஸ்ஸிதேஸு ஸத்³தா³யந்தேஸு ‘மஞ்சா ஸத்³தா³யந்தீ’த்யுச்சதே தம் வியேதி அதோயேவா ஸங்க்²யஸமாஸேபி லிங்க³விப⁴த்திவசனந்தரயோகோ³ ‘அந்தரங்கோ³ அந்தரங்கா³’தி, ஸங்கேதிகோ ஹ்யயமஸங்க்²யஸமாஸோ, ந புப்³ப³பத³த்த²ப்பதா⁴னோ, யதா²-பச்சக்க²ஸ்ஸாக்க²னிஸ்ஸிதத்தாவபோ³த⁴த்த²ம் ‘அக்க²மக்க²ம்பதி வத்ததே’தி விச்சா²ய-மஸங்க்²யஸமாஸேபி கதே பச்சக்க² ஞாணஸ்ஸாக்க²னிஸ்ஸிதத்தஞாபனத்த²ம் ஸங்கேதவஸேன கதோ-யமஸங்க்²ய ஸமாஸோ, ந புப்³ப³பத³த்த²ப்பதா⁴னோதி‘பச்சக்கோ² பச்சக்கா²’தி லிங்க³விப⁴த்தி வசனந்தரயோகோ³, ததே²வாய-மந்தரங்க³னிஸ்ஸிதோ-யம் ஸமுதா³யனிஸ்ஸிதோதி ஞாபனத்த²ம் ஸங்கேதவஸேன கதோ-யமஸங்க்²யஸமாஸோதி லிங்க³விப⁴த்திவசனந்தரயோகோ³ ந விருஜ்ஜ²தே, அத²வா அந்தரமங்க³மஸ்ஸ காரியஸ்ஸாத்தீ²தி ‘‘ஸத்³தா⁴தி³த்வ’’ (4-84) ததா² ப³ஹிரங்க³ந்தி, அந்தரங்க³ஞ்ச ப³ஹிரங்க³ஞ்ச அந்தரங்க³ப³ஹிரங்கா³னி, தேஸ்வந்தரங்கோ³ ப³லவாதி. அந்தரங்க³ காரியஸ்ஸ ப³லவத்தம் ஸாதே⁴தும் ‘ஸப்³ப³பட²மம் விதே⁴ய்யத்தா’திஆதி³ வுத்தம், இத³ம்பன அந்தரங்க³காரியஸ்ஸ ப³லவபா⁴வஸாத⁴னே காரணம் ந ஹோதி, அந்தரங்க³த்தா ப³லவபா⁴வோயேவ ஹி ஸப்³ப³பட²மம் விதே⁴ய்யத்த காரணம், ததா² சாஹ-‘யோ லோபதோ அகாரஸ்ஸ பட²மமேவ ப⁴வனே காரணமாஹ அந்தரங்க³த்தா அகாரஸ்ஸா’தி, தஸ்மா நாயம் பாடோ² க⁴டதே, அந்தரங்க³ப³லவபா⁴வஸாத⁴னஸ்ஸ பன லோகதோ இச்சி²தத்தா அயமேவத்தே² பாடோ² க⁴டதே’’அந்தரங்க³மேவ காரியம்ப³லவம் லோகே ததா²தி³ட்ட²த்தா, ததா² ஹி லோகோ பாதோவா’’த்யாதி³, லோகே ததா²தி³ட்ட²த்தாதி அந்தரங்க³ப³லவபா⁴வஸ்ஸ லோகே ஏவம் வக்க²மானனயேன தி³ட்ட²த்தா, அத²வா கேனசி விது⁴ரப்பச்சயோபனிபாதேன காரணவே கல்லேன வா கதா³சி கத்துமஸக்குணேய்யத்தேபி அந்தரங்க³ஸ்ஸ அவஸ்ஸம் விதே⁴ய்யத்தம் த³ஸ்ஸேதுமாஹ ஸப்³ப³பட²மம் விதே⁴ய்யத்தா’தி, ஸதிஸம்ப⁴வேதி நிமித்தஸ்ஸானுபஹதத்தா காரியஸ்ஸ ஸம்ப⁴வே ஸதி.