7. பட²மவேரஸுத்தம்

27. [அ. நி. 9.92; ஸம். நி. 5.1024] அத² கோ² அனாத²பிண்டி³கோ க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச –

‘‘யதோ கோ², க³ஹபதி, அரியஸாவகஸ்ஸ பஞ்ச ப⁴யானி வேரானி வூபஸந்தானி ஹோந்தி, சதூஹி ச ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி.

‘‘கதமானி பஞ்ச ப⁴யானி வேரானி வூபஸந்தானி ஹோந்தி? யம், க³ஹபதி, பாணாதிபாதீ பாணாதிபாதபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, பாணாதிபாதா படிவிரதோ நேவ தி³ட்ட²த⁴ம்மிகம்பி ப⁴யம் வேரம் பஸவதி, ந ஸம்பராயிகம்பி ப⁴யம் வேரம் பஸவதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. பாணாதிபாதா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி.

‘‘யம், க³ஹபதி, அதி³ன்னாதா³யீ…பே… காமேஸுமிச்சா²சாரீ… முஸாவாதீ³… ஸுராமேரயமஜ்ஜபமாத³ட்டா²யீ ஸுராமேரயமஜ்ஜபமாத³ட்டா²னபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, ஸுராமேரயமஜ்ஜபமாத³ட்டா²னா படிவிரதோ நேவ தி³ட்ட²த⁴ம்மிகம்பி ப⁴யம் வேரம் பஸவதி, ந ஸம்பராயிகம்பி ப⁴யம் வேரம் பஸவதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ஸுராமேரயமஜ்ஜபமாத³ட்டா²னா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி. இமானி பஞ்ச ப⁴யானி வேரானி வூபஸந்தானி ஹோந்தி.

‘‘கதமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி? இத⁴, க³ஹபதி, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’’’தி.

த⁴ம்மே அவேச்சப்பஸாதே³ன ஸமன்னாக³தோ ஹோதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’தி.

ஸங்கே⁴ அவேச்சப்பஸாதே³ன ஸமன்னாக³தோ ஹோதி – ‘ஸுப்படிபன்னோ ப⁴க³வதோ ஸாவகஸங்கோ⁴ உஜுப்படிபன்னோ ப⁴க³வதோ ஸாவகஸங்கோ⁴ ஞாயப்படிபன்னோ ப⁴க³வதோ ஸாவகஸங்கோ⁴ ஸாமீசிப்படிபன்னோ ப⁴க³வதோ ஸாவகஸங்கோ⁴; யதி³த³ம் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’தி.

அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி அச்சி²த்³தே³ஹி அஸப³லேஹி அகம்மாஸேஹி பு⁴ஜிஸ்ஸேஹி விஞ்ஞுப்பஸத்தே²ஹி அபராமட்டே²ஹி ஸமாதி⁴ஸம்வத்தனிகேஹி. இமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி.

‘‘யதோ கோ², க³ஹபதி, அரியஸாவகஸ்ஸ இமானி பஞ்ச ப⁴யானி வேரானி வூபஸந்தானி ஹோந்தி, இமேஹி ச சதூஹி ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ; ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி. ஸத்தமம்.