3. ஸத்தாவாஸவக்³கோ³

1. திடா²னஸுத்தம்

21. ‘‘தீஹி, பி⁴க்க²வே, டா²னேஹி உத்தரகுருகா மனுஸ்ஸா தே³வே ச தாவதிம்ஸே அதி⁴க்³க³ண்ஹந்தி ஜம்பு³தீ³பகே ச மனுஸ்ஸே. கதமேஹி தீஹி? அமமா, அபரிக்³க³ஹா, நியதாயுகா, விஸேஸகு³ணா [விஸேஸபு⁴னோ (ஸீ. ஸ்யா. பீ.)] – இமேஹி கோ², பி⁴க்க²வே, தீஹி டா²னேஹி உத்தரகுருகா மனுஸ்ஸா தே³வே ச தாவதிம்ஸே அதி⁴க்³க³ண்ஹந்தி ஜம்பு³தீ³பகே ச மனுஸ்ஸே.

‘‘தீஹி, பி⁴க்க²வே, டா²னேஹி தே³வா தாவதிம்ஸா உத்தரகுருகே ச மனுஸ்ஸே அதி⁴க்³க³ண்ஹந்தி ஜம்பு³தீ³பகே ச மனுஸ்ஸே. கதமேஹி தீஹி? தி³ப்³பே³ன ஆயுனா, தி³ப்³பே³ன வண்ணேன, தி³ப்³பே³ன ஸுகே²ன – இமேஹி கோ², பி⁴க்க²வே, தீஹி டா²னேஹி தே³வா தாவதிம்ஸா உத்தரகுருகே ச மனுஸ்ஸே அதி⁴க்³க³ண்ஹந்தி ஜம்பு³தீ³பகே ச மனுஸ்ஸே.

[கதா². 271] ‘‘தீஹி, பி⁴க்க²வே, டா²னேஹி ஜம்பு³தீ³பகா மனுஸ்ஸா உத்தரகுருகே ச மனுஸ்ஸே அதி⁴க்³க³ண்ஹந்தி தே³வே ச தாவதிம்ஸே. கதமேஹி தீஹி? ஸூரா, ஸதிமந்தோ, இத⁴ ப்³ரஹ்மசரியவாஸோ – இமேஹி கோ², பி⁴க்க²வே, தீஹி டா²னேஹி ஜம்பு³தீ³பகா மனுஸ்ஸா உத்தரகுருகே ச மனுஸ்ஸே அதி⁴க்³க³ண்ஹந்தி தே³வே ச தாவதிம்ஸே’’தி. பட²மம்.

2. அஸ்ஸக²ளுங்கஸுத்தம்

22. [அ. நி. 3.141] ‘‘தயோ ச, பி⁴க்க²வே, அஸ்ஸக²ளுங்கே தே³ஸேஸ்ஸாமி தயோ ச புரிஸக²ளுங்கே தயோ ச அஸ்ஸபரஸ்ஸே [அஸ்ஸஸத³ஸ்ஸே (ஸீ. ஸ்யா. பீ.) அ. நி. 3.142] தயோ ச புரிஸபரஸ்ஸே [புரிஸஸத³ஸ்ஸே (ஸீ. ஸ்யா. பீ.)] தயோ ச ப⁴த்³தே³ அஸ்ஸாஜானீயே தயோ ச ப⁴த்³தே³ புரிஸாஜானீயே. தம் ஸுணாத².

‘‘கதமே ச, பி⁴க்க²வே, தயோ அஸ்ஸக²ளுங்கா? இத⁴, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ஹோதி, ந வண்ணஸம்பன்னோ, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ அஸ்ஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ அஸ்ஸக²ளுங்கா.

‘‘கதமே ச, பி⁴க்க²வே, தயோ புரிஸக²ளுங்கா? இத⁴, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ஹோதி, ந வண்ணஸம்பன்னோ, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச, ந ஆரோஹபரிணாஹஸம்பன்னோ. இத⁴ பன, பி⁴க்க²வே, ஏகச்சோ புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ஹோதி, ந வண்ணஸம்பன்னோ ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² ஸம்ஸாதே³தி [ஸம்ஸாரேதி (க.) அ. நி. 1.3.141], நோ விஸ்ஸஜ்ஜேதி. இத³மஸ்ஸ ந வண்ணஸ்மிம் வதா³மி. ந கோ² பன லாபீ⁴ ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ஹோதி, ந வண்ணஸம்பன்னோ ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச, ந ஆரோஹபரிணாஹஸம்பன்னோ? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. ந கோ² பன லாபீ⁴ ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். இத³மஸ்ஸ ந ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச, ந ஆரோஹபரிணாஹஸம்பன்னோ.

‘‘கத²ஞ்ச, பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. லாபீ⁴ கோ² பன ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். இத³மஸ்ஸ ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸக²ளுங்கோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ புரிஸக²ளுங்கா.

‘‘கதமே ச, பி⁴க்க²வே, தயோ அஸ்ஸபரஸ்ஸா? இத⁴, பி⁴க்க²வே, ஏகச்சோ அஸ்ஸபரஸ்ஸோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ அஸ்ஸபரஸ்ஸா.

‘‘கதமே ச, பி⁴க்க²வே, தயோ புரிஸபரஸ்ஸா? இத⁴, பி⁴க்க²வே, ஏகச்சோ புரிஸபரஸ்ஸோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, புரிஸபரஸ்ஸோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச? இத⁴, பி⁴க்க²வே, பி⁴க்கு² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. லாபீ⁴ கோ² பன ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். இத³மஸ்ஸ ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, புரிஸபரஸ்ஸோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ புரிஸபரஸ்ஸா.

‘‘கதமே ச, பி⁴க்க²வே, தயோ ப⁴த்³தா³ அஸ்ஸாஜானீயா? இத⁴, பி⁴க்க²வே, ஏகச்சோ ப⁴த்³தோ³ அஸ்ஸாஜானீயோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ ப⁴த்³தா³ அஸ்ஸாஜானீயா.

‘‘கதமே ச, பி⁴க்க²வே, தயோ ப⁴த்³தா³ புரிஸாஜானீயா? இத⁴, பி⁴க்க²வே, ஏகச்சோ ப⁴த்³தோ³ புரிஸாஜானீயோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, ப⁴த்³தோ³ புரிஸாஜானீயோ…பே… ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச? இத⁴, பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இத³மஸ்ஸ ஜவஸ்மிம் வதா³மி. அபி⁴த⁴ம்மே கோ² பன அபி⁴வினயே பஞ்ஹம் புட்டோ² விஸ்ஸஜ்ஜேதி, நோ ஸம்ஸாதே³தி. இத³மஸ்ஸ வண்ணஸ்மிம் வதா³மி. லாபீ⁴ கோ² பன ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். இத³மஸ்ஸ ஆரோஹபரிணாஹஸ்மிம் வதா³மி. ஏவம் கோ², பி⁴க்க²வே, ப⁴த்³தோ³ புரிஸாஜானீயோ ஜவஸம்பன்னோ ச ஹோதி வண்ணஸம்பன்னோ ச ஆரோஹபரிணாஹஸம்பன்னோ ச. இமே கோ², பி⁴க்க²வே, தயோ ப⁴த்³தா³ புரிஸாஜானீயா’’தி. து³தியம்.

3. தண்ஹாமூலகஸுத்தம்

23. [தீ³. நி. 2.103] ‘‘நவ, பி⁴க்க²வே, தண்ஹாமூலகே த⁴ம்மே தே³ஸேஸ்ஸாமி, தம் ஸுணாத². கதமே ச, பி⁴க்க²வே, நவ தண்ஹாமூலகா த⁴ம்மா? தண்ஹம் படிச்ச பரியேஸனா, பரியேஸனம் படிச்ச லாபோ⁴, லாப⁴ம் படிச்ச வினிச்ச²யோ, வினிச்ச²யம் படிச்ச ச²ந்த³ராகோ³, ச²ந்த³ராக³ம் படிச்ச அஜ்ஜோ²ஸானம், அஜ்ஜோ²ஸானம் படிச்ச பரிக்³க³ஹோ, பரிக்³க³ஹம் படிச்ச மச்ச²ரியம், மச்ச²ரியம் படிச்ச ஆரக்கோ², ஆரக்கா²தி⁴கரணம் த³ண்டா³தா³னம் ஸத்தா²தா³னம் கலஹவிக்³க³ஹவிவாத³துவம்துவம்பேஸுஞ்ஞமுஸாவாதா³ அனேகே பாபகா அகுஸலா த⁴ம்மா ஸம்ப⁴வந்தி. இமே கோ², பி⁴க்க²வே, நவ தண்ஹாமூலகா த⁴ம்மா’’தி. ததியம்.

4. ஸத்தாவாஸஸுத்தம்

24. [தீ³. நி. 3.341] ‘‘நவயிமே, பி⁴க்க²வே, ஸத்தாவாஸா. கதமே நவ? ஸந்தி, பி⁴க்க²வே, ஸத்தா நானத்தகாயா நானத்தஸஞ்ஞினோ, ஸேய்யதா²பி மனுஸ்ஸா, ஏகச்சே ச தே³வா, ஏகச்சே ச வினிபாதிகா. அயம் பட²மோ ஸத்தாவாஸோ.

‘‘ஸந்தி, பி⁴க்க²வே, ஸத்தா நானத்தகாயா ஏகத்தஸஞ்ஞினோ, ஸேய்யதா²பி தே³வா ப்³ரஹ்மகாயிகா பட²மாபி⁴னிப்³ப³த்தா. அயம் து³தியோ ஸத்தாவாஸோ.

‘‘ஸந்தி, பி⁴க்க²வே, ஸத்தா ஏகத்தகாயா நானத்தஸஞ்ஞினோ, ஸேய்யதா²பி தே³வா ஆப⁴ஸ்ஸரா. அயம் ததியோ ஸத்தாவாஸோ.

‘‘ஸந்தி, பி⁴க்க²வே, ஸத்தா ஏகத்தகாயா ஏகத்தஸஞ்ஞினோ, ஸேய்யதா²பி தே³வா ஸுப⁴கிண்ஹா. அயம் சதுத்தோ² ஸத்தாவாஸோ.

‘‘ஸந்தி, பி⁴க்க²வே, ஸத்தா அஸஞ்ஞினோ அப்படிஸம்வேதி³னோ, ஸேய்யதா²பி தே³வா அஸஞ்ஞஸத்தா. அயம் பஞ்சமோ ஸத்தாவாஸோ.

‘‘ஸந்தி, பி⁴க்க²வே, ஸத்தா ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனூபகா³. அயம் ச²ட்டோ² ஸத்தாவாஸோ.

‘‘ஸந்தி, பி⁴க்க²வே, ஸத்தா ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனூபகா³. அயம் ஸத்தமோ ஸத்தாவாஸோ.

‘‘ஸந்தி, பி⁴க்க²வே, ஸத்தா ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனூபகா³. அயம் அட்ட²மோ ஸத்தாவாஸோ.

‘‘ஸந்தி, பி⁴க்க²வே, ஸத்தா ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனூபகா³. அயம் நவமோ ஸத்தாவாஸோ. இமே கோ², பி⁴க்க²வே, நவ ஸத்தாவாஸா’’தி. சதுத்த²ம்.

5. பஞ்ஞாஸுத்தம்

25. ‘‘யதோ கோ², பி⁴க்க²வே, பி⁴க்கு²னோ பஞ்ஞாய சித்தம் ஸுபரிசிதம் ஹோதி, தஸ்ஸேதம், பி⁴க்க²வே, பி⁴க்கு²னோ கல்லம் வசனாய – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி.

‘‘கத²ஞ்ச, பி⁴க்க²வே, பி⁴க்கு²னோ பஞ்ஞாய சித்தம் ஸுபரிசிதம் ஹோதி? ‘வீதராக³ம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘வீததோ³ஸம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘வீதமோஹம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘அஸராக³த⁴ம்மம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘அஸதோ³ஸத⁴ம்மம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘அஸமோஹத⁴ம்மம் மே சித்த’ந்தி பஞ்ஞாய சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் காமப⁴வாயா’தி பஞ்ஞாய சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் ரூபப⁴வாயா’தி பஞ்ஞாய சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் அரூபப⁴வாயா’தி பஞ்ஞாய சித்தம் ஸுபரிசிதம் ஹோதி. யதோ கோ², பி⁴க்க²வே, பி⁴க்கு²னோ பஞ்ஞாய சித்தம் ஸுபரிசிதம் ஹோதி, தஸ்ஸேதம், பி⁴க்க²வே, பி⁴க்கு²னோ கல்லம் வசனாய – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி. பஞ்சமம்.

6. ஸிலாயூபஸுத்தம்

26. ஏகம் ஸமயம் ஆயஸ்மா ச ஸாரிபுத்தோ ஆயஸ்மா ச சந்தி³காபுத்தோ ராஜக³ஹே விஹரந்தி வேளுவனே கலந்த³கனிவாபே. தத்ர கோ² ஆயஸ்மா சந்தி³காபுத்தோ பி⁴க்கூ² ஆமந்தேஸி ( ) [(ஆவுஸோ…பே… ஏதத³வோச) (ஸீ.)] – ‘‘தே³வத³த்தோ, ஆவுஸோ, பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி.

ஏவம் வுத்தே ஆயஸ்மா ஸாரிபுத்தோ ஆயஸ்மந்தம் சந்தி³காபுத்தம் ஏதத³வோச – ‘‘ந கோ², ஆவுஸோ சந்தி³காபுத்த, தே³வத³த்தோ பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி. ஏவஞ்ச கோ², ஆவுஸோ, சந்தி³காபுத்த, தே³வத³த்தோ பி⁴க்கூ²னம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சித்தம் ஸுபரிசிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி.

து³தியம்பி கோ² ஆயஸ்மா சந்தி³காபுத்தோ பி⁴க்கூ² ஆமந்தேஸி – ‘‘தே³வத³த்தோ, ஆவுஸோ, பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி. து³தியம்பி கோ² ஆயஸ்மா ஸாரிபுத்தோ ஆயஸ்மந்தம் சந்தி³காபுத்தம் ஏதத³வோச – ‘‘ந கோ², ஆவுஸோ சந்தி³காபுத்த, தே³வத³த்தோ பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி. ஏவஞ்ச கோ², ஆவுஸோ சந்தி³காபுத்த, தே³வத³த்தோ பி⁴க்கூ²னம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சித்தம் ஸுபரிசிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி.

ததியம்பி கோ² ஆயஸ்மா சந்தி³காபுத்தோ பி⁴க்கூ² ஆமந்தேஸி – ‘‘தே³வத³த்தோ, ஆவுஸோ, பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி. ததியம்பி கோ² ஆயஸ்மா ஸாரிபுத்தோ ஆயஸ்மந்தம் சந்தி³காபுத்தம் ஏதத³வோச – ‘‘ந கோ², ஆவுஸோ சந்தி³காபுத்த, தே³வத³த்தோ பி⁴க்கூ²னம் ஏவம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி. ஏவஞ்ச கோ², ஆவுஸோ சந்தி³காபுத்த, தே³வத³த்தோ பி⁴க்கூ²னம் த⁴ம்மம் தே³ஸேதி – ‘யதோ கோ², ஆவுஸோ, பி⁴க்கு²னோ சேதஸா சித்தம் ஸுபரிசிதம் ஹோதி, தஸ்ஸேதம் பி⁴க்கு²னோ கல்லம் வேய்யாகரணாய – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’’’தி.

‘‘கத²ஞ்ச, ஆவுஸோ, பி⁴க்கு²னோ சேதஸா சித்தம் ஸுபரிசிதம் ஹோதி? ‘வீதராக³ம் மே சித்த’ந்தி சேதஸா சித்தம் ஸுபரிசிதம் ஹோதி; ‘வீததோ³ஸம் மே சித்த’ந்தி சேதஸா சித்தம் ஸுபரிசிதம் ஹோதி; ‘வீதமோஹம் மே சித்த’ந்தி சேதஸா சித்தம் ஸுபரிசிதம் ஹோதி; ‘அஸராக³த⁴ம்மம் மே சித்த’ந்தி சேதஸா சித்தம் ஸுபரிசிதம் ஹோதி; ‘அஸதோ³ஸத⁴ம்மம் மே சித்த’ந்தி சேதஸா சித்தம் ஸுபரிசிதம் ஹோதி; ‘அஸமோஹத⁴ம்மம் மே சித்த’ந்தி சேதஸா சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் காமப⁴வாயா’தி சேதஸா சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் ரூபப⁴வாயா’தி சேதஸா சித்தம் ஸுபரிசிதம் ஹோதி; ‘அனாவத்தித⁴ம்மம் மே சித்தம் அரூபப⁴வாயா’தி சேதஸா சித்தம் ஸுபரிசிதம் ஹோதி. ஏவம் ஸம்மா விமுத்தசித்தஸ்ஸ கோ², ஆவுஸோ, பி⁴க்கு²னோ பு⁴ஸா சேபி சக்கு²விஞ்ஞேய்யா ரூபா சக்கு²ஸ்ஸ ஆபாத²ம் ஆக³ச்ச²ந்தி, நேவஸ்ஸ சித்தம் பரியாதி³யந்தி; அமிஸ்ஸீகதமேவஸ்ஸ சித்தம் ஹோதி டி²தம் ஆனேஞ்ஜப்பத்தம், வயம் சஸ்ஸானுபஸ்ஸதி.

‘‘ஸேய்யதா²பி, ஆவுஸோ, ஸிலாயூபோ ஸோளஸகுக்குகோ. தஸ்ஸஸ்ஸு அட்ட² குக்கூ ஹேட்டா² நேமங்க³மா, அட்ட² குக்கூ உபரி நேமஸ்ஸ. அத² புரத்தி²மாய சேபி தி³ஸாய ஆக³ச்சே²ய்ய பு⁴ஸா வாதவுட்டி², நேவ நம் ஸங்கம்பேய்ய ந ஸம்பவேதே⁴ய்ய; அத² பச்சி²மாய… அத² உத்தராய… அத² த³க்கி²ணாய சேபி தி³ஸாய ஆக³ச்சே²ய்ய பு⁴ஸா வாதவுட்டி², நேவ நம் ஸங்கம்பேய்ய ந ஸம்பவேதே⁴ய்ய. தம் கிஸ்ஸ ஹேது? க³ம்பீ⁴ரத்தா, ஆவுஸோ, நேமஸ்ஸ, ஸுனிகா²தத்தா ஸிலாயூபஸ்ஸ. ஏவமேவம் கோ², ஆவுஸோ, ஸம்மா விமுத்தசித்தஸ்ஸ பி⁴க்கு²னோ பு⁴ஸா சேபி சக்கு²விஞ்ஞேய்யா ரூபா சக்கு²ஸ்ஸ ஆபாத²ம் ஆக³ச்ச²ந்தி, நேவஸ்ஸ சித்தம் பரியாதி³யந்தி; அமிஸ்ஸீகதமேவஸ்ஸ சித்தம் ஹோதி டி²தம் ஆனேஞ்ஜப்பத்தம், வயம் சஸ்ஸானுபஸ்ஸதி.

‘‘பு⁴ஸா சேபி ஸோதவிஞ்ஞேய்யா ஸத்³தா³… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³… மனோவிஞ்ஞேய்யா த⁴ம்மா மனஸ்ஸ ஆபாத²ம் ஆக³ச்ச²ந்தி, நேவஸ்ஸ சித்தம் பரியாதி³யந்தி; அமிஸ்ஸீகதமேவஸ்ஸ சித்தம் ஹோதி டி²தம் ஆனேஞ்ஜப்பத்தம், வயம் சஸ்ஸானுபஸ்ஸதீ’’தி. ச²ட்ட²ம்.

7. பட²மவேரஸுத்தம்

27. [அ. நி. 9.92; ஸம். நி. 5.1024] அத² கோ² அனாத²பிண்டி³கோ க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச –

‘‘யதோ கோ², க³ஹபதி, அரியஸாவகஸ்ஸ பஞ்ச ப⁴யானி வேரானி வூபஸந்தானி ஹோந்தி, சதூஹி ச ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி.

‘‘கதமானி பஞ்ச ப⁴யானி வேரானி வூபஸந்தானி ஹோந்தி? யம், க³ஹபதி, பாணாதிபாதீ பாணாதிபாதபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, பாணாதிபாதா படிவிரதோ நேவ தி³ட்ட²த⁴ம்மிகம்பி ப⁴யம் வேரம் பஸவதி, ந ஸம்பராயிகம்பி ப⁴யம் வேரம் பஸவதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. பாணாதிபாதா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி.

‘‘யம், க³ஹபதி, அதி³ன்னாதா³யீ…பே… காமேஸுமிச்சா²சாரீ… முஸாவாதீ³… ஸுராமேரயமஜ்ஜபமாத³ட்டா²யீ ஸுராமேரயமஜ்ஜபமாத³ட்டா²னபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, ஸுராமேரயமஜ்ஜபமாத³ட்டா²னா படிவிரதோ நேவ தி³ட்ட²த⁴ம்மிகம்பி ப⁴யம் வேரம் பஸவதி, ந ஸம்பராயிகம்பி ப⁴யம் வேரம் பஸவதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ஸுராமேரயமஜ்ஜபமாத³ட்டா²னா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி. இமானி பஞ்ச ப⁴யானி வேரானி வூபஸந்தானி ஹோந்தி.

‘‘கதமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி? இத⁴, க³ஹபதி, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’’’தி.

த⁴ம்மே அவேச்சப்பஸாதே³ன ஸமன்னாக³தோ ஹோதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’தி.

ஸங்கே⁴ அவேச்சப்பஸாதே³ன ஸமன்னாக³தோ ஹோதி – ‘ஸுப்படிபன்னோ ப⁴க³வதோ ஸாவகஸங்கோ⁴ உஜுப்படிபன்னோ ப⁴க³வதோ ஸாவகஸங்கோ⁴ ஞாயப்படிபன்னோ ப⁴க³வதோ ஸாவகஸங்கோ⁴ ஸாமீசிப்படிபன்னோ ப⁴க³வதோ ஸாவகஸங்கோ⁴; யதி³த³ம் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’தி.

அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி அச்சி²த்³தே³ஹி அஸப³லேஹி அகம்மாஸேஹி பு⁴ஜிஸ்ஸேஹி விஞ்ஞுப்பஸத்தே²ஹி அபராமட்டே²ஹி ஸமாதி⁴ஸம்வத்தனிகேஹி. இமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி.

‘‘யதோ கோ², க³ஹபதி, அரியஸாவகஸ்ஸ இமானி பஞ்ச ப⁴யானி வேரானி வூபஸந்தானி ஹோந்தி, இமேஹி ச சதூஹி ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ; ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி. ஸத்தமம்.

8. து³தியவேரஸுத்தம்

28. [ஸம். நி. 5.1025] ‘‘யதோ கோ², பி⁴க்க²வே, அரியஸாவகஸ்ஸ பஞ்ச ப⁴யானி வேரானி வூபஸந்தானி ஹோந்தி, சதூஹி ச ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ; ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி.

‘‘கதமானி பஞ்ச ப⁴யானி வேரானி வூபஸந்தானி ஹோந்தி? யம், பி⁴க்க²வே, பாணாதிபாதீ பாணாதிபாதபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, பாணாதிபாதா படிவிரதோ…பே… ஏவம் தம் ப⁴யம் வேரம் வூபஸந்தம் ஹோதி.

‘‘யம், பி⁴க்க²வே, அதி³ன்னாதா³யீ…பே… ஸுராமேரயமஜ்ஜபமாத³ட்டா²யீ ஸுராமேரயமஜ்ஜபமாத³ட்டா²னபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, ஸுராமேரயமஜ்ஜபமாத³ட்டா²னா படிவிரதோ நேவ தி³ட்ட²த⁴ம்மிகம்பி ப⁴யம் வேரம் பஸவதி, ந ஸம்பராயிகம்பி ப⁴யம் வேரம் பஸவதி, ந சேதஸிகம்பி து³க்க²ம் தோ³மனஸ்ஸம் படிஸம்வேதே³தி. ஸுராமேரயமஜ்ஜபமாத³ட்டா²னா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி. இமானி பஞ்ச ப⁴யானி வேரானி வூபஸந்தானி ஹோந்தி.

‘‘கதமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி? இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. த⁴ம்மே…பே… ஸங்கே⁴… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி அச்சி²த்³தே³ஹி அஸப³லேஹி அகம்மாஸேஹி பு⁴ஜிஸ்ஸேஹி விஞ்ஞுப்பஸத்தே²ஹி அபராமட்டே²ஹி ஸமாதி⁴ஸம்வத்தனிகேஹி. இமேஹி சதூஹி ஸோதாபத்தியங்கே³ஹி ஸமன்னாக³தோ ஹோதி.

‘‘யதோ கோ², பி⁴க்க²வே, அரியஸாவகஸ்ஸ இமானி பஞ்ச ப⁴யானி வேரானி வூபஸந்தானி ஹோந்தி, இமேஹி ச சதூஹி ஸோதாபத்தியங்கே³ஹி ஸமன்னாக³தோ ஹோதி, ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ; ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி. அட்ட²மம்.

9. ஆகா⁴தவத்து²ஸுத்தம்

29. [விப⁴. 960; தீ³. நி. 3.340; அ. நி. 10.79] ‘‘நவயிமானி, பி⁴க்க²வே, ஆகா⁴தவத்தூ²னி. கதமானி நவ? ‘அனத்த²ம் மே அசரீ’தி ஆகா⁴தம் ப³ந்த⁴தி; ‘அனத்த²ம் மே சரதீ’தி ஆகா⁴தம் ப³ந்த⁴தி; ‘அனத்த²ம் மே சரிஸ்ஸதீ’தி ஆகா⁴தம் ப³ந்த⁴தி; ‘பியஸ்ஸ மே மனாபஸ்ஸ அனத்த²ம் அசரீ’தி…பே… ‘அனத்த²ம் சரதீ’தி…பே… ‘அனத்த²ம் சரிஸ்ஸதீ’தி ஆகா⁴தம் ப³ந்த⁴தி; ‘அப்பியஸ்ஸ மே அமனாபஸ்ஸ அத்த²ம் அசரீ’தி …பே… ‘அத்த²ம் சரதீ’தி…பே… ‘அத்த²ம் சரிஸ்ஸதீ’தி ஆகா⁴தம் ப³ந்த⁴தி. இமானி கோ², பி⁴க்க²வே, நவ ஆகா⁴தவத்தூ²னீ’’தி. நவமம்.

10. ஆகா⁴தபடிவினயஸுத்தம்

30. [தீ³. நி. 3.340, 359] ‘‘நவயிமே, பி⁴க்க²வே, ஆகா⁴தபடிவினயா. கதமே நவ? ‘அனத்த²ம் மே அசரி [அசரீதி (ஸ்யா.), ஏவம் ‘‘சரதி, சரிஸ்ஸதி’’ பதே³ஸுபி], தம் குதேத்த² லப்³பா⁴’தி ஆகா⁴தம் படிவினேதி; ‘அனத்த²ம் மே சரதி, தம் குதேத்த² லப்³பா⁴’தி ஆகா⁴தம் படிவினேதி; ‘அனத்த²ம் மே சரிஸ்ஸதி, தம் குதேத்த² லப்³பா⁴’தி ஆகா⁴தம் படிவினேதி; பியஸ்ஸ மே மனாபஸ்ஸ அனத்த²ம் அசரி…பே… அனத்த²ம் சரதி…பே… ‘அனத்த²ம் சரிஸ்ஸதி, தம் குதேத்த² லப்³பா⁴’தி ஆகா⁴தம் படிவினேதி; அப்பியஸ்ஸ மே அமனாபஸ்ஸ அத்த²ம் அசரி…பே… அத்த²ம் சரதி…பே… ‘அத்த²ம் சரிஸ்ஸதி, தம் குதேத்த² லப்³பா⁴’தி ஆகா⁴தம் படிவினேதி. இமே கோ², பி⁴க்க²வே, நவ ஆகா⁴தபடிவினயா’’தி. த³ஸமம்.

11. அனுபுப்³ப³னிரோத⁴ஸுத்தம்

31. ‘‘நவயிமே, பி⁴க்க²வே, அனுபுப்³ப³னிரோதா⁴. கதமே நவ? பட²மம் ஜா²னம் ஸமாபன்னஸ்ஸ காமஸஞ்ஞா [ஆமிஸ்ஸஸஞ்ஞா (ஸ்யா.)] நிருத்³தா⁴ ஹோதி; து³தியம் ஜா²னம் ஸமாபன்னஸ்ஸ விதக்கவிசாரா நிருத்³தா⁴ ஹோந்தி; ததியம் ஜா²னம் ஸமாபன்னஸ்ஸ பீதி நிருத்³தா⁴ ஹோதி; சதுத்த²ம் ஜா²னம் ஸமாபன்னஸ்ஸ அஸ்ஸாஸபஸ்ஸாஸா நிருத்³தா⁴ ஹோந்தி; ஆகாஸானஞ்சாயதனம் ஸமாபன்னஸ்ஸ ரூபஸஞ்ஞா நிருத்³தா⁴ ஹோதி; விஞ்ஞாணஞ்சாயதனம் ஸமாபன்னஸ்ஸ ஆகாஸானஞ்சாயதனஸஞ்ஞா நிருத்³தா⁴ ஹோதி; ஆகிஞ்சஞ்ஞாயதனம் ஸமாபன்னஸ்ஸ விஞ்ஞாணஞ்சாயதனஸஞ்ஞா நிருத்³தா⁴ ஹோதி; நேவஸஞ்ஞானாஸஞ்ஞாயதனம் ஸமாபன்னஸ்ஸ ஆகிஞ்சஞ்ஞாயதனஸஞ்ஞா நிருத்³தா⁴ ஹோதி; ஸஞ்ஞாவேத³யிதனிரோத⁴ம் ஸமாபன்னஸ்ஸ ஸஞ்ஞா ச வேத³னா ச நிருத்³தா⁴ ஹோந்தி. இமே கோ², பி⁴க்க²வே, நவ அனுபுப்³ப³னிரோதா⁴’’தி [தீ³. நி. 3.344, 349]. ஏகாத³ஸமம்.

ஸத்தாவாஸவக்³கோ³ ததியோ.