4. மஹாவக்³கோ³

1. அனுபுப்³ப³விஹாரஸுத்தம்

32. [தீ³. நி. 3.344, 359] ‘‘நவயிமே, பி⁴க்க²வே, அனுபுப்³ப³விஹாரா. கதமே நவ? [ஏத்த² ஸீ. பீ. போத்த²கேஸு ‘‘இத⁴ பி⁴க்க²வே பி⁴க்கு² விவிச்சேவ காமேஹீ’’ திஆதி³னா வித்த²ரேன பாடோ² தி³ஸ்ஸதி] பட²மம் ஜா²னம், து³தியம் ஜா²னம், ததியம் ஜா²னம், சதுத்த²ம் ஜா²னம், ஆகாஸானஞ்சாயதனம், விஞ்ஞாணஞ்சாயதனம், ஆகிஞ்சஞ்ஞாயதனம், நேவஸஞ்ஞானாஸஞ்ஞாயதனம், ஸஞ்ஞாவேத³யிதனிரோதோ⁴ – இமே கோ², பி⁴க்க²வே, நவ அனுபுப்³ப³விஹாரா’’தி. பட²மம்.

2. அனுபுப்³ப³விஹாரஸமாபத்திஸுத்தம்

33. ‘‘நவயிமா, பி⁴க்க²வே [நவ பி⁴க்க²வே (?)], அனுபுப்³ப³விஹாரஸமாபத்தியோ தே³ஸேஸ்ஸாமி, தம் ஸுணாத²…பே… கதமா ச, பி⁴க்க²வே, நவ அனுபுப்³ப³விஹாரஸமாபத்தியோ? யத்த² காமா நிருஜ்ஜ²ந்தி, யே ச காமே நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² காமா நிருஜ்ஜ²ந்தி, கே ச காமே நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. ஏத்த² காமா நிருஜ்ஜ²ந்தி, தே ச காமே நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² விதக்கவிசாரா நிருஜ்ஜ²ந்தி, யே ச விதக்கவிசாரே நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² விதக்கவிசாரா நிருஜ்ஜ²ந்தி, கே ச விதக்கவிசாரே நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி; ஏத்த² விதக்கவிசாரா நிருஜ்ஜ²ந்தி, தே ச விதக்கவிசாரே நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² பீதி நிருஜ்ஜ²தி, யே ச பீதிம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² பீதி நிருஜ்ஜ²தி, கே ச பீதிம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி; ஏத்த² பீதி நிருஜ்ஜ²தி, தே ச பீதிம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² உபேக்கா²ஸுக²ம் நிருஜ்ஜ²தி, யே ச உபேக்கா²ஸுக²ம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² உபேக்கா²ஸுக²ம் நிருஜ்ஜ²தி, கே ச உபேக்கா²ஸுக²ம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸுக²ஸ்ஸ ச பஹானா…பே… சதுத்த²ம் ஜா²னம் உபஸம்பஜ்ஜ விஹரதி; ஏத்த² உபேக்கா²ஸுக²ம் நிருஜ்ஜ²தி, தே ச உபேக்கா²ஸுக²ம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² ரூபஸஞ்ஞா நிருஜ்ஜ²தி, யே ச ரூபஸஞ்ஞம் [யத்த² ரூபஸஞ்ஞா நிருஜ்ஜ²ந்தி, யே ச ரூபஸஞ்ஞா (ஸீ. ஸ்யா. பீ.)] நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² ரூபஸஞ்ஞா நிருஜ்ஜ²தி, கே ச ரூபஸஞ்ஞம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா அனந்தோ ஆகாஸோதி ஆகாஸானஞ்சாயதனம் உபஸம்பஜ்ஜ விஹரதி. ஏத்த² ரூபஸஞ்ஞா நிருஜ்ஜ²தி, தே ச ரூபஸஞ்ஞம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² ஆகாஸானஞ்சாயதனஸஞ்ஞா நிருஜ்ஜ²தி, யே ச ஆகாஸானஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² ஆகாஸானஞ்சாயதனஸஞ்ஞா நிருஜ்ஜ²தி, கே ச ஆகாஸானஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம அனந்தம் விஞ்ஞாணந்தி விஞ்ஞாணஞ்சாயதனம் உபஸம்பஜ்ஜ விஹரதி. ஏத்த² ஆகாஸானஞ்சாயதனஸஞ்ஞா நிருஜ்ஜ²தி, தே ச ஆகாஸானஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² விஞ்ஞாணஞ்சாயதனஸஞ்ஞா நிருஜ்ஜ²தி, யே ச விஞ்ஞாணஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² விஞ்ஞாணஞ்சாயதனஸஞ்ஞா நிருஜ்ஜ²தி, கே ச விஞ்ஞாணஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனம் உபஸம்பஜ்ஜ விஹரதி. ஏத்த² விஞ்ஞாணஞ்சாயதனஸஞ்ஞா நிருஜ்ஜ²தி, தே ச விஞ்ஞாணஞ்சாயதனஸஞ்ஞம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² ஆகிஞ்சஞ்ஞாயதனஸஞ்ஞா நிருஜ்ஜ²தி, யே ச ஆகிஞ்சஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² ஆகிஞ்சஞ்ஞாயதனஸஞ்ஞா நிருஜ்ஜ²தி, கே ச ஆகிஞ்சஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. ஏத்த² ஆகிஞ்சஞ்ஞாயதனஸஞ்ஞா நிருஜ்ஜ²தி, தே ச ஆகிஞ்சஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய.

‘‘யத்த² நேவஸஞ்ஞானாஸஞ்ஞாயதனஸஞ்ஞா நிருஜ்ஜ²தி, யே ச நேவஸஞ்ஞானாஸஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தி, ‘அத்³தா⁴ தே ஆயஸ்மந்தோ நிச்சா²தா நிப்³பு³தா திண்ணா பாரங்க³தா தத³ங்கே³னா’தி வதா³மி. ‘கத்த² நேவஸஞ்ஞானாஸஞ்ஞாயதனஸஞ்ஞா நிருஜ்ஜ²தி, கே ச நேவஸஞ்ஞானாஸஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தி – அஹமேதம் ந ஜானாமி அஹமேதம் ந பஸ்ஸாமீ’தி, இதி யோ ஏவம் வதே³ய்ய, ஸோ ஏவமஸ்ஸ வசனீயோ – ‘இதா⁴வுஸோ, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி. ஏத்த² நேவஸஞ்ஞானாஸஞ்ஞாயதனஸஞ்ஞா நிருஜ்ஜ²தி, தே ச நேவஸஞ்ஞானாஸஞ்ஞாயதனஸஞ்ஞம் நிரோதே⁴த்வா நிரோதே⁴த்வா விஹரந்தீ’தி. அத்³தா⁴, பி⁴க்க²வே, அஸடோ² அமாயாவீ ‘ஸாதூ⁴’தி பா⁴ஸிதம் அபி⁴னந்தே³ய்ய அனுமோதே³ய்ய; ‘ஸாதூ⁴’தி பா⁴ஸிதம் அபி⁴னந்தி³த்வா அனுமோதி³த்வா நமஸ்ஸமானோ பஞ்ஜலிகோ பயிருபாஸேய்ய. இமா கோ², பி⁴க்க²வே, நவ அனுபுப்³ப³விஹாரஸமாபத்தியோ’’தி. து³தியம்.

3. நிப்³பா³னஸுக²ஸுத்தம்

34. ஏகம் ஸமயம் ஆயஸ்மா ஸாரிபுத்தோ ராஜக³ஹே விஹரதி வேளுவனே கலந்த³கனிவாபே. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஸுக²மித³ம், ஆவுஸோ, நிப்³பா³னம். ஸுக²மித³ம், ஆவுஸோ, நிப்³பா³ன’’ந்தி. ஏவம் வுத்தே ஆயஸ்மா உதா³யீ ஆயஸ்மந்தம் ஸாரிபுத்தம் ஏதத³வோச – ‘‘கிம் பனேத்த², ஆவுஸோ ஸாரிபுத்த, ஸுக²ம் யதே³த்த² நத்தி² வேத³யித’’ந்தி? ‘‘ஏததே³வ க்²வேத்த², ஆவுஸோ, ஸுக²ம் யதே³த்த² நத்தி² வேத³யிதம். பஞ்சிமே, ஆவுஸோ, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா – இமே கோ², ஆவுஸோ, பஞ்ச காமகு³ணா. யம் கோ², ஆவுஸோ, இமே பஞ்ச காமகு³ணே படிச்ச உப்பஜ்ஜதி ஸுக²ம் ஸோமனஸ்ஸம், இத³ம் வுச்சதாவுஸோ, காமஸுக²ம்.

‘‘இதா⁴வுஸோ, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ காமஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே காமஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ விதக்கஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே விதக்கஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ பீதிஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே பீதிஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸுக²ஸ்ஸ ச பஹானா…பே… சதுத்த²ம் ஜா²னம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ உபேக்கா²ஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே உபேக்கா²ஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா அனந்தோ ஆகாஸோதி ஆகாஸானஞ்சாயதனம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ ரூபஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே ரூபஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம அனந்தம் விஞ்ஞாணந்தி விஞ்ஞாணஞ்சாயதனம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ ஆகாஸானஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே ஆகாஸானஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம, நத்தி² கிஞ்சீதி ஆகிஞ்சஞ்ஞாயதனம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ விஞ்ஞாணஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே விஞ்ஞாணஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. தஸ்ஸ சே, ஆவுஸோ, பி⁴க்கு²னோ இமினா விஹாரேன விஹரதோ ஆகிஞ்சஞ்ஞாயதனஸஹக³தா ஸஞ்ஞாமனஸிகாரா ஸமுதா³சரந்தி, ஸ்வஸ்ஸ ஹோதி ஆபா³தோ⁴. ஸேய்யதா²பி, ஆவுஸோ, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ தே ஆகிஞ்சஞ்ஞாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ ஹோதி ஆபா³தோ⁴. யோ கோ² பனாவுஸோ, ஆபா³தோ⁴ து³க்க²மேதம் வுத்தம் ப⁴க³வதா. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³னம்.

‘‘புன சபரம், ஆவுஸோ, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. இமினாபி கோ² ஏதம், ஆவுஸோ, பரியாயேன வேதி³தப்³ப³ம் யதா² ஸுக²ம் நிப்³பா³ன’’ந்தி. ததியம்.

4. கா³வீஉபமாஸுத்தம்

35. ‘‘ஸேய்யதா²பி, பி⁴க்க²வே, கா³வீ பப்³ப³தேய்யா பா³லா அப்³யத்தா அகே²த்தஞ்ஞூ அகுஸலா விஸமே பப்³ப³தே சரிதும். தஸ்ஸா ஏவமஸ்ஸ – ‘யம்னூனாஹம் அக³தபுப்³ப³ஞ்சேவ தி³ஸம் க³ச்சே²ய்யம், அகா²தி³தபுப்³பா³னி ச திணானி கா²தே³ய்யம், அபீதபுப்³பா³னி ச பானீயானி பிவேய்ய’ந்தி. ஸா புரிமம் பாத³ம் ந ஸுப்பதிட்டி²தம் பதிட்டா²பேத்வா பச்சி²மம் பாத³ம் உத்³த⁴ரேய்ய. ஸா ந சேவ அக³தபுப்³ப³ம் தி³ஸம் க³ச்சே²ய்ய, ந ச அகா²தி³தபுப்³பா³னி திணானி கா²தே³ய்ய, ந ச அபீதபுப்³பா³னி பானீயானி பிவேய்ய; யஸ்மிம் சஸ்ஸா பதே³ஸே டி²தாய ஏவமஸ்ஸ – ‘யம்னூனாஹம் அக³தபுப்³ப³ஞ்சேவ தி³ஸம் க³ச்சே²ய்யம், அகா²தி³தபுப்³பா³னி ச திணானி கா²தே³ய்யம், அபீதபுப்³பா³னி ச பானீயானி பிவேய்ய’ந்தி தஞ்ச பதே³ஸம் ந ஸோத்தி²னா பச்சாக³ச்சே²ய்ய. தம் கிஸ்ஸ ஹேது? ததா² ஹி ஸா, பி⁴க்க²வே, கா³வீ பப்³ப³தேய்யா பா³லா அப்³யத்தா அகே²த்தஞ்ஞூ அகுஸலா விஸமே பப்³ப³தே சரிதும். ஏவமேவம் கோ², பி⁴க்க²வே, இதே⁴கச்சோ பி⁴க்கு² பா³லோ அப்³யத்தோ அகே²த்தஞ்ஞூ அகுஸலோ விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி; ஸோ தம் நிமித்தம் ந ஆஸேவதி ந பா⁴வேதி ந ப³ஹுலீகரோதி ந ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரேய்ய’ந்தி. ஸோ ந ஸக்கோதி விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரிதும். தஸ்ஸ ஏவம் ஹோதி – ‘யம்னூனாஹம் விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரேய்ய’ந்தி. ஸோ ந ஸக்கோதி விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரிதும். அயம் வுச்சதி, பி⁴க்க²வே, ‘பி⁴க்கு² உப⁴தோ ப⁴ட்டோ² உப⁴தோ பரிஹீனோ, ஸேய்யதா²பி ஸா கா³வீ பப்³ப³தேய்யா பா³லா அப்³யத்தா அகே²த்தஞ்ஞூ அகுஸலா விஸமே பப்³ப³தே சரிதும்’’’.

‘‘ஸேய்யதா²பி, பி⁴க்க²வே, கா³வீ பப்³ப³தேய்யா பண்டி³தா ப்³யத்தா கே²த்தஞ்ஞூ குஸலா விஸமே பப்³ப³தே சரிதும். தஸ்ஸா ஏவமஸ்ஸ – ‘யம்னூனாஹம் அக³தபுப்³ப³ஞ்சேவ தி³ஸம் க³ச்சே²ய்யம், அகா²தி³தபுப்³பா³னி ச திணானி கா²தே³ய்யம், அபீதபுப்³பா³னி ச பானீயானி பிவேய்ய’ந்தி. ஸா புரிமம் பாத³ம் ஸுப்பதிட்டி²தம் பதிட்டா²பேத்வா பச்சி²மம் பாத³ம் உத்³த⁴ரேய்ய. ஸா அக³தபுப்³ப³ஞ்சேவ தி³ஸம் க³ச்சே²ய்ய, அகா²தி³தபுப்³பா³னி ச திணானி கா²தே³ய்ய, அபீதபுப்³பா³னி ச பானீயானி பிவேய்ய. யஸ்மிம் சஸ்ஸா பதே³ஸே டி²தாய ஏவமஸ்ஸ – ‘யம்னூனாஹம் அக³தபுப்³ப³ஞ்சேவ தி³ஸம் க³ச்சே²ய்யம், அகா²தி³தபுப்³பா³னி ச திணானி கா²தே³ய்யம், அபீதபுப்³பா³னி ச பானீயானி பிவேய்ய’ந்தி தஞ்ச பதே³ஸம் ஸோத்தி²னா பச்சாக³ச்சே²ய்ய. தம் கிஸ்ஸ ஹேது? ததா² ஹி ஸா, பி⁴க்க²வே, கா³வீ பப்³ப³தேய்யா பண்டி³தா ப்³யத்தா கே²த்தஞ்ஞூ குஸலா விஸமே பப்³ப³தே சரிதும். ஏவமேவம் கோ², பி⁴க்க²வே, இதே⁴கச்சோ பி⁴க்கு² பண்டி³தோ ப்³யத்தோ கே²த்தஞ்ஞூ குஸலோ விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரேய்ய’ந்தி. ஸோ து³தியம் ஜா²னம் அனபி⁴ஹிம்ஸமானோ விதக்கவிசாரானம் வூபஸமா… து³தியம் ஜா²னம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் பீதியா ச விராகா³ உபேக்க²கோ ச விஹரேய்யம் ஸதோ ச ஸம்பஜானோ, ஸுக²ஞ்ச காயேன படிஸம்வேதே³ய்யம் யம் தம் அரியா ஆசிக்க²ந்தி – உபேக்க²கோ ஸதிமா ஸுக²விஹாரீதி ததியம் ஜா²னம் உபஸம்பஜ்ஜ விஹரேய்ய’ந்தி. ஸோ ததியம் ஜா²னம் அனபி⁴ஹிம்ஸமானோ பீதியா ச விராகா³…பே… ததியம் ஜா²னம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரேய்ய’ந்தி. ஸோ சதுத்த²ம் ஜா²னம் அனபி⁴ஹிம்ஸமானோ ஸுக²ஸ்ஸ ச பஹானா…பே… சதுத்த²ம் ஜா²னம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா அனந்தோ ஆகாஸோதி ஆகாஸானஞ்சாயதனம் உபஸம்பஜ்ஜ விஹரேய்ய’ந்தி. ஸோ ஆகாஸானஞ்சாயதனம் அனபி⁴ஹிம்ஸமானோ ஸப்³ப³ஸோ ரூபஸஞ்ஞானம் ஸமதிக்கமா …பே… ஆகாஸானஞ்சாயதனம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸப்³ப³ஸோ ஆகாஸானஞ்சாயதனம் ஸமதிக்கம்ம அனந்தம் விஞ்ஞாணந்தி விஞ்ஞாணஞ்சாயதனம் உபஸம்பஜ்ஜ விஹரேய்ய’ந்தி. ஸோ விஞ்ஞாணஞ்சாயதனம் அனபி⁴ஹிம்ஸமானோ ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸப்³ப³ஸோ விஞ்ஞாணஞ்சாயதனம் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனம் உபஸம்பஜ்ஜ விஹரேய்ய’ந்தி. ஸோ ஆகிஞ்சஞ்ஞாயதனம் அனபி⁴ஹிம்ஸமானோ ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரேய்ய’ந்தி. ஸோ நேவஸஞ்ஞானாஸஞ்ஞாயதனம் அனபி⁴ஹிம்ஸமானோ ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. ஸோ தம் நிமித்தம் ஆஸேவதி பா⁴வேதி ப³ஹுலீகரோதி ஸ்வாதி⁴ட்டி²தம் அதி⁴ட்டா²தி.

‘‘தஸ்ஸ ஏவம் ஹோதி – ‘யம்னூனாஹம் ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரேய்ய’ந்தி. ஸோ ஸஞ்ஞாவேத³யிதனிரோத⁴ம் அனபி⁴ஹிம்ஸமானோ ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி.

‘‘யதோ கோ², பி⁴க்க²வே, பி⁴க்கு² தம் ததே³வ ஸமாபத்திம் ஸமாபஜ்ஜதிபி வுட்டா²திபி, தஸ்ஸ முது³ சித்தம் ஹோதி கம்மஞ்ஞம். முது³னா கம்மஞ்ஞேன சித்தேன அப்பமாணோ ஸமாதி⁴ ஹோதி ஸுபா⁴விதோ. ஸோ அப்பமாணேன ஸமாதி⁴னா ஸுபா⁴விதேன யஸ்ஸ யஸ்ஸ அபி⁴ஞ்ஞாஸச்சி²கரணீயஸ்ஸ த⁴ம்மஸ்ஸ சித்தம் அபி⁴னின்னாமேதி அபி⁴ஞ்ஞாஸச்சி²கிரியாய தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே.

‘‘ஸோ ஸசே ஆகங்க²தி – ‘அனேகவிஹிதம் இத்³தி⁴வித⁴ம் பச்சனுப⁴வேய்யம், ஏகோபி ஹுத்வா ப³ஹுதா⁴ அஸ்ஸம், ப³ஹுதா⁴பி ஹுத்வா ஏகோ அஸ்ஸம்…பே… யாவ ப்³ரஹ்மலோகாபி காயேன வஸம் வத்தேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே.

‘‘ஸோ ஸசே ஆகங்க²தி – தி³ப்³பா³ய ஸோததா⁴துயா…பே… ஸதி ஸதி ஆயதனே.

‘‘ஸோ ஸசே ஆகங்க²தி – ‘பரஸத்தானம் பரபுக்³க³லானம் சேதஸா சேதோ பரிச்ச பஜானேய்யம், ஸராக³ம் வா சித்தம் ஸராக³ம் சித்தந்தி பஜானேய்யம், வீதராக³ம் வா சித்தம் வீதராக³ம் சித்தந்தி பஜானேய்யம், ஸதோ³ஸம் வா சித்தம் ஸதோ³ஸம் சித்தந்தி பஜானேய்யம், வீததோ³ஸம் வா சித்தம் வீததோ³ஸம் சித்தந்தி பஜானேய்யம், ஸமோஹம் வா சித்தம் ஸமோஹம் சித்தந்தி பஜானேய்யம், வீதமோஹம் வா சித்தம்… ஸம்கி²த்தம் வா சித்தம்… விக்கி²த்தம் வா சித்தம்… மஹக்³க³தம் வா சித்தம்… அமஹக்³க³தம் வா சித்தம்… ஸஉத்தரம் வா சித்தம்… அனுத்தரம் வா சித்தம்… ஸமாஹிதம் வா சித்தம்… அஸமாஹிதம் வா சித்தம்… விமுத்தம் வா சித்தம்… அவிமுத்தம் வா சித்தம் அவிமுத்தம் சித்தந்தி பஜானேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே.

‘‘ஸோ ஸசே ஆகங்க²தி – ‘அனேகவிஹிதம் புப்³பே³னிவாஸம் அனுஸ்ஸரேய்யம், ஸேய்யதி²த³ம் – ஏகம்பி ஜாதிம் த்³வேபி ஜாதியோ…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே.

‘‘ஸோ ஸசே ஆகங்க²தி – ‘தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன…பே… யதா²கம்மூபகே³ ஸத்தே பஜானேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே.

‘‘ஸோ ஸசே ஆகங்க²தி – ‘ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரேய்ய’ந்தி, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதி ஆயதனே’’தி. சதுத்த²ம்.

5. ஜா²னஸுத்தம்

36. ‘‘பட²மம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மி; து³தியம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மி; ததியம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மி; சதுத்த²ம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மி; ஆகாஸானஞ்சாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மி; விஞ்ஞாணஞ்சாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மி; ஆகிஞ்சஞ்ஞாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மி; நேவஸஞ்ஞானாஸஞ்ஞாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மி; ஸஞ்ஞாவேத³யிதனிரோத⁴ம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மி.

‘‘‘பட²மம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மீ’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. ஸோ யதே³வ தத்த² ஹோதி ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி [பதிட்டா²பேதி (ஸ்யா.), படிபாதே³தி (க.) ம. நி. 2.133 பஸ்ஸிதப்³ப³ம்]. ஸோ தேஹி த⁴ம்மேஹி சித்தம் படிவாபேத்வா [பதிட்டா²பேத்வா (ஸ்யா.), படிபாதே³த்வா (க.)] அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா.

‘‘ஸேய்யதா²பி, பி⁴க்க²வே, இஸ்ஸாஸோ வா இஸ்ஸாஸந்தேவாஸீ வா திணபுரிஸரூபகே வா மத்திகாபுஞ்ஜே வா யோக்³க³ம் கரித்வா, ஸோ அபரேன ஸமயேன தூ³ரேபாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா [பதா³லிதா (க.) அ. நி. 3.134; 4.181]; ஏவமேவம் கோ², பி⁴க்க²வே, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. ஸோ யதே³வ தத்த² ஹோதி ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி. ஸோ தேஹி த⁴ம்மேஹி சித்தம் படிவாபேத்வா அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. ‘பட²மம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மீ’தி, இதி யம் தம் வுத்தம், இத³மேதம் படிச்ச வுத்தம்.

‘‘து³தியம்பாஹம், பி⁴க்க²வே, ஜா²னம் நிஸ்ஸாய…பே… ததியம்பாஹம், பி⁴க்க²வே, ஜா²னம் நிஸ்ஸாய… ‘சதுத்த²ம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மீ’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. ஸோ யதே³வ தத்த² ஹோதி ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி. ஸோ தேஹி த⁴ம்மேஹி சித்தம் படிவாபேத்வா அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா.

‘‘ஸேய்யதா²பி, பி⁴க்க²வே, இஸ்ஸாஸோ வா இஸ்ஸாஸந்தேவாஸீ வா திணபுரிஸரூபகே வா மத்திகாபுஞ்ஜே வா யோக்³க³ம் கரித்வா, ஸோ அபரேன ஸமயேன தூ³ரேபாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா; ஏவமேவம் கோ², பி⁴க்க²வே, பி⁴க்கு² ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. ஸோ யதே³வ தத்த² ஹோதி ரூபக³தம் வேத³னாக³தம்…பே… அனாவத்தித⁴ம்மோ தஸ்மா லோகா. ‘சதுத்த²ம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மீ’தி, இதி யம் தம் வுத்தம், இத³மேதம் படிச்ச வுத்தம்.

‘‘‘ஆகாஸானஞ்சாயதனம்பாஹம், பி⁴க்க²வே, ஜா²னம் நிஸ்ஸாய ஆஸவானம் க²யம் வதா³மீ’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஸோ யதே³வ தத்த² ஹோதி வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி. ஸோ தேஹி த⁴ம்மேஹி சித்தம் படிவாபேத்வா அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா.

‘‘ஸேய்யதா²பி, பி⁴க்க²வே, இஸ்ஸாஸோ வா இஸ்ஸாஸந்தேவாஸீ வா திணபுரிஸரூபகே வா மத்திகாபுஞ்ஜே வா யோக்³க³ம் கரித்வா, ஸோ அபரேன ஸமயேன தூ³ரேபாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா; ஏவமேவம் கோ², பி⁴க்க²வே, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஸோ யதே³வ தத்த² ஹோதி வேத³னாக³தம் ஸஞ்ஞாக³தம்…பே… அனாவத்தித⁴ம்மோ தஸ்மா லோகா. ‘ஆகாஸானஞ்சாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மீ’தி, இதி யம் தம் வுத்தம், இத³மேதம் படிச்ச வுத்தம்.

‘‘‘விஞ்ஞாணஞ்சாயதனம்பாஹம், பி⁴க்க²வே, நிஸ்ஸாய…பே… ஆகிஞ்சஞ்ஞாயதனம்பாஹம், பி⁴க்க²வே, நிஸ்ஸாய ஆஸவானம் க²யம் வதா³மீ’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஸோ யதே³வ தத்த² ஹோதி வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி. ஸோ தேஹி த⁴ம்மேஹி சித்தம் படிவாபேத்வா அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா.

‘‘ஸேய்யதா²பி, பி⁴க்க²வே, இஸ்ஸாஸோ வா இஸ்ஸாஸந்தேவாஸீ வா திணபுரிஸரூபகே வா மத்திகாபுஞ்ஜே வா யோக்³க³ம் கரித்வா, ஸோ அபரேன ஸமயேன தூ³ரேபாதீ ச ஹோதி அக்க²ணவேதீ⁴ ச மஹதோ ச காயஸ்ஸ பதா³லேதா; ஏவமேவம் கோ², பி⁴க்க²வே, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஸோ யதே³வ தத்த² ஹோதி வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம், தே த⁴ம்மே அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ ஸமனுபஸ்ஸதி. ஸோ தேஹி த⁴ம்மேஹி சித்தம் படிவாபேதி. ஸோ தேஹி த⁴ம்மேஹி சித்தம் படிவாபேத்வா அமதாய தா⁴துயா சித்தம் உபஸம்ஹரதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஸோ தத்த² டி²தோ ஆஸவானம் க²யம் பாபுணாதி. நோ சே ஆஸவானம் க²யம் பாபுணாதி, தேனேவ த⁴ம்மராகே³ன தாய த⁴ம்மனந்தி³யா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. ‘ஆகிஞ்சஞ்ஞாயதனம்பாஹம், நிஸ்ஸாய ஆஸவானம் க²யம் வதா³மீ’தி, இதி யம் தம் வுத்தம், இத³மேதம் படிச்ச வுத்தம்.

‘‘இதி கோ², பி⁴க்க²வே, யாவதா ஸஞ்ஞாஸமாபத்தி தாவதா அஞ்ஞாபடிவேதோ⁴. யானி ச கோ² இமானி, பி⁴க்க²வே, நிஸ்ஸாய த்³வே ஆயதனானி – நேவஸஞ்ஞானாஸஞ்ஞாயதனஸமாபத்தி ச ஸஞ்ஞாவேத³யிதனிரோதோ⁴ ச, ஜா²யீஹேதே, பி⁴க்க²வே, ஸமாபத்திகுஸலேஹி ஸமாபத்திவுட்டா²னகுஸலேஹி ஸமாபஜ்ஜித்வா வுட்ட²ஹித்வா ஸம்மா அக்கா²தப்³பா³னீதி வதா³மீ’’தி. பஞ்சமம்.

6. ஆனந்த³ஸுத்தம்

37. ஏகம் ஸமயம் ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதாராமே. தத்ர கோ² ஆயஸ்மா ஆனந்தோ³ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸும். ஆயஸ்மா ஆனந்தோ³ ஏதத³வோச –

‘‘அச்ச²ரியம், ஆவுஸோ, அப்³பு⁴தம், ஆவுஸோ! யாவஞ்சித³ம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸம்பா³தே⁴ ஓகாஸாதி⁴க³மோ அனுபு³த்³தோ⁴ ஸத்தானம் விஸுத்³தி⁴யா ஸோகபரிதே³வானம் ஸமதிக்கமாய து³க்க²தோ³மனஸ்ஸானம் அத்த²ங்க³மாய ஞாயஸ்ஸ அதி⁴க³மாய நிப்³பா³னஸ்ஸ ஸச்சி²கிரியாய. ததே³வ நாம சக்கு²ம் ப⁴விஸ்ஸதி தே ரூபா தஞ்சாயதனம் நோ படிஸம்வேதி³ஸ்ஸதி [படிஸம்வேத³யதி (க.)]. ததே³வ நாம ஸோதம் ப⁴விஸ்ஸதி தே ஸத்³தா³ தஞ்சாயதனம் நோ படிஸம்வேதி³ஸ்ஸதி. ததே³வ நாம கா⁴னம் ப⁴விஸ்ஸதி தே க³ந்தா⁴ தஞ்சாயதனம் நோ படிஸம்வேதி³ஸ்ஸதி. ஸாவ நாம ஜிவ்ஹா ப⁴விஸ்ஸதி தே ரஸா தஞ்சாயதனம் நோ படிஸம்வேதி³ஸ்ஸதி. ஸோவ நாம காயோ ப⁴விஸ்ஸதி தே போ²ட்ட²ப்³பா³ தஞ்சாயதனம் நோ படிஸம்வேதி³ஸ்ஸதீ’’தி.

ஏவம் வுத்தே ஆயஸ்மா உதா³யீ ஆயஸ்மந்தம் ஆனந்த³ம் ஏதத³வோச – ‘‘ஸஞ்ஞீமேவ நு கோ², ஆவுஸோ ஆனந்த³, ததா³யதனம் நோ படிஸம்வேதே³தி உதா³ஹு அஸஞ்ஞீ’’தி? ‘‘ஸஞ்ஞீமேவ கோ², ஆவுஸோ, ததா³யதனம் நோ படிஸம்வேதே³தி, நோ அஸஞ்ஞீ’’தி.

‘‘கிம்ஸஞ்ஞீ பனாவுஸோ, ததா³யதனம் நோ படிஸம்வேதே³தீ’’தி? ‘‘இதா⁴வுஸோ, பி⁴க்கு², ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஏவம்ஸஞ்ஞீபி கோ², ஆவுஸோ, ததா³யதனம் நோ படிஸம்வேதே³தி.

‘‘புன சபரம், ஆவுஸோ, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. ஏவம்ஸஞ்ஞீபி கோ², ஆவுஸோ, ததா³யதனம் நோ படிஸம்வேதே³தி.

‘‘புன சபரம், ஆவுஸோ, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஏவம்ஸஞ்ஞீபி கோ², ஆவுஸோ, ததா³யதனம் நோ படிஸம்வேதே³தீ’’தி.

‘‘ஏகமிதா³ஹம், ஆவுஸோ, ஸமயம் ஸாகேதே விஹராமி அஞ்ஜனவனே மிக³தா³யே. அத² கோ², ஆவுஸோ, ஜடிலவாஸிகா [ஜடிலகா³ஹியா (ஸீ. பீ.), ஜடி³லபா⁴கி³கா (ஸ்யா.)] பி⁴க்கு²னீ யேனாஹம் தேனுபஸங்கமி; உபஸங்கமித்வா மம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தா கோ², ஆவுஸோ, ஜடிலவாஸிகா பி⁴க்கு²னீ மம் ஏதத³வோச – ‘யாயம், ப⁴ந்தே ஆனந்த³, ஸமாதி⁴ ந சாபி⁴னதோ ந சாபனதோ ந ச ஸஸங்கா²ரனிக்³க³ய்ஹவாரிதக³தோ [ஸஸங்கா²ரனிக்³க³ய்ஹவாரிதவதோ (ஸீ. ஸ்யா. கம். பீ.), ஸஸங்கா²ரனிக்³க³ய்ஹவாரிவாவடோ (க.) அ. நி. 3.102; 5.27; தீ³. நி. 3.355], விமுத்தத்தா டி²தோ, டி²தத்தா ஸந்துஸிதோ, ஸந்துஸிதத்தா நோ பரிதஸ்ஸதி. அயம், ப⁴ந்தே ஆனந்த³, ஸமாதி⁴ கிம்ப²லோ வுத்தோ ப⁴க³வதா’’’தி?

‘‘ஏவம் வுத்தே, ஸோஹம், ஆவுஸோ, ஜடிலவாஸிகம் பி⁴க்கு²னிம் ஏதத³வோசம் – ‘யாயம், ப⁴கி³னி, ஸமாதி⁴ ந சாபி⁴னதோ ந சாபனதோ ந ச ஸஸங்கா²ரனிக்³க³ய்ஹவாரிதக³தோ, விமுத்தத்தா டி²தோ, டி²தத்தா ஸந்துஸிதோ, ஸந்துஸிதத்தா நோ பரிதஸ்ஸதி. அயம், ப⁴கி³னி, ஸமாதி⁴ அஞ்ஞாப²லோ வுத்தோ ப⁴க³வதா’தி. ஏவம்ஸஞ்ஞீபி கோ², ஆவுஸோ, ததா³யதனம் நோ படிஸம்வேதே³தீ’’தி. ச²ட்ட²ம்.

7. லோகாயதிகஸுத்தம்

38. அத² கோ² த்³வே லோகாயதிகா ப்³ராஹ்மணா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வதா ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே ப்³ராஹ்மணா ப⁴க³வந்தம் ஏதத³வோசும் –

‘‘பூரணோ, போ⁴ கோ³தம, கஸ்ஸபோ ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸம் ஞாணத³ஸ்ஸனம் படிஜானாதி – ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததம் ஸமிதம் ஞாணத³ஸ்ஸனம் பச்சுபட்டி²த’ந்தி. ஸோ ஏவமாஹ – ‘அஹம் அனந்தேன ஞாணேன அனந்தம் லோகம் ஜானம் பஸ்ஸம் விஹராமீ’தி. அயம்பி [அயம்பி ஹி (ஸ்யா. க.)], போ⁴ கோ³தம, நிக³ண்டோ² நாடபுத்தோ ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸம் ஞாணத³ஸ்ஸனம் படிஜானாதி – ‘சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததம் ஸமிதம் ஞாணத³ஸ்ஸனம் பச்சுபட்டி²த’ந்தி. ஸோ [ஸோபி (?)] ஏவமாஹ – ‘அஹம் அனந்தேன ஞாணேன அனந்தம் லோகம் ஜானம் பஸ்ஸம் விஹராமீ’தி. இமேஸம், போ⁴ கோ³தம, உபி⁴ன்னம் ஞாணவாதா³னம் உபி⁴ன்னம் அஞ்ஞமஞ்ஞம் விபச்சனீகவாதா³னம் கோ ஸச்சம் ஆஹ கோ முஸா’’தி?

‘‘அலம், ப்³ராஹ்மணா! திட்ட²தேதம் – ‘இமேஸம் உபி⁴ன்னம் ஞாணவாதா³னம் உபி⁴ன்னம் அஞ்ஞமஞ்ஞம் விபச்சனீகவாதா³னம் கோ ஸச்சம் ஆஹ கோ முஸா’தி. த⁴ம்மம் வோ, ப்³ராஹ்மணா, தே³ஸேஸ்ஸாமி, தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், போ⁴’’தி கோ² தே ப்³ராஹ்மணா ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ஸேய்யதா²பி, ப்³ராஹ்மணா, சத்தாரோ புரிஸா சதுத்³தி³ஸா டி²தா பரமேன ஜவேன ச ஸமன்னாக³தா பரமேன ச பத³வீதிஹாரேன. தே ஏவரூபேன ஜவேன ஸமன்னாக³தா அஸ்ஸு, ஸேய்யதா²பி நாம த³ள்ஹத⁴ம்மா [த³ள்ஹத⁴ம்மோ (ஸப்³ப³த்த²) அ. நி. 4.45; ம. நி. 1.116 ச, தம்ஸம்வண்ணனாடீகாயோ ச மோக்³க³ல்லானப்³யாகரணஞ்ச ஓலோகேதப்³பா³] த⁴னுக்³க³ஹோ ஸிக்கி²தோ கதஹத்தோ² கதூபாஸனோ லஹுகேன அஸனேன அப்பகஸிரேன திரியம் தாலச்சா²யம் [தாலச்சா²திம் (ஸீ. ஸ்யா. பீ.), தாலச்சா²தி³ம் (க.) அ. நி. 4.45; ம. நி. 1.161 பஸ்ஸிதப்³ப³ம்] அதிபாதேய்ய; ஏவரூபேன ச பத³வீதிஹாரேன, ஸேய்யதா²பி நாம புரத்தி²மா ஸமுத்³தா³ பச்சி²மோ ஸமுத்³தோ³ அத² புரத்தி²மாய தி³ஸாய டி²தோ புரிஸோ ஏவம் வதே³ய்ய – ‘அஹம் க³மனேன லோகஸ்ஸ அந்தம் பாபுணிஸ்ஸாமீ’தி. ஸோ அஞ்ஞத்ரேவ அஸிதபீதகா²யிதஸாயிதா அஞ்ஞத்ர உச்சாரபஸ்ஸாவகம்மா அஞ்ஞத்ர நித்³தா³கிலமத²படிவினோத³னா வஸ்ஸஸதாயுகோ வஸ்ஸஸதஜீவீ வஸ்ஸஸதம் க³ந்த்வா அப்பத்வாவ லோகஸ்ஸ அந்தம் அந்தரா காலம் கரேய்ய. அத² பச்சி²மாய தி³ஸாய…பே… அத² உத்தராய தி³ஸாய… அத² த³க்கி²ணாய தி³ஸாய டி²தோ புரிஸோ ஏவம் வதே³ய்ய – ‘அஹம் க³மனேன லோகஸ்ஸ அந்தம் பாபுணிஸ்ஸாமீ’தி. ஸோ அஞ்ஞத்ரேவ அஸிதபீதகா²யிதஸாயிதா அஞ்ஞத்ர உச்சாரபஸ்ஸாவகம்மா அஞ்ஞத்ர நித்³தா³கிலமத²படிவினோத³னா வஸ்ஸஸதாயுகோ வஸ்ஸஸதஜீவீ வஸ்ஸஸதம் க³ந்த்வா அப்பத்வாவ லோகஸ்ஸ அந்தம் அந்தரா காலம் கரேய்ய. தம் கிஸ்ஸ ஹேது? நாஹம், ப்³ராஹ்மணா, ஏவரூபாய ஸந்தா⁴வனிகாய லோகஸ்ஸ அந்தம் ஞாதேய்யம் த³ட்டே²ய்யம் பத்தேய்யந்தி வதா³மி. ந சாஹம், ப்³ராஹ்மணா, அப்பத்வாவ லோகஸ்ஸ அந்தம் து³க்க²ஸ்ஸ அந்தகிரியம் வதா³மி.

‘‘பஞ்சிமே, ப்³ராஹ்மணா, காமகு³ணா அரியஸ்ஸ வினயே லோகோதி வுச்சதி. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா; ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா; இமே கோ², ப்³ராஹ்மணா, பஞ்ச காமகு³ணா அரியஸ்ஸ வினயே லோகோதி வுச்சதி.

‘‘இத⁴, ப்³ராஹ்மணா, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. அயம் வுச்சதி, ப்³ராஹ்மணா, ‘பி⁴க்கு² லோகஸ்ஸ அந்தமாக³ம்ம, லோகஸ்ஸ அந்தே விஹரதி’. தமஞ்ஞே ஏவமாஹம்ஸு – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’தி. அஹம்பி ஹி [அஹம்பி (ஸீ. பீ.)], ப்³ராஹ்மணா, ஏவம் வதா³மி – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’’’தி.

‘‘புன சபரம், ப்³ராஹ்மணா, பி⁴க்கு² விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி, ப்³ராஹ்மணா, ‘பி⁴க்கு² லோகஸ்ஸ அந்தமாக³ம்ம லோகஸ்ஸ அந்தே விஹரதி’. தமஞ்ஞே ஏவமாஹம்ஸு – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’தி. அஹம்பி ஹி, ப்³ராஹ்மணா, ஏவம் வதா³மி – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’’’தி.

‘‘புன சபரம், ப்³ராஹ்மணா, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. அயம் வுச்சதி, ப்³ராஹ்மணா, ‘பி⁴க்கு² லோகஸ்ஸ அந்தமாக³ம்ம லோகஸ்ஸ அந்தே விஹரதி’. தமஞ்ஞே ஏவமாஹம்ஸு – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’தி. அஹம்பி ஹி, ப்³ராஹ்மணா, ஏவம் வதா³மி – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’’’தி.

‘‘புன சபரம், ப்³ராஹ்மணா, பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி…பே… ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி…பே… ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. அயம் வுச்சதி, ப்³ராஹ்மணா, ‘பி⁴க்கு² லோகஸ்ஸ அந்தமாக³ம்ம லோகஸ்ஸ அந்தே விஹரதி’. தமஞ்ஞே ஏவமாஹம்ஸு – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’தி. அஹம்பி ஹி, ப்³ராஹ்மணா, ஏவம் வதா³மி – ‘அயம்பி லோகபரியாபன்னோ, அயம்பி அனிஸ்ஸடோ லோகம்ஹா’’’தி.

‘‘புன சபரம், ப்³ராஹ்மணா, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி, ப்³ராஹ்மணா, ‘பி⁴க்கு² லோகஸ்ஸ அந்தமாக³ம்ம லோகஸ்ஸ அந்தே விஹரதி திண்ணோ லோகே விஸத்திக’’’ந்தி. ஸத்தமம்.

8. தே³வாஸுரஸங்கா³மஸுத்தம்

39. ‘‘பூ⁴தபுப்³ப³ம், பி⁴க்க²வே, தே³வாஸுரஸங்கா³மோ ஸமுபப்³யூள்ஹோ [ஸமுபப்³பூ³ள்ஹோ (ஸீ. பீ.)] அஹோஸி. தஸ்மிம் கோ² பன, பி⁴க்க²வே, ஸங்கா³மே அஸுரா ஜினிம்ஸு, தே³வா பராஜயிம்ஸு [பராஜியிம்ஸு (ஸீ. ஸ்யா. க.)]. பராஜிதா ச, பி⁴க்க²வே, தே³வா [தே³வா பீ⁴தா (பீ.)] அபயிம்ஸுயேவ [அபயம்ஸ்வேவ (ஸீ.)] உத்தரேனாபி⁴முகா², அபி⁴யிம்ஸு [அபி⁴யம்ஸு (ஸீ.)] அஸுரா. அத² கோ², பி⁴க்க²வே, தே³வானம் ஏதத³ஹோஸி – ‘அபி⁴யந்தேவ கோ² அஸுரா. யம்னூன மயம் து³தியம்பி அஸுரேஹி ஸங்கா³மேய்யாமா’தி. து³தியம்பி கோ², பி⁴க்க²வே, தே³வா அஸுரேஹி ஸங்கா³மேஸும். து³தியம்பி கோ², பி⁴க்க²வே, அஸுராவ ஜினிம்ஸு, தே³வா பராஜயிம்ஸு. பராஜிதா ச, பி⁴க்க²வே, தே³வா அபயிம்ஸுயேவ உத்தரேனாபி⁴முகா², அபி⁴யிம்ஸு அஸுரா’’.

அத² கோ², பி⁴க்க²வே, தே³வானம் ஏதத³ஹோஸி – ‘அபி⁴யந்தேவ கோ² அஸுரா. யம்னூன மயம் ததியம்பி அஸுரேஹி ஸங்கா³மேய்யாமா’தி. ததியம்பி கோ², பி⁴க்க²வே, தே³வா அஸுரேஹி ஸங்கா³மேஸும். ததியம்பி கோ², பி⁴க்க²வே, அஸுராவ ஜினிம்ஸு, தே³வா பராஜயிம்ஸு. பராஜிதா ச, பி⁴க்க²வே, தே³வா பீ⁴தா தே³வபுரம்யேவ பவிஸிம்ஸு. தே³வபுரக³தானஞ்ச பன [புன (க.)], பி⁴க்க²வே, தே³வானம் ஏதத³ஹோஸி – ‘பீ⁴ருத்தானக³தேன கோ² தா³னி மயம் ஏதரஹி அத்தனா விஹராம அகரணீயா அஸுரேஹீ’தி. அஸுரானம்பி, பி⁴க்க²வே, ஏதத³ஹோஸி – ‘பீ⁴ருத்தானக³தேன கோ² தா³னி தே³வா ஏதரஹி அத்தனா விஹரந்தி அகரணீயா அம்ஹேஹீ’தி.

‘‘பூ⁴தபுப்³ப³ம், பி⁴க்க²வே, தே³வாஸுரஸங்கா³மோ ஸமுபப்³யூள்ஹோ அஹோஸி. தஸ்மிம் கோ² பன, பி⁴க்க²வே, ஸங்கா³மே தே³வா ஜினிம்ஸு, அஸுரா பராஜயிம்ஸு. பராஜிதா ச, பி⁴க்க²வே, அஸுரா அபயிம்ஸுயேவ த³க்கி²ணேனாபி⁴முகா², அபி⁴யிம்ஸு தே³வா. அத² கோ², பி⁴க்க²வே, அஸுரானம் ஏதத³ஹோஸி – ‘அபி⁴யந்தேவ கோ² தே³வா. யம்னூன மயம் து³தியம்பி தே³வேஹி ஸங்கா³மேய்யாமா’தி. து³தியம்பி கோ², பி⁴க்க²வே, அஸுரா தே³வேஹி ஸங்கா³மேஸும். து³தியம்பி கோ², பி⁴க்க²வே, தே³வா ஜினிம்ஸு, அஸுரா பராஜயிம்ஸு. பராஜிதா ச, பி⁴க்க²வே, அஸுரா அபயிம்ஸுயேவ த³க்கி²ணேனாபி⁴முகா², அபி⁴யிம்ஸு தே³வா’’.

அத² கோ², பி⁴க்க²வே, அஸுரானம் ஏதத³ஹோஸி – ‘அபி⁴யந்தேவ கோ² தே³வா. யம்னூன மயம் ததியம்பி தே³வேஹி ஸங்கா³மேய்யாமா’தி. ததியம்பி கோ², பி⁴க்க²வே, அஸுரா தே³வேஹி ஸங்கா³மேஸும். ததியம்பி கோ², பி⁴க்க²வே, தே³வா ஜினிம்ஸு, அஸுரா பராஜயிம்ஸு. பராஜிதா ச, பி⁴க்க²வே, அஸுரா பீ⁴தா அஸுரபுரம்யேவ பவிஸிம்ஸு. அஸுரபுரக³தானஞ்ச பன, பி⁴க்க²வே, அஸுரானம் ஏதத³ஹோஸி – ‘பீ⁴ருத்தானக³தேன கோ² தா³னி மயம் ஏதரஹி அத்தனா விஹராம அகரணீயா தே³வேஹீ’தி. தே³வானம்பி, பி⁴க்க²வே, ஏதத³ஹோஸி – ‘பீ⁴ருத்தானக³தேன கோ² தா³னி அஸுரா ஏதரஹி அத்தனா விஹரந்தி அகரணீயா அம்ஹேஹீ’தி.

‘‘ஏவமேவம் கோ², பி⁴க்க²வே, யஸ்மிம் ஸமயே பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி, தஸ்மிம், பி⁴க்க²வே, ஸமயே பி⁴க்கு²ஸ்ஸ ஏவம் ஹோதி – ‘பீ⁴ருத்தானக³தேன கோ² தா³னாஹம் ஏதரஹி அத்தனா விஹராமி அகரணீயோ மாரஸ்ஸா’தி. மாரஸ்ஸாபி, பி⁴க்க²வே, பாபிமதோ ஏவம் ஹோதி – ‘பீ⁴ருத்தானக³தேன கோ² தா³னி பி⁴க்கு² ஏதரஹி அத்தனா விஹரதி அகரணீயோ மய்ஹ’’’ந்தி.

‘‘யஸ்மிம், பி⁴க்க²வே, ஸமயே பி⁴க்கு² விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி, தஸ்மிம், பி⁴க்க²வே, ஸமயே பி⁴க்கு²ஸ்ஸ ஏவம் ஹோதி – ‘பீ⁴ருத்தானக³தேன கோ² தா³னாஹம் ஏதரஹி அத்தனா விஹராமி அகரணீயோ மாரஸ்ஸா’தி. மாரஸ்ஸாபி, பி⁴க்க²வே, பாபிமதோ ஏவம் ஹோதி – ‘பீ⁴ருத்தானக³தேன கோ² தா³னி பி⁴க்கு² ஏதரஹி அத்தனா விஹரதி, அகரணீயோ மய்ஹ’’’ந்தி.

‘‘யஸ்மிம், பி⁴க்க²வே, ஸமயே பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. அயம் வுச்சதி, பி⁴க்க²வே, ‘பி⁴க்கு² அந்தமகாஸி மாரம், அபத³ம் வதி⁴த்வா மாரசக்கு²ம் அத³ஸ்ஸனம் க³தோ பாபிமதோ திண்ணோ லோகே விஸத்திக’’’ந்தி.

‘‘யஸ்மிம், பி⁴க்க²வே, ஸமயே பி⁴க்கு² ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி… ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி… ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி… ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி, பி⁴க்க²வே, ‘பி⁴க்கு² அந்தமகாஸி மாரம், அபத³ம் வதி⁴த்வா மாரசக்கு²ம் அத³ஸ்ஸனம் க³தோ பாபிமதோ திண்ணோ லோகே விஸத்திக’’’ந்தி. அட்ட²மம்.

9. நாக³ஸுத்தம்

40. ‘‘யஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ கோ³சரபஸுதஸ்ஸ ஹத்தீ²பி ஹத்தி²னியோபி ஹத்தி²கலபா⁴பி ஹத்தி²ச்சா²பாபி புரதோ புரதோ க³ந்த்வா திணக்³கா³னி சி²ந்த³ந்தி, தேன, பி⁴க்க²வே, ஆரஞ்ஞிகோ நாகோ³ அட்டீயதி ஹராயதி ஜிகு³ச்ச²தி. யஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ கோ³சரபஸுதஸ்ஸ ஹத்தீ²பி ஹத்தி²னியோபி ஹத்தி²கலபா⁴பி ஹத்தி²ச்சா²பாபி ஓப⁴க்³கோ³ப⁴க்³க³ம் ஸாகா²ப⁴ங்க³ம் கா²த³ந்தி, தேன, பி⁴க்க²வே, ஆரஞ்ஞிகோ நாகோ³ அட்டீயதி ஹராயதி ஜிகு³ச்ச²தி. யஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ ஓகா³ஹம் ஓதிண்ணஸ்ஸ ஹத்தீ²பி ஹத்தி²னியோபி ஹத்தி²கலபா⁴பி ஹத்தி²ச்சா²பாபி புரதோ புரதோ க³ந்த்வா ஸோண்டா³ய உத³கம் ஆலோளேந்தி, தேன, பி⁴க்க²வே, ஆரஞ்ஞிகோ நாகோ³ அட்டீயதி ஹராயதி ஜிகு³ச்ச²தி. யஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ ஓகா³ஹா உத்திண்ணஸ்ஸ ஹத்தி²னியோ காயம் உபனிக⁴ம்ஸந்தியோ க³ச்ச²ந்தி, தேன, பி⁴க்க²வே, ஆரஞ்ஞிகோ நாகோ³ அட்டீயதி ஹராயதி ஜிகு³ச்ச²தி.

‘‘தஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ ஏவம் ஹோதி – ‘அஹம் கோ² ஏதரஹி ஆகிண்ணோ விஹராமி ஹத்தீ²ஹி ஹத்தி²னீஹி ஹத்தி²கலபே⁴ஹி ஹத்தி²ச்சா²பேஹி. சி²ன்னக்³கா³னி சேவ திணானி கா²தா³மி, ஓப⁴க்³கோ³ப⁴க்³க³ஞ்ச மே ஸாகா²ப⁴ங்க³ம் கா²த³ந்தி [கா²தி³தம் (ஸ்யா. க.) மஹாவ. 467 பஸ்ஸிதப்³ப³ம்], ஆவிலானி ச பானீயானி பிவாமி, ஓகா³ஹா ச [ஓகா³ஹாபி ச (ஸ்யா. க.) மஹாவ. 467 பஸ்ஸிதப்³ப³ம்] மே உத்திண்ணஸ்ஸ ஹத்தி²னியோ காயம் உபனிக⁴ம்ஸந்தியோ க³ச்ச²ந்தி. யம்னூனாஹம் ஏகோ க³ணஸ்மா வூபகட்டோ² விஹரேய்ய’ந்தி. ஸோ அபரேன ஸமயேன ஏகோ க³ணஸ்மா வூபகட்டோ² விஹரதி, அச்சி²ன்னக்³கா³னி சேவ திணானி கா²த³தி, ஓப⁴க்³கோ³ப⁴க்³க³ஞ்சஸ்ஸ ஸாகா²ப⁴ங்க³ம் ந கா²த³ந்தி [ந ஓப⁴க்³கோ³ப⁴க்³க³ஞ்ச ஸாகா²ப⁴ங்க³ கா²த³தி (ஸ்யா. க.)], அனாவிலானி ச பானீயானி பிவதி, ஓகா³ஹா சஸ்ஸ உத்திண்ணஸ்ஸ ந ஹத்தி²னியோ காயம் உபனிக⁴ம்ஸந்தியோ க³ச்ச²ந்தி.

‘‘தஸ்மிம், பி⁴க்க²வே, ஸமயே ஆரஞ்ஞிகஸ்ஸ நாக³ஸ்ஸ ஏவம் ஹோதி – ‘அஹம் கோ² புப்³பே³ ஆகிண்ணோ விஹாஸிம் ஹத்தீ²ஹி ஹத்தி²னீஹி ஹத்தி²கலபே⁴ஹி ஹத்தி²ச்சா²பேஹி, சி²ன்னக்³கா³னி சேவ திணானி கா²தி³ம், ஓப⁴க்³கோ³ப⁴க்³க³ஞ்ச மே ஸாகா²ப⁴ங்க³ம் கா²தி³ம்ஸு, ஆவிலானி ச பானீயானி அபாயிம், ஓகா³ஹா [ஏத்த² பிஸத்³தோ³ ஸப்³ப³த்த²பி நத்தி²] ச மே உத்திண்ணஸ்ஸ ஹத்தி²னியோ காயம் உபனிக⁴ம்ஸந்தியோ அக³மம்ஸு. ஸோஹம் ஏதரஹி ஏகோ க³ணஸ்மா வூபகட்டோ² விஹராமி, அச்சி²ன்னக்³கா³னி சேவ திணானி கா²தா³மி, ஓப⁴க்³கோ³ப⁴க்³க³ஞ்ச மே ஸாகா²ப⁴ங்க³ம் ந கா²த³ந்தி, அனாவிலானி ச பானீயானி பிவாமி, ஓகா³ஹா ச மே உத்திண்ணஸ்ஸ ந ஹத்தி²னியோ காயம் உபனிக⁴ம்ஸந்தியோ க³ச்ச²ந்தீ’தி. ஸோ ஸோண்டா³ய ஸாகா²ப⁴ங்க³ம் ப⁴ஞ்ஜித்வா ஸாகா²ப⁴ங்கே³ன காயம் பரிமஜ்ஜித்வா அத்தமனோ ஸோண்ட³ம் ஸம்ஹரதி [கண்டு³ம் ஸம்ஹந்தி (ஸீ. பீ.) கண்டு³ம் ஸம்ஹனதி (ஸ்யா.), ஏத்த² கண்டு³வனது³க்க²ம் வினேதீதி அத்தோ²],.

‘‘ஏவமேவம் கோ², பி⁴க்க²வே, யஸ்மிம் ஸமயே பி⁴க்கு² ஆகிண்ணோ விஹரதி பி⁴க்கூ²ஹி பி⁴க்கு²னீஹி உபாஸகேஹி உபாஸிகாஹி ரஞ்ஞா ராஜமஹாமத்தேஹி தித்தி²யேஹி தித்தி²யஸாவகேஹி, தஸ்மிம், பி⁴க்க²வே, ஸமயே பி⁴க்கு²ஸ்ஸ ஏவம் ஹோதி – ‘அஹம் கோ² ஏதரஹி ஆகிண்ணோ விஹராமி பி⁴க்கூ²ஹி பி⁴க்கு²னீஹி உபாஸகேஹி உபாஸிகாஹி ரஞ்ஞா ராஜமஹாமத்தேஹி தித்தி²யேஹி தித்தி²யஸாவகேஹி. யம்னூனாஹம் ஏகோ க³ணஸ்மா வூபகட்டோ² விஹரேய்ய’ந்தி. ஸோ விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம். ஸோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா.

‘‘ஸோ அபி⁴ஜ்ஜ²ம் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தம் பரிஸோதே⁴தி; ப்³யாபாத³பதோ³ஸம் பஹாய அப்³யாபன்னசித்தோ விஹரதி ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தம் பரிஸோதே⁴தி; தி²னமித்³த⁴ம் பஹாய விக³ததி²னமித்³தோ⁴ விஹரதி ஆலோகஸஞ்ஞீ ஸதோ ஸம்பஜானோ, தி²னமித்³தா⁴ சித்தம் பரிஸோதே⁴தி; உத்³த⁴ச்சகுக்குச்சம் பஹாய அனுத்³த⁴தோ விஹரதி அஜ்ஜ²த்தம் வூபஸந்தசித்தோ, உத்³த⁴ச்சகுக்குச்சா சித்தம் பரிஸோதே⁴தி; விசிகிச்ச²ம் பஹாய திண்ணவிசிகிச்சோ² விஹரதி அகத²ம்கதீ² குஸலேஸு த⁴ம்மேஸு, விசிகிச்சா²ய சித்தம் பரிஸோதே⁴தி. ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. ஸோ அத்தமனோ ஸோண்ட³ம் ஸம்ஹரதி [கண்டு³ம் ஸம்ஹந்தி (ஸீ. பீ.), கண்டு³ம் ஸம்ஹனதி (ஸ்யா.), ஏத்த² கண்டு³வனஸதி³ஸம் ஜா²னபடிபக்க²ம் கிலேஸது³க்க²ம் வினேதீதி அத்தோ²]. விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி. ஸோ அத்தமனோ ஸோண்ட³ம் ஸம்ஹரதி.

‘‘ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஸோ அத்தமனோ ஸோண்ட³ம் ஸம்ஹரதி. ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி… ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி… ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி… ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. ஸோ அத்தமனோ ஸோண்ட³ம் ஸம்ஹரதீ’’தி. நவமம்.

10. தபுஸ்ஸஸுத்தம்

41. ஏகம் ஸமயம் ப⁴க³வா மல்லேஸு விஹரதி உருவேலகப்பம் நாம மல்லானம் நிக³மோ. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய உருவேலகப்பம் பிண்டா³ய பாவிஸி. உருவேலகப்பே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஆயஸ்மந்தம் ஆனந்த³ம் ஆமந்தேஸி – ‘‘இதே⁴வ தாவ த்வம், ஆனந்த³, ஹோஹி, யாவாஹம் மஹாவனம் அஜ்ஜோ²கா³ஹாமி தி³வாவிஹாராயா’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. அத² கோ² ப⁴க³வா மஹாவனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³.

அத² கோ² தபுஸ்ஸோ க³ஹபதி யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² தபுஸ்ஸோ க³ஹபதி ஆயஸ்மந்தம் ஆனந்த³ம் ஏதத³வோச –

‘‘மயம், ப⁴ந்தே ஆனந்த³, கி³ஹீ காமபோ⁴கி³னோ காமாராமா காமரதா காமஸம்முதி³தா. தேஸம் நோ, ப⁴ந்தே, அம்ஹாகம் கி³ஹீனம் காமபோ⁴கீ³னம் காமாராமானம் காமரதானம் காமஸம்முதி³தானம் பபாதோ விய கா²யதி, யதி³த³ம் நேக்க²ம்மம். ஸுதம் மேதம், ப⁴ந்தே, ‘இமஸ்மிம் த⁴ம்மவினயே த³ஹரானம் த³ஹரானம் பி⁴க்கூ²னம் நேக்க²ம்மே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ’ [பஸ்ஸதம் (?)]. தயித³ம், ப⁴ந்தே, இமஸ்மிம் த⁴ம்மவினயே பி⁴க்கூ²னம் ப³ஹுனா ஜனேன விஸபா⁴கோ³, யதி³த³ம் நேக்க²ம்ம’’ந்தி.

‘‘அத்தி² கோ² ஏதம், க³ஹபதி, கதா²பாப⁴தம் ப⁴க³வந்தம் த³ஸ்ஸனாய. ஆயாம, க³ஹபதி, யேன ப⁴க³வா தேனுபஸங்கமிஸ்ஸாம; உபஸங்கமித்வா ப⁴க³வதோ ஏதமத்த²ம் ஆரோசேஸ்ஸாம. யதா² நோ ப⁴க³வா ப்³யாகரிஸ்ஸதி ததா² நம் தா⁴ரேஸ்ஸாமா’’தி.

‘‘ஏவம், ப⁴ந்தே’’தி கோ² தபுஸ்ஸோ க³ஹபதி ஆயஸ்மதோ ஆனந்த³ஸ்ஸ பச்சஸ்ஸோஸி. அத² கோ² ஆயஸ்மா ஆனந்தோ³ தபுஸ்ஸேன க³ஹபதினா ஸத்³தி⁴ம் யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச –

‘‘அயம், ப⁴ந்தே, தபுஸ்ஸோ க³ஹபதி ஏவமாஹ – ‘மயம், ப⁴ந்தே ஆனந்த³, கி³ஹீ காமபோ⁴கி³னோ காமாராமா காமரதா காமஸம்முதி³தா, தேஸம் நோ ப⁴ந்தே, அம்ஹாகம் கி³ஹீனம் காமபோ⁴கீ³னம் காமாராமானம் காமரதானம் காமஸம்முதி³தானம் பபாதோ விய கா²யதி, யதி³த³ம் நேக்க²ம்மம்’. ஸுதம் மேதம், ப⁴ந்தே, ‘இமஸ்மிம் த⁴ம்மவினயே த³ஹரானம் த³ஹரானம் பி⁴க்கூ²னம் நேக்க²ம்மே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. தயித³ம், ப⁴ந்தே, இமஸ்மிம் த⁴ம்மவினயே பி⁴க்கூ²னம் ப³ஹுனா ஜனேன விஸபா⁴கோ³ யதி³த³ம் நேக்க²ம்ம’’’ந்தி.

‘‘ஏவமேதம், ஆனந்த³, ஏவமேதம், ஆனந்த³! மய்ஹம்பி கோ², ஆனந்த³, புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘ஸாது⁴ நேக்க²ம்மம், ஸாது⁴ பவிவேகோ’தி. தஸ்ஸ மய்ஹம், ஆனந்த³, நேக்க²ம்மே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே நேக்க²ம்மே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘காமேஸு கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, நேக்க²ம்மே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே நேக்க²ம்மே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் காமேஸு ஆதீ³னவம் தி³ஸ்வா தம் ப³ஹுலம் கரேய்யம் [ப³ஹுலீகரேய்யம் (ஸீ. ஸ்யா. பீ.)], நேக்க²ம்மே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே நேக்க²ம்மே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன காமேஸு ஆதீ³னவம் தி³ஸ்வா தம் ப³ஹுலமகாஸிம், நேக்க²ம்மே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, நேக்க²ம்மே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ காமஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே காமஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, அவிதக்கே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே அவிதக்கே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘விதக்கேஸு கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, அவிதக்கே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே அவிதக்கே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் விதக்கேஸு ஆதீ³னவம் தி³ஸ்வா தம் ப³ஹுலம் கரேய்யம், அவிதக்கே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே அவிதக்கே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன விதக்கேஸு ஆதீ³னவம் தி³ஸ்வா தம் ப³ஹுலமகாஸிம், அவிதக்கே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, அவிதக்கே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ விதக்கஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே விதக்கஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் பீதியா ச விராகா³ உபேக்க²கோ ச விஹரேய்யம் ஸதோ ச ஸம்பஜானோ ஸுக²ஞ்ச காயேன படிஸம்வேதே³ய்யம் யம் தம் அரியா ஆசிக்க²ந்தி – உபேக்க²கோ ஸதிமா ஸுக²விஹாரீதி ததியம் ஜா²னம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, நிப்பீதிகே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே நிப்பீதிகே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘பீதியா கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, நிப்பீதிகே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே நிப்பீதிகே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் பீதியா ஆதீ³னவம் தி³ஸ்வா தம் ப³ஹுலம் கரேய்யம், நிப்பீதிகே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே நிப்பீதிகே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன பீதியா ஆதீ³னவம் தி³ஸ்வா தம் ப³ஹுலமகாஸிம், நிப்பீதிகே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, நிப்பீதிகே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, பீதியா ச விராகா³…பே… ததியம் ஜா²னம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ பீதிஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே பீதிஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, அது³க்க²மஸுகே² சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே அது³க்க²மஸுகே² சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘உபேக்கா²ஸுகே² கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, அது³க்க²மஸுகே² ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே அது³க்க²மஸுகே² சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் உபேக்கா²ஸுகே² ஆதீ³னவம் தி³ஸ்வா தம் ப³ஹுலம் கரேய்யம், அது³க்க²மஸுகே² ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே அது³க்க²மஸுகே² சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன உபேக்கா²ஸுகே² ஆதீ³னவம் தி³ஸ்வா தம் ப³ஹுலமகாஸிம் அது³க்க²மஸுகே² ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, அது³க்க²மஸுகே² சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸுக²ஸ்ஸ ச பஹானா…பே… சதுத்த²ம் ஜா²னம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ உபேக்கா²ஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே உபேக்கா²ஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘‘அனந்தோ ஆகாஸோ’’தி ஆகாஸானஞ்சாயதனம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, ஆகாஸானஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே ஆகாஸானஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘ரூபேஸு கோ² மே ஆதீ³னவோ அதி³ட்டோ², ஸோ ச அப³ஹுலீகதோ, ஆகாஸானஞ்சாயதனே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே ஆகாஸானஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் ரூபேஸு ஆதீ³னவம் தி³ஸ்வா தம் ப³ஹுலம் கரேய்யம், ஆகாஸானஞ்சாயதனே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே ஆகாஸானஞ்சாயதனே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன ரூபேஸு ஆதீ³னவம் தி³ஸ்வா தம் ப³ஹுலமகாஸிம், ஆகாஸானஞ்சாயதனே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, ஆகாஸானஞ்சாயதனே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ ரூபஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே ரூபஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் ஸப்³ப³ஸோ ஆகாஸானஞ்சாயதனம் ஸமதிக்கம்ம ‘‘அனந்தம் விஞ்ஞாண’’ந்தி விஞ்ஞாணஞ்சாயதனம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, விஞ்ஞாணஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே விஞ்ஞாணஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘ஆகாஸானஞ்சாயதனே கோ² மே ஆதீ³னவோ அதி³ட்டோ², ஸோ ச அப³ஹுலீகதோ, விஞ்ஞாணஞ்சாயதனே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே விஞ்ஞாணஞ்சாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் ஆகாஸானஞ்சாயதனே ஆதீ³னவம் தி³ஸ்வா தம் ப³ஹுலம் கரேய்யம், விஞ்ஞாணஞ்சாயதனே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே விஞ்ஞாணஞ்சாயதனே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன ஆகாஸானஞ்சாயதனே ஆதீ³னவம் தி³ஸ்வா தம் ப³ஹுலமகாஸிம், விஞ்ஞாணஞ்சாயதனே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, விஞ்ஞாணஞ்சாயதனே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ ஆகாஸானஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே ஆகாஸானஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் ஸப்³ப³ஸோ விஞ்ஞாணஞ்சாயதனம் ஸமதிக்கம்ம நத்தி² கிஞ்சீதி ஆகிஞ்சஞ்ஞாயதனம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, ஆகிஞ்சஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே ஆகிஞ்சஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘விஞ்ஞாணஞ்சாயதனே கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, ஆகிஞ்சஞ்ஞாயதனே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே ஆகிஞ்சஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் விஞ்ஞாணஞ்சாயதனே ஆதீ³னவம் தி³ஸ்வா தம் ப³ஹுலம் கரேய்யம், ஆகிஞ்சஞ்ஞாயதனே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே ஆகிஞ்சஞ்ஞாயதனே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன விஞ்ஞாணஞ்சாயதனே ஆதீ³னவம் தி³ஸ்வா தம் ப³ஹுலமகாஸிம், ஆகிஞ்சஞ்ஞாயதனே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, ஆகிஞ்சஞ்ஞாயதனே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ விஞ்ஞாணஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே விஞ்ஞாணஞ்சாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, நேவஸஞ்ஞானாஸஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது கோ பச்சயோ, யேன மே நேவஸஞ்ஞானாஸஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘ஆகிஞ்சஞ்ஞாயதனே கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, நேவஸஞ்ஞானாஸஞ்ஞாயதனே ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே நேவஸஞ்ஞானாஸஞ்ஞாயதனே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் ஆகிஞ்சஞ்ஞாயதனே ஆதீ³னவம் தி³ஸ்வா தம் ப³ஹுலம் கரேய்யம், நேவஸஞ்ஞானாஸஞ்ஞாயதனே ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே நேவஸஞ்ஞானாஸஞ்ஞாயதனே சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன ஆகிஞ்சஞ்ஞாயதனே ஆதீ³னவம் தி³ஸ்வா தம் ப³ஹுலமகாஸிம், நேவஸஞ்ஞானாஸஞ்ஞாயதனே ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, நேவஸஞ்ஞானாஸஞ்ஞாயதனே சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹராமி. தஸ்ஸ மய்ஹம், ஆனந்த³, இமினா விஹாரேன விஹரதோ ஆகிஞ்சஞ்ஞாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴. ஸேய்யதா²பி, ஆனந்த³, ஸுகி²னோ து³க்க²ம் உப்பஜ்ஜேய்ய யாவதே³வ ஆபா³தா⁴ய; ஏவமேவஸ்ஸ மே ஆகிஞ்சஞ்ஞாயதனஸஹக³தா ஸஞ்ஞாமனஸிகாரா ஸமுதா³சரந்தி. ஸ்வஸ்ஸ மே ஹோதி ஆபா³தோ⁴.

‘‘தஸ்ஸ மய்ஹம், ஆனந்த³, ஏதத³ஹோஸி – ‘யம்னூனாஹம் நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரேய்ய’ந்தி. தஸ்ஸ மய்ஹம், ஆனந்த³, ஸஞ்ஞாவேத³யிதனிரோதே⁴ சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ. தஸ்ஸ மய்ஹம், ஆனந்த³, ஏதத³ஹோஸி – ‘கோ நு கோ² ஹேது, கோ பச்சயோ, யேன மே ஸஞ்ஞாவேத³யிதனிரோதே⁴ சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’? தஸ்ஸ மய்ஹம், ஆனந்த³, ஏதத³ஹோஸி – ‘நேவஸஞ்ஞானாஸஞ்ஞாயதனே கோ² மே ஆதீ³னவோ அதி³ட்டோ², ஸோ ச மே அப³ஹுலீகதோ, ஸஞ்ஞாவேத³யிதனிரோதே⁴ ச ஆனிஸம்ஸோ அனதி⁴க³தோ, ஸோ ச மே அனாஸேவிதோ. தஸ்மா மே ஸஞ்ஞாவேத³யிதனிரோதே⁴ சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி ஏதம் ஸந்தந்தி பஸ்ஸதோ’. தஸ்ஸ மய்ஹம், ஆனந்த³, ஏதத³ஹோஸி – ‘ஸசே கோ² அஹம் நேவஸஞ்ஞானாஸஞ்ஞாயதனே ஆதீ³னவம் தி³ஸ்வா தம் ப³ஹுலம் கரேய்யம், ஸஞ்ஞாவேத³யிதனிரோதே⁴ ஆனிஸம்ஸம் அதி⁴க³ம்ம தமாஸேவேய்யம், டா²னம் கோ² பனேதம் விஜ்ஜதி யம் மே ஸஞ்ஞாவேத³யிதனிரோதே⁴ சித்தம் பக்க²ந்தே³ய்ய பஸீதே³ய்ய ஸந்திட்டே²ய்ய விமுச்சேய்ய ஏதம் ஸந்தந்தி பஸ்ஸதோ’. ஸோ கோ² அஹம், ஆனந்த³, அபரேன ஸமயேன நேவஸஞ்ஞானாஸஞ்ஞாயதனே ஆதீ³னவம் தி³ஸ்வா தம் ப³ஹுலமகாஸிம், ஸஞ்ஞாவேத³யிதனிரோதே⁴ ஆனிஸம்ஸம் அதி⁴க³ம்ம தமாஸேவிம். தஸ்ஸ மய்ஹம், ஆனந்த³, ஸஞ்ஞாவேத³யிதனிரோதே⁴ சித்தம் பக்க²ந்த³தி பஸீத³தி ஸந்திட்ட²தி விமுச்சதி ஏதம் ஸந்தந்தி பஸ்ஸதோ. ஸோ கோ² அஹம், ஆனந்த³, ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹராமி, பஞ்ஞாய ச மே தி³ஸ்வா ஆஸவா பரிக்க²யம் அக³மம்ஸு.

‘‘யாவகீவஞ்சாஹம், ஆனந்த³, இமா நவ அனுபுப்³ப³விஹாரஸமாபத்தியோ ந ஏவம் அனுலோமபடிலோமம் ஸமாபஜ்ஜிம்பி வுட்ட²ஹிம்பி, நேவ தாவாஹம், ஆனந்த³, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴’தி பச்சஞ்ஞாஸிம். யதோ ச கோ² அஹம், ஆனந்த³, இமா நவ அனுபுப்³ப³விஹாரஸமாபத்தியோ ஏவம் அனுலோமபடிலோமம் ஸமாபஜ்ஜிம்பி வுட்ட²ஹிம்பி, அதா²ஹம், ஆனந்த³, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴’தி பச்சஞ்ஞாஸிம். ஞாணஞ்ச பன மே த³ஸ்ஸனம் உத³பாதி³ – ‘அகுப்பா மே சேதோவிமுத்தி [விமுத்தி (க. ஸீ. க.)], அயமந்திமா ஜாதி, நத்தி² தா³னி புனப்³ப⁴வோ’’’தி. த³ஸமம்.

மஹாவக்³கோ³ சதுத்தோ².