9. படிஸாரணீயஸுத்தம்

89. [சூளவ. 39 தோ²கம் விஸதி³ஸம்] ‘‘அட்ட²ஹி, பி⁴க்க²வே, த⁴ம்மேஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ படிஸாரணீயகம்மம் கரேய்ய. கதமேஹி அட்ட²ஹி? கி³ஹீனம் அலாபா⁴ய பரிஸக்கதி, கி³ஹீனம் அனத்தா²ய பரிஸக்கதி, கி³ஹீ அக்கோஸதி பரிபா⁴ஸதி, கி³ஹீ கி³ஹீஹி பே⁴தே³தி, பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி, த⁴ம்மிகஞ்ச கி³ஹிபடிஸ்ஸவம் ந ஸச்சாபேதி. இமேஹி கோ², பி⁴க்க²வே, அட்ட²ஹி த⁴ம்மேஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ படிஸாரணீயம் கம்மம் கரேய்ய.

‘‘அட்ட²ஹி, பி⁴க்க²வே, த⁴ம்மேஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ படிஸாரணீயகம்மம் படிப்பஸ்ஸம்பே⁴ய்ய. கதமேஹி அட்ட²ஹி? ந கி³ஹீனம் அலாபா⁴ய பரிஸக்கதி, ந கி³ஹீனம் அனத்தா²ய பரிஸக்கதி, ந கி³ஹீ அக்கோஸதி பரிபா⁴ஸதி, ந கி³ஹீ கி³ஹீஹி பே⁴தே³தி, பு³த்³த⁴ஸ்ஸ வண்ணம் பா⁴ஸதி, த⁴ம்மஸ்ஸ வண்ணம் பா⁴ஸதி, ஸங்க⁴ஸ்ஸ வண்ணம் பா⁴ஸதி, த⁴ம்மிகஞ்ச கி³ஹிபடிஸ்ஸவம் ஸச்சாபேதி. இமேஹி கோ², பி⁴க்க²வே, அட்ட²ஹி த⁴ம்மேஹி ஸமன்னாக³தஸ்ஸ பி⁴க்கு²னோ ஆகங்க²மானோ ஸங்கோ⁴ படிஸாரணீயகம்மம் படிப்பஸ்ஸம்பே⁴ய்யா’’தி. நவமம்.