7. பத்தனிகுஜ்ஜனஸுத்தம்

87. [சூளவ. 265] ‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ ஆகங்க²மானோ ஸங்கோ⁴ பத்தம் நிக்குஜ்ஜேய்ய [நிகுஜ்ஜேய்ய (க.)]. கதமேஹி அட்ட²ஹி? பி⁴க்கூ²னம் அலாபா⁴ய பரிஸக்கதி, பி⁴க்கூ²னம் அனத்தா²ய பரிஸக்கதி, பி⁴க்கூ²னம் அவாஸாய [அனாவாஸாய (ஸீ. ஸ்யா.)] பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி [விபே⁴தே³தி (ப³ஹூஸு)], பு³த்³த⁴ஸ்ஸ அவண்ணம் பா⁴ஸதி, த⁴ம்மஸ்ஸ அவண்ணம் பா⁴ஸதி, ஸங்க⁴ஸ்ஸ அவண்ணம் பா⁴ஸதி. இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ ஆகங்க²மானோ ஸங்கோ⁴ பத்தம் நிக்குஜ்ஜேய்ய.

‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ ஆகங்க²மானோ ஸங்கோ⁴ பத்தம் உக்குஜ்ஜேய்ய. கதமேஹி அட்ட²ஹி? ந பி⁴க்கூ²னம் அலாபா⁴ய பரிஸக்கதி, ந பி⁴க்கூ²னம் அனத்தா²ய பரிஸக்கதி, ந பி⁴க்கூ²னம் அவாஸாய பரிஸக்கதி, ந பி⁴க்கூ² அக்கோஸதி பரிபா⁴ஸதி, ந பி⁴க்கூ² பி⁴க்கூ²ஹி பே⁴தே³தி, பு³த்³த⁴ஸ்ஸ வண்ணம் பா⁴ஸதி, த⁴ம்மஸ்ஸ வண்ணம் பா⁴ஸதி, ஸங்க⁴ஸ்ஸ வண்ணம் பா⁴ஸதி. இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ ஆகங்க²மானோ ஸங்கோ⁴ பத்தம் உக்குஜ்ஜேய்யா’’தி. ஸத்தமம்.