1. ஸதிஸம்பஜஞ்ஞஸுத்தம்

81. ‘‘ஸதிஸம்பஜஞ்ஞே, பி⁴க்க²வே, அஸதி ஸதிஸம்பஜஞ்ஞவிபன்னஸ்ஸ ஹதூபனிஸம் ஹோதி ஹிரோத்தப்பம். ஹிரோத்தப்பே அஸதி ஹிரோத்தப்பவிபன்னஸ்ஸ ஹதூபனிஸோ ஹோதி இந்த்³ரியஸம்வரோ. இந்த்³ரியஸம்வரே அஸதி இந்த்³ரியஸம்வரவிபன்னஸ்ஸ ஹதூபனிஸம் ஹோதி ஸீலம். ஸீலே அஸதி ஸீலவிபன்னஸ்ஸ ஹதூபனிஸோ ஹோதி ஸம்மாஸமாதி⁴. ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸம் ஹோதி யதா²பூ⁴தஞாணத³ஸ்ஸனம். யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸோ ஹோதி நிப்³பி³தா³விராகோ³. நிப்³பி³தா³விராகே³ அஸதி நிப்³பி³தா³விராக³விபன்னஸ்ஸ ஹதூபனிஸம் ஹோதி விமுத்திஞாணத³ஸ்ஸனம். ஸேய்யதா²பி, பி⁴க்க²வே, ருக்கோ² ஸாகா²பலாஸவிபன்னோ. தஸ்ஸ பபடிகாபி ந பாரிபூரிம் க³ச்ச²தி, தசோபி… பே²க்³கு³பி… ஸாரோபி ந பாரிபூரிம் க³ச்ச²தி. ஏவமேவம் கோ², பி⁴க்க²வே, ஸதிஸம்பஜஞ்ஞே அஸதி ஸதிஸம்பஜஞ்ஞவிபன்னஸ்ஸ ஹதூபனிஸம் ஹோதி ஹிரோத்தப்பம்; ஹிரோத்தப்பே அஸதி ஹிரோத்தப்பவிபன்னஸ்ஸ ஹதூபனிஸோ ஹோதி…பே… விமுத்திஞாணத³ஸ்ஸனம்.

‘‘ஸதிஸம்பஜஞ்ஞே, பி⁴க்க²வே, ஸதி ஸதிஸம்பஜஞ்ஞஸம்பன்னஸ்ஸ உபனிஸஸம்பன்னம் ஹோதி ஹிரோத்தப்பம். ஹிரோத்தப்பே ஸதி ஹிரோத்தப்பஸம்பன்னஸ்ஸ உபனிஸஸம்பன்னோ ஹோதி இந்த்³ரியஸம்வரோ. இந்த்³ரியஸம்வரே ஸதி இந்த்³ரியஸம்வரஸம்பன்னஸ்ஸ உபனிஸஸம்பன்னம் ஹோதி ஸீலம். ஸீலே ஸதி ஸீலஸம்பன்னஸ்ஸ உபனிஸஸம்பன்னோ ஹோதி ஸம்மாஸமாதி⁴. ஸம்மாஸமாதி⁴ம்ஹி ஸதி ஸம்மாஸமாதி⁴ஸம்பன்னஸ்ஸ உபனிஸஸம்பன்னம் ஹோதி யதா²பூ⁴தஞாணத³ஸ்ஸனம். யதா²பூ⁴தஞாணத³ஸ்ஸனே ஸதி யதா²பூ⁴தஞாணத³ஸ்ஸனஸம்பன்னஸ்ஸ உபனிஸஸம்பன்னோ ஹோதி நிப்³பி³தா³விராகோ³. நிப்³பி³தா³விராகே³ ஸதி நிப்³பி³தா³விராக³ஸம்பன்னஸ்ஸ உபனிஸஸம்பன்னம் ஹோதி விமுத்திஞாணத³ஸ்ஸனம். ஸேய்யதா²பி, பி⁴க்க²வே, ருக்கோ² ஸாகா²பலாஸஸம்பன்னோ. தஸ்ஸ பபடிகாபி பாரிபூரிம் க³ச்ச²தி, தசோபி… பே²க்³கு³பி… ஸாரோபி பாரிபூரிம் க³ச்ச²தி. ஏவமேவம் கோ², பி⁴க்க²வே, ஸதிஸம்பஜஞ்ஞே ஸதி ஸதிஸம்பஜஞ்ஞஸம்பன்னஸ்ஸ உபனிஸஸம்பன்னம் ஹோதி ஹிரோத்தப்பம்; ஹிரோத்தப்பே ஸதி ஹிரோத்தப்பஸம்பன்னஸ்ஸ உபனிஸஸம்பன்னோ ஹோதி…பே… விமுத்திஞாணத³ஸ்ஸன’’ந்தி. பட²மம்.