10. குஸீதாரம்ப⁴வத்து²ஸுத்தம்

80. [தி³. நி. 3.334, 358] ‘‘அட்டி²மானி, பி⁴க்க²வே, குஸீதவத்தூ²னி. கதமானி அட்ட²? இத⁴, பி⁴க்க²வே, பி⁴க்கு²னா கம்மம் கத்தப்³ப³ம் ஹோதி. தஸ்ஸ ஏவம் ஹோதி – ‘கம்மம் கோ² மே கத்தப்³ப³ம் ப⁴விஸ்ஸதி. கம்மம் கோ² பன மே கரோந்தஸ்ஸ காயோ கிலமிஸ்ஸதி. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, பட²மம் குஸீதவத்து².

‘‘புன சபரம், பி⁴க்க²வே, பி⁴க்கு²னா கம்மம் கதம் ஹோதி. தஸ்ஸ ஏவம் ஹோதி – ‘அஹம் கோ² கம்மம் அகாஸிம். கம்மம் கோ² பன மே கரோந்தஸ்ஸ காயோ கிலந்தோ. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, து³தியம் குஸீதவத்து².

‘‘புன சபரம், பி⁴க்க²வே, பி⁴க்கு²னா மக்³கோ³ க³ந்தப்³போ³ ஹோதி. தஸ்ஸ ஏவம் ஹோதி – ‘மக்³கோ³ மே க³ந்தப்³போ³ ப⁴விஸ்ஸதி. மக்³க³ம் கோ² பன மே க³ச்ச²ந்தஸ்ஸ காயோ கிலமிஸ்ஸதி. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, ததியம் குஸீதவத்து².

‘‘புன சபரம், பி⁴க்க²வே, பி⁴க்கு²னா மக்³கோ³ க³தோ ஹோதி. தஸ்ஸ ஏவம் ஹோதி – ‘அஹம் கோ² மக்³க³ம் அக³மாஸிம். மக்³க³ம் கோ² பன மே க³ச்ச²ந்தஸ்ஸ காயோ கிலந்தோ. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம் பி⁴க்க²வே, சதுத்த²ம் குஸீதவத்து².

‘‘புன சபரம், பி⁴க்க²வே, பி⁴க்கு² கா³மம் வா நிக³மம் வா பிண்டா³ய சரந்தோ ந லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – ‘அஹம் கோ² கா³மம் வா நிக³மம் வா பிண்டா³ய சரந்தோ நாலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ கிலந்தோ அகம்மஞ்ஞோ. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி…பே… இத³ம், பி⁴க்க²வே, பஞ்சமம் குஸீதவத்து².

‘‘புன சபரம், பி⁴க்க²வே, பி⁴க்கு² கா³மம் வா நிக³மம் வா பிண்டா³ய சரந்தோ லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – ‘அஹம் கோ² கா³மம் வா நிக³மம் வா பிண்டா³ய சரந்தோ அலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ க³ருகோ அகம்மஞ்ஞோ மாஸாசிதம் மஞ்ஞே. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி…பே… இத³ம், பி⁴க்க²வே, ச²ட்ட²ம் குஸீதவத்து².

‘‘புன சபரம், பி⁴க்க²வே, பி⁴க்கு²னோ உப்பன்னோ ஹோதி அப்பமத்தகோ ஆபா³தோ⁴. தஸ்ஸ ஏவம் ஹோதி – ‘உப்பன்னோ கோ² மே அயம் அப்பமத்தகோ ஆபா³தோ⁴ அத்தி² கப்போ நிபஜ்ஜிதும். ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி…பே… இத³ம், பி⁴க்க²வே, ஸத்தமம் குஸீதவத்து².

‘‘புன சபரம், பி⁴க்க²வே, பி⁴க்கு² கி³லானா வுட்டி²தோ [அ. நி. 6.16 ஸுத்தவண்ணனா டீகா ஓலோகேதப்³பா³] ஹோதி அசிரவுட்டி²தோ கே³லஞ்ஞா. தஸ்ஸ ஏவம் ஹோதி – ‘அஹம் கோ² கி³லானா வுட்டி²தோ அசிரவுட்டி²தோ கே³லஞ்ஞா. தஸ்ஸ மே காயோ து³ப்³ப³லோ அகம்மஞ்ஞோ. ஹந்தா³ஹம் நிபஜ்ஜாமீ’தி. ஸோ நிபஜ்ஜதி, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, அட்ட²மம் குஸீதவத்து². இமானி கோ², பி⁴க்க²வே, அட்ட² குஸீதவத்தூ²னி.

[தீ³. நி. 3.335, 358] ‘‘அட்டி²மானி, பி⁴க்க²வே, ஆரம்ப⁴வத்தூ²னி. கதமானி அட்ட²? இத⁴, பி⁴க்க²வே, பி⁴க்கு²னா கம்மம் கத்தப்³ப³ம் ஹோதி. தஸ்ஸ ஏவம் ஹோதி – ‘கம்மம் கோ² மே கத்தப்³ப³ம் ப⁴விஸ்ஸதி. கம்மம் கோ² மயா கரோந்தேன ந ஸுகரம் பு³த்³தா⁴னம் ஸாஸனம் மனஸி காதும். ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. ஸோ வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, பட²மம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு²னா கம்மம் கதம் ஹோதி. தஸ்ஸ ஏவம் ஹோதி – ‘அஹம் கோ² கம்மம் அகாஸிம். கம்மம் கோ² பனாஹம் கரோந்தோ நாஸக்கி²ம் பு³த்³தா⁴னம் ஸாஸனம் மனஸி காதும். ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. ஸோ வீரியம் ஆரப⁴தி. இத³ம், பி⁴க்க²வே, து³தியம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு²னா மக்³கோ³ க³ந்தப்³போ³ ஹோதி. தஸ்ஸ ஏவம் ஹோதி – மக்³கோ³ கோ² மே க³ந்தப்³போ³ ப⁴விஸ்ஸதி. மக்³க³ம் கோ² பன மே க³ச்ச²ந்தேன ந ஸுகரம் பு³த்³தா⁴னம் ஸாஸனம் மனஸி காதும். ஹந்தா³ஹம் வீரியம்…பே… இத³ம், பி⁴க்க²வே, ததியம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு²னா மக்³கோ³ க³தோ ஹோதி. தஸ்ஸ ஏவம் ஹோதி – அஹம் கோ² மக்³க³ம் அக³மாஸிம். மக்³க³ம் கோ² பனாஹம் க³ச்ச²ந்தோ நாஸக்கி²ம் பு³த்³தா⁴னம் ஸாஸனம் மனஸி காதும். ஹந்தா³ஹம் வீரியம் ஆரபா⁴மி…பே… இத³ம், பி⁴க்க²வே, சதுத்த²ம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு² கா³மம் வா நிக³மம் வா பிண்டா³ய சரந்தோ ந லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – அஹம் கோ² கா³மம் வா நிக³மம் வா பிண்டா³ய சரந்தோ நாலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ லஹுகோ கம்மஞ்ஞோ. ஹந்தா³ஹம் வீரியம் ஆரபா⁴மி…பே… இத³ம், பி⁴க்க²வே, பஞ்சமம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு² கா³மம் வா நிக³மம் வா பிண்டா³ய சரந்தோ லப⁴தி லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ ஏவம் ஹோதி – அஹம் கோ² கா³மம் வா நிக³மம் வா பிண்டா³ய சரந்தோ அலத்த²ம் லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம். தஸ்ஸ மே காயோ ப³லவா கம்மஞ்ஞோ. ஹந்தா³ஹம் வீரியம் ஆரபா⁴மி…பே… இத³ம், பி⁴க்க²வே, ச²ட்ட²ம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு²னோ உப்பன்னோ ஹோதி அப்பமத்தகோ ஆபா³தோ⁴. தஸ்ஸ ஏவம் ஹோதி – உப்பன்னோ கோ² மே அயம் அப்பமத்தகோ ஆபா³தோ⁴. டா²னம் கோ² பனேதம் விஜ்ஜதி யம் மே ஆபா³தோ⁴ பவட்³டே⁴ய்ய. ஹந்தா³ஹம் படிகச்சேவ வீரியம் ஆரபா⁴மி…பே… இத³ம், பி⁴க்க²வே, ஸத்தமம் ஆரம்ப⁴வத்து².

‘‘புன சபரம், பி⁴க்க²வே, பி⁴க்கு² கி³லானா வுட்டி²தோ ஹோதி அசிரவுட்டி²தோ கே³லஞ்ஞா. தஸ்ஸ ஏவம் ஹோதி – ‘அஹம் கோ² கி³லானா வுட்டி²தோ அசிரவுட்டி²தோ கே³லஞ்ஞா. டா²னம் கோ² பனேதம் விஜ்ஜதி யம் மே ஆபா³தோ⁴ பச்சுதா³வத்தேய்ய. ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. ஸோ வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இத³ம், பி⁴க்க²வே, அட்ட²மம் ஆரம்ப⁴வத்து². இமானி கோ², பி⁴க்க²வே, அட்ட² ஆரம்ப⁴வத்தூ²னீ’’தி. த³ஸமம்.

யமகவக்³கோ³ ததியோ.