1. கோ³தமீஸுத்தம்

51. ஏகம் ஸமயம் ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. அத² கோ² மஹாபஜாபதீ [மஹாபஜாபதி (ஸ்யா.) சூளவ. 402] கோ³தமீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தா கோ² மஹாபஜாபதீ கோ³தமீ ப⁴க³வந்தம் ஏதத³வோச – ‘‘ஸாது⁴, ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘அலம், கோ³தமி! மா தே ருச்சி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜா’’தி.

து³தியம்பி கோ² மஹாபஜாபதீ கோ³தமீ ப⁴க³வந்தம் ஏதத³வோச – ‘‘ஸாது⁴, ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘அலம், கோ³தமி! மா தே ருச்சி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜா’’தி. ‘‘ததியம்பி கோ² மஹாபஜாபதீ கோ³தமீ ப⁴க³வந்தம் ஏதத³வோச – ‘‘ஸாது⁴ ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘அலம், கோ³தமி! மா தே ருச்சி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜா’’தி.

அத² கோ² மஹாபஜாபதீ கோ³தமீ ‘‘ந ப⁴க³வா அனுஜானாதி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி து³க்கீ² து³ம்மனா அஸ்ஸுமுகீ² ருத³மானா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ப⁴க³வா கபிலவத்து²ஸ்மிம் யதா²பி⁴ரந்தம் விஹரித்வா யேன வேஸாலீ தேன சாரிகம் பக்காமி. அனுபுப்³பே³ன சாரிகம் சரமானோ யேன வேஸாலீ தத³வஸரி. தத்ர ஸுத³ம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² மஹாபஜாபதீ கோ³தமீ கேஸே சே²தா³பேத்வா காஸாயானி வத்தா²னி அச்சா²தே³த்வா ஸம்ப³ஹுலாஹி ஸாகியானீஹி ஸத்³தி⁴ம் யேன வேஸாலீ தேன பக்காமி. அனுபுப்³பே³ன யேன வேஸாலீ மஹாவனம் கூடாகா³ரஸாலா தேனுபஸங்கமி. அத² கோ² மஹாபஜாபதீ கோ³தமீ ஸூனேஹி பாதே³ஹி ரஜோகிண்ணேன க³த்தேன து³க்கீ² து³ம்மனா அஸ்ஸுமுகீ² ருத³மானா ப³ஹித்³வாரகோட்ட²கே அட்டா²ஸி.

அத்³த³ஸா கோ² ஆயஸ்மா ஆனந்தோ³ மஹாபஜாபதிம் கோ³தமிம் ஸூனேஹி பாதே³ஹி ரஜோகிண்ணேன க³த்தேன து³க்கி²ம் து³ம்மனம் அஸ்ஸுமுகி²ம் ருத³மானம் ப³ஹித்³வாரகோட்ட²கே டி²தம். தி³ஸ்வான மஹாபஜாபதிம் கோ³தமிம் ஏதத³வோச – ‘‘கிம் நு த்வம், கோ³தமி, ஸூனேஹி பாதே³ஹி ரஜோகிண்ணேன க³த்தேன து³க்கீ² து³ம்மனா அஸ்ஸுமுகீ² ருத³மானா ப³ஹித்³வாரகோட்ட²கே டி²தா’’தி? ‘‘ததா² ஹி பன, ப⁴ந்தே ஆனந்த³, ந ப⁴க³வா அனுஜானாதி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘தேன ஹி த்வம், கோ³தமி, முஹுத்தம் இதே⁴வ தாவ ஹோஹி, யாவாஹம் ப⁴க³வந்தம் யாசாமி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி.

அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘ஏஸா, ப⁴ந்தே, மஹாபஜாபதீ கோ³தமீ ஸூனேஹி பாதே³ஹி ரஜோகிண்ணேன க³த்தேன து³க்கீ² து³ம்மனா அஸ்ஸுமுகீ² ருத³மானா ப³ஹித்³வாரகோட்ட²கே டி²தா – ‘ந ப⁴க³வா அனுஜானாதி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’ந்தி. ஸாது⁴, ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘அலம், ஆனந்த³! மா தே ருச்சி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜா’’தி.

து³தியம்பி கோ²…பே… ததியம்பி கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘ஸாது⁴, ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. ‘‘அலம், ஆனந்த³! மா தே ருச்சி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜா’’தி.

அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ந ப⁴க³வா அனுஜானாதி மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜம். யம்னூனாஹம் அஞ்ஞேனபி பரியாயேன ப⁴க³வந்தம் யாசேய்யம் மாதுகா³மஸ்ஸ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி. அத² கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘ப⁴ப்³போ³ நு கோ², ப⁴ந்தே, மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜித்வா ஸோதாபத்திப²லம் வா ஸகதா³கா³மிப²லம் வா அனாகா³மிப²லம் வா அரஹத்தப²லம் வா ஸச்சி²காது’’ந்தி? ‘‘ப⁴ப்³போ³, ஆனந்த³, மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜித்வா ஸோதாபத்திப²லம்பி ஸகதா³கா³மிப²லம்பி அனாகா³மிப²லம்பி அரஹத்தப²லம்பி ஸச்சி²காது’’ந்தி. ‘‘ஸசே, ப⁴ந்தே, ப⁴ப்³போ³ மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜித்வா ஸோதாபத்திப²லம்பி…பே… அரஹத்தப²லம்பி ஸச்சி²காதும், ப³ஹுகாரா, ப⁴ந்தே, மஹாபஜாபதீ கோ³தமீ ப⁴க³வதோ மாதுச்சா² ஆபாதி³கா போஸிகா கீ²ரஸ்ஸ தா³யிகா; ப⁴க³வந்தம் ஜனேத்தியா காலங்கதாய த²ஞ்ஞம் பாயேஸி. ஸாது⁴, ப⁴ந்தே, லபே⁴ய்ய மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜ’’ந்தி.

‘‘ஸசே, ஆனந்த³, மஹாபஜாபதீ கோ³தமீ அட்ட² க³ருத⁴ம்மே படிக்³க³ண்ஹாதி, ஸாவஸ்ஸா ஹோது உபஸம்பதா³ –

[பாசி. 149; சூளவ. 403] ‘‘வஸ்ஸஸதூபஸம்பன்னாய பி⁴க்கு²னியா தத³ஹூபஸம்பன்னஸ்ஸ பி⁴க்கு²னோ அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் கத்தப்³ப³ம். அயம்பி த⁴ம்மோ ஸக்கத்வா க³ரும் கத்வா [க³ருகத்வா (ஸீ. ஸ்யா. பீ.)] மானேத்வா பூஜேத்வா யாவஜீவம் அனதிக்கமனீயோ.

‘‘ந பி⁴க்கு²னியா அபி⁴க்கு²கே ஆவாஸே வஸ்ஸம் உபக³ந்தப்³ப³ம். அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘அன்வட்³ட⁴மாஸம் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³ [பச்சாஸிம்ஸிதப்³பா³ (ஸீ. ஸ்யா. பீ.)] – உபோஸத²புச்ச²கஞ்ச, ஓவாதூ³பஸங்கமனஞ்ச. அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘வஸ்ஸம்வுட்டா²ய பி⁴க்கு²னியா உப⁴தோஸங்கே⁴ தீஹி டா²னேஹி பவாரேதப்³ப³ம் – தி³ட்டே²ன வா ஸுதேன வா பரிஸங்காய வா. அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘க³ருத⁴ம்மம் அஜ்ஜா²பன்னாய பி⁴க்கு²னியா உப⁴தோஸங்கே⁴ பக்க²மானத்தம் சரிதப்³ப³ம். அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா²ய ஸிக்க²மானாய உப⁴தோஸங்கே⁴ உபஸம்பதா³ பரியேஸிதப்³பா³. அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘ந கேனசி பரியாயேன பி⁴க்கு²னியா பி⁴க்கு² அக்கோஸிதப்³போ³ பரிபா⁴ஸிதப்³போ³. அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘அஜ்ஜதக்³கே³ ஓவடோ பி⁴க்கு²னீனம் பி⁴க்கூ²ஸு வசனபதோ², அனோவடோ பி⁴க்கூ²னம் பி⁴க்கு²னீஸு வசனபதோ². அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ.

‘‘ஸசே, ஆனந்த³, மஹாபஜாபதீ கோ³தமீ இமே அட்ட² க³ருத⁴ம்மே படிக்³க³ண்ஹாதி, ஸாவஸ்ஸா ஹோது உபஸம்பதா³’’தி.

அத² கோ² ஆயஸ்மா ஆனந்தோ³ ப⁴க³வதோ ஸந்திகே இமே அட்ட² க³ருத⁴ம்மே உக்³க³ஹேத்வா யேன மஹாபஜாபதீ கோ³தமீ தேனுபஸங்கமி; உபஸங்கமித்வா மஹாபஜாபதிம் கோ³தமிம் ஏதத³வோச –

‘‘ஸசே கோ² த்வம், கோ³தமி, அட்ட² க³ருத⁴ம்மே படிக்³க³ண்ஹேய்யாஸி, ஸாவ தே ப⁴விஸ்ஸதி உபஸம்பதா³ –

‘‘வஸ்ஸஸதூபஸம்பன்னாய பி⁴க்கு²னியா தத³ஹூபஸம்பன்னஸ்ஸ பி⁴க்கு²னோ அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் கத்தப்³ப³ம். அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ…பே….

‘‘அஜ்ஜதக்³கே³ ஓவடோ பி⁴க்கு²னீனம் பி⁴க்கூ²ஸு வசனபதோ², அனோவடோ பி⁴க்கூ²னம் பி⁴க்கு²னீஸு வசனபதோ². அயம்பி த⁴ம்மோ ஸக்கத்வா க³ரும் கத்வா மானேத்வா பூஜேத்வா யாவஜீவம் அனதிக்கமனீயோ. ஸசே கோ² த்வம், கோ³தமி, இமே அட்ட² க³ருத⁴ம்மே படிக்³க³ண்ஹேய்யாஸி, ஸாவ தே ப⁴விஸ்ஸதி உபஸம்பதா³’’தி.

‘‘ஸேய்யதா²பி, ப⁴ந்தே ஆனந்த³, இத்தீ² வா புரிஸோ வா த³ஹரோ யுவா மண்ட³னகஜாதிகோ [மண்ட³னகஜாதியோ (ஸீ. பீ.)] ஸீஸம்ன்ஹாதோ [ஸீஸம்னஹாதோ (ஸீ. பீ.), ஸீஸனஹாதோ (ஸ்யா.)] உப்பலமாலம் வா வஸ்ஸிகமாலம் வா அதி⁴முத்தகமாலம் [அதிமுத்தகமாலம் (ஸீ.)] வா லபி⁴த்வா உபோ⁴ஹி ஹத்தே²ஹி படிக்³க³ஹேத்வா உத்தமங்கே³ ஸிரஸ்மிம் பதிட்டா²பேய்ய; ஏவமேவம் கோ² அஹம், ப⁴ந்தே ஆனந்த³, இமே அட்ட² க³ருத⁴ம்மே படிக்³க³ண்ஹாமி யாவஜீவம் அனதிக்கமனீயே’’தி.

அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘படிக்³க³ஹிதா, ப⁴ந்தே, மஹாபஜாபதியா கோ³தமியா அட்ட² க³ருத⁴ம்மா யாவஜீவம் அனதிக்கமனீயா’’தி.

‘‘ஸசே, ஆனந்த³, நாலபி⁴ஸ்ஸ மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜ்ஜம், சிரட்டி²திகம், ஆனந்த³, ப்³ரஹ்மசரியம் அப⁴விஸ்ஸ, வஸ்ஸஸஹஸ்ஸமேவ ஸத்³த⁴ம்மோ திட்டே²ய்ய. யதோ ச கோ², ஆனந்த³, மாதுகா³மோ ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜிதோ, ந தா³னி, ஆனந்த³, ப்³ரஹ்மசரியம் சிரட்டி²திகம் ப⁴விஸ்ஸதி. பஞ்சேவ தா³னி, ஆனந்த³, வஸ்ஸஸதானி ஸத்³த⁴ம்மோ ட²ஸ்ஸதி.

‘‘ஸேய்யதா²பி, ஆனந்த³, யானி கானிசி குலானி ப³ஹுத்தி²கானி [ப³ஹுகித்தி²கானி (ஸீ. பீ.), ப³ஹுஇத்தி²கானி (ஸ்யா.)] அப்பபுரிஸகானி, தானி ஸுப்பத⁴ம்ஸியானி ஹோந்தி சோரேஹி கும்ப⁴த்தே²னகேஹி; ஏவமேவம் கோ², ஆனந்த³, யஸ்மிம் த⁴ம்மவினயே லப⁴தி மாதுகா³மோ அகா³ரஸ்மா அனகா³ரியம் பப்³ப³ஜ்ஜம், ந தம் ப்³ரஹ்மசரியம் சிரட்டி²திகம் ஹோதி.

‘‘ஸேய்யதா²பி, ஆனந்த³, ஸம்பன்னே ஸாலிக்கே²த்தே ஸேதட்டி²கா நாம ரோக³ஜாதி நிபததி, ஏவம் தம் ஸாலிக்கே²த்தம் ந சிரட்டி²திகம் ஹோதி; ஏவமேவம் கோ², ஆனந்த³, யஸ்மிம் த⁴ம்மவினயே லப⁴தி மாதுகா³மோ அகா³ரஸ்மா அனகா³ரியம் பப்³ப³ஜ்ஜம், ந தம் ப்³ரஹ்மசரியம் சிரட்டி²திகம் ஹோதி.

‘‘ஸேய்யதா²பி, ஆனந்த³, ஸம்பன்னே உச்சு²க்கே²த்தே மஞ்ஜிட்டி²கா [மஞ்ஜேட்டி²கா (ஸீ. ஸ்யா.)] நாம ரோக³ஜாதி நிபததி, ஏவம் தம் உச்சு²க்கே²த்தம் ந சிரட்டி²திகம் ஹோதி; ஏவமேவம் கோ², ஆனந்த³, யஸ்மிம் த⁴ம்மவினயே லப⁴தி மாதுகா³மோ அகா³ரஸ்மா அனகா³ரியம் பப்³ப³ஜ்ஜம், ந தம் ப்³ரஹ்மசரியம் சிரட்டி²திகம் ஹோதி.

‘‘ஸேய்யதா²பி, ஆனந்த³, புரிஸோ மஹதோ தளாகஸ்ஸ படிகச்சேவ [படிக³ச்சேவ (ஸீ. பீ.)] ஆளிம் ப³ந்தே⁴ய்ய யாவதே³வ உத³கஸ்ஸ அனதிக்கமனாய; ஏவமேவம் கோ², ஆனந்த³, மயா படிகச்சேவ பி⁴க்கு²னீனம் அட்ட² க³ருத⁴ம்மா பஞ்ஞத்தா யாவஜீவம் அனதிக்கமனீயா’’தி. பட²மம்.