10. து³தியஇத⁴லோகிகஸுத்தம்

50. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ மாதுகா³மோ இத⁴லோகவிஜயாய படிபன்னோ ஹோதி, அயம்ஸ லோகோ ஆரத்³தோ⁴ ஹோதி. கதமேஹி சதூஹி? இத⁴, பி⁴க்க²வே, மாதுகா³மோ ஸுஸம்விஹிதகம்மந்தோ ஹோதி, ஸங்க³ஹிதபரிஜனோ, ப⁴த்து மனாபம் சரதி, ஸம்ப⁴தம் அனுரக்க²தி.

‘‘கத²ஞ்ச, பி⁴க்க²வே, மாதுகா³மோ ஸுஸம்விஹிதகம்மந்தோ ஹோதி? இத⁴, பி⁴க்க²வே, மாதுகா³மோ யே தே ப⁴த்து அப்³ப⁴ந்தரா கம்மந்தா…பே… ஏவம் கோ², பி⁴க்க²வே, மாதுகா³மோ ஸுஸம்விஹிதகம்மந்தோ ஹோதி.

‘‘கத²ஞ்ச, பி⁴க்க²வே, மாதுகா³மோ ஸங்க³ஹிதபரிஜனோ ஹோதி? இத⁴, பி⁴க்க²வே, மாதுகா³மோ யோ ஸோ ப⁴த்து அப்³ப⁴ந்தரோ அந்தோஜனோ…பே… ஏவம் கோ², பி⁴க்க²வே, மாதுகா³மோ ஸங்க³ஹிதபரிஜனோ ஹோதி.

‘‘கத²ஞ்ச, பி⁴க்க²வே, மாதுகா³மோ ப⁴த்து மனாபம் சரதி? இத⁴, பி⁴க்க²வே, மாதுகா³மோ யம் ப⁴த்து அமனாபஸங்கா²தம் தம் ஜீவிதஹேதுபி ந அஜ்ஜா²சரதி. ஏவம் கோ², பி⁴க்க²வே, மாதுகா³மோ ப⁴த்து மனாபம் சரதி.

‘‘கத²ஞ்ச, பி⁴க்க²வே, மாதுகா³மோ ஸம்ப⁴தம் அனுரக்க²தி? இத⁴, பி⁴க்க²வே, மாதுகா³மோ யம் ப⁴த்தா ஆஹரதி…பே… ஏவம் கோ², பி⁴க்க²வே, மாதுகா³மோ ஸம்ப⁴தம் அனுரக்க²தி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ மாதுகா³மோ இத⁴லோகவிஜயாய படிபன்னோ ஹோதி, அயம்ஸ லோகோ ஆரத்³தோ⁴ ஹோதி.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ மாதுகா³மோ பரலோகவிஜயாய படிபன்னோ ஹோதி, பரலோகோ ஆரத்³தோ⁴ ஹோதி. கதமேஹி சதூஹி? இத⁴, பி⁴க்க²வே, மாதுகா³மோ ஸத்³தா⁴ஸம்பன்னோ ஹோதி, ஸீலஸம்பன்னோ ஹோதி, சாக³ஸம்பன்னோ ஹோதி, பஞ்ஞாஸம்பன்னோ ஹோதி.

‘‘கத²ஞ்ச, பி⁴க்க²வே, மாதுகா³மோ ஸத்³தா⁴ஸம்பன்னோ ஹோதி? இத⁴, பி⁴க்க²வே, மாதுகா³மோ ஸத்³தோ⁴ ஹோதி…பே… ஏவம் கோ², பி⁴க்க²வே, மாதுகா³மோ ஸத்³தா⁴ஸம்பன்னோ ஹோதி.

‘‘கத²ஞ்ச, பி⁴க்க²வே, மாதுகா³மோ ஸீலஸம்பன்னோ ஹோதி? இத⁴, பி⁴க்க²வே, மாதுகா³மோ பாணாதிபாதா படிவிரதோ ஹோதி…பே… ஸுராமேரயமஜ்ஜபமாத³ட்டா²னா படிவிரதோ ஹோதி. ஏவம் கோ², பி⁴க்க²வே, மாதுகா³மோ ஸீலஸம்பன்னோ ஹோதி.

‘‘கத²ஞ்ச, பி⁴க்க²வே, மாதுகா³மோ சாக³ஸம்பன்னோ ஹோதி? இத⁴, பி⁴க்க²வே, மாதுகா³மோ விக³தமலமச்சே²ரேன சேதஸா அகா³ரம் அஜ்ஜா²வஸதி…பே… ஏவம் கோ², பி⁴க்க²வே, மாதுகா³மோ சாக³ஸம்பன்னோ ஹோதி.

‘‘கத²ஞ்ச, பி⁴க்க²வே, மாதுகா³மோ பஞ்ஞாஸம்பன்னோ ஹோதி? இத⁴, பி⁴க்க²வே, மாதுகா³மோ பஞ்ஞவா ஹோதி…பே… ஏவம் கோ², பி⁴க்க²வே, மாதுகா³மோ பஞ்ஞாஸம்பன்னோ ஹோதி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ மாதுகா³மோ பரலோகவிஜயாய படிபன்னோ ஹோதி, பரலோகோ ஆரத்³தோ⁴ ஹோதீ’’தி.

‘‘ஸுஸம்விஹிதகம்மந்தா, ஸங்க³ஹிதபரிஜ்ஜனா;

ப⁴த்து மனாபம் சரதி, ஸம்ப⁴தம் அனுரக்க²தி.

‘‘ஸத்³தா⁴ ஸீலேன ஸம்பன்னா, வத³ஞ்ஞூ வீதமச்ச²ரா;

நிச்சம் மக்³க³ம் விஸோதே⁴தி, ஸோத்தா²னம் ஸம்பராயிகம்.

‘‘இச்சேதே அட்ட² த⁴ம்மா ச, யஸ்ஸா விஜ்ஜந்தி நாரியா;

தம்பி ஸீலவதிம் ஆஹு, த⁴ம்மட்ட²ம் ஸச்சவாதி³னிம்.

‘‘ஸோளஸாகாரஸம்பன்னா, அட்ட²ங்க³ஸுஸமாக³தா;

தாதி³ஸீ ஸீலவதீ உபாஸிகா, உபபஜ்ஜதி தே³வலோகம் மனாப’’ந்தி. த³ஸமம்;

உபோஸத²வக்³கோ³ பஞ்சமோ.