1. பட²மஉக்³க³ஸுத்தம்

21. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தத்ர கோ² ப⁴க³வா பி⁴க்கூ² ஆமந்தேஸி ‘‘அட்ட²ஹி, பி⁴க்க²வே, அச்ச²ரியேஹி அப்³பு⁴தேஹி த⁴ம்மேஹி [அப்³பு⁴தத⁴ம்மேஹி (ஸ்யா. க.)] ஸமன்னாக³தம் உக்³க³ம் க³ஹபதிம் வேஸாலிகம் தா⁴ரேதா²’’தி. இத³மவோச ப⁴க³வா. இத³ம் வத்வான ஸுக³தோ உட்டா²யாஸனா விஹாரம் பாவிஸி.

அத² கோ² அஞ்ஞதரோ பி⁴க்கு² புப்³ப³ண்ஹஸமயம் நிவாஸேத்வா பத்தசீவரமாதா³ய யேன உக்³க³ஸ்ஸ க³ஹபதினோ வேஸாலிகஸ்ஸ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² உக்³கோ³ க³ஹபதி வேஸாலிகோ யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² உக்³க³ம் க³ஹபதிம் வேஸாலிகம் ஸோ பி⁴க்கு² ஏதத³வோச –

‘‘அட்ட²ஹி கோ² த்வம், க³ஹபதி, அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ. கதமே தே, க³ஹபதி, அட்ட² அச்ச²ரியா அப்³பு⁴தா த⁴ம்மா, யேஹி த்வம் ஸமன்னாக³தோ ப⁴க³வதா ப்³யாகதோ’’தி? ‘‘ந கோ² அஹம், ப⁴ந்தே, ஜானாமி – கதமேஹி அட்ட²ஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோதி. அபி ச, ப⁴ந்தே, யே மே அட்ட² அச்ச²ரியா அப்³பு⁴தா த⁴ம்மா ஸம்விஜ்ஜந்தி, தம் ஸுணோஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், க³ஹபதீ’’தி கோ² ஸோ பி⁴க்கு² உக்³க³ஸ்ஸ க³ஹபதினோ வேஸாலிகஸ்ஸ பச்சஸ்ஸோஸி. உக்³கோ³ க³ஹபதி வேஸாலிகோ ஏதத³வோச – ‘‘யதா³ஹம், ப⁴ந்தே, ப⁴க³வந்தம் பட²மம் தூ³ரதோவ அத்³த³ஸம்; ஸஹ த³ஸ்ஸனேனேவ மே, ப⁴ந்தே, ப⁴க³வதோ சித்தம் பஸீதி³. அயம் கோ² மே, ப⁴ந்தே, பட²மோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி’’.

‘‘ஸோ கோ² அஹம், ப⁴ந்தே, பஸன்னசித்தோ ப⁴க³வந்தம் பயிருபாஸிம். தஸ்ஸ மே ப⁴க³வா அனுபுப்³பி³ம் கத²ம் கதே²ஸி, ஸேய்யதி²த³ம் – தா³னகத²ம் ஸீலகத²ம் ஸக்³க³கத²ம்; காமானம் ஆதீ³னவம் ஓகாரம் ஸம்கிலேஸம், நேக்க²ம்மே ஆனிஸம்ஸம் பகாஸேஸி. யதா³ மம் ப⁴க³வா அஞ்ஞாஸி கல்லசித்தம் முது³சித்தம் வினீவரணசித்தம் உத³க்³க³சித்தம் பஸன்னசித்தம், அத² யா பு³த்³தா⁴னம் ஸாமுக்கம்ஸிகா த⁴ம்மதே³ஸனா தம் பகாஸேஸி – து³க்க²ம், ஸமுத³யம், நிரோத⁴ம், மக்³க³ம். ஸேய்யதா²பி நாம ஸுத்³த⁴ம் வத்த²ம் அபக³தகாளகம் ஸம்மதே³வ ரஜனம் படிக்³க³ண்ஹேய்ய; ஏவமேவம் கோ² மே தஸ்மிம்யேவ ஆஸனே விரஜம் வீதமலம் த⁴ம்மசக்கு²ம் உத³பாதி³ – ‘யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’ந்தி. ஸோ கோ² அஹம், ப⁴ந்தே, தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ம்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே தத்தே²வ பு³த்³த⁴ஞ்ச த⁴ம்மஞ்ச ஸங்க⁴ஞ்ச ஸரணம் அக³மாஸிம், ப்³ரஹ்மசரியபஞ்சமானி ச ஸிக்கா²பதா³னி ஸமாதி³யிம். அயம் கோ² மே, ப⁴ந்தே, து³தியோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘தஸ்ஸ மய்ஹம், ப⁴ந்தே, சதஸ்ஸோ கோமாரியோ பஜாபதியோ அஹேஸும். அத² க்²வாஹம், ப⁴ந்தே, யேன தா பஜாபதியோ தேனுபஸங்கமிம்; உபஸங்கமித்வா தா பஜாபதியோ ஏதத³வசம் – ‘மயா கோ², ப⁴கி³னியோ, ப்³ரஹ்மசரியபஞ்சமானி ஸிக்கா²பதா³னி ஸமாதி³ன்னானி [ஸமாதி³ண்ணானி (ஸீ. க.)]. யா இச்ச²தி ஸா இதே⁴வ போ⁴கே³ ச பு⁴ஞ்ஜது புஞ்ஞானி ச கரோது, ஸகானி வா ஞாதிகுலானி க³ச்ச²து. ஹோதி வா பன புரிஸாதி⁴ப்பாயோ, கஸ்ஸ வோ த³ம்மீ’தி? ஏவம் வுத்தே ஸா, ப⁴ந்தே, ஜேட்டா² பஜாபதி மம் ஏதத³வோச – ‘இத்த²ன்னாமஸ்ஸ மம், அய்யபுத்த, புரிஸஸ்ஸ தே³ஹீ’தி. அத² கோ² அஹம், ப⁴ந்தே, தம் புரிஸம் பக்கோஸாபேத்வா வாமேன ஹத்தே²ன பஜாபதிம் க³ஹேத்வா த³க்கி²ணேன ஹத்தே²ன பி⁴ங்கா³ரம் க³ஹேத்வா தஸ்ஸ புரிஸஸ்ஸ ஓணோஜேஸிம். கோமாரிம் கோ² பனாஹம், ப⁴ந்தே, தா³ரம் பரிச்சஜந்தோ நாபி⁴ஜானாமி சித்தஸ்ஸ அஞ்ஞத²த்தம். அயம் கோ² மே, ப⁴ந்தே, ததியோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘ஸம்விஜ்ஜந்தி கோ² பன மே, ப⁴ந்தே, குலே போ⁴கா³. தே ச கோ² அப்படிவிப⁴த்தா ஸீலவந்தேஹி கல்யாணத⁴ம்மேஹி. அயம் கோ² மே, ப⁴ந்தே, சதுத்தோ² அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘யம் கோ² பனாஹம், ப⁴ந்தே, பி⁴க்கு²ம் பயிருபாஸாமி; ஸக்கச்சம்யேவ பயிருபாஸாமி, நோ அஸக்கச்சம். அயம் கோ² மே, ப⁴ந்தே, பஞ்சமோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘ஸோ சே, ப⁴ந்தே, மே ஆயஸ்மா த⁴ம்மம் தே³ஸேதி; ஸக்கச்சம்யேவ ஸுணோமி, நோ அஸக்கச்சம். நோ சே மே ஸோ ஆயஸ்மா த⁴ம்மம் தே³ஸேதி, அஹமஸ்ஸ த⁴ம்மம் தே³ஸேமி. அயம் கோ² மே, ப⁴ந்தே ச²ட்டோ² அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘அனச்ச²ரியம் கோ² பன மம், ப⁴ந்தே, தே³வதா உபஸங்கமித்வா ஆரோசேந்தி – ‘ஸ்வாக்கா²தோ, க³ஹபதி, ப⁴க³வதா த⁴ம்மோ’தி. ஏவம் வுத்தே அஹம், ப⁴ந்தே, தா தே³வதா ஏவம் வதா³மி – ‘வதே³ய்யாத² வா ஏவம் கோ² தும்ஹே தே³வதா நோ வா வதே³ய்யாத², அத² கோ² ஸ்வாக்கா²தோ ப⁴க³வதா த⁴ம்மோ’தி. ந கோ² பனாஹம், ப⁴ந்தே, அபி⁴ஜானாமி ததோனிதா³னம் சித்தஸ்ஸ உன்னதிம் [உண்ணதிம் (க.) த⁴. ஸ. 1121; விப⁴. 843, 845 பஸ்ஸிதப்³ப³ம்] – ‘மம் வா தே³வதா உபஸங்கமந்தி, அஹம் வா தே³வதாஹி ஸத்³தி⁴ம் ஸல்லபாமீ’தி. அயம் கோ² மே, ப⁴ந்தே, ஸத்தமோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி.

‘‘யானிமானி, ப⁴ந்தே, ப⁴க³வதா தே³ஸிதானி பஞ்சோரம்பா⁴கி³யானி ஸம்யோஜனானி, நாஹம் தேஸம் கிஞ்சி அத்தனி அப்பஹீனம் ஸமனுபஸ்ஸாமி. அயம் கோ² மே, ப⁴ந்தே, அட்ட²மோ அச்ச²ரியோ அப்³பு⁴தோ த⁴ம்மோ ஸம்விஜ்ஜதி. இமே கோ² மே, ப⁴ந்தே, அட்ட² அச்ச²ரியா அப்³பு⁴தா த⁴ம்மா ஸம்விஜ்ஜந்தி. ந ச கோ² அஹம் ஜானாமி – கதமேஹி சாஹம் [கதமேஹிபஹம் (ஸீ.), கதமேஹிபாஹம் (பீ. க.)] அட்ட²ஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ’’தி.

அத² கோ² ஸோ பி⁴க்கு² உக்³க³ஸ்ஸ க³ஹபதினோ வேஸாலிகஸ்ஸ நிவேஸனே பிண்ட³பாதம் க³ஹேத்வா உட்டா²யாஸனா பக்காமி. அத² கோ² ஸோ பி⁴க்கு² பச்சா²ப⁴த்தம் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² யாவதகோ அஹோஸி உக்³கே³ன க³ஹபதினா வேஸாலிகேன ஸத்³தி⁴ம் கதா²ஸல்லாபோ, தம் ஸப்³ப³ம் ப⁴க³வதோ ஆரோசேஸி.

‘‘ஸாது⁴ ஸாது⁴, பி⁴க்கு²! யதா² தம் உக்³கோ³ க³ஹபதி வேஸாலிகோ ஸம்மா ப்³யாகரமானோ ப்³யாகரேய்ய, இமேஹேவ கோ², பி⁴க்கு², அட்ட²ஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ உக்³கோ³ க³ஹபதி வேஸாலிகோ மயா ப்³யாகதோ. இமேஹி ச பன, பி⁴க்கு², அட்ட²ஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தம் உக்³க³ம் க³ஹபதிம் வேஸாலிகம் தா⁴ரேஹீ’’தி. பட²மம்.