7. தே³வத³த்தவிபத்திஸுத்தம்

7. ஏகம் ஸமயம் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே அசிரபக்கந்தே தே³வத³த்தே. தத்ர ப⁴க³வா தே³வத³த்தம் ஆரப்³ப⁴ பி⁴க்கூ² ஆமந்தேஸி – ‘‘ஸாது⁴, பி⁴க்க²வே, பி⁴க்கு² காலேன காலம் அத்தவிபத்திம் பச்சவேக்கி²தா ஹோதி. ஸாது⁴, பி⁴க்க²வே, பி⁴க்கு² காலேன காலம் பரவிபத்திம் பச்சவேக்கி²தா ஹோதி. ஸாது⁴, பி⁴க்க²வே, பி⁴க்கு² காலேன காலம் அத்தஸம்பத்திம் பச்சவேக்கி²தா ஹோதி. ஸாது⁴, பி⁴க்க²வே, பி⁴க்கு² காலேன காலம் பரஸம்பத்திம் பச்சவேக்கி²தா ஹோதி. அட்ட²ஹி, பி⁴க்க²வே, அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ²’’.

[சூளவ. 348] ‘‘கதமேஹி அட்ட²ஹி? லாபே⁴ன ஹி, பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². அலாபே⁴ன, பி⁴க்க²வே…பே… யஸேன, பி⁴க்க²வே… அயஸேன, பி⁴க்க²வே… ஸக்காரேன, பி⁴க்க²வே… அஸக்காரேன, பி⁴க்க²வே… பாபிச்ச²தாய, பி⁴க்க²வே… பாபமித்ததாய, பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². இமேஹி கோ², பி⁴க்க²வே, அட்ட²ஹி அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ².

‘‘ஸாது⁴, பி⁴க்க²வே, பி⁴க்கு² உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம் … உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய.

‘‘கிஞ்ச [கத²ஞ்ச (க.)], பி⁴க்க²வே, பி⁴க்கு² அத்த²வஸம் படிச்ச உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய?

‘‘யம் ஹிஸ்ஸ, பி⁴க்க²வே, உப்பன்னம் லாப⁴ம் அனபி⁴பு⁴ய்ய [அனபி⁴பூ⁴ய்ய அனபி⁴பூ⁴ய்ய (க.)] விஹரதோ உப்பஜ்ஜேய்யும் ஆஸவா விகா⁴தபரிளாஹா, உப்பன்னம் லாப⁴ம் அபி⁴பு⁴ய்ய [அபி⁴பூ⁴ய்ய அபி⁴பூ⁴ய்ய (க.)] விஹரதோ ஏவம்ஸ தே ஆஸவா விகா⁴தபரிளாஹா ந ஹோந்தி. யம் ஹிஸ்ஸ, பி⁴க்க²வே, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அனபி⁴பு⁴ய்ய விஹரதோ உப்பஜ்ஜேய்யும் ஆஸவா விகா⁴தபரிளாஹா, உப்பன்னம் பாபமித்ததம் அபி⁴பு⁴ய்ய விஹரதோ ஏவம்ஸ தே ஆஸவா விகா⁴தபரிளாஹா ந ஹோந்தி. இத³ம் கோ², பி⁴க்க²வே, பி⁴க்கு² அத்த²வஸம் படிச்ச உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரேய்ய, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம் … உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரேய்ய.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘உப்பன்னம் லாப⁴ம் அபி⁴பு⁴ய்ய அபி⁴பு⁴ய்ய விஹரிஸ்ஸாம, உப்பன்னம் அலாப⁴ம்…பே… உப்பன்னம் யஸம்… உப்பன்னம் அயஸம்… உப்பன்னம் ஸக்காரம்… உப்பன்னம் அஸக்காரம்… உப்பன்னம் பாபிச்ச²தம்… உப்பன்னம் பாபமித்ததம் அபி⁴பு⁴ய்ய அபி⁴பு⁴ய்ய விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ஸத்தமம்.