4. து³தியஸத்தகஸுத்தம்

24. [தீ³. நி. 2.138] ‘‘ஸத்த வோ, பி⁴க்க²வே, அபரிஹானியே த⁴ம்மே தே³ஸேஸ்ஸாமி. தம் ஸுணாத², ஸாது⁴கம் மனஸி கரோத²…பே… கதமே ச, பி⁴க்க²வே, ஸத்த அபரிஹானியா த⁴ம்மா?

யாவகீவஞ்ச, பி⁴க்க²வே, பி⁴க்கூ² ந கம்மாராமா ப⁴விஸ்ஸந்தி, ந கம்மரதா, ந கம்மாராமதம் அனுயுத்தா; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² ந ப⁴ஸ்ஸாராமா ப⁴விஸ்ஸந்தி…பே… ந நித்³தா³ராமா ப⁴விஸ்ஸந்தி… ந ஸங்க³ணிகாராமா ப⁴விஸ்ஸந்தி… ந பாபிச்சா² ப⁴விஸ்ஸந்தி ந பாபிகானம் இச்சா²னம் வஸம் க³தா… ந பாபமித்தா ப⁴விஸ்ஸந்தி ந பாபஸஹாயா ந பாபஸம்பவங்கா… ந ஓரமத்தகேன விஸேஸாதி⁴க³மேன அந்தராவோஸானம் ஆபஜ்ஜிஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, இமே ஸத்த அபரிஹானியா த⁴ம்மா பி⁴க்கூ²ஸு ட²ஸ்ஸந்தி, இமேஸு ச ஸத்தஸு அபரிஹானியேஸு த⁴ம்மேஸு பி⁴க்கூ² ஸந்தி³ஸ்ஸிஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானீ’’தி. சதுத்த²ம்.