3. பட²மஸத்தகஸுத்தம்

23. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. தத்ர கோ² ப⁴க³வா பி⁴க்கூ² ஆமந்தேஸி – ‘‘ஸத்த வோ, பி⁴க்க²வே, அபரிஹானியே த⁴ம்மே தே³ஸேஸ்ஸாமி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமே ச, பி⁴க்க²வே, ஸத்த அபரிஹானியா த⁴ம்மா? யாவகீவஞ்ச, பி⁴க்க²வே, பி⁴க்கூ² அபி⁴ண்ஹம் ஸன்னிபாதா ப⁴விஸ்ஸந்தி ஸன்னிபாதப³ஹுலா; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² ஸமக்³கா³ ஸன்னிபதிஸ்ஸந்தி, ஸமக்³கா³ வுட்ட²ஹிஸ்ஸந்தி, ஸமக்³கா³ ஸங்க⁴கரணீயானி கரிஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² அபஞ்ஞத்தம் ந பஞ்ஞாபேஸ்ஸந்தி, பஞ்ஞத்தம் ந ஸமுச்சி²ந்தி³ஸ்ஸந்தி, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்திஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ஸக்கரிஸ்ஸந்தி க³ரும் கரிஸ்ஸந்தி மானேஸ்ஸந்தி பூஜேஸ்ஸந்தி, தேஸஞ்ச ஸோதப்³ப³ம் மஞ்ஞிஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² உப்பன்னாய தண்ஹாய போனோப⁴விகாய ந வஸம் க³ச்சி²ஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² ஆரஞ்ஞகேஸு ஸேனாஸனேஸு ஸாபேக்கா² ப⁴விஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, பி⁴க்கூ² பச்சத்தஞ்ஞேவ ஸதிம் உபட்டா²பேஸ்ஸந்தி – ‘கிந்தி அனாக³தா ச பேஸலா ஸப்³ரஹ்மசாரீ ஆக³ச்சே²ய்யும், ஆக³தா ச பேஸலா ஸப்³ரஹ்மசாரீ பா²ஸும் விஹரேய்யு’ந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானி.

‘‘யாவகீவஞ்ச, பி⁴க்க²வே, இமே ஸத்த அபரிஹானியா த⁴ம்மா பி⁴க்கூ²ஸு ட²ஸ்ஸந்தி, இமேஸு ச ஸத்தஸு அபரிஹானியேஸு த⁴ம்மேஸு பி⁴க்கூ² ஸந்தி³ஸ்ஸிஸ்ஸந்தி; வுத்³தி⁴யேவ, பி⁴க்க²வே, பி⁴க்கூ²னம் பாடிகங்கா², நோ பரிஹானீ’’தி. ததியம்.