5. உத³கூபமாஸுத்தம்

15. ‘‘ஸத்திமே, பி⁴க்க²வே, உத³கூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே ஸத்த? [பு. ப. 203; கதா². 852] இத⁴, பி⁴க்க²வே, ஏகச்சோ புக்³க³லோ ஸகிம் நிமுக்³கோ³ நிமுக்³கோ³வ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா நிமுஜ்ஜதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா டி²தோ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா விபஸ்ஸதி விலோகேதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா பதரதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா பதிகா³த⁴ப்பத்தோ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா திண்ணோ ஹோதி பாரங்க³தோ [பாரக³தோ (ஸீ. ஸ்யா. கம்.)] த²லே திட்ட²தி ப்³ராஹ்மணோ.

‘‘கத²ஞ்ச, பி⁴க்க²வே, புக்³க³லோ ஸகிம் நிமுக்³கோ³ நிமுக்³கோ³வ ஹோதி? இத⁴ பி⁴க்க²வே, ஏகச்சோ புக்³க³லோ ஸமன்னாக³தோ ஹோதி ஏகந்தகாளகேஹி அகுஸலேஹி த⁴ம்மேஹி. ஏவம் கோ², பி⁴க்க²வே, புக்³க³லோ ஸகிம் நிமுக்³கோ³ நிமுக்³கோ³வ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா நிமுஜ்ஜதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம் [விரியம் (ஸீ. ஸ்யா. கம். பீ.)] … ஸாது⁴ பஞ்ஞா குஸலேஸு த⁴ம்மேஸூதி. தஸ்ஸ ஸா ஸத்³தா⁴ நேவ திட்ட²தி நோ வட்³ட⁴தி ஹாயதியேவ, தஸ்ஸ ஸா ஹிரீ…பே… தஸ்ஸ தம் ஓத்தப்பம்… தஸ்ஸ தம் வீரியம்… தஸ்ஸ ஸா பஞ்ஞா நேவ திட்ட²தி நோ வட்³ட⁴தி ஹாயதியேவ. ஏவம் கோ², பி⁴க்க²வே, புக்³க³லோ உம்முஜ்ஜித்வா நிமுஜ்ஜதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா டி²தோ ஹோதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. தஸ்ஸ ஸா ஸத்³தா⁴ நேவ ஹாயதி நோ வட்³ட⁴தி டி²தா ஹோதி. தஸ்ஸ ஸா ஹிரீ…பே… தஸ்ஸ தம் ஓத்தப்பம்… தஸ்ஸ தம் வீரியம்… தஸ்ஸ ஸா பஞ்ஞா நேவ ஹாயதி நோ வட்³ட⁴தி டி²தா ஹோதி. ஏவம் கோ², பி⁴க்க²வே, புக்³க³லோ உம்முஜ்ஜித்வா டி²தோ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா விபஸ்ஸதி விலோகேதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. ஏவம் கோ², பி⁴க்க²வே, புக்³க³லோ உம்முஜ்ஜித்வா விபஸ்ஸதி விலோகேதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா பதரதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மீ ஹோதி, ஸகிதே³வ [ஸகிம்தே³வ (க.)] இமம் லோகம் ஆக³ந்த்வா து³க்க²ஸ்ஸந்தம் கரோதி [து³க்க²ஸ்ஸந்தகரோ ஹோதி (க.)]. ஏவம் கோ², பி⁴க்க²வே, புக்³க³லோ உம்முஜ்ஜித்வா பதரதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா பதிகா³த⁴ப்பத்தோ ஹோதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. ஏவம் கோ², பி⁴க்க²வே, புக்³க³லோ உம்முஜ்ஜித்வா பதிகா³த⁴ப்பத்தோ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா திண்ணோ ஹோதி பாரங்க³தோ த²லே திட்ட²தி ப்³ராஹ்மணோ. இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, புக்³க³லோ உம்முஜ்ஜித்வா திண்ணோ ஹோதி பாரங்க³தோ த²லே திட்ட²தி ப்³ராஹ்மணோ.

‘‘இமே கோ², பி⁴க்க²வே, ஸத்த உத³கூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.