2. அனுஸயவக்³கோ³

1. பட²மஅனுஸயஸுத்தம்

11. ‘‘ஸத்திமே, பி⁴க்க²வே, அனுஸயா. கதமே ஸத்த? காமராகா³னுஸயோ, படிகா⁴னுஸயோ, தி³ட்டா²னுஸயோ, விசிகிச்சா²னுஸயோ, மானானுஸயோ, ப⁴வராகா³னுஸயோ, அவிஜ்ஜானுஸயோ. இமே கோ², பி⁴க்க²வே, ஸத்த அனுஸயா’’தி. பட²மம்.

2. து³தியஅனுஸயஸுத்தம்

12. ‘‘ஸத்தன்னம், பி⁴க்க²வே, அனுஸயானம் பஹானாய ஸமுச்சே²தா³ய ப்³ரஹ்மசரியம் வுஸ்ஸதி. கதமேஸம் ஸத்தன்னம்? காமராகா³னுஸயஸ்ஸ பஹானாய ஸமுச்சே²தா³ய ப்³ரஹ்மசரியம் வுஸ்ஸதி, படிகா⁴னுஸயஸ்ஸ…பே… தி³ட்டா²னுஸயஸ்ஸ… விசிகிச்சா²னுஸயஸ்ஸ… மானானுஸயஸ்ஸ… ப⁴வராகா³னுஸயஸ்ஸ… அவிஜ்ஜானுஸயஸ்ஸ பஹானாய ஸமுச்சே²தா³ய ப்³ரஹ்மசரியம் வுஸ்ஸதி. இமேஸம் கோ², பி⁴க்க²வே, ஸத்தன்னம் அனுஸயானம் பஹானாய ஸமுச்சே²தா³ய ப்³ரஹ்மசரியம் வுஸ்ஸதி.

‘‘யதோ ச கோ², பி⁴க்க²வே, பி⁴க்கு²னோ காமராகா³னுஸயோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. படிகா⁴னுஸயோ…பே… தி³ட்டா²னுஸயோ… விசிகிச்சா²னுஸயோ… மானானுஸயோ… ப⁴வராகா³னுஸயோ… அவிஜ்ஜானுஸயோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. அயம் வுச்சதி, பி⁴க்க²வே, பி⁴க்கு² அச்சே²ச்சி² தண்ஹம், விவத்தயி ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’’தி. து³தியம்.

3. குலஸுத்தம்

13. ‘‘ஸத்தஹி, பி⁴க்க²வே, அங்கே³ஹி ஸமன்னாக³தம் குலம் அனுபக³ந்த்வா வா நாலம் உபக³ந்தும், உபக³ந்த்வா வா நாலம் உபனிஸீதி³தும். கதமேஹி ஸத்தஹி? ந மனாபேன பச்சுட்டே²ந்தி, ந மனாபேன அபி⁴வாதே³ந்தி, ந மனாபேன ஆஸனம் தே³ந்தி, ஸந்தமஸ்ஸ பரிகு³ஹந்தி, ப³ஹுகம்பி தோ²கம் தே³ந்தி, பணீதம்பி லூக²ம் தே³ந்தி, அஸக்கச்சம் தே³ந்தி நோ ஸக்கச்சம். இமேஹி கோ², பி⁴க்க²வே, ஸத்தஹி அங்கே³ஹி ஸமன்னாக³தம் குலம் அனுபக³ந்த்வா வா நாலம் உபக³ந்தும், உபக³ந்த்வா வா நாலம் உபனிஸீதி³தும்.

‘‘ஸத்தஹி, பி⁴க்க²வே, அங்கே³ஹி ஸமன்னாக³தம் குலம் அனுபக³ந்த்வா வா அலம் உபக³ந்தும், உபக³ந்த்வா வா அலம் உபனிஸீதி³தும். கதமேஹி ஸத்தஹி? மனாபேன பச்சுட்டே²ந்தி, மனாபேன அபி⁴வாதே³ந்தி, மனாபேன ஆஸனம் தே³ந்தி, ஸந்தமஸ்ஸ ந பரிகு³ஹந்தி, ப³ஹுகம்பி ப³ஹுகம் தே³ந்தி, பணீதம்பி பணீதம் தே³ந்தி, ஸக்கச்சம் தே³ந்தி நோ அஸக்கச்சம். இமேஹி கோ², பி⁴க்க²வே, ஸத்தஹி அங்கே³ஹி ஸமன்னாக³தம் குலம் அனுபக³ந்த்வா வா அலம் உபக³ந்தும், உபக³ந்த்வா வா அலம் உபனிஸீதி³து’’ந்தி. ததியம்.

4. புக்³க³லஸுத்தம்

14. ‘‘ஸத்திமே, பி⁴க்க²வே, புக்³க³லா ஆஹுனேய்யா பாஹுனேய்யா த³க்கி²ணேய்யா அஞ்ஜலிகரணீயா அனுத்தரம் புஞ்ஞக்கே²த்தம் லோகஸ்ஸ. கதமே ஸத்த? உப⁴தோபா⁴க³விமுத்தோ, பஞ்ஞாவிமுத்தோ, காயஸக்கீ², தி³ட்டி²ப்பத்தோ [தி³ட்ட²ப்பத்தோ (க.)], ஸத்³தா⁴விமுத்தோ, த⁴ம்மானுஸாரீ, ஸத்³தா⁴னுஸாரீ. இமே கோ², பி⁴க்க²வே, ஸத்த புக்³க³லா ஆஹுனேய்யா பாஹுனேய்யா த³க்கி²ணேய்யா அஞ்ஜலிகரணீயா அனுத்தரம் புஞ்ஞக்கே²த்தம் லோகஸ்ஸா’’தி. சதுத்த²ம்.

5. உத³கூபமாஸுத்தம்

15. ‘‘ஸத்திமே, பி⁴க்க²வே, உத³கூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே ஸத்த? [பு. ப. 203; கதா². 852] இத⁴, பி⁴க்க²வே, ஏகச்சோ புக்³க³லோ ஸகிம் நிமுக்³கோ³ நிமுக்³கோ³வ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா நிமுஜ்ஜதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா டி²தோ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா விபஸ்ஸதி விலோகேதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா பதரதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா பதிகா³த⁴ப்பத்தோ ஹோதி; இத⁴ பன, பி⁴க்க²வே, ஏகச்சோ புக்³க³லோ உம்முஜ்ஜித்வா திண்ணோ ஹோதி பாரங்க³தோ [பாரக³தோ (ஸீ. ஸ்யா. கம்.)] த²லே திட்ட²தி ப்³ராஹ்மணோ.

‘‘கத²ஞ்ச, பி⁴க்க²வே, புக்³க³லோ ஸகிம் நிமுக்³கோ³ நிமுக்³கோ³வ ஹோதி? இத⁴ பி⁴க்க²வே, ஏகச்சோ புக்³க³லோ ஸமன்னாக³தோ ஹோதி ஏகந்தகாளகேஹி அகுஸலேஹி த⁴ம்மேஹி. ஏவம் கோ², பி⁴க்க²வே, புக்³க³லோ ஸகிம் நிமுக்³கோ³ நிமுக்³கோ³வ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா நிமுஜ்ஜதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம் [விரியம் (ஸீ. ஸ்யா. கம். பீ.)] … ஸாது⁴ பஞ்ஞா குஸலேஸு த⁴ம்மேஸூதி. தஸ்ஸ ஸா ஸத்³தா⁴ நேவ திட்ட²தி நோ வட்³ட⁴தி ஹாயதியேவ, தஸ்ஸ ஸா ஹிரீ…பே… தஸ்ஸ தம் ஓத்தப்பம்… தஸ்ஸ தம் வீரியம்… தஸ்ஸ ஸா பஞ்ஞா நேவ திட்ட²தி நோ வட்³ட⁴தி ஹாயதியேவ. ஏவம் கோ², பி⁴க்க²வே, புக்³க³லோ உம்முஜ்ஜித்வா நிமுஜ்ஜதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா டி²தோ ஹோதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. தஸ்ஸ ஸா ஸத்³தா⁴ நேவ ஹாயதி நோ வட்³ட⁴தி டி²தா ஹோதி. தஸ்ஸ ஸா ஹிரீ…பே… தஸ்ஸ தம் ஓத்தப்பம்… தஸ்ஸ தம் வீரியம்… தஸ்ஸ ஸா பஞ்ஞா நேவ ஹாயதி நோ வட்³ட⁴தி டி²தா ஹோதி. ஏவம் கோ², பி⁴க்க²வே, புக்³க³லோ உம்முஜ்ஜித்வா டி²தோ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா விபஸ்ஸதி விலோகேதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. ஏவம் கோ², பி⁴க்க²வே, புக்³க³லோ உம்முஜ்ஜித்வா விபஸ்ஸதி விலோகேதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா பதரதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மீ ஹோதி, ஸகிதே³வ [ஸகிம்தே³வ (க.)] இமம் லோகம் ஆக³ந்த்வா து³க்க²ஸ்ஸந்தம் கரோதி [து³க்க²ஸ்ஸந்தகரோ ஹோதி (க.)]. ஏவம் கோ², பி⁴க்க²வே, புக்³க³லோ உம்முஜ்ஜித்வா பதரதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா பதிகா³த⁴ப்பத்தோ ஹோதி? இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. ஏவம் கோ², பி⁴க்க²வே, புக்³க³லோ உம்முஜ்ஜித்வா பதிகா³த⁴ப்பத்தோ ஹோதி.

‘‘கத²ஞ்ச, பி⁴க்க²வே, புக்³க³லோ உம்முஜ்ஜித்வா திண்ணோ ஹோதி பாரங்க³தோ த²லே திட்ட²தி ப்³ராஹ்மணோ. இத⁴, பி⁴க்க²வே, ஏகச்சோ புக்³க³லோ உம்முஜ்ஜதி ஸாது⁴ ஸத்³தா⁴ குஸலேஸு த⁴ம்மேஸு, ஸாது⁴ ஹிரீ…பே… ஸாது⁴ ஓத்தப்பம்… ஸாது⁴ வீரியம்… ஸாது⁴ பஞ்ஞா குஸலேஸு த⁴ம்மேஸூதி. ஸோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, புக்³க³லோ உம்முஜ்ஜித்வா திண்ணோ ஹோதி பாரங்க³தோ த²லே திட்ட²தி ப்³ராஹ்மணோ.

‘‘இமே கோ², பி⁴க்க²வே, ஸத்த உத³கூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.

6. அனிச்சானுபஸ்ஸீஸுத்தம்

16. ‘‘ஸத்திமே, பி⁴க்க²வே, புக்³க³லா ஆஹுனேய்யா பாஹுனேய்யா த³க்கி²ணேய்யா அஞ்ஜலிகரணீயா அனுத்தரம் புஞ்ஞக்கே²த்தம் லோகஸ்ஸ. கதமே ஸத்த? இத⁴, பி⁴க்க²வே, ஏகச்சோ புக்³க³லோ ஸப்³ப³ஸங்கா²ரேஸு அனிச்சானுபஸ்ஸீ விஹரதி, அனிச்சஸஞ்ஞீ, அனிச்சபடிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. ஸோ ஆஸவானம் க²யா…பே… ஸச்சி²கத்வா உபஸம்பஜ்ஜ விஹரதி. அயம், பி⁴க்க²வே, பட²மோ புக்³க³லோ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ.

‘‘புன சபரம், பி⁴க்க²வே, இதே⁴கச்சோ புக்³க³லோ ஸப்³ப³ஸங்கா²ரேஸு அனிச்சானுபஸ்ஸீ விஹரதி, அனிச்சஸஞ்ஞீ, அனிச்சபடிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. தஸ்ஸ அபுப்³ப³ம் அசரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச. அயம், பி⁴க்க²வே, து³தியோ புக்³க³லோ ஆஹுனேய்யோ…பே… அனுத்தரம் புஞ்ஞக்கே²த்தம் லோகஸ்ஸ.

‘‘புன சபரம், பி⁴க்க²வே, இதே⁴கச்சோ புக்³க³லோ ஸப்³ப³ஸங்கா²ரேஸு அனிச்சானுபஸ்ஸீ விஹரதி, அனிச்சஸஞ்ஞீ, அனிச்சபடிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. ஸோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா அந்தராபரினிப்³பா³யீ ஹோதி…பே… உபஹச்சபரினிப்³பா³யீ ஹோதி…பே… அஸங்கா²ரபரினிப்³பா³யீ ஹோதி…பே… ஸஸங்கா²ரபரினிப்³பா³யீ ஹோதி…பே… உத்³த⁴ம்ஸோதோ ஹோதி அகனிட்ட²கா³மீ. அயம், பி⁴க்க²வே, ஸத்தமோ புக்³க³லோ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ. இமே கோ², பி⁴க்க²வே, ஸத்த புக்³க³லா ஆஹுனேய்யா பாஹுனேய்யா த³க்கி²ணேய்யா அஞ்ஜலிகரணீயா அனுத்தரம் புஞ்ஞக்கே²த்தம் லோகஸ்ஸா’’தி. ச²ட்ட²ம்.

7. து³க்கா²னுபஸ்ஸீஸுத்தம்

17. ஸத்திமே, பி⁴க்க²வே, புக்³க³லா ஆஹுனேய்யா…பே… அனுத்தரம் புஞ்ஞக்கே²த்தம் லோகஸ்ஸ. கதமே ஸத்த? இத⁴, பி⁴க்க²வே, ஏகச்சோ புக்³க³லோ ஸப்³ப³ஸங்கா²ரேஸு து³க்கா²னுபஸ்ஸீ விஹரதி…பே…. ஸத்தமம்.

8. அனத்தானுபஸ்ஸீஸுத்தம்

18. ஸப்³பே³ஸு த⁴ம்மேஸு அனத்தானுபஸ்ஸீ விஹரதி…பே…. அட்ட²மம்.

9. நிப்³பா³னஸுத்தம்

19. [கதா². 547-548] ‘‘நிப்³பா³னே ஸுகா²னுபஸ்ஸீ விஹரதி ஸுக²ஸஞ்ஞீ ஸுக²படிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. ஸோ ஆஸவானம் க²யா…பே… ஸச்சி²கத்வா உபஸம்பஜ்ஜ விஹரதி. அயம் பி⁴க்க²வே, பட²மோ புக்³க³லோ ஆஹுனேய்யோ…பே… புஞ்ஞக்கே²த்தம் லோகஸ்ஸ.

‘‘புன சபரம், பி⁴க்க²வே, இதே⁴கச்சோ புக்³க³லோ நிப்³பா³னே ஸுகா²னுபஸ்ஸீ விஹரதி ஸுக²ஸஞ்ஞீ ஸுக²படிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. தஸ்ஸ அபுப்³ப³ம் அசரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச. அயம், பி⁴க்க²வே, து³தியோ புக்³க³லோ ஆஹுனேய்யோ…பே… அனுத்தரம் புஞ்ஞக்கே²த்தம் லோகஸ்ஸ.

‘‘புன சபரம், பி⁴க்க²வே, இதே⁴கச்சோ புக்³க³லோ நிப்³பா³னே ஸுகா²னுபஸ்ஸீ விஹரதி ஸுக²ஸஞ்ஞீ ஸுக²படிஸம்வேதீ³ ஸததம் ஸமிதம் அப்³போ³கிண்ணம் சேதஸா அதி⁴முச்சமானோ பஞ்ஞாய பரியோகா³ஹமானோ. ஸோ பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா அந்தராபரினிப்³பா³யீ ஹோதி…பே… உபஹச்சபரினிப்³பா³யீ ஹோதி…பே… அஸங்கா²ரபரினிப்³பா³யீ ஹோதி…பே… ஸஸங்கா²ரபரினிப்³பா³யீ ஹோதி…பே… உத்³த⁴ம்ஸோதோ ஹோதி அகனிட்ட²கா³மீ. அயம், பி⁴க்க²வே, ஸத்தமோ புக்³க³லோ ஆஹுனேய்யோ…பே… அனுத்தரம் புஞ்ஞக்கே²த்தம் லோகஸ்ஸ. இமே கோ², பி⁴க்க²வே, ஸத்த புக்³க³லா ஆஹுனேய்யா…பே… அனுத்தரம் புஞ்ஞக்கே²த்தம் லோகஸ்ஸா’’தி. நவமம்.

10. நித்³த³ஸவத்து²ஸுத்தம்

20. ‘‘ஸத்திமானி, பி⁴க்க²வே, நித்³த³ஸவத்தூ²னி. கதமானி ஸத்த? இத⁴, பி⁴க்க²வே, பி⁴க்கு² ஸிக்கா²ஸமாதா³னே திப்³ப³ச்ச²ந்தோ³ ஹோதி ஆயதிஞ்ச ஸிக்கா²ஸமாதா³னே அவிக³தபேமோ [அதி⁴க³தபேமோ (ஸ்யா.) அ. நி. 7.42; தீ³. நி. 3.331], த⁴ம்மனிஸந்தியா திப்³ப³ச்ச²ந்தோ³ ஹோதி ஆயதிஞ்ச த⁴ம்மனிஸந்தியா அவிக³தபேமோ, இச்சா²வினயே திப்³ப³ச்ச²ந்தோ³ ஹோதி ஆயதிஞ்ச இச்சா²வினயே அவிக³தபேமோ, படிஸல்லானே திப்³ப³ச்ச²ந்தோ³ ஹோதி ஆயதிஞ்ச படிஸல்லானே அவிக³தபேமோ, வீரியாரம்பே⁴ [வீரியாரப்³பே⁴ (க.)] திப்³ப³ச்ச²ந்தோ³ ஹோதி ஆயதிஞ்ச வீரியாரம்பே⁴ அவிக³தபேமோ, ஸதினேபக்கே திப்³ப³ச்ச²ந்தோ³ ஹோதி ஆயதிஞ்ச ஸதினேபக்கே அவிக³தபேமோ, தி³ட்டி²படிவேதே⁴ திப்³ப³ச்ச²ந்தோ³ ஹோதி ஆயதிஞ்ச தி³ட்டி²படிவேதே⁴ அவிக³தபேமோ. இமானி கோ², பி⁴க்க²வே, ஸத்த நித்³த³ஸவத்தூ²னீ’’தி. த³ஸமம்.

அனுஸயவக்³கோ³ து³தியோ.