8. அரஹத்தவக்³கோ³

1. து³க்க²ஸுத்தம்

75. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம், காயஸ்ஸ பே⁴தா³ பரம் மரணா து³க்³க³தி பாடிகங்கா². கதமேஹி ச²ஹி? காமவிதக்கேன, ப்³யாபாத³விதக்கேன, விஹிம்ஸாவிதக்கேன, காமஸஞ்ஞாய, ப்³யாபாத³ஸஞ்ஞாய, விஹிம்ஸாஸஞ்ஞாய – இமேஹி, கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம், காயஸ்ஸ பே⁴தா³ பரம் மரணா து³க்³க³தி பாடிகங்கா².

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம், காயஸ்ஸ பே⁴தா³ பரம் மரணா ஸுக³தி பாடிகங்கா². கதமேஹி ச²ஹி? நேக்க²ம்மவிதக்கேன, அப்³யாபாத³விதக்கேன, அவிஹிம்ஸாவிதக்கேன, நேக்க²ம்மஸஞ்ஞாய, அப்³யாபாத³ஸஞ்ஞாய, அவிஹிம்ஸாஸஞ்ஞாய – இமேஹி, கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம், காயஸ்ஸ பே⁴தா³ பரம் மரணா ஸுக³தி பாடிகங்கா²’’தி. பட²மம்.

2. அரஹத்தஸுத்தம்

76. ‘‘ச², பி⁴க்க²வே, த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும். கதமே ச²? மானம், ஓமானம், அதிமானம், அதி⁴மானம், த²ம்ப⁴ம், அதினிபாதம். இமே கோ², பி⁴க்க²வே, ச² த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும்.

‘‘ச², பி⁴க்க²வே, த⁴ம்மே பஹாய ப⁴ப்³போ³ அரஹத்தம் ஸச்சி²காதும். கதமே ச²? மானம், ஓமானம், அதிமானம், அதி⁴மானம், த²ம்ப⁴ம், அதினிபாதம். இமே கோ², பி⁴க்க²வே, ச² த⁴ம்மே பஹாய ப⁴ப்³போ³ அரஹத்தம் ஸச்சி²காது’’ந்தி. து³தியம்.

3. உத்தரிமனுஸ்ஸத⁴ம்மஸுத்தம்

77. ‘‘ச², பி⁴க்க²வே, த⁴ம்மே அப்பஹாய அப⁴ப்³போ³ உத்தரிமனுஸ்ஸத⁴ம்மம் அலமரியஞாணத³ஸ்ஸனவிஸேஸம் ஸச்சி²காதும். கதமே ச²? முட்ட²ஸ்ஸச்சம், அஸம்பஜஞ்ஞம், இந்த்³ரியேஸு அகு³த்தத்³வாரதம், போ⁴ஜனே அமத்தஞ்ஞுதம், குஹனம், லபனம். இமே கோ², பி⁴க்க²வே, ச² த⁴ம்மே அப்பஹாய அப⁴ப்³போ³ உத்தரிமனுஸ்ஸத⁴ம்மம் அலமரியஞாணத³ஸ்ஸனவிஸேஸம் ஸச்சி²காதும்.

‘‘ச², பி⁴க்க²வே, த⁴ம்மே பஹாய ப⁴ப்³போ³ உத்தரிமனுஸ்ஸத⁴ம்மம் அலமரியஞாணத³ஸ்ஸனவிஸேஸம் ஸச்சி²காதும். கதமே ச²? முட்ட²ஸ்ஸச்சம், அஸம்பஜஞ்ஞம், இந்த்³ரியேஸு அகு³த்தத்³வாரதம், போ⁴ஜனே அமத்தஞ்ஞுதம், குஹனம், லபனம். இமே கோ², பி⁴க்க²வே, ச² த⁴ம்மே பஹாய ப⁴ப்³போ³ உத்தரிமனுஸ்ஸத⁴ம்மம் அலமரியஞாணத³ஸ்ஸனவிஸேஸம் ஸச்சி²காது’’ந்தி. ததியம்.

4. ஸுக²ஸோமனஸ்ஸஸுத்தம்

78. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ஸோமனஸ்ஸப³ஹுலோ விஹரதி, யோனி சஸ்ஸ ஆரத்³தா⁴ ஹோதி ஆஸவானம் க²யாய. கதமேஹி ச²ஹி? இத⁴, பி⁴க்க²வே, பி⁴க்கு² த⁴ம்மாராமோ ஹோதி, பா⁴வனாராமோ ஹோதி, பஹானாராமோ ஹோதி, பவிவேகாராமோ ஹோதி, அப்³யாபஜ்ஜா²ராமோ ஹோதி, நிப்பபஞ்சாராமோ ஹோதி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ஸோமனஸ்ஸப³ஹுலோ விஹரதி, யோனி சஸ்ஸ ஆரத்³தா⁴ ஹோதி ஆஸவானம் க²யாயா’’தி. சதுத்த²ம்.

5. அதி⁴க³மஸுத்தம்

79. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும் [பா²திகத்தும் (ஸீ.), பா²திகாதும் (ஸ்யா. கம். பீ.)]. கதமேஹி ச²ஹி? இத⁴, பி⁴க்க²வே, பி⁴க்கு² ந ஆயகுஸலோ ச ஹோதி, ந அபாயகுஸலோ ச ஹோதி, ந உபாயகுஸலோ ச ஹோதி, அனதி⁴க³தானம் குஸலானம் த⁴ம்மானம் அதி⁴க³மாய ந ச²ந்த³ம் ஜனேதி, அதி⁴க³தே குஸலே த⁴ம்மே ந ஆரக்க²தி [ஸாரக்க²தி (ஸீ. ஸ்யா. கம். பீ)], ஸாதச்சகிரியாய ந ஸம்பாதே³தி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும்.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும். கதமேஹி ச²ஹி? இத⁴, பி⁴க்க²வே, பி⁴க்கு² ஆயகுஸலோ ச ஹோதி, அபாயகுஸலோ ச ஹோதி, உபாயகுஸலோ ச ஹோதி, அனதி⁴க³தானம் குஸலானம் த⁴ம்மானம் அதி⁴க³மாய ச²ந்த³ம் ஜனேதி, அதி⁴க³தே குஸலே த⁴ம்மே ஆரக்க²தி, ஸாதச்சகிரியாய ஸம்பாதே³தி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காது’’ந்தி. பஞ்சமம்.

6. மஹந்தத்தஸுத்தம்

80. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹந்தத்தம் [மஹத்தம் (ஸ்யா. கம்.)] வேபுல்லத்தம் பாபுணாதி த⁴ம்மேஸு. கதமேஹி ச²ஹி? இத⁴, பி⁴க்க²வே, பி⁴க்கு² ஆலோகப³ஹுலோ ச ஹோதி யோக³ப³ஹுலோ ச வேத³ப³ஹுலோ ச அஸந்துட்டி²ப³ஹுலோ ச அனிக்கி²த்தது⁴ரோ ச குஸலேஸு த⁴ம்மேஸு உத்தரி ச பதாரேதி [பகரோதி (க.)]. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹந்தத்தம் வேபுல்லத்தம் பாபுணாதி த⁴ம்மேஸூ’’தி. ச²ட்ட²ம்.

7. பட²மனிரயஸுத்தம்

81. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி ச²ஹி? பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பாபிச்சோ² ச, மிச்சா²தி³ட்டி² ச. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி ச²ஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, அப்பிச்சோ² ச, ஸம்மாதி³ட்டி² ச. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. ஸத்தமம்.

8. து³தியனிரயஸுத்தம்

82. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி ச²ஹி [முஸாவாதீ³ ஹோதி, பிஸுணவாசா ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, (ஸீ. ஸ்யா. பீ.) ஏவம் ஸுக்கபக்கே²பி]? பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி [முஸாவாதீ³ ஹோதி, பிஸுணவாசா ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, (ஸீ. ஸ்யா. பீ.) ஏவம் ஸுக்கபக்கே²பி], லுத்³தோ⁴ ச, பக³ப்³போ⁴ ச. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி ச²ஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, அலுத்³தோ⁴ ச, அப்பக³ப்³போ⁴ ச. இமேஹி கோ² பி⁴க்க²வே ச²ஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. அட்ட²மம்.

9. அக்³க³த⁴ம்மஸுத்தம்

83. ‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அப⁴ப்³போ³ அக்³க³ம் த⁴ம்மம் அரஹத்தம் ஸச்சி²காதும். கதமேஹி ச²ஹி? இத⁴, பி⁴க்க²வே, பி⁴க்கு² அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, து³ப்பஞ்ஞோ ஹோதி, காயே ச ஜீவிதே ச ஸாபேக்கோ² ஹோதி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ அக்³க³ம் த⁴ம்மம் அரஹத்தம் ஸச்சி²காதும்.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ப⁴ப்³போ³ அக்³க³ம் த⁴ம்மம் அரஹத்தம் ஸச்சி²காதும். கதமேஹி ச²ஹி? இத⁴, பி⁴க்க²வே, பி⁴க்கு² ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, பஞ்ஞவா ஹோதி, காயே ச ஜீவிதே ச அனபேக்கோ² ஹோதி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அக்³க³ம் த⁴ம்மம் அரஹத்தம் ஸச்சி²காது’’ந்தி. நவமம்.

10. ரத்திதி³வஸஸுத்தம்

84. ‘‘ச²ஹி, பி⁴க்க²வே, த⁴ம்மேஹி ஸமன்னாக³தஸ்ஸ பி⁴க்கு²னோ யா ரத்தி வா தி³வஸோ வா ஆக³ச்ச²தி ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴. கதமேஹி ச²ஹி? இத⁴, பி⁴க்க²வே, பி⁴க்கு² மஹிச்சோ² ஹோதி, விகா⁴தவா, அஸந்துட்டோ², இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன, அஸ்ஸத்³தோ⁴ ஹோதி, து³ஸ்ஸீலோ ஹோதி, குஸீதோ ஹோதி, முட்ட²ஸ்ஸதி ஹோதி, து³ப்பஞ்ஞோ ஹோதி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தஸ்ஸ பி⁴க்கு²னோ யா ரத்தி வா தி³வஸோ வா ஆக³ச்ச²தி ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴.

‘‘ச²ஹி, பி⁴க்க²வே, த⁴ம்மேஹி ஸமன்னாக³தஸ்ஸ பி⁴க்கு²னோ யா ரத்தி வா தி³வஸோ வா ஆக³ச்ச²தி வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானி. கதமேஹி ச²ஹி? இத⁴, பி⁴க்க²வே, பி⁴க்கு² ந மஹிச்சோ² ஹோதி, அவிகா⁴தவா, ஸந்துட்டோ², இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன, ஸத்³தோ⁴ ஹோதி, ஸீலவா ஹோதி, ஆரத்³த⁴வீரியோ ஹோதி, ஸதிமா ஹோதி, பஞ்ஞவா ஹோதி. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தஸ்ஸ பி⁴க்கு²னோ யா ரத்தி வா தி³வஸோ வா ஆக³ச்ச²தி வுத்³தி⁴யேவ பாடிகங்கா², குஸலேஸு த⁴ம்மேஸு நோ பரிஹானீ’’தி. த³ஸமம்.

அரஹத்தவக்³கோ³ அட்ட²மோ. [ததியோ (ஸ்யா. க.)]