9. நிப்³பே³தி⁴கஸுத்தம்

63. ‘‘நிப்³பே³தி⁴கபரியாயம் வோ, பி⁴க்க²வே, த⁴ம்மபரியாயம் தே³ஸேஸ்ஸாமி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமோ ச ஸோ, பி⁴க்க²வே, நிப்³பே³தி⁴கபரியாயோ த⁴ம்மபரியாயோ? காமா, பி⁴க்க²வே, வேதி³தப்³பா³, காமானம் நிதா³னஸம்ப⁴வோ வேதி³தப்³போ³, காமானம் வேமத்ததா வேதி³தப்³பா³, காமானம் விபாகோ வேதி³தப்³போ³, காமனிரோதோ⁴ [காமானம் நிரோதோ⁴ (க.) ஏவம் வேத³னானிரோதோ⁴-இச்சாதீ³ஸுபி] வேதி³தப்³போ³, காமனிரோத⁴கா³மினீ [காமானம் நிரோத⁴கா³மினீ (க.) ஏவம் வேத³னானிரோத⁴கா³மினீ-இச்சாதீ³ஸுபி] படிபதா³ வேதி³தப்³பா³.

‘‘வேத³னா, பி⁴க்க²வே, வேதி³தப்³பா³, வேத³னானம் நிதா³னஸம்ப⁴வோ வேதி³தப்³போ³, வேத³னானம் வேமத்ததா வேதி³தப்³பா³, வேத³னானம் விபாகோ வேதி³தப்³போ³, வேத³னானிரோதோ⁴ வேதி³தப்³போ³, வேத³னானிரோத⁴கா³மினீ படிபதா³ வேதி³தப்³பா³.

‘‘ஸஞ்ஞா, பி⁴க்க²வே, வேதி³தப்³பா³, ஸஞ்ஞானம் நிதா³னஸம்ப⁴வோ வேதி³தப்³போ³, ஸஞ்ஞானம் வேமத்ததா வேதி³தப்³பா³, ஸஞ்ஞானம் விபாகோ வேதி³தப்³போ³, ஸஞ்ஞானிரோதோ⁴ வேதி³தப்³போ³, ஸஞ்ஞானிரோத⁴கா³மினீ படிபதா³ வேதி³தப்³பா³.

‘‘ஆஸவா, பி⁴க்க²வே, வேதி³தப்³பா³, ஆஸவானம் நிதா³னஸம்ப⁴வோ வேதி³தப்³போ³, ஆஸவானம் வேமத்ததா வேதி³தப்³பா³, ஆஸவானம் விபாகோ வேதி³தப்³போ³, ஆஸவனிரோதோ⁴ வேதி³தப்³போ³, ஆஸவனிரோத⁴கா³மினீ படிபதா³ வேதி³தப்³பா³.

‘‘கம்மம், பி⁴க்க²வே, வேதி³தப்³ப³ம், கம்மானம் நிதா³னஸம்ப⁴வோ வேதி³தப்³போ³, கம்மானம் வேமத்ததா வேதி³தப்³பா³, கம்மானம் விபாகோ வேதி³தப்³போ³, கம்மனிரோதோ⁴ வேதி³தப்³போ³, கம்மனிரோத⁴கா³மினீ படிபதா³ வேதி³தப்³பா³.

‘‘து³க்க²ம், பி⁴க்க²வே, வேதி³தப்³ப³ம், து³க்க²ஸ்ஸ நிதா³னஸம்ப⁴வோ வேதி³தப்³போ³, து³க்க²ஸ்ஸ வேமத்ததா வேதி³தப்³பா³, து³க்க²ஸ்ஸ விபாகோ வேதி³தப்³போ³, து³க்க²னிரோதோ⁴ வேதி³தப்³போ³, து³க்க²னிரோத⁴கா³மினீ படிபதா³ வேதி³தப்³பா³.

‘‘‘காமா, பி⁴க்க²வே, வேதி³தப்³பா³, காமானம் நிதா³னஸம்ப⁴வோ வேதி³தப்³போ³, காமானம் வேமத்ததா வேதி³தப்³பா³, காமானம் விபாகோ வேதி³தப்³போ³, காமனிரோதோ⁴ வேதி³தப்³போ³, காமனிரோத⁴கா³மினீ படிபதா³ வேதி³தப்³பா³’தி, இதி கோ² பனேதம் வுத்தம். கிஞ்சேதம் படிச்ச வுத்தம் [ம. நி. 1.166; ஸம். நி. 4.268]? பஞ்சிமே, பி⁴க்க²வே, காமகு³ணா – சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. அபி ச கோ², பி⁴க்க²வே, நேதே காமா காமகு³ணா நாமேதே [தே காமகு³ணா நாம நேதே காமா (க.)] அரியஸ்ஸ வினயே வுச்சந்தி –

[கதா². 514] ‘‘ஸங்கப்பராகோ³ புரிஸஸ்ஸ காமோ,

நேதே [ந தே (ஸ்யா.)] காமா யானி சித்ரானி லோகே;

ஸங்கப்பராகோ³ புரிஸஸ்ஸ காமோ,

திட்ட²ந்தி சித்ரானி ததே²வ லோகே;

அதே²த்த² தீ⁴ரா வினயந்தி ச²ந்த³’’ந்தி.

‘‘கதமோ ச, பி⁴க்க²வே, காமானம் நிதா³னஸம்ப⁴வோ? ப²ஸ்ஸோ, பி⁴க்க²வே, காமானம் நிதா³னஸம்ப⁴வோ.

‘‘கதமா ச, பி⁴க்க²வே, காமானம் வேமத்ததா? அஞ்ஞோ, பி⁴க்க²வே, காமோ ரூபேஸு, அஞ்ஞோ காமோ ஸத்³தே³ஸு, அஞ்ஞோ காமோ க³ந்தே⁴ஸு, அஞ்ஞோ காமோ ரஸேஸு, அஞ்ஞோ காமோ போ²ட்ட²ப்³பே³ஸு. அயம் வுச்சதி, பி⁴க்க²வே, காமானம் வேமத்ததா.

‘‘கதமோ ச, பி⁴க்க²வே, காமானம் விபாகோ? யம் கோ², பி⁴க்க²வே, காமயமானோ தஜ்ஜம் தஜ்ஜம் அத்தபா⁴வம் அபி⁴னிப்³ப³த்தேதி புஞ்ஞபா⁴கி³யம் வா அபுஞ்ஞபா⁴கி³யம் வா, அயம் வுச்சதி, பி⁴க்க²வே, காமானம் விபாகோ.

‘‘கதமோ ச, பி⁴க்க²வே, காமனிரோதோ⁴? ப²ஸ்ஸனிரோதோ⁴ [ப²ஸ்ஸனிரோதா⁴ (ஸ்யா.)], பி⁴க்க²வே, காமனிரோதோ⁴. அயமேவ அரியோ அட்ட²ங்கி³கோ மக்³கோ³ காமனிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

‘‘யதோ கோ² [யதோ ச கோ² (ப³ஹூஸு)], பி⁴க்க²வே, அரியஸாவகோ ஏவம் காமே பஜானாதி, ஏவம் காமானம் நிதா³னஸம்ப⁴வம் பஜானாதி, ஏவம் காமானம் வேமத்ததம் பஜானாதி, ஏவம் காமானம் விபாகம் பஜானாதி, ஏவம் காமனிரோத⁴ம் பஜானாதி, ஏவம் காமனிரோத⁴கா³மினிம் படிபத³ம் பஜானாதி, ஸோ இமம் நிப்³பே³தி⁴கம் ப்³ரஹ்மசரியம் பஜானாதி காமனிரோத⁴ம். காமா, பி⁴க்க²வே, வேதி³தப்³பா³…பே… காமனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³ வேதி³தப்³பா³தி, இதி யம் தம் வுத்தம் இத³மேதம் படிச்ச வுத்தம்.

‘‘வேத³னா, பி⁴க்க²வே, வேதி³தப்³பா³…பே… வேத³னானிரோத⁴கா³மினீ படிபதா³ வேதி³தப்³பா³தி, இதி கோ² பனேதம் வுத்தம். கிஞ்சேதம் படிச்ச வுத்தம்? திஸ்ஸோ இமா, பி⁴க்க²வே, வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா.

‘‘கதமோ ச, பி⁴க்க²வே, வேத³னானம் நிதா³னஸம்ப⁴வோ? ப²ஸ்ஸோ, பி⁴க்க²வே, வேத³னானம் நிதா³னஸம்ப⁴வோ.

‘‘கதமா ச, பி⁴க்க²வே, வேத³னானம் வேமத்ததா? அத்தி², பி⁴க்க²வே, ஸாமிஸா ஸுகா² வேத³னா, அத்தி² நிராமிஸா ஸுகா² வேத³னா, அத்தி² ஸாமிஸா து³க்கா² வேத³னா, அத்தி² நிராமிஸா து³க்கா² வேத³னா, அத்தி² ஸாமிஸா அது³க்க²மஸுகா² வேத³னா, அத்தி² நிராமிஸா அது³க்க²மஸுகா² வேத³னா. அயம் வுச்சதி, பி⁴க்க²வே, வேத³னானம் வேமத்ததா.

‘‘கதமோ ச, பி⁴க்க²வே, வேத³னானம் விபாகோ? யம் கோ², பி⁴க்க²வே, வேதி³யமானோ [வேத³யமானோ (ஸ்யா. கம்.) அ. நி. 4.233] தஜ்ஜம் தஜ்ஜம் அத்தபா⁴வம் அபி⁴னிப்³ப³த்தேதி புஞ்ஞபா⁴கி³யம் வா அபுஞ்ஞபா⁴கி³யம் வா, அயம் வுச்சதி, பி⁴க்க²வே, வேத³னானம் விபாகோ.

‘‘கதமோ ச, பி⁴க்க²வே, வேத³னானிரோதோ⁴? ப²ஸ்ஸனிரோதோ⁴ [ப²ஸ்ஸனிரோதா⁴ (ஸ்யா. கம். க.)], பி⁴க்க²வே, வேத³னானிரோதோ⁴. அயமேவ அரியோ அட்ட²ங்கி³கோ மக்³கோ³ வேத³னானிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் வேத³னம் பஜானாதி, ஏவம் வேத³னானம் நிதா³னஸம்ப⁴வம் பஜானாதி, ஏவம் வேத³னானம் வேமத்ததம் பஜானாதி, ஏவம் வேத³னானம் விபாகம் பஜானாதி, ஏவம் வேத³னானிரோத⁴ம் பஜானாதி, ஏவம் வேத³னானிரோத⁴கா³மினிம் படிபத³ம் பஜானாதி. ஸோ இமம் நிப்³பே³தி⁴கம் ப்³ரஹ்மசரியம் பஜானாதி வேத³னானிரோத⁴ம். வேத³னா, பி⁴க்க²வே, வேதி³தப்³பா³…பே… வேத³னானிரோத⁴கா³மினீ படிபதா³ வேதி³தப்³பா³தி, இதி யம் தம் வுத்தம் இத³மேதம் படிச்ச வுத்தம்.

‘‘ஸஞ்ஞா, பி⁴க்க²வே, வேதி³தப்³பா³…பே… ஸஞ்ஞானிரோத⁴கா³மினீ படிபதா³ வேதி³தப்³பா³தி, இதி கோ² பனேதம் வுத்தம். கிஞ்சேதம் படிச்ச வுத்தம்? ச²யிமா, பி⁴க்க²வே, ஸஞ்ஞா – ரூபஸஞ்ஞா, ஸத்³த³ஸஞ்ஞா, க³ந்த⁴ஸஞ்ஞா, ரஸஸஞ்ஞா, போ²ட்ட²ப்³ப³ஸஞ்ஞா, த⁴ம்மஸஞ்ஞா.

‘‘கதமோ ச, பி⁴க்க²வே, ஸஞ்ஞானம் நிதா³னஸம்ப⁴வோ? ப²ஸ்ஸோ, பி⁴க்க²வே, ஸஞ்ஞானம் நிதா³னஸம்ப⁴வோ.

‘‘கதமா ச, பி⁴க்க²வே, ஸஞ்ஞானம் வேமத்ததா? அஞ்ஞா, பி⁴க்க²வே, ஸஞ்ஞா ரூபேஸு, அஞ்ஞா ஸஞ்ஞா ஸத்³தே³ஸு [அஞ்ஞா பி⁴க்க²வே ரூபேஸு ஸஞ்ஞா அஞ்ஞா ஸத்³தே³ஸு ஸஞ்ஞா (க.) ஏவம் ஸேஸேஸுபி], அஞ்ஞா ஸஞ்ஞா க³ந்தே⁴ஸு, அஞ்ஞா ஸஞ்ஞா ரஸேஸு, அஞ்ஞா ஸஞ்ஞா போ²ட்ட²ப்³பே³ஸு, அஞ்ஞா ஸஞ்ஞா த⁴ம்மேஸு. அயம் வுச்சதி, பி⁴க்க²வே, ஸஞ்ஞானம் வேமத்ததா.

‘‘கதமோ ச, பி⁴க்க²வே, ஸஞ்ஞானம் விபாகோ? வோஹாரவேபக்கம் [வோஹாரவேபக்காஹம் (ஸ்யா. பீ.), வோஹாரபக்காஹம் (ஸீ.)], பி⁴க்க²வே, ஸஞ்ஞம் [ஸஞ்ஞா (ஸ்யா. பீ.)] வதா³மி. யதா² யதா² நம் ஸஞ்ஜானாதி ததா² ததா² வோஹரதி, ஏவம் ஸஞ்ஞீ அஹோஸிந்தி [அஹோஸீதி (க.)]. அயம் வுச்சதி, பி⁴க்க²வே, ஸஞ்ஞானம் விபாகோ.

‘‘கதமோ ச, பி⁴க்க²வே, ஸஞ்ஞானிரோதோ⁴? ப²ஸ்ஸனிரோதோ⁴, [ப²ஸ்ஸனிரோதா⁴ (ஸ்யா. க.)] பி⁴க்க²வே, ஸஞ்ஞானிரோதோ⁴. அயமேவ அரியோ அட்ட²ங்கி³கோ மக்³கோ³ ஸஞ்ஞானிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் ஸஞ்ஞம் பஜானாதி, ஏவம் ஸஞ்ஞானம் நிதா³னஸம்ப⁴வம் பஜானாதி, ஏவம் ஸஞ்ஞானம் வேமத்ததம் பஜானாதி, ஏவம் ஸஞ்ஞானம் விபாகம் பஜானாதி, ஏவம் ஸஞ்ஞானிரோத⁴ம் பஜானாதி, ஏவம் ஸஞ்ஞானிரோத⁴கா³மினிம் படிபத³ம் பஜானாதி, ஸோ இமம் நிப்³பே³தி⁴கம் ப்³ரஹ்மசரியம் பஜானாதி ஸஞ்ஞானிரோத⁴ம். ஸஞ்ஞா, பி⁴க்க²வே, வேதி³தப்³பா³…பே… ஸஞ்ஞானிரோத⁴கா³மினீ படிபதா³ வேதி³தப்³பா³தி. இதி யம் தம் வுத்தம் இத³மேதம் படிச்ச வுத்தம்.

‘‘ஆஸவா, பி⁴க்க²வே, வேதி³தப்³பா³…பே… ஆஸவனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³ வேதி³தப்³பா³தி, இதி கோ² பனேதம் வுத்தம். கிஞ்சேதம் படிச்ச வுத்தம்? தயோமே, பி⁴க்க²வே, ஆஸவா – காமாஸவோ, ப⁴வாஸவோ, அவிஜ்ஜாஸவோ.

‘‘கதமோ ச, பி⁴க்க²வே, ஆஸவானம் நிதா³னஸம்ப⁴வோ? அவிஜ்ஜா, பி⁴க்க²வே, ஆஸவானம் நிதா³னஸம்ப⁴வோ.

‘‘கதமா ச, பி⁴க்க²வே, ஆஸவானம் வேமத்ததா? அத்தி², பி⁴க்க²வே, ஆஸவா நிரயக³மனீயா [நிரயகா³மினியா (ஸீ. க.)], அத்தி² ஆஸவா திரச்சா²னயோனிக³மனீயா, அத்தி² ஆஸவா பேத்திவிஸயக³மனீயா, அத்தி² ஆஸவா மனுஸ்ஸலோகக³மனீயா, அத்தி² ஆஸவா தே³வலோகக³மனீயா. அயம் வுச்சதி, பி⁴க்க²வே, ஆஸவானம் வேமத்ததா.

‘‘கதமோ ச, பி⁴க்க²வே, ஆஸவானம் விபாகோ? யம் கோ², பி⁴க்க²வே, அவிஜ்ஜாக³தோ தஜ்ஜம் தஜ்ஜம் அத்தபா⁴வம் அபி⁴னிப்³ப³த்தேதி புஞ்ஞபா⁴கி³யம் வா அபுஞ்ஞபா⁴கி³யம் வா, அயம் வுச்சதி, பி⁴க்க²வே, ஆஸவானம் விபாகோ.

‘‘கதமோ ச, பி⁴க்க²வே, ஆஸவனிரோதோ⁴? அவிஜ்ஜானிரோதோ⁴, பி⁴க்க²வே, ஆஸவனிரோதோ⁴. அயமேவ அரியோ அட்ட²ங்கி³கோ மக்³கோ³ ஆஸவனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் ஆஸவே பஜானாதி, ஏவம் ஆஸவானம் நிதா³னஸம்ப⁴வம் பஜானாதி, ஏவம் ஆஸவானம் வேமத்ததம் பஜானாதி, ஏவம் ஆஸவானம் விபாகம் பஜானாதி, ஏவம் ஆஸவானம் நிரோத⁴ம் பஜானாதி, ஏவம் ஆஸவானம் நிரோத⁴கா³மினிம் படிபத³ம் பஜானாதி, ஸோ இமம் நிப்³பே³தி⁴கம் ப்³ரஹ்மசரியம் பஜானாதி ஆஸவனிரோத⁴ம். ஆஸவா, பி⁴க்க²வே, வேதி³தப்³பா³…பே… ஆஸவனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³ வேதி³தப்³பா³தி. இதி யம் தம் வுத்தம் இத³மேதம் படிச்ச வுத்தம்.

‘‘கம்மம், பி⁴க்க²வே, வேதி³தப்³ப³ம்…பே… கம்மனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³ வேதி³தப்³பா³தி, இதி கோ² பனேதம் வுத்தம். கிஞ்சேதம் படிச்ச வுத்தம்? [கதா². 539] சேதனாஹம், பி⁴க்க²வே, கம்மம் வதா³மி. சேதயித்வா கம்மம் கரோதி – காயேன வாசாய மனஸா.

‘‘கதமோ ச, பி⁴க்க²வே, கம்மானம் நிதா³னஸம்ப⁴வோ? ப²ஸ்ஸோ, பி⁴க்க²வே, கம்மானம் நிதா³னஸம்ப⁴வோ.

‘‘கதமா ச, பி⁴க்க²வே, கம்மானம் வேமத்ததா? அத்தி², பி⁴க்க²வே, கம்மம் நிரயவேத³னீயம், அத்தி² கம்மம் திரச்சா²னயோனிவேத³னீயம், அத்தி² கம்மம் பேத்திவிஸயவேத³னீயம், அத்தி² கம்மம் மனுஸ்ஸலோகவேத³னீயம், அத்தி² கம்மம் தே³வலோகவேத³னீயம். அயம் வுச்சதி, பி⁴க்க²வே, கம்மானம் வேமத்ததா.

‘‘கதமோ ச, பி⁴க்க²வே, கம்மானம் விபாகோ? திவிதா⁴ஹம் [இமாஹம் (க.)], பி⁴க்க²வே, கம்மானம் விபாகம் வதா³மி – தி³ட்டே²வ [தி³ட்டே² வா (ஸீ.)] த⁴ம்மே, உபபஜ்ஜே வா [உபபஜ்ஜம் வா (க. ஸீ., அ. நி. 10.217), உபபஜ்ஜ வா (?), ம. நி. 3.303 பாளியா தத³த்த²வண்ணனாய ச ஸம்ஸத்³தே³தப்³ப³ம்], அபரே வா பரியாயே. அயம் வுச்சதி, பி⁴க்க²வே, கம்மானம் விபாகோ.

‘‘கதமோ ச, பி⁴க்க²வே, கம்மனிரோதோ⁴? ப²ஸ்ஸனிரோதோ⁴, [ப²ஸ்ஸனிரோதா⁴ (க. ஸீ. ஸ்யா. க.)] பி⁴க்க²வே, கம்மனிரோதோ⁴. அயமேவ அரியோ அட்ட²ங்கி³கோ மக்³கோ³ கம்மனிரோத⁴கா³மினீ [ஸப்³ப³த்த²பி ஏவமேவ தி³ஸ்ஸதி] படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் கம்மம் பஜானாதி, ஏவம் கம்மானம் நிதா³னஸம்ப⁴வம் பஜானாதி, ஏவம் கம்மானம் வேமத்ததம் பஜானாதி, ஏவம் கம்மானம் விபாகம் பஜானாதி, ஏவம் கம்மனிரோத⁴ம் பஜானாதி, ஏவம் கம்மனிரோத⁴கா³மினிம் படிபத³ம் பஜானாதி, ஸோ இமம் நிப்³பே³தி⁴கம் ப்³ரஹ்மசரியம் பஜானாதி கம்மனிரோத⁴ம். கம்மம், பி⁴க்க²வே, வேதி³தப்³ப³ம்…பே… கம்மனிரோத⁴கா³மினீ படிபதா³ வேதி³தப்³பா³தி, இதி யம் தம் வுத்தம் இத³மேதம் படிச்ச வுத்தம்.

‘‘து³க்க²ம், பி⁴க்க²வே, வேதி³தப்³ப³ம், து³க்க²ஸ்ஸ நிதா³னஸம்ப⁴வோ வேதி³தப்³போ³, து³க்க²ஸ்ஸ வேமத்ததா வேதி³தப்³பா³, து³க்க²ஸ்ஸ விபாகோ வேதி³தப்³போ³, து³க்க²னிரோதோ⁴ வேதி³தப்³போ³, து³க்க²னிரோத⁴கா³மினீ படிபதா³ வேதி³தப்³பா³தி. இதி கோ² பனேதம் வுத்தம், கிஞ்சேதம் படிச்ச வுத்தம்? ஜாதிபி து³க்கா², ஜராபி து³க்கா², ப்³யாதி⁴பி து³க்கோ² [ப்³யாதி⁴பி து³க்கா² (ஸ்யா. பீ. க.)], மரணம்பி து³க்க²ம், ஸோகபரிதே³வது³க்க²தோ³மனஸ்ஸுபாயாஸாபி து³க்கா², யம்பிச்ச²ம் ந லப⁴தி தம்பி து³க்க²ம், ஸம்கி²த்தேன பஞ்சுபாதா³னக்க²ந்தா⁴ [பஞ்சுபாதா³னக்க²ந்தா⁴பி (க.)] து³க்கா².

‘‘கதமோ ச, பி⁴க்க²வே, து³க்க²ஸ்ஸ நிதா³னஸம்ப⁴வோ? தண்ஹா, பி⁴க்க²வே, து³க்க²ஸ்ஸ நிதா³னஸம்ப⁴வோ.

‘‘கதமா ச, பி⁴க்க²வே, து³க்க²ஸ்ஸ வேமத்ததா? அத்தி², பி⁴க்க²வே, து³க்க²ம் அதி⁴மத்தம், அத்தி² பரித்தம், அத்தி² த³ந்த⁴விராகி³, அத்தி² கி²ப்பவிராகி³. அயம் வுச்சதி, பி⁴க்க²வே, து³க்க²ஸ்ஸ வேமத்ததா.

‘‘கதமோ ச, பி⁴க்க²வே, து³க்க²ஸ்ஸ விபாகோ? இத⁴, பி⁴க்க²வே, ஏகச்சோ யேன து³க்கே²ன அபி⁴பூ⁴தோ பரியாதி³ன்னசித்தோ [பரியாதி³ண்ணசித்தோ (க.)] ஸோசதி கிலமதி பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி, யேன வா பன து³க்கே²ன அபி⁴பூ⁴தோ பரியாதி³ன்னசித்தோ ப³ஹித்³தா⁴ பரியேட்டி²ம் ஆபஜ்ஜதி – ‘கோ [ஸோ ந (க.)] ஏகபத³ம் த்³விபத³ம் ஜானாதி [பஜானாதி (க.)] இமஸ்ஸ து³க்க²ஸ்ஸ நிரோதா⁴யா’தி? ஸம்மோஹவேபக்கம் வாஹம், பி⁴க்க²வே, து³க்க²ம் வதா³மி பரியேட்டி²வேபக்கம் வா. அயம் வுச்சதி, பி⁴க்க²வே, து³க்க²ஸ்ஸ விபாகோ.

‘‘கதமோ ச, பி⁴க்க²வே, து³க்க²னிரோதோ⁴? தண்ஹானிரோதோ⁴, [தண்ஹானிரோதா⁴ (க. ஸீ. ஸ்யா. க.)] பி⁴க்க²வே, து³க்க²னிரோதோ⁴. அயமேவ அரியோ அட்ட²ங்கி³கோ மக்³கோ³ து³க்க²ஸ்ஸ நிரோத⁴கா³மினீ படிபதா³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘யதோ கோ², பி⁴க்க²வே, அரியஸாவகோ ஏவம் து³க்க²ம் பஜானாதி, ஏவம் து³க்க²ஸ்ஸ நிதா³னஸம்ப⁴வம் பஜானாதி, ஏவம் து³க்க²ஸ்ஸ வேமத்ததம் பஜானாதி, ஏவம் து³க்க²ஸ்ஸ விபாகம் பஜானாதி, ஏவம் து³க்க²னிரோத⁴ம் பஜானாதி, ஏவம் து³க்க²னிரோத⁴கா³மினிம் படிபத³ம் பஜானாதி, ஸோ இமம் நிப்³பே³தி⁴கம் ப்³ரஹ்மசரியம் பஜானாதி து³க்க²னிரோத⁴ம். து³க்க²ம், பி⁴க்க²வே, வேதி³தப்³ப³ம், து³க்க²ஸ்ஸ நிதா³னஸம்ப⁴வோ வேதி³தப்³போ³, து³க்க²ஸ்ஸ வேமத்ததா வேதி³தப்³பா³, து³க்க²ஸ்ஸ விபாகோ வேதி³தப்³போ³, து³க்க²னிரோதோ⁴ வேதி³தப்³போ³, து³க்க²னிரோத⁴கா³மினீ படிபதா³ வேதி³தப்³பா³தி. இதி யம் தம் வுத்தம் இத³மேதம் படிச்ச வுத்தம்.

‘‘அயம் கோ² ஸோ, பி⁴க்க²வே, நிப்³பே³தி⁴கபரியாயோ த⁴ம்மபரியாயோ’’தி. நவமம்.