3. இணஸுத்தம்

45. ‘‘தா³லித்³தி³யம் [தா³ளித்³தி³யம் (ஸீ.)], பி⁴க்க²வே, து³க்க²ம் லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’. ‘‘யம்பி, பி⁴க்க²வே, த³லித்³தோ³ [த³ளித்³தோ³ (ஸீ.)] அஸ்ஸகோ அனாள்ஹிகோ [அனத்³தி⁴கோ (ஸ்யா. கம்.)] இணம் ஆதி³யதி, இணாதா³னம்பி, பி⁴க்க²வே, து³க்க²ம் லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’. ‘‘யம்பி, பி⁴க்க²வே, த³லித்³தோ³ அஸ்ஸகோ அனாள்ஹிகோ இணம் ஆதி³யித்வா வட்³டி⁴ம் படிஸ்ஸுணாதி, வட்³டி⁴பி, பி⁴க்க²வே, து³க்கா² லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’. ‘‘யம்பி, பி⁴க்க²வே, த³லித்³தோ³ அஸ்ஸகோ அனாள்ஹிகோ வட்³டி⁴ம் படிஸ்ஸுணித்வா காலாப⁴தம் [காலக³தம் (க.)] வட்³டி⁴ம் ந தே³தி, சோதே³ந்திபி நம்; சோத³னாபி, பி⁴க்க²வே, து³க்கா² லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’. ‘‘யம்பி, பி⁴க்க²வே, த³லித்³தோ³ அஸ்ஸகோ அனாள்ஹிகோ சோதி³யமானோ ந தே³தி, அனுசரந்திபி நம்; அனுசரியாபி, பி⁴க்க²வே, து³க்கா² லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’. ‘‘யம்பி, பி⁴க்க²வே, த³லித்³தோ³ அஸ்ஸகோ அனாள்ஹிகோ அனுசரியமானோ ந தே³தி, ப³ந்த⁴ந்திபி நம்; ப³ந்த⁴னம்பி, பி⁴க்க²வே, து³க்க²ம் லோகஸ்மிம் காமபோ⁴கி³னோ’’தி? ‘‘ஏவம், ப⁴ந்தே’’.

‘‘இதி கோ², பி⁴க்க²வே, தா³லித்³தி³யம்பி து³க்க²ம் லோகஸ்மிம் காமபோ⁴கி³னோ, இணாதா³னம்பி து³க்க²ம் லோகஸ்மிம் காமபோ⁴கி³னோ, வட்³டி⁴பி து³க்கா² லோகஸ்மிம் காமபோ⁴கி³னோ, சோத³னாபி து³க்கா² லோகஸ்மிம் காமபோ⁴கி³னோ, அனுசரியாபி து³க்கா² லோகஸ்மிம் காமபோ⁴கி³னோ, ப³ந்த⁴னம்பி து³க்க²ம் லோகஸ்மிம் காமபோ⁴கி³னோ; ஏவமேவம் கோ², பி⁴க்க²வே, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு, ஹிரீ நத்தி² குஸலேஸு த⁴ம்மேஸு, ஓத்தப்பம் நத்தி² குஸலேஸு த⁴ம்மேஸு, வீரியம் நத்தி² குஸலேஸு த⁴ம்மேஸு, பஞ்ஞா நத்தி² குஸலேஸு த⁴ம்மேஸு – அயம் வுச்சதி, பி⁴க்க²வே, அரியஸ்ஸ வினயே த³லித்³தோ³ அஸ்ஸகோ அனாள்ஹிகோ.

‘‘ஸ கோ² ஸோ, பி⁴க்க²வே, த³லித்³தோ³ அஸ்ஸகோ அனாள்ஹிகோ ஸத்³தா⁴ய அஸதி குஸலேஸு த⁴ம்மேஸு, ஹிரியா அஸதி குஸலேஸு த⁴ம்மேஸு, ஓத்தப்பே அஸதி குஸலேஸு த⁴ம்மேஸு, வீரியே அஸதி குஸலேஸு த⁴ம்மேஸு, பஞ்ஞாய அஸதி குஸலேஸு த⁴ம்மேஸு, காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. இத³மஸ்ஸ இணாதா³னஸ்மிம் வதா³மி.

‘‘ஸோ தஸ்ஸ காயது³ச்சரிதஸ்ஸ படிச்சா²த³னஹேது பாபிகம் இச்ச²ம் பணித³ஹதி [பத³ஹதி (க.)]. ‘மா மம் ஜஞ்ஞூ’தி இச்ச²தி, ‘மா மம் ஜஞ்ஞூ’தி ஸங்கப்பதி, ‘மா மம் ஜஞ்ஞூ’தி வாசம் பா⁴ஸதி, ‘மா மம் ஜஞ்ஞூ’தி காயேன பரக்கமதி. ஸோ தஸ்ஸ வசீது³ச்சரிதஸ்ஸ படிச்சா²த³னஹேது…பே… ஸோ தஸ்ஸ மனோது³ச்சரிதஸ்ஸ படிச்சா²த³னஹேது…பே… ‘மா மம் ஜஞ்ஞூ’தி காயேன பரக்கமதி. இத³மஸ்ஸ வட்³டி⁴யா வதா³மி.

‘‘தமேனம் பேஸலா ஸப்³ரஹ்மசாரீ ஏவமாஹம்ஸு – ‘அயஞ்ச ஸோ ஆயஸ்மா ஏவம்காரீ ஏவம்ஸமாசாரோ’தி. இத³மஸ்ஸ சோத³னாய வதா³மி.

‘‘தமேனம் அரஞ்ஞக³தம் வா ருக்க²மூலக³தம் வா ஸுஞ்ஞாகா³ரக³தம் வா விப்படிஸாரஸஹக³தா பாபகா அகுஸலவிதக்கா ஸமுதா³சரந்தி. இத³மஸ்ஸ அனுசரியாய வதா³மி.

‘‘ஸ கோ² ஸோ, பி⁴க்க²வே, த³லித்³தோ³ அஸ்ஸகோ அனாள்ஹிகோ காயேன து³ச்சரிதம் சரித்வா வாசாய து³ச்சரிதம் சரித்வா மனஸா து³ச்சரிதம் சரித்வா காயஸ்ஸ பே⁴தா³ பரம் மரணா நிரயப³ந்த⁴னே வா ப³ஜ்ஜ²தி திரச்சா²னயோனிப³ந்த⁴னே வா. நாஹம், பி⁴க்க²வே, அஞ்ஞம் ஏகப³ந்த⁴னம்பி ஸமனுபஸ்ஸாமி ஏவம்தா³ருணம் ஏவம்கடுகம் [ஏவம்து³க்க²ம் (ஸ்யா. கம். க.)] ஏவம்அந்தராயகரம் அனுத்தரஸ்ஸ யோக³க்கே²மஸ்ஸ அதி⁴க³மாய, யத²யித³ம், பி⁴க்க²வே, நிரயப³ந்த⁴னம் வா திரச்சா²னயோனிப³ந்த⁴னம் வா’’தி.

‘‘தா³லித்³தி³யம் து³க்க²ம் லோகே, இணாதா³னஞ்ச வுச்சதி;

த³லித்³தோ³ இணமாதா³ய, பு⁴ஞ்ஜமானோ விஹஞ்ஞதி.

‘‘ததோ அனுசரந்தி நம், ப³ந்த⁴னம்பி நிக³ச்ச²தி;

ஏதஞ்ஹி ப³ந்த⁴னம் து³க்க²ம், காமலாபா⁴பி⁴ஜப்பினம்.

‘‘ததே²வ அரியவினயே, ஸத்³தா⁴ யஸ்ஸ ந விஜ்ஜதி;

அஹிரீகோ அனோத்தப்பீ, பாபகம்மவினிப்³ப³யோ.

‘‘காயது³ச்சரிதம் கத்வா, வசீது³ச்சரிதானி ச;

மனோது³ச்சரிதம் கத்வா, ‘மா மம் ஜஞ்ஞூ’தி இச்ச²தி.

‘‘ஸோ ஸம்ஸப்பதி [ஸங்கப்பதி (க.)] காயேன, வாசாய உத³ சேதஸா;

பாபகம்மம் பவட்³டே⁴ந்தோ, தத்த² தத்த² புனப்புனம்.

‘‘ஸோ பாபகம்மோ து³ம்மேதோ⁴, ஜானம் து³க்கடமத்தனோ;

த³லித்³தோ³ இணமாதா³ய, பு⁴ஞ்ஜமானோ விஹஞ்ஞதி.

‘‘ததோ அனுசரந்தி நம், ஸங்கப்பா மானஸா து³கா²;

கா³மே வா யதி³ வாரஞ்ஞே, யஸ்ஸ விப்படிஸாரஜா.

‘‘ஸோ பாபகம்மோ து³ம்மேதோ⁴, ஜானம் து³க்கடமத்தனோ;

யோனிமஞ்ஞதரம் க³ந்த்வா, நிரயே வாபி ப³ஜ்ஜ²தி.

‘‘ஏதஞ்ஹி ப³ந்த⁴னம் து³க்க²ம், யம்ஹா தீ⁴ரோ பமுச்சதி;

த⁴ம்மலத்³தே⁴ஹி போ⁴கே³ஹி, த³த³ம் சித்தம் பஸாத³யம்.

‘‘உப⁴யத்த² கடக்³கா³ஹோ, ஸத்³த⁴ஸ்ஸ க⁴ரமேஸினோ;

தி³ட்ட²த⁴ம்மஹிதத்தா²ய, ஸம்பராயஸுகா²ய ச;

ஏவமேதம் க³ஹட்டா²னம், சாகோ³ புஞ்ஞம் பவட்³ட⁴தி.

‘‘ததே²வ அரியவினயே, ஸத்³தா⁴ யஸ்ஸ பதிட்டி²தா;

ஹிரீமனோ ச ஓத்தப்பீ, பஞ்ஞவா ஸீலஸம்வுதோ.

‘‘ஏஸோ கோ² அரியவினயே, ‘ஸுக²ஜீவீ’தி வுச்சதி;

நிராமிஸம் ஸுக²ம் லத்³தா⁴, உபேக்க²ம் அதி⁴திட்ட²தி.

‘‘பஞ்ச நீவரணே ஹித்வா, நிச்சம் ஆரத்³த⁴வீரியோ;

ஜா²னானி உபஸம்பஜ்ஜ, ஏகோதி³ நிபகோ ஸதோ.

‘‘ஏவம் ஞத்வா யதா²பூ⁴தம், ஸப்³ப³ஸம்யோஜனக்க²யே;

ஸப்³ப³ஸோ அனுபாதா³ய, ஸம்மா சித்தம் விமுச்சதி.

‘‘தஸ்ஸ ஸம்மா விமுத்தஸ்ஸ, ஞாணம் சே ஹோதி தாதி³னோ;

‘அகுப்பா மே விமுத்தீ’தி, ப⁴வஸம்யோஜனக்க²யே.

‘‘ஏதம் கோ² பரமம் ஞாணம், ஏதம் ஸுக²மனுத்தரம்;

அஸோகம் விரஜம் கே²மம், ஏதம் ஆனண்யமுத்தம’’ந்தி. ததியம்;