10. க²த்தியஸுத்தம்

52. அத² கோ² ஜாணுஸ்ஸோணி [ஜாணுஸோணி (க.)] ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஜாணுஸ்ஸோணி ப்³ராஹ்மணோ ப⁴க³வந்தம் ஏதத³வோச –

‘‘க²த்தியா, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘க²த்தியா கோ², ப்³ராஹ்மண, போ⁴கா³தி⁴ப்பாயா பஞ்ஞூபவிசாரா ப³லாதி⁴ட்டா²னா பத²வீபி⁴னிவேஸா இஸ்ஸரியபரியோஸானா’’தி.

‘‘ப்³ராஹ்மணா பன, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘ப்³ராஹ்மணா கோ², ப்³ராஹ்மண, போ⁴கா³தி⁴ப்பாயா பஞ்ஞூபவிசாரா மந்தாதி⁴ட்டா²னா யஞ்ஞாபி⁴னிவேஸா ப்³ரஹ்மலோகபரியோஸானா’’தி.

‘‘க³ஹபதிகா பன, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘க³ஹபதிகா கோ², ப்³ராஹ்மண, போ⁴கா³தி⁴ப்பாயா பஞ்ஞூபவிசாரா ஸிப்பாதி⁴ட்டா²னா கம்மந்தாபி⁴னிவேஸா நிட்டி²தகம்மந்தபரியோஸானா’’தி.

‘‘இத்தீ² பன, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘இத்தீ² கோ², ப்³ராஹ்மண, புரிஸாதி⁴ப்பாயா அலங்காரூபவிசாரா புத்தாதி⁴ட்டா²னா அஸபதீபி⁴னிவேஸா இஸ்ஸரியபரியோஸானா’’தி.

‘‘சோரா பன, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘சோரா கோ², ப்³ராஹ்மண, ஆதா³னாதி⁴ப்பாயா க³ஹனூபவிசாரா ஸத்தா²தி⁴ட்டா²னா அந்த⁴காராபி⁴னிவேஸா அத³ஸ்ஸனபரியோஸானா’’தி.

‘‘ஸமணா பன, போ⁴ கோ³தம, கிம்அதி⁴ப்பாயா, கிம்உபவிசாரா, கிம்அதி⁴ட்டா²னா, கிம்அபி⁴னிவேஸா, கிம்பரியோஸானா’’தி? ‘‘ஸமணா கோ², ப்³ராஹ்மண, க²ந்திஸோரச்சாதி⁴ப்பாயா பஞ்ஞூபவிசாரா ஸீலாதி⁴ட்டா²னா ஆகிஞ்சஞ்ஞாபி⁴னிவேஸா [அகிஞ்சனாபி⁴னிவேஸா (ஸ்யா. க.)] நிப்³பா³னபரியோஸானா’’தி.

‘‘அச்ச²ரியம், போ⁴ கோ³தம, அப்³பு⁴தம், போ⁴ கோ³தம! க²த்தியானம்பி ப⁴வம் கோ³தமோ ஜானாதி அதி⁴ப்பாயஞ்ச உபவிசாரஞ்ச அதி⁴ட்டா²னஞ்ச அபி⁴னிவேஸஞ்ச பரியோஸானஞ்ச. ப்³ராஹ்மணானம்பி ப⁴வம் கோ³தமோ ஜானாதி…பே… க³ஹபதீனம்பி ப⁴வம் கோ³தமோ ஜானாதி… இத்தீ²னம்பி ப⁴வம் கோ³தமோ ஜானாதி… சோரானம்பி ப⁴வம் கோ³தமோ ஜானாதி … ஸமணானம்பி ப⁴வம் கோ³தமோ ஜானாதி அதி⁴ப்பாயஞ்ச உபவிசாரஞ்ச அதி⁴ட்டா²னஞ்ச அபி⁴னிவேஸஞ்ச பரியோஸானஞ்ச. அபி⁴க்கந்தம், போ⁴ கோ³தம…பே… உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. த³ஸமம்.