9. நிதா³னஸுத்தம்

39. ‘‘தீணிமானி, பி⁴க்க²வே, நிதா³னானி கம்மானம் ஸமுத³யாய. கதமானி தீணி? லோபோ⁴ நிதா³னம் கம்மானம் ஸமுத³யாய, தோ³ஸோ நிதா³னம் கம்மானம் ஸமுத³யாய, மோஹோ நிதா³னம் கம்மானம் ஸமுத³யாய. ந, பி⁴க்க²வே, லோபா⁴ அலோபோ⁴ ஸமுதே³தி; அத² கோ², பி⁴க்க²வே, லோபா⁴ லோபோ⁴வ ஸமுதே³தி. ந, பி⁴க்க²வே, தோ³ஸா அதோ³ஸோ ஸமுதே³தி; அத² கோ², பி⁴க்க²வே, தோ³ஸா தோ³ஸோவ ஸமுதே³தி. ந, பி⁴க்க²வே, மோஹா அமோஹோ ஸமுதே³தி; அத² கோ², பி⁴க்க²வே, மோஹா மோஹோவ ஸமுதே³தி. ந, பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ. அத² கோ², பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன நிரயோ பஞ்ஞாயதி திரச்சா²னயோனி பஞ்ஞாயதி பேத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ. இமானி கோ², பி⁴க்க²வே, தீணி நிதா³னானி கம்மானம் ஸமுத³யாய.

‘‘தீணிமானி, பி⁴க்க²வே, நிதா³னானி கம்மானம் ஸமுத³யாய. கதமானி தீணி? அலோபோ⁴ நிதா³னம் கம்மானம் ஸமுத³யாய, அதோ³ஸோ நிதா³னம் கம்மானம் ஸமுத³யாய, அமோஹோ நிதா³னம் கம்மானம் ஸமுத³யாய. ந, பி⁴க்க²வே, அலோபா⁴ லோபோ⁴ ஸமுதே³தி; அத² கோ², பி⁴க்க²வே, அலோபா⁴ அலோபோ⁴வ ஸமுதே³தி. ந, பி⁴க்க²வே, அதோ³ஸா தோ³ஸோ ஸமுதே³தி; அத² கோ², பி⁴க்க²வே, அதோ³ஸா அதோ³ஸோவ ஸமுதே³தி. ந, பி⁴க்க²வே, அமோஹா மோஹோ ஸமுதே³தி; அத² கோ², பி⁴க்க²வே, அமோஹா அமோஹோவ ஸமுதே³தி. ந, பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன நிரயோ பஞ்ஞாயதி திரச்சா²னயோனி பஞ்ஞாயதி பேத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ. அத² கோ², பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ. இமானி கோ², பி⁴க்க²வே, தீணி நிதா³னானி கம்மானம் ஸமுத³யாயா’’தி. நவமம்.