3. நிஸ்ஸாரணீயஸுத்தம்

13. ‘‘ச²யிமா, பி⁴க்க²வே, நிஸ்ஸாரணீயா தா⁴துயோ. கதமா ச²? இத⁴, பி⁴க்க²வே, பி⁴க்கு² ஏவம் வதே³ய்ய – ‘மேத்தா ஹி கோ² மே சேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴; அத² ச பன மே ப்³யாபாதோ³ சித்தம் பரியாதா³ய திட்ட²தீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் மேத்தாய சேதோவிமுத்தியா பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய; அத² ச பனஸ்ஸ ப்³யாபாதோ³ சித்தம் பரியாதா³ய ட²ஸ்ஸதி [ட²ஸ்ஸதீதி (ஸப்³ப³த்த²) தீ³. நி. 3.326 பஸ்ஸிதப்³ப³ம்], நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, ப்³யாபாத³ஸ்ஸ யதி³த³ம் மேத்தாசேதோவிமுத்தீ’’’தி [மேத்தாசேதோவிமுத்தி (ஸப்³ப³த்த²)].

‘‘இத⁴ பன, பி⁴க்க²வே, பி⁴க்கு² ஏவம் வதே³ய்ய – ‘கருணா ஹி கோ² மே சேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴; அத² ச பன மே விஹேஸா சித்தம் பரியாதா³ய திட்ட²தீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் கருணாய சேதோவிமுத்தியா பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய; அத² ச பனஸ்ஸ விஹேஸா சித்தம் பரியாதா³ய ட²ஸ்ஸதி, நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, விஹேஸாய யதி³த³ம் கருணாசேதோவிமுத்தீ’’’தி.

‘‘இத⁴ பன, பி⁴க்க²வே, பி⁴க்கு² ஏவம் வதே³ய்ய – ‘முதி³தா ஹி கோ² மே சேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴; அத² ச பன மே அரதி சித்தம் பரியாதா³ய திட்ட²தீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் முதி³தாய சேதோவிமுத்தியா பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய; அத² ச பனஸ்ஸ அரதி சித்தம் பரியாதா³ய ட²ஸ்ஸதி, நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, அரதியா யதி³த³ம் முதி³தாசேதோவிமுத்தீ’’’தி.

‘‘இத⁴ பன, பி⁴க்க²வே, பி⁴க்கு² ஏவம் வதே³ய்ய – ‘உபேக்கா² ஹி கோ² மே சேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴; அத² ச பன மே ராகோ³ சித்தம் பரியாதா³ய திட்ட²தீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் உபேக்கா²ய சேதோவிமுத்தியா பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய; அத² ச பனஸ்ஸ ராகோ³ சித்தம் பரியாதா³ய ட²ஸ்ஸதி, நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, ராக³ஸ்ஸ யதி³த³ம் உபேக்கா²சேதோவிமுத்தீ’’’தி.

‘‘இத⁴ பன, பி⁴க்க²வே, பி⁴க்கு² ஏவம் வதே³ய்ய – ‘அனிமித்தா ஹி கோ² மே சேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴; அத² ச பன மே நிமித்தானுஸாரி விஞ்ஞாணம் ஹோதீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் அனிமித்தாய சேதோவிமுத்தியா பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய; அத² ச பனஸ்ஸ நிமித்தானுஸாரி விஞ்ஞாணம் ப⁴விஸ்ஸதி, நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, ஸப்³ப³னிமித்தானம் யதி³த³ம் அனிமித்தாசேதோவிமுத்தீ’’’தி.

‘‘இத⁴ பன பி⁴க்க²வே, பி⁴க்கு² ஏவம் வதே³ய்ய – ‘அஸ்மீதி கோ² மே விக³தம் [விக³தே (ஸ்யா.)], அயமஹமஸ்மீதி ச [அயம் சகாரோ தீ³. நி. 3.326 நத்தி²] ந ஸமனுபஸ்ஸாமி; அத² ச பன மே விசிகிச்சா²கத²ம்கதா²ஸல்லம் சித்தம் பரியாதா³ய திட்ட²தீ’தி. ஸோ ‘மா ஹேவ’ந்திஸ்ஸ வசனீயோ – ‘மாயஸ்மா, ஏவம் அவச; மா ப⁴க³வந்தம் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னம், ந ஹி ப⁴க³வா ஏவம் வதே³ய்ய. அட்டா²னமேதம், ஆவுஸோ, அனவகாஸோ யம் அஸ்மீதி விக³தே அயமஹமஸ்மீதி ச ந ஸமனுபஸ்ஸதோ; அத² ச பனஸ்ஸ விசிகிச்சா²கத²ம்கதா²ஸல்லம் சித்தம் பரியாதா³ய ட²ஸ்ஸதி, நேதம் டா²னம் விஜ்ஜதி. நிஸ்ஸரணஞ்ஹேதம், ஆவுஸோ, விசிகிச்சா²கத²ம்கதா²ஸல்லஸ்ஸ யதி³த³ம் அஸ்மீதி மானஸமுக்³கா⁴தோ’தி. இமா கோ², பி⁴க்க²வே, ச² நிஸ்ஸாரணீயா தா⁴துயோ’’தி. ததியம்.