1. பட²மஸாரணீயஸுத்தம்

11. ‘‘ச²யிமே, பி⁴க்க²வே, த⁴ம்மா ஸாரணீயா [ஸாராணீயா (ஸீ. ஸ்யா. கம். பீ.)]. கதமே ச²? இத⁴, பி⁴க்க²வே, பி⁴க்கு²னோ மேத்தம் காயகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவி சேவ ரஹோ ச, அயம்பி த⁴ம்மோ ஸாரணீயோ.

‘‘புன சபரம், பி⁴க்க²வே, பி⁴க்கு²னோ மேத்தம் வசீகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவி சேவ ரஹோ ச, அயம்பி த⁴ம்மோ ஸாரணீயோ.

‘‘புன சபரம், பி⁴க்க²வே, பி⁴க்கு²னோ மேத்தம் மனோகம்மம் பச்சுபட்டி²தம் ஹோதி ஸப்³ரஹ்மசாரீஸு ஆவி சேவ ரஹோ ச, அயம்பி த⁴ம்மோ ஸாரணீயோ.

‘‘புன சபரம், பி⁴க்க²வே, பி⁴க்கு² யே தே லாபா⁴ த⁴ம்மிகா த⁴ம்மலத்³தா⁴ அந்தமஸோ பத்தபரியாபன்னமத்தம்பி ததா²ரூபேஹி லாபே⁴ஹி அப்படிவிப⁴த்தபோ⁴கீ³ ஹோதி ஸீலவந்தேஹி ஸப்³ரஹ்மசாரீஹி ஸாதா⁴ரணபோ⁴கீ³, அயம்பி த⁴ம்மோ ஸாரணீயோ.

‘‘புன சபரம், பி⁴க்க²வே, பி⁴க்கு² யானி தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸம்வத்தனிகானி ததா²ரூபேஹி ஸீலேஹி ஸீலஸாமஞ்ஞக³தோ விஹரதி ஸப்³ரஹ்மசாரீஹி ஆவி சேவ ரஹோ ச, அயம்பி த⁴ம்மோ ஸாரணீயோ.

‘‘புன சபரம், பி⁴க்க²வே, பி⁴க்கு² யாயம் தி³ட்டி² அரியா நிய்யானிகா நிய்யாதி தக்கரஸ்ஸ ஸம்மா து³க்க²க்க²யாய ததா²ரூபாய தி³ட்டி²யா தி³ட்டி²ஸாமஞ்ஞக³தோ விஹரதி ஸப்³ரஹ்மசாரீஹி ஆவி சேவ ரஹோ ச, அயம்பி த⁴ம்மோ ஸாரணீயோ. இமே கோ², பி⁴க்க²வே, ச² த⁴ம்மா ஸாரணீயா’’தி. பட²மம்.