3. ஸீலஸுத்தம்

213. [மஹாவ. 209; தீ³. நி. 3.316] ‘‘பஞ்சிமே, பி⁴க்க²வே, ஆதீ³னவா து³ஸ்ஸீலஸ்ஸ ஸீலவிபத்தியா. கதமே பஞ்ச? இத⁴, பி⁴க்க²வே, து³ஸ்ஸீலோ ஸீலவிபன்னோ பமாதா³தி⁴கரணம் மஹதிம் போ⁴க³ஜானிம் நிக³ச்ச²தி. அயம், பி⁴க்க²வே, பட²மோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலஸ்ஸ ஸீலவிபன்னஸ்ஸ பாபகோ கித்திஸத்³தோ³ அப்³பு⁴க்³க³ச்ச²தி. அயம், பி⁴க்க²வே, து³தியோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம், யதி³ ப்³ராஹ்மணபரிஸம், யதி³ க³ஹபதிபரிஸம், யதி³ ஸமணபரிஸம் – அவிஸாரதோ³ உபஸங்கமதி மங்குபூ⁴தோ. அயம், பி⁴க்க²வே, ததியோ ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ ஸம்மூள்ஹோ காலம் கரோதி. அயம், பி⁴க்க²வே, சதுத்தோ² ஆதீ³னவோ து³ஸ்ஸீலஸ்ஸ ஸீலவிபத்தியா.

‘‘புன சபரம், பி⁴க்க²வே, து³ஸ்ஸீலோ ஸீலவிபன்னோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. அயம், பி⁴க்க²வே, பஞ்சமோ ஆதீ³னவோ து³ஸ்ஸீலஸ்ஸ ஸீலவிபத்தியா. இமே கோ², பி⁴க்க²வே, பஞ்ச ஆதீ³னவா து³ஸ்ஸீலஸ்ஸ ஸீலவிபத்தியா.

‘‘பஞ்சிமே, பி⁴க்க²வே, ஆனிஸம்ஸா ஸீலவதோ ஸீலஸம்பதா³ய. கதமே பஞ்ச? இத⁴, பி⁴க்க²வே, ஸீலவா ஸீலஸம்பன்னோ அப்பமாதா³தி⁴கரணம் மஹந்தம் போ⁴க³க்க²ந்த⁴ம் அதி⁴க³ச்ச²தி. அயம், பி⁴க்க²வே, பட²மோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவதோ ஸீலஸம்பன்னஸ்ஸ கல்யாணோ கித்திஸத்³தோ³ அப்³பு⁴க்³க³ச்ச²தி. அயம், பி⁴க்க²வே, து³தியோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ யஞ்ஞதே³வ பரிஸம் உபஸங்கமதி – யதி³ க²த்தியபரிஸம், யதி³ ப்³ராஹ்மணபரிஸம், யதி³ க³ஹபதிபரிஸம், யதி³ ஸமணபரிஸம் – விஸாரதோ³ உபஸங்கமதி அமங்குபூ⁴தோ. அயம் பி⁴க்க²வே, ததியோ ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ அஸம்மூள்ஹோ காலம் கரோதி. அயம், பி⁴க்க²வே, சதுத்தோ² ஆனிஸம்ஸோ ஸீலவதோ ஸீலஸம்பதா³ய.

‘‘புன சபரம், பி⁴க்க²வே, ஸீலவா ஸீலஸம்பன்னோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. அயம், பி⁴க்க²வே, பஞ்சமோ ஆனிஸம்ஸோ ஸீலவதோ ஸீலஸம்பதா³ய. இமே கோ², பி⁴க்க²வே, பஞ்ச ஆனிஸம்ஸா ஸீலவதோ ஸீலஸம்பதா³யா’’தி. ததியம்.