10. நிஸ்ஸாரணீயஸுத்தம்

200. ‘‘பஞ்சிமா, பி⁴க்க²வே, நிஸ்ஸாரணீயா [நிஸ்ஸரணீயா (பீ.), நிஸ்ஸரணியா (தீ³. நி. 3.321)] தா⁴துயோ. கதமா பஞ்ச? இத⁴, பி⁴க்க²வே, பி⁴க்கு²னோ காமம் [காமே (ஸ்யா. கம்.) தீ³. நி. 3.321] மனஸிகரோதோ காமேஸு சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி. நேக்க²ம்மம் கோ² பனஸ்ஸ மனஸிகரோதோ நேக்க²ம்மே சித்தம் பக்க²ந்த³தி பஸீத³தி ஸந்திட்ட²தி விமுச்சதி. தஸ்ஸ தம் சித்தம் ஸுக³தம் [ஸுகதம் (பீ. க.)] ஸுபா⁴விதம் ஸுவுட்டி²தம் ஸுவிமுத்தம் ஸுவிஸம்யுத்தம் [விஸம்யுத்தம் (கத்த²சி, தீ³. நி. 3.321)] காமேஹி; யே ச காமபச்சயா உப்பஜ்ஜந்தி ஆஸவா விகா⁴தபரிளாஹா, முத்தோ ஸோ தேஹி, ந ஸோ தம் வேத³னம் வேதி³யதி. இத³மக்கா²தம் காமானம் நிஸ்ஸரணம்.

‘‘புன சபரம், பி⁴க்க²வே, பி⁴க்கு²னோ ப்³யாபாத³ம் மனஸிகரோதோ ப்³யாபாதே³ சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி. அப்³யாபாத³ம் கோ² பனஸ்ஸ மனஸிகரோதோ அப்³யாபாதே³ சித்தம் பக்க²ந்த³தி பஸீத³தி ஸந்திட்ட²தி விமுச்சதி. தஸ்ஸ தம் சித்தம் ஸுக³தம் ஸுபா⁴விதம் ஸுவுட்டி²தம் ஸுவிமுத்தம் ஸுவிஸம்யுத்தம் ப்³யாபாதே³ன; யே ச ப்³யாபாத³பச்சயா உப்பஜ்ஜந்தி ஆஸவா விகா⁴தபரிளாஹா, முத்தோ ஸோ தேஹி, ந ஸோ தம் வேத³னம் வேதி³யதி. இத³மக்கா²தம் ப்³யாபாத³ஸ்ஸ நிஸ்ஸரணம்.

‘‘புன சபரம், பி⁴க்க²வே, பி⁴க்கு²னோ விஹேஸம் மனஸிகரோதோ விஹேஸாய சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி. அவிஹேஸம் கோ² பனஸ்ஸ மனஸிகரோதோ அவிஹேஸாய சித்தம் பக்க²ந்த³தி பஸீத³தி ஸந்திட்ட²தி விமுச்சதி. தஸ்ஸ தம் சித்தம் ஸுக³தம் ஸுபா⁴விதம் ஸுவுட்டி²தம் ஸுவிமுத்தம் ஸுவிஸம்யுத்தம் விஹேஸாய; யே ச விஹேஸாபச்சயா உப்பஜ்ஜந்தி ஆஸவா விகா⁴தபரிளாஹா, முத்தோ ஸோ தேஹி, ந ஸோ தம் வேத³னம் வேதி³யதி. இத³மக்கா²தம் விஹேஸாய நிஸ்ஸரணம்.

‘‘புன சபரம், பி⁴க்க²வே, பி⁴க்கு²னோ ரூபம் மனஸிகரோதோ ரூபே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி. அரூபம் கோ² பனஸ்ஸ மனஸிகரோதோ அரூபே சித்தம் பக்க²ந்த³தி பஸீத³தி ஸந்திட்ட²தி விமுச்சதி. தஸ்ஸ தம் சித்தம் ஸுக³தம் ஸுபா⁴விதம் ஸுவுட்டி²தம் ஸுவிமுத்தம் ஸுவிஸம்யுத்தம் ரூபேஹி; யே ச ரூபபச்சயா உப்பஜ்ஜந்தி ஆஸவா விகா⁴தபரிளாஹா, முத்தோ ஸோ தேஹி, ந ஸோ தம் வேத³னம் வேதி³யதி. இத³மக்கா²தம் ரூபானம் நிஸ்ஸரணம்.

‘‘புன சபரம், பி⁴க்க²வே, பி⁴க்கு²னோ ஸக்காயம் மனஸிகரோதோ ஸக்காயே சித்தம் ந பக்க²ந்த³தி நப்பஸீத³தி ந ஸந்திட்ட²தி ந விமுச்சதி. ஸக்காயனிரோத⁴ம் கோ² பனஸ்ஸ மனஸிகரோதோ ஸக்காயனிரோதே⁴ சித்தம் பக்க²ந்த³தி பஸீத³தி ஸந்திட்ட²தி விமுச்சதி. தஸ்ஸ தம் சித்தம் ஸுக³தம் ஸுபா⁴விதம் ஸுவுட்டி²தம் ஸுவிமுத்தம் ஸுவிஸம்யுத்தம் ஸக்காயேன; யே ச ஸக்காயபச்சயா உப்பஜ்ஜந்தி ஆஸவா விகா⁴தபரிளாஹா, முத்தோ ஸோ தேஹி, ந ஸோ தம் வேத³னம் வேதி³யதி. இத³மக்கா²தம் ஸக்காயஸ்ஸ நிஸ்ஸரணம்.

‘‘தஸ்ஸ காமனந்தீ³பி நானுஸேதி, ப்³யாபாத³னந்தீ³பி நானுஸேதி, விஹேஸானந்தீ³பி நானுஸேதி, ரூபனந்தீ³பி நானுஸேதி, ஸக்காயனந்தீ³பி நானுஸேதி (ஸோ) [( ) கத்த²சி நத்தி²] காமனந்தி³யாபி அனனுஸயா, ப்³யாபாத³னந்தி³யாபி அனனுஸயா, விஹேஸானந்தி³யாபி அனனுஸயா, ரூபனந்தி³யாபி அனனுஸயா, ஸக்காயனந்தி³யாபி அனனுஸயா. அயம் வுச்சதி, பி⁴க்க²வே, பி⁴க்கு² நிரனுஸயோ, அச்சே²ச்சி² [அச்சே²ஜ்ஜி (ஸ்யா. கம். க.)] தண்ஹம், விவத்தயி [வாவத்தயி (ஸீ.)] ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸ. இமா கோ², பி⁴க்க²வே, பஞ்ச நிஸ்ஸாரணீயா தா⁴துயோ’’தி. த³ஸமம்.

ப்³ராஹ்மணவக்³கோ³ பஞ்சமோ.