10. பத்தபிண்டி³கஸுத்தம்

190. ‘‘பஞ்சிமே, பி⁴க்க²வே, பத்தபிண்டி³கா. கதமே பஞ்ச? மந்த³த்தா மோமூஹத்தா பத்தபிண்டி³கோ ஹோதி, பாபிச்சோ² இச்சா²பகதோ பத்தபிண்டி³கோ ஹோதி, உம்மாதா³ சித்தக்கே²பா பத்தபிண்டி³கோ ஹோதி, ‘வண்ணிதம் பு³த்³தே⁴ஹி பு³த்³த⁴ஸாவகேஹீ’தி பத்தபிண்டி³கோ ஹோதி, அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி. இமே கோ², பி⁴க்க²வே, பஞ்ச பத்தபிண்டி³கா. இமேஸம் கோ², பி⁴க்க²வே, பஞ்சன்னம் பத்தபிண்டி³கானம் ய்வாயம் பத்தபிண்டி³கோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி, அயம் இமேஸம் பஞ்சன்னம் பத்தபிண்டி³கானம் அக்³கோ³ ச ஸேட்டோ² ச மோக்கோ² ச உத்தமோ ச பவரோ ச.

‘‘ஸேய்யதா²பி, பி⁴க்க²வே, க³வா கீ²ரம், கீ²ரம்ஹா த³தி⁴, த³தி⁴ம்ஹா நவனீதம், நவனீதம்ஹா ஸப்பி, ஸப்பிம்ஹா ஸப்பிமண்டோ³, ஸப்பிமண்டோ³ தத்த² அக்³க³மக்கா²யதி; ஏவமேவம் கோ², பி⁴க்க²வே, இமேஸம் பஞ்சன்னம் பத்தபிண்டி³கானம் ய்வாயம் பத்தபிண்டி³கோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி, அயம் இமேஸம் பஞ்சன்னம் பத்தபிண்டி³கானம் அக்³கோ³ ச ஸேட்டோ² ச மோக்கோ² ச உத்தமோ ச பவரோ சா’’தி. த³ஸமம்.

அரஞ்ஞவக்³கோ³ சதுத்தோ².