(19) 4. அரஞ்ஞவக்³கோ³

1. ஆரஞ்ஞிகஸுத்தம்

181. ‘‘பஞ்சிமே, பி⁴க்க²வே, ஆரஞ்ஞிகா [ஆரஞ்ஞதா (ஸப்³ப³த்த²) பரி. 443 பஸ்ஸிதப்³ப³ம்]. கதமே பஞ்ச? மந்த³த்தா மோமூஹத்தா ஆரஞ்ஞிகோ ஹோதி, பாபிச்சோ² இச்சா²பகதோ ஆரஞ்ஞிகோ ஹோதி, உம்மாதா³ சித்தக்கே²பா ஆரஞ்ஞிகோ ஹோதி, வண்ணிதம் பு³த்³தே⁴ஹி பு³த்³த⁴ஸாவகேஹீதி ஆரஞ்ஞிகோ ஹோதி, அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ [இத³மட்டி²தம்யேவ (ஸீ. பீ.)] நிஸ்ஸாய ஆரஞ்ஞிகோ ஹோதி. இமே கோ², பி⁴க்க²வே, பஞ்ச ஆரஞ்ஞிகா. இமேஸம் கோ², பி⁴க்க²வே, பஞ்சன்னம் ஆரஞ்ஞிகானம் ய்வாயம் ஆரஞ்ஞிகோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய ஆரஞ்ஞிகோ ஹோதி, அயம் இமேஸம் பஞ்சன்னம் ஆரஞ்ஞிகானம் அக்³கோ³ ச ஸேட்டோ² ச மோக்கோ² [பாமோக்கோ² (அ. நி. 4.95; 10.91)] ச உத்தமோ ச பவரோ ச.

‘‘ஸேய்யதா²பி, பி⁴க்க²வே, க³வா கீ²ரம், கீ²ரம்ஹா த³தி⁴, த³தி⁴ம்ஹா நவனீதம், நவனீதம்ஹா ஸப்பி, ஸப்பிம்ஹா ஸப்பிமண்டோ³, ஸப்பிமண்டோ³ [ஸப்பிம்ஹா ஸப்பிமண்டோ³ (க.) ஸம். நி. 3.662] தத்த² அக்³க³மக்கா²யதி; ஏவமேவம் கோ², பி⁴க்க²வே, இமேஸம் பஞ்சன்னம் ஆரஞ்ஞிகானம் ய்வாயம் ஆரஞ்ஞிகோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய ஆரஞ்ஞிகோ ஹோதி, அயம் இமேஸம் பஞ்சன்னம் ஆரஞ்ஞிகானம் அக்³கோ³ ச ஸேட்டோ² ச மோக்கோ² ச உத்தமோ ச பவரோ சா’’தி. பட²மம்.

2. சீவரஸுத்தம்

182. ‘‘பஞ்சிமே, பி⁴க்க²வே, பம்ஸுகூலிகா. கதமே பஞ்ச? மந்த³த்தா மோமூஹத்தா பம்ஸுகூலிகோ ஹோதி…பே… இத³மத்தி²தம்யேவ நிஸ்ஸாய பம்ஸுகூலிகோ ஹோதி. இமே கோ², பி⁴க்க²வே, பஞ்ச பம்ஸுகூலிகா’’தி. து³தியம்.

3. ருக்க²மூலிகஸுத்தம்

183. ‘‘பஞ்சிமே, பி⁴க்க²வே, ருக்க²மூலிகா. கதமே பஞ்ச? மந்த³த்தா மோமூஹத்தா ருக்க²மூலிகோ ஹோதி…பே… இத³மத்தி²தம்யேவ நிஸ்ஸாய ருக்க²மூலிகோ ஹோதி. இமே கோ², பி⁴க்க²வே, பஞ்ச ருக்க²மூலிகா’’தி. ததியம்.

4. ஸோஸானிகஸுத்தம்

184. ‘‘பஞ்சிமே, பி⁴க்க²வே, ஸோஸானிகா. கதமே பஞ்ச? மந்த³த்தா மோமூஹத்தா ஸோஸானிகோ ஹோதி…பே… இத³மத்தி²தம்யேவ நிஸ்ஸாய ஸோஸானிகோ ஹோதி. இமே கோ², பி⁴க்க²வே, பஞ்ச ஸோஸானிகா’’தி. சதுத்த²ம்.

5. அப்³போ⁴காஸிகஸுத்தம்

185. ‘‘பஞ்சிமே, பி⁴க்க²வே, அப்³போ⁴காஸிகா…பே…. பஞ்சமம்.

6. நேஸஜ்ஜிகஸுத்தம்

186. ‘‘பஞ்சிமே, பி⁴க்க²வே, நேஸஜ்ஜிகா…பே…. ச²ட்ட²ம்.

7. யதா²ஸந்த²திகஸுத்தம்

187. ‘‘பஞ்சிமே, பி⁴க்க²வே, யதா²ஸந்த²திகா…பே…. ஸத்தமம்.

8. ஏகாஸனிகஸுத்தம்

188. ‘‘பஞ்சிமே, பி⁴க்க²வே, ஏகாஸனிகா…பே…. அட்ட²மம்.

9. க²லுபச்சா²ப⁴த்திகஸுத்தம்

189. ‘‘பஞ்சிமே, பி⁴க்க²வே, க²லுபச்சா²ப⁴த்திகா…பே…. நவமம்.

10. பத்தபிண்டி³கஸுத்தம்

190. ‘‘பஞ்சிமே, பி⁴க்க²வே, பத்தபிண்டி³கா. கதமே பஞ்ச? மந்த³த்தா மோமூஹத்தா பத்தபிண்டி³கோ ஹோதி, பாபிச்சோ² இச்சா²பகதோ பத்தபிண்டி³கோ ஹோதி, உம்மாதா³ சித்தக்கே²பா பத்தபிண்டி³கோ ஹோதி, ‘வண்ணிதம் பு³த்³தே⁴ஹி பு³த்³த⁴ஸாவகேஹீ’தி பத்தபிண்டி³கோ ஹோதி, அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி. இமே கோ², பி⁴க்க²வே, பஞ்ச பத்தபிண்டி³கா. இமேஸம் கோ², பி⁴க்க²வே, பஞ்சன்னம் பத்தபிண்டி³கானம் ய்வாயம் பத்தபிண்டி³கோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி, அயம் இமேஸம் பஞ்சன்னம் பத்தபிண்டி³கானம் அக்³கோ³ ச ஸேட்டோ² ச மோக்கோ² ச உத்தமோ ச பவரோ ச.

‘‘ஸேய்யதா²பி, பி⁴க்க²வே, க³வா கீ²ரம், கீ²ரம்ஹா த³தி⁴, த³தி⁴ம்ஹா நவனீதம், நவனீதம்ஹா ஸப்பி, ஸப்பிம்ஹா ஸப்பிமண்டோ³, ஸப்பிமண்டோ³ தத்த² அக்³க³மக்கா²யதி; ஏவமேவம் கோ², பி⁴க்க²வே, இமேஸம் பஞ்சன்னம் பத்தபிண்டி³கானம் ய்வாயம் பத்தபிண்டி³கோ அப்பிச்ச²தம்யேவ நிஸ்ஸாய ஸந்துட்டி²ம்யேவ நிஸ்ஸாய ஸல்லேக²ம்யேவ நிஸ்ஸாய பவிவேகம்யேவ நிஸ்ஸாய இத³மத்தி²தம்யேவ நிஸ்ஸாய பத்தபிண்டி³கோ ஹோதி, அயம் இமேஸம் பஞ்சன்னம் பத்தபிண்டி³கானம் அக்³கோ³ ச ஸேட்டோ² ச மோக்கோ² ச உத்தமோ ச பவரோ சா’’தி. த³ஸமம்.

அரஞ்ஞவக்³கோ³ சதுத்தோ².