(18) 3. உபாஸகவக்³கோ³

1. ஸாரஜ்ஜஸுத்தம்

171. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ ஸாரஜ்ஜம் ஓக்கந்தோ ஹோதி. கதமேஹி பஞ்சஹி? பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ ஸாரஜ்ஜம் ஓக்கந்தோ ஹோதி.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ விஸாரதோ³ ஹோதி. கதமேஹி பஞ்சஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ விஸாரதோ³ ஹோதீ’’தி. பட²மம்.

2. விஸாரத³ஸுத்தம்

172. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ அவிஸாரதோ³ அகா³ரம் அஜ்ஜா²வஸதி. கதமேஹி பஞ்சஹி? பாணாதிபாதீ ஹோதி…பே… ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ அவிஸாரதோ³ அகா³ரம் அஜ்ஜா²வஸதி.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ விஸாரதோ³ அகா³ரம் அஜ்ஜா²வஸதி. கதமேஹி பஞ்சஹி? பாணாதிபாதா படிவிரதோ ஹோதி…பே… ஸுராமேரயமஜ்ஜபமாத³ட்டா²னா படிவிரதோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ விஸாரதோ³ அகா³ரம் அஜ்ஜா²வஸதீ’’தி. து³தியம்.

3. நிரயஸுத்தம்

173. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? பாணாதிபாதீ ஹோதி…பே… ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? பாணாதிபாதா படிவிரதோ ஹோதி…பே… ஸுராமேரயமஜ்ஜபமாத³ட்டா²னா படிவிரதோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ யதா²ப⁴தம் நிக்கி²த்தோ ஏவம் ஸக்³கே³’’தி. ததியம்.

4. வேரஸுத்தம்

174. அத² கோ² அனாத²பிண்டி³கோ க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச –

‘‘பஞ்ச, க³ஹபதி, ப⁴யானி வேரானி அப்பஹாய ‘து³ஸ்ஸீலோ’ இதி வுச்சதி, நிரயஞ்ச உபபஜ்ஜதி. கதமானி பஞ்ச? பாணாதிபாதம், அதி³ன்னாதா³னம், காமேஸுமிச்சா²சாரம், முஸாவாத³ம், ஸுராமேரயமஜ்ஜபமாத³ட்டா²னம் – இமானி கோ², க³ஹபதி, பஞ்ச ப⁴யானி வேரானி அப்பஹாய ‘து³ஸ்ஸீலோ’ இதி வுச்சதி, நிரயஞ்ச உபபஜ்ஜதி.

‘‘பஞ்ச, க³ஹபதி, ப⁴யானி வேரானி பஹாய ‘ஸீலவா’ இதி வுச்சதி, ஸுக³திஞ்ச உபபஜ்ஜதி. கதமானி பஞ்ச? பாணாதிபாதம், அதி³ன்னாதா³னம், காமேஸுமிச்சா²சாரம், முஸாவாத³ம், ஸுராமேரயமஜ்ஜபமாத³ட்டா²னம் – இமானி கோ², க³ஹபதி, பஞ்ச ப⁴யானி வேரானி பஹாய ‘ஸீலவா’ இதி வுச்சதி, ஸுக³திஞ்ச உபபஜ்ஜதி.

‘‘யம், க³ஹபதி, பாணாதிபாதீ பாணாதிபாதபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, பாணாதிபாதா படிவிரதோ நேவ தி³ட்ட²த⁴ம்மிகம் ப⁴யம் வேரம் பஸவதி, ந ஸம்பராயிகம் ப⁴யம் வேரம் பஸவதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி. பாணாதிபாதா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதி.

‘‘யம், க³ஹபதி, அதி³ன்னாதா³யீ…பே….

‘‘யம், க³ஹபதி, காமேஸுமிச்சா²சாரீ…பே….

‘‘யம், க³ஹபதி, முஸாவாதீ³…பே….

‘‘யம், க³ஹபதி, ஸுராமேரயமஜ்ஜபமாத³ட்டா²யீ ஸுராமேரயமஜ்ஜபமாத³ட்டா²னபச்சயா தி³ட்ட²த⁴ம்மிகம்பி ப⁴யம் வேரம் பஸவதி, ஸம்பராயிகம்பி ப⁴யம் வேரம் பஸவதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி, ஸுராமேரயமஜ்ஜபமாத³ட்டா²னா படிவிரதோ நேவ தி³ட்ட²த⁴ம்மிகம் ப⁴யம் வேரம் பஸவதி, ந ஸம்பராயிகம் ப⁴யம் வேரம் பஸவதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி. ஸுராமேரயமஜ்ஜபமாத³ட்டா²னா படிவிரதஸ்ஸ ஏவம் தம் ப⁴யம் வேரம் வூபஸந்தம் ஹோதீ’’தி.

‘‘யோ பாணமதிபாதேதி, முஸாவாத³ஞ்ச பா⁴ஸதி;

லோகே அதி³ன்னம் ஆதி³யதி, பரதா³ரஞ்ச க³ச்ச²தி;

ஸுராமேரயபானஞ்ச, யோ நரோ அனுயுஞ்ஜதி.

‘‘அப்பஹாய பஞ்ச வேரானி, து³ஸ்ஸீலோ இதி வுச்சதி;

காயஸ்ஸ பே⁴தா³ து³ப்பஞ்ஞோ, நிரயம் ஸோபபஜ்ஜதி.

‘‘யோ பாணம் நாதிபாதேதி, முஸாவாத³ம் ந பா⁴ஸதி;

லோகே அதி³ன்னம் நாதி³யதி, பரதா³ரம் ந க³ச்ச²தி;

ஸுராமேரயபானஞ்ச, யோ நரோ நானுயுஞ்ஜதி.

‘‘பஹாய பஞ்ச வேரானி, ஸீலவா இதி வுச்சதி;

காயஸ்ஸ பே⁴தா³ ஸப்பஞ்ஞோ, ஸுக³திம் ஸோபபஜ்ஜதீ’’தி. சதுத்த²ம்;

5. சண்டா³லஸுத்தம்

175. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ உபாஸகசண்டா³லோ ச ஹோதி உபாஸகமலஞ்ச உபாஸகபதிகுட்டோ² ச [உபாஸகபதிகிட்டோ² ச (ஸீ. ஸ்யா. கம். பீ.)]. கதமேஹி பஞ்சஹி? அஸ்ஸத்³தோ⁴ ஹோதி; து³ஸ்ஸீலோ ஹோதி; கோதூஹலமங்க³லிகோ ஹோதி, மங்க³லம் பச்சேதி நோ கம்மம்; இதோ ச ப³ஹித்³தா⁴ த³க்கி²ணேய்யம் க³வேஸதி; தத்த² ச புப்³ப³காரம் கரோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ உபாஸகசண்டா³லோ ச ஹோதி உபாஸகமலஞ்ச உபாஸகபதிகுட்டோ² ச.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ உபாஸகரதனஞ்ச ஹோதி உபாஸகபது³மஞ்ச உபாஸகபுண்ட³ரீகஞ்ச [உபாஸகபுண்ட³ரீகோ ச (பீ. க.)]. கதமேஹி பஞ்சஹி? ஸத்³தோ⁴ ஹோதி; ஸீலவா ஹோதி; அகோதூஹலமங்க³லிகோ ஹோதி, கம்மம் பச்சேதி நோ மங்க³லம்; ந இதோ ப³ஹித்³தா⁴ த³க்கி²ணேய்யம் க³வேஸதி; இத⁴ ச புப்³ப³காரம் கரோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ உபாஸகோ உபாஸகரதனஞ்ச ஹோதி உபாஸகபது³மஞ்ச உபாஸகபுண்ட³ரீகஞ்சா’’தி. பஞ்சமம்.

6. பீதிஸுத்தம்

176. அத² கோ² அனாத²பிண்டி³கோ க³ஹபதி பஞ்சமத்தேஹி உபாஸகஸதேஹி பரிவுதோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச –

‘‘தும்ஹே கோ², க³ஹபதி, பி⁴க்கு²ஸங்க⁴ம் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன. ந கோ², க³ஹபதி, தாவதகேனேவ துட்டி² கரணீயா – ‘மயம் பி⁴க்கு²ஸங்க⁴ம் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேனா’தி. தஸ்மாதிஹ, க³ஹபதி, ஏவம் ஸிக்கி²தப்³ப³ம் – ‘கிந்தி மயம் காலேன காலம் பவிவேகம் பீதிம் உபஸம்பஜ்ஜ விஹரேய்யாமா’தி! ஏவஞ்ஹி வோ, க³ஹபதி, ஸிக்கி²தப்³ப³’’ந்தி.

ஏவம் வுத்தே ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘அச்ச²ரியம், ப⁴ந்தே, அப்³பு⁴தம், ப⁴ந்தே! யாவ ஸுபா⁴ஸிதம் சித³ம், ப⁴ந்தே, ப⁴க³வதா – ‘தும்ஹே கோ², க³ஹபதி, பி⁴க்கு²ஸங்க⁴ம் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன. ந கோ², க³ஹபதி, தாவதகேனேவ துட்டி² கரணீயா – மயம் பி⁴க்கு²ஸங்க⁴ம் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேனாதி. தஸ்மாதிஹ, க³ஹபதி, ஏவம் ஸிக்கி²தப்³ப³ம் – கிந்தி மயம் காலேன காலம் பவிவேகம் பீதிம் உபஸம்பஜ்ஜ விஹரேய்யாமாதி! ஏவஞ்ஹி வோ, க³ஹபதி, ஸிக்கி²தப்³ப³’ந்தி. யஸ்மிம், ப⁴ந்தே, ஸமயே அரியஸாவகோ பவிவேகம் பீதிம் உபஸம்பஜ்ஜ விஹரதி, பஞ்சஸ்ஸ டா²னானி தஸ்மிம் ஸமயே ந ஹோந்தி. யம்பிஸ்ஸ காமூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ காமூபஸம்ஹிதம் ஸுக²ம் ஸோமனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ அகுஸலூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ அகுஸலூபஸம்ஹிதம் ஸுக²ம் ஸோமனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ குஸலூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யஸ்மிம், ப⁴ந்தே, ஸமயே அரியஸாவகோ பவிவேகம் பீதிம் உபஸம்பஜ்ஜ விஹரதி, இமானிஸ்ஸ பஞ்ச [இமானி பஞ்சஸ்ஸ (ஸ்யா. கம்.)] டா²னானி தஸ்மிம் ஸமயே ந ஹோந்தீ’’தி.

‘‘ஸாது⁴ ஸாது⁴, ஸாரிபுத்த! யஸ்மிம், ஸாரிபுத்த, ஸமயே அரியஸாவகோ பவிவேகம் பீதிம் உபஸம்பஜ்ஜ விஹரதி, பஞ்சஸ்ஸ டா²னானி தஸ்மிம் ஸமயே ந ஹோந்தி. யம்பிஸ்ஸ காமூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ காமூபஸம்ஹிதம் ஸுக²ம் ஸோமனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ அகுஸலூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ அகுஸலூபஸம்ஹிதம் ஸுக²ம் ஸோமனஸ்ஸம், தம்பிஸ்ஸ தஸ்மிம் ஸமயே ந ஹோதி. யம்பிஸ்ஸ குஸலூபஸம்ஹிதம் து³க்க²ம் தோ³மனஸ்ஸம், தம்பிஸ்ஸ தஸ்மிம் ஸமயே ந ஹோதி. யஸ்மிம், ஸாரிபுத்த, ஸமயே அரியஸாவகோ பவிவேகம் பீதிம் உபஸம்பஜ்ஜ விஹரதி, இமானிஸ்ஸ [இமானேத்த² (ஸீ.)] பஞ்ச டா²னானி தஸ்மிம் ஸமயே ந ஹோந்தீ’’தி. ச²ட்ட²ம்.

7. வணிஜ்ஜாஸுத்தம்

177. ‘‘பஞ்சிமா, பி⁴க்க²வே, வணிஜ்ஜா உபாஸகேன அகரணீயா. கதமா பஞ்ச? ஸத்த²வணிஜ்ஜா, ஸத்தவணிஜ்ஜா, மம்ஸவணிஜ்ஜா, மஜ்ஜவணிஜ்ஜா, விஸவணிஜ்ஜா – இமா கோ², பி⁴க்க²வே, பஞ்ச வணிஜ்ஜா உபாஸகேன அகரணீயா’’தி. ஸத்தமம்.

8. ராஜாஸுத்தம்

178. ‘‘தம் கிம் மஞ்ஞத², பி⁴க்க²வே, அபி நு தும்ஹேஹி தி³ட்ட²ம் வா ஸுதம் வா – ‘அயம் புரிஸோ பாணாதிபாதம் பஹாய பாணாதிபாதா படிவிரதோதி [படிவிரதோ ஹோதீதி (ஸீ.), படிவிரதோ ஹோதி (ஸ்யா. கம். பீ.)]. தமேனம் ராஜானோ க³ஹேத்வா பாணாதிபாதா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’’’தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே! மயாபி கோ² ஏதம், பி⁴க்க²வே, நேவ தி³ட்ட²ம் ந ஸுதம் – ‘அயம் புரிஸோ பாணாதிபாதம் பஹாய பாணாதிபாதா படிவிரதோதி. தமேனம் ராஜானோ க³ஹேத்வா பாணாதிபாதா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி. அபி ச, க்²வஸ்ஸ ததே²வ பாபகம்மம் பவேதே³ந்தி [ததே²வ பாபகம் கம்மம் பவேத³யந்தி (ஸீ.), ததே³வ பாபகம்மம் பவேதே³தி (ஸ்யா. கம்.)] – ‘அயம் புரிஸோ இத்தி²ம் வா புரிஸம் வா ஜீவிதா வோரோபேஸீதி [வோரோபேதீதி (ஸ்யா. கம்.)]. தமேனம் ராஜானோ க³ஹேத்வா பாணாதிபாதஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தி. அபி நு தும்ஹேஹி ஏவரூபம் தி³ட்ட²ம் வா ஸுதம் வா’’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி [ஸூயிஸ்ஸதி (ஸீ. பீ.)] சா’’தி.

‘‘தம் கிம் மஞ்ஞத², பி⁴க்க²வே, அபி நு தும்ஹேஹி தி³ட்ட²ம் வா ஸுதம் வா – ‘அயம் புரிஸோ அதி³ன்னாதா³னம் பஹாய அதி³ன்னாதா³னா படிவிரதோதி. தமேனம் ராஜானோ க³ஹேத்வா அதி³ன்னாதா³னா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’’’தி? ‘‘நோ ஹேதம் ப⁴ந்தே’’. ‘‘ஸாது⁴, பி⁴க்க²வே! மயாபி கோ² ஏதம், பி⁴க்க²வே, நேவ தி³ட்ட²ம் ந ஸுதம் – ‘அயம் புரிஸோ அதி³ன்னாதா³னம் பஹாய அதி³ன்னாதா³னா படிவிரதோதி. தமேனம் ராஜானோ க³ஹேத்வா அதி³ன்னாதா³னா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி. அபி ச க்²வஸ்ஸ ததே²வ பாபகம்மம் பவேதே³ந்தி – ‘அயம் புரிஸோ கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யீதி [ஆதி³யதி (ஸ்யா. கம்.)]. தமேனம் ராஜானோ க³ஹேத்வா அதி³ன்னாதா³னஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தி. அபி நு தும்ஹேஹி ஏவரூபம் தி³ட்ட²ம் வா ஸுதம் வா’’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி.

‘‘தம் கிம் மஞ்ஞத², பி⁴க்க²வே, அபி நு தும்ஹேஹி தி³ட்ட²ம் வா ஸுதம் வா – ‘அயம் புரிஸோ காமேஸுமிச்சா²சாரம் பஹாய காமேஸுமிச்சா²சாரா படிவிரதோதி. தமேனம் ராஜானோ க³ஹேத்வா காமேஸுமிச்சா²சாரா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’’’தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே! மயாபி கோ² ஏதம், பி⁴க்க²வே, நேவ தி³ட்ட²ம் ந ஸுதம் – ‘அயம் புரிஸோ காமேஸுமிச்சா²சாரம் பஹாய காமேஸுமிச்சா²சாரா படிவிரதோதி. தமேனம் ராஜானோ க³ஹேத்வா காமேஸுமிச்சா²சாரா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி. அபி ச க்²வஸ்ஸ ததே²வ பாபகம்மம் பவேதே³ந்தி – ‘அயம் புரிஸோ பரித்தீ²ஸு பரகுமாரீஸு சாரித்தம் ஆபஜ்ஜீதி [ஆபஜ்ஜதி (ஸ்யா. கம்.)]. தமேனம் ராஜானோ க³ஹேத்வா காமேஸுமிச்சா²சாரஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தி. அபி நு தும்ஹேஹி ஏவரூபம் தி³ட்ட²ம் வா ஸுதம் வா’’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி.

‘‘தம் கிம் மஞ்ஞத², பி⁴க்க²வே, அபி நு தும்ஹேஹி தி³ட்ட²ம் வா ஸுதம் வா – ‘அயம் புரிஸோ முஸாவாத³ம் பஹாய முஸாவாதா³ படிவிரதோதி. தமேனம் ராஜானோ க³ஹேத்வா முஸாவாதா³ வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’’’தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே! மயாபி கோ² ஏதம், பி⁴க்க²வே, நேவ தி³ட்ட²ம் ந ஸுதம் – ‘அயம் புரிஸோ முஸாவாத³ம் பஹாய முஸாவாதா³ படிவிரதோதி. தமேனம் ராஜானோ க³ஹேத்வா முஸாவாதா³ வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி. அபி ச க்²வஸ்ஸ ததே²வ பாபகம்மம் பவேதே³ந்தி – ‘அயம் புரிஸோ க³ஹபதிஸ்ஸ வா க³ஹபதிபுத்தஸ்ஸ வா முஸாவாதே³ன அத்த²ம் பப⁴ஞ்ஜீதி [ப⁴ஞ்ஜதீதி (ஸீ.), ப⁴ஞ்ஜதி (ஸ்யா. கம்.), ப⁴ஞ்ஜீதி (பீ.)]. தமேனம் ராஜானோ க³ஹேத்வா முஸாவாத³ஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தி. அபி நு தும்ஹேஹி ஏவரூபம் தி³ட்ட²ம் வா ஸுதம் வா’’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி.

‘‘தம் கிம் மஞ்ஞத², பி⁴க்க²வே, அபி நு தும்ஹேஹி தி³ட்ட²ம் வா ஸுதம் வா – ‘அயம் புரிஸோ ஸுராமேரயமஜ்ஜபமாத³ட்டா²னம் பஹாய ஸுராமேரயமஜ்ஜபமாத³ட்டா²னா படிவிரதோதி. தமேனம் ராஜானோ க³ஹேத்வா ஸுராமேரயமஜ்ஜபமாத³ட்டா²னா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே! மயாபி கோ² ஏதம், பி⁴க்க²வே, நேவ தி³ட்ட²ம் ந ஸுதம் – ‘அயம் புரிஸோ ஸுராமேரயமஜ்ஜபமாத³ட்டா²னம் பஹாய ஸுராமேரயமஜ்ஜபமாத³ட்டா²னா படிவிரதோதி. தமேனம் ராஜானோ க³ஹேத்வா ஸுராமேரயமஜ்ஜபமாத³ட்டா²னா வேரமணிஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தீ’தி. அபி ச க்²வஸ்ஸ ததே²வ பாபகம்மம் பவேதே³ந்தி – ‘அயம் புரிஸோ ஸுராமேரயமஜ்ஜபமாத³ட்டா²னம் அனுயுத்தோ இத்தி²ம் வா புரிஸம் வா ஜீவிதா வோரோபேஸி [வோரோபேதி (ஸ்யா.)]; அயம் புரிஸோ ஸுராமேரயமஜ்ஜபமாத³ட்டா²னம் அனுயுத்தோ கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யி [ஆதி³யதி (ஸீ. ஸ்யா.)]; அயம் புரிஸோ ஸுராமேரயமஜ்ஜபமாத³ட்டா²னம் அனுயுத்தோ பரித்தீ²ஸு பரகுமாரீஸு சாரித்தம் ஆபஜ்ஜி [ஆபஜ்ஜதி (ஸீ. ஸ்யா.)]; அயம் புரிஸோ ஸுராமேரயமஜ்ஜபமாத³ட்டா²னம் அனுயுத்தோ க³ஹபதிஸ்ஸ வா க³ஹபதிபுத்தஸ்ஸ வா முஸாவாதே³ன அத்த²ம் பப⁴ஞ்ஜீதி. தமேனம் ராஜானோ க³ஹேத்வா ஸுராமேரயமஜ்ஜபமாத³ட்டா²னஹேது ஹனந்தி வா ப³ந்த⁴ந்தி வா பப்³பா³ஜேந்தி வா யதா²பச்சயம் வா கரோந்தி. அபி நு தும்ஹேஹி ஏவரூபம் தி³ட்ட²ம் வா ஸுதம் வா’’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி. அட்ட²மம்.

9. கி³ஹிஸுத்தம்

179. அத² கோ² அனாத²பிண்டி³கோ க³ஹபதி பஞ்சமத்தேஹி உபாஸகஸதேஹி பரிவுதோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. அத² கோ² ப⁴க³வா ஆயஸ்மந்தம் ஸாரிபுத்தம் ஆமந்தேஸி – ‘‘யம் கஞ்சி [யம் கிஞ்சி (ஸீ. பீ.)], ஸாரிபுத்த, ஜானேய்யாத² கி³ஹிம் ஓதா³தவஸனம் பஞ்சஸு ஸிக்கா²பதே³ஸு ஸம்வுதகம்மந்தம் சதுன்னம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபி⁴ம் அகிச்ச²லாபி⁴ம் அகஸிரலாபி⁴ம், ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி.

‘‘கதமேஸு பஞ்சஸு ஸிக்கா²பதே³ஸு ஸம்வுதகம்மந்தோ ஹோதி? இத⁴, ஸாரிபுத்த, அரியஸாவகோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. இமேஸு பஞ்சஸு ஸிக்கா²பதே³ஸு ஸம்வுதகம்மந்தோ ஹோதி.

‘‘கதமேஸம் சதுன்னம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴? இத⁴, ஸாரிபுத்த, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி², ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. அயமஸ்ஸ பட²மோ ஆபி⁴சேதஸிகோ தி³ட்ட²த⁴ம்மஸுக²விஹாரோ அதி⁴க³தோ ஹோதி அவிஸுத்³த⁴ஸ்ஸ சித்தஸ்ஸ விஸுத்³தி⁴யா அபரியோதா³தஸ்ஸ சித்தஸ்ஸ பரியோத³பனாய.

‘‘புன சபரம், ஸாரிபுத்த, அரியஸாவகோ த⁴ம்மே அவேச்சப்பஸாதே³ன ஸமன்னாக³தோ ஹோதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’தி. அயமஸ்ஸ து³தியோ ஆபி⁴சேதஸிகோ தி³ட்ட²த⁴ம்மஸுக²விஹாரோ அதி⁴க³தோ ஹோதி அவிஸுத்³த⁴ஸ்ஸ சித்தஸ்ஸ விஸுத்³தி⁴யா அபரியோதா³தஸ்ஸ சித்தஸ்ஸ பரியோத³பனாய.

‘‘புன சபரம், ஸாரிபுத்த, அரியஸாவகோ ஸங்கே⁴ அவேச்சப்பஸாதே³ன ஸமன்னாக³தோ ஹோதி – ‘ஸுப்படிபன்னோ ப⁴க³வதோ ஸாவகஸங்கோ⁴ உஜுப்படிபன்னோ ப⁴க³வதோ ஸாவகஸங்கோ⁴ ஞாயப்படிபன்னோ ப⁴க³வதோ ஸாவகஸங்கோ⁴ ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ம் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’தி. அயமஸ்ஸ ததியோ ஆபி⁴சேதஸிகோ தி³ட்ட²த⁴ம்மஸுக²விஹாரோ அதி⁴க³தோ ஹோதி அவிஸுத்³த⁴ஸ்ஸ சித்தஸ்ஸ விஸுத்³தி⁴யா அபரியோதா³தஸ்ஸ சித்தஸ்ஸ பரியோத³பனாய.

‘‘புன சபரம், ஸாரிபுத்த, அரியஸாவகோ அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி அச்சி²த்³தே³ஹி அஸப³லேஹி அகம்மாஸேஹி பு⁴ஜிஸ்ஸேஹி விஞ்ஞுப்பஸத்தே²ஹி அபராமட்டே²ஹி ஸமாதி⁴ஸம்வத்தனிகேஹி. அயமஸ்ஸ சதுத்தோ² ஆபி⁴சேதஸிகோ தி³ட்ட²த⁴ம்மஸுக²விஹாரோ அதி⁴க³தோ ஹோதி அவிஸுத்³த⁴ஸ்ஸ சித்தஸ்ஸ விஸுத்³தி⁴யா அபரியோதா³தஸ்ஸ சித்தஸ்ஸ பரியோத³பனாய. இமேஸம் சதுன்னம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴.

‘‘யம் கஞ்சி, ஸாரிபுத்த, ஜானேய்யாத² கி³ஹிம் ஓதா³தவஸனம் – இமேஸு பஞ்சஸு ஸிக்கா²பதே³ஸு ஸம்வுதகம்மந்தம், இமேஸஞ்ச சதுன்னம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபி⁴ம் அகிச்ச²லாபி⁴ம் அகஸிரலாபி⁴ம், ஸோ ஆகங்க²மானோ அத்தனாவ அத்தானம் ப்³யாகரேய்ய – ‘கீ²ணனிரயோம்ஹி கீ²ணதிரச்சா²னயோனி கீ²ணபேத்திவிஸயோ கீ²ணாபாயது³க்³க³திவினிபாதோ, ஸோதாபன்னோஹமஸ்மி அவினிபாதத⁴ம்மோ நியதோ ஸம்போ³தி⁴பராயணோ’’’தி.

‘‘நிரயேஸு ப⁴யம் தி³ஸ்வா, பாபானி பரிவஜ்ஜயே;

அரியத⁴ம்மம் ஸமாதா³ய, பண்டி³தோ பரிவஜ்ஜயே.

‘‘ந ஹிம்ஸே பாணபூ⁴தானி, விஜ்ஜமானே பரக்கமே;

முஸா ச ந ப⁴ணே ஜானம், அதி³ன்னம் ந பராமஸே.

‘‘ஸேஹி தா³ரேஹி ஸந்துட்டோ², பரதா³ரஞ்ச ஆரமே [நாரமே (ஸீ. ஸ்யா.)];

மேரயம் வாருணிம் ஜந்து, ந பிவே சித்தமோஹனிம்.

‘‘அனுஸ்ஸரேய்ய ஸம்பு³த்³த⁴ம், த⁴ம்மஞ்சானுவிதக்கயே;

அப்³யாபஜ்ஜம் [அப்³யாபஜ்ஜ²ம் (?) அப்³யாபஜ்ஜ²ம் (க.)] ஹிதம் சித்தம், தே³வலோகாய பா⁴வயே.

‘‘உபட்டி²தே தே³ய்யத⁴ம்மே, புஞ்ஞத்த²ஸ்ஸ ஜிகீ³ஸதோ [ஜிகி³ம்ஸதோ (ஸீ. ஸ்யா. கம். பீ.)];

ஸந்தேஸு பட²மம் தி³ன்னா, விபுலா ஹோதி த³க்கி²ணா.

‘‘ஸந்தோ ஹவே பவக்கா²மி, ஸாரிபுத்த ஸுணோஹி மே;

இதி கண்ஹாஸு ஸேதாஸு, ரோஹிணீஸு ஹரீஸு வா.

‘‘கம்மாஸாஸு ஸரூபாஸு, கோ³ஸு பாரேவதாஸு வா;

யாஸு காஸுசி ஏதாஸு, த³ந்தோ ஜாயதி புங்க³வோ.

‘‘தோ⁴ரய்ஹோ ப³லஸம்பன்னோ, கல்யாணஜவனிக்கமோ;

தமேவ பா⁴ரே யுஞ்ஜந்தி, நாஸ்ஸ வண்ணம் பரிக்க²ரே.

‘‘ஏவமேவம் மனுஸ்ஸேஸு, யஸ்மிம் கிஸ்மிஞ்சி ஜாதியே;

க²த்தியே ப்³ராஹ்மணே வேஸ்ஸே, ஸுத்³தே³ சண்டா³லபுக்குஸே.

‘‘யாஸு காஸுசி ஏதாஸு, த³ந்தோ ஜாயதி ஸுப்³ப³தோ;

த⁴ம்மட்டோ² ஸீலஸம்பன்னோ, ஸச்சவாதீ³ ஹிரீமனோ.

‘‘பஹீனஜாதிமரணோ, ப்³ரஹ்மசரியஸ்ஸ கேவலீ;

பன்னபா⁴ரோ விஸம்யுத்தோ, கதகிச்சோ அனாஸவோ.

‘‘பாரகூ³ ஸப்³ப³த⁴ம்மானம், அனுபாதா³ய நிப்³பு³தோ;

தஸ்மிஞ்ச விரஜே கே²த்தே, விபுலா ஹோதி த³க்கி²ணா.

‘‘பா³லா ச அவிஜானந்தா, து³ம்மேதா⁴ அஸ்ஸுதாவினோ;

ப³ஹித்³தா⁴ த³த³ந்தி தா³னானி, ந ஹி ஸந்தே உபாஸரே.

‘‘யே ச ஸந்தே உபாஸந்தி, ஸப்பஞ்ஞே தீ⁴ரஸம்மதே;

ஸத்³தா⁴ ச நேஸம் ஸுக³தே, மூலஜாதா பதிட்டி²தா.

‘‘தே³வலோகஞ்ச தே யந்தி, குலே வா இத⁴ ஜாயரே;

அனுபுப்³பே³ன நிப்³பா³னம், அதி⁴க³ச்ச²ந்தி பண்டி³தா’’தி. நவமம்;

10. க³வேஸீஸுத்தம்

180. ஏகம் ஸமயம் ப⁴க³வா கோஸலேஸு சாரிகம் சரதி மஹதா பி⁴க்கு²ஸங்கே⁴ன ஸத்³தி⁴ம். அத்³த³ஸா கோ² ப⁴க³வா அத்³தா⁴னமக்³க³ப்படிபன்னோ அஞ்ஞதரஸ்மிம் பதே³ஸே மஹந்தம் ஸாலவனம்; தி³ஸ்வான [தி³ஸ்வா (ஸீ. பீ.)] மக்³கா³ ஓக்கம்ம [உக்கம்ம (கத்த²சி)] யேன தம் ஸாலவனம் தேனுபஸங்கமி; உபஸங்கமித்வா தம் ஸாலவனம் அஜ்ஜோ²கா³ஹேத்வா அஞ்ஞதரஸ்மிம் பதே³ஸே ஸிதம் பாத்வாகாஸி.

அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘கோ நு கோ² ஹேது கோ பச்சயோ ப⁴க³வதோ ஸிதஸ்ஸ பாதுகம்மாய? ந அகாரணேன ததா²க³தா ஸிதம் பாதுகரோந்தீ’’தி. அத² கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ ப⁴க³வதோ ஸிதஸ்ஸ பாதுகம்மாய? ந அகாரணேன ததா²க³தா ஸிதம் பாதுகரோந்தீ’’தி.

‘‘பூ⁴தபுப்³ப³ம், ஆனந்த³, இமஸ்மிம் பதே³ஸே நக³ரம் அஹோஸி இத்³த⁴ஞ்சேவ பீ²தஞ்ச ப³ஹுஜனம் ஆகிண்ணமனுஸ்ஸம். தம் கோ² பனானந்த³, நக³ரம் கஸ்ஸபோ ப⁴க³வா அரஹம் ஸம்மாஸம்பு³த்³தோ⁴ உபனிஸ்ஸாய விஹாஸி. கஸ்ஸபஸ்ஸ கோ² பனானந்த³, ப⁴க³வதோ அரஹதோ ஸம்மாஸம்பு³த்³த⁴ஸ்ஸ க³வேஸீ நாம உபாஸகோ அஹோஸி ஸீலேஸு அபரிபூரகாரீ. க³வேஸினா கோ², ஆனந்த³, உபாஸகேன பஞ்சமத்தானி உபாஸகஸதானி படிதே³ஸிதானி ஸமாத³பிதானி [ஸமாதா³பிதானி (?)] அஹேஸும் ஸீலேஸு அபரிபூரகாரினோ. அத² கோ², ஆனந்த³, க³வேஸிஸ்ஸ உபாஸகஸ்ஸ ஏதத³ஹோஸி – ‘அஹம் கோ² இமேஸம் பஞ்சன்னம் உபாஸகஸதானம் ப³ஹூபகாரோ [ப³ஹுகாரோ (கத்த²சி)] புப்³ப³ங்க³மோ ஸமாத³பேதா [ஸமாதா³பேதா (?)], அஹஞ்சம்ஹி ஸீலேஸு அபரிபூரகாரீ, இமானி ச பஞ்ச உபாஸகஸதானி ஸீலேஸு அபரிபூரகாரினோ. இச்சேதம் ஸமஸமம், நத்தி² கிஞ்சி அதிரேகம்; ஹந்தா³ஹம் அதிரேகாயா’’’தி.

‘‘அத² கோ², ஆனந்த³, க³வேஸீ உபாஸகோ யேன தானி பஞ்ச உபாஸகஸதானி தேனுபஸங்கமி; உபஸங்கமித்வா தானி பஞ்ச உபாஸகஸதானி ஏதத³வோச – ‘அஜ்ஜதக்³கே³ மம் ஆயஸ்மந்தோ ஸீலேஸு பரிபூரகாரிம் தா⁴ரேதா²’தி! அத² கோ², ஆனந்த³, தேஸம் பஞ்சன்னம் உபாஸகஸதானம் ஏதத³ஹோஸி – ‘அய்யோ கோ² க³வேஸீ அம்ஹாகம் ப³ஹூபகாரோ புப்³ப³ங்க³மோ ஸமாத³பேதா. அய்யோ ஹி நாம க³வேஸீ ஸீலேஸு பரிபூரகாரீ ப⁴விஸ்ஸதி. கிமங்க³ம் [கிமங்க³ (ஸீ. பீ.)] பன மய’ந்தி [பன ந மயந்தி (ஸீ.) அ. நி. 4.159; சூளவ. 330; ஸம். நி. 5.1020 பாளியா ஸம்ஸந்தே³தப்³ப³ம்]! அத² கோ², ஆனந்த³, தானி பஞ்ச உபாஸகஸதானி யேன க³வேஸீ உபாஸகோ தேனுபஸங்கமிம்ஸு; உபஸங்கமித்வா க³வேஸிம் உபாஸகம் ஏதத³வோசும் – ‘அஜ்ஜதக்³கே³ அய்யோ க³வேஸீ இமானிபி பஞ்ச உபாஸகஸதானி ஸீலேஸு பரிபூரகாரினோ தா⁴ரேதூ’தி. அத² கோ², ஆனந்த³, க³வேஸிஸ்ஸ உபாஸகஸ்ஸ ஏதத³ஹோஸி – ‘அஹம் கோ² இமேஸம் பஞ்சன்னம் உபாஸகஸதானம் ப³ஹூபகாரோ புப்³ப³ங்க³மோ ஸமாத³பேதா, அஹஞ்சம்ஹி ஸீலேஸு பரிபூரகாரீ, இமானிபி பஞ்ச உபாஸகஸதானி ஸீலேஸு பரிபூரகாரினோ. இச்சேதம் ஸமஸமம், நத்தி² கிஞ்சி அதிரேகம்; ஹந்தா³ஹம் அதிரேகாயா’’’தி!

‘‘அத² கோ², ஆனந்த³, க³வேஸீ உபாஸகோ யேன தானி பஞ்ச உபாஸகஸதானி தேனுபஸங்கமி; உபஸங்கமித்வா தானி பஞ்ச உபாஸகஸதானி ஏதத³வோச – ‘அஜ்ஜதக்³கே³ மம் ஆயஸ்மந்தோ ப்³ரஹ்மசாரிம் தா⁴ரேத² ஆராசாரி [அனாசாரிம் (பீ.)] விரதம் மேது²னா கா³மத⁴ம்மா’தி. அத² கோ², ஆனந்த³, தேஸம் பஞ்சன்னம் உபாஸகஸதானம் ஏதத³ஹோஸி – ‘அய்யோ கோ² க³வேஸீ அம்ஹாகம் ப³ஹூபகாரோ புப்³ப³ங்க³மோ ஸமாத³பேதா. அய்யோ ஹி நாம க³வேஸீ ப்³ரஹ்மசாரீ ப⁴விஸ்ஸதி ஆராசாரீ விரதோ மேது²னா கா³மத⁴ம்மா. கிமங்க³ம் பன மய’ந்தி! அத² கோ², ஆனந்த³, தானி பஞ்ச உபாஸகஸதானி யேன க³வேஸீ உபாஸகோ தேனுபஸங்கமிம்ஸு; உபஸங்கமித்வா க³வேஸிம் உபாஸகம் ஏதத³வோசும் – ‘அஜ்ஜதக்³கே³ அய்யோ க³வேஸீ இமானிபி பஞ்ச உபாஸகஸதானி ப்³ரஹ்மசாரினோ தா⁴ரேது ஆராசாரினோ விரதா மேது²னா கா³மத⁴ம்மா’தி. அத² கோ², ஆனந்த³, க³வேஸிஸ்ஸ உபாஸகஸ்ஸ ஏதத³ஹோஸி – ‘அஹம் கோ² இமேஸம் பஞ்சன்னம் உபாஸகஸதானம் ப³ஹூபகாரோ புப்³ப³ங்க³மோ ஸமாத³பேதா. அஹஞ்சம்ஹி ஸீலேஸு பரிபூரகாரீ. இமானிபி பஞ்ச உபாஸகஸதானி ஸீலேஸு பரிபூரகாரினோ. அஹஞ்சம்ஹி ப்³ரஹ்மசாரீ ஆராசாரீ விரதோ மேது²னா கா³மத⁴ம்மா. இமானிபி பஞ்ச உபாஸகஸதானி ப்³ரஹ்மசாரினோ ஆராசாரினோ விரதா மேது²னா கா³மத⁴ம்மா. இச்சேதம் ஸமஸமம், நத்தி² கிஞ்சி அதிரேகம்; ஹந்தா³ஹம் அதிரேகாயா’’’தி.

‘‘அத² கோ², ஆனந்த³, க³வேஸீ உபாஸகோ யேன தானி பஞ்ச உபாஸகஸதானி தேனுபஸங்கமி; உபஸங்கமித்வா தானி பஞ்ச உபாஸகஸதானி ஏதத³வோச – ‘அஜ்ஜதக்³கே³ மம் ஆயஸ்மந்தோ ஏகப⁴த்திகம் தா⁴ரேத² ரத்தூபரதம் விரதம் விகாலபோ⁴ஜனா’தி. அத² கோ², ஆனந்த³, தேஸம் பஞ்சன்னம் உபாஸகஸதானம் ஏதத³ஹோஸி – ‘அய்யோ கோ² க³வேஸீ ப³ஹூபகாரோ புப்³ப³ங்க³மோ ஸமாத³பேதா. அய்யோ ஹி நாம க³வேஸீ ஏகப⁴த்திகோ ப⁴விஸ்ஸதி ரத்தூபரதோ விரதோ விகாலபோ⁴ஜனா. கிமங்க³ம் பன மய’ந்தி! அத² கோ², ஆனந்த³, தானி பஞ்ச உபாஸகஸதானி யேன க³வேஸீ உபாஸகோ தேனுபஸங்கமிம்ஸு; உபஸங்கமித்வா க³வேஸிம் உபாஸகம் ஏதத³வோசும் – ‘அஜ்ஜதக்³கே³ அய்யோ க³வேஸீ இமானிபி பஞ்ச உபாஸகஸதானி ஏகப⁴த்திகே தா⁴ரேது ரத்தூபரதே விரதே விகாலபோ⁴ஜனா’தி. அத² கோ², ஆனந்த³, க³வேஸிஸ்ஸ உபாஸகஸ்ஸ ஏதத³ஹோஸி – ‘அஹம் கோ² இமேஸம் பஞ்சன்னம் உபாஸகஸதானம் ப³ஹூபகாரோ புப்³ப³ங்க³மோ ஸமாத³பேதா. அஹஞ்சம்ஹி ஸீலேஸு பரிபூரகாரீ. இமானிபி பஞ்ச உபாஸகஸதானி ஸீலேஸு பரிபூரகாரினோ. அஹஞ்சம்ஹி ப்³ரஹ்மசாரீ ஆராசாரீ விரதோ மேது²னா கா³மத⁴ம்மா. இமானிபி பஞ்ச உபாஸகஸதானி ப்³ரஹ்மசாரினோ ஆராசாரினோ விரதா மேது²னா கா³மத⁴ம்மா. அஹஞ்சம்ஹி ஏகப⁴த்திகோ ரத்தூபரதோ விரதோ விகாலபோ⁴ஜனா. இமானிபி பஞ்ச உபாஸகஸதானி ஏகப⁴த்திகா ரத்தூபரதா விரதா விகாலபோ⁴ஜனா. இச்சேதம் ஸமஸமம், நத்தி² கிஞ்சி அதிரேகம்; ஹந்தா³ஹம் அதிரேகாயா’’’தி.

‘‘அத² கோ², ஆனந்த³, க³வேஸீ உபாஸகோ யேன கஸ்ஸபோ ப⁴க³வா அரஹம் ஸம்மாஸம்பு³த்³தோ⁴ தேனுபஸங்கமி; உபஸங்கமித்வா கஸ்ஸபம் ப⁴க³வந்தம் அரஹந்தம் ஸம்மாஸம்பு³த்³த⁴ம் ஏதத³வோச – ‘லபே⁴ய்யாஹம், ப⁴ந்தே, ப⁴க³வதோ ஸந்திகே பப்³ப³ஜ்ஜம் லபே⁴ய்யம் உபஸம்பத³’ந்தி. அலத்த² கோ², ஆனந்த³, க³வேஸீ உபாஸகோ கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸந்திகே பப்³ப³ஜ்ஜம், அலத்த² உபஸம்பத³ம். அசிரூபஸம்பன்னோ கோ² பனானந்த³, க³வேஸீ பி⁴க்கு² ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி, தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி அப்³ப⁴ஞ்ஞாஸி. அஞ்ஞதரோ ச பனானந்த³, க³வேஸீ பி⁴க்கு² அரஹதம் அஹோஸி.

‘‘அத² கோ², ஆனந்த³, தேஸ பஞ்சன்னம் உபாஸகஸதானம் ஏதத³ஹோஸி – ‘அய்யோ கோ² க³வேஸீ அம்ஹாகம் ப³ஹூபகாரோ புப்³ப³ங்க³மோ ஸமாத³பேதா. அய்யோ ஹி நாம க³வேஸீ கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜிஸ்ஸதி. கிமங்க³ம் பன மய’ந்தி! அத² கோ², ஆனந்த³, தானி பஞ்ச உபாஸகஸதானி யேன கஸ்ஸபோ ப⁴க³வா அரஹம் ஸம்மாஸம்பு³த்³தோ⁴ தேனுபஸங்கமிம்ஸு; உபஸங்கமித்வா கஸ்ஸபம் ப⁴க³வந்தம் அரஹந்தம் ஸம்மாஸம்பு³த்³த⁴ம் ஏதத³வோசும் – ‘லபே⁴ய்யாம மயம், ப⁴ந்தே, ப⁴க³வதோ ஸந்திகே பப்³ப³ஜ்ஜம், லபே⁴ய்யாம உபஸம்பத³’ந்தி. அலபி⁴ம்ஸு கோ², ஆனந்த³, தானி பஞ்ச உபாஸகஸதானி கஸ்ஸபஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸந்திகே பப்³ப³ஜ்ஜம், அலபி⁴ம்ஸு உபஸம்பத³ம்.

‘‘அத² கோ², ஆனந்த³, க³வேஸிஸ்ஸ பி⁴க்கு²னோ ஏதத³ஹோஸி – ‘அஹம் கோ² இமஸ்ஸ அனுத்தரஸ்ஸ விமுத்திஸுக²ஸ்ஸ நிகாமலாபீ⁴ ஹோமி அகிச்ச²லாபீ⁴ அகஸிரலாபீ⁴. அஹோ வதிமானிபி பஞ்ச பி⁴க்கு²ஸதானி இமஸ்ஸ அனுத்தரஸ்ஸ விமுத்திஸுக²ஸ்ஸ நிகாமலாபி⁴னோ அஸ்ஸு அகிச்ச²லாபி⁴னோ அகஸிரலாபி⁴னோ’தி. அத² கோ², ஆனந்த³, தானி பஞ்ச பி⁴க்கு²ஸதானி வூபகட்டா² [பி⁴க்கு²ஸதானி ஏகேகா வூபகட்டா² (ஸ்யா. கம்.)] அப்பமத்தா ஆதாபினோ பஹிதத்தா விஹரந்தா நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி, தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிம்ஸு. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி அப்³ப⁴ஞ்ஞிம்ஸு’’.

‘‘இதி கோ², ஆனந்த³, தானி பஞ்ச பி⁴க்கு²ஸதானி க³வேஸீபமுகா²னி உத்தருத்தரி [உத்தருத்தரிம் (ஸீ. ஸ்யா. கம். பீ.)] பணீதபணீதம் வாயமமானா அனுத்தரம் விமுத்திம் ஸச்சா²கம்ஸு. தஸ்மாதிஹ, ஆனந்த³, ஏவம் ஸிக்கி²தப்³ப³ம் – ‘உத்தருத்தரி பணீதபணீதம் வாயமமானா அனுத்தரம் விமுத்திம் ஸச்சி²கரிஸ்ஸாமா’தி. ஏவஞ்ஹி வோ, ஆனந்த³, ஸிக்கி²தப்³ப³’’ந்தி. த³ஸமம்.

உபாஸகவக்³கோ³ ததியோ.