7. து³க்கதா²ஸுத்தம்

157. ‘‘பஞ்சன்னம், பி⁴க்க²வே, புக்³க³லானம் கதா² து³க்கதா² புக்³க³லே புக்³க³லம் [புக்³க³லம் புக்³க³லம் (ஸீ. பீ.)] உபனிதா⁴ய. கதமேஸம் பஞ்சன்னம்? அஸ்ஸத்³த⁴ஸ்ஸ, பி⁴க்க²வே, ஸத்³தா⁴கதா² து³க்கதா²; து³ஸ்ஸீலஸ்ஸ ஸீலகதா² து³க்கதா²; அப்பஸ்ஸுதஸ்ஸ பா³ஹுஸச்சகதா² து³க்கதா²; மச்ச²ரிஸ்ஸ [மச்ச²ரியஸ்ஸ (ஸீ. பீ. க.)] சாக³கதா² து³க்கதா²; து³ப்பஞ்ஞஸ்ஸ பஞ்ஞாகதா² து³க்கதா².

‘‘கஸ்மா ச, பி⁴க்க²வே, அஸ்ஸத்³த⁴ஸ்ஸ ஸத்³தா⁴கதா² து³க்கதா²? அஸ்ஸத்³தோ⁴, பி⁴க்க²வே, ஸத்³தா⁴கதா²ய கச்ச²மானாய அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸத்³தா⁴ஸம்பத³ம் அத்தனி ந ஸமனுபஸ்ஸதி [ந ஸம்பஸ்ஸதி (ஸீ.)], ந ச லப⁴தி ததோனிதா³னம் பீதிபாமோஜ்ஜம். தஸ்மா அஸ்ஸத்³த⁴ஸ்ஸ ஸத்³தா⁴கதா² து³க்கதா².

‘‘கஸ்மா ச, பி⁴க்க²வே, து³ஸ்ஸீலஸ்ஸ ஸீலகதா² து³க்கதா²? து³ஸ்ஸீலோ, பி⁴க்க²வே, ஸீலகதா²ய கச்ச²மானாய அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸீலஸம்பத³ம் அத்தனி ந ஸமனுபஸ்ஸதி ந ச லப⁴தி ததோனிதா³னம் பீதிபாமோஜ்ஜம். தஸ்மா து³ஸ்ஸீலஸ்ஸ ஸீலகதா² து³க்கதா².

‘‘கஸ்மா ச, பி⁴க்க²வே, அப்பஸ்ஸுதஸ்ஸ பா³ஹுஸச்சகதா² து³க்கதா²? அப்பஸ்ஸுதோ, பி⁴க்க²வே, பா³ஹுஸச்சகதா²ய கச்ச²மானாய அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸுதஸம்பத³ம் அத்தனி ந ஸமனுபஸ்ஸதி, ந ச லப⁴தி ததோனிதா³னம் பீதிபாமோஜ்ஜம். தஸ்மா அப்பஸ்ஸுதஸ்ஸ பா³ஹுஸச்சகதா² து³க்கதா².

‘‘கஸ்மா ச, பி⁴க்க²வே, மச்ச²ரிஸ்ஸ சாக³கதா² து³க்கதா²? மச்ச²ரீ, பி⁴க்க²வே, சாக³கதா²ய கச்ச²மானாய அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, சாக³ஸம்பத³ம் அத்தனி ந ஸமனுபஸ்ஸதி ந ச லப⁴தி ததோனிதா³னம் பீதிபாமோஜ்ஜம். தஸ்மா மச்ச²ரிஸ்ஸ சாக³கதா² து³க்கதா².

‘‘கஸ்மா ச, பி⁴க்க²வே, து³ப்பஞ்ஞஸ்ஸ பஞ்ஞாகதா² து³க்கதா²? து³ப்பஞ்ஞோ, பி⁴க்க²வே, பஞ்ஞாகதா²ய கச்ச²மானாய அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, பஞ்ஞாஸம்பத³ம் அத்தனி ந ஸமனுபஸ்ஸதி, ந ச லப⁴தி ததோனிதா³னம் பீதிபாமோஜ்ஜம். தஸ்மா து³ப்பஞ்ஞஸ்ஸ பஞ்ஞாகதா² து³க்கதா². இமேஸம் கோ², பி⁴க்க²வே, பஞ்சன்னம் புக்³க³லானம் கதா² து³க்கதா² புக்³க³லே புக்³க³லம் உபனிதா⁴ய.

‘‘பஞ்சன்னம், பி⁴க்க²வே, புக்³க³லானம் கதா² ஸுகதா² புக்³க³லே புக்³க³லம் உபனிதா⁴ய. கதமேஸம் பஞ்சன்னம்? ஸத்³த⁴ஸ்ஸ, பி⁴க்க²வே, ஸத்³தா⁴கதா² ஸுகதா²; ஸீலவதோ ஸீலகதா² ஸுகதா²; ப³ஹுஸ்ஸுதஸ்ஸ பா³ஹுஸச்சகதா² ஸுகதா²; சாக³வதோ சாக³கதா² ஸுகதா²; பஞ்ஞவதோ பஞ்ஞாகதா² ஸுகதா².

‘‘கஸ்மா ச, பி⁴க்க²வே, ஸத்³த⁴ஸ்ஸ ஸத்³தா⁴கதா² ஸுகதா²? ஸத்³தோ⁴, பி⁴க்க²வே, ஸத்³தா⁴கதா²ய கச்ச²மானாய நாபி⁴ஸஜ்ஜதி ந குப்பதி ந ப்³யாபஜ்ஜதி ந பதித்தீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸத்³தா⁴ஸம்பத³ம் அத்தனி ஸமனுபஸ்ஸதி லப⁴தி ச ததோனிதா³னம் பீதிபாமோஜ்ஜம். தஸ்மா ஸத்³த⁴ஸ்ஸ ஸத்³தா⁴கதா² ஸுகதா².

‘‘கஸ்மா ச, பி⁴க்க²வே, ஸீலவதோ ஸீலகதா² ஸுகதா²? ஸீலவா, பி⁴க்க²வே, ஸீலகதா²ய கச்ச²மானாய நாபி⁴ஸஜ்ஜதி ந குப்பதி ந ப்³யாபஜ்ஜதி ந பதித்தீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸீலஸம்பத³ம் அத்தனி ஸமனுபஸ்ஸதி, லப⁴தி ச ததோனிதா³னம் பீதிபாமோஜ்ஜம். தஸ்மா ஸீலவதோ ஸீலகதா² ஸுகதா².

‘‘கஸ்மா ச, பி⁴க்க²வே, ப³ஹுஸ்ஸுதஸ்ஸ பா³ஹுஸச்சகதா² ஸுகதா²? ப³ஹுஸ்ஸுதோ, பி⁴க்க²வே, பா³ஹுஸச்சகதா²ய கச்ச²மானாய நாபி⁴ஸஜ்ஜதி ந குப்பதி ந ப்³யாபஜ்ஜதி ந பதித்தீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, ஸுதஸம்பத³ம் அத்தனி ஸமனுபஸ்ஸதி, லப⁴தி ச ததோனிதா³னம் பீதிபாமோஜ்ஜம். தஸ்மா ப³ஹுஸ்ஸுதஸ்ஸ பா³ஹுஸச்சகதா² ஸுகதா².

‘‘கஸ்மா ச, பி⁴க்க²வே, சாக³வதோ சாக³கதா² ஸுகதா²? சாக³வா, பி⁴க்க²வே, சாக³கதா²ய கச்ச²மானாய நாபி⁴ஸஜ்ஜதி ந குப்பதி ந ப்³யாபஜ்ஜதி ந பதித்தீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, சாக³ஸம்பத³ம் அத்தனி ஸமனுபஸ்ஸதி, லப⁴தி ச ததோனிதா³னம் பீதிபாமோஜ்ஜம். தஸ்மா சாக³வதோ சாக³கதா² ஸுகதா².

‘‘கஸ்மா ச, பி⁴க்க²வே, பஞ்ஞவதோ பஞ்ஞாகதா² ஸுகதா²? பஞ்ஞவா, பி⁴க்க²வே, பஞ்ஞாகதா²ய கச்ச²மானாய நாபி⁴ஸஜ்ஜதி ந குப்பதி ந ப்³யாபஜ்ஜதி ந பதித்தீ²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. தம் கிஸ்ஸ ஹேது? தஞ்ஹி ஸோ, பி⁴க்க²வே, பஞ்ஞாஸம்பத³ம் அத்தனி ஸமனுபஸ்ஸதி லப⁴தி ச ததோனிதா³னம் பீதிபாமோஜ்ஜம். தஸ்மா பஞ்ஞவதோ பஞ்ஞாகதா² ஸுகதா². இமேஸம் கோ², பி⁴க்க²வே, பஞ்சன்னம் புக்³க³லானம் கதா² ஸுகதா² புக்³க³லே புக்³க³லம் உபனிதா⁴யா’’தி. ஸத்தமம்.