(13) 3. கி³லானவக்³கோ³

1. கி³லானஸுத்தம்

121. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன கி³லானஸாலா தேனுபஸங்கமி. அத்³த³ஸா கோ² ப⁴க³வா அஞ்ஞதரம் பி⁴க்கு²ம் து³ப்³ப³லம் கி³லானகம்; தி³ஸ்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி –

‘‘யம் கிஞ்சி [யம் கிஞ்சி (ஸ்யா. கம்.)], பி⁴க்க²வே, பி⁴க்கு²ம் து³ப்³ப³லம் [பி⁴க்க²வே து³ப்³ப³லம் (ஸீ. ஸ்யா. கம். பீ.)] கி³லானகம் பஞ்ச த⁴ம்மா ந விஜஹந்தி, தஸ்ஸேதம் பாடிகங்க²ம் – ‘நசிரஸ்ஸேவ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதீ’’’தி.

‘‘கதமே பஞ்ச? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதஸஞ்ஞீ [ஸப்³ப³த்த²பி ஏவமேவ தி³ஸ்ஸதி], ஸப்³ப³ஸங்கா²ரேஸு அனிச்சானுபஸ்ஸீ, மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. யம் கிஞ்சி, பி⁴க்க²வே, பி⁴க்கு²ம் து³ப்³ப³லம் கி³லானகம் இமே பஞ்ச த⁴ம்மா ந விஜஹந்தி, தஸ்ஸேதம் பாடிகங்க²ம் – ‘நசிரஸ்ஸேவ ஆஸவானம் க²யா…பே… ஸச்சி²கத்வா உபஸம்பஜ்ஜ விஹரிஸ்ஸதீ’’’தி. பட²மம்.

2. ஸதிஸூபட்டி²தஸுத்தம்

122. ‘‘யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா பஞ்ச த⁴ம்மே பா⁴வேதி பஞ்ச த⁴ம்மே ப³ஹுலீகரோதி, தஸ்ஸ த்³வின்னம் ப²லானம் அஞ்ஞதரம் ப²லம் பாடிகங்க²ம் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா.

‘‘கதமே பஞ்ச? இத⁴, பி⁴க்க²வே, பி⁴க்கு²னோ அஜ்ஜ²த்தஞ்ஞேவ ஸதி ஸூபட்டி²தா ஹோதி த⁴ம்மானம் உத³யத்த²கா³மினியா பஞ்ஞாய, அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ. யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா இமே பஞ்ச த⁴ம்மே பா⁴வேதி இமே பஞ்ச த⁴ம்மே ப³ஹுலீகரோதி, தஸ்ஸ த்³வின்னம் ப²லானம் அஞ்ஞதரம் ப²லம் பாடிகங்க²ம் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா’’தி. து³தியம்.

3. பட²மஉபட்டா²கஸுத்தம்

123. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானோ தூ³பட்டா²கோ [து³பட்டா²கோ (ஸ்யா. கம். பீ. க.) மஹாவ. 366] ஹோதி. கதமேஹி பஞ்சஹி? அஸப்பாயகாரீ ஹோதி, ஸப்பாயே மத்தம் ந ஜானாதி, பே⁴ஸஜ்ஜம் நப்படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ ந யதா²பூ⁴தம் ஆபா³த⁴ம் ஆவிகத்தா ஹோதி அபி⁴க்கமந்தம் வா அபி⁴க்கமதீதி படிக்கமந்தம் வா படிக்கமதீதி டி²தம் வா டி²தோதி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் [திப்பானம் (ஸீ.) மஹாவ. 366] க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானோ தூ³பட்டா²கோ ஹோதி.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானோ ஸூபட்டா²கோ ஹோதி. கதமேஹி பஞ்சஹி? ஸப்பாயகாரீ ஹோதி, ஸப்பாயே மத்தம் ஜானாதி, பே⁴ஸஜ்ஜம் படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தம் ஆபா³த⁴ம் ஆவிகத்தா ஹோதி அபி⁴க்கமந்தம் வா அபி⁴க்கமதீதி படிக்கமந்தம் வா படிக்கமதீதி டி²தம் வா டி²தோதி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானோ ஸூபட்டா²கோ ஹோதீ’’தி. ததியம்.

4. து³தியஉபட்டா²கஸுத்தம்

124. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானுபட்டா²கோ நாலம் கி³லானம் உபட்டா²தும். கதமேஹி பஞ்சஹி? நப்படிப³லோ ஹோதி பே⁴ஸஜ்ஜம் ஸம்விதா⁴தும்; ஸப்பாயாஸப்பாயம் ந ஜானாதி, அஸப்பாயம் உபனாமேதி, ஸப்பாயம் அபனாமேதி; ஆமிஸந்தரோ கி³லானம் உபட்டா²தி, நோ மேத்தசித்தோ; ஜேகு³ச்சீ² ஹோதி உச்சாரம் வா பஸ்ஸாவம் வா வந்தம் வா கே²ளம் வா நீஹரிதும்; நப்படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் [ஸமாதா³பேதும் (?) மஹாவ. 366] ஸமுத்தேஜேதும் ஸம்பஹம்ஸேதும். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானுபட்டா²கோ நாலம் கி³லானம் உபட்டா²தும்.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானுபட்டா²கோ அலம் கி³லானம் உபட்டா²தும். கதமேஹி பஞ்சஹி? படிப³லோ ஹோதி பே⁴ஸஜ்ஜம் ஸம்விதா⁴தும்; ஸப்பாயாஸப்பாயம் ஜானாதி, அஸப்பாயம் அபனாமேதி, ஸப்பாயம் உபனாமேதி; மேத்தசித்தோ கி³லானம் உபட்டா²தி, நோ ஆமிஸந்தரோ; அஜேகு³ச்சீ² ஹோதி உச்சாரம் வா பஸ்ஸாவம் வா வந்தம் வா கே²ளம் வா நீஹரிதும்; படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேதும். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானுபட்டா²கோ அலம் கி³லானம் உபட்டா²து’’ந்தி. சதுத்த²ம்.

5. பட²மஅனாயுஸ்ஸாஸுத்தம்

125. ‘‘பஞ்சிமே, பி⁴க்க²வே, த⁴ம்மா அனாயுஸ்ஸா. கதமே பஞ்ச? அஸப்பாயகாரீ ஹோதி, ஸப்பாயே மத்தம் ந ஜானாதி, அபரிணதபோ⁴ஜீ ச ஹோதி, அகாலசாரீ ச ஹோதி, அப்³ரஹ்மசாரீ ச. இமே கோ², பி⁴க்க²வே, பஞ்ச த⁴ம்மா அனாயுஸ்ஸா.

‘‘பஞ்சிமே, பி⁴க்க²வே, த⁴ம்மா ஆயுஸ்ஸா. கதமே பஞ்ச? ஸப்பாயகாரீ ஹோதி, ஸப்பாயே மத்தம் ஜானாதி, பரிணதபோ⁴ஜீ ச ஹோதி, காலசாரீ ச ஹோதி, ப்³ரஹ்மசாரீ ச. இமே கோ², பி⁴க்க²வே, பஞ்ச த⁴ம்மா ஆயுஸ்ஸா’’தி. பஞ்சமம்.

6. து³தியஅனாயுஸ்ஸாஸுத்தம்

126. ‘‘பஞ்சிமே, பி⁴க்க²வே, த⁴ம்மா அனாயுஸ்ஸா. கதமே பஞ்ச? அஸப்பாயகாரீ ஹோதி, ஸப்பாயே மத்தம் ந ஜானாதி, அபரிணதபோ⁴ஜீ ச ஹோதி, து³ஸ்ஸீலோ ச, பாபமித்தோ ச. இமே கோ², பி⁴க்க²வே, பஞ்ச த⁴ம்மா அனாயுஸ்ஸா.

‘‘பஞ்சிமே, பி⁴க்க²வே, த⁴ம்மா ஆயுஸ்ஸா. கதமே பஞ்ச? ஸப்பாயகாரீ ஹோதி, ஸப்பாயே மத்தம் ஜானாதி, பரிணதபோ⁴ஜீ ச ஹோதி, ஸீலவா ச, கல்யாணமித்தோ ச. இமே கோ², பி⁴க்க²வே, பஞ்ச த⁴ம்மா ஆயுஸ்ஸா’’தி. ச²ட்ட²ம்.

7. வபகாஸஸுத்தம்

127. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நாலம் ஸங்க⁴ம்ஹா வபகாஸிதும் [வி + அப + காஸிதும் = வபகாஸிதும்]. கதமேஹி பஞ்சஹி? இத⁴, பி⁴க்க²வே, பி⁴க்கு² அஸந்துட்டோ² ஹோதி இதரீதரேன சீவரேன, அஸந்துட்டோ² ஹோதி இதரீதரேன பிண்ட³பாதேன, அஸந்துட்டோ² ஹோதி இதரீதரேன ஸேனாஸனேன, அஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, காமஸங்கப்பப³ஹுலோ ச விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² நாலம் ஸங்க⁴ம்ஹா வபகாஸிதும்.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் ஸங்க⁴ம்ஹா வபகாஸிதும். கதமேஹி பஞ்சஹி? இத⁴, பி⁴க்க²வே, பி⁴க்கு² ஸந்துட்டோ² ஹோதி இதரீதரேன சீவரேன, ஸந்துட்டோ² ஹோதி இதரீதரேன பிண்ட³பாதேன, ஸந்துட்டோ² ஹோதி இதரீதரேன ஸேனாஸனேன, ஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, நேக்க²ம்மஸங்கப்பப³ஹுலோ [ந காமஸங்கப்பப³ஹுலோ (க.)] ச விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அலம் ஸங்க⁴ம்ஹா வபகாஸிது’’ந்தி. ஸத்தமம்.

8. ஸமணஸுக²ஸுத்தம்

128. ‘‘பஞ்சிமானி, பி⁴க்க²வே, ஸமணது³க்கா²னி. கதமானி பஞ்ச? இத⁴, பி⁴க்க²வே, பி⁴க்கு² அஸந்துட்டோ² ஹோதி இதரீதரேன சீவரேன, அஸந்துட்டோ² ஹோதி இதரீதரேன பிண்ட³பாதேன, அஸந்துட்டோ² ஹோதி இதரீதரேன ஸேனாஸனேன, அஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, அனபி⁴ரதோ ச ப்³ரஹ்மசரியம் சரதி. இமானி கோ², பி⁴க்க²வே, பஞ்ச ஸமணது³க்கா²னி.

‘‘பஞ்சிமானி, பி⁴க்க²வே, ஸமணஸுகா²னி. கதமானி பஞ்ச? இத⁴, பி⁴க்க²வே, பி⁴க்கு² ஸந்துட்டோ² ஹோதி இதரீதரேன சீவரேன, ஸந்துட்டோ² ஹோதி இதரீதரேன பிண்ட³பாதேன, ஸந்துட்டோ² ஹோதி இதரீதரேன ஸேனாஸனேன, ஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, அபி⁴ரதோ ச ப்³ரஹ்மசரியம் சரதி. இமானி கோ², பி⁴க்க²வே, பஞ்ச ஸமணஸுகா²னீ’’தி. அட்ட²மம்.

9. பரிகுப்பஸுத்தம்

129. ‘‘பஞ்சிமே, பி⁴க்க²வே, ஆபாயிகா நேரயிகா பரிகுப்பா அதேகிச்சா². கதமே பஞ்ச? மாதா [மாதரம் (க.)] ஜீவிதா வோரோபிதா ஹோதி, பிதா [பிதரம் (க.)] ஜீவிதா வோரோபிதோ [வோரோபிதா (க.)] ஹோதி, அரஹம் [அரஹந்தம் (க.), அரஹா (ஸ்யா.)] ஜீவிதா வோரோபிதோ ஹோதி, ததா²க³தஸ்ஸ து³ட்டே²ன சித்தேன லோஹிதம் உப்பாதி³தம் ஹோதி, ஸங்கோ⁴ பி⁴ன்னோ ஹோதி. இமே கோ², பி⁴க்க²வே, பஞ்ச ஆபாயிகா நேரயிகா பரிகுப்பா அதேகிச்சா²’’தி. நவமம்.

10. ப்³யஸனஸுத்தம்

130. ‘‘பஞ்சிமானி, பி⁴க்க²வே, ப்³யஸனானி. கதமானி பஞ்ச? ஞாதிப்³யஸனம், போ⁴க³ப்³யஸனம், ரோக³ப்³யஸனம், ஸீலப்³யஸனம், தி³ட்டி²ப்³யஸனம். ந, பி⁴க்க²வே, ஸத்தா ஞாதிப்³யஸனஹேது வா போ⁴க³ப்³யஸனஹேது வா ரோக³ப்³யஸனஹேது வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி. ஸீலப்³யஸனஹேது வா, பி⁴க்க²வே, ஸத்தா தி³ட்டி²ப்³யஸனஹேது வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி. இமானி கோ², பி⁴க்க²வே, பஞ்ச ப்³யஸனானி.

‘‘பஞ்சிமா, பி⁴க்க²வே, ஸம்பதா³. கதமா பஞ்ச? ஞாதிஸம்பதா³, போ⁴க³ஸம்பதா³, ஆரோக்³யஸம்பதா³, ஸீலஸம்பதா³, தி³ட்டி²ஸம்பதா³. ந, பி⁴க்க²வே, ஸத்தா ஞாதிஸம்பதா³ஹேது வா போ⁴க³ஸம்பதா³ஹேது வா ஆரோக்³யஸம்பதா³ஹேது வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. ஸீலஸம்பதா³ஹேது வா, பி⁴க்க²வே, ஸத்தா தி³ட்டி²ஸம்பதா³ஹேது வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. இமா கோ², பி⁴க்க²வே, பஞ்ச ஸம்பதா³’’தி. த³ஸமம்.

கி³லானவக்³கோ³ ததியோ.